رواية رماني حظي العاثر عليه قلت ما أبيه و أتاريني ميته فيه الفصل الخامس والثلاثون 35 - بقلم Misoo

.. في بيت أبو زهرة .. وخصوصاً بـ غرفتها .. منسدحة على السرير وهي تضحك .. زهرة: هههههه يا حبي لك والله .. أقول أحمدي
أحمد: يا عيووونه وروووحه كله فدااا لج أمري وتدللي
زهرة بوناسة: لما بكرة راح تيي وتخطبني من أبوي شنو راح تقول له .. أقصد من وين جفتني وعرفتني؟؟
أحمد بتفكير:أممم عادي بقول هي صديقة وضحى وأنا كذا مرة جفتها وفي كل مرة أجوفها فيه قلبي يرتبش وأحس إن بيطلع من مكانه يا ويلـي ويلاااه أحتاس وأنا الدنيا وكأنه مافي حد موجود غيري وغيرها .. بقول له تكفى أرحم حالي أنا تراني هاوي بنتك وإذا ما خذتها راح أنجن
زهرة وهي طايرة من الفرح: واااي واااي وناااسة كل هـ الكثر تحبني أحس نفسي بطيررررر
بإستهبال ..أحمد: عاد خذيني معاج أطير ترى من دونج أنا مقوى
صدقت روحها زيادة .. زهرة:لاا تخاف وين ما أروح راح تكون معاي ما راح أخليك أبداً

.. في بيت أبو جاسم .. نزلت وهي تسمع صوت ضحك .. عقدت حواجبها مستغربه .. دخل الصالة وانصدمت بـ إلي موجودة وقاعدة تسولف وتضحك .. وشوي وشوي بدا يتهلل وجها من الوناسة ..
أم جاسم: نهــى ..! وأنا اقول البيت منور
قامت وهي تبتسم .. نهى: يمااا وحشتيني مووووت
ضمت بنتها وعيونها تدمع .. أم جاسم: والله مو كثري يا قلبي مو كثري .. شخبارج عيوني وشخبار سامي .. إلاا على طاري سامي وينه فيه؟؟
ابتسم وهي تقعد يمها .. نهى: أنا بخير وسامي بعد بخير .. وهو نزلني وراح عشان آخذ راحتي معاكم وبعدين راح إيي
أم جاسم بتسائل: متى رجعتي من السفر
حضنت يد أمها .. نهى:من الساعة 12 إلاا .. وعلى الساعة 2 ونص ييت وما حصلت غير منوي صاحية
لف لها وهي عاقدة حواجبها ..أم جاسم:وليش ما قعدتيني؟؟
هزت كتوفها .. منى: وأنا شـدراني .. قلت لما تقعدون تجوفونها ما حبيت أخرب عليكم نومكم .. إلاا أبوي وينه؟؟ للحين نايم؟؟
أم جاسم:لااا قبل لاا أنزل صحيته بعد شوي بينزل

.. في لندن .. في شقة خالد .. كانوا قاعدين سوالف وضحك .. وليد: تخيلوا وأنا ماشي إلاا بذيج البنت إلي تدعم فيني وكنت بطيح عليها بس نوافوا الحمار يودني .. قالت لي سوري ..وأنا متعشم إنها أجنبية كان أقول إلي بخاطري لها آآخ لو بس طايح عليج مو كان أحسن إلي ما أجوف غير ويهه البنت ينقلب أحمر وهي تقول بعصبية قليل أدب
الكل: ههههههههههههههههههههههههه
نواف:ههه وقسم كان شكل وليد في ذاك الوقت يفطس من الضحك
وليد وهو يضحك: هههههههه وقسم انحرجت لما طلعت البنت تفهم عربي
خالد شوي وينسدح في الأرض من الضحك:ههههههههه هذا درس لك علشان ما تتعلف في البنات
طرت على باله "ريما" .. ابتسم جاسم: والله حاس فيك لأن هـ الموقف صار لي من قبل
نواف بلقافة: جد متى وشلون
توهق وهو يحك راسه .. جاسم وهو يحاول يضيع السالفه: من زمان .. إلاا خويلد بسألك إنت مغير لون الجدران؟؟
خالد وهو يبتسم: إي توك ملاحظ؟؟
جاسم بإبتسامه:بصراحة إي
خالد: شرايك بلونها الحين أحلى وإلا إلي قبل
جاسم بتفكير: لاا الحين أحلى أساساً اللون موسع لك الصاله أكثر
وكأنه تذكر شي .. خالد: إيي تعال إنت من خذت شقتك الجديده وما جفناها .. حتى مكانها ما ندله
وليد: إي والله
نواف: شرايكم شباب اليوم السهرة عند جويسم
وليد وخالد:إي ليش لاا
توهق وحس نفسه إن اليوم مفضوح مفضوح ..

.. في شقة .. قاعدة تدرس بـ الصالة .. فجأة سمعت صوت فتح الباب وصوت صريخ وازعاج .. عقدت حواجبها بإستغراب .. كان يحاول يسكر الباب يمنعهم من الدخول .. نواف من ورا الباب: هههه بدخل بدخل
وليد: وخر يا جويسم خل نجوف عفيسك
خالد: هههههه محد قال لك ما تنظف شقتك قبل لاا تطلع
يدز الباب يحاول يمنعهم من الدخول .. جاسم وهو متوهق: قلت لكم دقايق انظفها على السريع إنتوا تعرفون إني ما أحب أحد يجوف مكاني معفوس
.. وبكل قوة دز الباب وقدر يسكره .. قفلاه وهم صاروا يضربون الباب ويصرخون عليه يفتح .. نزلت كتابها وقامت واقفة .. جافته يدخل وهو مرتبش .. جاسم بأمر: أغراض هذي كلها شيليها بسررعة ودخلي غرفتج وقفلي عليج الباب وإياني إياج أسمع لج حس
عقدت حواجبها بإستنكار ..ريما: شنوو؟؟
جاسم وهو يسمع ازعاجهم : هذولاا خالد ونواف و وليد عند الباب يبون يدخلون بسرعه تكفين خلصيني
ريما بقهر: طيب كان ممكن تقول لي جذي من الأول مو تتفلسف علي وتهدد تراني مو خدامة عندك .. صج متخلف ..
تهففت وهي تلم كتبها وأوراقها وتدخل الغرفة وتسكر الباب بقوة وتقفله .. انقهر منها بس سكت وتمالك نفسه علشان لاا ينفضح .. راح وفتح لهم الباب إلي كان شوي وينكسر من كثر ما كانوا يرافسون فيه ويطقونه ..
جاسم بقهر: صج هيلق (يعني جنقل) .. أحد يطق الباب جذي ؟؟
نواف وهو يضحك: ههههههههه محد قال لك يا رجال تنقعنا بره
وليد وهو يضرب كفه بكف خالد: مسوي حالك مرتب هههههههه
.. دخلوا الشقة وهم يناظرون بـ الأثاث وإستايل الشقة .. خالد بإبتسامه: شقتك كبيرة ما شاء الله
قعد على الكنبة مكان ما كانت جالسة ريما .. طاحت عينه على الكوب إلي فيه أحمر شفايف .. بهت لونه وعلى طول خذا الكوب واقف وتجه للمغسله إلي في المطبخ المفتوح على الصالة وغسل الكوب وهو يدعي في قلبه عليها .. وفي نفسه "حسب يالله على بليسج يا ريمو كان إنج بتفضحيني اليوم"..
.. جاسم : قعدوا شفيكم واقفين ؟؟
قعد خالد وظلوا وليد ونواف واقفين .. ناظرهم وهم عاقد حواجبه بإستغراب .. جاسم: شفيكم؟؟
وليد وهو يناظر نواف: خل نفتش شقته
اتسعت ابتسامته .. نواف: خوش فكرة يلاا
اتسعت عيونه بصدمة .. جاسم: خيرر أقول كل واحد يحترم نفسه وينثبر
ما عطوا بال وصاروا يفتشون ويجوفون شنو عنده وشنو ما عنده .. دخلوا غرفته والحمامين (انتوا والكرامه) إلي واحد بـ الصالة و واحد بغرفته و المخزن والمطبخ حتى الثلااجة فتحوها يناظرون شنو موجود داخلها ..
كان يناظرهم وهو يضحك .. خالد: حشى يهال أنتوا ؟؟
صب قلبه لما جاف نواف و وليد وهم يحاولون يفتحون غرفة ريما ..
نواف:إلاا بسألك جويسم ليش قافل الغرفة ذي؟؟
قلبه طاح في بطنه .. ارتبك وما عرف شنو يسوي أو بـ شنو يبرر .. ناظرهم يناظرونه ينتظرون جواب منه .. وفجأة خطرت له فكره .. جاسم: لو قلت لكم ما راح تصدقوني
وليد بفضول: قول ونحن بعدها راح نحكم نصدق أو لا
جاسم: الغرفة هذي مسكونة
انتفضوا برعب .. نواف و وليد: شنووووو..!!
على طول راحوا وقعدوا يم خالد إلي استغرب: وإنت شلون تاخذ شقة مسكونه؟؟
هز راسه بنفي .. جاسم: مو كل الشقة بس هذي الغرفة مسكونة .. أنا لما جفت الشقة عجبتني حيل .. وقلت أبيها .. عاد قال لي راعي العمارة إن الغرفة هذي مسكونه ساكنتها وحده وما راح تأذيك كله قاعدة بالغرفة وما تطلع منها خير شر
بلع ريجه .. نواف: قط مرة جفتها أو سمعت صوت داخل الغرفة أو كلمتك
هز راسه بـ إي .. جاسم: كل يوم في الليل تصرخ وبعدها تهدا (قال هـ الكلام بس علشان يقنعهم وله هو بالأصل ما يعرف إن كان صوت الإصراخ إلي يسمعه حقيقة ولاا هو يتوهم) .. سعات أحس بحركة وأسمع صوت أشياء تتحرك داخل الغرفة بس ما أعطي للموضوع أي بال
وليد: اللهم سكنهم في مساكنهم .. شلون مستحمل تنام بـ مكان وهم فيه
.. كانت واقفة عند الباب تسمع الحوار إلي دار بينهم .. انصعقت من إلي سمعته وفي نفسها "معقولـة ..!!"

.. في البحرين .. في بيت أبو جاسم .. كانوا قاعدين على السفرة يتعشون .. وطبعاً بعد ما انضم لهم سامي .. أبو جاسم: دريتوا إن مبارك حمد الـ.. خطب منى
شرقت بـ العصير .. منى: كح كح
أم جاسم وهي تناظره بغيض: الله .. شربي ماي حبيبتي شربي
ناظرته من طرف عيونها .. نهى:...................
سامي بإبتسامه: وأكيد أنت رديته لأن منى توها صغيره على الزواج
رفع حاجب وهو مو عاجبه الكلام .. أبو جاسم: وليش أرده بـ العكس أنا عطيته الموافقة من زمان
وقفت وهي فاتحة عيونها ندهشة .. منى: شنووو..! بس يبا أنا للحين ما قلت لك رايي .. أنا بصراحة يا يبا ماني موافقة عليه .. صليت واستخرت وما أرتحت أبد حسيت بضيقة ويوم نمت كل شوي افزع من الكوابيس
أبو جاسم وهو معصب: بس أنا صليت استخارة يوم اخترته لج
عصبت وانقهرت .. نهى: ليش أنت إلي بتتزوج ولاا هي علشان تصلي بدالها الاستخارة .. يبا حرام عليك ترخص فيها تراها بنتك .. لاتـ..
قاطعها بصوته الحاد .. وهو ينزل القفشه بـ الصحن .. أبو جاسم: جب واا كلمة هذا إلي قاصر بعد تحاسبيني ..ترى محد له كلمة من بعد كلمتي .. منى لـ مبارك ومبارك لـ منى ..
بعد ما قال إلي عنده تركهم وطلع من غرفة الطعام .. انقهرت وهي تقوم من السفرة وتطلع من غرفة الطعام وهي تتحلطم .. أما هو فـ هز راسه بـأسى من تفكير عمه .. سامي: الله يهديه
دمعت عيونها بقهر على حال بنتها .. أم جاسم: حسب يالله ونعم الوكيل .. حسب يالله ونعم الوكيل
نهى بغضب: والله شكلنا مالنا مكانه عنده علشان جذي يرخص فينه
.. قامت وراحت لـ أختها تواسيها ..


نهاية البارت