رواية رماني حظي العاثر عليه قلت ما أبيه و أتاريني ميته فيه الفصل الثامن 8 - بقلم Misoo

رفع راسه و يناظر بـ سامي الواقف للحين عند الباب ورافع حاجبه بإستنكار .. جاسم: نهووي الحين بدل ما طاقتها سوالف مع ولد العم .. سلمي على ريلج على الأقل
من سمعت سيرته .. جمدت كل أطرافها .. لفت على وين ما أشر لها جاسم .. وطالعت بـ سامي الواقف ومتكتف ورافع حاجب بإستنكار وكان واضح من هيئته إنه معصب .. بلعت ريجها وبصعوبة .. نهى: سـ ـا مـ ـي
حاول كثر ما يقدر يكتم غيضه .. سامي بقهر: اي شفيج مو مستوعبه؟
حاولت تبين عادي .. نهى وهي تبتسم ببرود عكس إلي بداخلها: سووري والله ما إنتبهت عليك
هز راسه .. سامي: أكيد من لقى أصحابه نسى أحبابه
جاسم وهو يضحك: ههههههه واايد واااثق الأخ .. أقول لاا تحرف الأمثال على كيفك.. من لقى أحبابه نسى أصحابه مو العكس ..
رفع حاجبه ببرود .. سامي: والله كيفي أنا ومرتي أنت شكو
قام وهو مبتسم .. عمر: طيب يا جماعة الأخير أنا استأذن الحين
جاسم: وين؟ تو الناس
عمر : لاا والله عندي شغل .. مرة ثانية إن شاء الله بقعد معاك أكثر
جاسم: أوكي براحتك
عمر: يلاا سلااام
الكل: مع السلامة
.. لف وهو يبتسم جافه يناظر في نهى إلي منزله راسها وتلعب بأناملها .. جاسم: أقووم عيل أريح وأسلم على الوالده مرة وحده .. خذ راحتك البيت بيتك وإعذرني بس بجد تعبان
هز راسه وهو يبتسم .. سامي: لاا عادي معذور
.. تركهم جاسم ورقى فوق يسلم على أمه ويريح ..
سامي بقهر: ممكن أحصل تفسير على إلي صار
بلعت ريجها .. نهى بتوتر ملحوظ: والله أنا ما كنت أدري إن عمر موجود أصلاا تفاجأت فيه
زفر بقهر .. سامي: بس هذا ما يعطيج الحق إنج تقعدين معاه وإنتي مو لاابسه حجاب .. يعني تفاجأتي فيه تقومين من مكانج وتستأذنين مو تقعدين تدقين سوالف معاه
نهى: بس أنا ومنى ما نتحجب عن عيال عمي وخاليني
سامي بنرفزة: قبل بس الحين لااا .. حياتج قبل لاا أنا أرتبط فيج شي مالي دخل فيه .. بس الحين أنا مرتبط فيج وكل شي تسوينه لاازم أكون راضي عنه .. ومن يوم وطالع تتحجبين عنهم حالهم حال أي شخص غريب سااامعه
هزت راسها برضى علشان تتفاده المشاكل .. وتقصر الشر .. نهى: أوكي
استغرب من هدوءها والأكبر من طاعتها ..أول مرة ترد عليه بدون ما تستفزة وتطلعه من طورة .. أول مرة تسوي شي من غير عناد .. ابتسم براحه إن بدا يسيطر على زمام الأمور .. سامي: يلاا أنا ماشي تامريني على شي
رفعت راسها بإستغراب .. أول مرة يتكلم معاها بـ النبره هذي .. ولاا بعد يسألها إذا تبي شي .. هزت راسها بـ لاا .. نهى: لاا سلامتك
سامي بابتسامه: الله يسلمج .. يلاا مع السلامة
نهى بهمس: مع السلاامه

.. في اليوم الثاني ..

.. في بيت أبو سلمى .. من سامحها عمها وهي تحس نفسها طايرة من الفرح .. وطول الوقت ملازمة بنت عمها حتى إنها نامت معاها في الغرفة وهذا نادراً ما يصير .. بسبب كوابيسها .. ريما وهي منحرجه: سوري سلومه لأني فزعتج من نومتج أمس
ابتسمت بعبط.. سلمى: لاا شدعوه بالعكس لاازم أشكرج أول مرة أجرب احساس الرعب هههه
خذت الموسده وحذفتها عليها .. ريما: سخـــيفة وبايخه ومليـقة.. مالت عليج صج انج مو كفو الواحد يتأسف لج
سلمـى: هههههههه والله ما طلبت منج تتأسفين .. وبعدين حمدي ربج إني ما خليتج تبوسين يدي علشان اسامحج
ريما: هه هه هه هه تعرفين تنكتين بعد وأنا ما أدري .. بذمتج متى صارت عندج خفت الدم هذي
سلمى بغرور مصطنع:أصلاا من يوم يومي خفيفة ظل
ريما بسخريه: خير إن شاء الله
سلمى وهي تتنهد: آآه من جد ريموو استفقدتج واستفقدت قعدتج وسوالفج
ريما بابتسامه: والله أنا أكثر ما تتوقعين شكثر مليت .. تخيلي طول الفترة ما كونت صداقة إلاا مع طالبه وحده بس اسمها كرستينا الله يذكرها بالخير كانت مونستني ..
سلمى بوناسه: ما أصدق ريمو تعرفت على وحده .. والله شي جيد أحس سويتي انجاز أنا بصراحة عن نفسي كنت شاكة إنج ممكن تعرفين أحد .. لأنج ما شاء الله واايد اجتماعية
ضربتها على راسها بمزح .. ريما: تتطنزين حضرتج
سلمى وهي تبتسم: ا والله مو قصدي بس انتي واايد انطوائية يعني مو اجتماعية مثلي كل مكان رازة الويه
ريما بتنهيده: آه لاا تذكريني تكفين .. تدري والله لولاا أخوي طلول وكرستينا إلي صحيح ما كنت ذاك الزود أطلع معاها وما أجوفها إلاا في الجامعة بس كان الشي مهون علي وحدتي .. أخوي طلول بعد فديته ما قصر معاي دوم يتصل ويسأل عني وسعات نطلع مع بعض
سلمى: إلاا تعالي قولي لي ما حصلتي صعوبات أو بعض مضايقات
ابتسمت وهي تتذكر الشلة .. ريما: وييي فاااتج نص عمرررج يا سلومه .. تخيلي الكل على باله إني فرنسية ماعدا كرستينا .. ههههه والله سوالف صارت تموت من الضحك .. بس في نفس الوقت حدي منقهرة ومنبطة جبدي .. بس والله ياني متحلفه فيهم
سلمى بتشويق: يااي ونااسة حمستيني . يلاا يلاا بسرعة قوولي
ريما بابتسامه: أوكي سمعي ................ (وقالت لها السالفة كلها)

.. في بيت أبو جاسم .. قاعده تبرد أظافرها وتغني .. نهى: تبي ترحل وتتركني تبي تسافر وتهجرني تعال وقول وش سويت حرام تروح ظالمني .. حرام تروح ظالمنــي ..
أم جاسم وهي متخصرة: أقول يا حلوة متى إن شاء الله ناويه تروحين السوق .. ترى ما بقى شي
نزلت المبرد من يدها .. نهى بملل: متى ما فضيت
رفعت حاجبها باستنكار..أم جاسم: أقوول يا المشغولة قومي بدلي لج ربع ساعة تجهزين نفسج وبعدها بنروح السوق يلااا
هزت راسها وقامت لغرفتها وبدلت ملاابسها ..وبعدها قعدت عند التسريحة .. وتوها بتحط الفونديشن تذكرت سامي .. نهى:أوووف الحين إذا طلعت بدون علمه بيسوي لي سالفه وأنا بغنى عنها ..أوووف يا ربي عيني على مغثته ..
رفعت تلفونها بتدق على رقمه بس تراجعة وقررت تطرش له مسج .. على طول فتحت على رسائل جديده وكتبت له "أنا وأمي طالعين" .. وطرشتها
.. وشوي وصل لها مسج فتحته وكان من سامي "وين؟" .. ردت عليه "السوق" .. رجع وطرش لها "ليش؟؟" .. هي بملل "أوووف شرايك يعني وعرسي بعد شهرين؟؟" .. هو "أولاا كلميني عدل ولاا تتهفهفين .. وثانيا أوكي روحي بس هاا بدون مكياج ولاا عطر وشعرج تغطينه عدل" .. حقرته وقررت ما ترد عليه ولاا تعطيه بال .. نهى في نفسها "زين مني عبرتك صج ما تنعطى ويه".. حطت لها ميك آب خفيف .. وتعطرت بس هم خفيف يعني المفروض إلي يبي يشم عطرها يلصق فيها .. لبست العباية والشيله .. وطبعاً القذله طالعه .. خذت شنطتها وطلعت من الغرفة

.. في بيت أبو سلمى .. بعد ما سردت لها كل السالفه .. ريما بابتسامه: وتوتا توتا وخلصت الحتوتة
سلمى بقهر: واااي حدي تنرفزت منهم شـ السخافة وربي تافهين آآخ بس لو أنا كنت معاج كان أكوفنهم
ريما وهي تضحك: ههههههه يمه يمه منج دفشـة ما فيج أنوثه .. على طول بكوفنهم ههههه
سلمى: تدرين مو بس هم يقهرون حتى إنتي تبطين الجبد آآخ بارده
ريما وهي تبي تقهرها : باردة ولاا حارة هاهاااي
كشت عليها بقهر .. سلمى: يا ملقج يا المليقة
ريما: هههههههه أعصابج بس لاا ينط لج عرج ههههههه
سلمى بملل: أووف غيري السالفة تمللت
ريما:أممم ما عندي شي أقوله خلصت سوالفي
سلمى بتفكير:أممم أممم إي تذكـــرت وضووح
ريما بابتسامه:القاطعه شفيها ؟؟
سلمى بحماس: اتصلت لي أول أمس
ريما بفرح: قولي والله
سلمى على حماسها: والله .. وعطيتها رقمي بعد
ريما وهي رافعه حاجب: انزين ما قالت لج ليش قطعت طول الفترة إلي راحت ؟؟
هزت راسها بـ لاا .. سلمى: نوب نوب .. بس أنا سألتها على السريع وقالت لي من المغثة مافي غيره .. بس إن شاء الله بتزورنا وبتقول لنا كل شي ..
ريما : إن شاء الله والله لها وحشــة .. بس متى بتيي
سلم وهي تبتسم: بعد إسبوعين إن شاء الله لأنما راح تقدر تزورنا كل مرة .. فقلت بعد إسبوعين مرة وحده تيي حفلة ميلاادي .. وااااي ونااااسة ريموووو بصير 17 سنة
ريما: هههههههه وحليلج توج بتدخلين الـ 17 سنة واايد كبرتي الصراحه
سلمى بابتسامه: آآآه ودي الأيام تمشي بسررررعة

.. في مجمع السيتي سنتر .. من محل إلى محل يدورون .. نهى بتعب: والله يمـه تعبت خل نرتاح
أم جاسم: لااا موب الحين لااحقة على الراحة .. وبعدين ترى ما خذيتي شي
نهى بدلع: يـــــمه .. الحين كل ذوله الأكياس إلي بيدي وتقولين ما خذيت شي؟
أم جاسم بإصرار: إي كلها كم بلوزة وبطلون .. وإذا كل يوم بتاخذين لج كم شغله بسيطة وبترتاحين عزت الله بيي عرسج وإنتي للحين ما خلصتي .. يلاا خل ندخل هالمحل ..
نهى بمل: أوك
.. رن تلفونها ورفعته جافت المتصل "سـامي" .. تهففت وحقرته لأن مالها نفس .. وشوي ورجع تلفونها يدق .. بس حقرته وسوته سايلنت لأن زعجها .. وبعد التعب والعناء .. راحت هي وأمها لـ الكوستا يريحون شوي .. طلعت تلفونها جافت 8 مكالمات لم يرد عليها .. ومسجين .. فتحت المكالمات .. وكانت كلها من "سامي" .. ومسجين بعد منه .. الأول "ليش ما تردين ؟؟" .. الثاني "في أي مجمع إنتي" .. نهى في نفسها "أوووف صج لوسه" .. دخلت الرسايل وكتبت له مسج "في الستي سنتر" وطرشته .. وشوي وصل لها مسج منه "أهاا .. طيب خلصتي أو للحين بقى لج وايد؟" .. ردت عليه "لاا باقي لي واايد .. وأكيد مو كل شي بخلصة اليوم" .. رد عليها "طيب عيل 10 دقايق بالكثير بكون عندج .. أنتظرج في الكوستا" .. من قرت المسج خافت .. على طول طرشت له "ليش؟؟ شتبي؟؟" .. رد عليه "لما أيي بتعرفين" .. في هاللحظة تذكرت نهى شكلها وشهقت .. على طول لفت لأمها .. نهى وهي تحاول ما تبين توترها.. وبدلع: مامي حبيبتي أنا بروح الحمام (إنتوا والكرامه)
أم جاسم : أوكي يا قلبي بس لاا تبطين
نهى وهي قايمة:إن شاء الله
.. أول ما دخلت الحمام على طول غسلت ويها .. وبعدها رجعت تحط كحل خفيف ومسكرة وبلشر خوخي فاتج .. ومرطب .. عدلت شيلتها ودخلت كل شعرها .. وطلعت أحلى من ما كانت صار شكلها طفولي ونعوم .. وبعد ما تأكدت من شكلها .. طلعت وراحت قعدت مع أمها .. وكلها دقايق إلاا وهي تجوفه يقبل عليهم .. أم جاسم: مو كأنه هذا ريلج ؟
هزت راسها بأسف .. نهى:إي هذا سامي
ابتسمت وهي تناظره يوقف عندهم .. سامي: السلاام عليكم
أم جاسم بابتسامة: هلاا وعليكم السلاام
نهى بملل: وعليكم السلاام
أم جاسم: شصدفة الحلوة
كان يناظر فيها .. سامي بابتسامة: مو صدفة أنا كنت متواعد مع نهى إني أجوفها هني
ابتسمت وهي تطالع بنتها .. أم جاسم: أهاا ههه وحليلكم .. طيب أنا بخليكم شوي تاخذون راحتكم
سامي بسرعة: لاا وين ؟؟ أفاا وتروحين تقعدين بروحج ما يصير
أم جاسم وهي تقوم: لاا بروح محل للعطور بخذ لي عطر وبرجع ما بتأخر
سامي: براحتج
.. أول ما أختفت أم جاسم عن نظره .. على طول قعد يمها .. سامي: ممكن ترفعين راسج
استغربت طلبه .. ورفعت راسها .. نهى: ممكن أعرف شتبي؟؟
سامي ببرود: لاا بس كنت حاب أتأكد إذا تسمعين الكلاام ولاا بس تستغفليني نفس آخر مرة ..
انقهرت منه .. نهى بسخرية: هاا وشنو طلعت ؟
سامي بنفس بروده: لاا طلعتي شاطرة هالمرة .. مع إن حاطه لج بس خفيف
نهى وهي تحاول تضبط أعصابها: قلتها خفيف .. أنا ما أحب أطلع و ويهي مافيه ولاا شي .. فـ بليــز لاا تحاول تضغط علي أكثر من جذي
سامي وهو يحط ريل على ريل: أممم بفكر
لفت ويها عنه وهي حدهاا منقهرة منه .. وهو ابتسم إن قدر يرفع ضغطها ..

.. بعد اسبـــــــوعيـــــــن ..

.............

.. نهى .. كل يوم تنزل السوق مع أمها تشتري جهازها

.............

.. سامي .. طول وقته بالشغل .. وما قام يتصل ولاا يطرش حتى مسج

.............

.. جاسم .. عايش حياته بطول والعرض بدون أي ضغوط دراسه ..

.............

.. منى .. منكرفه بالدراسة لأن بدت أمتحانات المنتصف .. وما بقى لها غير امتحان واحد وتخلص

.............

.. سلمـى .. نفس حالة منى بس من يومين بدت تجهز حق حفلتها

.............

.. ريما .. كل يوم تكلم طلال ومرتاحة نفسياً وخصوصاً إن المياه رجعت لمجاريها مع عمها إلي بحسبة أبوها وطبعاً في نفس الوقت كانت تجهز مع بنت عمها للحفلة

.............

.. في بيت أبو سلمى .. قاعدين متربعين على الكنبات .. سلمى بوناسـة: واااي أخيراً خلصت امتحانات وبعد بكرة الحفلة يعني يمديني أروح السوق واشتري لي فستان
ريما وهي تبتسم: يا الله شعليج بتصيرين 17
سلمى: ههههههه وااااي حدي مستانســـة
ريما : هههههههه دوم يا قلبي مو بس خمس دقايق
خذت التكية ورمتها عليها .. سلمى: سخيفة
ريما وهي تبتسم: انزين من عزمتي من ربعج
سلمى وهي شاقة الحلج: كل بنات صفي وخواتهم .. وربعي حصه و فاطمة وبثينة و ريم و حنان وشوق و خلود و كوثر و منيرة و سهيلة و شهلااء و رقية و شيخة و عايشة و منار و مريم و...
قاطعتها وهي ميتة ضحك.. ريما: ههههههههههههه بس خلاااص هههههههه الحين يقول كلهم أعرفهم
سلمى: ههههههه شاسوي من الحماااس .. إيي صح ما قلت لج ترى أبو بعد عزم قالي أمس في الليل إنه بيعزم واحد شريك معاه في مشروع رجل أعمال يعني ويبي شوي يقوي العلااقة كثر ما يقدر فقال بيعزم مرته وبناته لحفلتي .. ومنها نتعرف على بناته
ريما: أهاا مو مشكلة أصلاا أحلى كل ما زاد عدد المعازيم زادت الهداية وله؟؟
سلمى بحمااس: أي والله ههههههه
ريما : هههههههههههههههههههه



نـــــــــــهايــــــــــــــــة الــــــــــبارت