رواية رواسي الدهر الفصل الحادي والعشرون 21 - بقلم روح الدليمي

من غير وعي هلهلت بصوت عالي و بجيت. باوع بعيوني نظرات ما عرفت تفسيرهن شنو و طلع من الغرفه بدون ميحجي شي. شمرت الكزاز من ايدي و گعدت بالگاع. تقربوا مني امي و ابويه كل واحد كعد يمي من جهه و اني صرت بنصهم. امي رفعت راسي ليفوك و صارت تباوع على رگبتي و تشوف الجرح. بعدت ايدها عني و حجيت بتعب. "عوفيني امي مابيه شي." "ليش هيج تسوين بروحج؟ ليش تأذين نفسج بهاي الطريقه؟ "لو ممسويه هيج مجان طلگني." مسح على راسي بهدوء و گال.

"و هسه من طلگج ارتاحيتي؟ "عدم وجوده بحياتي راحه جبيره الي." كمت من بيناتهم نمت بفراشي و اردفت بصوت خافت. "طلعوا عوفوني وحدي و من تكعد مسك خليها تجيني." بقوا واكفين يباوعون عليه بنظرات حيره و تساؤل. تجاهلتهم و فريت روحي و غمضت عيوني و نمت. حسيت الصبح على صوت مسك تكعد بيه. "ماما دومي دومي." فتحت عيوني باوعتلها ابتسمتلها و حجيت بصوت ناعس. "روح الماما أنتِ تعاي يمي." "لا الوح ويه بابا بدليلي."

عدلت روحي و كعدت فركت عيوني اريد اصحصح. باوعتلها و گلت. "وينه بابا؟ "يم ددو." "تمام انتظريني هنا هسه اجي اوكي ؟ "اوتي." كعدتها على الجربايه و كمت فتحت الكنتور طلعتلي ملابس و فتت سبحت عسريع و نزلت جوه لكيت رسيم گاعد هوَ و امي و ابويه و يحجون. "صباح الخير." "صباح النور حَبيبتي." "نمتي زين؟ "اول مره انام مرتاحه هيج من يوم الي انخطفت." باوعت لرسيم و اردفت متسائله. "وين تريد تاخذ مسك؟ "للبيت يردون يشوفوها."

"البارحه جانت يمكم يوميه؟ "ب اي وقت يكدرون يشوفوها مثل ما هيَ بنتج بتهم هم." نترت برسيم بصوت عالي. "اعرف شنو تريد أنتَ، تريد تاخذها و تبقيها يمك و تحرمني منها." كام من مكانه و گال بحديه. "اني لو اريد احرمج منها مثل متكولين چان سويتها قبل مو هسه، خليها يمج و اني اخليهم يجون هنا و يشوفوها احسن بس شوفي بنتج و فرحتها لما عرفت حتروح ويايه أنتِ الي جاي تحرميها من ابوها." "جميله كومي بدلي لمسك و جهزيها تروح ويه ابوها."

باوعت لابويه و عيوني دمعت. "ليش من احجي شي تسوون عكسه؟ "لان أنتِ غلط تبقى بنته و اله حق يشوفها و ياخذها وياه شوكت ميريد، أنتِ ردتي الطلاك و طلكج ما مجبور يبقى بعيد عن بنته و لا بنته الها ذنب تبقى بعيده عن ابوها." كامت من مكانها و صعدت فوك. باوعت لابويه بغضب و عفتهم و رحت للمطبخ. جوعانه من البارحه بدون اكل بس على البوب كورن بالسينما. سويت بيض و جبن امي مخدره جاي اصلا بس حميته. همَّ يكعدون من وكت كلش ف يتريكون قبلي.

كملت و كمت غسلت ماعوني و الكوب. صعدت فوك متجاهله امي و ابويه دخلت غرفتي شفت مسك ماكو. عرفت انطوها لرسيم ياخذها وياه. كعدت على الجربايه و فتحت تلفوني انصدمت بكميه الرسائل و المكالمات. و اكثر شي من ماري. دكيت عليها اول ما جاوبتني عاطت بيه. "وينج أنتِ؟ ليش متردين عليه ادبسز." "تلفوني صامت ما سمعته." "رواسي بعد اسبوع عرسي ما اريد تصير مشاكل." حجيت بعدم فهم. "يا مشاكل! شقصدج؟

"ما اريد رسيم يسويلج مشكله، من شوكت تطلعين ويه دِلهَام وحدكم؟ "اول مره نطلع وحدنه كله وياكم." "و برأيج صح طلعتج وياه و أنتِ متزوجه؟ "ترا ما بيها شي رحنه سينما و رجعنه شبيكم سويتوها سالفه! عاطت بيه بعصبيه. "لتبقين غبيه غلط و كلش غلط هم." حجيت بنفاذ صبر. "اذا ماكو شي بعد اني راح اسده." "اجيج والله اگلب الدنيا فوك راسج! "ماري رسيم طلگني." بقت ساكته ما حجت شي اردفت. "وينج هيوو." "وياج بس انصدمت شلون طلگج؟

"سويت فلم هندي و خليته يطلگني." "لا أنتِ لازم اكون يمج و اسمع السالفه لايف حتى اذا مسويه شي طايح حظه تنكفخين مني، اصبريلي ابدل و اجيج." ضحكت و رديت. "اي يلا تعالي حتى نطلع سوه اريد اشتري فستان للحنه و العرس بعدني كلشي ما اخذت." "يلا ساعه و اني يمج." "تمام." سديته منها و كمت نزلت جوه جبت عده التنظيف و رجعت للغرفه نظفتها كلها من الكزاز و غيرت الشراشف و عطرتها و اخر شي بدلت ملابسي حتى من تجي ماري نطلع بدون تأخير.

وكفت كدام المرايه احط مكياج و دك تلفوني باوعت رشا دتتصل عليه. رديت عليها و فتحت سبيكر. "هلا حبي شلونج." "الحمدلله عُمري و أنتِ." "بخير." "رسيم گال حتجين اليوم." "ما اعرف والله اشوف بلكي المغرب اجي." "مو متعرفين تجين و غصب عنج مشتاقيلج هوايه من يوم الرحتي ما اجيتي يمنه." شلت الحمره بيدي حطيت منها و حجيت. "رسيم طلكني كاللكم؟ "اي گال و كلش انقهرنا چان عدنه امل انو ترجعون سوه."

"هوَ واحد مريض نفسي رسيم سايكو والله، تعبني هوايه ما اكدر ارجع و اكون وياه." "الله يكتبلكم الي بي خير و يسعدكم ثنينكم." "امين، صدك عذاري شلونها صار فتره ماكو." "مريضه كلش و بس نايمه حتى علاوي يمي اني اهتم بي ويه ابني." "شبيها ليش؟ "صار عدها جرثومه بالمعده و هاده حيلها فد مره." "يااا خطيه ماعدها غير العافيه يارب." "الله يعافيج گلبي." باوعت لتلفوني ماري دتتصل عليه.

"حَبيبي اني لازم اروح هسه سلمي على الكل و ان شاء الله احاول اجي اليوم." "الله يسلمج حبي ننتظرج." سديته منها و رجعت دكيت على ماري. "هاا اجيتي؟ "اي اني بَره تطلعين لو ادخل؟ "لا تعاي بعد وكت على السوك." "تمام فتحيلي الباب." سديته و نزلت فتحت الباب بقيت انتظرها تنزل من سيارتها. نزلت تحجي بالتلفون و معصبه وصلت يمي و عاطت على الي دتحجي وياه.

"انجب و لتحجي كلمه زايده والله اذا اعرف أنتَ حاجي بهذا الموضوع اطيح حظك، ما احترمك اذا تبقى بهاي سوالفك يلا ولي ببيت العالم اني." سدته و تقربت عليه حضنتني و گالت. "سوري صارت بوجهج بس نرفزني الحقير." "عادي يمعوده بس منو هذا ادم؟ "لا اخويه المطي." ضحكت عليها و دخلنا جوه سلمت على امي و كعدت يمها تسولف هيَ وياها.

عفتهم و رحت للمطبخ طلعت ببسي صبيت و حطيت كيك الي و الها رتبتهم بالصينيه اخذتها و رجعت يمهم وكفت بباب الصاله و گلت. "امشي نصعد بغرفتي احسن." "لا خلي نكعد هنا ويه خاله." "خليج گاعده اني صاعده فوك." درت روحي اريد اروح استوقفتني امي و گالت. "زعلانه مني ؟ "لا تعودت." كامت من مكانها اجت يمي باستني من راسي و گالت. "منريد نزعلج احنه كل الي يهمنا سعادتج بس رسيم من حقه ياخذ بنته وياه و يشوفها هوَ و اهله شوكت ميريدون."

"مو بس هذا الموضوع امي كومه سوالف كومه." اخذت الصينيه مني و سحبتني بيدها الثانيه دخلتني للصاله كعدت على القنفه، حطت الصينيه على الطبله و خلت كلاص ببسي و صحن كيك كدام ماري و الثاني خلته كدامي. كعدت يمي و گالت. "ماري صديقتج مو غريبه راح احجي كدامها و هيَ تحكم." "شبيكم شصاير؟ "لان رسيم راد ياخذ مسك وياه هيَ ما قبلت و احنه خليناه ياخذها ابوها و من حقه غلطانين بتصرفنه ؟ هزت راسها ب "لا" و گالت.

"لا مو غلط لان هيَ بنته و شوكت ميريد يشوفها وياخذها." "زين و الفتره الفاتت كلها بكل مره رسيم يأذيني و يهيني و يستصغرني همَّ يصيرون وياه ضدي، ابويه ضربني كدامه و قلل من قيمتي و امي ترزلني كدامه يصيرون وياه ضدي." "لان أنتِ غلط رواسي تصرفاتج ابد مو مال وحده عاقله، احنه من البدايه نعرف رسيم بس تغيرت نظرتنه اله و صرنه نكرهه من يوم الي خطفج بي و عذبج." "تكرهوا و تدافعون عنه."

"هوَ تغير رواسي كلش تغير كلنا نشوف تغيره الا أنتِ، لان جافصه ببطنه و من يعصب عليج تجين تصيحين ميتغير." "حتى لو خاله بس غلط تتصرفون وياها هيج كدامه! حتى لو هيَ غلطانه تبقون وياها مو ضدها بعدين تحجون وياها بيناتكم و تطيحون حظها." "ماكو واحد يتحمل سوالف رواسي مثل رسيم تحمل هوايه غلط و عدم احترام، صارلها سنه يمنه و هوَ ما تركها ابد يوميه يوميه يجي لو يخابر و يسأل عليها."

"شيلي من السنه ٧ شهور عايفني بقهري و خوفي عليه و هوَ متونس ويه الحمره لتبقين تدافعين اله خلصالكل صار يعرف انتو تموتون على رسيم و الي يهمكم رسيم و بس." باوعتلي و گالت ب امر. "خابريلي رسيم اريد احجي وياه." "اني شعليه روحي خابري من تلفونج." "تلفوني على الشحن خابري من عندج بسرعه." "خابري هسه شيصير يعني." "ما اريد احجي وياه." "اي بس خابري و انطي لامج هيَ تحجي لتحجين أنتِ." شلت تلفوني دكيت على رسيم و انطيت التلفون لامي.

كامت من مكانها و گالت. "هاي اني مو رواسي، اي اكو." طلعت من الصاله تحجي بعيد. باوعتلي ماري و گالت. "أنتِ بعدج تحبي؟ باوعتلها شايله صحن الكيك بيدها و تاكل منتظرتني ارد عليها. سحبت الصحن من ايدها و گلت. "كافي تاكلين البدله تصغر عليج و متكدرين تلبسيها." "طيبه والله و انتو سوالفكم تسوي واهس للاكل عبالك گاعده بسينما." "لو انطيهم قصتي يعرضوها يدفروني و يكولون دطيري أنتِ و قصتج."

"لتلوفين الموضوع جاوبي على سؤالي، بعدج تحبين رسيم؟ رفعت اكتافي بمعنى ما اعرف و گلت. "لا ما اتوقع لان مرتاحه بدونه." "اذا احد اجه خطبج توافقين؟ "لا ما اريد اتزوج بعد." باوعت على الباب و اردفت بفضول. "امي شعدها ويه رسيم تحجي صار ساعه! "كومي شوفيها." "لا هسه عبالهم اريد اعرف اخباره." "احجيلي الفلم السويتي لبين ما تجي امج." سحبت نفس قوي مليان حسرات و حجيتلها كلشي صار بالتفصيل، و هيَ تسمعني مركزه.

اخر شي كامت عليه و ضربتي بكل قوتها على ظهري، عطت بيها بصوت عالي. "وجع شبيج حيوانه! "گتلج اسمعها منج لايف حتى تنكفخين." "مو هيج كسرتيلي ظهري قندره على راسج." دخلت امي للصاله انطتني التلفون و گالت. "راح احجيلج." رديت متسائله. "شتحجين؟ "الفتره الي رسيم سافر بيها راح حتى يتعالج ما عافج لحاله." "ميهمني المهم عافني بدون اي خبر." "چان كل يوم يتواصل ويايه و ويه ابوج و يعرف اخبارج، رسيم ما تخلى عنج رواسي."

"يعني جنتو تعرفون اخباره و وين هوَ؟ "اي بس هوَ مجان يريدها تعرف اي شي." "ليش ميريد تعرف ترا حقها تعرف مكان زوجها وين و شنو وضعه! "بكل مره يسمع صوتها و شلون تبجي عليه يتخبل و يتخربط عليهم بس چان يكول 'خلوها تتعود على عدم وجودي حتى اذا صار بيه شي متتأذى بغيابي'." الدموع تجمعت بعيوني مسحتهن بسرعه قبل مينزلن و يفضحني. باوعت لامي و حجيت بحديه. "ما اريد اعرف اي شي يخصه، رسيم صفحه و انطوت و حركت الدفتر كله حتى متنفتح بعد."

"لازم تعرفين رسيم من ابتعد عنج ابتعد علمودج و بس." "اوكي عرفت هسه شنو المطلوب؟ "ما مطلوب منج شي بس دا احجيلج حتى تعرفين روحج أنتِ الغلطانه مو بس رسيم." "تمام." كمت من مكاني باوعت لماري و اردفت. "كومي نصعد فوك اعدل مكياجي حتى نطلع." كامت ويايه و صعدنه فوك رتبت مكياجي و هيَ هم عدلت على مكياجها. اخذت جنطتي و اغراضي و طلعنه. رحنا للسوك افترينه كومه لحد ما تكسرت رجلينه.

بالكوه لكيت فساتين ثنين واحد قصير لون سمائي و بي فتحات مقسمه من الظهر للحنه اخذته و الثاني مخصر طويل و بي فتحه من الركبه و جوه لونه اسود. ماري هم اخذت اغراض ناقصتها، و اشتريت هدايا لعذراء و رشا و اطفالهم. خلصنا من السوك طلبت من ماري تاخذني لبيت رسيم. "شعندج رايحه؟ "رايحه للبنات و هم ارجع مسك ويايه." "تكدرين تواجهين رسيم و انتو البارحه متطلكين! حجيت بعدم اهتمام. "اي عادي ميعنيلي شي مجرد ابو بنتي." "براحتج."

دزيت رساله لرشا بلغتها بجيتي. اخذتني لبيتهم نزلت و نزلت اغراضي ويايه و كلتلها. "تعالي أنتِ هم." "لا عيب و ادم خابرني من جنه بالسوك گال يريد يجي." "تمام حَبيبي انتبهي على نفسج و ركزي بطريقج." "ان شاء الله اذا احتاجيتي شي خابريني اجيج." شمرتلها بوسه و رديت. "متقصرين عُمري." سديت الباب و بيدي هوايه شغلات باوعت عليهن و حسيت عيب ادخل و اني شايله هلكد اغراض ويايه و فساتيني. ردت روحي حتى ارجع انضربت بشخص.

رفعت راسي باوعتله ضحك و گال. "محمله السوك كله و جايه." ركزت نظراتي بعيونه و حجيت. "اي دااجهز لخطوبتي بس تخلص عدة الطلاك راح نعقد." مد ايده على الفساتين مالتي اخذهن مني و هوَ يضحك. "حلو كلش حلو، منو سعيد الحظ؟ "متعرفه واحد جنتل مان مو من الانذال." "يلا عود نتعرف عليه مو مشكله." رجع اخذ الاكياس من ايدي و دخل للبيت قبلي. مشيت وراه و دخلت لكيتهم كلهم كاعدين بالصاله سلمت عليهم و كعدت. "شلونج خويه ان شاء الله مرتاحه؟

"الف الحمدلله مرتاحه." "مرتاحه لدرجه تجهز لخطوبتها و هيَ بعدها بالعده." انظارهم توجهت عليه ارتبكت كلش ابتسمت و حجيت بتوتر. "لا يا خطوبتي گتلك دنجهز لعرس ادم و ماري أنتَ سمعتني غلط." "قبل كم يوم ادم جابلنه كارت الدعوه و عزمنا." "بدون عزيمه تجون گلبي." بقينه كاعدين نسولف اني و البنات و نشرب جاي و غسان گاعد هوَ و رسيم ما اعرف بشنو يسولفون و مسك كاعده بحضن رسيم و تلعب بلحيته و شعره.

كمت شلت الهدايا و انطيتها للبنات فرحوا بيهن كلش. "ليش زحمتي روحج جيتج تكفي والله." "اي والله ماكو داعي بس جيتج و شوفتج كافيه." رديت عليهم ب ابتسامه. "ماكو شي يغلى عليكم تدللون." دك تلفوني ترخصت و كمت احجي بَره الصاله. "هلاا دِلهَام." "شلونج؟ "الحمدلله و أنتَ؟ "ما اعرف." "خير شبيك؟ "مشاعر مخربطه مقهور لان ماري راح تتزوج." "اي أنتَ هم تزوج شنو يعني." "متريدني." "منو هاي الي متريدك؟ بس دليني عليها اطيح حظها." ضحك و گال.

"وحده متعرفيها." بلحظه غباء مني حجيت. "يلا اذا هيَ متريدك تعال اني اتزوجك." بقه ساكت ما حجه شي، و اني انتبهت شنو حجيت عضيت شفتي بقوه قندره عليج رواسي شلون تحجين هيج! "لتصدك ترا اتشاقه بس مو صحيح." "اعرف." "اي لتفكر بغير شي ترا اذبحك والله، اني جفوصه شوي." "جفصي براحتج اعرفج شنو عادي." "اي عفيه اني حروح هسه لان مو بالبيت بعدين اخابرك." "اخذي راحتج."

سده من عندي انداريت اريد ارجع للصاله، شفت رسيم واكف ورايه منتجي على الحايط و ايده على شواربه. رفعت حاجبي معاجبني و حجيت متسائله. "شنو واكف تتسمع؟ "لا هسه اجيت." عفته و دخلت كعدت يمهم باوعت لمسك گاعده بحضن غسان و يلعب و يدغدغ بيها ابتسمت على منظرهم شكد حلو، هوايه يحبون مسك و يداروها و يهتمون بيها كأنو بتهم مو بنت اخوهم. باوعت للساعه و حجيت. "مسوكه ماما يلا حتى نروح." "وين بعد وكت ما شبعنه منج."

"لا صارت ب ٩ هسه اترزل من استاذ راشد." "ابقي بعد الله عليج." "غير مره ان شاء الله، يلا ماما تعالي." هزت راسها متقبل تجي. باوعلها غسان و گال. "تبقين هنا؟ "اي يم بابا." "خليها تبات هنا اليوم." "ماعدها ملابس و لا اغراضها وياها." "خلي غسان يوصلج و أنتِ حظريهن و دزيهن وياه خليها تبقى شوفيها فرحانه." "تمام." اجه رسيم كعد و شال مسك بحضنه يبوس بيها ما اعرف شنو يحجي وياها بس تكول "اي اريد". باوعت للبنات و گلت.

"بس فدوه اذا تريد حلويات او ببسي لتنطوها ابد ما اريدها تتعود عليهن." "ليظل بالج حَبيبتي مننطيها." باوعت لغسان و گلت. "غسان توصلني اذا مو زحمه." "اني اوصلج كومي." "لا شكراً." "ابدل و اجي." كام من مكانه صعد فوك شوي و رجع مبدل. كمت سلمت على البنات و رحت على مسك اخذتها بحضني بستها و كلتلها. "لتضوجيهم و اسمعي الكلام." هزت راسها ب "اي" و باستني. اخذها رسيم مني. مشيت اريد اطلع استوقفني لما گال.

"حظروا نفسكم الاسبوع الجاي تروحون تخطبولي."