رواية رواسي الدهر الفصل الثاني والعشرون 22 - بقلم روح الدليمي

مشيت أريد أطلع، استوقفني لما گال: "حضروا نفسكم الأسبوع الجاي تروحون تخطبولي." أخذت أغراضي وكملت طريقي وطلعت. لغسان ينتظرني بالسيارة، صعدت أخذني للبيت. نزلت بسرعة حضرت أغراض مسك وكل احتياجاتها، رتبتهم بالجنطة ورجعت انطيتها لغسان. تشكرته وراح. رجعت دخلت للبيت، صار بوجهي أبويه. "ها بابا، منو جابچ؟ "غسان، وانطيته أغراض مسك. اليوم تبات يمهم." "جان كلتي اطلع أسلم عليه." "ما أعرف، ما إجه بالي."

دخلت للصالة سلمت على أمي وكعدت. "شوفيني شنو أخذتي." "أي، هسه." رجعت كمت من مكاني وفتحت الكيس القماش مال فساتين وشوفتهم لأمي وأبويه. "ها، شنو رأيكم؟ "كل شي تلبسيه يطلع حلو عليچ، بالعافية حبيبتي." تقربت عليه بسته وگلت: "الله يعافيك حبيبي." "كلش حلوات، بس الطويل أحلى من القصير، مبين فخم أكثر." "أي، علمود هيچ خليته للعرس." "يوم الي نفرح بعرسچ." تغيرت ملامح وجهي للعصبية وحجيت بنتر:

"إذا حاطين ببالكم تزوجوني فـ شيلوا هل فكرة من بالكم، ما أتزوج بعد." "ليش؟ بعدچ صغيرة والحياة كدامج." "مو الأتزوج، أريد أربي بنتي وبس." شلت أغراضي وصعدت فوگ بدون ما أحجي. شيمر الأسبوع ركض بركض، هوسة التجهيزات وترتيب بيت آدم وماري. إجه يوم الحنة والعرس، اتفقوا يسووهن بنفس اليوم. گعدنا من الصبح، فتت سبحت حتى ألحگ أجهز روحي. طلعت من الحمام شفت تلفوني يدگ. استغربت منو يدگ عليّ هيچ وقت. رحت شلته، باوعت رقم غريب. رديت،

إجاني صوت ولد گال: "السلام عليكم، بس عدكم طلبية؟ رفعت حاجبي مستغربة وگلت: "أني ما طالبه شي، خاف غلطان؟ "لا، رقمچ مكتوب على الوصل والعنوان ***." "أي، هذا عنوانه صح. بره أنتَ؟ "قربت عليكم، خمس دقايق واكون بره." "شگد فلوس التوصيل؟ "مدفوع، بس تستلموه." "تمام." سديته منه وأني مستغربة منين إجتني هاي الطلبية، وآنوب مدفوعة. بدلت بسرعة ونزلت جوه. دگ تلفوني، باوعت نفس الرقم، رديت عليه. "بيتكم وين صاير بالضبط؟

"من تتعدى الأسواق، أول فرع يمين، ثالث بيت على اليمين. أني راح أنتظرچ بره." "تمام." صحت على أمي: "ماما، أني راح اطلع أستلم الطلب، هسه أجي." "تمام." طلعت بره أنتظره يجي. شْوَي و صارت سيارة بيضة گدامي. نزل منها واجه عليّ. انطاني كيس لونه أحمر ومكتوب عليه كارتير، وياها بوكيه ورد. تشكرته ودخلت للبيت وملامحي تدل على الصدمة. دخلت للصالة يم أمي. گالت: "شطالبه؟ "تؤ، مو أني. أحد دازلي ياها بس ما أعرف منو."

كعدت على القنفة، حطيت بوكيه الورد على الطبلة وفتحت الكيس، طلعت العلبة منه. فتحتها وآنصدمت بيها. بداخلها گِلادة تموت من جمالها، گِلادة كارتير ذهبية وبيها حجر أخضر. فريتها على أمي، فتحت عيونها مصدومة بيها لأن سعرها غالي. "منو جابلچ ياها؟ "علمي علمچ، والله." حطيت العلبة على القنفة وشلت البوكيه مال ورد. چان اكو كارت عليها، أخذته، طلعته من الظرف وقريته: "هدية بسيطة لأجمل بنية شافتها عيني، أتمنى تعجبچ."

وكاتب جواها "مجهول". "ما كاتب اسمه بس مجهول. هسه شلون أعرف منو دازها وليش؟ "خاف رسيم؟ هزيت راسي ما مأيدتها وگلت: "لا، أبد ما أتوقع. البارحة گال لهم يريد يخطب." بقينة وحدة تباوع بوجه الثانية. شلت تلفوني صورت الگلادة والورد ودزيتها لرسيم وكتبتله: "أنتَ دزيتهم؟ ما شافها ومارد عليّ، مع إنو متصل بالواتس. دگ تلفوني، ماري تتصل. جاوبتها، إجاني صوتها تبجي. "ماري حبي، شبيچ؟ "ما أريده، بطلت ما أتزوجه." "شبيكم؟ شصاير؟

تبجي وتشّهك بالكوه تسولف. "آدم واحد خاين، رواسي راح أموت، گلبي محترك والله." أشرت لي أمي تسأل شكو، رفعت أكتافي بمعنى ما أعرف. "أهدي حبيبتي، هسه أجيچ بس أبَدل." "أي، فدوة تعالي." سديته منها، گمت من مكاني، أخذت الهدية والورد وصعدت فوگ، حطيتهم على الميز وبدلت ملابسي بدون صوت حتى متگعد مسك. أخذت أغراضي وطلعت.

أخذت تكسي من الشارع ورحت لبيت ماري. بعد مدة قليلة وصلت، دفعت الأجرة ونزلت مستعجلة. دگيت الباب وبقيت أنتظر يفتحوه الي. انداريت على صوت آدم. "رواسي." "شبيك وياها؟ "والله ما مسوي شي. خابرتني الصبح تغلط وتصيح، وتگلي طلكني، ما أريدك بعد، أنتَ خاين." رجعت دگيت الجرس، ثواني وانفتح الباب. شمرت روحها بحضني وصارت تبجي بحرگه واضحة وتشّهك بصوت عالي. دخلتها للصالة وآدم دخل ورانه. "ماري حبيبتي، كافي بچي وفهميني شصار." "آدم يخوني."

"والله ما خاينچ، شبيچ أنتِ." عاطت بي: "أنتَ كذاب! أني شفتك بعيوني شلون تبوسها." باوعت لآدم مصدومة، وهوَ هم مصدوم مثلي. رجعت عاطت: "شفتك واگف أنتَ وياها يم البيت، وجانت زعلانه منّك وأنتَ تريد تراضيها، وبكل عين صلفة بستها گدامي! "والله ماكو هيچ شي، شتحجين ماري! "وين شفتيهم؟ "بالحلم." رديت عليها بصدمة واضحة: "بالحلم؟ "أي."

آدم صار يضحك من كل گلبه، وأني ما تحملت انفجرت بالضحك. وهيَ تباوع علينه بغضب. گام آدم من مكانه واجه كعد يمها، اخذها بحضنه. ضربته راشدي وعاطت بي: "خاين حقير، امشي منا." باسها من راسها وگال: "حبيبي، كل عقلچ أنتِ؟ طلعتيني خاين لأن حلمانه! "أي، لأن لو مو خاين مجان حلمت هل حلم." "قندرة عليچ وعلى حلمچ. هاي تأثير التوتر مال عرس. يلا ميخالف، نعذرچ." "والله گلبي محترك، شنو يخوني." "ولچ، حلم هذا! حلم مو حقيقه!

"حتى لو، المفروض حتى بالحلم متخوني." "امشي گدامي، جيبي أغراضچ حتى نروح للمركز، راح نتأخر." "ما أتزوج واحد خاين." "بس أني ما خنتچ عُمري أنتِ." مد ايده يمسح دموعها وطبع بوسة على كل عين. أخذت تلفوني وطلعت من الصالة، عفتهم براحتهم. رحت للمطبخ وعيوني بالتلفون، فتحت الواتس، لگيت رسيم رد عليّ. "لا، مو أني. ليش أجيبيلچ؟ دزيت له إيموجي مال اوكي وسديت التلفون. رفعت عيوني شفت دِلهَام واگف ويـباوع عليّ. ابتسمت بوجهه وگلت:

"سوري، ماشفتك." "بيچ شي؟ "لا، بس اجيت علمود ماري." "تشربين گهوة؟ "أي، ليش لا." سحبت كرسي وكعدت. إجتني رسالة على الواتس. رقم غريب. دخلت للمحادثة، كاتب: "إن شاء الله عجبتچ هديتي." رفعت عيوني على دِلهَام واگف يسوي گهوة، تلفونه مو بيده، يعني مو هوَ. رأساً كتبت: "منو أنتَ وليش تدزلي هدايا؟ _المجهول. "احجي منو، خلصني أحسن ما إنطيك بلوك! _خليني هسه مجهول، من يجي الوقت المناسب راح تعرفيني. "نشوف آخرتها شنو."

سديت تلفوني وحطيته على الميز. إجه يمي دِلهَام، حط فنجان گهوة گدامي وكعد يمي. "شلونها معنوياتك؟ "صفر. ما متعود بدونها. ما أعرف شلون راح أگدر أعيش وهيَ مو ويايه." "قابل وين رايحة؟ هيَ هياته بيتها، عشر دقايق، ربع ساعة بالزايد وأنتَ يمها." "هيَ الوحيدة اللي بقت لي بهاي الدنيا بعد موت أمي وأبويه. أحس راح تلتهي بحياتها وتنساني." "اختچ هاي، مثل ما أنتَ ما عندك غيرها، هيَ مثلك. مستحيل تگطع بيك وتعوفك. لتفكر بهاي الطريقة."

حط ايده على الميز وصار يرسم دوائر عشوائية ومركز على حركة إصبعه شلون يدور بنفس المكان. حطيت إيدي على إيده أمنعه يكمل وگلت: "لتشغل تفكيرك بهيج سوالف. شبيك؟ اتزوج أنتَ هم! بقى صافن عليّ لثواني وگال: "رواسي، تتزوجيني؟ فتحت عيوني مصدومة من طلبه وجرئته. نترت بي: "سامع روحك شدتحجي! "ستوب، ستوب. شبيج؟ أشاقه وياچ." "مو شقه هذا، أدبسز." گمت من مكاني أريد أطلع، گال: "أنتِ مثل أختي، وأني عندي حبيبة، عن قريب راح أخطبها." "تمام."

عفته وطلعت من المطبخ. رحت للصالة أشوف ماري. طيور الحب ناسين روحهم وماخذين راحتهم زيادة عن اللزوم. كحيت بخفة حتى يحسون عليّ. ابتعد عنها آدم. حط ايده على رگبته، ضحك وگال: "أنتظركم بالسيارة، أني آخذكم." "لو داخل عليكم دِلهَام؟ شگد متستحون! "عادي، زوجي هوَ، قابل بالحرام." "قبل شوي متردّين وتبجين وتصيحين خاين، ما أريده. هسه صار زوجچ." "الله عليچ سكتي، هسه ترجع تتعارك. بالكوه راضيتها لأن خنتها بالحلم." عاطت بي:

"يعني تعترف أنتَ خنت! ضرب على راسه وگال: "يلا، استلم." دخل دِلهَام، سلّم على آدم وگال: "شبيكم؟ "أختك زعلانه لأن خنتها بالحلم." ضحك وگال: "أي، حقها. لو تحبها متخونها." شال تلفونه وسويچ السيارة وگال بنفاذ صبر: "أولي أحسن." دِلهَام باوع لماري وگال بخبث: "شوفي، شوفي. يريد يخلص منچ. طلكي، لتتزوجي. أبقي يمي أحسن." نترت بي: "دِلهَام، صدگ تحجي! تعرف أختك خبله، هسه تتفاعل زيادة." "شْقصدج؟

"ماري، كومي لا أدفرچ. هسه بعد ربع ساعة موعدنا وأنتِ بعدچ گاعدة." باوعت لآدم وگالت: "ما أريدك، أنتَ واحد خاين. أنتَ طالق." مشه باتجاه الباب وعاط: "مو گلت أولي أحسن؟ الأخ وأخته ناويين يجلطوني." گامت من مكانها وصاحت عليه: "يلا، خلص سامحتك. رجعتك على ذمتي." حطيت إيدي على حلگي أمنع ضحكتي تطلع، بس ما سيطرت على روحي، متت من الضحك، انتهيت. "خاف صارت زحمة؟ "ماعجبك؟ عادي، أرجع أطلكك." "امشي حبيبتي، امشي. راح تندفرين."

"طلكها، متاخذها وياك." "جلدك يحكك." "أي والله، يرادله كتلة معدلة. غسل ولبس." باوع لي آدم وضحك: "لازم اللوندري مال رسيم صارت الج." اختفت ضحكتي بمجرد ما ذكر اسمه. "يلا، تأخرنا هواي، خلي نروح." "زعلتي مني؟ مو قصدي." "لا، بس تأخرنا." "اخذي سويچ السيارة، معلّگ يم الباب. شغليها علما أجي بس أجيب أغراضي والبدلة." هزيت لها راسي وطلعت. شغلت السيارة وكعدت أنتظرها. دگ تلفوني، نفس الرقم مال مجهول. رديت عليه. "منو أنتَ؟

رد عليّ بصوت غريب كلش، واضح مستخدم برنامج حتى يغير صوته. _المجهول اللي راح يلوّن حياتچ. "شگد بطران أنتَ." _لتسوقين السيارة أنتِ. نزلت من السيارة وصرت أباوع حواليه، ماكو أحد. الشارع فارغ. نترت بي: "وينك أنتَ؟ تعال خليني أشوفك، أريد أعرف أنتَ منو! _مو هسه، بعد وقت. ديري بالج على نفسچ حبيبتي. ضحكت باستهزاء: "حبيبتك؟ أنتَ الظاهر سكران." _بعمري ما حاط الشرب بحلكي، شلون أسكر. "تكول أنتَ منو لو يجيك بلوك!

_خليچ صبورة، كل شي بوقته حلو عُمري أنتِ. "دطير، قندرة." سديت التلفون بوجهه. ردت أسويله بلوك، بس فضولي منعني، أريد أعرف منو هوَ وشيريد مني. رجعت صعدت بالسيارة ودگيت هورن حتى تجي ماري. ثواني وانفتح الباب وطلعت تركض أغراضها بيدها، ودِلهَام شايل البدلات. فتح الباب الوره، حطهن على الكشن، وهيَ صعدت بالصدر. "شطول روحچ أنتِ؟ صار ساعة أنتظر! "شبيچ؟ غير علما طلعت الأغراض." "فضيني، سدي الباب."

سدت الباب وحركت السيارة متجهة للمركز. وصلنا لگينا نرجس ونارين واصلات قبلنا ومبلشات بالمكياج. ماري رأساً راحت وبدوا يجهزونها حتى تخلص على الموعد. بقيت گاعدة أنتظر نص ساعة علما وحدة من الزبائن خلصت وكعدت مكانها. خلصت مكياج وبلشت بشعري. أمي دگت عليّ. "نعم ماما." "رحتوا للمركز؟ "أي، هسه خلصت مكياج وبلشت بالشعر." "أگلچ، أنتِ مطلعة فساتين اثنين لمسوكه، يا واحد ألبسها؟

"السمائي، حتى نطلع نفس الشي أني وياها، والثاني ألبسها من يصير وقت العرس." "تمام، تجين لهنا لو تروحين للقاعة؟ "لا، ما ألحگ أجي للبيت، بوجهنا للقاعة." "ماشي حبيبتي." سديته منها وكعدت أگلب بالانستا لحد ما كملتني. ما خلصنا لحد الـ ٣ العصر.

طلعت ماري من غرفة التبديل لابسة بدلتها، طالعة أميرة. بدلتها لونها أحمر وبيها نفشة بسيطة. مسوية مكياج سموكي وحمرة حمرة. التسريحة شعرها مرفوع بطريقة كلش حلوة وبسيطة ونازل منه خصل كيرلي، ولابسة تاج بسيط. طالعة تموت. رجّعنا المركز، رج بصوت الهلاهل أني والبنات. فتحولنا أغاني وصرنا نرقص كلنا. شلت تلفوني صورتها فيديو وصور، وأني والبنات هم أخذنا صور. دگ تلفوني، آدم. ابتعدت عنهم ورديت. "ها، وصلت؟ "أي، بره."

"انزل أنتظرنا يم الباب." سديته من عنده ورحت على البنات بلغتهم بوصول آدم. نارين ونرجس ساعدوها حتى تطلع من التوتر، صارت متعرف تمشي. طلعت قبلهم، خليت آدم يبقى داير روحه وفتحت التلفون أصوّر فيديو. طلعت هيَ مبتسمة، وكفت گدام الباب وگالت بهدوء: "حبيبي."

اندار عليها وضحك. مشى بخطوات رزنة، يباوع بعيونها والابتسامة ما فارگت وجهه. وگف گدامها، لزم وجهها بإيده وطبع بوسة على راسها. نزل إيده عن وجهها، لزم إيدها وقرّب روحه، همس بإذنها وهيَ ضحكت خجلانة. مشوا ثنينهم للسيارة والبنات يهلهلن. ساعدها تصعد، واندار عليّ گال: "إذا أحد يسأل علينه، گولي لهم خطفها، ما تحمل." ضحكت ورديت عليه: "يلا، عادي، حلالك." راح من جهته وصعد السيارة. فتح الجامَة وگال: "ما عدنا شي بعد، نروح للقاعة مو؟

"أي، هسه نجي وراكم أحنه." صعدنا بسيارة ماري، أني والبنات. فتحت نارين المسجل وعلت الصوت، فتحت كامرة تلفونها وصارت تصور بينه وإحنه نرقص، وكل شي تنزله أول بأول ويه منشن لكل وحدة بينه. وصلنا للقاعة قبل آدم وماري، بقينة واگفين بره ننتظرهم. علما وصلوا، نزلوا من السيارة ودخلنا. أخذنا ماري لغرفة الانتظار مال عرسان وبقينة وياها. اندگ الباب، گمت فتحتها، صار بوجهي دِلهَام لابس قاط وكاشخ على آخر حبة. باوع لي من فوگ ليجوه وگال:

"شنو هل جمال والأناقة؟ حجيت بثقة: "أعرف، طالعة شگ شگ." ابتعدت عن الباب وأردفت: "فوت، شوف عروستنا." دخل للغرفة، صار يباوع عليها وعيونه تجمعت بيها الدموع. يتنفس بسرعة كأنو ديحاول يضبط نفسه وما يخلي دموعه تنزل. مشى باتجاه ماري، ركع گدامها على رجل وحدة ولزم إيدها، باسها وگال بنبرة حزن:

"بنتي الحلوة كبرت وصارت عروس. متتخيلين شگد جنت أحلم بهذا اليوم وأشوفچ سعيدة بحياتچ ويه شخص يحبچ ويخاف على زعلچ ويكون الج سند بعد ما الله ياخذ أمانته." نزلت دموعها، باسته من راسه وگالت بعبرة: "دِلهَام، لتحجي هيچ وتقهرني. أنتَ كل شي بدنيتي، ما عندي غيرك." "ما أتحمل فكرة عدم وجودچ ويايه بنفس البيت. صار فتره مخنوگ وكل ما يقرب موعد عرسچ تزيد الخنگة." رفعت عيونها، باوعت لي وگالت: "صيحي آدم، خلي يجي." "هسه أني أصيحه."

طلعت من الغرفة، شوي ورجعت هيَ وآدم. گامت من مكانها وكفت گبال آدم وگالت بقهر: "بطلت، ما أريد أتزوج. طلكني." وزّع نظراته علينه مستغرب، شبيها. گام دِلهَام من مكانه، مسح دموعه، ابتسم لها وگال: "أزعل عليچ والله." "ما أريد أعوفك." "شكو؟ "ما أريد أتزوج، أريد أبقى ويه أخويه." "وين رايحة أنتِ؟ ترا كلها كم دقيقة وتكونين يمه، وهوَ يجيچ بكل وقت." عاطت بآدم، كلنا مصدومين من ردة فعلها.

"ما أريد، ألغي كل شي، روح گول لهم العرس انلغى." "ماري، مو هيچ حبيبتي. يوميه اجيج وتجينّي." "مااا، ما أريد أعوفك دِلهَام." نتر بيها آدم: "لعب هوَ؟ "عوفونة وحدنة، أحجي وياها." طلعنا كلنا من الغرفة، بقى هوَ وياها وآدم. توترنا كلش وخفنا لا صدگ تخرب كل شي وينلغي العرس. "تتوقعون راح تعوف العناد؟ "طبعاً، هيَ تحب آدم، بس دِلهَام غير، هوَ رباها وكبرها. صار لها أب وأم مو بس أخ."

"دِلهَام قهرني كلش، بس لو باقي ساكت وعايف مشاعره بداخله أحسن." "ميعرف أخته طگه و نص. اليوم الصبح خابرتني تبجي وتصيح آدم يخوني، تالي طلعت شايفته بالحلم." "خايفة هيَ وتدور حجة حتى تبطل." "من شنو تخاف؟ والله آدم وردة، مو لأن ابن عمي، بس هوَ فعلاً كلش خوش رجال وميت عليها، يحسب ساعة ساعة لليوم الي يتزوجها ويصيرون ببيت واحد." "العالم كلها إجت وباقي شوي على وقت دخوليتها. يارب ما تسوي شي غبي مثلها."

انفتح باب الغرفة وطلع دِلهَام وياه آدم، وشكله معصب كلش، حتى الفرحة اختفت من ملامحه. رحت على آدم. "ها؟ "كل شي التغى، خلص. متريدني وتريد تتطلك." "يااا، صدگ تحجي! "روحي بلغي الكل، أني رايح." ابتعد عني والكسرة واضحة عليه. مشى مسافة وطلعت ماري من الغرفة، صاحت بإسمه: "آدم!

التفت عليها، أشر لها بإيده بمعنى "شكو". لزمت بدلتها وراحت تمشي عليه. لزمته من إيده وصارت تحجي وياه. منكدر نسمعهم لأن بعيدين علينه، بس واضح من شكل آدم منفعل هوايه. عاف إيدها ورفع إصبعه تجاهها، ما أعرف شنو گال لها وهيَ هزت راسها "أي". تقرّب عليها، باسها من راسها ولزم إيدها، واجوا يمشون باتجاهنا. "هسه نرقص لو نرجع لبيوتنه؟ "اليوم ردح للصبح." ضحكت وحطت راسها على كتف آدم وگالت:

"ابن عمچ يريد يخلص مني، حتى ما حاول يقنعني، رأساً گال مثل ما تريدين وعافني." "لا والله؟ "أي." "إذا تقهرين روحچ أزعل عليچ والله." "هسه تبطل، اسكت." أخذتنا ماري للغرفة ورتبنالها المكياج. دخلنا إحنه للقاعة ويه المعازيم حتى تصير دخوليتها. دقايق وانطفت الأضواء واشتغلت أضواء خافتة. المصورة وكفت گدام الباب هيَ والمساعدة مالتها، وكل وحدة بيهن شايلة كامرة. وحدة للفيديو ووحدة للصور. اشتغلت الأغنية وانفتح الباب مال قاعة.

طلت علينا تتمايل ويه الأغنية والابتسامة على وجهها. وصلت لنص القاعة والمصوّرات گدامها يصورون بيها. صارت ترگص بخجل واضح عليها، متوترة لأن وحدها. باوعت للبنات وگلت لهم: "خلي نكوم وياها، يلا." گمنا أني ونرجس ونارين، صرنا يمها، متوسطين القاعة. دارت وجهها لأبو الدي جي وأشرت علينه. رفعت لها إيدها وسوت "أوكي". شوي وتغيرت الأغنية، حطت "أجدع صحاب"، صارت تغني ويه الأغنية وتأشر علينه.

"أجدع صحاب صحابي من صغري، دول اللي يمشوا معايا دغري.. دول أغلى ناس همَّ الأساس، وأقول لكوا إيه.." فتحت إيدها وحضنتنه كلنا سوه. ابتعدنا عنها ولزمنا إيد بعض وصرنا نغني ويه الأغنية ونرقص لحد ما خلصت. أنظارنه توجهت على الباب لما دخلن نسوان ثنين وياهن بنات ٤. دخلن كلهن يهلهلن بعلو صوتهن. أجن يمنه، تقدمن على ماري، هيَ تباوع عليهن مصدومة. حضنتهن ثنينهن وصاروا يبجون. باوعت على البنات وحجيت متسائلة: "منو هذول؟

"أتوقع خالاتها." ابتعدت عنهن وگالت بعبرة: "ما توقعت أحد بيكم يجي." _شلون نعوفچ بهيج يوم، بنت الغالية أنتِ. تقدمن عليها البنات، بوسنها، ووحدة منهن صاحت على أم الدي جي، طلبت منها أغنية. شغلت الأغاني وصاروا يرقصون وياها. استمرت حفلة الحنة ساعتين، وبعدها اخذنا ماري نعدل شعرها والمكياج حتى تلبس بدلة العرس.

كل شي هوسة وخبصة. ما أعرف منين طلعولنا بفكرة الحنة والعرس سوة. التهينا بماري وحرّنا بالمكياج. من گد الرقص عركت هوايه ومكياجها يحتاج تعديل مضبوط، مو مال إحنه نخبص بكيفنه. أخذت تلفوني وطلعت من الغرفة، خابرت آدم. "ها، روسيه." "أحس تورطنا." "بشنو تورطتوا؟ "لازم ميكب ارتست علمود مكياج ماري." "منين أجيبيلكم هسه؟ "دبر روحك، محد گال لكم سوو العرس والحنة بنفس اليوم، ما عندكم عقل." "هسه أشوف وأخابرچ."

"لتتأخر، بسرعة، عدنا ساعة بس علما نجهزها." سديته من آدم ودخلت على ماري والبنات، لگيت وحدة من بنات خالاتها واگفة وتسويلها بالمكياج. "ها، تدبريها؟ _عيب عليچ، أصلاً أني عندي مركز بالخارج. "أي، نگذتني." "خلي أخابر آدم لعد، أنطي خبر، وأبدل أني هم."

أخذت مكياجي ويايه وطلعت. دگيت على آدم بلغته ورحت للحمام أرتب مكياجي هناك. الغرفة هوسة كلش. رتبت روحي وطلعت. دگ تلفوني، تأففت بضجر من شفت نفس الرقم مال المجهول يتصل عليّ. رديت عليه وكملت طريقي للغرفة. "خير؟ _شدعوة لبسچ هلكد طويل! صارت عيوني تتوزع على كل مكان حوالي، بس ما چان اكو أحد غيري أني. سرّعت مشيتي ودخلت للغرفة. حجيت بنتر: "منو أنتَ؟ وبعدين شعليك بـ لبسي! _أغار عليچ، ما أتحمل أشوف غيري ينظرلچ.

"ترا لعبت نفسي منك! لو تجي وتواجهني وتخليني أعرف أنتَ منو، لو بعد ممنوع تتصل عليّ." _شبيچ مستعجلة عُمري، اصبري شوي. إن الله مع الصابرين. "قنادر عليك وعلى عُمرك." سديته بوجهه. باوعت للبنات مستغربات. شلت فستاني حتى ألبسه. ماري گالت: "ويه منو جنتي تحجين؟ "واحد قندرة من الصبح دزلي هدية وديراقبني، بس ما عرفته منو! "ما عرفتي صوته؟ "عود مسوي روحه ذكي من يحجي ويايه. أحس عبالك روبوت يحجي، ما أعرف شلون يتغير صوته."

"هسه كل شي بالذكاء الاصطناعي وبرامج تغيير الصوت." "خيولي، قندرة، عكر مزاجي." دخلت للحمام اللي بالغرفة، بدلت فستاني، لبست الثاني الأسود. وماري كملت ترتيب مكياجها وگامت تبدل تلبس البدلة مال عرس. ساعدناها أني والبنات. اندگ الباب ودخلت المصورة گالت: "العروسة جهزت؟ "أي جاهزة." عاطت ماري بفزع: "ولكم، المسكة مالتي وين! "ويه آدم، شبيج؟ هسه من يجي يجيبها وياه." _يلا، امشي ويايه حتى أصوركم وبعدها تدخلون للقاعة.

"تعالوا ويايه بنات." "لا، أني ونارين نروح نگعد ورانه ردح بعد." "أنّي أجي وياچ، يلا."

ساعدتها تطلع ورحنه لغرفة مخصصة للتصوير. بلشت تصور بيها المصورة وأخذت وياها أني هم. بعدين وكفت وخلت ظهرها على الباب. خابرت آدم بلغته إنو يجي. كلها كم دقيقة واندگ الباب ودخل آدم شايل بيده المسكة مالتها. عفتهم وطلعت أنتظر بره حتى ياخذون راحتهم بالتصوير والحركات. بقيت واگفة يم الباب وأگلب بالتلفون. أوجهه الستوريات مال نارين ونرجس. گدامي مراية جبيرة، وكفت وأخذت كم صورة الي. نزلت عيوني على التلفون، اختاريت وحدة منهن أنشرها. حسيت بشخص واگف ورايه. رفعت عيوني، باوعت له من المراية. انداريت عليه. صرنا وجه بوجه.

باوع لي من فوگ ليجوه وگال: "حليانة روسيه." "أي، لأن ماكو علاقات سامة بحياتي." "جيد." بقى صافن عليّ وينظر لي بنظرات حب. نترت بي: "خير، رايد شي؟ "أريد أعرفچ على خطيبتي." رفعت حاجبي، ما عاجبني وگلت: "شنو المناسبة؟ ليش تعرف عليها؟ "تتعرفين عليها لأن بنتچ راح تربى يمها." "عفواً؟ "يعني أقصد، من تجي يمي، هيَ تهتم بيها." "ها، أوكي. عود أتعرف عليها، مو هسه." "فستانچ حلو." "أعرف." "عيونچ حلوة." "مو شي جديد." "تحبيني؟ "لا."

"أني هم ما أحبچ." "راح تبقى لازگ روحك بيه؟ روح لخطيبتك، عوفني بحالي." درت عيوني، باوعت دِلهَام واگف يحجي ويه المصورة الثانية. ابتعدت عن رسيم وصحت له: "حبيبي تعال نصور سوه...