رواية رواسي الدهر الفصل الخامس 5 - بقلم روح الدليمي

اندفر الباب وانفتح، هجموا على رسيم كتفوه ونزلوا بالكاع. واحد بيهم حط رجله على راسه يمنعه من الحركة. ركضت عليه وعطت بيهم. رواسي: شتسووون؟ هذا زوجييييي! وخروو عنهه. دخل ابويه وبقه متصنم بمكانه من كلامي. سحبني من ايدي كدام الكل وعاط بيه. راشد: شتحجيييين أنتِ !!!! رواسيييي سامعههه روحج شدتحجييين؟؟؟ رواسي: اي هوَ زوجي تزوجنا صار هواي. درت عيوني على رسيم، چان يباوعلي ويبتسم. رجعت رفعت عيوني على الضابط الموجود وگلت.

رواسي: شنو مسوي هوَ حتى تاخذو؟ _تهمه خطف وتجارة مخدرات. رواسي: ما خطفنيييي! ما خطفنيييي! انضربت راشدي قوي. رفعت عيوني على ابويه. ينظرلي بغضب. سحبوا رسيم من الگاع واخذو وياهم. طلعت وراهم اركض. استوقفتهم بصوتي العالي وركضت على رسيم. حضنته بقوه وهمست بأذنه بترجي. رواسي: الله يخليك احجي مثل ما گتلك. بعدوني عنه وواحد منهم گال. _انتو هم تعالو ورانه يلا. انسحبت من شعري بقوه. رسيم صار يسب بأبويه يريده يعوفني.

اول مره بحياته يمد ايده عليه ويأذيني. رجع ضربني مره ثانيه وعاط بيه. راشد: تخبلتتيييي أنتِ! فهميني تخبلتييييي؟؟؟؟ رواسي: عوفنييييي عوفنييييي. سحبني يريد يصعدني بسيارته. نترت ايدي منه بقوه وگلت. رواسي: رسيييم زوجييي، ما اعوفه لو شما تسوي ما اعوفه. راشد: أنتِ تردين تخبليني فهميني !! ثواني ورجع اردف بكل عصبيه. راشد: سامعه نفسج شدتحجين.

رواسي: هوَ رجلي ومااعوفه لو شما تسوون. احبه ويحبني وتزوجته برضاتي واني اريده. محد اله حق يتدخل بعد. راشد: هسه تجين وياي للمركز نشتكي عليه وياويلج اذا حجيتي غير حجي متلومين الا نفسج. اقسم بالله تشتكين عَ زوجج وانتي الممنونه!! جرني من ايدي بكل قوته وصعدني بالسياره واني احاول اخلص نفسي منه. قفل الباب مال سياره وحرك بسرعه متوجهه للمركز وهوَ عصبي. الطريق كله هوَ يضرب بيه ويسب ويغلط واني دموعي تنزل مثل الشلال عَ خدودي.

وينه هوَ هسه؟ شنو حالته بس لا اذوه؟ والله اموت اذا يصير بي شي. كل حياتي هوَ. حجيت بترجي واني ابجي واتوسل. رواسي: الله يخليك افهمني حس بيه. راشد: اششش و لا حرف. رايحه متزوجه رجاااال مافيا!! وين عايشين احنه فهمييينيي. رواسي: احبهههه ليش تبعدوني عنه حرام عليكم. راشد: شلووون حَبيتي بس فهميني شلوون؟ مابقه شي ما سواه بيج تالي شنو؟ ترجعيلي متزوجته.

بقيت ساكته و بس دموعي تنزل. اني بنفسي ماعندي جواب لسؤاله. اني شخصياً ما اعرف شلون حبيته بهاي الطريقه وهوَ سبب كل عذابي. وصلنا على المركز، نزل من السياره واجه من جهتي. فتح الباب وسحبني من السياره نزلني. لزم ايدي بكل قوته وصار يسحب بيه ويمشيني غصب عني. دخلنا للمركز. صارت عيوني تدور بالمكان اريد اشوفه بس ماله اثر. وين اخذوا؟ تقدم واحد من الضباط سلم على ابويه واخذنه لمكتبه. كعدنا يمه. ابويه گال. راشد: بنتي تريد تشتكي.

باوعلي الضابط وگال. _احجيلي كلشي صار وياج. مسحت دموعي وباوعت لابويه وحجيت بثقه. رواسي: رسيم يحبني واحبه. خطبني من ابويه اكثر من مره وچان يواجهه بالرفض. عاط بيه ابويه بصوت عالي. راشد: لتكذببييييين ولجججج. رواسي: ممكذبه بابا. من بعد اصرار ابويه على الرفض اتفقنا ننهزم سوه وتزوجنا. الضابط صار يباوعلي بشك وگال. _بس هوَ مكال هيج؟ رواسي: مستحيل رسيم يحجي غير حجي. _مجان خاطفج هوَ؟ مسحت دموعي وگلت. رواسي: لا.

_بس عدنه ادله على انو هوَ چان يعذبج. حرت شنو احجي. اخاف احجي شي و الوصها على رسيم. بقيت متردده. بعدين حجيت. رواسي: لا چان اتفاق حتى يوهم اهلي هوَ خاطفني. عاط بيه الضابط. رجعت ظهري ليوره من الخوف. گال. _رواسيييي احجي كلشييي صار، هذول عصابه لازم تساعدينه حتى نلزمهم! رواسي: ماكو شي صار، يعني شحجي ؟؟؟ راشد: بنتي حَبيبتي لتسوين هيج بيه وبنفسج. رواسي: أنتَ لتجبرني اسوي شي واحجي شي مصاير. الضابط باوع لابويه وگال.

_اذا متشتكي عليه منكدر نسويله شي. راشد: عدكمممم ادله وشلون چان يعذبها، وشلون چان ينطيها مخدرات. _هذا كله مو كافي اذا هيَ تكول عكس هذا الكلام. رواسي: اني جنت مدمنه قبل لا اروح وياه، وهوَ ساعدني اترك المخدرات. كام ابويه وانهد عليه بالضرب. الضابط سحبه من ايده وبعده عني. عاط بيه من وره الضابط. راشد: أنتِ تخبلتيييييي، اليوم اذا اشرب من دمج هم ميبرد گلبي. رواسي: حجيت الي صار كله. اذا ماكو شي بعد اريد ارجع للبيت.

_ووقعي افادتج وبعدها روحي. اخذني وياه لغرفه ثانيه وطلب مني ارجع احجي كلشي. حجيتله نفس الحجي وبعدها وقعت. گال. _اني متأكد أنتِ ما حجيتي الي صار. محد غيرج راح يندم اذا سوه بيكم شي بس يطلع منا. رواسي: شوكت يطلع؟ _راح يبقى على ذمة التحقيق فتره. لازم نعرف منو وراه. رواسي: ليش متفهمون انتو؟ ماكو احد وراه ولا عنده شي ثاني.

_لا عنده وكل شي راح يبين. اذا مياخذ اعدام راح ينسجن مؤبد. وهسه تكدرين تروحين بس ب اي وقت نحتاجج تجين هنا. طلعت من المكتب. ابويه واكف ينتظرني. بدون اي كلام سحبني من ايدي واخذني لسيارته واتجه بينه للبيت. اول ما دخلنا منطقتنا عيوني دمعت. غمضت عيوني و نزلت دموعي على خدي. نزلنا من السياره دخلت للبيت لكيت امي گاعده. بس شافتني ركضت عليه حضنتني وصارت تبجي. وابجي وياها.

كرهت روحي كلش لان خليت ابويه بهذا الموقف، بس بنفس الوقت ميجي من گلبي أاذي رسيم. بعدتني عن حضنها تتفحص بيه وگالت. جميلة: ما سوالج شي؟؟؟ ما اذاج بشي مو بنتي. رواسي: مابيه اي شي ماما ليظل بالج. مشتاقتلج هوايه. رجعت حضنتها وصرت اشهك بالبجي. تقدم ابويه عليه سحبني من حضن امي وگال. راشد: تفوتين لغرفتج ماكو طلعه منها ابد. جميلة: ليش هيج تنتر بيها راشد، عوفها خليني اشبع منها. عاط ابويه بصوت عالي وگال بعصبيه.

راشد: بنتججج المصووونههه متزوجههه الرجال الي خطفهاااا ومتقبل تشتكي عليه وطلعتني جذااااب كدام العالم. شهكت ولطمت على وجهها بقوه وگالت. جميله: صخااام الصخمنيييي رواسييي صدك يحجي؟؟؟ نزلت راسي خجلانه منهم. ما اعرف شنو احجي ولا شنو اگول. لزمتني من زنودي وصارت تعت بيه وعاطت. جميلة: ولججج احجيييي. راشد: شتحجيييي شتحجييي، تحجيلج صخاام وجهها. كعدت بالكاع. حيلي انهد بعد مابيه اوكف على رجلي.

امي صارت تروح وتجي فوك راسي وتغلط عليه وابويه كذلك ما قصر. تقدم عليه سحبني وصار يجر بيه. صعدني لغرفتي وقفل الباب وعافني. اسبوعين كاملات اني محبوسه. مجرد ينطوني اكل من الباب ويروحون. بكل مره يبقى الاكل على حطته. ما امد ايدي عليه ولا اكل اي شي. يوم اجه ابويه عليه وبيده سلاح. رجفت بخوف من الي جاي. سحبني من شعري وگال. راشد: اليوم تنهين هاي المسخره كلها. امشي كدامي. دفعني كدامه. ردت اوكع لزمت بالكومدي وگلت. رواسي: تموتني؟

راشد: اذا متنفذين كلامي راح اموتج بدون ميرفلي جفن. رواسي: اني بنتك وحيدتك، شلون يجي من گلبك تسوي بيه هيج؟ حط سلاحه براسي وگال. راشد: اذا متنزلين وياي هسه وتحجين كدام السيد عن كلشي حتى يطلكج من عنده، طلقه وحده براسج كفيله ب ان تنهي حياتج. نزلني من فوك ويمشي بيه ومسدسه براسي. سحب صايه وشال من امي وشمرهن عليه وگال بتهديد. راشد: لبسيهن وكدامي يلا، اذا تهمج حياتج نفذي الي اكوله. لبست الصايه وشمرت الشال على راسي ب اهمال.

لزك روحه بيه من وره ومسدسه دفعه بظهري بكل قوته. شاغت روحي. دخلنا للاستقبال. چان السيد موجود وعمي وابنه ادم. گال ابويه موجه الحجي للسيد. راشد: سيد هاي بنتي واتمنى تطلكها من زوجها. _شنو سبب الطلاق؟ راشد: يعذبها ويعنفها وعدا ذلك هوَ محبوس هسه. متريد تبقى على ذمته. رفع عيونه عليه باوعلي وگال. _تردين تطلكين غيابي؟ هزيت راسي ب "اي" ونزلت دموعي. هز راسه وگال. _لتبجين بنتي، راح اطلگج منه وتخلصين من عذابج.

بلش السيد يردد ب ايات قرائنيه وكلمات. وتم طلاقي من رسيم غيابياً. راح السيد وطلع وراه ابويه وعمي. بقينه اني وادم. باوعلي بنظرات ماعرفت افسرها. وگال. ادم: ليش هيج سويتي روسيه؟ عطت بي واني امسح بدموعي. رواسي: اسميييي روااااسي مو روسيه. ادم: من شوكت طول عمرنا نصيحلج روسيه. رواسي: اكرهههه اكرههه لحد يكول روسيه. تقدم عليه خطوه. رجعت خطوتين ليوره. گال. ادم: بس تكملين عدة الطلاق نتزوج. رواسي: ما اريد اتزوج. عوفوني بحالي.

ردت اطلع من الاستقبال. صار بوجهي ابويه. دفعني ورجع دخلني وگال. راشد: بعمري وحياتي ما رفضتلج طلب، بس أنتِ شسويتي رواسي؟؟ نزلت على رجله لزمتها وحجيت بتوسل. رواسي: موتني وخلصني من هاي الدنيا، تعبت يابه تعبت. راشد: من ايدججج تعبج كله من ايدج أنتِ! رواسي: طلكتوني منه بعد شتريدون مني؟ راشد: تتزوجين ادمر. رواسي: اموت وما اتزوج. ما اريد. كمت من الكاع اريد اطلع. گال. راشد: تتزوجين وغصب عنج. بعملتجج هاي نزلتييي راسي.

رواسي: ما سويت غلط وتزوجت على سنه الله ورسوله. راشد: تعاونتي وياه ضدييي جنتي تعرفين بكلشي وبقيتي ساكته!!!! رواسي: اكدر ارجع لغرفتي؟ راشد: ممنوع تطلعين منها غير لبيت زوجج. نزلت راسي بدون ما احجي اي حرف. طلعت من يمهم. تجاهلت امي الي جانت تباوعلي بخوف وصعدت لغرفتي. سديت الباب وره شوي سمعت صوت القفل. رجعوا قفلوا الباب عليه. تستاهلين كلشي يصير بيج رواسي، لو شما يسوون بيج أنتِ مستاهله كلشي.

مرت فتره ولاحظت الشهريه ما اجتني. ما اهتميت وگلت يجوز بسبب تأثير الحبوب والادمان. مرن التلث شهور بروتين ممل. ما اطلع من غرفتي وانحرمت من جامعتي. تدخل امي عليه بس تنطيني اكل وتحاول تحجي ويايه بس تتردد. وهيج مشت ايامي. بيوم دخل ابويه عليه. باوعلي بغضب وگال. راشد: كومي حظري روحج يلا. رواسي: شكو؟ راشد: بدون اسئله زايده كومي اليوم تروحين لبيت زوجج. بقيت اباوعله بصدمه. وحجيت بغصه. رواسي: دتزوجني حتى تخلص مني؟

راشد: ما اتحمل وجودج ببيتي بعد. كومي فضيني يلا. السيد وكلهم ينتظرون. مناوي يعوفني بحالي الا يزوجني. كمت من لا چاره. بدلت ملابسي وهوَ طلع ينتظرني بباب الغرفه. اخذت شال حطيته على راسي وطلعت من الغرفه. تعديته وردت انزل من الدرج. سحبني من ايدي وگال بتهديد. راشد: اذا تفكرين تسوين اي شي وتخربين علينه، رسيم يموت وكدام عيونج هم. رواسي: ليش هيج تغيرت عليه؟ وين حبك الي ودلالك؟

وين كلامك لما جنت تكول لو اموت ما اجبرج على شي مرايدته. راشد: تغير كلشي لما سويتي عملتج وتزوجتي واحد نذل مثل رسيم، وحطيتي راسي بالكاع كدام العالم كلهاا. عفته ونزلت امشي كدامه. دخل للاستقبال وبعدها سمعت صوت السيد يكول. _بنتي اذا موافقه على الزواج گولي قبلت. بقيت متردده بس استسلمت وجاوبته بكسره. رواسي: نعم قبلت. مجرد ما تم عقد زواجي من ادم انهديت بالبجي. اجت امي عليه وحضنتني صارت تهدي بيه گالت.

جميلة: صدكيني هذا الشي بي خير الج. ادم يحبج وكلنا نعرف انو راح يحافظ عليج ويصونج. رواسي: بس اني ما اريده. مستحيل اتقبله ك زوج الي مهما يكون. جميلة: بعد ميفيد الحجي صرتي مرته بشرع الله. طلع ابويه من يمهم وگال بدون ميباوع عليه. راشد: لمي اغراضج اليوم تروحين وياه. رواسي: حاظر بابا، بس خليك متأكد بس اطلع من هذا الباب بعد تنسى عندك بنيه اسمها رواسي. راشد: بلا حجي زايد كومي. ابتعدت عن حضن امي وصعدت لغرفتي.

لكيت حاطين جنطه جبيره بالكاع. ضحكت بكسره ورحت على كنتوري شلت ملابسي وحطيتهم بالجنطه. لميت كل اغراضي ما بقيت الهم شي بالغرفه. سديت الجنطه واخذتها اسحب بيها وطلعت من الغرفه. ادم صار بوجهي ابتسملي وگال. ادم: واخيراً صرتي حلالي روسيه. رواسي: لتكووول قندره لتكوول هذا الاسم. ادم: انطيني الجنطه عنج. اخذ الجنطه مني نزلها جوه، واني نزلت وراه. وكف يم ابويه يحجي وياه. تجاهلتهم وطلعت من باب البيت قبله.

شوي واجه ورايه حط جنطتي بسيارته واندار عليه گال. ادم: متسلمين على اهلج؟ رواسي: ميحتاج. فتحت باب السياره وصعدت. اجه من جهة السايق صعد وحرك السياره. باوعتله وگلت. رواسي: اخذني للصيدليه اريد اجيب علاجهز. راسه وبقه ساكت. وكف يم صيدليه فتح حزامه واندار عليه گال. ادم: شنو تردين اجيبلج؟ رواسي: لا اني انزل هسه اجي ما اتأخر. ادم: اني اجيب. رواسي: اريد شسمه.. هذا. باوعلي وضحك گال. ادم: يلا لتتأخرين انتظرج، هاج فلوس.

طلع من محفظته فلوس اخذتهن و نزلت من السياره ودخلت للصيدليه. چان اكو رجال وياه بنيه شابه. رحت عليها وحجيت بصوت ناصي. رواسي: اريد اختبار حمل ثنين، وشغلات نسائيه. هزت راسها وراحت جابتلي طلبي. دفعت الفلوس ورجعت للسياره. حرك بدون ميحجي حرف زايد. وصلنا يم بيت. باوعتله وگلت. رواسي: بيت منو هذا؟ ادم: بيتنا. رواسي: منكعد يم اهلك؟ ادم: لا وحدنه براحتنه.

هزيت راسي ونزلت من السياره. اخذ جنطتي من الصندوك واجه فتحلي باب البيت ودخلنا سوه. دخل جنطتي لوحده من الغرف وگال. ادم: هاي غرفتنا رتبي اغراضج بيها علما ارجع اني، راح اجيب مسواك البيت فارغ. رواسي: تمام. طلع هوَ وقفل باب البيت عليه. عباله انهزم. دخلت للغرفه. صرت اباوع لكلشي بيها. لونها اوف وايت وجديده وعليها فرشه مال عرسان. ضحكت مستهزئه وسحبت الفرشه شمرتها بالكاع واخذت الكيس ودخلت للحمام.

طلعت اختبار الحمل وسويته. بقيت انتظر خمس دقايق. شلته بيدي وصرت اباوع عليه مصدومه. خطين، يعني اني حامل !! رواسي: يعني زواجي من ادم باطل!!! رجعت طلعت الاختبار الثاني وعدته وطلع نفس النتيجه. ما اعرف افرح لو ابجي بهاي الحاله. سمعت صوت ادم شمرت الاختبارات مال حمل بالزباله وغسلت وطلعت من الحمام. بقه يباوعلي بنظرات شك. حاولت ما ابين توتري وگلت. رواسي: اني جوعانه توصيلنه اكل؟ ادم: يلا هسه كملتي اغراضج؟

رواسي: لا هسه اسويهن عسريع. دخلت للغرفه متجاهله نظراته الي. ما اكدر احجيله خاف يروح يكول لاهلي ويجبروني انزله. الشي الوحيد الي بقالي من رسيم مستحيل اخلي يصير بي شي. رتبت ملابسي كلهن وطلعت من الغرفه بعد ما صاحني ادم حتى ناكل. كعدنا ناكل بكل هدوء لحد ما كسر هدوئنا بكلامه الي نزل مثل مي بارد على النار الي مشتعله بداخلي. ادم: رواسي، اني تزوجتج حتى امنع ابوج يزوجج لشخص ثاني. مستحيل اتقرب منج او اوصل يمج لتخافين.

رواسي: عليك الله؟؟؟ ادم: صح احبج واريدج واتمنى اليوم الي تكونين بي بحضني وانتِ حلالي، بس مستحيل اسوي بيج هيج وانتِ بگلبج واحد ثاني. رواسي: توعدني متتقرب مني ابد؟ ولا تحاول؟ ادم: اوعدج، راح نبقى نفس وضعنه مو تكولين اعتبرك اخويه؟ رواسي: اي. ادم: خلص اعتربينا اخوان ببيت واحد كل واحد ينام بغرفته وبس كدام الكل نمثل احنه متزوجين علمودج أنتِ حتى ميجيج حجي. كمت عليه حضنته بكل قوتي وگلت.

رواسي: شكراً ادم والله ياريت لو عندي اخ مثلك. بعدني عنه وگال. ادم: كملي اكلج. رجعت كعدت بمكاني خجلت من تصرفياول مره اسويها واحضنه. هسه شيكول عليه! كملت اكلي وحسيت روحي بعدني جوعانه. استحيت اگول. مدلي اللفه مالته وگال. ادم: اني مو جوعان هاج اكليها أنتِ. رواسي: لا شبعت شكراً. ادم: عينج عليها اكليها روسيه. ضربت على الميز بقوه وگلت. رواسي: كلتتتت لتكول قندره. ادم: عفيه قندره بكلشي لازكتها.

رواسي: لتكول روسيه اسمي رواسي وخلص. ادم: رواسي رواسي مثل ما تردين تدللين. اخذت اللفه مالته واكلتها كلها. هوَ يباوعلي مصدوم بس ما حجه شي. نفسيتي انفتحت بشكل مو طبيعي شبيه اني ماعندي حل وسط. كمت غسلت ورتبت المسواك بالثلاجه. باوعتله وگلت. رواسي: منو راح يطبخ؟؟ ادم: منو ام البيت برأيج؟ رواسي: بس ما اعرف اطبخ اني رسيم! ادم: اسمي ادم رواسي ادم. رواسي: اي شكلت اني لعد! ادم: خلص نكضيها دلفري عادي مو مهم. سديت الثلاجه وگلت.

رواسي: اريد اكمل جامعتي بقتلي اخر سنه. ادم: اي عادي ليش لا. رواسي: شو احس كلشي ديصير فخ. ادم: لا ليش متعرفيني قابل! رواسي: اخاف متفق أنتَ وابويه عليه؟ ادم: اي نريد نذبحج بليله ظلمه ونشمر جثتج للكلاب السائبه. رواسي: عزااا صدك تحجي!! صار يضحك وهز راسه طلع من المطبخ وعافني. لميت الميز وشمرت الزباله. سويت جاي وصبيت الي واله. ورحت كعدت يمه.

بقيت احوس بمكاني اريد اروح للدكتوره. لازم اطمن على وضع الطفل. وخاصه اني جنت اخذ مخدرات لازم اعرف اذا راح يأثر او لا. بقيت متردده اسولف او لا. باوعتله وحجيت. رواسي: ادم عادي باجر تاخذني للدكتوره؟ رفع حاجبه وصار يباوعلي بشك. منتظرني احجي. اردفت. رواسي: قبل لا تصير السالفه چان عندي موعد بس ما كدرت اروح علمود هيج. ادم: يعني ماكو شي؟ رواسي: لا شنو ممكن يكون اكو. ادم: اممم، ميخالف باجر ارجع من الشغل ونروح.

بقينه كاعدين نتفرج بالتلفزيون. واني كل بالي وتفكيري برسيم وبالطفل الي ببطني. لشوكت اكدر اظم حملي اول وتالي راح تكبر بطني وينكشف كلشي. رفعت عيوني على ادم چان مركز نظراته عليه. توترت كلش منه. كمت من مكاني وگلت. رواسي: اني نعست تصبح على خير. ادم: تلاكين الخير. دخلت للغرفه و قفلت الباب عليه تحسباً لاي شي ممكن يصير. مهما يكون هوَ رجال وكل باله اني مرته ميعرف زواجنه باطل. نمت بفراشي واطلقت سراح دموعي.

اتذكر كل يوم مر واني ويه رسيم وابجي. المشكله ماكو بيناتنه مواقف حلوه كل ذكرياتي وياه سيئه بس مع ذلك ما فارگ تفكيري ولا لحظه. ما اعرف شلون نمت. كعدت الصبح على ضوالشمس داخل من الشباك انزعجت منه وكعدت افرك بعيوني. باوعت للساعه الي معلكه بالحايط. ساعه ٩ ونص الصبح. كمت من مكاني وطلعت من الغرفه. البيت فارغ واضح ادم طلع لشغله. هوَ موظف بدائره حكوميه.

كمت سلگتلي بيض وخدرت جاي. حطيتهم بصينيه ورحت كعدت بالصاله اتفرج على التلفزيون. مر الوقت بملل مو طبيعي ماعندي شي اسوي. بقيت اكلب بقنوات التلفزيون ما خليت مسلسل يعتب عليه. انفتح باب البيت و دخل ادم شايل كيس مال مطعم. كمت عليه اخذته منه گال. ادم: ناكل و اسبح بعدها نروح. رواسي: تمام. اخذت الاكل للمطبخ جهزت كلشي على الميز وصحته حتى نتغده. كملنا اكل فات هوَ يسبح واني لميت المطبخ و فتت ابدل ملابسي.

بس خلصت طلعت لكيته گاعد ينتظرني. كام بدون ميحجي شي وطلع. طلعت وراه ورحنا لعياده دكتوره نسائيه. كعدت انتظر دوري و هوَ كعد يمي. رفعت عيوني باوعتله متوتر. حسيت يعرف شي. اجه ببالي اختبار الحمل و غمضت عيوني بقوه خايفه لا يكون شافه. قاطع تفكيري صوت السكرتيره تنادي باسمي. بقه ادم ينتظرني واني دخلت. شرحتلها حالتي گالت. _تمددي على سرير الفحص. سويت مثل ما طلبت مني وكشفت عن بطني. حطت جهاز السونار وصارت تمشي على بطني وتضغط بقوه.

كررت الحركه اكثر من مره. باوعتلي وگالت. _الطفل وضعه زين ماكو اي شي يخلينا نشك. حالياً أنتِ بشهرج الثالث. رواسي: يعني مابي شي ؟؟ _لا بنتي بس اذا تردين تتأكدين اكثر سوي سونار دوبلر يبين كلشي. رواسي: اكدر اسوي هسه؟ _اي هسه انطيج ورقه تحويل و روحي على العياده تبعد عن عيادتنه مسافه قليله سوي وتعاليلي. كمت من مكاني وعدلت ملابسي. اخذت ورقه التحويل منها وطلعت. كام ادم من مكانه بس شافني اجا يمي وگال. ادم: هاا اكو شي؟؟

رواسي: طلبت سونار ثاني. ادم: الطفل بي شي؟ باوعتله بصدمه وبقيت ساكته ما حجيت شي. اردف. ادم: اعرف أنتِ حامل رواسي، كوليلي اكو شي؟ رواسي: شلون عرفت! ادم: اختبار الحمل لمنو يكون غيرج؟؟ غوركت عيوني وحجيت بتوسل. رواسي: ادم فدوه لتحجي شي والله يجبروني انزله. ادم: لو اريد احجي، چان حجيت من اول لحظه. امشي يلا خلي نسوي. طلعنا من عيادة الدكتوره ورحنا للعياده الي دزتني عليها. حجزت سره ومجان اكو احد كدامي رأساً دخلوني.

سوتلي الدوبلر وانطتني تقرير ورجعت لدكتورتي. اول ما طلعت المريضه الي يمها دخلتني اني. بقت تقره بالتقرير وتشوف بالسونار. باوعتلي وگالت. يتبع...