رواية رواسي الدهر الفصل السادس 6 - بقلم روح الدليمي

رجعت لدكتورتي. أول ما طلعت المريضة اللي يمها دخلتني. بقت تقرا بالتقرير وتشوف بالسونار. باوعتلي وقالت: "ماكو شي يستدعي للخوف مثل ما گلتلج، وضعه ممتاز. بس احتياط لكل شي ممكن يصير راح أنطيج إبر تثبيت." رواسي: "تمام، شكراً دكتورة." كتبتلي على وصفة علاج، أخذتها منها وطلعت. من الغرفة أقرا بيها. كاتبتلي حبوب فيتامينات وفوليك أسيد وإبر تثبيت. حجيت لآدم حجي الدكتورة. أخذ الوصفة مني وراح للصيدلية جابلي العلاج ورجعنا للبيت.

روتيننا ملل بملل، ماكو شي نسويه أبد. أتجنب أبقى گاعدة ويه آدم هوايه خاف يسوي أي شي بيه. أكثر وقتي بالغرفة. مر شهر على زواجنا أنا وآدم. وقررت أرجع لدوامي وجامعتي. طلعنا أنا وياه من الصبح ورحت حجيت ويه الإدارة وبالكوة لحتى اقتنعوا أرجع أداوم. اشترالي تلفون ورجع رقمي القديم من الشركة. بلشت أداوم وآدم يوديني الصبح ويرجعني. أهلي أبد ما حجيت وياهم ولا همَّ حاولوا يحجون وياي.

بعد شهر من الدوام، طلعت بَره أنتظر آدم مثل كل مرة. صرت أدور بعيوني على سيارته وشفت رسيم واگف ومنتجي على السيارة. أول ما شافني أجه باتجاهي. تراجعت وردت أدخل للجامعة مرة ثانية، بس انعتيت من إيدي وانضربت بصدره. بقى يباوع بعيوني وعاط بيه بصوت عالي. رسيم: "شلوووون تزوجتييييي وأنتِ على ذمتييي؟ ما طلگتچچچججج!!! حاولت أخلص روحي من عنده، بس بكل مرة أحاول أفلت إيدي منه يشد بقبضته عليها.

أردف بنفس النبرة: "جاوبييينييي روااااسيييي." رواسي: "عوفني رسيم دتأذيني." رسيم: "عبالچ أعوفچ بهاي السهولة؟ امشي كداميييي يلااا." دفعني كدامه، ردت أگع اله شوي. التفت عليه وعطت بيه: رواسي: "شجاااابككك؟ شرجعكككك؟ مو انسجنت أنتَ؟؟؟ رسيم: "عبالچ إذا انسجن تكدرين تاخذين راحتج من ورايه؟ رواسي: "أرجع منين ما اجيت، ما أريد أشوف وجهك روووح. هسه يجي آدم وتصير مصيبة." فتح باب السيارة وراد يصعدني بيها كوه.

بس انسحبت من إيدي. رفعت راسي على صوته. عاط برسيم: آدم: "شتسووويي هناااا؟؟؟ رسيم: "مو شغلك، صعدي رواسي." سحبني آدم خلاني وره ظهره وكال بجدية: آدم: "رواسي متجي وياك لأي مكان، روح أحسن ما أدنك بمكانك." هجم رسيم عليه وضربه وآدم رجعله الضربة. التموا العالم علينه وكل مجموعة لزمت واحد بيهم. بطني مغصتني من الخوف. باوعت لآدم وگلت: رواسي: "آدم امشي خلي نروح، حباب لتسوي مشكلة." أخذ إيدي بيده ومشينا للسيارة.

صعدت أنا وهوَ. اندار لجهته وصعد. حرك السيارة بسرعة وعاط بيه: آدم: "شيسووييي هذااا يم جامعتج؟؟؟ رواسي: "والله ما أعرف، انصدمت لما شفته." آدم: "سهلة." شال تلفونه واتصل على أحد. من خلال حجيه عرفته ديحجي ويه أبويه. گال: آدم: "أدري شلون يطلع؟ شلون ما لكوا عليه شي؟ أنتَ مو گلت مجرم ومتورط؟ استغفر الله العظيم، عمي هذا مينكدرله؟ يسحبها من بيناتنه ويرجع ياخذها. متتذكر أول مرة خطبها ورفضته شسوه؟ فرك وجهه بيده

الثانية ورجع يسوق وأردف: آدم: "مو حجي هذااا مو حجي! أحبسهااا خوما أحبسهااا. أنا أحلاها خلص، معليك أنا أحُل كل شي من جذوره. يلا سلام." سده من عنده. باوعت لآدم وحجيت متسائله: رواسي: "رسيم خاطبني قبل؟ آدم: "ع أساس متعرفين يعني؟ مو حجيتي كل شي للشرطة أنتِ؟ رواسي: "كل شي ما أعرف، فهمني! آدم: "خطبچ أكثر من مرة أبوج چان بكل مرة يرفضه. آخر مرة بيوم الي خطفچ بي من نهيت عليج أنا." رواسي: "يعني رسيم چان يحبني؟ ضحك مستهزء وكال:

آدم: "لا بس يريد ينتقم من أبوچ عن طريقي." رواسي: "شمسوي أبوي ليش؟ ضرب على الستيرن بقوة وكال: آدم: "هوَ هذا الي راح يخلي يخبّلني. أبوچ شنو مسوي حتى مخلي رسيم حتى بالاحلام يجينه." درت وجهي على الجامّة وانشغلت بتفكيري. ليش رسيم خاطبني من أبويه وما موافق؟ وشنو الشي اللي مسويه أبويه لدرجة رسيم يريد بس ينتقم منه بأي طريقة! ما أعرف شلون وصلنه للبيت. نزلت من السيارة وأخذت أغراضي ورأساً دخلت.

بوجهي فتت للغرفة، طلعت ملابس الي بدلت وتمددت بفراشي. التفكير سيطر عليه. خايفة من الجاي، ما أعرف شنو حيصير بعد! بنفس الوقت الفرحة احتلتني من شفته واگف گدام عيوني وما بيه شي. اندگت باب الغرفة. سمحتله يدخل وسحبت الغطة على روحي غطيت جسمي. أجه گعد يمي على طرف الجرباية وكال: آدم: "أهلي وأهلج جايين يمنه." رواسي: "هلا بيهم. بس شعجب؟ من تزوجنا لحد هسه محد بيهم إجه علينه؟ آدم: "نگعد نحجي ونضع النقاط على الحروف." عدلت گعدتي

ورفعت شعري عن وجهي وحجيت: رواسي: "لتگوللهم إني حامل من رسيم، الله يخليك. والله ينزلوا بأي طريقة." آدم: "ما أجيب طاري هذا الموضوع. سرج يمي ميطلع أبد. كومي مطمئنة." رواسي: "شكراً آدم." آدم: "تعرفين جنت أتمنى نعيش حياتنه بحب وفرح. بس أنتِ من يومچ متريديني." رواسي: "صدگني آدم، إني أشوفك أخويه. صعبة عليه أعيش وياك گزوجة وأنتَ بنظري أخويه." آدم: "حتى لو رسيم مجان داخل حياتچ؟

رواسي: "لا رسيم ولا غيره السبب. من إحنه صغار رابين سوى وببيت واحد لحد ما كبرنا يلا كل واحد راح ببيته الجديد ويه أهله، لذلك ما أكدر أشوفك غير أخو الي." آدم: "هاهيه رواسي، كومي بدلي وتعالي يلا لتطلعين گدامهم هيج." رواسي: "ليش بي شي لبسي؟ آدم: "شوفي روحچ بالمراية وتعرفين إذا بي أو لا. أنا أنتظرچ بالصالة." طلع من الغرفة وطبق الباب وراه. مزت من مكاني ورحت على المراية. باوعت على روحي وگلت:

رواسي: "والله مابي شي. يعني شكو يريدني أبـدل؟ ركزت على روحي أكثر. البدي محصور على جسمي ومخايل على ملابسي الداخلية مبينة. ضربت گصتي وحجيت معصبة على روحي: رواسي: "طاح حظچ رواسي، مو ببيت أهلچ أنتِ؟ شنو هذا اللبس؟ متستحين على نفسچ... عابت أي والله." فتحت الكنتور وطلعتلي دشداشة لبستها وطلعت. من الغرفة وكفت بمكاني لما اندگ الباب. راح آدم فتحه ودخلوا أمي وأبوي ووراهم عمي وزوجته. سلمت عليهم وكعدوا همَّ.

أنا دخلت للمطبخ. خدرت جاي، الشغلة الوحيدة اللي أعرف أسويها. صبيت الجاي بالاستكانات وأخذته الهم. گعدت على الكرسي وحطيت الصينية بحضني. أبوي باوعلي وكال: راشد: "روسيتي شلونچ بابا؟ نزلت راسي أبعد نظراته عني وحجيت: رواسي: "ميهم شلوني." عمي سالم گال: سالم: "ليش بابا آدم مضوجچ بشي؟ رواسي: "لا عمو، بس اللي سويتوا بيه برأيكم أكدر أكون بخير من بعده؟

راشد: "شسوينا لج، فهميني رواسي. شنو اللي سويناه غير إنو حافظنه عليچ من شخص مجرم؟ حطيت الصينية على الطبلة الصغيرة بصفي وحجيت: رواسي: "مجرم؟ متأكد أنتَ؟ إذا مجرم شلون طلع من السجن خلال كم شهر بس؟! راشد: "بس سوايته وياچ تثبت إنه شخص مجرم ولججج بنتي أفهـمي، هذا يشتغل ويه عصابة!! سالم: "احجيلنه الحقيقة بنتي وخليـنه نفتهم! رواسي: "أنتو اللي لازم تحجون مو أنا؟ رفعت عيوني باوعت لأبوي وعطت بصوت عالي:

رواسي: "فهمنييي بابا أنتَ فهمني، شنو اللي مسويه لرسيم أنتَ؟؟؟ راشد: "سالفة قديمة." باوع عمي لأبوي وكال: سالم: "شمصخم أنتَ الثاني؟؟؟ راشد: "ما أكدر أحجي أي شي، بس بنتي التهي ببيتچ وزوجچ وعوفي رسيم ميفيدچ." كمت من مكاني وحجيت بعصبية: رواسي: "تحجي كل شي هسه، لا وحق الله أسوي شي ما يعجبكم." نتر بيه بنفس النبرة: راشد: "شووو تهدديين ولججج! رواسي: "احجي كل شي وهسه." دار وجهه على أمي وبقة ساكت. گام عمي من مكانه

جره من ياخته وعاط بي: سالم: "ولككك احجي فضنيييي شنو مسوي؟؟؟ آدم: "يابه مو هيج عوفه." سالم: "خلييي يحجي لا أطيح حظه هسه." تنهد أبوي، نزل راسه وكال: راشد: "راح أحجي بس تنطوني وعد، أي حرف ما يطلع، لأن أتدمّر أنا وأنسجن! سالم: "شمسوي مصيبة احجي!!! راشد: "رسيم شاف رواسي صدفة وحبها. أجه خطبها مني ولما عرفته منو يكون رفضته. چان بكل مرة يخطبها أرفض. لحد ما إجاني بيوم وكال: 'شنو سبب رفضك الي؟

نزلت دموعه مسحهن وأردف: "بوقتها گتله إذا تعرف سبب رفضي أنتَ بنفسك راح تتركها." بقة فترة كلش طويلة ما سمعت عنه خبر ولا شفته. لحد ما إجاني بيوم وكال: 'رواسي راح تصير الي وأحرمك منها مثل ما حرمتني من أمي.'" عاط بي عمي بصوت عالي: سالم: "شنووو يعنييي، شمسويي لأمه أنتَ؟؟؟ صار يبجي وكال بنبرة حزينة: راشد: "موتتها." كلنا شهگنا مصدومين من كلامه. بقيت فاتحة عيوني على وسعها من هول الصدمة. نزلت دموعي وحجيت:

رواسي: "شلون موتتهاااا؟؟؟ بابا شدتحجي أنتَ!!! باوعتلي مرت عمي وكالت: آمنة: "رواسي بنتي شبيج اهدي، هسه نفهم كل شي." گام عليه آدم حضني يهدي بيه. كل جسمي صار يرجف من العصبية وعملت أبويه. همس بصوت ناصي: آدم: "گافي رواسي مو زين عليچ حامل." رواسي: "متسمع شنو گال؟ آدم: "بس اهدي حتى نفهم." اندار على أبويه وأردف: آدم: "عمي خلصناا واحجي ليش موتتها وشلون؟

راشد: "من بعد ما مات أبو رسيم تعرفت عليها وحبيتها. ردت أتزوجها على سنة الله ورسوله، بس هيَ رفضتني لأن متزوج. رحت عليها وتعـاركـنه وبلحظة صار كل شي." رفعت عيوني على أمي. دموعها تنزل عالصامت. تعرف كل شي وبقت ساكتة!! رواسي: "منو المجرم بيكم أنتَ لو رسيمممم! راشد: "مو قصدي والله، دفعتها وگعت وانضرب راسها بالحايط وبلحظتها ماتت." سالم: "ورسيم شلون عرف؟ راشد: "من خاله هوَ حگاله." رواسي: "طلعووو بَـررره." آدم: "سكتي عيب."

عطت بصوت عالي حسيت أحبالي الصوتيه تگطع: رواسي: "گلتتتتت طلعووو بَـررره، إذا متطلعون اني أطلع." گام عمي گال: سالم: "نشكرچ بنتي، يلا آمنة." رواسي: "مو أنتَ عمو، أبويه وأمي يطلعون. ما أريد أشوفهم بعد." راشد: "رواسي بنتي والله كل شي صار بالغلط." رواسي: "مو بنتككك إني، تنسوني خلاااص." عفتهم ودخلت للغرفة قفلت الباب عليَّ. أعصابي براس خشمي. باوعت على تلفوني. تجيني رسائل. رحت شلته من الشحن.

انصدمت بكمية الرسائل والمكالمات من رقم غريب. فتحت الواتس ورديت كتبت: رواسي: "منو؟ رأساً اتصل عليَّ. جاوبته. إجاني صوته يصيح: رسيم: "روااااسييي طلعييي بَـررره." رواسي: "شتريد مني رسيم؟ عوفني بحالي. خلال كم شهر ما بقى شي مصار بيه." رسيم: "طلعي روسيه، متبقين يمهم بعد." رواسي: "إني متزوجة رسيم، لو نسيت؟ رسيم: "خلال خمس دقايق إذا متجيني، أنا أهجم عليكم وبكيفچ بعد." سد التلفون بوجهي. بقيت حايرة ما أعرف شسوي.

شوكت أرتاح أنا؟ شوكتتت... طلعت من الغرفة رحت للصالة. چان بس آدم موجود. باوعلي وكال متسائل: آدم: "شبيچ لونچ مخطوف؟ رواسي: "رسيم بَـررره." آدم: "فوتي جوه أنتِ وقفلي الباب عليچ." رواسي: "لتأذي حباب." آدم: "فوتي گلت! عفته ورجعت دخلت لغرفتي وقـفلت الباب عليَّ مثل ما طلب مني. شوي وصار صوتهم اثنينهم واضح بالبيت. واحد يصيح على الثاني. فتحت باب الغرفة وطلعت وكفت يم باب الصالة. أسمع كلامهم.

رسيم: "لتخليني أموتككك هسه، گلتلك تطلكها وغصب عنك." آدم: "أنتَ تفهم لو لا؟ أدري شنو براسكك دماغ لو قندرة؟ رسيم: "وين ما أروح قندرة رواسي ورايه، عائلة متوارثة قنادر." آدم صار يضحك بصوت عالي وصاح: آدم: "روااااسييي تعالي هناا حَبيبتي." مديت راسي من الباب أشوفهم. رسيم نايم فوگ آدم ويضربه وآدم خربان من الضحك. دخلت للصالة تحمحت وگلت: رواسي: "جهااال أنتو والله العظيم." ابتعد رسيم عن آدم لما شافني. أجه باتجاهي. جرني

من إيدي يريد ياخذني وكال: رسيم: "يلا امشي گدامي." نترت إيدي منه وحجيت بعصبية: رواسي: "نعااال على راسك مو بس قندرة، شبيييك بابا شتحس أنتَ؟؟ رسيم: "متبقين هنااا ما أقبل." رواسي: "وأنا أنتظرك تقبل يعني؟ منو أنتَ حتى تدخل بيه! آدم: "رواسي كافي عيب عليچ." رواسي: "إني عيب عليه لو هوَ؟؟؟ رسيم: "أول مرة يحجي حجاية بيها حظ. اسمعي كلامه وسكتي أحسن من ما تنركعين بالقندرة على حلگچ." گعدت على القنفة وگلت:

رواسي: "ترا عيب عليك تهجم علينه متستحي على نفسك أنتَ؟ ولو منين تجيب المستحة وانتَ من المافيا." رسيم: "لججج والله مو مثل ما أنتِ مفكرة شبيج! رواسي: "إذا خلصت تكدر تروح يلا." گعد آدم بمكانه وكال: آدم: "كافي ترا مصختوها ثنينكم. أنتَ الثاني اكعد خلي نحجي." گعد رسيم وجه نظراته على آدم منتظره يحجي. گال: آدم: "اسمعك رسيم شنو تريد أنتَ؟ رسيم: "تطلكها وأرجعها على ذمتي." ضحك آدم وكال: آدم: "ما أكدر تعذرني."

رسيم: "غصب عنك تطلكها." آدم: "والله وغلاتها عندي ما أكدر أطلكها." سكت شوي وبقة يباوع عليه. نظرتله بمعنى لتحجي. گال: آدم: "لأنها بعدها مرتك مو مرتي." صار يباوعلي مستغرب. گمت من مكاني وحجيت بعصبية: رواسي: "ليش هيج آدممم؟؟ آدم: "حقه يعرف رواسي." رسيم: "شلون يعني؟ فهـموني انسطرت." آدم: "لأنها حامل منك، ف طلاقكم وزواجنه باطل." صار يباوعلي بنظرات حيرة. بادلته بنظرات غضب. عفتهم گاعدين وطلعت من الصالة.

فرحت لأن عرفني بعدني مرته وبنفس الوقت كارهته بسبب سوايته الي، وخايفة إذا أرجع يمه صدگ يأذيني وينتقم من أبويه بيه أنا. دخلت للحمام غسلت وجهي. طلعت من الحمام لكيته واگف ينتظرني يم الباب. سحبني لحضنه وحضني بكل قوته وكال: رسيم: "مشتاقلج روسيه." رواسي: "وخر عني ادبسز." دفعته عني بالكوه وتعديته. مشيت. صار بوجهي آدم گال: آدم: "روحي ويه رجلچ رواسي، ماكو داعي تبقين هنا بعد." رواسي: "مستثگـل گعدتي يمك ؟؟

آدم: "لا والله أبد، بعيوني أخليچ." رسيم: "حتى أفقسهن الك وأخليك أعمى." رواسي: "شعندكك هنا بعدكك؟ امشي روح ما أريدك أنا." رسيم: "الكذاب الله يحطه بالنار روسيه." رواسي: "كون تنحـرگ بنار جهنم وتتشعوط تشعوط." آدم: "گافي رواسي، يبقى زوجچ ولازم تروحين وياه. وإذا متريدين ترجعين لبيت أهلچ لحد ما تولدين بالسلامة وبعدها تطلكين من عنده." رواسي: "أحس اكو شي غلط." آدم: "مثل شنو؟

رواسي: "إني أتذكر مرة قريت إنو يقع الطلاق على المرأة الحامل." رسيم: "ميـجوز يتزوجچ وانتِ حامل أصلاً. حتى لو طلاقنا صح بس زواجكم باطل." رواسي: "اي خلص مدام متطلكين إحنه ف عوفني بحالي." آدم: "هسه شنسوي يعني؟ رواسي: "آدم إذا متريدني يمك أرجع يم أهلي عادي، بس رسيم مستحيل أرجعله." عفتهم ودخلت لغرفتي بقيت حايرة. شسوي وشنو الصح وشنو الغلط. گعدت أقره على النت أريد أعرف طلاگنه باطل لو زواجي من آدم.

قريت بأكثر من موقع إنو طلاگنه صحيح حتى لو جنت حامل، بس زواجي من آدم باطل وإذا يريدني لازم ينتظرني أولد يلا يعقد عليه مرة ثانية. شلون بلوة هاي، يارب ساعدني ولتخليني بهيج موقف. اندگت باب الغرفة. گمت فتحتها چان آدم گال: آدم: "ميـقبل يروح منا إلا ياخذچ وياه. لحد هسه مطول بالي وما سويت شي لخاطرج بس ما أريد أقهرچ." رواسي: "أحبه والله بس بعد كلام أبوي والمصيبة اللي عرفناها أخاف أروح يمه."

آدم: "خلي يعقد عليچ من جديد وروحي وياه. تحبون بعضكم وأنا شاهد على حبه الج." رواسي: "يااا حب هذا آدم يا حب فهمني، عذبني وأذاني. صح حبيته وما أعرف شلون حبيته بعد كل شي سواه بيه، بس أخاف أرجع يمه يسوي بيه أكثر من هيج. لككك كل جسمي آثار حروق وجروح لحد هسه ما راحن." آدم: "لعددد شكوو تزوجتي وفوگها حامل منه؟؟ رواسي: "كلشي غصب عني صار." آدم: "يعني متريدي؟ رواسي: "اوووف آدم أوووف لو أعرف أريده أو لا أبقى ساكتة برايك؟؟؟

آدم: "خير إن شاء الله." دار وجهه عني وراح. سديت باب الغرفة. نزعت الدشداشة أريد أغير ملابسي. گدام المراية بقيت واگفة گدام المراية وعيني على جسمي. كله آثار ضرب وحرق. شلت ملابسي لبستهن بسرعة قبل لا يدخل عليَّ ويشوفني بهل منظر هذا! مشيت بكسل وگعدت بزاوية الغرفة ولميت رجلي على صدري واسترجعت ذكرياتي ليومي الأسود... لليوم اللي غير حياتي كلها.