رواية رواسي الدهر الفصل الرابع والعشرون 24 - بقلم روح الدليمي

بقيت صافنة والصينية وكعت من ايدي، العصير والكزاز صار بكل مكان. وحدة من الكزازات جرحت رجلي. كام من مكانه واجه عليّ، سحبني من ايدي وكعدني. رسيم: بيج شي روسيه؟ باوعيلي. رفعت عيوني باوعت عليه. بدون أي تفكير، رفعت ايدي ضربته راشدي وكمت من مكاني. عطت بي: رواسي: أنتَ واحد نذل! صارلك شهرين تلعب عليه و ماخذ دور المجهول حتى تخليني أرجع أتعلق بيك وأتزوجك؟ راشد: رواسي عيب عليج! رديت عليه بنفس النبرة:

رواسي: كلكم متفقين وياه، وانتو تعرفون شكد أذاني هوَ وبعدكم مُصرين تجمعونا سوة. رسيم: أريدج اني روسيه، والله أحبج. رواسي: وأني أكرهك رسيم. عفتهم وطلعت من الاستقبال، صعدت لغرفتي. كعدت على الجرباية أهز برجلي وأباوع للجرح شلون يذب دم. معصبة منهم كلهم. كلهم يضحكون عليّ، كلهم يريدون سعادة رسيم وبس. أني محد يفكر بيه. انفتح باب الغرفة ودخل عليّ. عطت: رواسي: اطلع بَره! ما أريد أشوفك، اطلع! رسيم: روسيه خلي نحجي.

رواسي: ماكو شي نحجي بي. صدكني رسيم لو جايني بدون كذب وخداع جان ممكن تكون اكو فرصة النا. بس أنتَ بقيت تخدع بيه طول الفترة الفاتت. رسيم: متقبلين تنطيني فرصة! حرت شسوي وياج. رواسي: تطلكنا احنه، ماكو أمل نرجع خلاص، انساني. رسيم: مرة وحدة شغلي عقلج وفكري عدل، أبوس ايدج. رواسي: مو طلكتني! رسيم: كلتها الج مرة وحدة وكلتها بس لأن أنتِ ردتي تأذين روحج. أكدر أعقد عليج من جديد. أشرت على الباب ونترت بعصبية:

رواسي: اطلع بَره، ما أريد أشوفك. رسيم: خلي نتفق اتفاق. رواسي: ماكو شي نتفق عليه. رسيم: بس اسمعيني ممكن؟ رواسي: احجي، أسمعك. كمت من مكاني، نزعت الكعب شمرته ونزعت السترة. فتحت الكنتور طلعت ملابس ورجعت كعدت كدامه. رواسي: فضني، احجي. رسيم: خلي نبلش من البداية، بداية جديدة. كأن هسه دنتعرف. ثنينه نستحق هاي الفرصة، وصدكيني ما أسوي أي شي يزعلج. رواسي: ما عندي ثقة بيك. رسيم: نبني الثقة. روسيه فكري لخاطر مسك. ركزت

نظراتي بعيونه وحجيت بقلق: رواسي: رسيم أنتَ متتغير. أخاف أنطيك فرصة وترجع تأذيني مثل قبل. رسيم: والله و غلاتج عندي ميبدر مني أي تصرف يزعجج. رواسي: وإذا انعاد كل شي صار قبل؟ رسيم: مينعاد، والله ومينذكر من الأساس. رواسي: إذا كدرت تكسب گلبي بدون كذب وخداع، مستعدة أنسى كل شي ونبلش بداية جديدة. رسيم: خلي بس نرجع نعقد قبل لتخلص العدة. رواسي: ما اعرف. أخذ ايدي بين ايده، طبع بوسة عليها وكال:

رسيم: ما أريد أخسرج روسيتي. بس نعقد و هاهيه. تذكرت خطيبته. سحبت ايدي منه ونترت: رواسي: لحظة لحظة! أنتَ شلون تريدني أرجعلك وأنتَ خاطب! رسيم: مو خاطب والله. رواسي: لعد و نور؟ ضحك وكال: رسيم: بنت خالتي. رواسي: أي يعني عادي تكدر تتزوجها! رسيم: لا، ما أكدر لأنها أختي بالرضاعة. رواسي: انطيني وقتي أفكر. رسيم: ما عدنا وقت، أقل من شهر باقي وتخلص العدة. رواسي: أسبوع بس أفكر عدل. رفع اصابعه بوجهي وكال: رسيم: يومين بس، ميصيرن ٣.

رواسي: تمام، بس عوفني أفكر براحتي. لتحجي وياي ولتضغط عليّ بليز. رسيم: بليز؟ رواسي: أي بليز، لتضغط عليّ. رسيم: أمج أبوج من ذاك الصوب. احجي عدل. رواسي: متعودة، عادي. أنتَ هم تتعود. هز راسه معاجبه ومد ايده على رجلي يتفحص بالجرح. كام فتح المجر الي حاطه بي شغلات التعقيم والإسعافات الأولية. طلع معقم وشاش ولاصق طبي. كعد بالگاع وحط رجلي بحضنه. رواسي: رسيم عوفها، أني أعقمها. رسيم: لا، أني. هسه تحرگج شوي، تحملي.

فتح علبة المعقم، دار منها على الشاش وصار يمسح على الجرح بخفة. عصرت رجلي من الألم وعضيت على شفتي بقوة. لف رجلي بالشاش وحط عليه لاصق حتى مينفتح. كام من مكانه، أخذ ايدي بيده، سحبني عليه وبدون مقدمات طبع بوسة عميقة على شفايفي. دفعته عني وعطت: رواسي: حرام تبوسني، مو مرتك أني! رسيم: تخبل بعد وحدة. رواسي: اطلع بَره، أخذت راحتك أنتَ. سحبني من خصري وكال بهدوء: رسيم: يا راحتي أنتِ. أحبج.

نزل راسه على رگبتي، سحب نفس قوي. كل جسمي قشعر بسبب انفاسه الحارة. توترت وبوخت من الخجل. باسني من رگبتي بخفة وهمس بأذني: رسيم: گلبي يرجف عليج روسيه. حجيت بتوتر: رواسي: فدوه وخر عني، ميصير. رسيم: لتحرميني منج. أرجعيلي روسيه، خلي روحج بروحي. ميت أني، ميت بدونج. الدنيا كلها متسوه إذا أنتِ مو يمي. رواسي: فدوه روح، خاف أحد يجي. رسيم: محد يجي، يعرفوني يمج. رواسي: أريد أبدل، عوفني. وخر راسه عن رگبتي وبقة محاوط خصري بيده.

باسني من راسي وكال: رسيم: أجيب الشيخ يعقدلنا من جديد؟ رواسي: گتلك خليني أفكر، فدوه رسيم عوفني. رسيم: وإذا ما عفتج شتسوين؟ رواسي: أصيح وألم عليك العالم، أكلهم يريد يغتصبني. ضحك بخفة وقرب عليه، باسني من خدودي، على كل خد طبع بوسة هادئة. رسيم: أحبج. رواسي: أكرهك. رسيم: أحبج. رواسي: أكرهك. رسيم: أحبج. رواسي: أحبك. رفع حاجبه وابتسم بمكر. هزيت راسي وأردفت: رواسي: لا لا، أقصد أكرهك. من وراك غلطت. رسيم: أصدكج؟

رواسي: أي، طبعاً. ما أحبك أني. رسيم: زين ليش حاضنتني؟ عوفيني أريد أروح. انتبهت على روحي فعلاً حاضنته. وخرت ايدي وابتعدت عنه. حطيت شعري وره اذني وگلت: رواسي: روح يلا، ولتجي بعد. رسيم: يومين بس وتلكيني فوك راسج، أني والشيخ. رواسي: يجوز ما أقبل؟ رسيم: مو بكيفج حبيبتي. دخل أبويه، باوع لرسيم خزره وكال بعصبية: راشد: روح جيب الشيخ وتعال. رواسي: خلوني أفكر، شبيكم! راشد: ثنينكم أدبسزيه!

صار ساعة واكف بالباب محد بيكم انتبهلي. حايرين واحد يبوس باللاخ. رسيم: عادي، مرتي وأبوسها، أنتَ شعليك؟ راشد: من ترجع تعقد عليها عود كول مرتي. باوعلي ونتر بيه: راشد: هسه تنطيني قرارج لو ترجعيله لو كل واحد بطريقه. باوعت لرسيم، گال: رسيم: دَوافقي يا عيني. رواسي: عندي شروط. راشد: احجي يا بنتي، مو فتيتي گلبي. رواسي: انزلوا جوه، هسه أعدل روحي وأجيكم. رسيم: انزل أنتَ هسه، تعدل روحها ونجي. عاط بي أبويه وهو يضحك:

راشد: أمشي كدامي سرسري، امشي. رسيم: غير أساعدها! شنو أعوفها وحدها؟ خاف تريد تبدل، أبَدللها أني. تقرب عليه أبويه، سحبه من ياقة القميص وطلعه كدامه وهو يضحك على أبويه. سديت الباب وأني أضحك عليهم، واحد يتناكر ويه الثاني عبالك جهال. بدلت ملابسي لأن صارن كلهن عصير. لبست فستان ونزلت. دخلت عليهم، سلمت ورحت بست البنات وكعدت بين أبويه وأمي. باوعلي رسيم وكال: رسيم: روسيه. رواسي: نعم؟ رسيم: موافقة ترجعين لي؟

رواسي: ما اعرف. وإذا أوافق ف عندي هوايه شروط. غسان: شروطج يتنفذن كلهن، وأخذيها كلمة مني. رواسي: والنعم منك. بس رسيم، ما عندي ثقة بي. رسيم: حلفتلج بأغلى شي عندي، كلشي صار قبل لا ينعاد ولا ينذكر. جميله: وإذا ما كدرت تكون كد كلمتك؟ محمد: مستحيل يكسرها أو يزعلها بأي شي. محد شافه شلون صار بفراكها. رواسي: يستاهل حتى يتعلم شلون يلزم أعصابه ويعوف النسوان. رسيم: يا طلابة النسوان؟ رواسي: شنو كذب؟

مو تزوجتني وأنتَ متزوج بدون ما تكلي، ومن اجيت لاهلي أنتَ سافرت ويه هدى؟ رسيم: سافرت ويه هدى صح، بس ما شفتها بعد ولا شافتني. رواسي: وهيَ؟ من كذبت عليه كتلي طلكتها وطلعت ممطلكها ومكعدها وحدة. رسيم: گتلج ما كدرت أطلقها، خفت عليها من أهلها. قاطعني أبويه وكال بجدية: راشد: هسه عوفوا كل شي قديم وركزوا على حياتكم الجديدة. كلتي عندي شروط، احجي شروطج خلي يفهم شنو تردين. رسيم: موافق عليهن كلهن بدون ما أسمع.

رواسي: بس هم أحجيهن حتى تشوف روحك كدها لو لا. رسيم: أسمعج بكل ممنونية. ركزت نظراتي بعيونه وحجيت بجدية:

رواسي: أول شي تجيب مشية جبيرة تسد الشارع كله وتجي تخطبني من أبويه على حسب الأصول. ثاني شي تسويلي كل مراسيم الزواج من الخطوبة للعرس. ثالث شي تترك شغلك مال مافيات. رابع شي عصبيتك تسيطر عليها، وإيدك ممنوع ترفعها عليّ، صوتك ممنوع يعلى عليّ كدام أي بشر. من تريد تتعارك وياي، تنتظر لليل من نكون بغرفتنا وبابنا مسدود، تحجيلي شنو التصرف السويته وزعجك مني بدون صياح. رسيم: تم، تأمرين أمر.

رواسي: إذا تحس عقلك صار يفكر بغيري بنفس اللحظة طلكني. ما أبقى وياك وأنتَ تفكيرك يم غير وحدة. رسيم: ما صارت قبل حتى تصير. رواسي: وشغلي، أرجع أشتغل وممنوع تمنعني منه. رسيم: ما أمنعج، هذا حقج. درستي وتعبتي مو حتى تكعدين بالبيت. رواسي: هذا الي عندي. إذا تشوف نفسك كفو وكدها، أني موافقة. بس إذا تحس بروحك متكدر على شرط منهن، ف اطلع من حياتي للأبد. رسيم: أنفذ كل شرط بكل حب وممنونية. رواسي: تمام. كمت من مكاني وأردفت بهدوء:

رواسي: أترخص منكم، أروح أشوف مسك. طلعت من يمهم ورحت للصالة، شفت مسك بعدها نايمة. كعدت يمها ونزلت دموعي. رواسي: كله يهون لخاطرج، المهم أشوفج فرحانة. دخلن البنات عليّ وأمي وياهن. مسحت دموعي وابتسمت بوجههم. عذراء: والله فرحانة الكم من كل گلبي. الله يسعدكم. رواسي: أني مو فرحانة. رشا: ليش ولج؟ رواسي: ما عندي ثقة بي للأسف. خايفة لا يعيد كل شي.

نور: ابني الثقة من جديد. رسيم يحبج هوايه والله. ٢٤ ساعة يسولف بيج ويتمنى بس ترجعون. عذراء: بيوم الي طلگج ارتفع السكر عنده والليل كله هوَ بالمستشفى، فد مرة تعب. رواسي: وثاني يوم يكلكم أريد تخطبولي. ضحكت نور وكالت: نور: صراحة أني اقترحت عليه هاي الفكرة. كتله أني راح أجي وأعرفها عليّ بصفتي خطيبتك، حتى تغارين عليه وترجعيله. رشا: وأنتِ تحبي، رواسي. واضح بعيونج. رواسي: الحب مو كل شي والله.

بقوا كاعدين يمنه ساعة وبعدها طلعوا. رسيم وأبويه اتفقوا على كل شي، وكله بعد يومين يجون مشية ويخطبوني من جديد. التهينا بالبيت والتحضيرات. أمي سوت حملة تنظيف على كل البيت. ما أعرف منو كايللها الزلم راح يفترون بالبيت ويشوفوا نظيف لو لا. قبل يوم المشية بليل گاعدة بغرفتي وفاتحة كام ويه البنات. اندك الباب ودخل أبويه. البنات كلهن سكتن. عفت تلفوني وكمت عليه. رواسي: هاا حبيبي، شو منايم؟ راشد: رسيم خابرني. رواسي: شيريد؟

راشد: يكول باجر تعقدون. راد أنطيج خبر لأن أنتِ متردين عليه. رواسي: شبي مستعجل؟ يجوز أرفض؟ رفع اصبعه بوجهي وحجه بجدية: راشد: إذا ناويه ترفضين كولي من هسه حتى ليش يجون وتخجلين العالم. شيوخ وناس واصلين كلهم راح يجون. إذا ببالج هيج فكرة شيليها أحسن، لو كولي ما أريده حتى أخابره وما محد بيهم يجي. عيب علينا نرفض والعالم كلها جايه علمودج أنتِ. رواسي: لا، خلص بكيفكم. انتو شنو تشوفوا مناسب، أني وياكم.

أخذني بحضنه وباسني من راسي. راشد: إذا متردي كولي بنتي، منجبرج إحنه. بس شفتي هوَ شلون رايدج وصار هوايه يحاول وياج حتى ترجعيله. رواسي: إذا أرجعله ف علمود مسك لأن متعلقة بي هوايه. راشد: إذا هيج مترتاحون يا بنتي. أنتِ تحبي لو لا؟ نزلت راسي خجلانة من عنده. رفع راسي بيده، ضحك عليه وأردف: راشد: احجي ليش خجلانة؟ قبل يومين شبعج بوس وأنتِ متسرسحة بين ايده. رواسي: هوَ أدبسز، أني معليه. راشد: أي والله، سرسري مسقط فد مرة.

رواسي: خايفة بابا. راشد: لتخافين روسيه، أني متأكد رسيم راح يحافظ عليج. يحبج ويخاف عليج وعلى زعلج. قبل الانتقام، عامي عيونه، بس هسه كل شي تغير. رواسي: ما اعرف. راشد: أرجع أسئلج، تحبي أنتِ؟ رواسي: يمكن. ضحك بخفة وكال: راشد: عيونج هيَ تحجي الجواب. وصلني. باسني من راسي وأردف: راشد: نامي حبيبتي ولتفكرين بشي. رواسي: إن شاء الله. تصبحين على خير حبيبي. راشد: وأنتِ بخير.

طلع من الغرفة وسد الباب. رجعت لمكاني، شلت التلفون. لكيت البنات بعدهن على الخط، حجيت وياهن شوية وبعدها سديته ونمت. كعدت الصبح على صوت أمي، خبصتني خبص. جميله: روسيه كومي، أمي وراج كومه تحضير. فركت عيوني ورديت عليها بصوت ناعس: رواسي: شبيج امي من صبح الله، عوفيني أنام شوي. جميله: كومي، راح يحجون بعد شوي وأنتِ بعدج. شلت تلفوني باوعت للساعة، گمزت من فراشي وعطت: رواسي: ساعة بـ ٢ ليش ما كعدتيني من وكت؟

جميله: عجزت أكعدج وأنتِ نايمة. مسك اجتج، كلتيلها روحي هسه أجى ورجعتي نمتي. رواسي: خلي أفوت أسبح وأجهز روحي. دخلت للحمام سبحت بسرعة وطلعت مخبوصة خبص. لبست قفطان مغربي أبيض ومطرز بذهبي علمود الصور يطلعن حلوات من نعقد. نشفت شعري بالشسوار ومشطته. بقيت حايرة شنو أسوي شعري. اندكت باب غرفتي ودخلن البنات يهلهلن. ضحكت عليهن وگلت: رواسي: جنت أنتظر الهلهولة حتى أعيش الأجواء.

نارين: رواسي، عوفي رسيم وتعالي أزوجج لأبويه. مغرمة بجمالج، ما أريد تضيعين من أيدنه. ضربتها ماري على ظهرها وعاطت بيها: ماريا: هيَ تريدلها حجة حتى تعوف رسيم. مو زين وافقت ترجعله. رواسي: خايفة والله. نرجس: لتخافين و أنسي كل شي قديم، فكري بالحاضر والمستقبل. أجت نارين وكفت ورايه، حضنتني وكالت بتوتر: نارين: روسيه، أريد أعترف لج بفد شي صغيرون. درت روحي عليها ورديت متسائلة: رواسي: شنو؟ شمسوية؟ اعترفي! ضحكت وكالت:

نارين: أني جنت أعرف المجهول هوَ نفسه رسيم. نرجس: كذابة! نارين: مو باعي، خلي أحجيلج. رواسي: احجي حتى أعرف بشنو أضربج. نارين: خابرني گال يريد نلتقي. اتفقنا ورحنا سوة لمطعم. وطلب مني أساعده حتى يخليج تحبي مرة ثانية. ماريا: يا حقيرة! ليش ما كلتيلنه؟ نارين: أنتِ متثبت حجاية بحلگج، رأساً تجفصين وتكولين لرواسي ونرجس. متحب رسيم، ف ما حجيت. رواسي: بشني ساعدتي أنتِ؟ بعدت عني وكفت يم الجرباية وكالت:

نارين: اقترحت عليه شخصية المجهول وحجيتله شنو الشغلات الي عاجبتج، وهوَ صار يدزهن الج هدايا. بقيت أباوع عليها حايرة. أفرح لو أزعل. مشيت عليها وگلت: رواسي: تعاي أنطيني حضن يلا. حضنتها ومديت ايدي على خصرها، كرصتها بقوة. ابتعدت عني تفرك بخصرها ومغمضة عيونها من الوجع. نارين: مو هيج يا حقيرة! رواسي: تستاهلين حبيبي. ضحكت عليها ورجعت كدام المرايا. رواسي: شأسوي شعري؟ ماري: سوي بالفير خصلات ناعمة. تعاي أني أسويلج.

سحبت الكرسي كعدت عليه وهي صارت ورايه تسويلي بشعري. نرجس طلعتلي صبغ أظافر وكعدت تصبغلي بأظافري، ونارين تگلب بتلفونها تختارلي مكياج مناسب. سمعت صوت سيارات بَره. عطت بتوتر: رواسي: اجو ولكم اجو!

بكل فضول وكفنه بالشباك نباوع عليهم. فتحت تلفوني وصرت أصور لحظة وصولهم. السيارات ترسن الشارع ترس، كل سيارة ينزل منها ٤ أو ٥ أشخاص. وأخيراً طبگت سيارته. نزل منها هوَ وأخوانه وياهم اثنين ما عرفتهم. رفع عيونه يباوع على شباك غرفتي، شافني واكفة. ضحك وغمزلي. رفعتله ايدي وسويتله "أوكي". طلع أبويه من البيت يرحب بيهم ودخلهم للاستقبال. نرجس: يعني سوري كلش بس رسيم غثيث. رواسي: أتفق.

نارين: انجبي أنتِ وياها، وأنتِ تعالي يلا خلي نكملج بسرعة، بقالج شوية. رجعت كعدت ونارين وكفت تسويلي مكياجي وماري تعدل بشعري. كملت كل شي وصعدت أمي. جميله: روسيه ماما، يلا انزلوا أنتِ والبنات. رواسي: تمام امي، فد شوي ننزل. طلعت أمي، باوعت على البنات وكلتلهم: رواسي: بنات متوترة. ماري: ماكو داعي تتوترين، بالعكس تونسي وضحكي. انطي نفسج فرصة تعيشين كل هاي اللحظات الحلوة. وامشوا ننزل يلا.

نزلت واني أحاول أتصنع ضحكتي. سمعت صوت هلاهل ويه نزولتي. باوعت مرت عمي ونسوان ولدها وعذراء ورشا ونور وباقي أقاربهم كلهم موجودين. كعدت بمكاني والبنات بلشوا يركصون. نص ساعة واجت أمي گالت: جميله: يلا ماما، راح يعقدلكم الشيخ. گمت كعدت يم باب الاستقبال ورجلي حطيتهم بمي وورد. اجت عذراء حطت بحضني قرآن واسمع صوت الشيخ وهوَ يردد آيات من القرآن. صفنت وأحس بضربه من أمي وهيَ تكلي: جميله: ردي موافقة، وأنتَ وكيل.

رديت الموافقة واعتلت صوت الهلاهل. رجعت كعدت بمكاني وصاحت نارين: نارين: راح يدخل العريس، بنات. توترت وعيني على الباب. دخل رسيم يمشي بخطوات ثابتة. نظراته متركزة عليّ وينظرلي بكل حب. تقرب باسني من راسي. كعد يمي وهمسلي: رسيم: مو كلتي تعال تزوجني؟ أريد أنكد هاي. أني جيت حبيبتي. رواسي: أني طلبت من المجهول مو منك.

ضحك وسكت عني. جابو الحلقات ولبسني الحلقة. باس ايدي. اندار أخذه العقد من رشا وصعد ايده يلبسني ياه. قرب روحه عليّ بحجة يسد بالعقد. انفاسه الحارة تضرب برگبتي. لبسني ياه وطبع بوسة بدون ما أحد ينتبه عليه. سيطرت على نفسي وحجيت بهدوء: رواسي: رسيم لا تصير أدبسز. ضحك وكال بمكر: رسيم: بعدج ما شفتي الأدبسز الحقيقي.

اجت رشا گومتني وصاحت: رسيم حتى نركص. ركصنه شوي. وكف وصاح على أمي وحجه وياها بصوت ناصي. هزت راسها أمي وهوَ اخذ ايدي وسحبني من بينهم. صعدنا لغرفتي، دخلني وسد الباب. رواسي: قنادر عليك رسيم إذا تصير أدبسز. ما اهتم لكلامي، يتقرب واني أرجع. آخر شي لزمني من خصري، باسني براسي ونطق كلامه بخدر: رسيم: أحبج روسيتي ومستحيل أرجع أضيعج من أيدي أو أذيج.

طبع بوسة على شفتي وتعمق بيها. شلت ايدي أدفع بي وهوَ ما مهتم ومستمر يبوس. ابتعد وخله كصته على كصتي. دفعته أرزل: رواسي: شكد سرسري وما تستحي. رسيم: شرأيك نعيدها حبيبي؟ أدفع بي حتى يطلع وأرزل بي وهو يضحك. نزل جوه قبلي. عدلت روحي نزلت وراه. كعدت يم البنات. غمزلتي نارين وهي تكول: نارين: شصار؟ احجي. ما أكول لا لحد. رواسي: من تتزوجين تعرفين شيصير. نارين: لو متزوجة أبويه جان هو كال شصار.

ضحكو عليها وأجو غسان ومحمد حتى يباركوني وطلعوا كلهم. بقينة أني والبنات كعدنه نسولف ونضحك. اتصل دِلهَام على ماري حتى ياخذها وياه، طلعوا وطلعت وراهم. شفته نزل واجه باتجاهي. ابتسملي وكال: دِلهَام: مبروك رواسي، يارب أشوفج داىما سعيدة. رواسي: الله يبارك بيك دِلهَام، يوم الألك. طلعوا واني صعدت لغرفتي تعبانة. بدلت ونمت بسريري. سمعت صوت تلفوني يدك. شلته واني أشوف المتصل رسيم. جاوبترواسي: نعم استاذ رسيم.

رسيم: الله ينعم عليج خطيبتي، شلونج؟ رواسي: الحمد لله، أريد أنام. رسيم: رواسي إذا لهسه زعلانه وعد مني الج راح أرجع أزرع الثقة بيناتنه وأحبج مثل قبل وأكثر. رواسي: أتمنى هذا الشي، رسيم. الي سويته خلاني أفقد ثقتي بيك. رسيم: صدكيني راح يتغير كل شي. روحي نامي حبيبتي، وأني أجي أشوفج الصبح. تصبحين على خير، أحبج. رواسي: تمام، وأنتَ من أهله. كعدت الصبح مسك نايمة بصفي. دخلت للحمام سبحت ونشفت شعري ونزلت. أمي وأبويه كاعدين.

رواسي: صباح الخير. ردوا وصاحني أبويه. راشد: تعالي بنتي اكعدي، تريكيك. كعدت بصفه وهو يسألني: راشد: شلونج اليوم؟ نمتي زين؟ رواسي: الحمد لله زينة. أي. دك تلفوني، باوعت رسيم ديتصل عليّ. گمت من يمهم ورديت عليه. رواسي: نعم. رسيم: شبيج حبيبي؟ رواسي: مابيه شي، شكو متصل؟ سمعت صوت ضربة وكال: رسيم: هاا، اجه دور النكد من هسه؟ نترت بي: رواسي: شقصدك، أني نكدية؟ ضحك ورد عليه: رسيم: لا حبيبي، أني أنكد عليج مو أنتِ. رواسي: خوش.

رسيم: وصلت اني، فتحيلي الباب أريد أصبحت بوجهج. رحت على الباب وكفت يمه وحجيت: رواسي: شعندك جاي خير يابه؟ رسيم: من أشوفج أگلج شعندي. سده من عندي وسمعت صوته. فتحت الباب دخل. سحبني من خصري باسني وكال: رسيم: هسه أكدر أكول صباح الراحة يا راحتي. ابتعدت عنه ورديت عليه واني أمشي كدامه: رواسي: صباح الخير. دخلنا للصالة. فتحت عيوني مصدومة لما تقدم على أبويه. باس راسه وسوه نفس الشي ويه أمي. كعد وكاللهم:

رسيم: شلونك عمي، شلونج عمتي. ضحك أبويه ورد عليه: راشد: بخير الحمد لله. جميله: الحمد لله ابني، أنتَ شلونك؟ رسيم: طول ما روسيه ويايه أني بخير ونعمة. سويت حركة بحلگي تدل على عدم اهتمامي. أردف: رسيم: روسيه، حظري روحج الأسبوع الجاي حفلة المهر. وهل يومين نعقد بالمحكمة إن شاء الله. عطت بصدمة: رواسي: شنو شبيك مضروب على راسك؟ ايده على راسه يتفحصه وكال: رسيم: لا مابيه شي. رواسي: ترا لا تعبالك عقدنا وهيج يعني أني سامحتك.

راشد: روسيتي مو كلنه ننسى كل شي قديم ونركز على الجديد؟ رواسي: كل ما أشوفه أرجع أحس بنفس الألم والقهر الي عشته بسببه. رسيم: يمكن أبوچ وأمج يزعلون من كلامي، بس أني تناسيت كل شي لخاطرج. أمي ماتت على أيد أبوچ وأمج تكتمت على الموضوع، بس كل حقد بداخلي مابقئ تجاههم. والله يشهد على كلامي.

رواسي: ما بقيت شي ما سويته بس حتى أنسى تعذيبك الي. حاولت بس ما كدرت. نسيت كل شي سويته بيه، ونسيت خداعك الي وكذبك عليّ، إلا تعذيبك ما كدرت أنساه. وما أتوقع راح أنساه بيوم ويبقى عندي خوف منك لا هم ترجع تعذبني مرة ثانية. كام من مكانه وكال: رسيم: من رخصتكم، بس أتوضى وأرجع. طلع من الصالة راح على الحمام. باوعلي أبويه وكال: راشد: أنطي آخر فرصة، وإذا غلط بحقج غلط صغير يحلم ترجعيله بعد. وحتى بالعراق ما أبقيج.

ردت أمي مؤيدة كلامه: جميله: يا حبيبتي فكري عدل، وخلي بنتج كدامج قبل كل شي. دتشوفيها شلون متعلقة بأبوها مع إنو ما صارله هوايه من دخل حياتها وعرفته. ومثل ما گال أبوج، بس يفكر يغلط بحقج أو يأذيج راح يلگانه احنه بوجهه. صفنت عليهم لثواني وحجيت: رواسي: هيج رأيكم؟ راشد: أي، وصدكيني رسيم يحبج. ومثل ما متأكد من وجودج كدامي، متأكد رسيم مستحيل يأذيج بعد ولا يزعلج. ردت أحجي بس قاطعني رسيم گال وهوَ ينزل برداناتَه:

رسيم: عمه وين القرآن الكريم؟ چامت من مكانها وكالت: جميله: عفته بالمطبخ، هسه أجيبه. راحت جابته ورجعت أخذه من أيدها، باسه وحطه على راسه. لزمه بأيد وحدة، والأيد الثانية حطها فوكاه. وكف كدامي، باوع بعيوني وكال:

رسيم: أقسم لج بكتاب الله ما أأذيج بيوم أبد، ولا أزعلج. أحبج وراح أبقى أحبج لحد آخر شهگة نفس تطلع مني. أقسم بكتاب عيني متنظر لغيرج أبد ولا أخونج بيوم من الأيام. راح أبقى محافظ عليج طول عمري وأسعى لسعادتج أنتِ ومسك، وإن شاء الله أطفالنه البقية. رجع باس القرآن وحطه على الرف فوك التلفزيون. كعد بمكانه وأردف: رسيم: أتمنى تسامحيني على كل شي وتنسين الفات كله. أبويه كام من مكانه أشر لامي وكال:

راشد: كومي نعوفهم وحدةم يتفاهمون بيناتهم. باوعله رسيم وكال: رسيم: عمي، أخذها وأطلعوا جيبوا مسواك للبيت، أكيد عدكم نقص. ضحكت أمي وكالتله: جميله: لا، كل شي موجود. أول بارحة جاب مسواك. رسيم: شوفي تأكدي، لازم تلكين نقص منا منا. راشد: تطردنه من بيتنه سرسري؟ رسيم: حقك عليه عمي الغالي، بس إفهموا عاد مو شلعتوا گلبي.

ضحكوا أمي وأبويه وطلعوا من الصالة وطبقوا الباب وراهم. كام من مكانه وكف كدامي، كومني وأخذني بحضنه. حضني بكل قوته حتى نفسي انكتم. ضربته على ظهره. ابتعد عني شوي وكال: رسيم: صايرة عنيفة روسيه، إيدج والضرب. رواسي: تريد قنادر لو ضرب؟ بكيفك، ثنينهن متوفرات.

مد ايده صار يمشي أصابعه بكل خفة على وجهي واستقر على شفتي، صار يمسح عليها بطرف إصبعه. غمضت عيوني لما شفتي صارت بين شفته وإيده تمشي على ظهري بهدوء. اختفيت عن العالم كله، صرنا بعالم بس أني وياه وحدنا. ابتعد عني، حط گصته على گصتي يضبط انفاسه السريعة. رجع يطبع بوسات متفرقة على كامل وجهي، ويه كل بوسة يهمس بكلمة "أحبج". دفعته بخفة، ابعده عني وگلت: رواسي: كافي، لتصير أدبسز. رسيم: تحبيني روسيه؟ رواسي: لا. ابتسم ابتسامة خفيفة:

رسيم: يلا، عندي وقت أخليج تحبيني. رواسي: ما أحبك، أحب المجهول الرومانسي أبو الهدايا. رسيم: والمجهول يموت عليج روسيته. رواسي: أعرف، بس يا ترى راح يعوضني عن كل شي فات؟ رسيم: يعوضج شوي شوي، وبلش بأول شغلة. رواسي: شنو هيَ؟ باسني بهدوء وكال: رسيم: أعيشج كل مشاعر الخطوبة، كل شي تتمنيه أسوي الج. أصيرلج مصباح سحري، أنتِ اطلبي وأني أنفذلج. ضحكت وگتله: رواسي: قصدك تصير المارد السحري؟ رسيم: مو چان جني، شوكت صار مارد؟

رواسي: الجني مالي أنتَ. كعد على القنفة وسحبني كعدني بحضنه. باسني من رگبتي وكال بجدية: رسيم: أني وعدتج أنفذلج كل شي تطلبين، بس شغلة وحدة ما أكدرلها وأتمنى تعذريني منها. رفعت حاجبي وحجيت متسائلة: رواسي: شنو؟ تريد تتزوج؟ رسيم: عندي أنتِ تسوين كل بنات العالم، روسيتي ما أبَدلج بأي وحدة. رواسي: شنو لعد! رجع باسني بهدوء ورد عليه: رسيم: شغلي. گمت من حضنه وضحكت مستهزئة: رواسي: مو گتلك أنتَ متتغير، وفوقاها حلفت بالقرآن.

رسيم: والله وغلاتج عندي مو سهل أتركه هيج. روسيه شغلي صعب وخطير، كله ويه العصابات. إذا أسحب روحي منهم يخلصون عليّ وعلى عائلتي، وگتلج هل شي من قبل. رواسي: وتالي شلون لعد؟ رسيم: ما أوعدج، بس أحاول علمودج. صدكيني لو الأذية بس الي تصير، أعوفهم اليوم قبل باجر، بس أنتوا هم تتأذون وتنتهي حياتكم بسببي. ومستحيل اسمح بهذا الشي. كعدت يمه وصرت أباعله حايرة. استسلمت وحجيت: رواسي: خلص، عوف الموضوع هذا ولا كأن شرطت عليك هذا الشرط.

أخذ ايدي قربها من شفايفه، طبع بوسة عليها وكال: رسيم: هسه موافقة علمود الحفلة؟ رواسي: ما ألحك بأسبوع واحد. رسيم: تلحكين، لتصعبيها حبيبي. رواسي: بس مو هسه العرس، بعد أريد أستمتع بفترة الخطوبة. رسيم: طك گلبي عليج والله، أريد نرجع ببيت واحد وبغرفة وحدة. رواسي: عادي، هسه احنه ببيت واحد وبغرفة وحدة. قرب عليه، عضني من خدي وكال مستسلم: رسيم: أويلي منج روسيه، أويلي. بس مو أكثر من شهرين. رواسي: لا، ٦ شهور أقل شي.

رسيم: رواسي، وصلت حدها عندي. بعد ما أتحمل. بسته من شفته، بوسة سريعة، وحجيت بدلع: رواسي: الجني مالي يمكن بعد ميريد يحقق أمنياتي. تجرأت وكعدت بحضنه، وجهي بوجهه. بكل هدوء، نزلت راسي على رگبته، طبعت عليها بوسات ممتالية. حضني من خصري وگلبني على القنفة وصار فوكايه. رسيم: ليش تعذبيني وأنتِ بعيدة عني؟ رواسي: وأنتَ ليش تعذبني ومتحقق أمنياتي؟ رسيم: صايرين يابه صايرين، هاهيه مثل ما تريدين أنتِ.

قرب روحه يريد يبوسني وانفتح الباب علينه. ابتعدت عني رأساً، عدلت كعدتي وگلت: رواسي: مسوكه ماما، صح النوم تعالي. فتحتلها ايدي، اجت تركض أخذتها بحضني وصرت أبوس بيها وهيَ حضنتني بقوة وباستني بقوة. رسيم: وأني مالي بوسة وحضن؟

شمرت روحها بحضن رسيم وصارت تبوس بي وحضنتنه. صفنت عليهم والابتسامة ما فارگتني. مر الأسبوع بسرعة بين عقد المحكمة وتحضيرات لحفلة المهر. حجزت صالون واشتريت فستان بسيط. ماري والبنات اهتموا بحجز القاعة والتزيين، مهتمين بأدق التفاصيل. كلش أثق بذوقهم، جنت مطمئنة كل شي راح يكون من أحلى وأحسن شي.

أجه يوم الحفلة. كعدت من الصبح، أخذت أغراضي وأجاني رسيم وياه رشا وعذراء ونور وأخذنا للمركز. ماري والبنات أجو سوة. بلشوا بيه أول شي، والبنات بقوا ينتظرون يخلصون الزبائن القبلهن.

سويت شعري ويفي بسيط ومرفوع نص شعر. مكياجي ألوان ترابية ترهم لفستاني الذهبي. كملت ووكفت كدام المرايا أباع على روحي والفرحة غامرتني. البنات هم خلصوا، وحدة تكول للثانية أني أحلى منج. اخذنا صور هوايه لحد ما خابر رسيم يبلغني بوصوله. طلعنا من المركز، لكيته واكف منتجي على سيارة والجكارة بيده. بس شافني شمرها بعيد وأجه يمشي باتجاهي وعيونه متشوف غيري. صار كدامي، لزم ايدي قربني عليه وطبع بوسة على راسي وكال بصوت بي رجفة:

رسيم: روسيتي، جمالج يذبح. خفي علينه شوي. رواسي: وأنتَ طالع صاك مصكصك، أووف بويه. أتسرّسح على الصاكين. عاطت نارين من يمه: نارين: هيوو، ترا أحنه هنا. شبيكم بنص الشارع؟ رد عليها بدون ما يرفع نظراته عني: رسيم: لا عيني، تشوف غيرها ولا أذني تسمع لغيرها.

صار بصفي، مديت ايدي حضنت ايده ومشينه للسيارة، وأصوات الهلاهل وهوسات البنات ورانه. صعدن كلهن ويه ماري بسيارتها، وأني ورسيم بسيارته. شغل أغاني وإيده بإيدي طول الطريق، كل شوي يرفعها يبوسها ويبقه حاضنها يم گلبه.

بعد مده وصلنا للقاعة، لكينه الكل واصل قبلنا. بقينه ننتظر خمس دقايق ودخلنا أني وياه. الابتسامة مرسومة على وجهنا والفرحة واضحة بعيونه. توسطنا القاعة والمصورة كدامنة تصور بينه. صرنه نركص أني وياه على أغنية "ع بالي حبيبي" لآليسا. أردد بكلمات الأغنية وهوَ مبتسم لي بحب:

رواسي: ع بالي حبيبي، ع بالي حبيبي، إغمرك ما إتركك، إسرقك ما إرجعك، إحبسك ما إطلعك، من قلبي ولا يوم. أخطفلك نظراتك، ضحكاتك، حركاتك، علقهن بغرفتي، نيمهن ع فرشتي، إحلمهن بغفوتي، تَحلى بعيني النوم. ع بالي حبيبي. رفع ايدي ليفوك وافتريت وسحبني، حاوطني من خصري وأني حاوطت رگبته بيدي وكملت الأغنية:

رواسي: ليلة اللي إلبسلك الأبيض، وصير ملكك والدنيّ تشهد. وجيب منك إنت، طفلك إنت، متلك إنت، ع بالي حبيبي. أعيش حدك عمر أو أكتر، وحبي يكبر كل ما نكبر. وشيب لما تشيب، عمري يغيب لما تغيب، ع بالي حبيبي.

بكل جرأة طبع بوسة عميقة على شفايفي وابتعد عني. كملنا رگصتنا لحد نهاية الأغنية. اشتغلت أغاني عراقية وإخوان رسيم دخلوا بيناتنه يركصون. سحبوني مني يركصون وياه. أجن البنات كابلني وصرنا نركص. خلصت حفلتنا بين الركص والأكل والكيكة والفرحة مالتنا كلنا.

مرت فتره سافرت بيها لأحد الدول بس حتى أختار بدلة عرسي مناك. أمي وماري شاركوني رحلة البحث. بعد أسبوع من البحث المستمر وفرة السوق، اختاريت بدلة سحرتني من أول لحظة عيني صارت عليها. فخمة كلش، حسيتها تكول اخذيني أني الي راح أخليج مثل الأميرات بعرسج. وأثناء سفري صارت مظاهرات تشرين ببغداد. بالبداية الوضع طبيعي، بعد فترة رجعت العالم تتظاهر وهنا كل شي انگلب. بدت أعمال الشغب وقتلهم للشعب بكل دم بارد. العالم صارت تموت بس لأن

طلعت تطالب بحقها. قررنا أني ودِلهَام وكم شخص من زملائنا نطلع نقدم مساعدات ونساعد الناس الي تتصاب أو يصير بيهم أي شي. هذا أبسط شي نكدر نقدمه لشباب وبنات بلدنا. حتى رسيم وأدم وأخوانهم جانو طول الوقت همَّ بساحة التظاهرات. تواصلنا قليل بحكم أماكنه المتباعدة. صرنا كل يوم احنه نتواجد بساحة التظاهرات. الوضع مخيف بشكل مو طبيعي. الحكومة حارت شلون تأذي الشعب،

استخدمت أبشع الأنواع: طلق حي، دخانيات، قناصين، خطف وتعذيب وغيرها وغيرها. بكل مرة نفشل بإنقاذ حياة شخص، انهار من البجي وأحط ايدي على گلبي خايفة لا أحد من عدنا يصير بي شي. واكفة داأسعف بنية متصاوبة، رجع الطلق بشكل مخيف. وكع واحد من الولد كدامنه، ركض عليه دِلهَام حتى يساعده. قبل ليوصل يمه، وكف بمكانه لثواني معدودة، وفجأة وكع بالگاع والدم معبي التيشيرت مالته. يتبع...