رواية رواسي الدهر الفصل السابع عشر 17 - بقلم روح الدليمي

طلعت وراه بس ما لحكت عليه. چان رايح. أول ما دخلت للبيت استلمتني أمي صياح ورزايل. جميله: انتِ بس فهميني شنو تردين بالضبط؟ يجيج مو راضيه يعوفج مو راضيه. شنوو يرضيج رواسي؟ باوعتلها بعيوني الدامعه وحجيت بقهر. رواسي: احبه بس ما اريده. كل لمسه منه وكل حجايه تذكرني باللي سواه بيه! ما اكدر اطلعهن من بالي. كعدت على القنفه واردفت بنفس النبره.

رواسي: كل ما تجي عيني بعينه اتذكر شلون عذبني. احاول انسى وأتناسى ممكن لأيام بس أندم على قربي منه. جميله: جان لا تزوجتي! ليش رجعتيله اذا هيج رواسي؟ ليششش خليتي و خليتينه بهيج موقف! لطمت على وجهي بكل قوتي وصرت أصرخ بحرگه گلب. ضربت على گلبي بقوه وحجيت بصياح. رواسي: گلبي ولج يمه گلبي يريده مو بيدي. عذبني دمرني اعرف والله اعرف بس تعاي فهمي گلبي هالشييي. غمتني بيدها وكالت. جميله: هوَ الجلب يحب خناگه.

انهد حيلي تعبت من كثر اللطم والصياح. اجت يمي حضنتني وبجيت بحضنها وحجيت بقهر. رواسي: شسوي يمه شلون أتصرف، انصحيني. دليني على الطريق الصح تايهه اني وضيعت طريقي. مسحت على راسي بهدوء وكالت. جميله: رسيم يحبج ومن زمان هوايه رواسي. رواسي: لعد ليش ما وافقتوا عليه من البدايه، ليش خليتوا يخطفني ويعذبني؟

جميله: خفنه عليج منه من عرف الحقيقه. هوَ حلف ينتقم، خوفنه چان بمكانه خطفج وعذبج شهور. ابوج يدور مكانج. چان راسم ومخطط لكل شي لدرجه حتى الشرطه ما كدروا يلكون اثرج بسهوله. رواسي: حبيت معذبي، أخذني أسيره لحبه ومحد يكدر يحررني. ابتعدت عن حضنها مسحت دموعي وحجيت. رواسي: اذا تشوفوني أبجي عليه ضربوني بالقندره على راسي. اني ردت البعد والانفصال ولازم أتحمل. جميله: وبنتج؟

رواسي: شوكت ميحب يجي يشوفها ويكدر ياخذها تبات يمه. البنات يداروها اعرف. جميله: رواسي رسيم مريض ترا لتعوفي وهوَ بحاجتج. باوعتلها وحجيت بعدم فهم. رواسي: قصدج مريض نفسي؟ أي واضح. باوعتلي وكالت بأسف. جميله: لا رواسي رسيم عنده مرض خبيث. شهكت ولطمت على صدري حجيت بخوف. رواسي: شنوو شلون؟ جميله: ما رادج تعرفين. متشوفين ابوج تغير وياه؟ رواسي: ليش ما حجيتوا!!! رسيم راح يموت ويعوفنييي؟

انضربت على راسي بكلامها. شنو يعني رسيم عنده كانسر؟ شلون وشوكت وليش ما گال. كمت من مكاني طلعت من البيت وبيدي تلفون. أتصل عليه ميرد أبد. بقيت أمشي ودموعي تنزل. أمي تتصل عليه أنطيها رفض كل شوي. رفعت عيوني اباوع على سيارته. طبكت يمي ونزل منها. أجه عليه رفعت أيدي ضربته ورجعت حضنته بكل قوتي وبجيت. رواسي: اذا تموت أموتك والله. ضحك وكال. رسيم: هسه هذا خوف لو شنو؟ ابتعدت عنه وحجيت بعتب. رواسي: ليش ما حجيتلي ليش ما گلت!

رسيم: متريديني رواسي ليش أحجيلج؟ رواسي: صح ما اريدك بس لازم أعرف. شلون تضم عليه مرضك؟ رسيم: ما حجيت حتى لترجعيلي لأن مريض، أريدج ترجعين لأن تحبيني رواسي، أريدج ترجعين لأن متكدرين بدوني ونبلش حياتنه من جديد بدون مشاكل. نزلت راسي وحجيت. رواسي: ما أرجع رسيم لتحاول، بس أريد أكون وياك وأسندك. محتاجني أنتَ. رسيم: واني ما أريدج يمي. صعدي يلا أرجعج للبيت. تبهتت ملامحي من كلامه. ابتعدت عنه ودرت روحي وحجيت.

رواسي: روح مناا لا ألّم العالم عليك اگول يتحارش بيه! ضحك وسحبني من ايدي وكال بمكر. رسيم: شنو رأيج أرجع أخطفج ونبلش قصه حبنا من جديد. رواسي: حتى بالقندره والله. صعدني بالسياره وهوَ يضحك. صعد. لزمني من ايدي وكال. رسيم: اذا أموت لتتزوجين غيري رواسي. رواسي: شيت أب رسيمي. رسيم: وتالي رواسي؟ رواسي: رجعني للبيت رسيم. رسيم: راح أخطفج. رواسي: حتى أطيح حظك والله.

لزم ايدي قربها على شفايفه، طبع بوسه عليها. وعلى غفله عضني منها. عطت بالم وسحبت ايدي منه وحجيت بنتر. رواسي: قندره عليك ليش تعضني صاير جلب! انطاني كفخه على راسي وكال. رسيم: لا يا جلبه. تعلمي تحترمين بابا عيب عيب. رواسي: محترمه اني بس أنتَ فسدت اخلاقي. رسيم: اني شسويت؟ رواسي: ما سويت شي أبد بس خطفتني و حرگتني و ضربتني ب اختصار طيحت حظي وعذبتني و بعد شنو ذكرني صارن هوايه نسيت!

رسيم: والله متندم رواسي. شسوي حتى أخليج تسامحيني وتنسين؟ رواسي: وها صدك أهم شي خليتني مدمنه وأتعذب كدام عيونك وتستلذ بتعذيبي. أنتَ سايكوووو رسيم. رسيم: راح أموت وتخلصين مني. انتظري كم شهر بس. رواسي: شيت أب رسيمي لتجيب طاري الموت. رسيم: راح أشتتك هسه اذا متسكتين.

درت وجهي عنه وصرت أباع من الجامّه. حرك سيارته وأخذني للبيت. طلبت منه ينزل بس ما قبل. راح هوَ واني دخلت للبيت. يومي كئيب وكله حزن وقهر. مقهوره من و على رسيم. طول اليوم بالي مشغول وأفكر بي وبمرضه. صار الليل واني على نفس وضعي. حابسه روحي بالغرفه وأبجي وأفكر. شلت تلفوني وكتبت لآدم بلغته أنو ميجيني الصبح. بطلت ما أروح. وخابرت على ماري وياكيد مثل عادتها رأساً جاوبتني. ماريا: لككك هلااا سوسي. رواسي: شلونج حبيبي.

ماريا: متحمسهه للسفره صار هواي ممسافرين بس بنات. رواسي: أكلج ماري، اني ما أجي وياكم ما أگدر. عاطت بيه. ماريا: ليش ولج رسيم ما قبل مو؟ نزلت دموعي وحجيت بغصه. رواسي: ماري رسيم مريض. شلون أسافر وأتونس وهوَ ديتعذب بمرضه وحده! ماريا: شبي مريض؟ شي خطير يعني؟ شهكت وحجيت بقهر. رواسي: عنده كانسرر، ماري رسيم راح يموت ويعوفني. ماريا: أهدي حبيبي لتبجين. متأكده أنتِ؟ رواسي: أمي گالت ومن سألته ما نكر.

ماريا: ما اعرف شحجي والله. ربي يشافي ويحفظه الكم. سديته منها ودخلت بنوبه بجي ونمت اني ودموعي. حسيت الصبح على صوت تلفوني يدك. جاوبت واني نايمه. رواسي: منو؟ رسيم: بعدج نايمه؟ مو عندج سفره؟ رواسي: ما أروح بطلت. رسيم: ليش؟ فركت عيوني وعدلت كعدتي وحجيت بجديه. رواسي: كلل عقلك تريدني أروح أتونس وأنتَ محتاجني يمك؟ رسيم: كومي بدلي يلا ولمي غراضج. اني أوصلج لماريا. رواسي: ما أروح رسيم. عاط بيه.

رسيم: رواسي كومي ١٠ دقايق اني يمج يلا. سده بوجهي وعافني صافنه. هسه شسوي؟ كمت فتت للحمام سحبت وبدلت وكعدت أنتظره. شوي وخابرني انطيته رفض. شلت جنطتي نزلتها. لكيت أمي وأبويه ديتريكون. صبحت عليهم. باوعلي أبويه وكال. راشد: آدم گال ما راح تروحين. رواسي: نسيبك يريدني أروح. راشد: اوكفي انطيج فلوس. رواسي: لا بابا شكراً عندي. كام من مكانه وكال. راشد: حتى لو عندج خليهن خاف تحتاجين. كلشي يصير.

دخل للغرفه هوَ واني كعدت سويتلي لفه جبن أكلتها وكمت. رجع دك رسيم جاوبته گال. رسيم: وينج يلا اني بَره. رواسي: هسه جايه بس ثواني. متريك أنتَ؟ رسيم: لا عندي شغل بعدين أكل. رواسي: تمام هسه أجي. سديته من عنده وطلبت من أمي تسويله لفه. واني كمت للمطبخ. طلعت كوب استعمال واحد و صبيتله جاي. وأخذت اللفه من أمي. أجه أبويه انطاني الفلوس. سلمت عليهم وطلعت. بس شافني نزل أخذ جنطتي وباسني من راسي وكال.

رسيم: يومي يصير حلو من أصّبح بوجهج. رواسي: رسيم خايفه عليك اني. فتحلي باب السياره وكال. رسيم: ماكو شي حتى تخافين. عادي كلنا على هذا الطريق. رواسي: اسم الله رسيم كافي شنو هذا الحجي! صعدت السياره و هوَ اندار من جهته. انطيته اللفه والجاي وگلت. رواسي: أكل لتبقى بدون أكل. رسيم: تحبيني روسيه؟ رواسي: أحبك رسيمي الحلو. رسيم: تحبيني لأن حلو؟

رواسي: أي لعد شلون اذا أنتَ مو حلو ما أباع بوجهك أصلاً. يعني هم مو حلو وهم معذبني مترهم !! شكلك الحلو الي شافعلك تراا.. أموت على الحلوين. رسيم: أم الحلوين راح تندفرين. رواسي: حرك شبيك واكف راح نتأخر. حرك السياره وأخذني لبيت ماري. لكيناهم واكفين بَره يم السياره يحطون بالاغراض ودِلهَام واكف يساعد بيهن. نزلت من السياره وحجيت بصوت عالي. رواسي: هاااي گاييزز. ماريا: هلا حبيبي. نرجس: تأخرتي صار ساعه ننتظر.

رواسي: مو ع أساس ما أجي بس رسيم جابني. نارين: يلا بسرعه خلي نطلع قبل لا أهلي يغيرون رأيهم. ماريا: يلا ماعدنا شي. التفتت على رسيم واكف ويه دِلهَام ويحجي وياه. تقربت عليهم سكتوا واثنينهم داروا وجههم عليه. رواسي: ليش سكتوا؟ رسيم: ماكو شي دنسولف عن الشغل. رفعت حاجبي وحجيت بمكر. رواسي: قصدك عن المافيات والعصابات؟ حجه دِلهَام يغير الموضوع. دِلهَام: شلون صرتي رواسي ان شاء الله أحسن؟ رواسي: ما اعرف صراحه.

رسيم: تتونسين بالسفره وتتحسن نفسيتج. باوعتله وعيوني غورگت. برطمت شفايفي وحجيت بقلق. رواسي: أخاف اذا أروح يصير بيك شي واني مو يمك. سحبني لحضنه حضني باس راسي وكال. رسيم: ابوج من عرف گال أنتَ عار ميصيرلك شي. لتخافين عليه. بجيت وصرت أشهك. وخرني عن حضنه لزم وجهي بيده مسح دموعي وكال بهدوء. رسيم: ولج بابا لتبجين. رواسي: اذا تموت أموتك والله. درت وجهي على دِلهَام لما ضحك على حجايتي وكال. دِلهَام: شلون رهمتيها رواسي؟

رسيم: كلشي ممكن ويه رواسي راشد عادي. ضربته على كتفه بخفه وحجيت. رواسي: شايف اذا أرجع وألكه صاير بيك شي. أطيح حظك وبالقندره والله. رسيم: يلا اذا صارلي شي تشوفيلج واحد حلو وتنسيني. رواسي: ما أريد حلو غيرك اني. باسني من راسي وكال. رسيم: يلا روحي تونسي بابا وطمنيني عنج من توصلين. رواسي: انتبه على نفسك علمودي وعلمود بنتك. هز راسه سلمت ورحت. صاح عليه وكال. رسيم: لحظه حبيبي. راح للسياره جاب ظرف واجه يمي گال.

رسيم: هاج خليهن يمج. رواسي: عندي والله وأبويه انطاني. رسيم: حتى لو يجي يوم وتحتاجيهن بغيابي. رواسي: وين تروح ليش؟ رسيم: أحبج روحي تونسي يلا. راح صعد سيارته بدون مينطيني جواب. ركبت السياره كدام والبنات وره. عاطت بيه ماريا. ماريا: ساعه ساعه. رواسي: اسكتي ترا هسه أبطل. نرجس: متكدر بدون حبيب الگلب عيني رجعيها. انداريت عليها وگلت بنتر. رواسي: ترا تنكفخين والله. نارين: بيي كالم گيرلز شبيكم. ماريا: رواسي تسوقين أنتِ؟

شو أحسني دايخه. رواسي: حولي يلا. نزلنا من السياره اني صرت بمكانها وهيَ كعدت بالصدر. ربطت تلفونها على السياره وحطت أغاني. فتحت تلفوني اريد أصور. عاطت بيه نرجس. نرجس: عوفييي التلفون دتسوقين. رواسي: اريد أنزل ستوري. ماريا: جيبيه اني أصورج.

عليت الصوت وصرت أسوق وأغني ويه الأغنيه وهيَ تصور. نشرته ستوري وسوت منشن الهم وكتبت "سفره بناتيه ناريه". تونسنا بالطريق بس تعب السياقه والتركيز ضربني صداع. بعد كم ساعه وصلنا لبيت أهل ماريا الي بسليمانيه. نزلنا الاغراض ودخلنا للبيت. ماري بقت واكفه بباب البيت ونظراتها تتوزع على كل مكان ونزلت دموعها. تقدمت عليها حطيت ايدي على كتفها وحجيت بهدوء. رواسي: اذا تحبين نروح لفندق منبقى هنا.

اندارت عليه حضنتني وصرت تبجي. اجو البنات وصرنه نهدي بيها. هذا بيت اهلها من يوم الي ماتوا ما دخلتله وهسه تذكرتهم. بجت شوي وبعدها مسحت دموعها وكالت بحماس. ماريا: يلااا بناااات تعالو. نارين: ماري أنتِ زينه؟ مشت من يمنه وكالت. ماريا: عال العال يلا أريد نستغل كل ثانيه بهاي السفره. ضاعت من عدنه عشر دقايق لنضيع الباقي.

صت اكل النه وكلنا فرشنا بمكان واحد وكعدنه. طلعنه فلم والصدفه حطت نفس الفلم الرعب الي شفته ويه رسيم لما چان خاطفني. فتحت تلفوني صورت الفلم ودزيته اله و كتبتله. رواسي: بشنو يذكرك هذا الفلم؟ رأساً شافها وكتب. رسيم: اول بوسه. رواسي: يذكرني بعذابي. شافها وما رد. اني هم عفت التلفون وصفنت على الفلم بس بالي ويه رسيم. شنو راح يكون وضعه؟ راح يفيد بي العلاج لو لا؟ وكومه تساؤلات اجت بالي. ما لكيت الها جواب. ما اعرف شلون غفيت.

كعدت الصبح على صوت البنات فوك راسي. فركت عيوني وباوعتلهن وحجيت بصوت ناعس. رواسي: متخلون واحد ينام شبيكم؟ نرجس: رواسي كومي عاد صار الظهر واحنه بعدنه كلشي ممسوين. عدلت روحي وحجيت. رواسي: شنسوي اليوم؟ ماريا: أريد أسوي تان كوموا يلا. رواسي: جبتيلي ملابس السباحه؟ ماريا: أي يلا كومي فضيني. كمت دخلت للحمام وغسلت وجهي حتى أصحصح. ورحت على ماري انطتني المايو. بقيت صافنه عليها وعطت بيها. رواسي: هاي شنو؟ ماريا: مايو!

رواسي: اعرف قندره بس يعني ما أكدر ألبسه والله. أبويه ورسيم يعلگوني من رجلي بالسقف. نارين: منو اكو بس احنه بنات يمعوده كلنه أهلنه ميقبلون. نرجس: بيناتنه خو ما اكو ولد. رواسي: أمشي وراجن بس اذا ترزلت تنكتلن. ماريا: تمام يلا بسرعه.

رجعت دخلت لبست المايو وطلعت خجلانه من روحي. بس بعدين من شفتهن تشجعت لأن فعلاً ماكو أحد بس احنه هالمستحه على شنو. طلعنه بَره شفت المسبح نظيف الظاهر أحد جاي منظفه. فتحنه الكراسي وحطينه أغراضنه. ماري جابت كريماتها والسيرومات علمود التان. دهنت جسمي وتمددت على الكرسي. گامت ماري جابت ريدبول وكلاصات بيهن ثلج. صبيت الي وأخذت كلاصي. صورت كدام المسبح وجزء رجلي مبين. من الركبه وجوه. نشرتها وكتبت "relax". بنفس الثانيه شافها رسيم ورد على الستوري.

رسيم: تطشررر العرض، عرضي راحح. ضحكت ودزيتله. رواسي: لتخاف بعده ملموم. رسيم: الامه العربيه كلها شافت وتكليلي ملوم!! حذفي رواسي. رواسي: اوكف أصوّرك تتأكد بعينك. رحت صورت الاعدادات مال ستوري وشوفته أنو خافيه الستوري من الكل بس هوَ والبنات مبقيتهم. شافها وكتب. رسيم: حذفي حبيبي لا أطير الحساب كله يلا. رواسي: رسيم التهي بروحك وعوفني ترا أسويلك هايد أنتَ همم! رسيم: يصير خير.

تأفأفت بضجر وحذفت الستوري مالي خلك. رجعت صورت واحد ثاني وبينت بس الگلاص وايدي والمسبح. رجع رد عليها وكال. رسيم: ايدج شيليها لتبين. رواسي: بلوك لوجهك. عفت تلفوني وكمت فتت بالمسبح. مرت الأربع أيام بسرعه تونسنا كلش بس ونستي شلون تكمل؟ تمددت بفراشي تعبانه من الطريق. مسكه بحضني. فتحت تلفوني اكلب اشوف شكو ماكو دخلت لستوري رسيم، ناشر صوره من المطار قبل ٤ ساعات وكاتب. "قد لا نعود".