رواية رواسي الدهر الفصل الثامن عشر 18 - بقلم روح الدليمي

فتحت تلفوني أقلّب أشوف شكو ماكو. دخلت لستوري رسيم، ناشر صورة من المطار قبل ٤ ساعات وكاتب: "قد لا نعود". فتحت عيوني على وسعها مصدومة. انفتح الستوري الثاني، هدى مسويتلّه منشن هيَ وياه بالطيارة وكاتبة "بداية جديدة" وكاتبة اسم الدولة اللي مسافرين الها. تهسترت أعصابي، صرت أفور من العصبية. يعني كلامه ووداعه وحجيه كله طلع صحيح مو حتى يجبرني أرجع؟ باوعت لمسك نايمة، كلشي ما أكدر أسوي خاف تكعد. بقيت ألوب بمكاني.

"عافني وسافر ويا هدى الحمرة الحية الثانية.. أني أعلمك رسيم إذا ما أخليك تشتعل شعل ميكون اسمي رواسي." كمت من مكاني، طلعت من الغرفة. صارت بوجهي أمي تمسح على الدرج. جميلة: شو ما نمتي؟ رواسي: وين بابا؟ جميلة: تغدى ونام ليش؟ رواسي: من يكعد صيحني، جيبي أني أسوي عنج روحي ارتاحي أنتِ هم. أخذت منها الوصلة وصرت أمسح بالگاع، طلعت حرگتي كلها بالمسح. مسحت البيت كله من فوگ ليجوه. أشتغل ودموعي تنزل عشرة عشرة.

كعد أبويه ودخل للمطبخ، بگه صافن عليه مستغرب. منزلة كلشي بالكاونترات والثلاجة وكلشي طالعة من مكانه وكعدت أرتب من جديد. راشد: منو مضوجج بنتي؟ المواعين بيدي شلتن و شمرتهن بالگاع تكسرن كلهن. تراجع ليوره بسبب الكزاز وكال: راشد: شبيجج رواسي شصاير وياج!! كعدت بالگاع وحضنت رگبتي وصرت أبجي وأشهگ بالبجي. حجيت بغصة واضحة: رواسي: عافنيييي رسييممم عافنننيييي بعد ميريدني. راشد: ماكو هيج حجي كومي منا كومي حبيبتي.

سحبني من الگاع وأخذني بحضنه، مسح على راسي بكل هدوء وأردف بحنية: راشد: رسيم يحبج ميعوفج. حجيت والشهگة شگت بلعومي شگ: رواسي: سافر بابا سافر بدون ميكلي ولا يودعني. سافر وخذ وياه هدى وأني عافني ميريدني بعد. بعدني عن حضنه، يباوعلي مستغرب وكال: راشد: وين سافر شوكت؟؟ رواسي: هوَ والحية الحمرة رايحين لل*** اليوم. راشد: مستحييل! شلون يسوي هيج وهوَ يعرف الوضع شنووو؟؟؟ حجيت باستغراب: رواسي: يا وضع شكو ليش؟

راشد: خلي أفتهم السالفة اصبرييي. عافني وطلع من المطبخ. باوعت للكاع لازم أرجع ألم وأنظف الكزاز. استسلمت وكعدت ألملم وأعزل من جديد. مرت فترة وماكو أي خبر عن رسيم. أدزه ميرد عليّ ولا يفتح رسائلي أبداً. أسأل إخوانه ميعرفون عنه أي شي. كلنا عايشين بقلق على رسيم ووين اختفى. راسلت هدى أكثر من مرة، جانت تشوف رسائلي بدون مترد عليهن، وهالشي چان يذبحني ذبح. هيَ وياه وتعرف شلون وانّي مرته كلشي ما أعرف عنه!

الشغل تركته وصرت ما أداوم بطلب من أبوي، ماعرفت شنو السبب. كل وقتي بالبيت ويه أهلي وبنتي. نفسيتي تدمرت، تعبت وتمرضت كلش. أمي حايرة بيه وببنتي، رشا وعذراء كل فترة يجن يغيرن جو وياهن شوي وبس يرحن أرجع لحالتي. دِلهَام الوحيد اللي چان يخفف عليّ وحشتي ويغير نفسيتي بكلامه. صار قريب مني كلش بحيث ماكو يوم يمر إذا ميتصل عليّ ويبقى يسمعني ساعات بدون ملل. مشاعري تجاهه صداقة وأخوة بس ماكو غير شي.

شهور مرت واحنه نفس الوضع كلشي ما أعرف عن رسيم. إجه عيد ميلاد مسك وجهزتلها حفلة بسيطة بيناتنا. البنات كلهن إجن وبيت عمي وعزمت دِلهَام هم. إجه هوَ وماري. صارت حفلة حلوة وتونسنا بيها، بس راحوا الكل عزلنا البيت أني وأمي وأخذت مسك نومتها ونمت من التعب. كعدت ثاني يوم مخنوكة كلش وگلبي يأذيني. طلعت من غرفتي ونزلت جوه، شفت أبوي گاعد يتفرج بالتلفزيون. رحت كعدت يمه وحجيت: رواسي: بابا. راشد: نعم حبيبتي.

رواسي: أريد أطلع ويه البنات صار هواي متخلوني أطلع لمكان وحدي. راشد: خلي هنَّ يجن يمج رواسي متطلعين. رواسي: أريييد أفهم ليش متخلوني أطلع صار فترة محبوسة بالبيت مو حالة هاي!! راشد: أخاف عليج روسيه، ما أريد ترجعين تتأذين. رواسي: صاير شي؟؟ باوع بعيوني وبگه ساكت. أردفت بعصبية: رواسي: احجييي باااابااا فهمني. راشد: ماكو شير. رواسي: لعد خليني أطلععع ليش حابسني بالبيت حتى شغلي خليتني أتركه! نزلت أمي من فوك واجت يمنه،

باوعتلها وحجيت: رواسي: ماما الله يخليج احجي وياه أريد أطلع ميقبل. جميلة: خليها تطلع راشد ما عليها شي. نتر بينه: راشد: گلت لاااا لتلحون! بجيت وحجيت بخنكة مكتومة: رواسي: الله يخليك بابا أروح لماري بيتهم قريب، طگتتت روحي تراا حسوا بيه. راشد: خلي هيَ تجي يمج مثل كل مرة مو إنتي تروحين. جميلة: وديها أنتَ وآمن عليها ورجع. باوعت لأبوي وحجيت بتوسل: رواسي: الله يخليك بابا والله راح أنفجر.

راشد: أني آخذج ومن تكملين تخابريني أجيك وممنوع تطلعون لأي مكان فهمتييي!! رواسي: تمام. راشد: روحي بدلي أنتظرج. رحت بسرعة خابرت ماري بلغتها إنو راح أجيه وبدلت ملابسي وجهزت أغراض مسك وبدلتلها ونزلت جوه. كام أبوي من مكانه، أمي گالت: جميلة: خلي مسكه يمي تونسني روحي أنتِ. رواسي: مو البنات يردون يشوفوها. جميلة: البارحة شافوها خليها يمي وروحي تونيّ غير جو. نزلت جنطة مسك وباوعتلها وحجيت:

رواسي: ماما عادي أروح أني وتبقين يم بيبي تلعبون سوه؟ هزت راسها وكالت: مسك: أي. بستها من راسها وأمنت أمي عليها وطلعنه. وصلني لبيت ماري والطريق كله هوَ يوصي بيه إنو ما أطلع لمكان. ما فهمت الحرص الزايد هذا على شنو! نزلت من السيارة ودگيت الجرس. بقيت أنتظر شوي وفتحلي دِلهَام الباب. دِلهَام: يا هلا ومية هلا برواسي تفضلي. دخلت للبيت وكلت: رواسي: هلا بيك شلونك؟ دِلهَام: عايش والحمد لله أنتِ شلونج بعدج مقهورة؟

رواسي: الله كتبلي أبقى مقهورة من يوم الي خطفني بي. دِلهَام: بعده ما يرد عليج. هزيتله راسي بـ "لا" وحجيت: رواسي: ماري وينها؟ دِلهَام: راحت للماركت هسه تجي تعاي نكعد نبقى واگفين شنو؟ رحنه كعدنا بالصالة. باوعلي وكال: دِلهَام: رواسي أريد أحجي شي بس لتفهمني غلط. رواسي: شنو صاير شي؟ دِلهَام: ليش متتطلقين وتعيشين حياتج؟ يعني إذا هوَ عافج وسافر حتى بدون ميكول ولا يرد عليج ولا تعرفين أخباره شكو باقية على ذمته لحد هسه؟

صارله ٧ شهور مختفي وماحد يعرف عنه شي. رواسي: سويتها مرة ما أسويها مرة ثانية، خايفة عليه. دِلهَام تعرف هوَ بيه كانسر ليل نهار أفكر بي حتى بعز فرحتي ببنتي مكسورة عليه. خانتني دمعتي ونزلت أردفت: رواسي: ما أعرف بي عايش لو ميت، التفكير ذبحني ذبح. وإخوانه كل ما أسألهم يكولون ما نعرف شي بس ما مقتنعة. دِلهَام: لا تبجين عيونج على شخص عافج. رواسي: مو بيدي دِلهَام مو بيدي، أول مرة أحب بحياتي وحبيت منو؟

حبيت الشخص خطفني وعذبني، ولحد هاي اللحظة هوَ مستمر بتعذيبي. دِلهَام: مثل ما عافج وراح وگطع أخباره عنج، أنتِ هم عوفي عيشي حياتج و أنسي خلي يولي لتفكرين بي رواسي شايفه روحج شلون ذبلانة؟ رواسي: ما رايدة شي والله غير بس أعرف إنو هوَ بخير. بس أريد أعرف إذا چان عايش أو لا، كلشي ما أريد. دِلهَام: طز بي طز بي إذا هوَ مو سائل عنج أنتِ سوي نفسه ولتهتمين اله، عايش ميت لهيج يهمج خلص هوَ اختار هذا الشي. رواسي: وبنته شنو ذنبها؟

بدل ما تكبر بين أمها وأبوها. بنتي دتكبر بدون أبوها لو ما أبقى أشوفها صورة وأگوللها هذا بابا يمكن إذا تشوفه متعرفه. دِلهَام: براحتج رواسي ابقي فكري بي وتعذبين روحج علموده وهوَ أصلاً ميريدج. گام من يمي وعافني وحدي. بقيت أبجي قهر وخوف على رسيم. سمعت صوت ماري تصيح باسمي. مسحت دموعي وگلت: رواسي: هياتني بالصالة حبيبي. إجت يمي حضنتني وكالت: ماريا: ليش باجية منو وياج؟؟

رواسي: ماري راح أموت من الخوف والله. خايفة على رسيم أريد بس أسمع عنه أي شي يطمني وأعرف إنو هوَ بخير حتى لو بعيد عني. حجت بعصبية: ماريا: همم رسيم! متملين أنتِ فهميني. رواسي: خلييي روحج بمكاني شتسوين؟ تخيلي آدم يتركج أنتِ وبنتج ويسافر بدون ميكولج ويكطع كل تواصله وياكم ويعوفج بحيرتج وخوفج وأنتِ تعرفين هوَ مريض!

ماريا: بكل سهولة أعوفه مثل ما عافني أتطلك منه أخلعههه ما أبقى على ذمته وهوَ فضل وحدة ثانية عليه وأخذها وسافر وياها للخارج. رواسي: ما أكدر أسوي هيج أني ما أكدر. ماريا: خلييج هيج أنتِ تتأذين مو غيرج، صيري قوية. لتبقين بهل طيحان حظ هذا دوسي على گلبج بالقندرة و أنسي. گامت من مكانها وأردفت بأمر: ماريا: مسحي دموعج لا أطيح حظج هسه! البنات راح يجون بعد شوي جايه تتونسين لو تبقين بس تبجين. عافتني وأخذت الأغراض للمطبخ.

مسحت دموعي ورجعت دخلت للانستا أشوف بلكي منزل شي بس هم ماكو. شمرت تلفوني بعيد عني وگمت للمطبخ أشوف ماري. رواسي: شتسويين؟ ماريا: إذا متنسين رسيم ممنوع تحجين ويايه. رواسي: براحتج. طلعت من المطبخ أخذت أغراضي وطلعت من بيتهم. تمشيت لحد الشارع أريد آخذ تكسي ما خابرت أبوي. ما أريد أبقى أكثر. بقيت واگفة أنتظر تمر تكسي. على غفلة انضربت على راسي من وره و وكعت مغمي عليه بالگاع. حسيت على هوا بارد يضرب بجسمي.

فتحت عيوني، باوعت حواليه أني وين؟ شجابني لهنا؟ حاولت أكوم من مكاني، باوعت على روحي رابطين رجلي بالجرباية. الخوف احتلني، الرجفة سرت بكامل جسمي. عطت بصوت عالي: رواسي: تعالوووو طلعوووننيييي منااااا. انفتح باب الغرفة ودخل. باوعلي وكال: حيدر: صح النوم يا حلوة. رواسي: ويننن رسيييممم ليش خطفنييييي؟؟؟؟ حيدر: مو رسيم روسيه. تقرب عليه گعد گدامي، ثاني رگبته مد إيده على شعري. ضربت على وجهه بقوة وعطت بي:

رواسي: إذاااا تطخنيييي اكسررر راسككك حيوواااان. ضحك بخبث وكال: حيدر: رسيم وين؟ رواسي: ما أعرف. عاط بيه: حيدر: تعرفين رواسي احجي رسيم وينه؟ رواسي: غبي أنتَ؟ متفهم؟ مو دا اگلك ما أعرف. حيدر: تمام أنتِ جبتيها لنفسج. گام من مكانه وفر وجهي براشدي وصار يجيني واحد وره اللاخ. گسرني تگسر بس ما بجيت ولا عطت. ما نطقت بحرف واحد أبداً. مستحيل أخليهم يشوفوني أتعذب مستحيل. ابتعد عني وعاط: حيدر: احجي رسيم وين!

رواسي: رسيم عافنييي كلشي ما أعرف عنه، خاطفين الشخص الغلط انتو المفروض هدى تنخطف هيَ تعرف بي وين. حيدر: لتكذبين واحجي، هدى مسافرة عدها شغل بالخارج راحت تكمله. رواسي: خوش ضاحكة عليكم سافرت هيَ ورسيم وكل شي ما أعرف عنهم صار كم شهر أي خبر ما أعرف عنه. ضرب راسي بالجرباية وطلع من الغرفة. نزلت دموعي ألم وقهر. لشوكت أبقى أتعذب؟ كل عذابي من رسيم. كلشي يصير ويايه هوَ سببه. يارب طلع حبه من گلبي ولتخليني أتعذب أكثر.

بقيت أبجي بدون انقطاع لحد ما تعبت وغفيت بدون ما أحس على روحي. حسيت على إيد تلعب بشعري. فتحت عيوني لگيته گاعد يمي وإيده بشعري. فزيت ونهضت روحي من مكاني وعطت بي: رواسي: ياا نذل وخر عني. حيدر: حلوه وأنتِ نايمة حظك حلو أستاذ رسيم. رواسي: قندرة عليك وعلى رسيم الله ياخذكم. حيدر: مراح تحجين وينه؟ رواسي: قندرة عندك مو دماااغ، گتلك ما أعرف أي شي عنه ياااا غبي متفهم. مد إيده على وجهي وصار يتلمس بشفاي، درت راسي

أبعد إيده عني وحجيت بصياح: رواسي: وخررر عني لتطخني حيواان. حيدر: خلي نتونس بيناتنه محد راح يعرف. تفلت بنص وجهه وعطت بي: رواسي: أنتَ عاجبككك يطيح حظككك يا ****. جرني من شعري بقوة وضربني على وجهي. قرب روحه عليه أكثر وهمس بأذني بتهديد: حيدر: إذا رسيم ميرجع صدگيني أموتج بيدي. رواسي: موتني وخلصني هسه لأن رسيم مراح يرجعه هوَ وعافنه وعاف كلشي وسافر ويه هدى.

حيدر: إذا طلعتي تگذبين علينه، اخليج هنا تتعذبين وكل يوم أني وكل الموجودين نغتصبج لحد ما تموتين جوانه عود خلي رسيم يفيدج. عافني وگام من يمي. رواسي: نذل ****. ضحك مستهزئ وطلع من الغرفة. بقيت ٤ أيام محبوسة لا أكل ولا شرب. بس ضرب وتعنيف هد حيلي هد. إيدي صرت ما أكدر أرفعها. كل بالي وتفكيري ببنتي شلون حالتها بدوني؟ ورسيم معقولة ما وصله خبر إنو أني مخطوفة؟ معقولة عرف وعافني يمهم أتعذب وهوَ يعرفهم شنو!

باليوم الخامس كعدت على صوت صياح وطلق بدون توقف. نزلت دمعتي ودعيت ربي أتوسل بي: رواسي: يارب خلصنيي منهم تعبت ياربي ما الي غيرك. يارب يعرفون مكاني ويطلعوني منا. بقت الأصوات والطلق مستمر بدون توقف. سمعت صوت قفل الباب ينفتح، رفعت عيوني وباوعت على الباب انفتح ودخل. صورته صارت تروح من گدامي شوي شوي والسواد صار بكل مكان. سمعت صوته يحجي ويايه بس لا گادرة أحجي ولا گادرة أفتح عيوني. رسيم: روسيتي بابا تسمعيني؟؟ أجيتج أني.

حسيت عليه شالني وگال: رسيم: والله أندمهم على كل شي سوو بيج والله، انتهى كلشي لتخافين. استسلمت سحبت نفس قوي وبعدها ما حسيت على شي. ما أعرف شگد بقيت غايبة عن الوعي. فتحت عيوني باوعت حواليه أني بالمستشفى. كل جسمي يأذيني وراسي ثگيل مابيه أرفعه. صارت عيني على الباب لما انفتح ودخل رسيم. صدگت وجوده گدامي عبالي چنت أحلم! إجه گعد يمي وينظرلي بخوف. رسيم: شلون صرتي روسيه؟ درت وجهي عنه وبقيت ساكتة. أردف:

رسيم: متردين تحجين ويايه حقج بس طمنيني عنج شنو سوولج؟ بالكوة رفعت إيدي أشرت على الباب وحجيت بصوت هادئ تعبان: رواسي: اطلع بَره ما أريد أشوفك أبد. رسيم: بس تعرفين السبب متأكد تعذريني. رواسي: ميهمني اطلع بَره وخابر أهلي يجون. غمضت عيوني ما أريد أشوفه وأضعف وأنسى كلشي مريت بي بسببه. بقى يحجي ويايه ويحاول بس التزمت الصمت وما نطقت حرف بعد. رسيم: حبيبتي بس احجي ويايه جاوبيني، شنوو سوولج؟ أذوج بشي؟؟ أخذ إيدي بيده وأردف:

رسيم: أحبج والله ابتعدت عنج علمودج أنتِ، ردت تتعودين على غيابي إذا متت. رواسي جاوبيني الله عليج. بقيت مسيطرة على روحي وعلى دموعي وما بجيت. مل مني وگام من مكانه طلع من الغرفة. فتحت عيوني ودموعي عرفت طريقها وصارت تنزل بدون توقف. بقيت أبجي لوقت طويل جايني بعد شهور غياب يكلي أحبج، يااا حب هذا ياااا حب! عافني شهور بدون حتى ميسأل عليه و بالتالي انخطفت لأن يدوروله وهوَ مرتاح ويه هدى بالخارج.

اندگت باب الغرفة مسحت دموعي وغمضت عيوني. انفتح الباب وإجاني صوته. فتحت عيوني باوعتله وعيوني مغوركة دموعي متقبل توكف. إجه يمي يتفحص بيه وگال: دِلهَام: رواسي؟؟؟ هاي شصاير بيج شمسوين بيج فهميني !! رواسي: خابر أبويہ خلي يجي فدوه تعبانة كلش. دِلهَام: احجي رواسي شنو مسوين بيج بعد؟ رواسي: ماكو شي بس خابر أبويہ يجيني أريد أطلع منا. دِلهَام: تعرفين الي خطفج منو؟ رواسي: الي يشتغل وياهم رسيم. دِلهَام: هوَ خطفج وسوه بيج هيج؟؟؟

رواسي: لا خطفوني حتى يجبروا يرجع لهنا وعبالهم أعرف مكانه وين. دِلهَام: ورجع؟ رواسي: هوَ جابني لهنا ما شفته؟ دِلهَام: لا. طلع تلفونه من جيبه واتصل على أبويہ. سمعنه صوت دگة التلفون بباب الغرفة. انفتح الباب ودخل أبويہ مفزوع، إجه عليه صار يتفحص بيه ونظراته كلها خوف وقلق. راد يحجي قاطعته: رواسي: قبل لتسأل كلشي مابيه ما سوولي شي بس طلعني منا الله يخليك أريد أروح لبنتي.

راشد: گتلجج لتطلعين ووصيتج تخابريني أني أرجعج ليش هيج رواسي ليش تعاندين؟! رواسي: عوفوني بحالي لحد يحجي ويايه أريد بس أرجع للبيت يم بنتي اخذني عليها گلبي مشتعل نار أريدها. دِلهَام: بس نتأكد من وضعج ونطلعج صارلج أيام بدون لا أكل ولا شرب. رواسي: ما أريد أبقى هسه يجي رسيم ما أريد أشوفه طلعوني منا لا تبقوني.

راشد: رسيم متخبل عليج رواسي صار أيام حتى نوم مينام. يريد بس يعرف مكانج، مو بس هوَ كلناااا صار فترة تجينه تهديدات إذا ميرجع رسيم يذبحوج أنتِ وبنتج. رواسي: ياريت يذبحوني وأخلص من هاي الدنيا كلها. أروح يم ربي هوَ أرحم بيه منكم كلكم. راشد: اسم الله عليج شنو هذا الحجي متعرفين شنو حالتنا چانت بغيابج، أمج نامت طريحة بالفراش من خوفها عليج. أني ورسيم ليل نهار ندور عليج... ما قبل ندخل الشرطة بالموضوع لأن خطر عليج.

رواسي: ميهمني أي شي ولحد يجيب اسمه گدامي بعد أبد. دِلهَام: محد يجيب اسمه گدامج بعد بشرط تبقين هنا اليوم بس شوي يصير بيج حيل. عطت بيهم: رواسي: طلعوني منا ما أريد أبقى. راشد: تمام بس اهدي وعلى كيفج ويه روحج. طلع دِلهَام وراح وراه أبويہ. بقيت وحدي ورجعت لنوبة البكاء. أعصابي تهسترت صرت ألوب بمكاني. شوي ودخل دِلهَام لما شاف حالتي صاح على الممرضة طلب منها أبرة مهدئ وأجه عليه ثبتني من إيدي. گال بهدوء يحاول يهديني:

دِلهَام: رواسي باعي بعيوني. ركزت نظراتي بعيونه ودموعي مستمرة تنزل. أردف: دِلهَام: اهدي كلشي راح يكون بخير أني يمج ما أعوفج. رواسي: أريد أموت تعبانة كلش. دِلهَام: اسم الله عليج، أنتِ قوية وراح تتخطين كلشي. صعبة عليج عشتي نفس الشعور مرتين أذيتج نفسية أكثر من ما تكون جسدية وأني مستحيل أعوفج وحدج أساعدج تتخطين وتتخلصين من كل شي بس خليج هادئة. دخلت الممرضة أخذ منها الإبرة وگال:

دِلهَام: روحي يلا ساعدي أبوها يكمل أوراق الخروج. _تمام. طلعت وهوَ ضرب أبرة المهدئ بالمغذي. گعد يمي على طرف السرير وگال: دِلهَام: شنو تردين أسويلج؟ رواسي: رجعني للبيت. دِلهَام: هسه بس يخلص المغذي أني آخذج وعد غمضي عيونج وارتاحي. رجعت راسي على المخده وغمضت عيوني بس دموعي ما وكفت أبد. مرت فترة حسيت على صوت أبويہ يكعد بيه. راشد: روسيه بابا يلا كومي نرجع للبيت. فتحت عيوني بكسل أحس جفني ثگيل ما أكدر أفتح عيوني عدل.

ساعدني گمت من مكاني سندني وطلعنه من المستشفى. ما أعرف شلون وصلنا للبيت بالي مو وياي. نزلت من السيارة ودخلت للبيت استقبلتني أمي بالبجي وأخذتني بحضنها. بقت تبجي وهيَ حاضنتني وتلوم بروحها لأن قنعت أبويہ يخليني أطلع. ابتعدت عن حضنها بدون ما أحجي شي وصعدت لغرفتي. قفلت الباب عليه و فتت بفراشي بدون ما أبـدل ملابسي حتى والتجأت للنوم. أيام مرت واني نفس حالتي حبست روحي بالغرفة. حتى بنتي ما شفتها.

يجون يدگون الباب عليه لحد ما يملون ويعوفوني ويروحون. بيوم نايمة مثل عادتي بدون لا أكل ولا شرب مكضيتها بس بجي ونوم. اندگت باب الغرفة عطت بصوت عالي: رواسي: عوفوني بحالي. إجاني صوته من وره الباب: رسيم: فتحي الباب روسيه والله گلبي مشتعل نار عليج. رواسي: روح منااا ما أريد أشوفك روح. رسيم: فتحي الباب حبيبي خليني أشوفج أريد أحجي وياج. رواسي: طلكني و روح ما أريدك. رسيم: بس افتحي الباب وكل شي تردي يجرالج.

بالگوه گمت من مكاني فتحت قفل الباب ورجعت بمكاني. دخل للغرفة صار يباوع على حال الغرفة مظلمتها فد مرة. راح على البرده فتحها وفتح شباك الغرفة وشغل الأضواء وأجه يمي سحب الغطة عني وگال: رسيم: كومي وياي. رواسي: عوفني بحالي كل عذابي ودماري أنتَ سببه روحح مناا اذبح روحي والله. رسيم: اسمعي مني وبعدين احكمي روسيه، فراگج أبد مو هين تعذبت بدونج هوايه وبكل لحظة چنت أتمنى وجودج يمي.

حطيت إيدي على أذني وصرت أغلط عليه بصوت عالي حتى ما أسمع كلامه. قرب عليه أكثر ولزم إيدي نزلها بقيت مستمرة أغلط عليه وهوَ بس يريدني أسكت. رواسي: حقير نذل الله ياخذك رسيم الله ياخذك دمرتني أنتَ دمرتني. سحبني عليه وطبع بوسة قوية على شفايفي سكتني بيها. ابتعدت عنه وضربته على وجهه راشدي وعطت بي: رواسي: منو سملحك تبوسني ادبسز. رسيم: مشتاقلج روسيه. رواسي: تشتاقلك نار جهنم يارب شتريييد مني روح منار.

رسيم: مرتي الحلوة ميت عليج أني. رواسي: قندرة خوش مو مرتك أني مو مرتك. رسيم: أي هسه زين صار ساعة اگول وينها القندرة ما طلعت عبالي تأدبتي. رواسي: روح منااا لا أگطعع عليك القندرة من صدگ. رسيم: هيج تحبيني معقوله؟ رواسي: طلكنيي رسيم. رسيم: أي هسه لو فد شوي؟ رواسي: لتستهزء گتلك طلكني ما أريدك ما أحبكك أكرهك أني أكرهك. رسيم: متأكده؟ رواسي: أيي طلكني يلا. رسيم: تمام براحتج مثل ما تريدين. گام من مكانه باوعلي وگال:

رسيم: أنتِ ....