رواية رواسي الدهر الفصل الثامن 8 - بقلم روح الدليمي

رفعت عيوني عليه. ملامحه تدل على صدمته من طلبها. وجهت نظراتي على البقية، كلهم نفس الشيء، مصدومين من كلامها. رشا: هااا عيني بلشتي تبثين سمج؟ هيا: ليش أبث سمي؟ أنا أحب رسيم وأريد أبقى وياه، ما نتطلك. محمد: هيا، أنتو من البداية متفقين زواجكم فترة وبس. لحد ما تنحل مشكلتج لو شفتي تزوج واشتغلت الغيرة. كمت من مكاني أريد أروح، بس سرعان ما وقفني صوت رسيم: روسيه، لتروحين. التفتت عليه وعقجت وجهي.

رواسي: أريد أحضر محاضراتي مال باجر، اليوم ما داومت هم. غسان: كعدي رواسي، خلي نفتهم. -رفعت حاجبي ببرود. رواسي: ماكو شي نفتهمه، البنية متريد تطلك، تجبروها يعني؟ عذراء: عادي عندج تكون عندج ضرة؟؟ رواسي: أكيد لا مو عادي، ولو جنت أعرف هو متزوج ما جان تزوجته. أنا أرجع لأهلي وخليهم هم يكملون حياتهم سوه. وكف رسيم بصدمة. رسيم: شنو تروحين لأهلج؟ رواسي: مثل ما سمعت، أنا الطرف الثالث بعلاقتكم وما أقبل هذا الشيء على روحي أبد.

عفتهم يحجون ويصيحون عليّ وصعدت فوك. دخلت للغرفة ودورت للمفتاح ما لكيته. گلبت المجرات كلها وهم ما لكيته. انفتح باب الغرفة، التفتت شفته رسيم. عطت بعصبية وأنا أفتح بالمجرات الي يم راسه. رواسي: وينن مفتااااح الباب؟؟ رسيم: يمج، بس شتسوين بي.

فتحت المجر الأخير لكيته بيها. جذب نظري صورة محطوطة بدفتر بس طرفها طالع. شلت الدفتر بيدي وفتحته. انصدمت لما شفت صورتي موجودة بداخله. وهو بس انتبه، أجا عليه بسرعة وسحب الدفتر من إيدي بقوة. رسيم: خلينه نحجي رواسي. رواسي: ماكو شي نحجي بي، اطلع من الغرفة أريد أدرس. رسيم: روسيه حبيبتي، ما أبقى وياها والله. عطت بخنقة مكتومة. رواسي: ميهمني، گتلك أريد أدرس، اطلع بَره.

سحبني لحضنه. ومجرد ما راسي صار على صدره، انفجرت بالبجي، صرت أشخك بصوت عالي. وهو حار بيه يريدني بس أهدئ، بس ما أقدر، ما أقدر. شكد أحاول أبين روحي قوية وما أضعف، بس ما عندي أي قوة. سحبني كعدني على الجرباية وكعد يمي، گال: رسيم: هسه أطلگها والله هسه، بس لتبجين. شهگت بصوت وحجيت: رواسي: عوفني الله يخليك عوفني، من البداية علاقتنه غلط بغلط. رسيم: ماكو شي غلط وداعتج، أحبج أنا روسيه. رواسي: أنتَ متحبني، أنتَ تحب تأذيني.

حضن وجهي بيده وقرب روحه أكثر. صار يطبع بوساته على وجهي ويعتذر مني. بعدته عني. رواسي: طلكني رسيم، ما أريدك أنا. رسيم: حلم إبليس بالجنه، وأنتِ حلمج أطلگج. رواسي: لو أنا لو هيَ تبقى وياك. رسيم: اعترفيلي بحبج إلي، ليش ظامه مشاعرج عني وأنتِ مفضوحة. ضربته على صدره بقهر وعطت: رواسي: أحبك يا أنذل شخص شفته بحياتي. رسيم: حتى اعترافج بيه مسبات. خزرته وكلت: رواسي: لأن أنتَ نذل.

دفعني على ظهري وصار فوكايه. نزل راسه يشم بعطري. توترت من قربنه كلش، أعرف هذا القرب نهايته شنو. دفعته عني بخفة وگلت بإستعجال: رواسي: رسيمم، وخر وخر، نسيييت شغلة. ابتعد عني يباوعلي بتساؤل. رسيم: شنو؟ رواسي: لازم أطلع أنا ضروري. رسيم: وين! باوعتله ورديت بفهاوة: رواسي: هااا؟ رسيم: تردين تطلعين؟ كوليلي وين. رواسي: ها، لا أقصد أطلع من الغرفة. درت وجهي عنه ومشيت بخطوات بطيئة، بس بسرعة ركض عليه وسحبني عليه.

رسيم: ليش تبعديني عنج؟ رواسي: لأن ممحتاجني أنتَ، عندك مرة ثانية روح الها. رسيم: امشي وياي، امشي. سحبني من إيدي وطلع يسحب بيه. نزلنا جوه. كلهم كاعدين يسولفون. كعدنا يمهم نستمع لحديثهم. وهيا بس شافته كامت ودخلت للمطبخ. شوي ورجعت بيدها فنجان گهوه، حطته على الطبله. هيا: گهوتك رسيم. رسيم: شكراً، بس أريد روسيه تسويلي. أشرت على روحي مستغربة. رواسي: انييي؟ رسيم: أي، ليش مستغربة؟

رواسي: بس أنا ما أعرف أسوي گهوه، بس جاي وبالگوه تعلمته. رسيم: عادي، كومي سوي يلا، أريدها ساده. كمت من مكاني بدون ما أحجي شي، دخلت للمطبخ وصرت أدور على الگهوه. لكيتها وسويته. حطيتها بصينيه صغيرة وياها گلاص مي. شفت على الكاونتر اكو نستله جلاكسي، فتحتها أخذت قطعتين منها وحطيتهم بصف الفنجان وأخذتها اله.

رجعت يمهم للصاله، شفت هيا دتبجي والبنات يحجون وياها. ما اهتميت، حطيت الصينيه على الطبله يم رسيم وكعدت بمكاني. بقيت أباوع على رسيم أنتظره يشربها. شال الفنجان بيده، شرب شوي وعقج وجهه. أكيد مو طيبة، بس يستاهل، گتله ما أعرف أسوي. رجع يشرب بيها شوي شوي لحد ما خلص الفنجان كله. شال النستله أكلها وشرب المي. رسيم: عاشت إيدج، تخبل شلون گهوه محروگه ومشعل جدها. رواسي: أنتَ ردت، ما جبرتك أنا. ابتسم بحب وكال:

رسيم: لو تشربيني سم يعجبني لأن من إيدج. وجه نظراته لهيا وكال: رسيم: يلا كافي بجي وروحي لمي أغراضج حتى أرجعج لاهلج. عاطت بصوت حاقد. هيا: هجمتيييي بيتي، الله يهدم بيتج يا رواسي الحية. رواسي: ما سويت شي أنا!! غسان: ما عليها البنية، صار شگد هوَ كايلج نتطلك بس أجّلها علمودج لأن سادس. هيا: بس أنا طلبت منه ميطلكني، ما أريد أتطلك! عذراء: راح تتطلكون وخلص، كلنا نعرف رسيم ميحبج! ولا أنتِ تحبي، بس تحجين هيج علمود رواسي تعوفه.

هيا: أبوهاااا گتل أمه وبعده وياها، ليش ما عافهاااا، ليششش؟؟ شگت كلبي بكلامها، راساً گمت عليها وضربتها من دون وعي وعطت بيها. رواسي: ادبسزززز، إذا تحجين على أهليييي، راسج أكسرههه. صاح بيه رسيم حتى أبتعد عنها. بسرعة ابتعدت وعفتهم وصعدت للغرفة. ركضت على المفتاح أخذته وقفلت الباب.

شمرت هدومه بالگاع وطلعت كتبي والملازم وذبيت حرگتي كلها بالدراسة. هالفترة راح أبلش تطبيقي ولازم أكون جاهزة. گعدت گدام الكتب وكل شوي دموعي تنزل، أبجي شوي وأمسح دموعي وأرجع أركز بدراستي. اندگت باب الغرفة، غلست ما جاوبت. رجع دگه بقوة أكثر وعاط بصوت: رسيم: رواسييي، فتحي الباب.

غلست عليه ما جاوبته. بقه يدگ بالباب لحد ما صار صوت طگه قوية واختفى صوته. شويه وسمعت صوت غسان ومحمد بكل البيت ويصيحون بإسمه. گمت من مكاني، فتحت باب الغرفة، شفته متمدد بالكاع فاقد والكل مجتمعين فوگ راسه! عطت بيهم وركضت عليه، دفعت هيا من يمه وكعدت يمه. نزلت روحي وحطيت راسي على صدره. أسمع دگات گلبه مو منتظمة أبد. رفعت راسي وعطت بخوف: رواسي: ماكو جهاز ضغط بالبيت؟؟ عذراء: أنا عندي، هسه أجيب.

راحت ركض لغرفتها، جابته ورجعت. قستله الضغط بسرعة، شفته مرتفع كلش. انتبهت عليه صار يعرگ بشكل مو طبيعي. رواسي: فوتوا على الغرفة بسرعة، هسه أجي. ركضت للمطبخ صرت أدور على خل تفاح ما لكيت. بقيت أروح وأجي أدور، ماله أي أثر. رجعت ركض وصعدت فوك، نسيت بروحي حامل. دخلت عليهم للغرفة. رواسي: هوَ عنده سكر أو ضغط؟ محمد: أي أي، عنده سكر. رواسي: وين علاجه؟

فتحت هيا المجر مال كومدي وطلعت من عنده علبه بيها أدوية وأبر إنسولين. أخذتهن منها وطلعت جهاز السكر، قسته هم طلع مرتفع. رأساً ضربته أبرة إنسولين تحت الجلد. رواسي: إذا ما نزل لازم ناخذه لمستشفى، إذا يبقى سكره مرتفع يصير عنده غيبوبة سكر. طفرت هيا وصارت تعيط بعرامة. هيا: كلهههه منج أنتِ، كلشي ما چان بي من دخلتي حياتنه دمرتييي ودمرتينا كلنا. رفعت إيدي بهدوء وحجيت: رواسي: مالي خلك، هاي طلعوها منا.

عذراء: هياوي تعالي ويايه بلا مشاكل. دگت رجلها بالكاع وجتفت إيدها. هيا: ما أطلع إذا ميصحى رسيم، إذا معاجبها ترجع منين ما إجت. زفرت نفسي بعصبية وهزيت راسي. معاجبني لا وجودها ولا كلامها، بالبداية سوت روحها البنية الي ماكو مثلها، وهسه طلعت على حقيقتها. بقيت أنتظر، مرت عشر دقايق ورجعت قستله السكر. نازل شوي، تنفست بإرتياح. رواسي: نزل الحمدلله، هسه شوي ويصحى. غسان: تعاركتوا انتو؟ رواسي: لا، جنت أدرس.

باوع لملابس رسيم بالكاع وصار يأشر عليهن. غسان: هاي دراستج؟ باوعتله وحجيت بتوتر: رواسي: ها، شسمه، من اجيت أنا فرغلي الكنتور ومصار مجال أرتبهم. محمد: رواسي، ديري بالج على رسيم، والله يحبج وإحنه كلنا شاهدين على حبه الج. رواسي: شاهدين على حبه لو على خطفه الي حدد؟ محمد: من دخل السجن يلا عرفنه إنو هو خطفج، ما چنه نعرف أبد. رديت عليه ببرود: رواسي: اوكي. مرّ الوقت وبلش يصحى شوي شوي. رفعت راسه بحضني وسندت ظهره على صدري.

رواسي: مي فدوه. ركضت هيا جابتله مي وجت تريد تشربه. سحبت الگلاص من إيدها وقربته لحلگه. شربه كله، ريگه نشف بسبب ارتفاع السكر. گال بتعب: رسيم: ممرضتي الحلوة تعبتج. رواسي: خوفتنا عليك رسيم، ليش ما گلتلي عندك سكر؟ رسيم: مو شي مهم. رواسي: لا مهم وكلش مهم. غسان: ناخذك مستشفى؟ -أخذ نفس بتعب. رسيم: لا، ميحتاج، هسه أصحصح.

هزو راسهم وشافوا كلش تعبان. طلعوا كلهم من الغرفة بعد ما اطمنوا عليه إنو مابي شي. بقت بس هيا واگفه وتباوع لرسيم بعيونها المدمعة. ما اهتميت الها وحطيت إيدي على راسه. رواسي: حبيبي نام ارتاح شوي. رسيم: نوميني بحضنج. ضحكت وهمستله: رواسي: والله لو ما هاي واگفه چان جاوبتك جواب يبرد گلبي. بسته من راسه واردفت بصوت مسموع: رواسي: أنا وحضني كلنا الك. رفع عيونه على هيا. رسيم: من تطلعين سدي الباب وراج، أريد أنام.

هيا: من شوكت تطردني من غرفتك؟ رفعت حواجبي بعصبية وحجيت بنتر: رواسي: الرجال تعبان متشوفي شلون؟؟ طلعي وسدي الباب، خلينه نرتاح. طلعت من الغرفة وطبگت الباب بقوه عود عصبيه. ابتعدت عن رسيم وعطت: رواسي: وجععع كون بنص گلـبـج. انداريت عليه واردفت بعصبية: رواسي: لو صاييير بيك شييي استاااذ ؟؟؟ ابتسم بتعب. رسيم: على كيفج بابا، اهدي، مابيه شي. رواسي: لا عبالك خايفه عليك، بس إذا تموت أترمل أنا وبعدني بعز شبابي. رفع حاجبه بصدمة.

رسيم: ترديني أموت يعني؟ رواسي: اذا تموووت أموتككك والله. ضحك بصوت عالي. رسيم: شلون رهمتيها؟ رواسي: معليك، ترهم، نام واشبع نوم، اليوم مسموحلك تنام هنا. رسيم: روسيه، خجلتيني بكرمج والله. عطت بدون وعي: رواسي: انجب. حطيت إيدي على حلكي وطفرت من مكاني ودرت وجهي عنه. أنعل يومج رواسي، شلون تكوليله انجب، قندرة على راسج وحلگج. ظل ساكت ثواني وصاح بإسمي. درت وجهي عليه، أشرلي بإصبعة بمعنى تعالي. مشيت وكفت يمه.

رسيم: نزلي روحج تعاي. رواسي: آخر مرة والله بالغلط. رسيم: گلتت نزلي روحج، مابيه حيل أكوم. رواسي: أريد أكمل دراستي. نتر بيه قاطع كلامي. رسيم: قربييي روحج عليه أكثر. نزلت روحي لمستواه. مد إيده على أذني وسحبني منها. رسيم: ممنووععع تنعاااد رواسي. عطت بوجع. رواسي: شبيييك رسيييمممم!! رسيم: أنا لو أنتِ؟ رواسي: گتلك آخر مرة بالغلط طلعت مني، عوف أذني، تخبلتتت أنتَ؟ عاط بصوت: رسيم: وتالي وياججج، متعرفين تحجين بإحترااام!!

مديت إيدي على إيده أريد أخلي يعوف أذني. شلعها شلع، قندرة عليك رسيم. عاف أذني ورأساً سحبني. صرت فوگاه، حضني من خصري وهمس بصوت خافت. رسيم: عقابي الج غير، كل غلط تغلطي أخذ منج بوسه، والبوسه شوي شوي تتطور وتصير غير شي. دفعته بخفة. رواسي: بس عوفني ممكن؟ حضني أكثر. رسيم: غلطتي مرتين ولازم تتعاقبين عليهن ثنينهن.

گلبني وصار فوگايه. نزل وجهه عليه أكثر. غمضت عيوني بقوة. صار يطبع ببوساته على كامل وجهي وختمها ببوسة عميقة على شفايفي. ابتعد عني واثنينه نجر النفس بقوة. شوية وصارت لمساته إجراء ولزم ملابسي. توترت كلش، أريد بس أبعده عني بأي طريقة. صرت أحاول أرفع روحي بس سرعان ما قيد حركتي بيده. رسيم: ما أعوفج اليوم، روسيه أنتِ حلالي. حجيت برجفة. رواسي: عوفني رسيم. قرب وجهه يم أذني وهمس. رسيم: ما أريد أأذيج حبيبي، لتمنعيني منج.

رواسي: ما أريد، حباب، ما أكدر. مد إيده على راسي ودخل أصابعه بشعري. سحبني بقوة وردف بجدية. رسيم: لتمنعيني، ما أريد أضربج. لزمت إيده أريد أبعده. رواسي: دتأذيني، وخر عني. فجأة انفتح باب الغرفة بقوة وهوَّ بسرعة گام عني وباوع للباب. ماكو أحد. تقدم خطوات وطلع من الغرفة. شوي ورجع، وجهه ما يتفسر. رسيم: راح أطلع، إذا أرجع وأجيج وهم ترفضيني تشوفين مني شي مراح يعجبج رواسي. رواسي: تكرهني بيك بهاي تصرفاتك، خاف متعرف.

هز راسه بتوعد. رسيم: هينه رواسي، يصير خيرا. أخذ أغراضه وطلع من الغرفة معصب. ما اهتميت اله، گمت فتت للحمام، غسلت وجهي وصرت أباوع على روحي بالمرايه. رواسي: شنوو تردين بالضبط رواسي؟ يعجبج تنضربين وياخذ منج الي يريده مثل قبل؟ أخذت نفس بتعب ونشفت وجهي ورجعت بمكاني. بقيت أدرس وأراجع الي فاتني لوقت متأخر. فزيت ع صوت التلفون، شفته رسيم وجاوبته. رواسي: نعم؟ جاوبني بحدية. رسيم: بدلي وتعالي، أنتظرج بالسيارة.

رواسي: ما أريد، نعسانه راح أنام. رسيم: أنتظرج بسرعة يلا. سد الإتصال بوجهي وأنا استسلمت للأمر الواقع وگمت بدلت ملابسي ونزلت. البيت هدوء، الكل نايمين لأن عدهم دوام الصبح. فتحت باب البيت بهدوء، وقبل ما أطلع أجاني صوتها. التفت عليها واقفة متخصرة على الدرج. هيا: ويه منو متواعده بتالي الليل؟ ابتسمت بإستهزاء. رواسي: ميخصجج!

فجأة صارت تصيح بصوت عالي على الكل. كلهم طلعوا من غرفهم مفزوعين. تجمعوا يم الدرج يباوعون عليها يردون يفهمون شكو. هيا: تريد تنهزم من البيت، متواعده ويه حبيبها. نزل غسان من الدرج مصدوم، أجه يمي. غسان: وين طالعة ساعة ٢ بالليل؟ رواسي: ما أعرف، رسيم خابرني گلي طلعي، واجت هاي صارت تصيح وأتهمتني. غسان: رسيم ما رجع بعده؟ رواسي: هسه أجه، دينتظرني بره. انداريت عليها وعطت بصوت عالي.

رواسي: متواعده ويه حَبيبي وأريد أطلع، عندج مانع؟ هيا: شگد بلا أخلاق، وينه رسيم خلي يجي يشوف هاي الي لفاها ببيتنه. دخل رسيم على صوتنه يباوع مستغرب. وهيَّ بس شافته عاطت. هيا: همزييين، اجيت، تعااال شوف هاي ال** متواعده ويه حبيبها وتحجيها بكل عين صلفه تريد تنهزم وياه. غسان گام يضحك. غسان: شگد مريضة أنتِ، شلون ما چنه حاسين عليج؟ كال بتعجب. رسيم: شبيكم؟ رواسي: متواعده ويه حَبيبي وشافتني أريد أطلع، گعدت الكل بصوتها المزنجر.

حط إيده وره ظهري وسحبني عليه. رسيم: روحوا ناموا، ماكو شي، أنا خابرتها أريد أطلعها شوي. طبطب غسان على كتفه. غسان: لتتأخرون، دنيا ليل، كلشي يصير. رسيم: ناخذ فره ونرجع، منتأخر. صعد غسان وأخذ مرته وعذراء رجعت لغرفتها. بس هيا بقت واگفه بمكانها تباوع علينه. فرني عليه وباسني من شفتي. رسيم: يلا حَبيبي، امشي. طلعنا من البيت، ركبنا السيارة، حرك وصار يفرني بشوارع بغداد وأنا طول الطريق ساكتة، مزعوجة كلش. وكف يم مطعم.

رسيم: شتحبين أجيبيلج؟ رواسي: ما أشتهي، نفسي تلعب. رسيم: ممتعشيه أنتِ بس على الغده. انداريت عليه واردفت بجدية متسائلة. رواسي: وين رحت رسيم؟ رسيم: طلعت ويه جماعتي. رواسي: لتعيدها بعد. مسح ع وجهه وكال. رسيم: لو باقي يمج أكثر چان أذيتج وأنا حلفت ما أذيج بعد. رواسي: بس أذيتني برغم حلفانك، أذيتني. رسيم: بشنو أذيتج؟ عطت بقهر. رواسي: بكلشييي، تزوجتني وأنتَ متزوج وخليتني طرف ثالث بعلاقتكم، وهاي أكبر أذية إلي.

رسيم: ماكو علاقة بيناتنه حتى تكونين طرف ثالث. رواسي: رجعني للبيت، تعبانه كلش، بطني تأذيني بسببك. مد إيده على بطني بخوف. رسيم: متعبـَـج؟ ركزت بعيونه. رواسي: مو بكد تعبي من أبوهر. رسيم: حبيني رواسي، حبيني بكل حواسج. رواسي: أحبك والله، بس أعرف نهايتنا مراح تكون مرضية. رسيم: سلميني روحج وخلي حياتنه تتغير. رواسي: اغتصبتني مرتيييين أنتَ، واليوم چانت راح تصير الثالثة. خزرني وتنّر بية.

رسيم: مرتي أنتِ رواسي، يا اغتصاب الي تحجين عنه. وخرت إيده عن بطني. رواسي: أخذت كل شي غصب عني، فرضت روحك عليَّ و خليتني أمام الأمر الواقع. درت وجهي على الجامّة وكملت كلامي بغصة. رواسي: رجعني للبيت، باجر عندي دوام بالمستشفى. سكتت وحرك السيارة بدون ميحجي شي ورجعنا للبيت. نزلت من السيارة قبله وطگيتها بركضة للغرفة فتت وقفلـت الباب عليه حتى ميجي يمي. شوي وصار يدگ بالباب يريدني أفتحه. بالاخير جزع مني وعاط.

رسيم: إذا متفتحين الباب أروح أنام يم هيا وما أطلكها! عفته ما جاوبته ولا فتحتله الباب. خليت الوقت يمر وگمت من مكاني فتحت الباب على كيفي وطلعت أتسحب من الغرفة بدون صوت. رحت يم غرفة هيا. شفت الباب مسدود والضو مفتوح. قربت راسي على الباب بهدوء وسمعت صوته جوه، يعني راح يمها؟ يتبع...