رواية رواسي الدهر الفصل السابع 7 - بقلم روح الدليمي

انفتح باب الغرفة بطريقة همجية، رفعت رأسي شفته رسيم. زفرت نفسي متنرفزة و عاط بي: رواسي: أنتَ متستحييي؟؟ شعندك باقي هنا!! رسيم: ما أتحرك خطوة وحدة إذا متمشين وياي! رواسي: والله يا رسيم إذا متروح منا أطيح حظك و أشتكي عليك. دخل آدم الغرفة، سحبه من إيده و ضربه بوكس. بقوا واحد يضرب بالثاني و أني أتفرج عليهم. عفتهم ثنينهم يتضاربون و طلعت من الغرفة. فتحت تلفوني و اتصلت على عمي. أول ما جاوبني گلت:

رواسي: عمووو تعال بسرعة فدوه. سالم: شبيج بنتي شكوو؟ رواسي: رسيم هنا و هوَ و آدم واحد خلى دم الثاني بطوله. سالم: جاييي جاااييي. سديته من عنده و گعدت على القنفة، و همَّ بس أصواتهم طالعة. واحد يصيح و يفشر على الثاني. واحد يكول للثاني أنتَ أخذتها مني. ضحكت عليهم، كل عقلهم ديتعاركون علمودي. ماكو دقايق و تفلش الباب من قوة الدگ. گمت فتحته، صار بوجهي عمي و ولده إخوان آدم. سالم: وينهم؟ رواسي: بالغرفة.

دفعوني و دخلوا ركض عليهم، مشيت وراهم. عجبتني المسرحية اللي دتصير، أريد أعرف نهايتها شنو حتكون. إخوان آدم تجمعوا عليهم، بعدوهم عن بعض. و عمي وگف بنصهم و عاط بيهم: سالم: مخابيييل انتووو!! شواربكم تارسة وجوهكم و تتعاركون علمود مرة؟ حجيت من يمي مستهزئة: رواسي: والله عمو عادي حتى الصرصور عنده شوارب. رسيم: لججج و تالي وياج!!! تأدبييي رواسي. سالم: مالكككك حجي وياها، عندك حجي تحجي ويايه اني. رواسي: أني مسؤولة عنها!

رسيم: أريد آخذ مرتي ليش متنطوهاااا؟ سالم: مرت ابني هاااي منين اجت و صارت مرتك؟ ادم: مو مرتي يابه. سالم: تضحكووون عليه انتو، مو عقدت عليها و جبتها هنااا؟ رسيم: رواسي حامل ب ابنييي زواجها من ابنك باطل. انصدم من كلام رسيم، اندار عليه و خزرني و عاط بيه: سالم: روااااسيييييي، شيمضرططط هذااا؟ نزلت راسي، خجلت منه ما عرفت شنو أجابه. ادم گال: ادم: أي رواسي من تزوجتها جانت حامل. تخبل عمي علينه و صار يسب بيه و يغلط.

رسيم فلت روحه من إخوان آدم و هجم على عمي يريد يضربه، ركضت عليه و گففت كدامه و حجيت بجدية: رواسي: تأدب و امشييي اطلع منااا، ترفع إيدك على عميي؟؟ سحبني من إيدي و بلحظة وحدة حط سلاحه براسي. فرني عليهم صار ظهري على صدره و عاط: رسيم: اللي يخطييي خطوة وحد بس أو يجي ورايه، أموتها و أموت روحي وراها. سالم: مينلام أبوها لما رفضك على همجيتك هاي. حسيت على مغص قوي ببطني، حضنت بطني بيدي و عطت ب ألم: رواسي: يممههه بطنييي.

رأساً نزل سلاحه عن راسي و فرني عليه. صار يباوع عليه بخوف وقلق گال: رسيم: باباتي شبيج؟؟ رواسي: ولكممم بطنييي رااح أموووت. گعدت بالگاع و صرت أعصر ببطني، تگطعت تگطع من الوجع. حاروا بيه و اختصبوا خبص. رسيم شالني و راد يطلع، عاط بي عمي: سالم: ويييين ماخذهاا؟ رسيم: أعمى أنتَ متشوف حالتها؟؟ طلع بيه بدون ميسمع منهم و أخذني للمستشفى. الدنيا ليل و ماكو دكاترة. رأساً دخلوني للطوارئ و اجت دكتورة فحصتني و گالت:

_عندج تقلصات قوية كلش و هالشي ابد مو زين. رواسي: الطفل مابي شي؟؟ _حالياً لا بس كثرت التقلصات تأثر على حملج و ممكن يصير عندج إسقاط، راح أنطيج مثبتات و من يصير عندج أي ألم تاخذين حبوب للتقلصات. اندارت على رسيم و گالت: _حضرتك زوجها؟ رسيم: أي. _راح أنطيها مسكن هسه و بس يخلص تكدر تطلعها، بس حاول تخليها ترتاح و بدون جهد.. و أي زعل أو عصبية ابعدها عنهن. رسيم: المهم هيَ بخير الطفل يجي غيره. _مابيها شي، الحمدلله على سلامتها.

راحت الدكتورة و اجت الممرضة حطتلي الكانونة و بطل مغذي. شوي شوي صار يخف الوجع عندي و حسيت بنعس مو طبيعي. رفعت عيني على رسيم و گلت: رواسي: لشوكه تبقى تعذبني رسيم؟ رسيم: يا راحتي أنتِ، ارجعيلي أريدج اني. رواسي: بس أني ما أريدك. مد إيده على راسي و صار يمسح عليه بهدوء و گال: رسيم: تريديني روسيه، متگدرين بدوني أنتِ. رواسي: منگدر نرجع، عرفت كلشي اني. ضحك بكسرة و گال:

رسيم: صدگيني أحبج مستحيل أذيج بعد، الانتقام عمى عيوني و أذيتج في سبيل أجبر أبوچ يعترف على روحه و ينسجن. رواسي: أني ضحية حالي حال أمك، و أنتَ و أبويه الي جنيتوا علينه. رسيم: ارتاحي هسه ما أتحمل يصير بيج شي والله، و بعدين نتفاهم و نحل كلشي. غمضت عيوني و استسلمت للنوم. ما حسيت للصبح. فتحت عيوني أني بغرفتي ببيت أهلي. نهضت روحي من الفراش و صرت أباوع حواليه. جنطتي و أغراضي كلهن بالغرفة. شلون أجيت لهنا و شوكت ما أعرف.

گمت من فراشي و طلعت من الغرفة نزلت جوه. شفت أبويه گاعد ويه عمي و آدم يسولفون. بس شافوني سكتوا. تقدمت عليهم و حجيت: رواسي: كملوا ليش سكتوا. راشد: ليش ما گلتِ أنتِ حامل؟ رواسي: ميخصك هذا الشي. ملامحه تدل على عصبيته بس كلامه كله ببرود: راشد: أنتِ بنتي و كل شي يخصج يخصني اني. رواسي: ماعندي اب مجرم مثلك. راشد: و عادي يكون لطفلچ اب مجرم مثل رسيم! رواسي: ليش رسيم ذبح أحد؟ أحد مات على إيده؟؟

بقه ساكت و يباوعلي بنفس نظرات الغضب، أردفت: رواسي: إذاً لتحجي أبد. سالم: رواسي تردين ترجعين لرسيم؟ باوعت لابويه، عاط بيه: راشد: إذا ترجع أذبحهااا والله. رواسي: أي عمو أريد أرجع. كام عليه يريد يضربني بس صار بوجهه آدم گال: ادم: لهنااا وحدك عميييي رواسي متنضرب أبد. رواسي: عادي هوَ إيده ملطخة بالدم ميهمه إذا موتني أو لا لأن عنده تجربة سابقة. اندار عليه آدم و عاط بيه: ادم: سكتيييي أنتِ تراا أني أضربجج مو أبوچ.

گمت من مكاني و گلت: رواسي: أريد أرجع لرسيم و غصب عن الكل، إذا مترجعوني اله أرجع أنهزم وياه مرة ثانية و بكيفكم بعد. عفتهم و رجعت لغرفتي. أهلي اللي جنت أشوفهم أحسن ناس انصدمت بيهم. أبويه طلع قاتل و أمي متستره عليه. كرهتهم و حقدت عليهم. قرار رجعتي لرسيم فقط حتى أحرك گلبهم.

مرت ساعة كاملة و أني بغرفتي و همَّ أصواتهم عالية، يتعاركون. اندگت باب غرفتي و دخلت أمي. درت وجهي عنها ما أريد أشوفها. أحسهم كلهم مشتركين بموتت أمه لرسيم! گعدت يمي على الجرباية و گالت: جميلة: روسيه بنتير. رواسي: قندرة على راسي، شتريدون مني؟؟ جميلة: بس اجيت أگلج السيد جوه و رسيم هم. رواسي: يعني؟؟ جميلة: مو تردين ترجعيله؟ السيد اجى حتى تعقدون من جديد. باوعتلها بنظرات حزن و حجيت بقهر: رواسي: شلون گدرتي تبقين ساكتة؟

ما انبج ضميرج؟ وينها جميلة اللي متسكت على الظلم حتى لو على گص رگبتها؟ شلون تسترّتي على جريمة قتل!! جميلة: أبوچ هذا شلون أفرط بي فهميني رواسي شلووون؟ أنتِ من رادو يسجنون رسيم مو غيرتي كل إفادتج و كذبتي عليهم؟؟ أني سويت نفسج لان أحبه. رواسي: رسيمممم ما قتل أحد، و بعدين أبويه خانججج و أنتِ دافعتي عنه وين گرامتججج امي وينهاااا. جميلة: گرامتي ويه گرامتج، أنتِ شلون قبلتي تتزوجين الشخص اللي خطفج و أذاج و دمر حياتج.

رواسي: مو نفس الشي أمي مو نفس الشي! جميلة: لا نفس الشي. رواسي: رسيم أذاني أني، ما أذى أحد ثاني و حرك گلبه. گامت من مكانها و گالت: جميلة: أذيتج أذيتنا كلنا، كلنا احترگت روحنه بعذابج.. بس الحجي ما يفيد بعد أني نازلة تعالي وراي أنتِ. عافتني و طلعت من الغرفة گمت من مكاني. بدلت ملابسي و نزلت. كارهة كلشي بهاي الدنيا. يارب أخذ روحي و خلصني من هذا العذاب.

حطيت شال على راسي و دخلت يمهم سلمت و گعدت يم أبويه. عقدلنا السيد من جديد و راح. باوعلي رسيم و گال: رسيم: لمي غراضج و امشي نروح بالگوه متحمل روحي گاعد هنا. هزيتله راسي و طلعت من يمهم رجعت لغرفتي. طلعت باقي أغراضي حطيتهم بجنطة ثانية لان جانوا حاطيهن ب أكياس. طلعت الجنط أسحب بيهم. أول ما شافني صعدلي بسرعة أخذ الجنط من إيدي و نزلهم و گال: رسيم: انتظرج بالسيارة. رواسي: تمام. راح هوَ و نزلت أني رحت يم

أبويه و گففت گدامه و گلت: رواسي: جبرتوني أرجعله بس حتى أحرك گلبكم، راح أساعده و أخلي يحرگكم بنار انتقامه. راشد: لتصيرين أنتِ و الدنيا ضدي، وداعت عيونج كلشي صار بالغلط ما جنت متقصد أموتها. رواسي: و رسيم مجان متقصد يأذيني بس بسببك صارت كل أذيتي.

تقدمت عليه حضنته بكل قوتي و بجيت بحضنه. هوَ صار يبجي و يايه و يعتذر. قسيت بكلامي وياه بس لازم أخلي يتخلص من ذنبه، قتل النفس حراام و هوَ قتلها و ضمضم على عملته. ابتعدت عنه و حضنت أمي بستها و ابتعدت عنهم و طلعت من البيت بدون ما أحجي شي. رسيم بس شافني نزل من السيارة و اجى عليه فتحلي باب السيارة صعدت و رجع هوَ صعد و حرك بينه. صرت أباوع للشارع و مركّزة بالطريق. لزم إيدي فزيت من صفنتي گال: رسيم: صار ساعة أحجي وين صافنة؟

رواسي: أكرهك رسيم، لتفكر رجعتلك لسواد عيونك. رسيم: ميخالف أكرهيني المهم أنتِ يمي و ببيتي. سحبت إيدي منه و رجعت أباوع من الجام. انتبهت مو نفس طريق البيت اللي جنه بي بس غلست و ما حجيت شي. بعد مدة وصلنا وكف سيارته بكراج بيت جبير كلش و تصميمه فخم بناء جديد. نزلت من السيارة و هوَ نزل أغراضي و دخل قبلي للبيت، صاح بصوت عالي: رسيم: وينكممم يا قووووم. اجانة صوت رجال طلع من المطبخ، اجى يمنه حضن رسيم بكل قوته و يطبطب على ظهره.

گال: _شوكت طلعت من السجن!! رسيم: رأساً طلعت، بس سافرت و قبل يومين رجعت. اندار عليه و گال: رسيم: روسيه هذا اخويه الجبير و عضيدي غسان. رواسي: أهلاً اني رواسي. انتبه غسان لوجودي و رفع حاجبه مستغرب و گال: غسان: شلون انطوها؟؟ رسيم: سالفة طويلة، يلا باباتي تعاي نفوت جوه. سحب الجنط و دخل يمشي ويه أخو و يحجون گال: رسيم: لعد البقية وينهم؟ غسان: محمد بالدوام و رشا و عذراء كل وحدة يم أمها بس هيا موجودة بغرفتها. ترك الجنط على

جهة و گعد بمكانه و گال: رسيم: شبيج واگفة حَبيبي تعاي گعدي. رحت گعدت يمه متوترة ما أعرف أحد بيهم و لا أعرف أي شي عنه و عن عائلته. بقوا يسولفون و غسان گال: غسان: وين سافرت بدون حتى متحجي! رسيم: رحت عمره طهرت روحي من كل شي لخاطرها. باوعتله و گلت مستغربة: رواسي: أنتَ رحت عمره؟ ليش أنتَ تعرف شي عن الله و دين محمد. ضحك غسان و گال: غسان: بهاي حقج، طايح حظ مسربت ليل نهار بالشوارع و مرته المسكينة تبقى تنتظر بي للصبح.

وسعت عيوني مصدومة، شنو مرته شنو تنتظره؟ رفع عيونه عليه يباوعلي و بقه ساكت بدون ميحجي شي. غورگت عيوني و حجيت بهدوء أحاول أسيطر على روحي: رواسي: بس أريد أغسل وين الحمام؟ رسيم: أمشي آخذج للغرفة هناك موجود حمام. گام من مكانه و گمت وراه. تمنيت أذبحه بيدي. شلون متزوج و محجالي!!! صعدنا فوك و دخل لوحده من الغرف دخل الجنط و گال: رسيم: هاي غرفتنا روسيه اخذي راحتج. راد يطلع من الغرفة لزمته من إيده منعته يطلع و حجيت بغصة:

رواسي: أنتَ متزوج؟ رسيم: على وشك الطلاق. رواسي: شگد جذاااب أنتَ دخيل ربك! و كلامك وينه لعد؟؟ منو اللي گلي أقرف من كل بنية بس أنتِ لا؟؟؟ رسيم: أي صح ما جذبت عليج بشي. رواسي: لعد شلون متزووووج!!! و فوكاها ما گلتليييي. رسيم: زواجي منها مثل زواجج من آدم. رواسي: شلون يعني؟ رسيم: كل واحد بغرفة و ما عليه بيها أبد. دفعته و تعديته رحت گعدت على الجرباية. اجه گعد يمي لزم إيدي نترتها منه. رجع سحبها و لزمها بقوة و گال:

رسيم: تغارين عليه؟ رواسي: لا ليش أغار. رسيم: اممم حلو جيد. رواسي: كوم من يمي لا والله بال.. قاطعني و گال بعصبية: رسيم: گولي بالقندرة حتى تجيج القندرة عدل على حلگج. رواسي: روح لمرتك شعندك يمي. رسيم: أنتِ مرتي. رواسي: لتفكر أبد أكدر أتقبلك ك زوج الي مستحيل، و فوگاها جايبني ضرة لمرته شگد متستحي. اندگت الباب و دخلت بنية شابة تطلع أصغر مني. باوعتلي و رجعت نظراتها لرسيم و گالت بفرح: _و أخيراً أخذتها و صارت حلالك.

رسيم: دعائج الي سهلها عليه. رواسي: أختك؟؟ ضحك و گال: رسيم: لا ضرتج. بقيت بصدمتي معقولة هاي صدگ تحجي؟ اجت تقربت عليه حضنتني و بوستني و گالت: _الف مبروك حَبيبتي الله يسعدكم و يديمكم لبعض. ابتعدت عني باوعتلها و حجيت مستغربة: رواسي: متأكدة أنتِ ضرتي؟ لو شنو الموضوع؟ ضحكت و گالت هيَ تباوع لرسيم: _بس بالاسم مرته ترا مابيناتنه أي شي، رسيم أشوفه مثل اخويه.

رفعت حواجبي و سويت حركة بشفتي تدل على استغرابي، حاسة كلشي ديصير كمين الي. رسيم: هيا عيوني سويلنه شي ناكله من البارحة بدون أكل. هيا: تدلل حَبيبي. طلعت من الغرفة و الابتسامة على وجهها. گمت من مكاني فتحت جنطتي طلعت ملابس الي أريد أبدل. تخصرت و باوعت لرسيم تمدد على الجرباية و عيونه عليه. رواسي: شعندك باقي هنا؟؟ رسيم: غرفتي هم تطرديني منها؟ رواسي: ماكو غرفة تجمعنا سوه روح لهيا روح يمها.

رسيم: و لا مرة نمت يمها كله هنا بغرفتي. رواسي: أي بس صارت غرفتي هاي شوفلك غرفة ثانية لو روح لمرتك نام يمها اني شعليه بيك. گام من مكانه و اجى باتجاهي، رجعت خطوتين بعد ما لزگ روحه بيه و أنفاسنه اختلطت. رجع سحبني من خصري و نزل راسه طبع بوسة على شفتي و گال: رسيم: يجي من گلبج وحدة ثانية تشاركج بيه؟ رواسي: عيوني ترا اني الثانية مو هيَ يعني اني اللي دا أشاركها بيك. رسيم: متغارين!

رواسي: لا عادي ليش أغار منو أنتَ حتى أغار عليك بلا زحمة؟ بقيت أباوع بعيونه بكل ثقة أريد أخفي غيرتي اللي شعلتني شعل و على لحظة أموته بيدي هوَ وياه. بلحظة شالني عطت بي: رواسي: نزلننيييي شبيكككك والله اكطع عليك. قاطعني و هوَ يبوسني و گال: رسيم: ملكة القنادر رواسي راشد، طحت بغرامج و ذبت بتفاصيلج.

توترت من قربنه عبالك أول مرة يكون قريب مني بهذا القرب. غمضت عيوني بقوة لما نزلني على الجرباية و رجعتلي ذكرياتي لأول يوم خطفني بي. فتحت عيوني و دفعته عني بخوف و عطت: رواسي: وخررر عني لتلمسننييي وخررر. ركز عيونه بعيوني جانت نظراتي كلها خوف من عنده، برغم حبي اله بس بعدني أخاف من قربه. مسح على خدي ب إصبعه و گال بهدوء: رسيم: ليش الخوف باباتي. رواسي: وخر عني فدوه.

تمدد على ظهره و سحبني لحضنه. أنفاسه سريعة و مو منتظمة أبد. باوعتله مغمض عيونه بقوة سحبت روحي من حضنه و گمت بهدوء. أخذت ملابسي گال: رسيم: وين؟ رواسي: أبدل بالحمام. رجع غمض عيونه و أني دخلت للحمام. بدلت ملابسي و طلعت سحبت جنطتي و فتحت الكنتور ملان ملابسه. باوعتله و رجعت باوعت للكنتور و گلت: رواسي: هسه أني وين أحط ملابسي استاذ؟؟ رسيم: طلعي ملابسي و خلي ملابسج. رواسي: وين أخليهن إذا طلعتهن؟؟ رسيم: بكنتور هيا.

رواسي: اهاا حلو حلو. تقربت على الكنتور و صرت أطلع ملابسه و أشمرهم بالكاع. عاط بيه: رسيم: مو بالكاااع ولججج. رواسي: خليه هيا تاخذهن يمها تحطهن على راسها مو بس بكنتورها. رسيم: صاحية أنتِ؟ رواسي: لا مدمنة مخدرات اني عقلي طگه ونص. فرك وجهه بقوة و گام من مكانه صار يشيل بالملابس من الگاع و يعدل بيهن على الجرباية. خلاهن كلهن على الجرباية و طلع من الغرفة. گعدت أرتب بملابسي بكنتوره و أغلط عليه بصوت مسموع:

رواسي: نذل حقير ممكتفي بوحدة طايح حظ مال قندرة و دكك على راسه يصحى على روحه لا والله مو قندرة وحدة قناااادر و نعووول. تبسمرت بمكاني لما گال: رسيم: كملي بعد روحي كملي جلدج يحكج أنتِ. رواسي: ما حجيت شي اني سمعت غلط. رسيم: أي أي صحيح، امشي نتغده يلا. رواسي: ما أريد شكراً. رسيم: دمشي بلا كلام زايد. رواسي: ما عندي ثقة بيكم خاف هم ترجعون تنطوني مخدرات. راد يحجي بس دگ تلفونه جاوب: رسيم: هاا باباتي؟ أي هسه نازلين صبي الأكل.

سده و اجى يمي باوعتله و گلت: رواسي: منو؟ رسيم: هيا. رواسي: و أنتَ ما شاء الله عليك صاير بابا للكل، بعد إذا تكولها الي أطيح حظك. هز راسه و صار يستغفر، سحبني من إيدي طلعني من الغرفة و گال: رسيم: إذا تقللين من احترامي گدام أي شخص أني أطيح حظج خوش باباتي؟ رواسي: لككك أنتَ مو أبويه لتگولها أبد. رسيم: بنيتي أنتِ. رواسي: أاوووععع. رسيم: وتالي رواسي؟

بقيت ساكتة ما حجيت شي، نزلنا سوه. شفتهم كلهم گاعدين داير مداير السفره بالگاع و هيا و وياها بنية ثانية ينقلون بالاكل. گاموا البنات سلموا عليه و باركولنا و الولد نفس الشي. كلهم عرفوني على أسمايهم و منو همَّ. رجعنا كلنا گعدنا گعدنا أني و رسيم بصف بعضنا. اجت هيا گعدت يم رسيم من الجهة الثانية. قربت روحي من رسيم و همستله بعصبية: رواسي: إذا تبقى گاعد يمها أسوي شي ميعجبك والله. رسيم: مو متغارين و عادي؟

رواسي: إذا متكوم أني أكوم و تحلم بعد أكعد وياكم ب أي مكان. هز راسه و گال بصوت مسموع: رسيم: روسيه تعاي بمكاني أنتِ اني اكعد بمكانج. أنظار الكل توجهت علينه مستغربين الوضع. گمت من مكاني و هوَ گعد بي و أني گعدت بمكانه صرت أني يم هيا و رسيم يم أخو محمد. كملنا أكلنا و همَّ يسولفون ويه رسيم و كل واحد يحجيله عن شغله و شلون ماشي. الكل يحجي بس أني ساكتة و أستمع الهم بكل هدوء. دگ تلفوني تجاهلته لما هيا گالت لرسيم:

هيا: رسيم عندي الك مفاجئة. رسيم: أحب مفاجئاتچ گولي شنو. هيا: نجحتت من السادس بمعدل ٩٨. الابتسامة انرمست على وجهه و گال بفرح: رسيم: عفيه عليج بابا ما خيبتي ظني بي. هيا: أنتَ وعدتني إذا اطلع معدل عالي الي حق أطلب منك أي شي و تنفذ. رسيم: و بعدني گد وعدي گولي عيوني الج. رجع دگ تلفوني ترخصت منهم و جاوبت قبل لا اگوم: رواسي: هلا ادوم. ادم: شلونج رواسي؟ خوما رجع أذاچ بشي؟ صعدت فوك و أني أحجي:

رواسي: لا عيوني ليظل بالك ابد ما سوالي شي. ادم: أي شي تحتاجي اني موجود بمكالمه وحدة منج تلكيني مزروع يمكم. رواسي: متقصر حَبيبي. سديته من عنده و درت روحي أريد أطلع شفت رسيم واگف بباب الغرفة و يخزر بيه. سويت روحي ما مهتمة و مشيت أريد أطلع، بس دفعني لداخل الغرفة و عاط بيه: رسيم: منوو سمحلجج تتواصلين ويه *** هذا. رواسي: أحترم نفسك و اعرف شلون تحجي، ما اسمحلگ تقلل احترام أي شخص من أهلي فهمت لو لا؟؟

رسيم: رواسي لتختبرين صبري!! رواسي: من تنفذ كلامي و تبعد روحك عن هيا و كلامك اللي تحجي الي ممنوع ينحجي لغيري بذاك الوكت شتريد گول و أني انفذ، فهمتتت !! رسيم: گتلجج هالفترة راح نتطلك!! رواسي: من تطلكون عود تعال و باليوم اللي تطلكها بي راح أصيرلگ مرة أحبك و أصونك و أحافظ عليك. عفته واگف و طلعت من الغرفة لكيت هيا واگفة يم الباب و دمعتها بعينها. تعديتها أريد أنزل استوقفتني و گالت: هيا: رواسي اني أحب رسيم لتجبره يعوفني.

رواسي: ما أجبر أحد اني اذا يريدچ يبقيچ يمه بس يطلكنيي لو جنت أعرف بي متزوج يحلم أرجع أتزوجه و أجي وياه. هيا: لتخلي يكرهني حرام عليج اني هم مرته! رواسي: شوفي حَبيبتي لا أنتِ و لا رسيم تهموني، اللي يهمني گرامتي اللي هانها لما جابني لهنا گ زوجه اله و هوَ متزوج. عنده خيارين ماكو غيرهم لو يطلكج و يبقى وياي أو يطلكني و يبقى وياج. عفتها و نزلت جوه گعدت وياهم اجت رشا زوجه غسان بيدها صينية استكانات جاي.

وزعت للكل وصلت يمي و گالت: رشا: تفضلي عروستنا. رواسي: بي شكر؟ رشا: أي أكيد. أخذته منها و گمت من مكاني گلت: رواسي: شكراً گلبي بس أني أشربه بدون شكر. اجى رسيم أخذه من إيدي و گال: رسيم: اني أشربه. هزيتله راسي و رحت للمطبخ صبيتلي بكوب و رجعت گعدت يمهم. مرت محمد گالت: عذراء: شلون تكدرين تشربيه بدون شكر؟ رواسي: عودت روحي حتى أكدر أحافظ على جسمي. كلشي بي شكر ما أكله و لا أشربه. رشا: عودينا وياج كلنا محتاجين. ضحكت و گلتلها:

رواسي: تدللون الف طلب مثل هل طلب. اجت هيا گعدت يم رسيم، شال تلفونه و گام من مكانه. شوي و رجع گعد على الكرسي المنفرد. باوعت لرسيم و گلت: رواسي: حَبيبي تلفوني القديم يمك؟ صار يباوعلي مستغرب أول مرة اگول حبيبي بس ردت أقهر هيا. گال: رسيم: موجود بالغرفة شتسوين بي. رواسي: أريد أنقل صوري و أرقام صديقاتي بي. رسيم: ميخالف بليل أسويهن الج. عذراء: رواسي شنو تشتغلين أنتِ؟ رواسي: أدرس بعدني هاي آخر مرحلة الي.

رشا: ما شاء الله شنو تخصصج أي قسم؟ جاوبها رسيم و عيونه عليه: رسيم: ممرضتي هيَ. هيا: يعني تدرس تمريض؟ رواسي: أي. هيا: معدلي يدخلني تمريض مو؟ رسيم: ليش ميدخلج معدلج عالي و تكدرين تدخلين طب. رواسي: ما أنصحج بي شوفي غير شي الج يناسبج أكثر. رسيم: أدخلي صيدلة مو حلمج؟ ليش تغيري. هيا: هيج رأيك؟ رواسي: لتسمعين من أحد أنتِ شنو حلمج اسعي اله. هيا: رسيم عادي أطلب هسه؟ رسيم: گولي و اني انفذ.

هيا: ما أريدك تطلكني، أريد أبقى زوجتك و على اسمك.. يتبع...