رواية روح الأدهم الفصل الثالث 3 - بقلم هاجر العفيفي

فيلا الحديدي روح: باااااس اهدوا شويه، اسمع مين فيكم. أدهم دخل في اللحظة دي. أدهم: مالك ياروحى، صوتك عالى ليه؟ روح: لاء، ده أنا بتفاهم مع الأولاد. أدهم برفعة حاجب: كده بتتفاهمى معاهم؟ أومال لو بتزعقيلهم. أسر راح مسك في أدهم. أسر: عمو أدهم. أدهم شاله بابتسامه: نعم يا أستاذ أسد. أسر بطفوله: عايز العب مع جودى وهى مش راتيه. أدهم بضحك: مش راضيه ليه ياست جودي؟ جودي ببراءه: كل سويه يزعقلي. روح: ههههههه.

أدهم: بتزعقلها ليه يا أسر؟ أسر بطفوله: عشان بتلعب مع عمر، وأنا قولتلها لاء متلعبيش مع ولاد. أدهم فتح عينه بدهشه وبص لروح ال واقفه كاتمه ضحكتها. أدهم: ومش عايزها تلعب ليه مع عمر؟ أسر: كده. أدهم: حاضر، أنا هعلمها. روح وقد انفجرت في الضحك: هههههههه مش قادره، انت بتسمع كلامه. أدهم وهو بينزل أسر جمب الأطفال: هاتى البنت دى وتعالى ورايا. روح بضحك: حاضر حاضر. وأخدت جودي من وسطهم وراحت ورا أدهم.

أدهم: خدى هنا يابت انتي، معلقه مين فيهم؟ جودي بصتله ببراءه ومش فاهمه كلامه. روح بضحك: وضح كلامك يا أدهم، هى مش فاهمه. أدهم بغيظ: بس كده حاضر، قولى ياست جودي انتي بتحبى تلعبى مع مين فيهم؟ جودي بطفوله: حوى. أدهم: لاء قصدى على أسر ولا عمر. جودي بحركه طفوليه: الاتنين. أدهم بصدمه: الاتنين ياقادره! لاء اختارى واحد فيهم. جودي بعصبيه طفوليه: أنا بلعب مع الاتنين يابابى وبحب الاتنين، وادينى عندهم يامامى.

أدهم بدهشه: انتي بتزعقيلى كمان! هجيبك منين بعد كده. روح شالتها: خلاص بقا يا أدهم متزعلش البنت. أدهم: أنا اسف ياست جودي، بس برضوا لينا حساب تانى بعدين، بقولك تيجى معايا أنا ومامى هنخرج النهارده. جودي بتفكير: لاء هخلينى مع أسى وعمى وحوى. أدهم برفعة حاجب: والله ماشى يا جودي، هترجعى تندمى، وديها ياروح تلعب معاهم وتعالى عايزك. روح: حاضر. وخرجتها مع الأطفال ورجعت لأدهم تاني. روح: خير يا أدهم.

أدهم قرب منها: هو أنا يعنى موحشتكيش. روح بخجل: وحشتنى طبعا، بس أنا معاك دايما أهو. أدهم: معايا دايما، بس كل عقلك مع الأطفال بس، مبقتيش منتبهه ليا خالص. روح: طب اعمل ايه يا أدهم، دول أمانه هنا، مينفعش اسيبهم لوحدهم. أدهم بغيظ: وأنا أطق يعنى. روح مسرعه: بعد الشر عنك ياحبيبى، متقولش كده. أدهم: خلاص هتخرجى معايا النهارده. روح بتردد: بس بس. أدهم: بس ايه. روح: والولاد.

أدهم: أمى موجوده والداده برضوا، يعنى مش هتقف عليكى ياروحى. روح: طب وجودي. أدهم: مانتى شوفتى سالتها قدامك ومرضيتش أهو، ولا هى حجج والسلام عشان متخرجيش معايا، خلاص ياروح براحتك. ولسه هيمشي روح مسكت ايده. روح: انت بقيت قفوش أووى يا أدهم، خلاص ياحبيبى هخرج معاك. أدهم: طيـ. روح بتزمر: هو ايه الـ طيب، شكلك لسه زعلان. أدهم: أه، صالحينى يالا. روح فهمت قصده وباسته من جبينه. أدهم بصلها برفعة حاجب: بس كده.

روح بابتسامه: كفايه عليك كده. أدهم: ماشى ياروح، هتقعى تحت ايدى وهتندمى. روح: ههههههه مهونش عليك يا أدهومى. وسابته وخرجت. أدهم بابتسامه: هتجننينى ياروحى. *** في فيلا سليم العشري دخل سليم الفيلا في غير موعده وطلع غرفته، بس قبل مايدخل سمع ندي بتتكلم في الفون وصوتها عالي نسبيا، راح عند باب غرفته. ندي: أيوه أنا كويسه والله، وانت وحشتني أكتر. سليم دخل في الوقت ده بعصبيه. سليم بغضب: طب طالما وحشك مروحتيش ليه ياست هانم.

ندي بدموع قفلت الفون: سليم انت فاهم غلط، ده ده. قاطعها من كلامها صفعه على وشها خلتها تتجمد مكانها. سليم بحده: ايه مابتصدقي أخرج وتشوفى حياتك، مانتي لو أهلك. قاطعته ندي بصراخ: اخرررررس، كل الا أهلى ياسليم، أنا مش هسمحلك تجيب سيرتهم أبداااا، وأنا مسمحلكش انك تشك فيا، حرام عليك بقا كفاااايه، انت ايه وال كنت بكلمه ده أدهم، وحتى شوف. رفعت الفون قدامه وكان رقم أدهم فعلا. سليم كان بيبصلها بملامح جامده مفيش أي تعبير.

ندي بنفاذ صبر ودموع: خلاص أنا تعبت ياسليم، مش هقدر استحمل تاني، أنا كل يوم بنام وأنا دموعي على خدي، وده كله بسببك انت، كل يوم أقول لنفسي يمكن يتغير، يمكن يرجع سليم الدكتور ال قابلته ال حبني وحبيته، وبسخريه او ال كنت فاكراه بيحبني، انت ضيعت كل حاجة كانت في حياتي ياسليم، كنت عاملة حياة وردية هعيشها معاك، لكن للأسف جيت انت وخليتها سودة، أنا دلوقتي همشي وهروح عند أمي، وياريت ورقة طلاقى توضلي بدون شوشرة. ولسه هتمشي

سليم مسك ايدها بكسره: ندي متسيبنيش. ندي بصتله بجمود وبسخرية: فاكرني هصدقك تاني؟ سيبني في حالي بقااااا. وسابته وبالفعل أخدت كل حاجته وخرجت، وهو كان بيبصلها بانكسار وندم. *** في جزر المالديف أدم: ايه رايك في المكان ياقلبي. مايا: جميل ياحبيبي. أدم: أومال الجميل زعلان من ايه. مايا: مش زعلانه، أسر وحشني بس. أدم: والله وحشني شقاوته، خلاص هانت، كلها يومين بالظبط ونرجع.

مايا خافت أووى من فكرة انها ترجع بيتها تاني، حاسة ان فيه حاجة هتحصل. أدم: يلا بقا تاكلي ايه. مايا: بيتزا. أدم بغمزه: عيوني في ثانية تكون عندك ياجميل، انت تؤمر. مايا: هههههههه. أدم: احم، ماتخلي البيتزا كمان شويه 😉. مايا وقد فهمت قصده: لاااا روح هات دلوقتي، اخلص جعااانه. أدم: حاااضر، يخربيتك فصيلة. مايا بضحك: يلا سريعا. أدم بوعيد: حاضر، راجعلك يا. مايا طلعت لسانها ليه ودخلت تجري. أدم: والله عسل. *** في فيلا الحديدي

ندي دخلت بشنطتها بس حاولت تكون طبيعيه. روح بلهفه: ندي عامله ايه ياقلبي، واحشاني، وباستغراب وايه الشنطه ال معاكي دي. ندي: انتي أكتر ياروحى، دي شنطتي. روح: طب مانا عارفه، بس ليه. ندي لسه هترد قاطعها نزول أدهم ال اول ماشافها حصنها بلهفه واشتياق. أدهم بحب: وحشتييينى ياندوووش، عامله ايه. ندي: تمام الحمد لله. أدهم بتساؤل هو الأخر: ايه الشنطه دى؟

ندي بمرح مصطنع: ايه ياجماعه، في ايه، وحشتوني وجايه اقعد معاكم شوية، ايه مش عايزني. روح مسرعه: لاء طبعا ياقلبي، انتي منورانا. أدهم بشك: يعنى سليم مش مزعلك. ندي يتوتر: ه ها لاء طبعا، ده هو حتى هيسافر شغل يومين عشان كده محبتش اقعد لوحدي. أدهم بشك أكتر: اممم متأكده. ندي بهروب من الموضوع: أهه طبعا، أومال فين جودي؟ وحشتني جدا، وماما فين. روح: طنط خرجت تجيب حاجات، وجودي جوه بتلعب مع الأولاد. ندي بدهشه: أولاد مين!

أدهم: اه صح، أنا مقولتلكيش، عقبال عندك، احنا فاتحين حضانة الأمل جوه، ولاد خالد وولاد أدم، وكلهم جوه. ندي بضحك: هههههههههه يانهاااار، ليه أهلهم فين العيال دي. روح: بيتفسحوا. أدهم بوعيد: لما يرجعوا بس وربى لأخصملهم الاتنين من مرتبهم، وهخليهم يشيلوا شغل سنة قدام. روح: حرام عليك. ندي: لاء شكلهم مزعلينك أووى يا أدهم. أدهم وهو يجز على أسنانه بغيظ: لما يجوا بالسلامه بس الأول.

ندي: استر يارب، طب أنا هدخل العب مع الولاد بقا، اصل وحشونى. أدهم: اه يبقا عملتي فيا واجب، اصل هاخرج أنا وروح وكنا شايلين هم مين هيفعد معاهم. ندي بغمزه: أي خدعه، ابقوا تعالوا كل يوم. وسابتهم ودخلت للأطفال. أدهم: لماضه. روح: مش ملاحظ ان ندي زعلانه. أدهم: ملاحظ، بس مش عايز اضغط عليها، سيبينى أنا هعرف بطريقتي. روح: ماشى، وابقا طمني. أدهم: حاضر، يلا بقا انتى جاهزه. روح: خمس دقايق واكون جاهزه علطول.

أدهم وهو على وشك البكاء: سريعا بالله عليكى، قبل مايحصل حاجة تمنعنا نخرج. روح بضحك وهى طالعه على الدرج: حاضر هوا ياحبيبي. أدهم: يامسهل. *** في تركيا في أحدى المناطق الهاديه والجميله. جنه: جعاااااانه. خالد: ارحمينى بالله عليكى، دى خامس مرة تفطري فيها النهارده، أنا اعتقد ان احنا مسافرين ناكل بس. جنه ببراءه: يرضيك تسيب جنتك جعانه. خالد: بتاخدى نقطة ضعفى يعنى يا جنه، الصراحه ميرضنيش.

جنه باسته من خده: شاطر، ودينى لعيالي بقا. خالد: بجد، أنا منى لله عشان فكرت أسافر معاكي، كنت جيت أخدت واحده من هنا وقضيت معاها يومين في الخيال. جنه بصدمه: ياخااااااااااااين! أخرتها تعمل كده، اهئ اهئ، مكانش العشم يابو عمر. خالد: طب اطلقها دى ولا اعمل فيها ايه يابنتي، اطلعى من دور ام أشرف ده شويه، يخربيت الفصلانجنه ببراءه: عايزني افرفش، ودينى فسحة حلوه. خالد برفعة حاجب: وايه يضمن انك تفرفشى بعدها ومفيش نكد.

جنه: سيد، متقولش كده، احنا أهل، انت بتشك في قدرات مراتك. خالد بسخريه: أنا بشك في مراتى نفسها. جنه: قومى يابنى خرجنى وأكلنى بره يلا، وأنا بص هبهرك رومانسيه، يلا بس. خالد بنفاذ صبر: حاضر ياختي، لما نشوف، قومي. جنه نطت وباسته في خده: هيييييه، حبيبي يا أبو العيال. وسابته ودخلت تغير هدومها. خالد خبط كف فوق الأخر: وربنا أنا متجوز مجنونه. *** عند روح وأدهم

كانوا بيتمشوا في أحدى المناطق المطله على البحر، وكان شغاله أغنية لتامر عاشور رومانسيه، وكانوا مندمجين معاها جدا وحاسين كلامتها وبيوجهوها لبعض، وبعد مانتهت الأغنية أدهم بص لروح ال كانت سرحانه. أدهم: تصدقي ياروح، أنا كل يوم قلبي بيثبتلي ان بعشقك عن اليوم ال قبله، انتي بقيتي كل حياتي وروحي فعلا.

روح بابتسامه: انت ال كل يوم بتثبتلي ان أخترت صح، وربنا عوضني بيك، وعوضني عن حرمان من أهلي ال ماتوا بيك انت، أنا بحبك أووى يا أدهم. أدهم ضمها لصدره بحنان: احنا اتخلقنا لبعض ياروحى. أدهم لروح وروح لأدهم: ربنا يخليكي ليا ياحياتي وعمري ال جاي. روح بمرح: ويخليك ليا يازوجي العزيز. أدهم: قلبه وربى. روح لسه هترد قاطعها واحد صديق أدهم قابلهم. كريم: أدهم أخبارك ايه ياباشا، وحشني. أدهم: انت أكتر ياصحبي، عامل ايه.

كريم: تمام، ايه ياعم محدش شافك من يوم فرحك، ليه معتزل العالم، ازيك يامدام روح. أردفت روح بابتسامه: الحمد لله. أدهم بضحك: طول عمرك رخم يا كريم. كريم بغرور: عارف يابني طبعا، المهم بنتك عامله ايه. أدهم: كويسه وبتقولك مش عايزه تشوف وشكك. كريم: البت طلعت بتحبني زي أبوها، وبغمزة ايه ياعم مش ناوي تفرحنا بولد كده يشيل اسم الحديدي. روح غمضت عيونها بألم شديد وحاولت تتماسك ودموعها متنزلش.

أدهم بص لروح بحزن عشان عارف ان الكلام ده بيتعب نفسيتها، حاول يخلص من كلام كريم: ان شاء الله، بس خلينا نفرح بيك الأول. كريم: لاااااا لسه بدري يابني، بعد الشر، يلا هسيبك أنا بقا عشان مستعجل جدا، سلاموز. أدهم: مع السلامه، ابقا اسأل. كريم: حاضر، سلام. ومشي وسابهم. أدهم نظر لروح ال كانت ساكته ومتكلمتش واتحدث بهدوء. أدهم: ممكن أعرف مالك بقا. روح بدموع: أدهم أنا حاسة ان عاجزة أووى، عاجزة ان افرحك بالولد ال نفسك فيه، عاجزة.

قاطعها أدهم: هشششششش، كفايه، هنرجع تاني للكلام الأهبل ده، أنا قولتلك قبل كده ياروح وهقولهالك تاني، أنا عمري ماهستغنى عنك، مش عايز نقاش في الموضوع ده تاني، ماشي. روح بدموع: حاضر. أدهم ضمها ليه أكتر ومسح دموعها بمرح: نكدووو مش وقتك بالله عليكى، عايزين نفرح ساعتين. روح ابتسمت على كلامه. أدهم بابتسامه: أيوه كده بقا، هو ده الكلام، ابتسامة تملي الدنيا، أمال. روح بحب: بحبك يانبضى. أدهم: بحبك ياروحى.

وكملوا مشي وقت كبيييير جدا وكانوا بيهزروا ويضحكوا ويرجعوا أيام زمان من تاني، وكان وقت جميل عدا عليهم. *** في فيلا سليم العشري مصطفي: يعني انت عجبك حالك ده دلوقتي. سليم بتعب: ماله حالي. مصطفي: ارتحت لما هي سابتك ومشيت. سليم بتنهيده: لاء طبعا، أنا همووت من غيرها، وجودها كان مطمنني، دلوقتي أنا حاسس اني ضايع فعلا. مصطفي: قولتلك ياصحبي اعترفلها، انت ال مرديتش وصممت تكرهها فيك.

سليم: لاء، أنا عارف ندي كانت هتصمم تفضل معايا لو قولتلها على كل حاجة، وهكون أنا كده بظلمها معايا، لكن لما تكرهني هكون مرتاح أكتر. مصطفي: بس انت كده بتأذي نفسك ياصحبي. سليم بتنهيده: أحسن لما أأذيها هي. كده أحسن يامصطفي. مصطفي بقلة حيله: ربنا يريح بالك يارب ياسليم. سليم برجاء: يااااااارب.