رواية صعيدي علمني الأدب الجزء الثاني الفصل الثاني عشر 12 - بقلم حنين عادل

بيجري خالد وراها. بتدخل الحمام وهوا بيقف بره بقلق. بتطلع روح وهي بتنشف بفوطة. خالد: تعالي نروح للدكتور. روح: أنا كويسة يا خالد، ماتقلقش. خالد: سمعتها من عمي بدر وصدقت كلامه، لكن دلوقتي لأ. أنا مش مستعد أخسرك. روح: يا خالد، أنا كويسة بجد، ماتخافش عليا. خالد: روح، أرجوكِ. روح: أرجوك أنت. أنا لو لقيتني تعبانة هاكلمك نروح لدكتور، صدقني. خالد: أكيد؟ روح: أكيد. بيطلعوا يقعدوا في الجنينة. خالد: طيب وبعدين؟ روح: وبعدين إيه؟

خالد: هاتفضلي كده؟ روح: يعني هاعمل إيه يا خالد؟ خالد: ماتبقيش مستسلمة كده. روح: ماعادش حاجة تستاهل إني أحارب عشانها. خالد: لأ، فيه نفسك. نفسك تستاهل تحاربي عشانها. روح: نفسي! أنا مش عارفة نفسي دي. خالد: روح، دي سنة الحياة. هو احنا خالدين؟ كل واحد له يومه والموت مصير محتوم.

روح: عارفة يا خالد. عارفة. أنا كل اللي قاهرني ومأثر فيا إني ماكنتش جنبه. شال همي العمر وطبطب عليا وأنا ماكنتش جنبه ولا هونت عليه تعبه وتعب نفسيته. عارفة لو قضيت حياة فوق حياتي معاه مش هاشبع، بس إحساسي إني قصرت، إحساس إني ماكنتش حاسة بيه ده بيموتني. كل لما بفتكر وبتخيل الوضع وهو بيتوجع وأنا مش جنبه، قلبي بيوجعني أوي. خالد: يا روح، ماتظلميش يونس. لو كنتي عرفتي كنتي هاتنهاري وكنتي هاتزودي على عمي بدر تعبه.

روح: اقفل يا خالد على الموضوع، أرجوك. أنا هاقوم أنام. تصبح على خير. خالد: وأنتِ من أهل الخير. *** بتتفاجئ ميرا بالعريس. ميرا بصدمة: أنت! دكتور عبد الغني. عبد الغني: هييييي، إزيك يا أميرة. ميرا بتقعد. ميرا: هو... حضرتك... عبد الغني: عارف إنك مستغربة وجودي. أيوه، أنا العريس. بصراحة كده يا ميرا، أنا من أول يوم شفتك فيه وأنا انبهرت بيكي وقلبي حبك. ميرا: بس حضرتك مش شايف فرق السن اللي بينا؟

يعني مش عشان أنا فقيرة تفتكر إنك ممكن تشتريني؟ مرات أبوها: والنبي يا خويا ماتزعل، هيا مش قصدها. عبد الغني: أشتريكي؟ عمري ما أقدر لأنه غالي أوي على أي حد. وعلى العموم فكري، ولو وافقتي هابقى أسعد واحد في الدنيا وصدقيني هاسعدك. بيمشي عبد الغني. بتقعد ميرا تبص لمرات أبوها بقرف. مرات أبوها بتقعد جنبها: راجل بيحبك وشاريكي وقيمة وسيما. ميرا: ده قد أبويا. مرات أبوها: وماله؟ المهم مريش وهايطلعك من الفقر اللي أنتِ فيه ده.

ميرا: أنا راضية بعيشتي الحمد لله. مرات أبوها: ماتبقيش أنانية. ميرا: أنانية! مرات أبوها: ماتنسيش أخوكي اللي لازم يتعالج وعايز عملية في القلب. وطبعًا عارفة ثمنها كام، اللي لو اشتغلتي في الممنوعات ما هاتعرفي تجمعي فلوسها. ميرا: أنتِ بتقنعيني بإيه؟ إني أدمر حياتي ومستقبلي؟ مرات أبوها: لأ، إنك تنقذي أخوكي اللي مالهوش غيرك في الدنيا. بتقوم ميرا وبتدخل أوضتها وبتغير هدومها وبتقعد على السرير تفكر في كلام مرات أبوها.

ميرا: الله يرحمك يا بابا ويسامحك. *** في المستشفى. يونس واقف قدام العناية المركزة. يونس: يلا بقا يا بوي، خلعت قلوبنا عليك. شد حيلك بقا. ربنا يقومك بالسلامة يا حبيبي. *** في الصباح. بتصحى بسمة وبتجهز وبتنزل على السلم. مرات أبوها: واللهي ما أنا عارفة إيه لازمته العلم آخر البنت بيت جوزها. بسمة: بيكبر المخ يا ماما، بيخليكي تعرفي حاجات ماكنتيش تعرفيها. بينور الدماغ. مرات أبوها: طيب يا اختي.

بتمشي بسمة وهي في طريقها لكليتها. بسمة بارتياح: الحمد لله ماشفتهوش النهارده. يارب بعده عني. بتدخل بسمة الكلية وبتدخل محاضراتها. *** في القاهرة. إسلام وميرا قاعدين على الكافتيريا. إسلام: إيه... أستاذ عبد الغني معقول؟ ميرا: أيوه واللهي. إسلام: أظن، أظنه بيتعصب كل ما بيشوفني معاكي. وأنا كنت فاكرة مقفول. طلع بيكرش عليكِ. ميرا: بيكرش! ههههه. إسلام: ده داخل من باب البيت. ههههه. يا ترى إيه شكله بعد ما ترفضيه؟

ميرا بصتله وسكتت. إسلام بصلها: أوعي تكوني ناوية توافقي. ده أنتِ تبقي اتجننتي. *** بتصحى روح من النوم. بتاخد شاور وبتقعد في الجنينة كالعادة. مش بتاكل وحاسة بدوخة بس مش فارق معاها حاجة. وكأنها بتموت نفسها بالبطيء. *** في الجنينة في البيت الكبير. كرم: طلعتي نحس، نحس يعني يا كريمة. كريمة: لا إله إلا الله. أنا اللي قلت للراجل يموت. ده عمره. كرم: وأنا أقول لسه 6 أيام. وبعد الليالي والحمد لله.

كريمة: مستعجل أوي كده. تكونش بتحبني؟ كرم: يابت... يابت، ده أنتِ العين والنن، يابت. كريمة: بس ماتقولش يا بت. كرم: اه يا جزمة. جتك البلا في شكلك. أنا ماشي. بيقوم كرم يمشي. كريمة: خد بس هنا، ماتزعلش. كرم: لأ، زعلان. كريمة: طب أصالحك إزاي؟ كرم: بوسة. كريمة: بس كده. كرم بصدمة: إيه ده؟ بجد؟ كريمة: طبعًا. ما أنت هتبقى جوزي. كرم: وأبو العيال. كريمة: وأبو العيال وأمهم لو عاوز. كرم: طيب يلا. كريمة: طيب غمض عينيك. كرم: ماشي.

بيغمض كرم عينيه وبيعمل بوقه على وضعية البوس. وبيبوس. بيفتح عينيه. كرم: أما... عااااا... كريمة بتجري وبتضحك. كرم: بقا أول بوسة؟ ياربي. أبوس كلبة؟ ماشي يا كريمة، ماشي. كريمة: تعيش وتاخد غيرها. هههههههه. ***

بيعدي أسبوع. شاكر حالته بتتحسن وبيطلع من العناية المركزة بس بيفضل تحت المتابعة في المستشفى. يونس ومصطفى مش بيسيبوه. ميرا بتفكر في عرض الدكتور عبد الغني وإسلام بيحاول يخليها ترفض ومستغرب إنها بتفكر. خالد بيروح يطمن على روح كل يوم وشايف إنها تعبانة وبيُقنعها تروح لدكتور لكنها مش بتوافق. مش بتخرج من البيت وعلطول قاعدة ساكتة. بسمة ماشافتش جمال ودي كانت حاجة غريبة بالنسبة ليها لأنه لازق. *** في بيت روح.

روح واقعة على الأرض. بيدخل عليها. "روح... "روح... "روح... وبيحاول يفوقها. روح بتفتح عيونها ودايخة: أنت!