رواية صعيدي علمني الأدب الفصل الثالث عشر 13 - بقلم حنين عادل

طلع بدر من البيت ويونس بيحاول يكلمه وشاكر بس مافيش فايدة. يونس طلع وراه: ارجوك يا عمي تسمعني. بيركب العربية وبتركب روح. شاكر: يا بدر. بدر: أشوف وشك بخير يا خوي. يونس: يا عمي أنا آسف. بدر: اطلع يا بني. روح بتبص ليونس وبتغمز. بتمشي العربية. ويونس بيفضل واقف بيبص عليها وجواه أحاسيس مختلفة. بيدخل يونس البيت. يونس: يا بوي. شاكر بعصبية: ما عادش ليك كلام معايا واصل. اعتبرني مت.

يونس: بعيد الشر عنك يا بوي. أنا آسف. أنا عارف إني غلطت وغلطي واعر بس سامحني. أنا ماليش غيرك يا بوي. بيمشي شاكر وبيسيبه. بيروح يونس وبيقعُد في الجنينة الخلفية وبيمسك جيتاره وبيبدأ يعزف. يونس بتفكير: أنت عملت إيه يا يونس في حياتك؟ خلى الكل يبعد عنك. روح اللي مش طايقاك من وقت ما جت. وعمك اللي ممشيه مكسور الخاطر. وأبوك. وأولهم أمك اللي اتخلت عنك وسابتك. آآآآه. آآآآآه يا قلبي مش ناوي ترتاح بقا وتنسى اللي فات.

........................... علي التليفون. صفاء: مشت يا بت افرحي. كريمة: بركاتك يا شيخ مخلوف. بركاتك. صفاء: بردك ما فيش فايدة فيكي. كريمة: أنا مبسوطة أوي. وأخيرا الجو فضالك يا بت يا كريمة. صفاء: يلا شدي حيلك بقا. كريمة: شهر بالكتير وهيكون جوزي. ............................. بعد ساعات. نزل بدر من العربية وروح نزلت قدام فيلا جميلة، أقل ما يقال عنها قصر. والخدامين شالوا الشنط.

روح طلعت تجري: عاااااااا وحشتيني. وحشتيني. وحشتيني. طلعت تجري عالجنينة وقعدت على المرجيحة تبوس فيها. قامت وقفت وشمرت بنطلونها وقعدت على البيسين ونزلت رجليها فيه وقعدت تحركها بضحك. بدر وقف يضحك عليها وجه قعد جمبها. روح: شمر يا راجل. بدر: هههه. حاضر. مبسوطة يا روح؟ روح: جدا جدا جدا. أنت مش متخيل أنا بحب الفيلا دي قد إيه يا بابا. هوا أنت في حاجة مزعلاك؟ بدر: حاجات مش حاجة.

روح: أنا عارفة إنك زعلان مني وإني زودتها الوقت اللي فات. بس صدقني هتغير وهاتكون فخور بيا يا بابا. بدر: قولتي كده كتير وما فيش تغيير. أنا عارف إن يونس ما كانش غلطان. أنتِ اللي كنتي بتستفزيه. ده كان رد فعل بسيط على أفعالك. بس أنا ما اتعودتش أجي عليكي. بس خلاص. انسي. بعد كده الغلطة بحساب. روح: أنا آسفة يا بابا. أوعدك إنك مش هتزعل مني تاني. يا عسل أنت. أنت طالع حلو كده لمين يا راجل أنت. بدر: كلي بعقلي حلاوة يا بت.

روح: بجد. مش ناوي تستقر بقا وأجوزك كده وأشوف عيالك قبل ما أموت. بدر: عندك عروسة حلوة؟ روح: عندي كتير. بس أشر أنت بس وتلاقيهم زي الرز. دا أنت بدر النمر صاحب شركات النمر. أكبر شركات للمقاولات. وعندك بنتك روح النمر. أحلى بنت في مصر. بدر: أنتِ مغرورة لمين يا بت؟! روح: من حق الحلو يدلع. دي ثقة. بس ها. قولت إيه. بدر: فس إيه يابت. أنتِ اتهبلتي. روح: ليه يا بابا. أنت عايش من عشرين سنة لوحدك؟

بدر: ما حدش يقدر يعوضني عن سارة في حياتي. أنتِ بتقولي إيه. أمك دي ما كانتش مراتي. بس دي كانت صاحبتي وأمي وأختي وحياتي كلها. اتحدينا العالم عشان نتجوز. بس للأسف الفرحة ما طولتش كتير. روح: ربنا يرحمها. كان نفسي أشوفها. هنتقابل في الجنة إن شاء الله. .................................... في المساء. يونس: يا بوي ماتزودهاش عليا. شاكر: هملني دلوك يا يونس. يونس بعيون مليانة دموع: أنت كمان يا بوي هتتخلي عني وتهملني كيفها؟

هوا أنا وحش للدرجادي عشان الكل يبعد عني؟ لو أنت هملتني أعيش ليه. شاكر بيحضنه: أنت مالكش ذنب في اللي حصل يا يونس. أمك اللي كانت ما عجبهاش عيشتها وباصة لفوق فوق أوي. دي مش أم. وما تسواش إنك تفضل طول عمرك تفكر فيها. يونس: نفسي أشوفها. نفسي أعرف منها هي ليه هملتني. كان إيه هوا ذنبي ليه؟ شاكر: كان غلطي إني ما عرفتش أختارلك أمك صوح. يونس: هي فين يا بوي. ريحني وخبرني. شاكر: ما عرفش مكانها. يونس: ماشي يا بوي. مسيرك هاتخبرني.

بيوس يونس ايد شاكر وبيطلع على أوضته. يونس بتفكير: أنا هاروح القاهرة اعتذر لعمي وأستسمحه. نام على السرير وبص للسقف. افتكرها وهي بتغمزله وهي ماشية وبتضحك. ضحك على جنانها. يونس بتفكير: ما عدّاش ساعات وحاسس إني عايز أشوفك. مش فاهم أنا إيه اللي أنا فيه ده. نام بعد صراع من التفكير. .................................... روح واقفة في بلكونتها. وبتغني. كتروا من الحب تلاقوا، تلاقوا، تلاقوا. في الضلمة ألف قمر. بنحب يا ناس.

نكذب لو قلنا ما بنحبش. بدر: أنتِ لسه صاحية. روح: تعالي يا حبيبي. مش جايلي نوم. بدر: ومش جايلك نوم ليه بقا؟ بتفكري في إيه؟ روح: في الدنيا يا حاج. بدر: جامعتك بعد تلات أيام. ها مستعدة تجيبي من الأوائل زي كل سنة؟ روح: آه طبعاً. بس الأوائل بجد إن شاء الله. بدر: طيب أنا هاروح أنام. روح: لأ. خليك معايا شوية واحكيلي قصتك أنت وماما.

بدر: شفتها في يوم وأنا راكب حصاني. شايلة صينية الأكل وماشية. فضلت وراها لما راحت لابوها الغيط وحطت الصينية. حسيت في حاجة شاداني ليها. استنت لما أبوها أكل وشالت الصينيه ومشت. شوية وأنا وراها. اتعقّلت. وقعت. نزلت من على حصاني وجريت عليها بسرعة. قومتُها ولميتلها الأطباق من على الأرض. كانت مخبية وشها مني. بس كان باين عينيها. كانت نفس عينيكي. وخدت مني الصينية من غير أي كلمة ومشت. أسرتني من يومها. بقيت كل يوم أروح أستناها

لما تروح لابوها وتيجي. حبيت أدبها قبل أي حاجة. كنت ابن العمدة وأبويا شديد. روحت ليه في يوم وكنت هاقوله أنا عايز أتزوج. فاجئني إنه خلاص خطبلي وفرحي بعد أسبوع. غضبت واتعصبت وثورت عليه. بس اللي كان في دماغه في دماغه. روحت خطبتها من أبوها بعد ما أقنعته إني هاقنع أبوي. بس أبوي ما اقتنعش. ولما عرف طردهم من البلد. طلعت دورت عليهم لحد ما لقيتهم وكتبت عليها وخدتها وروحت لابوي. بس طردني وغضب عليا. بس كانت أحلى حاجة حصلتلي. ما

ندمتش عليها. نزلت القاهرة وأنا شاب مش معايا جنيه. وهي استحملتني. كنا بنشتغل ليل ونهار واستحملت وكافحت معايا أربع سنين. وربنا كرمني. آخر كرم. بدعائها. فتحت شركة واتنين وتلاتة. وبقيت غني. وهي كل ده جمبي وفي ضهري وسانداني. لحد ما حملت فيكي. الدكتور قالها الحمل فيه خطر عليكي. قولتلها أنا مش عايز غيرك من الدنيا. واترجيتها. بس قالتلي إن ربنا هيسترها واللي عاوزه ربنا هيكون. وإنها نفسها في طفل ونفسها تبقى أم. استسلمت

لقرارها. وكنت خايف طول فترة الحمل وماسك قلبي بإيدي. كنت خايف أخسرها. ماكنش عندي طاقة لمجرد التفكير إني أخسرها. واجه اليوم ده. خلفتك والحمد لله كانت كويسة. كنت مبسوط إن ربنا استجاب لدعائي وحماها ليا. بس الفرحة ما كملتش. بعد ست شهور عملت حادثة وماتت. الدنيا مش على مزاج حد. دخلت في حالة اكتئاب. بعدها فترة كبيرة ما كنتش عارف أكمل حياتي من غيرها. بس قولت لازم أستقوي عشانك عشانك أعرف أربيكي. خدتك وروحت الصعيد تاني. وأنتي

عندك ست شهور بس. أبوي كالعادة كان قاسي. طردني وقالي ما أشوفش وشك تاني. ده نتيجة إنك عصيتني. وكان سبب موتها إنك عصيته. رجعت تاني مكسور الخاطر. بس كان لازم أكون قوي عشانك. ربيتك. وكنت باخدك معايا الشغل وأغيرلك وأشربك اللبن. كنت مبسوط وأنا شايفك بتكبري قدامي. وكنت بشوف فيكي أمك.

روح: ياااه يا بابا. أنت راجل عظيم. بدر: كل اللي عاوزة في الحياة إنك تكوني كويسة. وإنك تشوفي مستقبلك. العمر قدامك. ماتضيعيهوش. خليكي قوية وانجحي. أنا مش هاعيشلك على طول. روح: في إيه يا بابا. بتكرر الكلمة دي كتير ليه. ربنا يخليك ويطول في عمرك. بدر: يلا تصبحي على خير. روح: وأنت من أهل الخير يا حبيبي. بتدخل روح وبتقفل البلكونة. بتنام على سريرها. روح بتفكير: معقول هلاقي اللي يحبني زي ما أنت حبيت ماما يا بابا؟

ولا لأ. زي ما يكون الحب متحرم عليا. لازم اتخذل وأتجرح من كل اللي بحبهم. افتكرت يونس وهو بيجري وراها بالسلاح: هههههه. مش عارفة ليه كل الناس بتحبني أوي كده. أكيد دي حاجة في الشخصية. نامت روح وهي بتفتكر يونس. وكأن الأرواح تتلاقي. .................................... في الصباح. صحي يونس من النوم وخد شاور ونزل. شاكر ومصطفى وصفاء على السفرة. قعد يونس وبدأ في الفطار. الكل خلص. قام شاكر راح أوضة المكتب.

يونس: أنا عاوز عنوان عمي بدر يا بوي. شاكر باستغراب: ليه؟ يونس: أنا عاروح أعتذر له. أنا غلطت فيه ولازم أصلح غلطي. شاكر: خايف تروح تزود الطين بله؟ يونس: لاه. ماتخافش يا بوي. شاكر مسك ورقة وكتبله عنوان بدر. شاكر: هتروح ميته؟ يونس: دلوك. بجهز شنطتي. تليفون يونس رن. يونس: أيوه يا باشا. إيه. بس. تمام يا فندم. شاكر: في إيه؟ يونس: جالي مأمورية طارئة. شاكر: هتقعد كام يوم؟ يونس: من تلات أيام لأسبوع.

شاكر: خلاص روح بعد ما تخلص مأموريتك. يونس: حاضر يا بوي. بس تفتكر هيسامحني؟ شاكر: بدر قلبه أبيض وهيسامحك. .............................. بتصحي روح من النوم. بتلبس ملابس رياضية. بتنزل تركب عربيتها وتروح النادي. بتنزل من عربيته. لـ تجري كعادتها. بيجري جمبها شخص. روح بغضب: عايز إيه؟ حسام: أنا آسف يا روح. أنا اتأسفت كتير. اقبلي اعتذاري.

روح وقفت بعصبية: اعتذارك بجد مش محروج من نفسك. ده أنا حبيتك. حبيتك بجد. إزاي تعمل فيا كده؟ حسام: كانت غلطة. ممكن تسامحيني ونبدأ صفحة جديدة؟ روح بزعيق: دفترك قفلته من زمان. وابعد عني أحسنلك. الناس كانت بتبص عليهم. وحسام حس بالإحراج. بيمد إيده وبيحطها على كتفها. طاااااخ. ضربته بالقلم. روح بعصبية: حذاري إيدك تتحط عليا أو تلمسني يا حيوان. ماتنساش نفسك. أنا روح بدر النمر. حسام بغضب: أنتِ إزاي عملتي كده؟ إزاي اتجرأتي؟

هدفعك التمن غالي. بيرفع إيده عشان يضربها. بيلاقي إيد بتمسكها.