رواية صعيدي علمني الأدب الفصل الثامن والعشرون 28 - بقلم حنين عادل

يوسف: خلاص ..خلاص هاقول هاقول . يونس: سامعك. يوسف: الشاهد الأول الغفير..والشاهد التاني ياسمين. وبما انها بنت كان لازم يكون ست كمان وهيا ..... يونس: أيوه هيا مين؟ مش معقول يكون تشابه أسماء. يوسف: لأ مش تشابه أسماء. هيا ساميه غالي. والدتك. يونس مسك دماغه: طب ليه بتعمل كل ده؟ وتعرف روح منين؟! يوسف: أنا ماعرفش أسبابها إيه أو تعرف روح ولا لأ. يونس: عنوانها فين؟! يوسف بتوتر: ماعرفش!

روح كانت قلقانه. قامت من على سريرها وراحت أوضة يونس وخبطت على الباب. يونس فتح الباب. روح: ممكن أتكلم معاك شويه. يونس: دلوك! روح بابتسامه: دلوك. دخل يونس ودخلت روح وراه وقعدوا في البلكونه. يونس: اتفضلي. روح: يونس أنا عاوزة أقولك... هوا.. أنا عايزة أقولك إنه أنا.. عايزة إني.. يونس: إيه يا روح؟ بقالك ساعة بتقولي يونس أنا عاوزة أقولك؟! روح: أنا.... أنا بحبك. يونس: وده مقلب جديد من مقالبك بقا ولا إيه؟!

روح: لأ أنا فعلاً بحبك يا يونس ومش عايزة أمشي من هنا. يونس: للأسف اتأخرتي. أنا بحب ياسمين وياسمين بتحبني. روح: نعم... دا أنا أشرحكم انتوا الاتنين. ياسمين مين يلا؟ ياسمين صاحبتي معقوله؟ يونس: هيا ماقالتلكيش ولا إيه؟ مش انتوا أصحاب؟ روح: بس أنا بحبك يا يونس. يونس: ومن امتى بقا بتحبيني؟

روح: مش عارفه أنا حبيتك امتى. يمكن من أول يوم شفتك فيه وأنا ماكنتش عارفه. يمكن امبارح يمكن النهاردة. قلبي مش عارف يحدد حبك امتى. بس الأكيد إنه بيحبك وبيعشقك يا نمر. فتحت عيونها بصدمه. روح: معقوله كنت بحلم؟ أنا بحب النمر! عااااا أنا بحب النمر! أنا بحب النمر! بس هوا بيحب ياسمين. هوا قالي كده في الحلم. بس ده حلم ده حلم. طلعت وقفت في البلكونه. وهيا مبتسمه.

أحببتك وكنت غافله. أحببتك ولا أدري. ولكن القلب قد أعلن عن خضوعه واستسلامه. حينما شعر أنك قد تكون لغيره أحرقته نار الغيرة. أريدك لي لأخر عمري. أريدك أن تأخذ بيدي للجنه. أريدك وبشده. أنت لي.. لي أنا فقط. بيدخل يونس من الجنينه الخلفيه. روح بتفكير: الوقت اتأخر أوي. احنا الفجر. هوا كان فين؟ دخل يونس اوضته وقلع التيشيرت ورماه وطلع مرهم ودهن الجرح وهوا بيتوجع. روح: طيب ليه محمل نفسك اكتر من طاقتك؟

يونس بص عليها: إيه اللي مخليكي صاحيه لحد دلوقتي؟ روح: أنا ماكنتش صاحيه. أنا كنت نايمه بس حلمت حلم صحاني. يونس: أيوه وياتري حلو ولا وحش. روح خدت منه المرهم ودهنتله. روح: لأ مش وحش. بالعكس وضحلي حاجات ماكنتش فاهماها بس كنت حاساها. يونس: أيوه. روح: مالك يانمر متضايق ليه؟ احكيلي. نقسم الحمل علي اتنين. هايخف ومش هايبقي تقيل. يونس: ياريت كان ينفع. روح: وماينفعش ليه؟

يونس: عشان ماينفعش. ماحدش بيحس بجرح حد. ولا حد بيشيل زعل حد. كل واحد ليه شيلته. روح: جربني؟ يونس: ماينفعش. وجودك معايا في اوضتي في وقت زي ده. روح: بس أنا أبقي بنت عمك. يونس: عشان انتي بنت عمي مارضاش ليكي كده. ولا أرضاها لعمي. تصبحي على خير. روح: احم.. وانت من أهل الخير. بس إن حسيت إنك عايز تحكي أنا موجودة. خرجت روح وسابت يونس. يونس قعد على السرير. يونس بتفكير: ليه يا ست ساميه؟ ليه حتى كلمة ماما خسارة فيكي؟ ليه كده؟

وانت مالك بروح؟ ليه حطاها في دماغك وعايزة تبوظي حياتها؟ ليه؟ في الصباح. في عربيه. كرم وكريمه كانوا جمب بعض في العربيه من ورا وصفاء قدام. كريمه: يادي الحظ. كرم: حظ أسود ومطين بالطين. كريمه: انت تخرس خالص. كرم: اتكتمي واحترمي نفسك. بدل ما اشوهلك وشك ده. كريمه: طب جرب وشوف إيه اللي هيجرالك يا كرم الزفت. كرم: على دماغك ياوليه. ناقصه تربيه. صفاء: انتوا بتقولوا إيه؟ كرم: مافيش حاجه. هنوصل امتى المخروبه دي؟

صفاء: معلش يا ولدي أنا عارفه إن العمده جبرك إنك تيجي معانا. كرم: هاعمل إيه يا خاله؟ ربنا يعدي الأيام دي على خير. كريمه: جاتك البلا. كرم: على دماغك ودماغ اللي خلفوكي. صفاء: بتقول حاجه؟ كرم: بقول ماخبرتنيش عن أبوكي؟ هوا فين؟ صفاء: الله يرحمه. إحنا مالناش في الدنيا غير بعض. كريمه بصت للشباك بحزن. وكرم كان ملاحظها. بصتله كريمه بقرف. كرم: يا خاله مايصحش تقعدي قدام. قعديني أنا.

صفاء: أنا أكده مرتاحه يا ولدي. خليك جنب عروستك. روح كانت واقفه قدام المرايه وماسكه وردة وبتقطع فيها. روح: أقوله... مقولوش... أقوله... مقولوش... أقوله... لأ استني لما يخلف من ياسمين عيلين صح؟ قال إيه بتتكسفي أوي يا ست روح. بت قولي له واللي يحصل. يحصل. عدلت شعرها وحطت ورده على جنب شعرها وراحت على أوضته.

الست لما بتحب وشها بينور. بتحس إنها جميله. حتى لو وحشه. شعور السعاده لوحده أحسن من عشرين كيلو مكياج. بيورد الخدود وبيلمع العينين. بيطمن القلب وبيفرحه. بيخلي كل حاجة حلوة وبيخلينا نتغاضى عن أي حاجة. خبطت على الباب. مرة واتنين وتلاته. فتح الباب وهوا بينشف شعره. روح: صباح الخير يا عسل. يونس: عسل؟ روح: احم... هيا طلعت كده. أعمل إيه يعني. يونس: ادخلي. دخلت روح اوضته وقعدت. روح: إيه ده يانمر؟ إيه الشنطه دي؟

كانت شنطه مفتوحه على السرير وفيها هدومه. روح بحزن: هوا انت مسافر ولا إيه؟ يونس: أيوه. روح: ليه؟ يونس: عشان في حاجات لازم تتوضح. روح: ماتسافرش. يونس: ليه؟ روح: عشان... عشان مش عاوزة أقعد لوحدي. وقف يونس قدام المرايه بيسرح شعره. يونس: انتي هنا مش لوحدك. معاكي خالد وياسمين وباباكي وعمك. روح: بس... يونس: بس إيه؟ روح: بس انت مش موجود. يونس بصلها بإبتسامه: ووجودي معاكي من عدمه بيفرق حاجة. روح: بيفرق كتير. يونس: إزاي بقا؟

روح: يعني.. اخدت على وجودك جنبي. يونس: اه. روح: طب ما تاخدني معاك؟! يونس: إزاي يعني؟ واخدك بصفتك إيه؟ روح: هيا بنت عمك دي مش صفة؟ يونس: مش صفة تخليني اخدك معايا. روح: طيب.. أنا... أنا... تروح وترجع بالسلامه. خرجت روح وهيا متضايقه. روح نزلت على الجنينه لقت ياسمين وخالد قاعدين. روح: بقا في خيانات؟ مش خيانة. ياسمين سابتهم وطلعت. روح: هوا في إيه؟ مالها ياسمين؟ بتعمل كده ليه؟ في إيه؟ أنا عملت ليها إيه؟

خالد: مش عارف. أنا حاسسها متغيرة وبتتكلم بالألغاز. روح: طيب تعالي نفطر. ولا فطرتوا سوا؟ خالد بضحك: حصل. روح: النداله في دمك. دخلت روح لقتهم قاعدين على السفره. شاكر وبدر ويونس ومصطفي. روح: صباح الخير. الكل: صباح النور. روح قعدت تفطر وعينيها على يونس. شاكر: إيه المؤمريه المفاجأة دي؟ وانت لسه تعبان ما ارتحتش. يونس: لازم ضروري اطلعها يابوي. دي مسألة حياة أو موت. وأنا معايا الطقم بتاعي. أنا هوجهم بس مش هاتعب نفسي في حاجة.

بدر: وهاتقعد كام يوم؟ يونس: يومين تلاته بالكتير. بدر: عاوز أشوفك قبل مانمشي. شاكر: وه.. انت هاتعاود؟ بدر: شغلي وحالي ما أنا خبرتك. روح اتضايقت وبصت ليونس اللي كان باين إنه بيفكر في حاجة. يونس: الحمد لله. أنا هاطلع أجيب شنطتي. ادعولي. شاكر: ربنا يجعلك في كل خطوة سلامة يا ولدي. روح: خلي بالك من نفسك. يونس ابتسم لها. طلع يونس عالسلم.

يونس بتفكير: أنا بعمل كل ده عشانك. ما أنكرش إني كنت عاوز أقابلها من زمان عشان أسألها سابتني ليه. بس الموضوع ماعدش على قدي. لما أحس إنك في خطر بسببها. يبقي لازم أعمل المستحيل عشان أحميكي. مش كفاية أذيتي. كمان عايزة تأذي اللي بحبهم. جاب شنطته الصغيرة ونزل. يونس: أشوف وشكم بخير. روح بحزن: مع السلامه. شاكر: مع السلامه يا ولدي. ابقي طمني عليك. خرج يونس من الباب ونظرات روح كانت معاه.

روح بتفكير: مش عارفة ليه مش مطمنه. ومتأكده إنها مش مأمورية. يا نمر ياتري إيه اللي في دماغك. روح خرجت وراه. خبطت على إزاز عربيته. يونس: في إيه؟ روح: مش مطمنه. يونس: ماتخافيش. اطمني. روح: ارجعلي يا يونس. عايزة أقولك حاجات كتير. يونس: إن شاء الله. روح: مع السلامه. طلع يونس بالعربيه. وروح دخلت البيت وهيا متضايقه. دخل كرم وكريمه وصفاء المستشفي. كرم: جايباني مستشفي؟ كريمه: اتكتم. كرم: لمي لسانك يا وليه.

كريمه: ولولوا عليك ساعة واتفضوا. دخلت كريمه الأوضة وصفاء راحت تنده للدكتور. دخل الدكتور وبدأ يكشف على رجل كريمه. الدكتور: انت ازاي ماشيه بيها كده؟ كرم اتفاجأ من منظر لرجلها. وكريمه ماكنتش طايقه إيد الدكتور عليها وبتبكي. كرم قرب منها ومسك إيدها: اهدي. هاتبقي كويسه. بعد ثلاث ساعات. بينزل يونس من عربيته قدام ڤيلا. بيدخلها. وبيلاقي الباب مفتوح. بيخبط على الباب بيلاقيه اتفتح. بيلاقي صوت: ادخل. أنا مستنياك.

بيسمع صوت كرسي هزاز. بيفضل يمشي لحد مايوصل. وهوا خايف ودقات قلبه و. حان وقت المواجهة. مواجهة ما أذاه. ما أشعره كثيرا بالنقص. مواجهة ما فطر قلبه وأكثر فيه التفكير. مواجهة من هي أمه؟ أمه التي لم يراها ولم يعرفها. لم يحفظ رائحتها ويقبل يديها. من لم يعايدها في شهر مارس كما بقية أصدقائه.