رواية صدفة العمر الفصل الأول 1 - بقلم زينب عامر

واحد مدفعش وراب. صوت عالي: مين ي جماعة اللي مدفعش ورا؟ الشخص اللي قاعد جنبها: أي براحة وداني. بصتله ومردتش. رجعت قالت: مين مدفعش ي جماعة؟ بهمس: أنا اللي مدفعتش. بصتله بطرف عينها وعملت نفسها مسمعتش: انت بتكلمني أنا؟ رحيم: اه أنا اللي مدفعتش. رقية: ومدفعتش ليه شاطر تقول وداني ومش وداني. رحيم: ما انتي اللي بتجعر. رقية بصدمة: بجعر! تصدق ان.. قاطعها السواق: ف واحد مدفعش. رقية بشماتة: ادفع بقا.

رحيم: نسيت محفظتي ف العربية و... رقية: أي أي حيلك انت هتحكيلي قصة حياتك. وفتحت شنطتها وطلعت فلوس: خد يسطا واحد. السواق: لما انتي اللي مدفعتيش عمالة تقولي للناس ليه. رقية: أنا دفعت بس اللي جنبي اداني الفلوس وأنا اتلغبطت محصلش حاجه. السواق خد الفلوس وسكت وهي قعدت متعصبة. رحيم رن ع صاحبه: قابلني عند **** يحيوان.. انت بتضحك اصبر عليا.. متعصب عشان بسببك اتأخرت ع الشركة وحصلي موقف بايخ.. بقا كدا طب ماشي. وقفل السكة ف وشه.

رحيم وهو باصص قدامه: أما ننزل هديكي الأجرة. رقية مردتش عليه. السواق اخيرا وصل والناس نزلت. رحيم بيبص لاقها ماشية نده عليها: لو سمحتي ي آنسة. رقية وقفت وبصتله: خير. رحيم: هو أي اللي خير هو أنا بشحت منك. رقية: لا لسمح الله اظن انت شوفت السواق اتكلم معايا ازاى. رحيم ببرود: وأنا مالي حد قالك تدفعي. رقية: تصدق أنا غلطانة كنت سيبت السواق عليك ونزلك من العربية ف نص الطريق. رحيم: محدش يقدر. رقية بصتله بغيظ ومشت.

رحيم: استني خدي فلوسك. رقية بصتله وبصوت عالي: معلش متأخرة أقولك اعتبرهم صدقة سلام. ومشيت وهي بتضحك عشان سابته يكلم نفسه خصوصا ان باين عليه مش محتاج صدقة. رحيم: صدقة!! هي البت دي غبية ولا أي. مؤمن: انت بتكلم نفسك ولا أيه. رحيم: عارف إنك حيوان ولا أعرفك. مؤمن بضحك: مالك بس ف أيه. مؤمن حط ايده ع بوقه: اهو سكت اهو قولي بقا ف أيه.. أقولك تعال نفطر وتحكيلي وبعدين نروح الشركة. رحيم: طيب. ومشوا سوا.

رقية وصلت الشركة ودخلت ومش عارفه ولا فاهمه حاجة. وقفت واحد وسألته: لو سمحت أنا جايه عشان انترفيو. الشخص: اطلعي الدور الرابع. رقية: تمام شكراً. الشخص: العفو. ومشي؛ رقية بتكلم نفسها: دور رابع أيه أنا فيا صحة اطلع دور أول حتى اكيد فيه أسانسير اكيد. فضلت تدور لحد ما لاقت الأسانسير وطلعت. شافت سكرتيرة راحت عليها: لو سمحتي كنت جاية عشان الانتر... أيه ده مالك انتي كويسة. السكرتيرة بتعب: أه ممكن بس تجيبيلي مية.

رقية بصت حواليها: منين طيب. السكرتيرة: آخر الدور يمين هتلاقي عمي محمد هاتى منه. رقية: حاضر. راحت بسرعه لقت راجل كبير واقف والمكان زي مطبخ. رقية: لو سمحت عاوزة مية. محمد: انتي مين يابنتى. رقية بابتسامة: أنا جاية أعمل مقابلة بس عاوزة مية عشان السكرتيرة الحامل اللي بره. محمد: اتفضلي يابنتي. رقية: شكراً. واخدت الازازة وادتها للسكرتيرة. دينا: شكراً. رقية: العفو، معلش بس هو أنا هعمل الانترفيو أمتى.

دينا قفلت الازازة: مستر رحيم ع وصول اتفضلي اقعدي. رقية: تمام. وراحت قعدت. * * * ف كافية. رحيم: بس يسيدي ده اللي حصل ومنظري كان وحش. مؤمن: هي دفعتلك لوحدها كدا. رحيم: أه بس السواق كلمها. مؤمن: طبعا انت رديت عليه. رحيم: لا يخويا هي ردت عليه هي دي بتسكت ولا بتسيب حقه. مؤمن: طب والله جدعة. رحيم وهو بياكل: هي جدعة عشان مبتسيبش حقها بس لسانها طويل. مؤمن ضحك: وهتديها الفلوس أزاى. رحيم: مش هديها انت متعرفش انها دفعتها صدقة.

مؤمن فتح ف الضحك: صدقة! رحيم بصله بغيظ. مؤمن: مش قادر لا. رحيم: اطفح وانت ساكت خلينا نمشي عشان عمك. مؤمن وهو لسه بيضحك: حاضر. بعد ساعة تقريبا. رقية قاعده زهقانه وفيه كذا بنت جت للانترفيو ولابسين لبس قصير وفيه اللي بشعرهم وده مسبب لها توتر عشان ممكن متتقبلش. رقية قامت بزهق: لو سمحتي المستر اللي بتقولي عليه هيجي ولا لأ. دينا: هو المفروض يكون جه عمره ما اتأخر. رقية: أنا بقالي ساعة وشوية قاعدة أيه الاستهتار ده. دينا

شافت رحيم جاي قامت وقفت: ممكن تهدي... مستر رحيم أن.. رقية: بلا رحيم بلا بتاع بقا مديرين آخر زمن أنا راحة أقعد هي نص ساعة كمان لو مجاش هقدم استقالتي إحنا هنهزر هنا. صوت من وراها: هو انتي كنتي اشتغلتي عشان تقدمي استقالتك. بتلف تشوف مين بيتكلم. رقية: انت؟؟ انت بتعمل أيه هنا أوعى تكون جيت ورايا عشان تديني الأجرة. رحيم: أجرة أيه ديه. رقية: الأجرة اللي أنا دفعتها لك ف العربية انت هتستعبط. دينا ضحكت بتعب غصب عنها.

رحيم بغيظ: ممكن تخرس. رقية: وانت مين عشان تقولي اخرس؛. وبصت لدينا: أنا جاية أول واحدة هنا لو سمحتي رني ع رحيم ده شوفيه فين أو هيجي ولا لأ. دينا بصت لرحيم اللي هو أعمل أيه. رحيم: مش المفروض تحترمي الشخص اللي جاية تشتغل عنده. رقية: انت مالك انت وبعدين لما هو يبقا يحترم مواعيده ووقت الناس أبقى أحترمه. رحيم اتعصب من كلامها ووجه كلامه لدينا: هاتي القهوة بتاعتي ع المكتب. ومشي دخل مكتبه.

رقية بصت لدينا وعلامات الاستغراب ع وشها. دينا بهدوء: مستر رحيم اللي حضرتك مستنياها. رقية بصدمة: احيييه.