رواية صدمتي في زوجتي الفصل الثالث 3 - بقلم peach

رنا بهدوء: ناوية أغير جو يا بابا، فيها حاجة دي؟ سعاد بغيظ: يا برودك يا شيخة، واقفة على الطلاق وعايزة تغيري جو؟ هو انتي مبتحسيش؟ رنا بعدم اكتراث وهي بتاكل تفاحة: لا بحس، بس أنا مش هزعل على واحد خاين للعشرة. سعاد: بقولك إيه يا بت، انتي مفيش عندنا بنات بتتطلق، واخبطي دماغك في أكبر حيط. رنا بمحاولة امتصاص غضبها: ممكن أعرف أسبابكم؟

سعاد: ببساطة، الناس هتفضل تتكلم ومش هتسكت، دا غير ستات العيلة هيفضلوا يعايروني بيكي طول الوقت، وإحنا مش ناقصين نص كلمة من حد.

رنا: تولع الناس، هما مش شاطرين غير للكلام وبس، طول الوقت دي قالت ودي عادت، وأوقات بيتبلوا على الناس عادي، ونسوا إن لهم رب بيمهل ولا يهمل. أما عن ستات العيلة، فدا شغلهم الشاغل، مبيسيبوش حد في حاله، بيفضلوا ينتقدوا طول الوقت، وكأن معندهمش شغلة غير كده، وميغركيش إنهم بيتكلموا معاكي وادامك حلو، الله أعلم بيقولوا إيه عننا من وراكي. يا ماما بالله عليكي سيبيني آخد حقي وأطفي نار قلبي. مش هتنطفي إلا لما انتقم وأخد حق كرامتي اللي حطها تحت جزمته لما اتجوز عليا.

حسام بحنان: ادخلي يا رنا ارتاحي، والصباح رباح. رنا بتحدي: هتطلق. حسام بموافقة: هعملك اللي انتي عايزاه. *** أما عند كريم. حمزة: بابا. كريم بضيق: نعم. حمزة: إحنا جعانين أوي. كريم بغضب: وهي السنيورة أمك ما أكلتكوش قبل ما تمشي؟ حمزة برعب: أكلتنا بس. كريم بصوت عالي: بس إيييييييه؟ حمزة ببكاء: أنا عايز ماما. كريم بسخرية: ماما بح يا حبيبي.

وكمل بغيظ: الهي مجابتش العربية لغاية دلوقتي، أوووووووف. أما أقوم أغير هدومي، وأول ما أفتح الدولاب، إيه دا؟ هدومي فين؟ هي اتلخبطت ولمت هدومي معاها ولا إيه؟ جاب تليفونه علشان يرن عليها، نت ملقاش الواي فاي ظاهرة، راح عند الروتر ملقاش السلك أصلاً. كريم بعصبية: إلا فين هو دا كمان؟ لا كده كده كتير. ورن عليها فون. رنا بمكر: إيه يا حبيبي، زهقت بالسرعة دي؟ كريم بهجوم: هدومي فين؟ رنا ببرود: في الغسالة.

كريم بغباء: في الغسالة بيعملوا إيه؟ رنا باستخفاف: منشراهم يعني، مثلاً الهدوم اللي بتتحط في الغسالة بتتغسل طبعاً. وكملت بدهاء: روح افتح الغسالة كده، هتلاقي حاجة هتعجبك أوي. أول ما كريم فتح الغسالة اتصدم حرفياً، وقال بعصبية: إيه اللي انتي عملاه في الهدوم دا؟ رنا بشماتة: عليهم كرول، صح؟ وهدومك اللي بتحبها متقطعين حتت حتت. معلش يا حبيبي، أنا كنت زهقانة فقلت أتسلى بإيه، ملقتش غير هدومك أتسلى فيهم.

كريم بحنق: ألبس إيه أنا دلوقتي؟ اقفلي، اقفلي. رنا بخبث: بصراحة مفضلش من هدومك حاجة غير الطقم اللي كنت جايباهولك في عيد ميلادك، وانت اتريقت عليه انت والسنيورة بتاعتك. كريم: بس دا مش استايلي. رنا وعيونها دمعت من فرط الضحك: هههههههههههههههههههههههههههههههههههههههههههههههههههه. استايل إيه يا أبو ستايل أنت، دا أنت كنت بتلبس أقل طقم في الكلية، قال ستايل قال. روح لست الحسن بتاعتك، ريحتك مقرفة، جايز تقولك أنا مش عايزاك.

كريم باحراج: إنتي فضيحة. رنا باستخفاف: لما أقول الحق أبقى فضيحة، ولما أمشي على هواك أبقى حبيبة القلب. كريم: خلاص سلام. رنا بمكر: عايز حاجة تاني؟ كريم بتذكر: سلك الروتر فين؟ رنا: في جيبي. كريم بغيظ: اخلصي، أنا مش فاضي للهبل دا. رنا بكذب: وأنا أعرف منين هو فين؟ مش كان معاك آخر مرة؟ كريم بمحاولة تذكر: مش فاكر إني أخدته أصلاً.

رنا بعدم اكتراث: شكلك بقى عندك زهايمر، أصلك بقيت بتنسى كتير أوي الأيام دي. وأنا مكنتش بتكلم خوفاً على مشاعرك، بس لازم تروح لدكتور تشوف فيه إيه. سلام، أنا رايحة أنام. كريم: فين عربيتي؟ رنا: الصبح هبعتهالك، محدش هنا يوصلهالك. كريم: طيب سلام. *** وأول ما قفل انفجرت رنا في ضحك هستيري،

وقالت بشماتة: أنت بطبعك شكاك، فهتصدق كلامي بسهولة. عيش في خوفك إنك تكون مريض، على ما أضرب ضربتي الجاية. وأما عن هدومك المتقطعة، فشافيت بيها غليلي، ولو شوية صغيرين، أصلهم كانوا هدايا منها. خلينا نتفرج على الجاي ونضحك بعلو الصوت. أنت شفت رنا الحنونة، لكن مشفتش رنا لما بتاخد حقها من اللي ظلمها بتعمل إيه، ولسه الجاي أحلى وأحلى. ثم انخرطت في بكاء مرير.