رواية صغيرتي نور الفصل الرابع عشر 14 - بقلم يارا علاء

وصلوا منزل نور وكان مراد يسير على وصف عبد الحق له. كانت نور نائمة، تغفو وكأنها لم تنم منذ عام كامل. مراد بهدوء وصوت منخفض: نور، نور، اصحي. اصحي يا نور، وصلنا البيت. ولكن لا توجد إجابة من نور. بدأ مراد ينظر إلى نور وهي نائمة، وفضل سرحان فيها. بدأ يفتكر كل ما حصل معهما من أول يوم قابلها فيه لحد النهاردة. مراد لنور وهي نائمة: أنا ليه بخاف عليكي كده؟ تعرفي إني ما نمتش وأنتي مخطوفة خالص.

إزاي هيجيلي نوم وأنا كنت حاسس إن روحي مسروقة مني. خايف أمشي ورا إحساسي أتعب وأتكسر تاني. مش عايز أتكسر تاني يا نور. كل هذا ونور مازالت نائمة. مراد: كارولين كسرتني، كسرتني. عارفة يا نور، كان فرحنا فاضل عليه يوم، يوم واحد بس. تخيلي عملت إيه. نزلت دمعة من عين مراد وأكمل بصوت مهزوز: بعتتلي رسالة قالتلي فيها إنها عمرها ما حبيته وإنها كانت بتنسى بيا حبيبها الأول. ولما رجعلي عرفت إنها ما حبتنيش ولا يوم.

تخيلي لما أكون واقف بشتري بدلة فرحي وألاقي رسالة زي دي من واحدة ما حبت في الدنيا قدها. عمرها ما شافت معايا يوم وحش. كنت دايماً بحاول أكون معاها شخص كويس وكنت بجهز نفسي إني أكون أحسن زوج. بس... توقف عن الكلام عندما شعر أن نور تتحرك وبدأت تستيقظ. مراد بصوت منخفض: نور، اصحي. وصلنا، اصحي يا نور. استيقظت نور. نور بفرح: إحنا وصلنا البيت. وهمت لتنزل من السيارة، ولكن أوقفها صوت مراد. مراد: طب مش هتقوليلي أطلع؟ نور:

أسفة جداً، بس من فرحتي نسيت حالي إني أعزمك. مراد فرح لفرحتها: لأ، عادي، ولا يهمك. نور: طب يلا بينا نطلع. قفل مراد السيارة وتوجهوا ناحية المنزل. صعدوا السلالم ثم دقوا الجرس. فتح الباب والد نور. وما إن فتح الباب حتى قفزت نور إلى حضن أبيها، ذلك الحضن الذي تشعر فيه بالأمان. احتضنت أيضًا والدتها التي استقبلتها بدموع عينيها. والدة نور ببكاء: طمنيني عليكي يابنتي. حد عملك حاجة؟ حد أذاكي يا قلب أمك؟ نور ببكاء:

لأ يا أمي، محدش عملي حاجة. أم نور: بتعيطي ليه يا قلب أمك طيب؟ نور ببكاء: إنتو وحشتوني أوي. مش عايزة أسيبك إنتي وبابا أبداً. عايزة أفضل هنا معاكم. والدة نور: إنتي وحشتينا أكتر والله. الحمدلله إنك جيتي، رديتي فينا الروح. والد نور: أنا مش عارف أشكرك إزاي يابني. مهما أشكرك مش هوفيك حقك. مراد: أنا ما عملتش حاجة يا عمي. أهم حاجة إن نور بخير. والدة نور: الله يكرمك ويرضي عليك يابني. عبد الحق:

يلا يا نور ياحبيبتي قومي غيري، وإنت يابني تعالي معايا، أطلعلك حاجة تنام بيها. مراد: مش هينفع أبات ياعمي. أنا جيت بس عشان أوصل نور وطلعت أسلم عليكم. عبد الحق: والله يابني مانت ماشي. إنت مجنون؟ هسيبك تمشي في الليل كده وتسوق؟ وأنا عارف إن ليك تلات أيام مش نايم. مراد: بس... والدة نور: مفيش بس، هتبات والكلام انتهى هنا. قامت نور عشان تدخل أوضتها، بس داخت جامد وكانت هتقع لولا مراد سندها. والدة نور بخضة: مالك يا حبيبتي؟ نور:

اطمني يا ماما، أنا بخير. بس دوخت بسبب قلة الأكل. أنا بقالي يومين ما أكلتش يا ماما. اعتصر قلب مراد لما سمعه. والدة نور: يا قلب أمك، هعملك أحلى أكل. حسبي الله في اللي كان السبب. اتجهت والدة نور نحو المطبخ وبدأت في تحضير الطعام. بعد فترة قليلة انتهت من تحضير الطعام. جلسوا يتناولون الطعام وكانت نور تأكل بشراهة. انتهت من الأكل ثم قالت: تسلم إيدك ياماما. والدة نور: كلي ياحبيبتي، إنتي ما أكلتيش حاجة. نور بضحك:

ما أكلتش حاجة؟ ده أنا ناقص آكلك إنتي والحاج والاستاذ اللي قاعد مش بياكل ده. ضحك الجميع على كلامها، ثم أنهوا طعامهم وتناولوا الشاي. مراد: نور، هتقدري تيجي معايا بكرة النيابة؟ نور: لازم بكرة؟ مراد: لو مش هتقدري، تتأجل. مفيش حاجة لازم. نور: لأ، خلاص نروح بكرة عشان نخلص. والدة نور: ما بلاش بكرة. أنا خا*ئفة عليها. مراد: اطمني يا أمي، هتبقي معايا وهيكون معانا حراس. عبد الحق: يلا بقى ننام، والصبح نشوف الموضوع ده.

ثم توجه الجميع للنوم.