رواية شارع الحب الفصل السادس 6 - بقلم فرح وائل

اسما: فيروز، خدي الخط الجديد اهو، ركّبيه بقى. فيروز: ماشي، هاتيه وهقفل الأكونت بالمرة. عدت أيام ومفيش ولا رسالة بتيجي لفيروز. وجه يوم الفرح، فيروز لابسة فستان نبيتي وحاطة ميك أب، وشكلها كان جميل جداً. أول ما نزلت من البيت، كانت العربية مستنياها هي ومامتها. خالد اتصل على مامتها وقال: خالد: ماما، مامة العروسة، عايزاكي بسرعة. تعالي اركبي العربية اللي قدام، هاخدك قبل ما هما يتحركوا عشان هما قدامهم شوية.

مامتها: طب وفيروز؟ خالد: متخافيش، صاحبي معاها وهاجر جارتنا كمان. مامتها: ماشي، هروح أنا يا فيروز. فيروز: طيب يا ماما. هاجر مش هتيجي؟ هاجر: لا، هركب مع سيف قدام. ما تيجي تركبي معانا. فيروز: ما خالد جابلي العربية خلاص. هاجر: طيب ماشي. دخلت العربية لقت يوسف قاعد قدام. بصلها وقال: يوسف: اللهم صلي على النبي. فيروز: نعم؟ يوسف: لا أبداً، بقول أذكار. أصلي، ملحقتش أقولهم قبل ما أنزل. فيروز: ربنا يقوي إيمانك.

يوسف لقاها فتحت الداتا، حاول يكلمها: يوسف: مش انتي اخت خالد؟ فيروز بزهق: آه. يوسف: أنا صاحبه. فيروز هزت بدماغها بمعنى ماشي. يوسف: اسمك فيروز.. ولا شوبيس؟ فيروز باستغراب: إيه؟ بتقول إيه؟ يوسف: لا، بقول تمام. فيروز في دماغها: "فيروز.. ولا شوبيس؟ مش سيف اللي بعتلي الجملة دي. في إيه؟ عادي يعني يا فيروز، ممكن يكون بيرخم، ما هو باين عليه بارد أصلاً." اسما بترن:

فيروز: أيوه يا اسما. لا مفيش رسايل تاني. آه، من ساعة الخط ما اتغير وكل حاجة اتظبطت. اسما: طب الحمد لله. انتي في العربية؟ فيروز: آه. اسما: طب هقفل بقى عشان مدايقكيش. فيروز: ماشي يا سومي، سلام. يوسف: تحبي أشغل مزيكا؟ فيروز: ياريت. يوسف شغل: "نعم يا حبيبي نعمم أنا بين شفايفك نغم.." فيروز: معلش، الأغنية مش لايقة على المناسبة، أظن يعني. اتفضل تليفوني، شغل منه. يوسف: ماشي. فيروز: انت بتعمل إيه كل ده؟ يوسف: مش لاقي أغاني.

فيروز: هات، أجيبهالك. أهي خلاص. فيروز كان في إيدها عصير، وقع في العربية: فيروز: يا لهوي! الواد ده لو شافها هيقول لخالد، وأنا مش معايا مناديل. هعمل إيه؟ في الطريق، يوسف بيحاول يتكلم بس فيروز بترد عليه ببرود. أول ما نزلت من العربية، شافت سيف واقف قدامها. سيف: قمر، والله قمر. يوسف: فيروز، خالد مستنيكي جوه، تعالي أدخلك. فيروز: لا، متتعبش نفسك. شكراً. يوسف: خد يا سيف، أقولك. فيروز دخلت سلمت على العروسة والعريس.

بتلاقي رسالة وصلت لها: "لو لمحتك بتهزي رجلك بس مش بترقصي، بتهزي رجلك بس.. هتشوفي مني وش عمرك ما شوفتيه.. ولا هتشوفيه في حياتك، فاهمة؟ فيروز اتصدمت: إزاي وصل للرقم الجديد؟ إزااااي؟ مامتها: أومي يا فيروز، ارقصي شوية. فيروز: أرقص!؟ مامتها: آه، أومي ارقصي مع هاجر. هاجر: يلا يا فيروز. فيروز قامت رقصت فعلاً. ولما هاجر شافت رقصها حلو، وقفت تتفرج عليها وسابتها بترقص لوحدها. بعد الفرح، وصل لفيروز رسالة: "بتعاندي يا فيروز؟

ماشي، عاندي براحتك. بس متزعليش من اللي هيحصل." فيروز: الله يحرقك يا سيف! اعمل اللي تعمله بقى وسيبني في حالي. وهما مروحين: خالد: يلا يا فيروز، روحي اركبي العربية اللي جيتي بيها. فيروز خافت ليكون يوسف شاف العصير اللي اتدلق: لا.. هركب معاك. خالد: مش هروح دلوقتي، أمك هي اللي هتروح. فيروز: وأنا هاجي معاك يا خالد. خالد: روحي، روحي اركبي، خلصيني. بعد ما وصلت البيت: خالد: روحي انتي، وأنا هركن العربية وأجي.

نزلت من العربية وكان الدنيا ضلمة في الشارع. حست بإيد بتشدها لحوش بيتها. * بتعانديني يا فيروز. فيروز: انت مين؟ * انتي قصدك تعانديني صح؟ فيروز: مين بيتكلم؟ * فيروووز، ردي. انتي قصدك تعانديني صح؟ فيروز بخوف: خالد. * خالد بيودي العربية، مش هييجي دلوقتي. ردي عليا، بتعانديني صح؟ فيروز بخوف: أنا معرفكش والله عشان أعاندك. أعاندك في إيه أصلاً؟ * قولتلك مترقصيش، قومتي رقصتي. عاجبك إن الناس تتفرج عليكي ك... (سكت لما حس بدموعها)

فيرووز، متعيطيش. أنا معملتش حاجة لسه. فيروز بخوف: خااالد. * ساب إيدها. طب، اطلعي... اطلعي. فيروز فضلت واقفة بتعيط وهو خرج وسابها.