رواية شبيهتي القوية الفصل الأول 1 - بقلم نشوة عادل

يا لهوى يا اسراء! مش ممكن دي زي ما يكون إنتي ودي انعكاسك في مراية. احلفي بالله كده إنكم اتنين. اسراء بضحك: في إيه يا ملك؟ إنتي عقلك فوت ولا إيه؟ ما إحنا قدامك أهو يا بنتي بشحم ولحم. ملك: لبسنا مختلف وبوقها ما بيتحركش معايا. عاوزة دليل تاني إزاي بقى؟

ملك: يا بنتي أنا أعرف إنه يخلق من الشبه أربعين وكل حاجة، لكن يكون تطابق في كل حاجة بدون ما يكون فيه أي حاجة تفرق بينكم، دي صعبة بجد. إن حد يكشف إنها مش إنتي، أمك نفسها عمرها ما هتكشفها. اسراء: ده اللي مطمني بجد إنها مش هتتكشف. ملك: طب هو إنتي اسمك إيه يا جميل؟ ... : اسمي ريهام. ملك: طيب يا ريهام، هو أهلك يعني هيوافقوا إنك تكوني في بيت غريب؟ ريهام: ماما عارفة وواثقة فيا، وبعدين أنا بعمل كده بمقابل مش لله في لله يعني.

ملك: أنا فاهمة، بس مامتك عارفة؟ طب باباكي، إخواتك الرجالة كده يعني؟ ريهام: أبويا ما يعرفش عننا حاجة من يوم ما هو وأمي اتطلقوا وأنا عمري 5 سنين، ومليش إخوات صبيان، وتقدر تقولي إني مقطوعة من شجرة، مليش غير أمي وبس. ملك: ربنا يطول في عمرها ويديمها ليكي يا رب. ريهام: تسلمي. اسراء: وأنا زي ما وعدتك، هخلي بالي من مامتك وهشيلها بعيوني كمان.

ريهام بابتسامة: وأنا واثقة فيكي. المهم، إنتي قولتيلي هتفهميني كل حاجة لما نكون مع ملك، ادينا مع بعض أهو، عايزة أفهم بقى ليه إنتي عاوزاني آخد مكانك في البيت؟ اسراء بحزن: بصي، هو يمكن الكلام اللي هقوله ما يبانش ليكي منطقي، بس الحقيقة إني مليش شخصية وسط ولاد عمي. ريهام: إنتوا عايشين في بيت واحد؟

اسراء: آه، من يوم ما ماما اتجوزت عمو بعد وفاة بابا الله يرحمه، جه هو وولاده عاشوا معانا. بس مش ده السبب الوحيد اللي خلاني أطلب تكوني مكاني. ريهام: أومال؟ اسراء: هما سببين كمان. الأول، يوسف ابن عمي، أنا بحبه أوي وأوقات كتير بحسه بيحبني، لكن تصرفاته عكس ده خالص، وأنا مبقتش فاهمة أنا صح ولا واهمة نفسي. ريهام: طب والسبب التاني؟

اسراء: بيحصل معايا حاجات غريبة أوي الفترة الأخيرة، بقيت أشوف حاجات كتير مرعبة وحاسة إن عقلي هيشت. ريهام: حاجات غريبة إزاي؟ اسراء: خيال رايح جاي قدام باب أوضتي، وأوقات بسمع أصوات حد بينده عليا بصوت مخيف، وبشوف زي أشباح. ريهام: امممم، ما يمكن يكون حد من ولاد عمك عاوز يستظرف عليكي فيعمل كده! اسراء: أنا شكيت في كده فعلاً، بس محدش منهم في الفيلا. ريهام: أومال هما فين؟ اسراء: كلهم في الساحل بيصيفوا.

ملك: طب ما يمكن ماسافروش وضحكوا عليكي. اسراء: لا، متأكدة إنهم هناك، لأن صفاء الشغالة بتاعتنا معاهم، وهي بتفتح لي فيديو كول كل يوم من الشاليه. ريهام: أومال مين معاكي في الفيلا حالياً؟ اسراء: مفيش غير ماما وعمو والخدم بس.

ريهام: طب بصي، السبب الأول بتاع يوسف ده أنا موعدكيش بيه، لأن لو اللي إنتي بتخططي له إنه يوقعه بحبك كده، هو هيحبني أنا مش إنتي، وأكيد إنتي فاهمة قصدي. أما عن إني أخلي شخصيتك قوية وسط ولاد عمك، دي سهلة أوي ومتقلقيش، أقل من المدة اللي قولتي عليها هكون مسيطرة. أما السبب التالت ده غامض، وإن شاء الله هعرف كل حاجة عن قريب. اسراء: أنا بجد متشكرة أوي يا ريهام، وجميلك مش هنساه.

ريهام: ولا جميل ولا حاجة، كده كده أنا واخدة حقي فلوس، وكمان هتخلي بالك من أمي، يبقى محدش فينا ليه جمايل على التاني. اسراء: طب يلا نبدل الهدوم. ريهام: استني، هو أنا هلبس اللبس بتاعك ده؟ اسراء: آه، ماله؟ ريهام: ماله إيه يا حاجة؟ ده مبين أكتر ما هو مغطي. أي نعم أنا مش محجبة وملتزمة، بس معرفش ألبس كده. اسراء: طب معلش عشان خاطري البسي كده، بس وإما تروحي هتلاقي لبس كويس ومقفول. ريهام: لله الأمر، انجري قدامي على البروفة.

ملك: استنوا عندك، فيه حاجة هيقدروا بيها يكشفوا ريهام. اسراء: إيه؟ ملك: الصوت. إنتوا صوتكم مش زي بعض. ريهام: من الناحية دي متقلقيش. ملك: إزاي بقى؟ ريهام قلدت صوت اسراء بالظبط بنفس الطبقة والنبرة. ملك بصدمة: يخربيتك، ده إنتي قردة. ريهام: يخربيتك إنتي، لمي لسانك أحسنلك. ملك: احم، إني أسف. بعد ما اسراء وريهام بدلوا هدومهم، راحت اسراء على بيت ريهام، أما ملك فوصلت ريهام على الفيلا.

ملك: مامت اسراء اسمها رجاء، وعمها اسمه ماهر، وولاد عمها ولدين توأم يوسف وسيف، وبنتين سلمى قد اسراء، وسيليا في ثانوية عامة. ريهام: تمام، والخدم؟ ملك: الحارسين اللي على البوابة محمد وأمين، والجنايني صالح، والخدم اتنين صفاء ورحاب. ريهام: تمام، ابقي بقى واحنا داخلين عرفيني على الخدم، ووريني صور ولاد عمها دول. ملك: أشطة. بعد ما وصلوا وملك ابتدت تكلم كل واحد باسمه، وطبعاً ريهام كانت مركزة،

فجأة صوت من وراهم: الهانم كانت فين لحد نص الليل وووووو...... يتبع