رواية سلف و دين الفصل التاسع والخمسون 59 - بقلم لولو محمد

احمدك واشكر فضلك يارب. فضلنا طول الليل نصلي وندعي ترجع. نور بتعيط. حسام يمسح على راسها. حسام: بس للأسف محتاجة تستحمى زي ما انتي شايفة. اللي خدوه ما هانش عليهم يغيرولها البامبرز. ندي تخرج من الأوضة بتتسند على إيدها السليمة. حسام يبصلها، ياخد حبيبة ويروح يقف قدامها. حسام: عارفة لقوها إزاي؟ ندي تبص لحسام وهي بتعيط.

حسام: اللي خدها رماها ومشي. راح يشوف حياته. الناس سمعوا صريخ متواصل لمدة ساعتين من شقة شاب عازب. والشقة فاضية. سابها جعانة لوحدها وفضلت تعيط ساعتين من الجوع. ندي تقعد في الأرض وهي منهارة من العياط. "على" بيغمز لنور. نور: أنا هجيب لها غيار. نور تعدي، تبعد حسام وتبص له برجاء. حسام يبص الناحية التانية. نور تدخل الأوضة.

حسام: البامبرز سرب وفضلت ببلها لحد ما أنا روحت. كان نشف عليها. كتر خيرهم، أدوها رضعة. نيمتها من تعبها. كانت في شقة زياد. ندي تبص لحسام. "على": كفاية يا حسام. الرسالة وصلت. ندي وحسام يبصوا على "على". نور تاخد الغيار وتحاول تاخد حبيبة. حسام: سبيها في حضني. أنا اللي هحميها. كلوا أنتوا ألف هنا. حسام ياخد الغيار من نور ويدخل الحمام. ندي تحاول تقوم، نور تساعدها. ندي تروح ورا حسام تلاقيه بيملى البانيو ميه. يبص لورا يشوفها.

ندي تتكلم بتردد وهي بتعيط. ندي: ممكن أنا أحميها؟ حسام: لأ. ندي تعيط أكتر. ندي: ماشي، غلط بس ما تقتلنيش يعني. حسام يقفل المايه ويروح ناحية ندي. حسام: ما تعيطيش في الحمام. حسام يشد ندي ويقفل الباب. حسام: إيدك مربوطة، لا هتقدري تشيليها ولا تحميها ولا حتى تبلّي إيدك. ساعديني أقلعها. ندي تساعد حسام وكل شوية تبصله. حسام: عاوزة تقولي إيه؟ ندي: انت ناوي على إيه؟ حسام: اللي انتي عاوزاه. عاوزة تطلقي وتنزلّي مصر؟

أنا مش ناوي أجبرك على حاجة تاني. وبصراحة مش ناوي أجي على نفسي تاني. أنا عملت كل اللي أقدر عليه وما عجبش. ندي: احلف إنك ما اديتنيش حاجة. حسام: هحلف بس لما نطلع من الحمام. ومش عشانك. حسام يروح يحط حبيبة في المايه ويبدأ يحميها وندي تساعده.

حسام: أنا مش هدافع عن نفسي. انتي كدا كدا شيفاني وحش. الحوار ده كان المفروض يدور بينا قبل اللي عملتيه. أنا هحجز لبابا بكرة جلسة. نطمن عليه. حالته مش عجباني، وواضح السبب من المكان اللي كنتي رامياه فيه. من باب الفضول مش أكتر، انتي كنتي ناوية على إيه؟ ندي: ما أعرفش. حسام: آه، سوري نسيت. مش عارف سقطته إزاي زياد ده. قالك إيه خلاكي تصدقيه وتهربي معاه؟

ندي: أنا ما هربتش معاه والله. أنا حتى ما شوفتوش خالص ولا مرة. أنا كنت عند واحدة عايشة لوحدها في بيتها والله. زياد ده... الباب يخبط. صوت نور: أجيب لكوا حاجة؟ حسام: خلصنا ثواني ونيجي. كلوا أنتوا. حسام يقفل الحنفية وندي تفرد له الفوطة وتساعده ينشفها ويلبسوها. حسام: روحي كلي. هروح أعملها ببرونة وأرضعها. ندي: أنا هرضعها. حسام: انتي تعبانة ومش قادرة. ندي: لا قادرة. أنا اللي هرضعها. انت زعلان مني، حقك. بس لو سمحت...

ندي تعيط. حسام: ما تعيطيش في الحمام. انتي خسرتي دم كتير ومن امبارح على محاليل. كلي لقمة عشان تقدري ترضعيها. دا غير إن إيدك متعورة، هتشيليها إزاي؟ ندي: بإيدي السليمة. عندي إيد سليمة والله. بقيت كويسة. هعرف بس سيبني. حسام: تعالي أساعدك. ندي تهز راسها وتفتح الحمام وتروح الأوضة وتقعد على السرير وحسام يحط لها حبيبة على رجلها. حسام: متأكدة هتقدري؟ ندي تهز راسها وتبص له برجاء يسيب حبيبة. ندي تحضنها أوي. نور تدخل.

نور: انتي هترضعيه؟ مش كانت ببرونة أحسن؟ حسام: ما بتسمعش الكلام. حسام يطلع بره. الأكل محطوط ومصطفى قاعد على كرسيه في جنب وعلي واقف في البلكونة. حسام يروح يقف جنبه. حسام: إحنا كنا نقف كدا وكافيه اللي اسمه زياد في الوش كدا زيك زمان. محلك أقصد. حسام ينفخ. حسام: بفكر أجر المحل اللي هناك ده وأفتحه. أي حاجة. يمكن أعجب. "على": انت بتقول إيه؟ انت عارف انت بتقول إيه؟ حسام: واحد يضحك عليها بساندوتشين، والتاني بكتابين.

"على" يمسك في حسام. حسام يبتسم. "على" يسيبه. "على": أنا كنت عارف إنك مريض، بس انت كدا بقيت مجنون. حسام: خدنا من العقل إيه؟ اديك شايف من هم لهم. "على": هو انت عاوز مني إيه بالظبط؟ عاوز توصل لإيه يعني؟ حسام: انت إيه اللي جابك؟ "على": نور اللي... حسام: تؤتؤتؤتؤ. عيب. أنا عارف إن الفلوس اللي جيتوا بيها كانت فلوس عملية نور والخلفة عند نور أهم بكتير من ندي. "على": الكلام ده قبل ما ندي تكلم نور. حسام: أنا مش عدوك.

"على": يا راجل. حسام: نور مبسوطة معاك وانت ما تنكرش إنك مبسوط معاها. "على": انت عايز إيه؟ ما تجيب من الآخر عشان أنا ثباتي الانفعالي... كلمة كمان وصوتي هيعلى عليك وهنتفرج علينا اللي يسوى واللي ما يسواش. حسام: عاوزك مبسوط مع مراتك. عاوزك راضي باللي وقفت لأهلها عشانك. عاوزك ما تخسرش حاجة. أقسم بالله ما هتقدر تعوضها. "على": برضه! تمام يا حسام. هعيد تاني. أنا مش هطلق نور. تمام؟ اطمنت كدا؟ حسام: تعال ناكل لقمة.

"على": اتفضل انت. مش جعان. حسام: تمام. حسام يدخل يلاقي نور خارجة من الأوضة. حسام: جوزك شكله محرج ياكل من غيرك. أكليها وأكلي عمك. وأنا هاخد طبق وأدخل آكل ندي. نور: تمام. بالراحة عليها. تمام؟ حسام يبتسم ويبوس راس نور ويروح ياخد طبق ويدخل الأوضة. ونور تدخل البلكونة. نور: يلا ناكل يا قلبي. "على": مش جعان يا نور. كلي انتي. نور: مالك مضايق ليه؟ المفروض تكون فرحان.

"على": فرحان طبعاً إن حبيبة رجعت. بس مقلق شوية من اللي جاية. نور: ما يغرّكش كلام حسام. دا بيحبها وبيموّت فيها. تعرف بس لو قالت له كلمتين حلوين هينسي أي زعل وكل حاجة ترجع زي ما كان. "على" يبتسم. نور: تعرف ما هانش عليه ناكل وهي بترضع. أخد الطبق جوه يا قلبي. وزمانه بياكلها بإيده. مش بقولك بيموت فيها. "على" يهز راسه. نور: يلا ناكل إحنا كمان. أنا ما أكلتش من امبارح ومستعدة آكل خروف بحاله.

"على": هو اللي بره ما يجيبش خروف، بس ممكن تتصبّري بيه. ونبقى نخرج نغيّر جو أنا وإنتي. البيت هنا كئيب وخانقني. نور: بلاش النهاردة. خلينا على الأقل لحد ما نطمن على ندي. بفكر نشوف لنا فندق ولا حاجة. مش عارفة يعني نسيبهم لوحدهم يتراضوا ولا إيه؟ نور تغمز لـ "على". "على": روحي أكلي عمك. نور: وأنا مين هياكلني؟ نور تبص له بطرف عينها. يبتسم. نور: هو يعني حسام بيحب ندي أكتر من حبك ليا؟

وعمالة أقولك جعانة وآكل خروف بحاله وعمالة أغمزلك. بيحبها. بيموت فيها. إنك تحس أبداً. "على" يضحك. نور: أيوه كدا اضحك. "على": انتي إزاي أخته؟ نور: برضه!! مفيش فايدة فيك. أنا هروح آكل. روح انت بقى أكل عمي. "على": حاضر. نور تشهق. نور: يعني عادي تاكل عمي وأنا لأ؟ "على": إيه! نور: بتحب عمي أكتر مني. "على": لا. أنا كدا اتأكدت إنكوا إخوات. نور: ههههههههههههه. يلا يلا تعال.

نور و"على" يدخلوا. "على" يبص على باب الأوضة مقفول، يغمض ويتنهد. في أوضة ندي. حسام بياكل ندي. ندي: انت مش هتاكل؟ حسام ياخد معلقة. حسام: لتفتكري حاطط لك حاجة فيه ولا حاجة. ندي تبصله.

حسام: أنا هطلب نقلي أي فرع تاني بأي مرتب بقي. مش مهم. للأسف أنا مرتبط بجمعيات هنا. مش هقدر أنزل مصر قبل ما أسدها كلها. ومعيش دلوقتي أدفعها. حتى القرشين اللي حيلتي بفكر أديهم لنور. انتي عارفة إنها ضحت بفلوس العملية عشان تدور عليك. بتحبك أوي. ندي: أنا ما كانش قصدي كل ده يحصل.

حسام: على فكرة حاسس بيكي أوي. أنا كمان عملت حاجات كتير ما كانش قصدي إنها تحصل. كان كل همي إننا نبقى سوا، بس الطريقة أذتني وأذتك وأذت ناس كتير أوي. زي ما انتي من غير قصد أذيتينا كلنا. حسام ياكل ندي وهي بصاله. حسام: أنا محدش سامحني. حتى بالرغم من إني حاولت بكل طاقتي أراضيكي وأعوضك، ما نفعش. ندي: نام. حسام يبعد الطبق ويساعد ندي تنيم حبيبة.

حسام: نامي جنبها وارتاحي. وأنا هطلع أفرش بره وأنام شوية. مرهق جداً وعندي شغل الصبح. إن عزروني الفترة اللي فاتت، فدا معناه إنهم هيعذروني الفترة الجاية. وأنا في عرض دولار واحد. ندي: لو تحب نام هنا. وأنا... حسام: لا. أنا مش هنام معاكي في أوضة واحدة. كملي أكلك. حسام يشاور على الطبق ويفتح الباب ويطلع بره. "على" ونور بياكلوا وياكلوا مصطفى.

حسام: لو حبيتي تنامي يا نور، ادخلي جنب ندي. وأنا هفرش جوه جنب السرير. وعلى فكرة الكنبة دي بتتفتح سرير لو حد يحب يريح عليه. نور: كنا بنفكر ناخد فندق ونسيبكوا تتراضوا. حسام: أنا كدا كدا هطلب نقلي فرع تاني. فالشقة هتكون فاضية. هتقل عليكي بقى تاخدي بالك منه. نور: فكرة كويسة عشان تبقي بعيدة عن الزفتة هدايا. ولعلمك اللي ندي عملته ما غطاش على عملتك. حسام: فكريني كدا مين فينا الكبير؟ نور: ما تحاولش. أنا زعلانة منك.

حسام: وأنا كمان والله يا نور. زعلان من نفسي أوي. نور: كلك لقمة وخش ارتاح. وسيب الباقي على ربنا. حسام يبتسم ويبص لـ "على". "على": متابعة. حسام يدخل الأوضة. نور تروح تقعد جنب "على". "على": متاكدة مش عاوزانا نخرج من هنا؟ نور: نخرج. حاضر. هدخل أطمن على ندي وأغير ونخرج. بس دلوقتي كل... في شقة منال. منال: خير ما عملتوا. وأنا بكرة هاخدك للدكتورة بتاعة نور. شاطرة أوي وتتابع حالتك من أولها. عمر يدخل من البلكونة.

عمر: رجعت الحمد لله. منال: لقوا البت... أية: أحمدك وأشكر فضلك يا رب. منال: والله طول الليل بصلي وأدعي. أية: أنا هقوم أكلم ندي. عمر: نايمين دلوقتي. أكيد تعبانين. ضغط عصبي جامد الفترة اللي فاتت. أية: كدا "على" ونور هيرجعوا؟ عمر: مش عارف. بس أكيد هيستنوا يومين تلاتة كمان ولا حاجة. أية: وانت برضه ناوي تسافر اسكندرية دلوقتي؟ منال: دلوقتي إيه؟ مفيش سفر. الصبح رباح. الدنيا مش هتطير. نغم تدخل.

نغم: يس مش راضي يخليني ألعب معاه. عمر: معلش يا يويو. قومي شوفي العيال. أية تهز راسها وتقوم تدخل مع نغم جوه. عمر: أنا لازم أرجع. منال: رجوعك ملوش لازمة أصلا. روح قفل الشقة وسلمها للراجل من سكات. عمر: وأسكت لهم على اللي عملوه؟ منال: ما عملوش حاجة. كان ممكن يطلعوا زي ولاد الحرام. ومش هنتكلم في اللي عملوه. عمر يبص في الأرض. منال: من استغنى فنحن عنه أغنى. عمر: تفتكري بقي أية هتسكت ومش هتحاول تتصل بـ أسماء دي؟

منال: سيبها لربنا. اللي عاوزه ربنا هيكون. أية تدخل. أية: يس زعلان إنه بطل يروح التمرين وبيقول إنه عاوز يروح التمرين النهاردة. عمر: طب إيه رأيك نوديه النادي إحنا النهاردة؟ وهو نتفسح. منال: تصدق انت جدع. أنا هقوم ألبس. منال تقوم. عمر: وانتِ إيه؟ مش جاية؟ أية: ما أنا لابسة. عمر: طب مش تقوم تلبسي العيال؟ أية: وانت بقي فاكر لما أولد أنا اللي هعمل كل حاجة وانت هتقعد باشا؟ عمر: لا طبعاً. هعمل حاجات مهمة جداً. أية: زي؟

عمر: هقعد كل شوية أستعجلك. أية: يا راجل!!! عمر: ههههههههههه. هقوم ألبس يس وانتِ لبسي نغم. اتفضلي. خلينا نمشي. أية وعمر يقوموا. أية: أمال فين؟ لما الواحدة لما تحمل جوزها يقولها ارتاحي انتي وما تقومييش وأنا هعمل كل حاجة. عمر: منهم لله اللي بيروجوا للإشاعات المغرضة دي. عمر وأية يدخلوا أوضة العيال وهم بيضحكوا. في البلكونة عند حسام. نور: يعني إيه؟ وسابوا الشقة بالبساطة دي؟ "على": يعملوا إيه؟

يكبروا الموضوع ونقلب على أية القديم والجديد. نور: بس هما ما عملوش حاجة غلط. "على": منهم لله بقي اللي كانوا السبب. نور تبص لـ "على" وتبص في الأرض. "على": أنا اللي مضايقني إن اللي حصل ده ممكن يتكرر في أي مكان هيروحوا فيه. إن كانت أية ادارت في النقاب، عمر مش هينفع يتنقب. نور: المشكلة إن اللي بيحاسب عمر واحد بيتفرج على قلة الأدب دي. بيحاسب عمر وما لقيش اللي يحاسبه. "على": انتي لسه مش عاوزة تخرجي؟ أنا بجد مخنوق أوي.

نور: هنروح فين دلوقتي؟ الوقت اتأخر أصلا. "على": أي حتة. بيقولوا لبنان حلوة. نور: بكرة الصبح نخرج ونعمل كل اللي انت عاوزه. "على": بكرة حسام حاجز لعمك جلسة علاج طبيعي. بيقول إنه حاسس إن حالته اتأخرت. نور: وأنا كمان حاسة بده. ما هو بره اللي عاشه الفترة اللي فاتت ما كانش سهل. "على": ولا اللي جاية هيكون أسهل. نور: ليه بتقول كدا؟

تفاءلوا بالخير تجدوه. الحمد لله. شوف كنا فين وبقينا فين. دا ربنا كريم أوي. أنا للحظة خفت ما نلاقيهاش. "على": الحمد لله. دا إحنا كنا نموت. نور: الحمد لله. حسام يدخل. حسام: مساء الخير. "على" يبص الناحية التانية وما يردش. نور: مساء النور. نمت كويس؟ حسام: والله قايم مكسر. تشربوا قهوة؟ نور: ثواني هعملك تشرب يا قلبي. "على": ماشيين. نور تمشي. حسام: هروح أبص على حبيبة.

حسام يروح أوضة ندي. يفتح الباب يلاقي ندي نايمة في وضع الجنين وواخدة حبيبة في حضنها. حسام يحاول يشيل حبيبة. ندي تتفزع. ندي: حبيبة!!! حسام: كنت هشيلها شوية. وحشاني. ندي تتعدل وتقعد. حسام: عاملة إيه؟ حسام يشيل حبيبة ويقعد على طرف السرير. ندي: هو انت هتاخدها؟ حسام: هاخدها وأروح فين؟ هسيب بيتي وأهرب زي ما... ندي تعدل شعرها وتبص في الأرض. حسام: بصي نايمة إزاي. ندي تبص على حبيبة. حسام: لما تكبر هنحكيلها اللي حصل ده إزاي؟

ندي: في حاجات كتير مش هينفع نحكيلها لها لما تكبر. حسام: معاكي حق. ندي: هاتها شوية. حسام يشيل ندي حبيبة. حسام: "على" ونور كانوا جايين ياخدوكي معاهم مصر. ندي تبص لحسام. حسام: هتنزلي الشقة باسم حبيبة وترجعي لي الشبكة. وكل واحد يروح لحاله. ندي: وحبيبة؟ حسام: انتي إيه رأيك؟ ندي: لو كانوا طلعوا عليك وهي معاك... حسام: انتي اللي خدتيها ليهم؟ ندي: وانت ما عملتش حاجة غلط يعني؟

حسام: ههههه. دا أنا ما بعملش حاجة صح. أنا أساساً ما أتعاشرش. أنا أمي مسمياني "دلدول". بتسحل شغل وجمعيات عشان أي وقت تطلبي أي حاجة حاضر. أكل، فسح، لبس، حاضر. دا حتى شغل البيت على الأقل شايل نصه. ندي: وأنا ما أنكرتش. حسام: انتي سبتيني ورحتي لراجل غريب. وثقتي في واحد غريب أكتر مني. ندي: وانت خنتني. حسام: وانتي ما خنتينيش؟ ندي: أقسم بالله ما حصل. أقسم بالله أبداً. حسام: ومرواحك لزياد وبيتانك بره البيت؟

ندي: قولتلك ما كانش معايا. قولتلك بابا كان معايا طول الوقت. حسام: لو كان ساومك على حبيبة كنتي هتعملي إيه؟ ندي: أنا جيتلك أول ما خدوهالي مني. جيتلك. حسام: دلوقتي افتكرتيني. ما افتكرتينيش وأنا رايح لزياد أترجاه يدلني على مكانك. وهو واقف قدامي يضحك على عجزي. أنا كنت بموت عليكوا. ما سبتش بابا ولا مكان ما دورتش فيه. ندي: مش هعمل كدا تاني. حسام: أنا كدا كدا قلت لـ "على" إني هطلقك. تقدري تاخدي أبوكي وتنزلّي معاه مصر.

ندي: أنا ماليش دعوة بـ "على". حسام: وهو كمان ملوش دعوة بيكي. دا بمجرد ما عرف إني هطلقك بدل ما ياخد نور يعملها العملية، جالك. ندي: والله ما ليا دعوة بيه. حسام: وانتِ هسيبك لما تطلقي؟ ندي: أنا مش هخرب على أختي. أنا عمري ما هجرح نور. والله أنا و"على" حوار وانتهى. حسام: وطّي صوتك. نور تسمع. صمت. ثواني. ندي تحط حبيبة على السرير وتغطيها.

حسام: أنا بكرة الصبح هروح الشغل وهرجع آخد عمي و"على" ونروح نطمن عليه. انتي مش هتقدري تيجي. خليكي هنا مع نور وحبيبة. ولو "على" عاوز يفضل معاكي. ندي: والله ما ليا دعوة بيه. حسام: كلمتي نور ليه؟ ندي: كلمت نور. ما كلمتوش. والله ما ليا دعوة بيه. والله ما ليا دعوة بيه. لا هو ولا بغيره. نور تخبط على الباب. نور: هو حقك وكل حاجة. بس القهوة هتتبرد. حسام: كنا بنتفق على تفاصيل الطلاق. نور تدخل وتقفل الباب وتبص لـ ندي.

نور: بتتكلموا جد؟ حسام: مش ده اللي كنتي جاية من مصر تكلميني فيه. تمام. أنا موافق. ومش عاوز الشقة باسمي، بس باسم بنتي. وأنا متأكد إنكوا مش هتسيبوها لوحدها. نور: وحبيبة؟ حسام: انتي شايفة إنها أمينة عليها بعد اللي عملته؟ نور: حسام. حسام: اللي تاخد بنتها وتهرب مع راجل غريب. ندي تعيط. ندي: والله ما كان معايا. والله العظيم. حسام: وأنا أعرف منين؟ إحنا لقينا البنت في بيته في أوضة نومه. ما يمكن كنتي معاه هنا؟ نور: حسام.

حسام: طردك وخد منك البنت. ما قدرتيش عليه. جيتيل لي. ندي: والله ما حصل. والله ما كان معايا. والله ما حصل. نور: كفاية يا حسام. لو سمحت. كفاية. حسام: ماشي. هسكت. شوفوا انتوا عاوزين إيه وأنا هعمله. عن إذنكوا. حسام يسيب الأوضة ويطلع بره. ندي تبص لنور وهي بتعيط. ندي: والله ما حصل. والله العظيم ما حصل. نور تحضن ندي. ندي: والله ما كان معايا. والله زياد ما كان معايا. والله... ندي تدوخ ويغمى عليها. نور تصرخ. في النادي.

ليلى: ولا هتكلم ولا ليا دعوة. أنا تعبت. منال: جدعة. ليلى: بس أنا مش فاهمة. يعني مش كفاية ساب كل بنات الدنيا واختار واحدة بظروف نور. لا، وبدل ما يعملوا العملية ويفرحونا بعيالهم، رايحين يتفسحوا في لبنان. وقته ده يعني. منال مش قادرة تكتم الضحك. عمر: هو بس... ليلى: المشكلة إننا لو اتكلمنا بنبان إن إحنا اللي وحشين. حد يقول إننا خايفين عليهم وعلى مصلحتهم. ابداع. عمر: أنا بس عاوز...

ليلى: أنا أصلاً مالي. ما اللي يخلف يخلف، واللي يتجوز يجوز، واللي يسافر يسافر. أحرق دمي ليه أنا مالي. عمر: والله عندك حق. ليلى: وانتوا بقي هتنتقلوا هنا على طول؟ منال: دا أنا ريقي نشف من ساعة ما عرفت إن البت حامل. هاتيهالي هاتيهالي هاتيهالي. بس تقولي لمين؟ ليلى: عينة واحدة. انتي هتقوليلي. ريقي نشف مع "على". وفي الآخر يقوم يبوس راسي ويمشي. أكتر من كدا ما تاخديش. أية: أسماء مش بترد عليا خالص وبتكنسل. ليلى: أسماء مين؟

عمر: ما قولتك كبري مخك عنها بقي. أية: أنا هقوم أبص على نغم. مش شايفة قدامي من هنا. عمر: تمام. أية تقوم. عمر: شوفتي مش هتبطل. ليلى: هو في حاجة ولا إيه؟ منال: ما تاخديش في بالك يا أية. مش هتشوف لنا حوار الأكل ولا إيه؟ عمر: حالا. ثواني. عمر يقوم. منال تبتسم لليلى. ليلى: خير ما عملتي إنك كلمتيني. أهو الواحد يغير جو. منال: على رأيك. المفروض نبقى نيجي هنا كتير. ليلى: معاكي حق. قاعدة البيت بتخنق. في شقة ندي.

أية تدخل تقعد ونغم في إيدها. أية: هو عمر فين؟ منال: عملتي إيه في التمرين يا نونو؟ ليلى: راح يجيب المنيو عشان نتعشى. نغم: الكابتن قالتلي إني شاطرة. انتي ليه مش جيتي تتفرجي عليا؟ انتي مش وعدتيني؟ أية: ممكن موبايلك يا طنط. منال: والله رجلي بتوجعني يا... اتفضلي يا يويو. أية تاخده وتبتسم وتروح في جنب. منال: المرة الجاية إن شاء الله هدخل معاكي جوه. أية تاخد رقم أسماء من موبايلها وتتصل بيها من موبايل منال. أسماء ترد.

أية: هو انتي عملتي لي بلوك؟ أنا ما أخدتش بالي غير لما فتحت الواتساب. أسماء: أية!! أية: هو في إيه يا أسماء؟ أنا زعلتك في حاجة؟ أسماء تقفل السكة. أية تستغرب. تحاول تتصل مرة اتنين تلاتة. أية تستغرب. ترجع الترابيزة. منال: هو يس هيخلص إمتى؟ عمر يدخل. عمر: دي كل المنيوهات هنا. أية: تصدق أسماء عملت لي بلوك. بفتح الواتساب أبعتلها رسالة لقيت معمول لي بلوك. بكلمها من موبايل طنط. أول ما عرفت إنها أنا قفلت السكة وعملت بلوك.

منال: في داهية. من استغنى نحن عنه أغنى. أية: بس ليه طيب؟ أنا عملتلها إيه؟ ليلى: دي كانت جارتك في اسكندرية. أية: أيوه وكنا صحاب جداً. ليلى: صحبة مصالح خلاص. خلصت حاجتي من عند جارتي. عرفاها. العينة القذرة دي. أية تبص لعمر. أية: هو انت اتخانقت مع أخوها بخصوص أقساط الموبايل؟ عمر: وده إيه دخله بأي حاجة؟ منال: هو اللي خلق أسماء دي ما خلقش غيرها يعني. مضايقة نفسك ليه؟ ما تروحي يا عمر تشوف يس خلص ولا قدامه قد إيه. عمر: حاضر.

عمر يمشي. وأية تقعد. منال تناوله المنيوهات. منال: خدي خدي. شوفي تحبي تاكلي إيه. ما فيش حاجة تستاهل تضايقي روحك عليه. ليلى: على فكرة البيبي بيتأثر جامد بزعلكم. منال: سامعة؟ أسماء دي تستاهل تضايقي ابنك عشانها يعني. أية تحط إيدها على بطنها وتاخد المنيو تبص فيها. في شقة ندي. حسام يفك الكانولا من إيد ندي. حسام: انتي بقيتي كويسة خالص أهو. الحمد لله. نور: طب مش عاوز تقولها حاجة؟ حسام يبص لنور. تبتسم له.

حسام: أنا آسف يا ندي. ندي: أنا عارفة إن اللي عملته غلط. بس... نور: بقولكوا إيه؟ كفاية عتاب. انتوا الاتنين غلطتوا. والحمد لله قدر ولطف. كان ممكن تنتهي بشكل أسوأ. ما حدش فينا يستحمله. لموا نفسكم بقى. ندي تبص لحبيبة. نور: هسيبك تراضي مراتك يا حسام. دا انت بتحبها حتى لو زعلان منها. خليك انت الكبير. مش شايف حالتها. حسام: تمام يا نور. نور: ربنا يهديكوا. نور تطلع بره وتقفل الباب. ندي تبص لحسام. ندي: والله ما هربت مع زياد.

حسام: خلاص يا ندي. مش عاوز أتكلم. ندي: بس أنا ما عملتش كدا. ما عملتش. ندي تعيط. حسام يقعد جنبها ويمسح دموعها. حسام: خلاص تمام. اهدّي. وأسف. أنا عارف إني كدبت عليكي، بس والله كنت خايف أخسرك. وبعدين...

وبعدين دي والله كانت قبل ما أطلب منك تعفيني. لأني ما كنتش عاوز أعمل كدا تاني. لأني كنت مقروف منها ومن نفسي. أنا بجد كنت مخنوق. وجيتلك. قولت لك عفيني. ولما رضيتي قطعت علاقتي بيها. وحاولت معايا كتير. ولما ما لقتش معايا أمل، انتقمت مني فيكي. بس أنا ما عملتش كدا. ما اديتكيش حاجة. وبعدين لو كنت بديكي إيه اللي خلاني أبطل؟ ما كنت فضلت أديكي وما جيتلكيش. دوغري. وطلبت منك. فكري بعقلك يا ندي. ندي: أنا تعبانة أوي.

حسام: أنا قولتك بلاش نتكلم. بصي. ارتاحي. وأنا هقعد بحبيبة وهجيب عمي ينام جنبك. حسام يحاول يشيل حبيبة. ندي: خليها جنبي. خليها جنبي. حسام: مش هخطفها. أنا بس هقعد بيها في الصالة وأسيبك ترتاحي. عمي قاعد على الكرسي. أكيد محتاج يفرد ضهره. ندي: أنا نمت. هاجي أقعد معاك في الصالة. حسام: تمام. لو قادرة تعالي. ولو تحبي تقعدي في البلكونة. ندي: ياريت. حسام: تمام. هتقدري تمشي لوحدك؟ ولا أسندك. أنا مش هشيلك. أنا زعلان منك...

بس هخليني جدع معاكي لحد ما تخفي وتقفي على رجلك. حسام يسند ندي يقومه. ندي: وبعد ما أخف؟ حسام يشيل حبيبة. ندي: وبعد ما أخف هتعمل إيه؟ حسام: بكرة هروح الشغل وهطلب نقلي. لو حبيتي تيجي معايا أنا وحبيبة، أكيد هكون أسعد واحد. حبيتي تنزلي مصر مع "على" ونور وباباكي، أنا مش هقدر أجبرك على حاجة. بس برضه مش هبقى ملزم ناحيتك انتي وأبوكي بحاجة. تعالي.

ندي تبص لحسام. يتحرك. تتحرك معاه وهي ساكتة. حسام يفتح الباب يلاقي "على" ونور واقفين على باب الأوضة التانية. ياخد ندي ناحية البلكونة. حسام: دخّلي عمي جوه ينام شوية يا نور. وادخلي انتي و"على" في الأوضة التانية لو تحبوا. انتوا ما نمتوش من الصبح. نور: والله خير ما عملت. الجو في البلكونة يرد الروح.

"على" يبص على ندي. باصة في الأرض. يبص على نور بصالة. يفتح باب الأوضة التانية ويدخل. نور تروح تزق عمها في أوضة ندي. وحسام يقعد ندي في البلكونة. حسام: أجيب لك حاجة تاكلي أو تشربي؟ ندي: شكراً. حسام يقعد وحبيبة على رجله بيلاعبها. ندي تبص عليه. يبصلها. حسام: شبهك أوي. كاني بلاعِبك وانتِ قدها. كنت برده أقعد كدا وآخدك على رجلي. ندي تبتسم. حسام: كنت أتعصب أوي لما تعمليها عليا. عمتي الله يرحمها تقول لي: "محدش قالك شيلها".

وأقول: "مش هشيلها تاني". وبعدين أول ما تغير لك وتحمّي وتلبّسي الطقم النضيف، أجري أشيلك. ومهما يقولوا: "بلاش"، كنت أشيلك برضه. وتعمليها عليا تاني وأتعصب تاني. وهكذا وهكذا وهكذا. طب والله البت دي عرفاني. بصي بتضحك لي إزاي. ندي تبتسم. حسام: في أغنية مش فاكر بتاعة مين بتقول: "في خيط رفيع رابط ما بينا وده النصيب. هتخاف عليه؟ هخاف عليه. هتسيب؟ هسيب." بس أنا عمري ما سبت. بس ما عدتش قادر أمسك لوحدي أكتر من كدا.

ندي: جنات. دي أغنية لجنات. حسام: آه تقريباً. طول عمرك أشطر مني في الحاجات دي. أنا ما كنتش فالح غير في المذاكرة. حتى لعب الكورة مع العيال ما كنتش بحب ألعب معاهم. ندي: عشان ما بتحبش تخسر. حسام: بس كنت بسيبك تغلبيني. ندي: مش دايماً. حسام: لا والله دايماً. عمري ما سبتك تخسري. ندي: يعني عمري ما كسبت بمجهودي أبداً. حسام: طب انتي عمرك كسبتي حد غيري؟ ندي: كسبت نور. حسام: هي دي بتعرف تلعب؟ نور تدخل. نور: الله الله بقي كدا.

حسام: هاتي كرسي وتعالي اشهدي. مش كنت دايماً بسيبها تكسب؟ نور: ندي كانت شاطرة في الألعاب اللي بتعتمد على الحظ. من يومها حظها "بومب". إنما بقي ألعاب الذكاء فحدث ولا حرج. ندي: وأنا غبية ولا إيه؟ نور: لا. متسرعة. مش بتفكري قبل ما تلعبي. ندي: دا لعب يعني. نور: بقولكوا إيه؟ أنا مش قادرة. هخش أنام وأسيبكوا تستعيدوا الذكريات سوا. حسام: تصبحوا على خير. ندي: تصبحوا على خير.

نور: أنا حطيت لك مخدة وغطا على الكنبة. يلا تصبحوا على خير. نور تمشي. حسام: بفكر أتصرف في قرشين أديهم لها بدل الفلوس بتاعة العملية. ندي: مش هيرضوا. حسام: لا هترضى. انتي عارفة قد إيه نفسها تبقى أم. بس بتحبك أوي. ما استحملتش عليك الهوا وجت جري. ندي: أنا كمان بحبها أوي. أنا ما ليش غيرها. حسام: ناوية على إيه يا ندي؟ تفتكري لما نطلق، حتى لو سبتلك حبيبة، "على" هيسيبك في حالك؟ تفتكري لو نور عرفت؟ ندي: وانت هتسيب لي حبيبة؟

حسام: وهل يضر الناقة سلخها بعد دبحها يا ندي؟ ما انتي دبحتيني خلاص. ندي: ما أنت ياما دبحتيني. حسام: بنت أمك يا بت بنت أمك. بس انتي البامبرز ساترك. هقوم أغيّر لها لحسن الريحة عمتني. ندي تضحك. حسام يشيل حبيبة ويدخل جوه. تبص على الشارع وتقوم تروح وراه تلاقيه منيمها على الكنبة وبينضفها. ندي: وأنا في البلد بيسموها "ضيّعة". حسام يبصلها.

ندي: ما كنتش عارفة هعمل إيه ولا أروح فين. بس كنت محتاجة أحس إني حرة. إني أقدر أطير. إني أنسى ولو للحظة إن رجلي لسه مربوطة في القفص بحبل. وإني مهما بعدت هرجع له. حسام: وحبيبة؟ الحبل ده؟ ندي: النصيب.

حسام: القفص هيفضل طول عمره قفص طول ما انتي شيفاه كدا. طول ما انتي فاكرة إنك مربوطة بيا عشان حبيبة أو عشان جابرك أو حتى عشان فلوس علاج أبوكي الغالية أو أي سبب تاني. الجواز مش أساسه الحب. الجواز أساسه المودة والرحمة. وده كلام ربنا مش كلامي. وأنا ما قصّرتكش. بس مهما هعمل، طول ما انتي شايفة جوازك مني قفص، مش هيفرق بقى إن دهب ولا صفيح. هيفضل قفص. وأنا دلوقتي اهو بقولك: انتي حرة يا ندي. طيري. الباب مفتوح.

ندي: جناحاتي مكسورة. حسام: خلاص خليكي لحد ما جناحاتك تخف. ووقت ما تحبي تطيري، الباب مفتوح. ما هو على رأي اللي قال: "إذا أردت شيئاً بشدة، أطلق سراحه". حسام يشيل حبيبة ويقوم يقف. حسام: وأنا عمري ما تمنيت غيرك. ندي تبص له. حسام: تحبي تشيلي بيبو شوية؟ حسام يشيل ندي حبيبة على إيدها السليمة. حسام: هنضف الليلة دي وأعملنا اتنين نسكافيه نشربهم على أضواء القمر. ندي تهز راسها. حسام: نورتي بيتك يا ندي.

ندي تبتسم ابتسامة بسيطة. حسام يوطي يلم البامبرز والوايبس والحاجة من على الكنبة. في أوضة نور. نور و"على" نايمين على السرير. كل واحد مدي ضهره للتاني. "على" يلف ويبص لها. "على": نور؟ نمتي؟ نور تلف له. نور: لا يا "على". صاحية. خير؟ عاوز حاجة؟ "على": أنا آسف. نور: على إيه؟ "على": أي كلام سخيف سمعتيه ضايقك. أنا آسف إني حطيتك في موقف زي ده.

نور: يمكن أنا اللي بغير عليك بزيادة. أو يمكن أنا حساسة بزيادة. بس دا ما يمنعش إن ثقتي فيك مطلقة. "على": لو تحبي... ويا ريت بصراحة. نشوف فندق. نور: مش قبل ما أطمن على ندي. سامحني. مش هتقدر تهتم بعمي وحبيبة بإيدها دي، وحسام أكيد هيرجع شغله. "على": بس مش هينفع ننام كدا. على الأقل ناخد أوضة. ويا ستي الفترة اللي حسام فيها في شغله، أبقى تعالي انتي اقعدي معاها. ولما حسام يروح، ارجعي لي.

نور: ما يمكن حسام يأجر شقة أكبر في المكان اللي هيتنقله. أو انت مش عاوز تقعد مع حسام في مكان واحد؟ "على": مش عاوز أكون مع ندي في مكان واحد. نور: إيه!!! "على": إن كانت مامتك علقت وحسام علق، أنا وندي مش هينفع نحتك ببعض تاني. أنا كان لازم أبعد من زمان أوي. وجودي مش بيعمل غير المشاكل. ليها ولكي ولنفسي. أبعد. يمكن حياتها تهدى. نور: وهو انت اللي عوّرت حياتهم؟ دا انت ركبت الطيارة وانت بتخاف منها عشان تساعدها.

"على": ووجودي فرق يعني؟ نور: وجودي أنا فرق. ولولاك ما كنتش جيت. "على": أنا بحبك يا نور. ومش ناوي أخسرك. نور تقرب من "على" وتنام في حضنه. نور: ولا أنا هقدر أخسرك يا "على". في أوضة ندي. ندي بتكلم أية على الماسنجر. أية: عاوزة أحضنك أوي. وحشاني جداً وشكلك تعبانة أوي. ندي: أحسن كتير. الحمد لله. أية: حاولت أكلمك كتير. ندي: حسام هيجيب لي شريحة جديدة إن شاء الله. أية: هو عمل فيكي إيه تاني؟ الكلب ده.

ندي: المرة دي مش هو. المرة دي أنا اللي عملت في نفسي. وللأسف كنت هدفع التمن عمري كله. الحمد لله قدر ولطف. ندي عينها تتملي دموع. أية: أنا نزلت مصر. عمر خلاني ألم كل حاجتي فجأة. قاعدة عند طنط منال. كنت ناوية أروح. بس هستنى لما "على" ونور يرجعوا عشان العيال اللي هنا. عمر سافر تاني اسكندرية لوحده. وطنط منال نزلت المحل وأنا قاعدة معاهم. ندي: خليكي معاها. هتاخد بالها منك وانتِ حامل.

أية: دا اللي خلى عمر ينزلني مصر. بيقول السفر أيام امتحانات الترم التاني مش هتكون سهلة. وبطني كبيرة. وكمان مش هيعرف يتصرف لوحده. وأنا ما قدرتش أقول له حاجة. معاه حق. مع إنّي يا دوب كنت بدأت أشم نفسي هناك. بقي عندي... كان عندي صاحبة. بس لما جيت هنا عملت لي بلوك. بيقولوا عشان مصلحتها معايا خلصت. بس حاسة إن في حاجة تانية. ندي: ما تعبريّهاش. ما تستاهلش. أية: هترجعي معاهم؟ ندي تبتسم بسخرية.

ندي: لا مش هرجع أبداً. نور و"على" هيخليهم هنا يتفسحوا شوية. يحللوا القرش اللي ضاع بسببى. وهينزلوا. وهاجر شقتي اللي في مصر مفروش. أية: ليه يا بنتي؟ العفش يخرب حرام. ندي: محتاجة فلوس يا أية. ما ليش غير كده. لا تعليم ولا شغل ولا فلوس ولا أي حاجة. حسام قال لي: "خليكي لحد ما تقدري تقفي على رجلك". وأنا عمري ما هقدر أقف على رجلي وأنا قاعدة مطرحي. أية: فهمت.

ندي: نور هتظبط الدنيا. بتقول إن ممكن طنط تعترض على إني أدخل غريب البيت. فهنقل الرفايع من شقة بابا لشقتي. و"على" هيشوف مستأجر لشقتي. وهو أي حاجة. أية: هتقدمي عندك ولا أونلاين؟ ندي: أونلاين. أنا مش هقدر أنزل أو أروح في أي حتة. حبيبة وبابا هسيبهم لمين؟ أية: معاكي حق. ندي: أنا هروح أرجع الموبايل لـ "على". بدل ما أنا محتلياه كدا. ولما حسام يجيب لي الخط هبقى أكلمك تاني. ماشي؟ أية: عاملة إيه معاه؟ وحسام عامل إيه؟

ندي: عادي. جوز أختي. ولازم أتعامل معاه عادي. أية: جوز أختك بس؟ ندي: وما ينفعش يكون أكتر من كدا. لمصلحة الكل. أية: يعني خلاص؟ ندي: دا خلاص من زمان أوي. انت إزاي لسه ما أخدتيش بالك لحد دلوقتي؟ أية: كان لسه عندي أمل. ندي تبتسم بحزن وتجيب الكاميرا على حبيبة بتلعب جنبها. أية تبتسم. أية: يا قلبي. وحشاني أوي. كبرت ما شاء الله. ندي: ده الأمل اللي باقي لي. ده الأمل اللي عايشة عشانه.

أية: ربنا يخليهالك يا رب. أما لو أجيب بنت قمر كدا... ندي: هتطلع أحلى إن شاء الله. هتطلع وحشة لمين؟ أية: لعمها. ندي تبتسم. أية: روحي اديله الموبايل. وابقي كلميني بعدين. وأنا كمان هروح أعمل الغدى. ندي: ماشي يا قلبي. سلام. أية تحدث لندي بوسة وتقفل. ندي تتسند وتقوم تفتح الباب وتبص. مفيش حد. تروح البلكونة. "على" ونور واقفين ومصطفى قاعد. ندي تدي لـ "على" الموبايل. ندي: شكراً.

"على" يبتسم ويهز راسه وياخده منها. ويبص الناحية التانية. ندي تبتسم بسخرية. نور: أعمل لك حاجة؟ ندي: شكراً. لو حابين تنزلوا في جنينة قريبة حلوة أوي هتعجبكم. وفي كافيهات حلوة كتير. نور: لما حسام يروح هننزل. ندي: أنا بقيت كويسة. ما تربطوش نفسكوا بيا. اخرجوا. لبنان حلوة. ولو حسام اتنقل، مش هنقعد في بيروت كتير. بس ممكن تخليكوا في الشقة لو عاوزين.

نور: سيبها لوقتها. ما أكيد المدينة التانية دي هتكون كويسة برضه. أمال حبيبة نايمة ولا إيه؟ ندي: صاحية. هروح أقعد معاها. خدوا راحتكوا. نور: لا والله. أنا قصدي تجيبيها تاخد شوية شمس. ندي: ما أنا فاتحة الشباك جوه. ما تقلقيش. هسيبكوا تاخدوا راحتكوا. تيجي يا بابا تقعد معايا؟ مصطفى يهز راسه. ندي تيجي تشد الكرسي. "على" يقوم. "على": هتقعدوا فين؟ ندي: في أوضتي. شكراً.

"على" يدخلهولها ويمشي من غير ولا كلمة. ندي تبتسم وتقفل الباب. ندي: تحب تفرد ضهرك جنب حبيبة؟ ولا أقرأ لك كتاب؟ مصطفى يشاور على الكتاب. ندي تبتسم وتمسك كتاب. ندي: تمام. نقرا شوية في التربية الإيجابية. ندي تقعد على السرير وتبدأ تقرا. في الشركة. هدايا: انت بتتشرط على إيه؟ لتكون فاكر إن اللي هتعمله ما حدش غيرك يقدر يعمله. عدنان: برواقة. حسام قصده مو هيك.

حسام: لا. أقصد معلش. إحنا كلنا لازم نفهم إننا في مركب واحدة. يعني اللي هيتهور ويدب مسمار فيها، هيكون أول واحد يغرق. عدنان: أنا اللي خبرتها تسوى هيك. حقك عندي. وهلا مرتك وبنتك حدك. شو بتريد أكتر؟ حسام: هعوز أكتر من كدا إيه؟ بس أنا مش هينفع أفضل في بيروت. عدنان: هيدا هو الكلام المظبوط. بيروت مانا محتاجتلك. هدايا قائمة بالواجب. انت الداهية اللي متلك مو محتاج ريس فوقه. بتعرف شو؟

من يوم شفتك وأنا نظرتي فيك في محلها. أصل اللي يسوى هيك في أغلى الغوالي ما راح يهمه حدا. وهيك رجال بيعدلوا لي راسي. حسام يبص لهدايا. عدنان: انتوا الاتنين كتير بتشبهوا بعضكن. بس هيك خدنا في الفيزياء. الأقطاب المتشابهة بتتنافر. هههههههه. كنت كتير أكره هالمادة. هههههههههه. حسام: هستلم الشغل فين وامتى؟ عدنان: هدايا هتضبطهالك. لا تعتل هم. حسام: هدايا تاني؟ ما كفايا خدماتها اللي فاتت.

عدنان: ههههههههههههههههه. بكفاياك غلاظة. حسام، هيدي البقلاوة ما بتتعامل هيك. بتعرف شو؟ أنا حتى أمور مرتي بسيبها لهدايا تضبطها. الله يبارك. لا من يوم يومها رافعة راسي. حسام: اللي تشوفه طبعاً. عدنان: طب شو؟ اتراضوا عشان خاطري. حتى متل ما قلت حسام، إحنا بمركب واحد. هيك ما بيصير. حسام: أنا تمام. هدايا: وأنا تمام. حسام: أنا كدا تعليماتي هاخدها مباشرة منك. صح؟ عدنان: إي صح. حسام: تمام.

عدنان: بالله خبرني شو ساوت مرتك بعد ما خدوا منها الصغيرة؟ حسام: هتعمل إيه يعني؟ رجعت. حسام يبص لهدايا. حسام: ورفضت تطلق وقررت تسامح مقابل إني أنا كمان أسامح. عدنان: أكيد بتسامح. والله ها القلب ما شفت أكبر منه. شايفه هدايا؟ كان وين هالرجال يعلمنا كيف الواحد يمشي مرته. هدايا: وهي مدام لينا عمرها زعلتك برضه؟ عدنان: شو؟ ما خبرتكن؟

ما راح تصدقوني. لينا ما فيها غير المصاري. تفيق بكير تظهر مع رفيقاتها على النادي أو المول. تشتري أواعي واسكربينات شي مجوهرات. بيرجع الأولاد من المدرسة. الدادة تهتم فيهم. وآخر اليوم ترجع تشوف شو أخبارها وتهتم ببشرتها وتنام. أما أنا ماني ببالها. أظهر امتى ما بظهر. أرجع امتى ما برجع. مع مين كنت ولا شو عمساوي. ما فيها تشغل حالها. حسام: رمت طوبتها يعني؟ هدايا: اسمها مريحة ومرّيحة.

حسام: لا اسمها رمت طوبتها. أنا مش عاوزها تريحني. عاوزها تسألني رايح فين، جاي منين، كنت مع مين. تغير عليا وتعيش عشاني قبل ما تعيش لبنتنا ونفسها. عاوز أحس بحبها ليا مش لفلوسي. خوفها عليا. اتاخرت ليه؟ انت كويس؟ ما تنامش غير لما تطمن إني روحت أو بخير. تقلق لو ما لقتنيش جنبها. ما يحلالهاش اللقمة غير وأنا معاها. عدنان: مو مبين عليك هالقد رومانسية.

هدايا: ما تصدقش الأفلامات دي. دي عدة النصب. دا انت خليتها تقطع شرايينها ووقفت تتفرج. حسام: أنا حاربت الدنيا عشان أوصلها. ولسه بحارب. وكل حرب وفيها خسائر. نقطتين دم مش هيخسرواه. هدايا: كان ممكن ما تلحقهاش. حسام: أنا أصلاً ما كنتش عاوزها تعمل كدا. أكيد. ولو كنت شفتها ما كنتش سمحت لها. وبعدين انتي مين اداكي الحق إنك تحاسبيني أو تحكمي عليا؟ انتي حتى مش قادرة تداري غيرتك منها. هدايا: أنا أغار من دي؟

حسام: لو كان عندك اللي يعمل لك ربع اللي بعملهولها، ما كانش ده بقي حالك. عدنان: شو صار لكن؟ كاني مانى موجود. شو في يا حسام؟ روّقي هدايا. هدايا: هروّق. هسيبها لكوا خالص. هروح أخلص إجراءات نقله. خلينا نخلصه. هدايا تقوم وتمشي. عدنان: النسوان ما فيك تعاملهن هيك. ليك يوم بتحتاجون. ما بينسوا هيك كلمات. حسام يبص لعدنان. عدنان يهز راسه. حسام يهز راسه. موافق. في شقة ندي.

نور تخبط على باب ندي وتفتح الباب تلاقي ندي قاعدة بتقرا كتاب ومصطفى وحبيبة نايمين. ندي تقفل الكتاب وتطلع بره وتقفل الباب وراه. نور: الغدا جاهز. تحبي تاكلي؟ ندي: تعبتي نفسك. طب ليه ما ناديتينيش آجي أساعدك؟ نور: ما حصلش حاجة يعني. ندي: على فكرة أنا طبيخي اتحسن خالص. ما تخافيش مني يعني. نور: أنا متأكدة من ده. المهم دلوقتي هتاكلي معانا ولا تستني حسام؟

ندي: لا. كلوا انتوا. أنا هستنى بابا يصحى. أصل ممكن حسام يتصل في أي وقت يقول إنه جاي ياخده. أنا مجهزة له كل حاجة. بس قولت أسيبه يرتاح. نور: خير ما عملتي. بصي، إحنا كنا بنفكر نخرج أنا و"على" نلف شوية. بصراحة زهقت من قاعدة البيت. ندي: طب ما دي فكرة حلوة. كلوا وانزلوا. نور: لما حسام ياخد عمي. أهو أساعدك. ندي: تمام. نور: ما تيجي نخرج كلنا سوا. نروح السيشن وبعدين نتفسح كلنا. إيه رأيك؟

ندي: لا. كدا اليوم هيضيع حرام. وكمان أنا مش قادرة. معلش. نور: تمام. فكري تاني. أغرف لك معاهم؟ ندي: لا شكراً. مش جعانة دلوقتي. نور تهز راسها. ندي تدخل. ونور تروح المطبخ تلاقي "على" غارف صينيتين. نور: بتقول مش جعانة. "على": سمعت. بس عمي لازم ياكل قبل ما ينزل. هيفضل لحد ما يرجع من غير أكل. نور: أكيد هياكله قبل ما ينزل. "على": حسام هيكلمها وهو رايح. هتاكل الراجل ولا هتلبسه ولا هتلبس؟ ولا هنقف كلنا مدربكين بقي قدام الباب؟

نور: هو انت بتشيل هم كل حاجة كدا؟ نور: مش فاهمة. انت عاوزني أوديلهم صينية الأوضة؟ طب ما يقوموا ناكل كلنا على السفرة. "على": أنا واخد قرار إني ما أدخلش وما أتحمقش وما... نور: هي مش هتطلع تقعد معانا؟ هتفضل في الأوضة طول ما إحنا هنا؟ "على": ليه يعني؟ ما تافورش. نور: تمام. "على" يشيل صينية ويروح يحطها على ترابيزة في البلكونة ويقعد. ونور ماشية وراه ببطء. أول ما تدخل يشاور لها تقعد.

نور: تفتكر بجد تكون جعانة ومش عاوزة تطلع تقعد معانا؟ طب ليه؟ أكون زعلتها في حاجة؟ "على" ياكل. نور: ما أعرفش. ممكن تكون حاجات كتير. بس من الصبح ما طلعتش من الأوضة. ولا هي ولا حبيبة ولا عمي. نور: طلعت مرتين الحمام. "على": صد رد. حتى مرة منهم ما رميتش السلام. وعملت مش شيفاني. نور: ما تافورش. هي بس شكلها مندمجة في كتاب مهم. "على": تمام. "على" يكمل أكل. نور: أضمن أدخلها الصينيه. كلت كلت. ما كلتش. أهو يبقى جنبها صح؟

"على" ياكل. نور تبصله وتروح المطبخ. "على" يبص على الشارع.