رواية سلف و دين الفصل الستون 60 - بقلم لولو محمد

نور / تفتكر بجد تكون جعانة و مش عاوزة تطلع تقعد معانا؟ طب ليه؟ أكون زعلتها في حاجة؟ علي / معرفش، ممكن تكون حاجات كتير. بس من الصبح ما طلعتش من الأوضة، لا هي ولا حبيبة ولا عمي. نور / طلعت مرتين الحمام. علي / صد رد، حتى مرة منهم ما رمتش السلام وعملت مش شايفة. نور / متتفور، هي بس شكلها مندمجة في كتاب مهم. علي / تمام. علي بيكمل أكل. نور / الأضمن أدخلها الصينية. أكلت كلت، ما أكلتش، اهو يبقى جنبها صح؟ علي / ياكل.

نور تبصله وتروح المطبخ. علي يبص على الشارع. في السيشن. حسام قاعد لوحده بره، تليفونه يرن. يبص فيه وينفخ ويرد. حسام / يا نعمة. داية / أوراق نقلِك خلصت، واجرت لك شقة كويسة في منطقة نضيفة، تقدر تستلمها من بكرة. حسام / ومستر عدنان ما كانش ينفع يبلغني هو بالكلمتين دول؟ داية / مستر عدنان مش فاضي لتفاهاتك دي، وعلى العموم مش هموت وأكلمك يعني، لتكون فاكر نفسك حاجة يعني؟ لا فوق، أنت بالنسبة لي كنت شغل وبس.

حسام / خلصتي البقين اللي كنتي هتموتي وتسمعهملي؟ داية تقفل السكة في وشه. يبتسم باب الأوضة يتفتح، ومصطفى يطلع. يزقه ممرض. حسام يديله فلوس ويزق عمه. حسام / هنروح نلم حاجتنا عشان بكرة هنسافر بعيد عن هنا، مكان أبقى فيه أنا وانت وندى وبس. حسام يبص على مصطفى مش مهتم باللي بيقوله. حسام / لو نور وعلي واحشينك أوي كده، خليك معاهم وابقى ارجع أجيبك لما يجوا مسافرين. مصطفى يلف راسه ويبص لحسام.

حسام / مع إنّي أشك إنهم هيكونوا مبسوطين بالفكره دي، أكيد هيبقوا عاوزين يتفسحوا ويهيصوا ويعيشوا جو العرسان ورومانسيات لبنان. أقولك خليك معانا أحسن، اهو ندور على مركز تاني تكمل فيه علاجك. بهدلتك دي بنتك السبب فيها، مش أنا، يكون في علمك. حسام يفتح العربية ويركب مصطفى، ويلف يركب. في نايت كلوب. بنات وشباب بيرقصوا. علي ونور يدخلوا. نور / إيه المكان ده؟ شكله ديسكوا، كنت فكراه كافيه. بنت حلوة تدخل لابسة جيب قصير.

بنت / أهلاً، نورتونا وأنسُتونا. شكلكن أول مرة بتيجوا لهون، أنا بحفظ زبايني وبعمري ما بنسى حد. نور / شاطرة، بس معلش أصلنا كنا فاكرينه مطعم. بنت / تِكرمِلي عيونك، مصرية؟ كتير بحب مصر وبنات مصر. أول مرة على لبنان؟ علي / الترابيزة اللي هناك فاضية؟ البنت / على راسي، اتفضل. البنت تتحرك قدام علي. نور / إحنا هنقعد هنا؟ علي / شوية ونمشي، نغير جو، بصراحة عجباني الدوشة. نور / الدوشة ولا حاجة تانية؟ علي / حاجة تانية.

نور تبص لعلي، يغمزلها وهو بيضحك ويعدلها الكرسي تقعد. البنت / أنا سهر، رفيقتكم للمسا. كيف ما بدكن، نادوني. نور / شكراً. البنت تمشي. نور / إيه دي لزقة أوي؟ كنت فاكراها مش هتمشي. دي كان ناقص تجيب كرسي وتيجي تقعد جنبنا. علي / انبسطتي؟ نور / إيه المكان ده بس؟ ليسوقنا خمرة؟ علي / أكيد فيه عصير وأكل يعني، وأنا بصراحة تعبت من المشي. نور / خايفة بوليس الآداب يطب علينا وإحنا كده؟ علي / ههههههههههه، إنتي عبيطة يا بنتي ولا إيه؟

أكيد المكان ده مرخص. سهر تدخل وتحط مينيوهين. علي / المشروبات والأكل هنا حلال صح؟ سهر / كيف ما بدك، حلال حرام، أنا بدبرلك اياه. نور / اللهم طولك يا روح. كلميني أنا يا حبيبتي، معلش. سهر / تِكرمِلي عيونك، اؤمريني. نور تبص في المنيو. نور / أنا مش فاهمة نص المنيو! إيه؟ تسقية مجدرة؟ يخنة القرع، مكمور الباذنجان، حمص بيروتي، بطاطس بوريه باللبن، سلطة... دا المنيو محتاجة مترجم. الروكا، مكدوس.

سهر / التسقية بالمصري فته، بس من غير لحمة. فيها حمص، ثوم، مكسرات وخبز محمص ولبن. علي / لبن!! سهر / إيه بتقولوا عنه بمصر؟ زبادي. نور / بناقص الأكلة دي. خلينا في اللي نعرفه. بصي خلينا في الفتوش والتبولة والكبيبة، إيه رأيك يا علي؟ علي / لا خلينا نجرب، مش هنيجي لبنان كل يوم. سهر / هيك بيكون الحكي. نور تبصلها. سهر / طب شو رأيكن؟

حضّرلكن وجبة ميكس. راح طعميكن من كل الأكلات اللي عنا، والمرّة الجاية بتطلبوا اللي تعجبكن. شو رأيكن؟ علي / موافق. نور تبص لعلي وتبتسم لسهر من تحت الدرس. سهر / بجيبلكن عيران مع الأكل، ولا بدكن شي تاني؟ علي / عيران!! سهر / شي مشروب منعش من اللبن والحليب، بيهضم الأكلات وبيريح المعدة كتير، منعش ومشْهِي. نور / تمام، نجربه بالمرة، ولا إنت إيه رأيك يا علي؟ علي / ماشيه. سهر / خمس دقايق وبرجعلكن. سهر تمشي.

نور / الله يعينك يا ندى. فاكرة لما حسام خدها عيد ميلاد هدايا؟ اتحرق دمها نفس حرقتي دي بالظبط. علي / ليه بس يا بنتي؟ هو حد كلمكن؟ نور / مش عارفة، الجو موترني. علي / فكّيها، فكّيه. نور / بحاول. علي يمسك إيدها، تبتسم له. سهر تدخل وراها شاب شايل صينية عليها مقبلات وسلطات. تحطها على الترابيزة. في شقة حسام. حسام ينيم مصطفى على الكنبة في الصالة ويغطيه، ويدخل الأوضة. ندى بترتب الشنطة. ندى / ما كنت سبته ينام هنا.

حسام / ونزعجه ليه؟ ولا إنتي مضايقة؟ ليعرفوا إننا هنام في سرير واحد، لا سمح الله. ندى / لا مش مضايقني، بس بابا تعبان، واخاف الكنبة تتعبُه. حسام / إنتي عارفة كويس إنها مريحة. ندى / خلاص، أنا آسفة، مش هتكلم تاني. ندى تقعد على السرير. حسام / أنا ما قولتلهمش إننا مسافرين بكرة على فكرة، أصل بصراحة مش في نيتي أخدهم معايا. ندى / أحسن، خليهم هنا يتفسحوا وينبسطوا. حسام يفتح شنطة صغيرة ويطلع باسبورين.

حسام / باسبور عمي وباسبورك، وحبيبة متضافه عليه. لو تحبي تخليكي معاهم وترجعوا معاهم، أنا مش همنعك. ندى تحط الباسبورات في الشنطة تاني. ندى / أنا ما خرجتش من الأوضة وإنت مش موجود. نور دخلتلي الأكل هنا. فلو سمحت بطل. حسام / أبطل إيه؟ ندى / تلميحاتك دي. حسام / أنا ما لمحتش لأي حاجة، أنا بس عاوزك مرتاحة. ندى / شكراً. ندى تكمل لم هدومها في صمت. حسام / أنا آسف. ندى تبصله. حسام / آسف بجد. ندى / على إيه؟ حسام / كل حاجة.

ندى / وأنا كمان آسفة... آسفة إني وثقت في واحد غريب. آسفة إني هربت وما واجهتش. آسفة إني كنت هضيع بنتي. أنا كمان آسفة أوي. حسام / تعالي، ندى، لنفسنا فرصة. آخر فرصة. ندى / ما افتكرش إن فيه حاجة اسمها آخر فرصة. هتفضل تغلط وأنا هفضل أديك فرصة. حسام / وإنتي يعني مش هتغلطي خالص؟ مش هديكي فرص أبداً؟ ندى / خلينا نلحق نخلص. حسام يهز راسه ويكملوا لم الهدوم. في شقة منال. منال / يعني إيه هتصفي في إسكندرية؟

عمر / أنا فكرت ولقيت الدنيا كدا هتبقى صعبة عليا. أنا سافرت هناك عشانك، بس أنا حياتي هنا يا آية. منال / بالبساطة دي؟ عمر / زي ما سافرنا بالبساطة دي، نرجع بالبساطة دي. هحول البضاعة اللي هناك حبة بحبة على المحل هنا، والزيادة أحطه في شقتنا كمخزن، لحد ما أفضي المحل وأسلمه أول الشهر. وأنا بلغت صاحب المحل بالموضوع خلاص. منال / يعني مش بتفكر أو بتنوي؟ دا إنت قررت ونفذت. عمر / ليكي مين في إسكندرية تبكي عليه أوي كده؟

منال / ليا أسماء... صاحبتي الوحيدة. عمر / زي ما صاحبتيها، صاحبها غيرها. وبعدين من فلاحتها أوي، ما هي طلعت واطية في الآخر أهو وحلقتلك أول ما مصلحتها خلصت. منال / طب... طب أقساط موبايل أخوها؟ عمر / خلصوها الحمد لله. منال / إزاي وإمتى؟ عمر / ربنا كرمهم بفلوس، خلصوني. إنتي بتكرهي الخير ليا يعني؟ منال / لا طبعاً، بس... أنا في حاجة جوايا... عمر، أنا مش مرتاحة. عمر / حقك. بكرة هروح أنضف شقتنا ونرجع نقعد فيها.

منال / أنا مش بتكلم عن كدا، مع إنّي برضه مش معترضة، بس... أنا حاسة إن رجوعنا من إسكندرية... عمر / ما تبقيش أنانية بقى يا آية. أنا ما كنتش مرتاح هناك، أنا سبت دنيتي كلها عشانك، بس مش مبسوط هناك لوحدي. أنا عاوز أعيش هنا، أرجوكي. منال / تمام يا عمر... تمام. في شقة حسام. علي ونور يفتحوا الباب. نور / شكلهم نايمين. علي يبص على مصطفى نايم على الكنبة. نور / شكلهم اتراضوا وإحنا بره. مش قولتلك نسيبهم لوحدهم؟ كل حاجة هتتصلح.

علي يبتسم ويهز راسه، ويدخل الأوضة التانية ونور وراه يغيروا هدومهم. نور / أنا منفوخة على الآخر. هحط راسي على المخدة وأنام للصبح. علي / أي خدعة لفّتِك العالم أهو. نور / حصل. علي / عشر سنين قدام مش هنخرج من البيت. نور / عشر سنين بحالهم!! لا دا أنا كدا انتقم هنا بقى. إلا هو إحنا هنرجع إمتى صحيح؟ علي / وقت ما تحبي. نحجز تذاكر ونطير.

نور / نقعد يومين تلاتة كمان لحد ما ندى تشد حيلها وتقدر تعتمد على إيدها، ونسافر. اهو ما نبعزقش الفلوس اللي معانا كلها. علي / اللي تشوفيه. نور تنام في السرير وتستغطى، وعلي يدخل جنبها وياخدها في حضنه. علي / فيه حاجة كنت عاوز أكلمك فيها. نور / مع إن الوقت غريب، بس سمعاك. اتفضل.

علي / أنا اكتشفت إننا أحياناً بنجري ورا حاجة فاكرين إن هي دي اللي هتسعدنا، بس في الحقيقة وإحنا بنجري ما بناخدش بالنا إننا بنوقع حاجات تانية. لأنها معانا مش حاسسين بقيمتها. نور / إنت بتتكلم عن الخلفه يعني؟ إنت شايف إننا لأننا معاناوش أولاد دي ميزة؟ بص، مش هُنكر إن ليا صحبات كتير لما عرفوا إننا كفلنا يس ونغم،

استغربوا وقالولي: "بقي إنتوا تبقوا عرسان وبدل ما تعيشوا وتتفسحوا، رايحين تجيبوا عيال تربطوا نفسكوا وتأيدوا حياتكوا بيهم." بس ما تنكرش إنهم أدوا لحياتنا طعم جميل. بس ساعات برضه بقول: "يا ترى لو ربنا كرمني بطفل، هقدر أعدل بينهم ولا زي ما ماما بتقول... " أنا مش هنكر إنّي ساعات بخاف، بس إحنا علينا السعي. وبرضه إنت معاك حق، لازم ما ننساش النعم اللي في حياتنا وإحنا بنسعى، لازم نحافظ على التوازن ده. علي يبتسم ويهز راسه.

نور / عندك ندى مثلاً، شوف حسام بيعمل عشانها إيه، ومعيشها هي وحبيبة إزاي. بس هي مقتنعة إنها لو عاشت هي وحبيبة لوحدهم هتكون أسعد. وجربت، والحمد لله إنها جت على قد كده. علي / هو حسام بيعمل عشانها إيه يعني؟ بيعمل إيه؟ أي راجل ما بيعملوش. بيساعدها في شغل البيت، ما أنا بساعدكن. نور / وإنت مين قالك إن مساعدتك ليا مش فارقة معايا، وإنّي مش مقدرة تعبك؟ علي / بس أنا عمري ما خونت. علي يسكت ويتنهد. علي / تصبحي على خير يا نور.

علي يبوس راسها. نور / وأنا برضه. عمري ما قصرت في حقوقك الشرعية. وإنت من أهله يا علي. علي / أنا أقدر أرد، بس أنا رأيي إن رأيي أو رأيك مش هيغير في الواقع حاجة، يبقى أسكت وأحافظ على الود اللي بينا أحسن. نور / ما افتكرش فيه حاجة في الدنيا ممكن تأثر على الود اللي بينا. علي يبوس راسها. علي / تصبحي على خير يا نور. نور / وإنت من أهله يا حبيبي. في شقة آية تاني يوم. منال وآية واقفين، وفيه اتنين ستات بينضفوا.

منال / أنا مش فاهمة، مش كنتي ارتحتي في البيت بدل وقفتك دي؟ آية / هو أنا بعمل حاجة؟ ما أنا بتابع بس. منال / إنتي حرة، مع إنّي مش فاهمة إيه لازمته أصلاً. هو أنا قصرت معاكي في حاجة؟ آية / والله أزعل منك، أكيد لا. منال / أمال عاوزة تسبيني ليه بس؟ دا أنا ما صدقت مليتوا عليا البيت بدل وحدتي طول الوقت. آية / هو أنا جيت هنا وسبتك؟ أنا بس بنضفها. منال / ما هي هتتقفل وتتترب تاني، يبقى إيه لزمته؟ آية / يعني إحنا خسرانين إيه؟

منال / على رأيك. النضافة حلوة برضه. هههههههههههههههههههه. في شقة حسام. نور / طب امشوا بكرة طيب. حسام / هو أنا في إجازة؟ أنا هستلم شغل بكرة يعني، يادوب أسافر دلوقتي وأفرش وأنزل أشتري الحاجات الناقصة. نور / طب كنت قولت امبارح، كنت لميت حاجتي ولا. حسام / وتلمي حاجتك ليه؟ شقة طول وعرض في قلب بيروت فيها كل اللي هتحتاجيه، وتلاجتك مليانة، وكل حاجة خطوتين منك. انبسطي. نور / يا سلام.

حسام / الشقة تحت أمرك لآخر الشهر. اتفسحي وانبسطي وقضي هاني مون تاني، إنتِ تستحقيه. حسام يدي لنور ظرف. حسام / خلي دول معاكي. نور / إيه ده؟ حسام / مبلغ صغير، خليهولك يمكن حاجة تعجبك. نور / أنا معايا فلوس. حسام / يا حبيبتي، أنا عارف، بس إنتوا لما هتنزلوا مصر هيبقى وراكوا مصاريف كتير، والعملية اللي عاوزة تعمليها. نور / علي مش هيوافق. حسام / وعلى ماله؟

دي فلوسي وبديها لأختي، مش بديهاله. وإنتي حرة تتصرفي فيها زي ما إنتي عاوزة. تشتري لبس، دهب، تعملي شعرك الحلو ده. حسام يلعب في شعر نور. نور / طب خليهم معاك، يمكن تحتاجهم. إنت هتروح بيت جديد، وأكيد هتنزل تشتري حاجات. حسام / لا ما تقلقيش على أخوكي. الحمد لله، أنا مرتبّي كبير وكمان داخل جمعيات، وعارف أظبط أموري كويس. نور / طب خليهم معاك برضه، ولو احتاجتهم.

حسام / مش هتحتاجيهم، خليهم معاكي. حوشيهم. بصي، لما تعملي العملية وربنا يكرمك بنونو صغير كده شبهك، ابقي سميه حسام. نور / لا دا إنت تاخدهم أسهل. إنت عارف اللي بينك وبين علي. حسام يضحك. حسام / عاجبك فيه إيه ده؟ نور / والله حنين وقلبه أبيض زي الأطفال بالظبط. حسام / ماشي يا أختي، اشبعي بيه. مش إنتي مبسوطة وبيعاملك حلو؟ نور تبتسم وتهز راسها. حسام / هعوز إيه تاني؟ حسام يديها الظرف. ندى تدخل. ندى / إحنا لبسنا.

حسام / وأنا جاهز. ندى تحضن نور. نور / لما تستقروا، هاجي أنا وعلي نقضي معاكوا يوم ونتفسح سوا. ندى / إنتِ تنوري في أي حتة. نور تبتسم. نور / وأكيد هتيجوا تسلموا عليا قبل ما أسافر، مش كده؟ حسام / أكيد طبعاً. بصي، أنا ما بحبش اللحظات دي، بس لازم نلحق الطريق قبل الضلمة. معاكي المفتاح، هنمشي.

نور تحضن حسام وتحضن ندى تاني. يطلعوا من الأوضة. علي قاعد بيلاعب حبيبة جنبه على الكنبة، ومصطفى قاعد على كرسيه. ندى تدخل تشيل حبيبة. عينيها تيجي في عين علي، يبتسم. تبص لحبيبة وتروح تقف جنب حسام. حسام / هنزل الشنطة وأطلع آخد عمي. ندى / هاجي معاك. حسام يشيل شنطتين وينزل، وندى تنزل وراه شايلة حبيبة وشنطتها. نور واقفة في إيدها ظرف. علي / خير، كان فيه حاجة ولا إيه؟ نور / كان بيديني ده. علي / إيه ده؟ نور / فلوس.

علي يعوج راسه ويرفع حاجبه. نور / قالي: "حوشيهم أو هاتي بيهم حاجة." قالي إن دي حاجة بين الأخوات، قالي إنه عارف إنك معاك فلوس ومش مخليني ناقصني حاجة، بس... علي يقوم يقف ويتحرك ناحية البلكونة. حسام يدخل. حسام / ما تساعدني أنزل عمي يا علي، ينوبك فيه ثواب. علي يلف ويرجع يسنده، ونور باين عليها الزعل. في شقة منال. آية وعمر قاعدين في السرير. عمر / أمال نضفتي الشقة ليه؟ آية / ما أنا كنت ناوية أمشي،

بس صعبت عليا لما قالت: "ملّيتوا عليا وحدتي." بس برضه حاسة إننا متقلين عليها، وكمان إنت أكيد مقيد حريتها. عمر / يعني إنتي عاوزة إيه دلوقتي؟ آية / مش عارفة، بس بقول أسيبها لله، على الأقل لحد ما نور وعلي يرجعوا. عمر / إنتي اللي يمشي وراكي يلسع. تخليه يمشي، بيلف حوالين نفسه. آية / أنا!! عمر / إنتي كل يوم برأي. نقعد معاها؟ نمشي؟ لا نقعد؟ لا نمشي؟ لا نقعد؟ أجيبلك وردة؟ آية / تصدق، أنا الغلطانة إني قاعدة معاك.

آية تقوم من السرير. عمر / رايحة فين يا بت؟ آية / أنا الغلطانة إني سايبة قاعدة الأنس اللي بره وجيت أقعد معاك هنا. عمر / طب اطفّي النور وراكي. آية تبرقع. عمر / هقيل حبة بس. آية / تصبح على خير. آية تطفي النور وتطلع وتقفل الباب، وعمر ينام. في شقة نور. علي قاعد في البلكونة. نور تدخل وتحط صينية أكل. نور / حاجة خفيفة كده. علي / جه في وقته، جعان جداً. نور تقعد. نور / إنت زعلان مني؟ علي / ليه؟ نور / إنت عارف.

علي يسيب المعلقة ويبصلها. علي / مش قولتيها بين أخ وأخته؟ نور / والله هو اللي صمّم. علي / يعني إنتي ما خدتيهمش عشان العملية؟ نور / ما إحنا صرفنا فلوسها عشان نيجي هنا. علي يبص على الشارع. نور / أنا عارفة إن ربنا يوسعها عليك كمان وكمان، بس والله هو اللي عرض. علي / وإنتي ما صدقتي. نور / لا والله، هو اللي أصر. وكمان ندى كمان كلمتني وقولتلها لا، وأصرّت.

علي / على فكرة، أنا مقدر موقفك جداً، بس أنا كنت هتصرف. على فكرة، أنا عارف إنك نفسك تعملي العملية، أنا مقدر والله، بس... نور تبصله برجاء. علي يسكت. علي / أنا بقول نرجع ونوفر الفلوس أحسن ما نبعزق الفلوس ونروح ناخد من أخوك. نور / ما هو قالي: "خلي فلوس علي للعملية، واتفسحي بدول وانبسطي." علي يبتسم ويبص على الشارع. نور / خلاص، اللي تشوفه. علي / إنتي طلبتي مني حاجة وأنا رفضت؟ مخلّيكي ناقصة حاجة؟

نور / أبداً والله، هو بس عشان التوقيت. بص، اعتبرهم سلف، ولما ربنا يكرم، هبقى أحطهمله في حسابه مع إيراد الصيدلية. علي / دا مفيش فايدة. نور / خلاص يا علي، اللي تشوفه. نور تسيب الأكل وتقوم تدخل أوضتهم وتقعد تعيط. علي يدخل. علي / العملية دي هتعمليها بكرة الصبح يعني؟ عشان النكد ده. نور / هو إنت ما نفسكش تبقى أب؟ علي / نفسي، بس مش مستعجل، ومش موقف حياتي عليه. نور / طب فيها إيه بس؟ يعني لو عمر كان محتاج فلوس، مش هتديله؟

مش هتقف جنبه؟ وبعدين على رأي ندى، إحنا لما اخترنا بين العملية وبين ندى وحبيبة، جينا جري. فارجوك، لو بجد بتحبني... علي / أنا مش عاوزاله أفضال عليّ. نور تعيط. نور / ليها عليا أنا أخويا، وجمايله عليا من يوم ما اتولدت. أخويا وطول عمره جنبي، ولما كنت بحتاج أي حاجة، كان أول واحد يجري عليا قبل الكل. فيها إيه يعني لما يساعدني أحقق حلمي؟ أنا ما ليش أحلام تانية. عمري ما اتمنيت حاجة غير إني أكون أم. إنت حاسس بيا؟ عارف يعني إيه؟

علي يحضنها. نور / ياريتها قالت: "ما فيش أمل" زي كل الدكاترة اللي قبلها. ياريتها سدتها في وشي وريحتني. الأمل بيوجع، يا علي، بيوجع أوي. علي / الأمل بيحيي. نور / أنا عاوزة أبقى أم يا علي، عشان خاطري. علي / لو بإيدي ما اتأخرتش، بس دا رزق من ربنا. إحنا بس علينا السعي. نور / طب خد الفلوس، ونعمل العملية، ونبقى بنسعى. علي / يعني اتفسح في لبنان وأصرف فلوسي، وأستلف من أخوك؟ نور تمسح دموعها. نور / أنا هدخل ألم هدومي.

علي / مش النهاردة. نور تبصله. علي / خلينا يومين كده. نور / وإيه الفلوس؟ علي / إنتي مالك بالفلوس؟ هو مين فينا راجل البيت؟ أنا ولا إنتي؟ بصي يا نور، دي الناهية. هنتفسح شوية، وهننزل مصر، نروح نحدد معاد العملية. والفلوس اللي خدتيها من أخوكي، تاخديها ترجعيها، تولعي فيها، ما يخصنيش. لا تتصرف على بيتي ولا عليكِ. نور / ما أنا ساعات بصرف من مرتبّي. علي / ليه؟ ما بديكيش مصروف؟ لو ما بيكفكيش، ما بتقولليش ليه؟ أزودك.

نور / امال أنا بشتغل ليه؟ علي / بتتسلي، بتضيعي وقت. نور / يعني لو إنت محتاج، ما أديكش؟ علي / لما أحتاج، بس الحمد لله، أنا مش محتاج. نور / على فكرة، إنت أوفر أوي، ومش حوار رجولة وقوامة والكلام ده كله. حوار حسام، وإنت قولتها. افرض خدتهم من بابا، كنت هتعمل كده برضه؟ علي / أنا جعان. نور / روح كل. علي / تعالي، افتحي نفس. نور / ماليش نفس. اعتبر إن بابا أخدتهم من حسام وأداهملي. علي / ما خلاص بقى يا نور.

نور / والله العظيم حسام ما قالي أعمل بيهم العملية. قالي: "اشتري بيهم اللي نفسك فيه عشان ما تقلّيش عليا في مصاريفي، وكفايا عليكي فلوس العملية." والله حسام مش وحش زي ما إنت فاكر. وبعدين حسام ولا أي كان اللي هتتصرف منه، ما كلها فلوس حلال. علي يبتسم. علي / بحيّيكي على إصرارك، حقيقي. لا بتتعبّي ولا بتزهقي. نور تسكت. علي / ماشي يا نور، اعملي اللي يريحك. خدي الفلوس واصرفيها زي ما إنتي عاوزة، بس من باب الفضول، ممكن أعرف كام؟

نور تروح تجيب الظرف وتديه لعلي، وتبص له برجاء. في شقة حسام. حسام وندى بيتفرجوا على التليفزيون. حسام يبص في الساعة. حسام / أخد الفلوس وما اتكلمش، يعني... ندى / ما يمكن ما قالتلوش. حسام / دي نور يا ندى، ما بتتبلّش في بقها فولة. قالتله بمجرد ما نزل. ندى / هو إنت اديتها الفلوس عشان يتخانقوا؟ حسام / أكيد لأ. ندى / امال في إيه؟ مش فاهماك. حسام / لا فاهمة. سي زفت ودور الهلالي اللي عايش فيه. ندى / إنت حاطه في دماغك ليه؟

نور مبسوطة معاه، سيبهم. حسام / وأنا عملت إيه؟ ما أنا اديتها الفلوس عشان يخلفوا ويتربطوا ببعض أكتر. ندى / امال إنت مستني إيه؟ حسام / مستني أوريكي إنه حتى لو الفلوس مني، هياخدوها. ندى / وإنت توريني ليه؟ وبعدين الفلوس منك دي مالها؟ فلوس حرام؟ هي أخ مدّي لأخته فلوس، فيها إيه؟ حسام / ما فيهاش. هقوم أعمل حاجة نشربها. ندى / ياريت. حسام يبص لندى ويقوم، وهي عينها على التليفزيون مش معاه. في مصر.

عمر سايق عربية ومنال جنبه، وآية والعيال ورا. آية / ما قولت نستنى معاد المتابعة؟ ما قالتش جديد. منال / ادينا اطمنا، والدكتورة كمان عرفت الحالة وهتعرف تتابع. آية / ماشي، هتفسحونا فين بقى؟ تليفون عمر يرن، يبص فيه. منال / ركّز في الطريق. عمر / دا علي. منال تاخد الموبايل. منال / هات، أنا أرد عليه. علي / أحلى الو، دي ولا إيه؟ منال / يخليك ليا. أوعى تنسى الزعتر اللي قولتلك عليه. علي / جبته طبعاً، ودي حاجة تتنسى؟

منال / ربنا ما يحرمني منك، لا إنت ولا أخوك. معلش أصلُه سايق. علي / إحنا راجعين مصر بعد بكرة. منال / بالسرعة دي؟ علي / آه، ما خلاص، بصي القاعدة ملهاش لازمة. هنتفسح يومين ونروح. منال / تنوروا. علي / قولت أقول لعمر عشان يفضي نفسه يجبني من المطار ويفضيلي نفسه عشان محتاجه في حوار. منال / هقوله. علي / أخبار يس ونغم إيه؟ قوليلهم جبتلهم حاجات حلوة أوي. منال / تعيش وتجيب. بابا علي جابلكوا حاجات كتير أوي، وهييجي بعد بكرة.

يس / أنا مخاصم. آية / يسيس! يس يربع إيديه مقموص. منال / تيجوا بالسلامة يا علي، وأخبار نور إيه؟ علي / في الحمام. لما تطلع هخليها تكلمكم. منال / ملوش لازوم، كفايا اطمنت عليها. آية / ندى كلمتهم؟ منال / كلمتوا ندى؟ علي / آه، حسام راح الشغل وهيّجيب أكل وهو راجع، ومش ناقصهم حاجة الحمد لله. منال / الحمد لله. علي / هستأذنك أقفل لو مش عاوزين مني حاجة. منال / مع السلامة، خد بالك من نفسك ومن مراتك. علي / في عيني. سلام.

منال / سلام. منال تقفل. منال / ينفع اللي عملته ده يا يسيس؟ يس / عشان يسافر من غيري. آية / بس هو ما كانش مسافر يتفسح يا يس. منال / وبعدين إنت زعلان إنك قاعد معايا ولا إيه؟ لحقت تهضم الكب كيك اللي عملتهولك. يس / إنتي أصلاً عملاه فانيليا، وأنا بحب الشيكولاتة. منال / عدّي بينا يا عمر نجيب كاكاو نعمله كب كيك، يمكن يرضي عليا. نغم / أنا بحب الفانيليا عادي. آية تحضن نغم. آية / وأنا بحبك حب مش عادي. في شقة ندى.

حسام يفتح الباب ويدخل شايل كيس. الدنيا هادية جداً وإضاءة بسيطة. يحط الكيس على السفرة، ويدخل الأوضة يلاقيها فاضية. يتخض ويطلع يجري. يقابل ندى خارجة من المطبخ شايلة حبيبة نايمة على كتفها. حسام / ندى. ندى / كنت بطفي على اللبن كان هيفور. حسام / وشايلة حبيبة كده ليه؟ وفين عمي؟ ندى / بابا نايم في أوضته، وحبيبة نامت على كتفي. في المطبخ، هدخلها أوضتها. حسام / هاتيها عني.

ندى تشيلهاله. يدخلها الأوضة ويطلع. يلاقي ندى فتحت الكيس وبتطلع اللي فيه. حسام / آسف على التأخير، أول يوم بقي وكده. ندى / ربنا معاك. حسام / نور حجزوا تذاكر العودة بعد بكرة. لو تحبي تيجي معايا. ندى / ملوش لازوم. بابا وحبيبة هيتعبوا طريق رايح جاي. حسام / هوصلهم المطار وأسلم الراجل الشقة وأرجعلك. ندى / تمام. عملتلي إيه في حوار الدراسة؟ حسام / كلمت واحد صاحبي في مصر هيسألك وهيرد عليا بكرة، وعلي كمان هيسألك.

ندى / وماله علي؟ بينا. حسام / ملوش، هو اللي قال: "الكلام جاب بعضه." يعني. ندى / تمام، بس خليك فاكر إنت اللي بتجيب سيرته مش أنا. حسام / دا جوز أختي يعني. سيرته عمرها ما هتنقطع. أمر واقع ومفروض عليا. ندى تبتسم وتأكل. حسام / بخصوص الشغل. ندى تبصله. حسام / ما كنتيش عاوزة شغل؟ ندى / فكرت فيها، لقيت إن صعب مع حبيبة وبابا.

حسام / لا، فيه شغلانة حلوة وتتعمل من البيت. الشركة عندنا فيها منتجات تجميل كتير، هخليكي تسوقيها، ولكي عمولة حلوة. ندى / أنا ما أفهمش في الشغلانة دي. حسام / ولا بتفهمي في غيرها، بس سهل تتعلميها. يعني... ندى تبص لحسام. حسام / دا اللي قدرت عليه. لو مش عاوزة، ريحتي. ندى / لا، عاوزة. حسام / تمام، ناكل ونفتح اللاب ونعملك الصفحة، وأعلمك تعملي كل حاجة. ندى / تمام. حسام / بس هتعمليلي قهوة. ندى / هعملك. حسام / كلي بقين.

ندى تبتسم وتأكل. في شقة نور في مصر. أماني / ألف مليون حمد الله على السلامة، نورتوا بيتكوا. بس مش كنتوا قعدتوا يومين تلاتة كمان؟ علي / عشان نور تولع في بنات لبنان. نور / إيه؟ علي / كنا ندخل الكافيه من هنا، تيجي بنت تستقبلنا من هنا. نور تتشال وتتهبد من هنا. نور / إيه؟ علي / يعني ما كانوش ماصين أوفر؟ ليلى / لا، ما هو علي يتغير عليه عادي. أماني / تلاقيه كان بيسايرهم. علي / أنا!!!

طب والله أبداً، بس ما أنكرش إني كنت ببقى مستمتع. أصل نور غيرتها عسل أوي. نور / مش غيرة، بس كنت بضايق من مياصتهم. ما أنا ممكن أتمايص عادي على فكرة. ليلى / وإيه اللي حايشك؟ آية / وتتمايصي في بيتها؟ إنما قدام الناس... علي / يا جماعة، مش بيتمايصوا، بس هما مش زينا يعني، عادي. وبعدين ادينا سبنالهم البلد بحالها. عمر / المهم انبسطتوا. نور / أكيد طبعاً. الجو والمناظر والطرق، حقيقي كل بلد وله سحره وجماله اللي بيميزه.

منال / سبحان الله. علي / مش عارف ليه نفسي هفّتاني على حلويات شرقية. عمر / ومين سمعك؟ تعرف أنا أول امبارح جبت طبق حلويات مشكل. اسألهم عليه. آية / فعلاً كان حلو أوي. علي / طب قشطة، قوم دلني عليه. نور / ما تطلبوها ديليفري يعني. عمر / بصي، أنا عارف مكانه، إنما اسمه... كان إيه يا آية؟ مش فاكرة؟ آية / كان تقريباً لارونا؟ لامونا؟ عمر / لامونا إيه؟ يلا يا ابني، كان زمانا وصلنا. آية / ما تبقاش تستلني تاني.

منال / هاتلي بقلاوة يا علي. علي / عيني، مش هنتأخر. علي وعمر ينزلوا. آية / طب على فكرة بقي، لا حكاية حلويات ولا نيلة. دول عاوزين يستفردوا ببعض. منال / ياختي، ما تسبيهم. خليهم يفكوا سوا، وإحنا نفك إحنا كمان. فكّي النقاب، فكّي كدا، وخلينا ناخد راحتنا. نور / امال بابا لسه ما جاش لحد دلوقتي؟ أماني / راح لعمتك النهاردة. أروى جايلها عريس، وعمتك عاوزاه يقعد معاهم. آية / والعريس عارف إن عمي كان حمى أروى؟

أماني / في الأول والآخر عمها. والعريس عارف طبعاً إن أروى اتطلقت. منها لله اللي كانت السبب. نور / منه لله اللي... منال / آية... قومي ساعدي نور تعملنا شاي. آية / قمت. آية ونور يدخلوا المطبخ. أماني / أنا مش فاهمة، قلة الأدب دي. منال / بقولك إيه يا أم حسام، فكّيها كدا. إنتي عارفة الحمل وعمايله. أماني / خليكي كده دافعي عنها. لما تمريعيها أكتر ما هي ممروعة. منال / دي غلبانة. أماني / والله ما غلبان إلا إنتي.

أماني تقوم تفتح البلكونة. ليلى / يلاهوي، ربنا يهدي. منال / هههههههههههههههه. في شقة ندى. حسام يدخل شايل كيس من محل لبس أطفال. ندى قاعدة بتشتغل على اللاب. حسام / مساء الخير. ندى / حمد الله على السلامة. أغرفلك تاكل؟ حسام / ياريت. ندى تقفل اللاب وتقوم تروح المطبخ. حسام يروح يقعد ويحط الكيس جنبه، ويفتح اللاب ويراجع اللي ندى كانت بتعمله. ندى تدخل شايلة صينية، تحطها جنب حسام. ندى / كنت بشتغل زي ما علمتني.

حسام / ما أنا بشوف أهو. ندى / بس ما فيش حد عبرني. حسام / وإنتي لحقتي تدّي لنفسك فرصة؟ هقوم أغير. حسام يقوم يدخل جوه. حبيبة تصحى. حسام / قلب بابا. حسيتي بيا؟ وحشتك صح؟ ندى تدخل تلاقي حسام شايل حبيبة. ندى / هاتها عنك. حسام / سبيها. أنا أكيد واحشاها. أول ما شمت ريحتي صحيت. بصي بتضحكلي إزاي. ندى تبتسم. حسام / صحيح، البت حبيبة أبوها... إنتي حبيبة بابي، إنتي قلب بابي. ندى / الأكل هيبرد كده. حسام / صحيح، افتكرت. تعالوا.

حسام يطلع في الصالة، ندى وراه. حسام يديها حبيبة، ويفتح الكيس يطلع فستان أبيض منفوش. حسام / في فرح زميل لينا يوم السبت. حسام يمد إيده في الكيس يطلع جزمة لحبيبة. حسام / هتبقي أحلى من العروسة نفسها. ندى / الفرح في بيروت صح؟ حسام / لا، هنا. ليه؟ ندى / مفيش. إنت جايب لحبيبة بس، فقولت هتاخد حبيبة لوحدها يعني عشان... إنت فاهم أنا وهدايا وكده. حسام / إنتي وهدايا إيه؟ ما هي ممكن تيجي الفرح هنا عادي. ندى تهز راسها.

حسام / وبعدين إنتي مالك بيها أصلاً؟ أي كان حوار وانتهى. لو مش عاوزاني أروح... ندى / لا، أبداً. بالعكس، فرصة تغير جو. حسام / وإنتي؟ مش هتغيري جو معانا؟ ندى / ما أعرفش. إنت عاوز إيه؟ حسام / فهمت. كل ده عشان ما جبتلكيش فستان جديد صح؟ أنا قولت إن عندك كتير، ما حدش شافك بيهم، بس لو عاوزة واحد جديد، فممكن ننزل بكرة أنا وإنتي ننقيلك فستان حلو زيك كده. ندى / لا، عادي، هبقى أشوف حاجة مناسبة من اللي عندي.

حسام يحط الفستان والجزمة في الكيس، ويقعد ياكل، وندى تاخد الكيس جوه. على قهوة. عمر / أنا مش مصدق اللي بسمعه. علي / كان لازم أسافر وأشوف بعيني عشان أقتنع بكلامك. عمر / كل شيء نصيب، والرضا عبادة. علي / كان فيه جوايا أمل إن الأيام تدور وربنا يعوضني عن الأيام دي ويجمعنا. عرفت إن الأمل ده زي السم، بيسود حياتي، هيخسرني نور ويخسرها حبيبة وحياتها. كان لازم أقتل الأمل ده جوايا. أنا وندى عمرنا ما هنكون لبعض.

عمر / بس ربنا عوضك بنور بتحبك وإنت بتحبها، ومش بس كده، عوضك عن الأطفال باتنين مفيش زيهم. علي / الحمد لله. صدقني، بصلي كل يوم ركعتين شكر عليه. عمر / خد بالك، اللي جواك ده شيطان. شيطان بيوهمك إن ندى هتقدر تديك اللي ناقصك. بيخليك مش شايف النعمة اللي في إيدك، فتبتر عليها وتزول من وشك. علي / كل ده فهمته في السفرية دي، بس أنا ما كنتش بعمل ده لنفسي. أنا ما كنتش قادر أشوفها بتتعذب. عمر / ما فيه ستات كتير عايشين عشان العيال.

علي / ما اترددتش ثانية تنهي حياتها لمجرد إنها بعدت عن حبيبة. ما فكرتش مرتين قبل ما تقطع شرايينها. عمر / ضعف إيمان يا علي. ربنا يهديها. علي / نور مرة قالتلي إن اللي بينتحر مش شرط يكون كافر، ممكن يكون مريض ومش في وعيه، وإن الاكتئاب مرض خطير ممكن يخلي الإنسان يعمل حاجات مش مسؤول عنها، يأذي نفسه من غير ما يحس. عمر / بتتكلم عن عبير تقصد؟

علي / حياة صعبة وفيها شعاع أمل بسيط، خيط رفيع رابط بالدنيا وعايش عشانه، وفجأة ينقطع. تسود الدنيا في عينيك لحظة إنت فيها لوحدك، مش لاقي إيد تتمدلك. عمر / ما دا برضه ضعف إيمان يا علي، لما توقف حياتك على حاجة أو على شخص. إنك تستنى مساعدة من بشر. علي / إنت مش مكان حد عشان تحكم عليه.

عمر / معاك حق. دا أصلاً مش موضوعنا. بص، خلينا نتفق إن كلكم طلعتوا كسبانين من الرحلة دي. ندى حبيبة في حضنها، ومفيش حاجة ممكن تكون عندها أهم منها. وحبيبة بين أبوها وأمها. وإنت ونور بتحبوا بعض وحياتكوا مستقرة ومش ناقصكوا أي حاجة الحمد لله. حتى حسام معاه مراته وبنته. علي / فاكر الفيلم بتاع البت السمرا دي؟ الفيلم الكرتون بتاع الأميرة الضفدعة دي؟ عمر / آه فاكره، ماله؟ علي / الساحرة العجوزة

العامية كانت بتقولهم: "اللي إنتوا محتاجينه، مش اللي إنتوا عاوزينه." عمر / أيوه صح. وإنتوا كل واحد أخد اللي محتاجه. مش شرط يكون هو هو اللي كان عاوزه، بس دا اللي إنتوا محتاجينه. علي / هتقدر جامعة أونلاين وتدرس وتاخد شهادة وتشتغل وتقف على رجليها عشان ما تبقاش محتاجة لحد. هتعوض اللي فاتها من حياتها. عمر / جدعة. دا نفس اللي بقوله لآية. ما ينفعش حياتنا تقف مهما كانت المحنة. علي / بخصوص آية، لسه بتسأل عن أسماء. عمر يتنهد.

علي / فترة وهتنسي. خليها تختلط أكتر بناس تانيين. عمر / ما أنا كنت فرحان بأسماء، وقولت هتختلط وتطلع للدنيا تاني. ربنا وعدنا باللي قفلها في وشنا ورجعنا نقطة الصفر تاني. علي / اللي حصل مش شرط يتكرر. عمر / ومش شرط اللي يعرف الماضي يستر. زي أستاذ شريف، ممكن يعمل زي جيران الهنا، بدلوا الفيديوهات بينهم وبين بعض وحاولوا يبتزوها. علي / في كل مكان ولاد الناس وولاد الكلاب.

عمر / بقولك إيه، ما تيلا بينا بدل ما زمانهم افتكرونا طمعنا في الحلويات وأكلناها. علي / هههههههههههه، فصلتني. قوم قوم. علي يقوم يقف ويشاور للقهوجي، وعمر يقوم ويعدل هدومه. في شقة ندى. ندى قاعدة شغالة على اللاب. حسام يطلع من الأوضة يروح يقف وراها ويعملها مساج في رقبتها وكتافها. تبصله مبتسمة وباصة له. حسام / حبيبة نامت، وعمي نام. ندى / هخلص حاجة كده وأنام.

حسام / ما افتكرش إنها ماينفعش تتأجل للصبح. كفايا شغل كده عشان عينيكي. ندى تبصله. حسام / كفايا كده، قومي ارتاحي. ندى تقفل اللاب، تقوم معاه، ويدخلوا الأوضة. حسام يقفل الباب. في شقة علي. يس / يعني مش هتسافروا تاني؟ علي / لو هنسافر تاني، هناخدك معانا. يس / وعد. علي / والله يا يسو، ما كنا مسافرين نتفسح، ولا قدرنا نقعد بعيد عنكوا. اضطرينا. يس / أنا مش بحب أبقى كل يوم في بيت.

علي / حقك طبعاً، بس تيتا منال مش حد غريب، وعموا عمر وعمتوا آية بيحبوك زي ما بحبك بالظبط. يس / وأنا كمان بحبهم، بس بحبك أكتر. علي يبوس راسه. علي / وأنا والله بحبك أوي يا يس. نور تدخل هي ونغم، علي يساعد نغم تنام في السرير. نور / بكرة بإذن الله هنروح الملاهي، لو ما وراكش حاجة. علي / بكرة صعب شوية، ممكن بعد بكرة؟ يس / بعد بكرة تمرين. علي يبص لنور. علي / هحاول أظبط أموري. سيبوها لله دلوقتي. وقت النوم. تصبحوا على خير.

نغم / وإنت من أهله. يس / وإنت من أهله. نور تطلع بره، وعلي وراها. يوارب الباب ويطفّي النور. نور / صالحته؟ علي / هحاول أخلص اللي ورايا بدري بدري وأجي على المغرب كده نخرج ونتعشا بره. نور / حلو جداً. هستناك تكلمني نلبس. علي / اتفقنا. دلوقتي بقي وريني السرير فين، لحسن بسقط. نور تبتسم وتروح هي وعلي أوضتهم. يوم السبت في أوبن أريا.

عريس وعروسة ومعازيم وهدايا. هدايا لابسة فستان نبيتي غامق قصير. تيبست قاعدة على ترابيزة مع عدنان وناس. حسام يدخل. مانج ندى لابسة فستان أسود سمبل، وحسام شايل حبيبة. حسام / مستر عدنان قاعد هناك، ولازم أروح أسلم عليه. ندى / وهدايا كمان هناك. حسام / تمام، هنروح نسلم سوا، تمام؟ ندى / تمام، بس مش هنقعد معاهم. حسام / تمام. حسام وندى يروحوا ناحية عدنان. عدنان يقوم يقف. عدنان / يا الله يا الله، شو هالحلا؟ شو هالجمال؟

محلاها الصغيرة، الله يبارك فيكن. حسام / ميرسي. هدايا / هاي ندى. ندى / أهلاً. هدايا / حلو الفستان، ما رفعك. ندى / هي الغوامق كده بترفع، مش إنتي لابسة نبيتي عشان كده برضه؟ هدايا / تؤ، عشان لون الدم. عدنان / إي صبايا؟ هيدا عرس، ما فينا نختلف على لون الفستان. تنيناتكن بتاخدوا العقل، تقبرني طلاتكن. حسام / هستأذنك نروح نقعد هناك. عدنان / شو؟ ما فيك تقعد حدّي هون؟ بكفايا حارمنا من هالطّلة، بيكفينا هيك. شو ساعة؟

ست الصبايا، لو تاذني. عدنان يبص لندى. ندى تقعد. حسام يعدلها الكرسي ويقعد. ندى وهدايا يبصوا لبعض. شاب يدخل يحط عصير لندى وعصير لحسام. عدنان / شو، مرتاحين هون عن بيروت؟ ندى / هنا أنضف، أقصد الجو وكده. حضرتك عارف الزحمة والتلوث بقى. عدنان / بدي شي يوم آخدكن عالضيعة، منظر بياخد العقل. والله بنقضي أحلى يوم وبننبسط. حسام / أكيد بإذن الله. عدنان / شو يا ست الصبايا؟ إمتين ما بدك تنوريني؟ ندى / عادي، وقت ما تحبي.

هدايا / إيه رأيك نروح في الويك إند؟ ندى / هو إنتي جاية؟ عدنان / فيه ناس حياتي ما بتمشي بلاهم، هدول. مانهم ناس، هدول هدايا. هدايا / ههههههههههههههههه. عدنان / ما رح تلاقي متلها، بتنظيم الأمور، شغل، مواعيد، حتى أواعيي بتظبط لي ياهم. ندى / آآآه، لا، كدا بانت طبعك. ندى تبص لحسام. ندى / بتتعبّي أوي إنتي يا هدايا؟ هدايا / تصدقي، حسام كان بيقول لي كده طول الوقت.

ندى / بس يا خسارة، بتتعبّي على الفاضي. يعني مثلاً، البدلة اللي حضرتك لابسها يا مستر عدنان. عدنان يبص على بدلته. ندى / المنديل والجرافة مش لايقين خالص. فاقعين ومبهدلين. أكيد دول ذوق هدايا، صح؟ عدنان / إي صح، بس مانهن هيك أبداً. شوفي المنديل كيف لون الزهرة اللي بالجرافة. هدايا / صحيح يا ندى، هو السواد اللي تحت عينيكي ده إرهاق ولا حاجة تانية؟

ندى / ضعف من الرضاعة، بس ما تقلقيش. حسام ما سكتش، أخدني لدكتورة وعمل اللازم، وادتني فيتامينات، إن شاء الله تجيب نتيجة. هدايا / لو تحبي، أنا ممكن آخدك التويلت خمس دقايق أضيعهولك خالص. واضح إن نوع المكياج اللي بتستخدميه مش حلو. ندى / لا والله، دي كلها براندات. حسام ما بيستخسرش فيا حاجة، بس أنا بقي اللي مش بعرف أستخدمها. أصلي مش بستخدمها كتير. إنتي عارفة بقى الجواز والأمومة بياخدوا كل وقتي.

حسام / إنتي أصلاً حلوة حتى من غير أي مكياج. حسام يبوس إيدها. ندى تبتسم لهدايا. عدنان / أنا بالأصل ماني شايف أي سواد تحت هدول اللآلئ، بس أنا بعرف النسوان، فيهم يطلعوا أدق أدق تفاصيلك. فما فيني أدخل، اعذروني. هدايا / إيه ده؟ سلامتك. حسام / جرح بسيط، عدّت الحمد لله. هدايا / الحمد لله. وانتوا بقى هتفضلوا قاعدين لينا كده؟ الكل يبص لبعضه بصدمة. هدايا / أنا هقوم أرقص. دا فرح، هاف فن. عدنان / هههههههههههههه.

هدايا / تحب تيجي معايا؟ عدنان / بتقبرني بهيدا الحكي. عدنان يقوم مع هدايا، وهي بتشاور لندى باي. ندى / هو إحنا هنطول؟ حسام / ليه؟ وهو إنتي قصرتي؟ دا إنتي طلعتي فتاكة. أنا ماسك نفسي عن الضحك بالعافية. ندى / وأنا ماسكة نفسي عن إني أجيبها من شعرها بالعافية. حسام / بموت أنا لما بتغيري عليا كده. ندى تبصله. حسام / ما تيجي نرقص. ندى / قدام الناس كده؟ حسام / دا سلو يعني، مش حوار. هو أنا بقولك ارقصي بلدي؟ ندى / وإيه ماله؟

دا اللي ناقص. حسام / تصدقي، عندك حق. دا اللي ناقص فعلاً. لما نروح نبقي نكمله. ندى / هو إيه ده؟ حسام / إنك ترقصيلي. فاكرة لما رقصتيلي في مصر يوميها؟ جننتي أمي. ندى / هروح الحمام. ندى تقوم. حسام / تحبّي أوصلك؟ ندى تسأل واحد من الوترز يشاورلها تمشي، وحسام متابعها بعينه. هدايا وعدنان يرجعوا. عدنان بيضحك وبينّهج، وهدايا ساحباه من الجرافته وماشية بتترقص قدامه. عدنان / وينها ست الغوالي؟ حسام / راحت الحمامة.

هدايا / ربنا يسهلها. حسام / خفّي، إيه مالك؟ عدنان / حسام، شو حكينا؟ شو حكينا؟ حسام / أنا بتكلم عليها. ندى عارفة اللي كان بينا، يعني كل كلمة هتقوليها هتفسريها إنك غيرانة منها. هدايا / هتقول غيرانة منها تاني؟ عدنان / يا حسام، هدول نسوان مع بعض، ما فينا نحن ندخل. حسام / بشوقك. ندى تدخل تقعد. هدايا / الحمام عامل إيه؟ ندى / السيتر اللي إنت جايبه، يقعد مع بابا. اتصل. حسام / خير. ندى / بقول نروح بقى.

حسام / تمام. معلش، أصل عمي قاعد، فكنت جايبله حد يقعد بيه، بس شكله مش عارف يتعامل. اهو بنخبط لحد ما نعرف الناس الكويسة اللي هنا. عدنان / هستناكم في الويك إند. حسام / بإذن الله. عن إذنكوا. حسام يانج ندى ويروحوا يسلموا على العريس ويمشوا. وعدنان متابعها. هدايا / لو عاجباك، ما تقوم وراها. عدنان / وليش أروح وراها؟ وهي فيها تيجي حدّي؟ هدايا / ما افتكرش. عدنان / لو ما فيها لحالها، تخلص من حسام، مين غيري يقدر يخلصها منه؟

هدايا / مش دا حسام اللي قولت محتاجه في الشغل دلوقتي؟ هتبيعه عشانها؟ عدنان / كتير بضعف قدام هيك طباع. حامي. هدايا / إنت كده بتلعب بالنار. عدنان / أول مرة ولا شو؟ خلينا عم نتسلى. هدايا تبص الناحية التانية وتقوم. هدايا / هقوم أسلم على صحباتي هناك. عن إذنك. عدنان / فيكي تجيبيهن هون؟ بنتعرف أحسن ما تتركييني لحالي. كتير قاسية هيك وحدة. هدايا / هههههههههههههه. دا إنت مسخرة. في شقة أماني. أماني / يعني هتروحوا لوحدكوا برضه؟

نور / هتيجي معانا تعملي إيه بس؟ هي لمة على الفاضي. أماني / وهتودّي العيال عند منال برضه؟ نور / هتقعدي بيهم يعني؟ أماني / لا، مش فاضية. هنزل مع عمتك نشتري حاجات لجهاز أروى. نور / امال كنتي هتيجي معايا إزاي؟ أماني / كنت هعتذر لها طبعاً. نور / لا إله إلا الله. ماشي يا ماما. أماني / لو عاوزاني أقعد بيهم، ممكن أعتذر لعمتك. نور / لا، خليكي مع عمتي أحسن. كدا كدا أنا رتبت مع طنط منال خلاص.

أماني / أحسن. ما فيش أخبار البت آية دي حامل في واد ولا بت؟ نور / لسه بدري أوي يا ماما. أماني / ليه؟ هي في الكام؟ نور / في الشهور الأولى لسه. مش هو بيبان في السادس باين؟ أماني / ساعات بيبان قبل كده، على حسب. بقولك إيه، ما تشغليش بالك، وركزي بس في اللي إنتي فيه. نور / حاضر. في شقة منال. منال / وإنتي يعني لازم تسيبي كل حاجة لآخر يوم؟

جابلك الورق، ابدئي ذاكري أول بأول. تيجي بقى أيام الامتحانات تكوني هتولدي ولا تعب الحمل زايد عليكي، ما يبقاش وراكي حاجة. آية / ما أنا ذاكرته والله. منال / لحقتي؟ دا لسه جايبهولك امبارح. آية / هو جايبلي مجلد؟ دا حياله ملزمة أربع ورقات. منال / هو أنا هقدر عليكي؟ اعملي اللي يريحك. آية / ههههههههههه. طب والله ذاكرتهم. تحبي أجيبلك الملزمة تمتحنيني فيهم؟ منال / وأنا أفهم في التجارة عشان أمتحنك؟

لما جوزك ييجي، يبقي يمتحنك هو. جرس الباب يضرب. منال / اهو جه. قومي افتحي على ما أعدّل طرحتي. آية تقوم تفتح. عمر يدخل. عمر / ما تقولوش محشي. منال تقوم تقف. منال / قول سلام عليكوا الأول. أه، محشي وسخن. حماتك بتحبك. هروح أغرفلك. آية الحزن يملأ وشها. عمر / ربنا ما يحرمني منك أبداً. منال تدخل المطبخ. عمر يشوف آية. عمر / مالك؟ آية / مفيش. ادخل وأنا هساعد طنط في الغرفة. عمر يبصلها. آية تسيبه وتمشي. في الويك إند.

حسام / إنتي بتتكلمي جد ولا بتهزري؟ ندى / قوللهم حبيبة تعبت فجأة، بابا تعب، أنا تعبانة. حسام / وهو طبيعي تبقوا تعبانين وأسيبكوا وأروح؟ ندى / طب ما تعتذر يا حسام. اعتذر أحسن. ولا إنت مش قادر تبعد عن هدايا؟ حسام / هدايا إيه وزفت إيه يا بنتي؟ إنتي ليه مش فاهمة؟ مستر عدنان هنا، الكل في الكل، وله علاقات. ندى / مستر عدنان ده راجل مش كويس. حسام / وإنتي تعرفيه عشان تحكمي عليه؟ ندى / هي هدايا دي مش بنتُه؟

يقوم ويرقص ويتمصخروا على بعض. حسام / هنا غير مصر. الناس هنا أوبن مايند. ندى / يعني أنا بدل ما آخد مراتي فرح، آخد هدايا؟ وبدل ما أقضي الويك إند مع مراتي وعيالي، أقضيه مع هدايا؟ أنا متأكدة إن فيه حاجة بينهم. حسام / وإحنا مالنا؟ ندى / لأنه لو عرف إن كان فيه حاجة بينكم. حسام / هي مراته عشان يغير عليها؟ ما هي مدوراها مع نص الشركة. ندى تبصله باستغراب. حسام / استهدى بالله وقومي البسي. ساعتين زمن هنغير جو ونرجع.

ندى / مش عاوزة أروح. روح لوحدك لو عاوز. حسام / تمام يا ندى. في النادي. آية / يعني الدكتورة قالتلك تتعاملي عادي؟ نور / مش عادي أوي يعني، بس يعني ما أشيلش حاجة أو أبذل مجهود، بس مش هفضل في السرير يعني. آية / أصلاً مين يقدر يستحمل يفضل في السرير طول الوقت ده؟ نور / اديكي قولتي. آية / وهتعرفي إنك حامل ولا لا إمتى؟ نور / هههههههههههه، لسه شوية. آية / أنا زهقتك بأسئلتي صح؟ نور / أبداً، ياريت كان عندي إجابة لكل الأسئلة دي.

آية / معاكي حق. نور / إنتي وندى صحاب من زمان؟ آية / لا، لما اتجوزت عمر... بتسألي ليه؟ نور / أصلها كانت زيك كده زمان، بتسأل كتير أوي، وفي كل حاجة، ورا بعض ورا بعض. آية / هي ندى أصلاً تتحب منه لـ... آسفة. نور تبتسم. آية / أنا بقي من يوم ما عرفتها وهي مكسورة وحزينة وشايلة الهم. غيري السيرة، غيريها.

نور / حسام قال لندى إنه هيطلقها، وندى رفضت. وقبل ما تقولي أي حاجة، ما كانش هياخد منها حبيبة ولا أي حاجة. ندى اختارت حسام بكامل إرادتها. آية / يا ترى ليه؟ بقولك إيه، مش قولت غيري السيرة؟ نور / الولاد خلصوا التمرين. تحبي تقعدي شوية ولا نروح؟ آية / اللي تعوزوه. أنا عادي. يس ونغم يدخلوا. نور / أهلاً أهلاً بالابطال. في شقة ندى تاني يوم. جرس الباب يضرب. ندى تروح تفتح، تلاقي عدنان ماسك ورد. عدنان / شو؟ ما فيني أدخل ولا شو؟

ندى / اعذرني حضرتك، أكيد عارف إن حسام في الشغل دلوقتي. عدنان / ما خطر ببالي إنه راح يسيبكوا لحالكوا بهيك ظروف، ويهتم بالشغل. ما تاخذيني، أنا جاي من بيروت على هون، بس بعرف إن الوالد موجود. ندى تبتسم بحرج وتفتح الباب. عدنان يدخل ويقعد. عدنان / بعرف إني جاي بدون موعد، بس أنا هيك كنت مفكر حالي مو غريب. ندى / أكيد طبعاً. تشرب حاجة؟ عدنان / كاسة ماي. ما فيني أتعبك. ندى / تعبك راحة. ثواني. ندى تروح أوضة أبوه.

ندى / معلش يا بابا، هتعبك، بس مدير حسام بره، وكنت عاوزاك تقعد معاه. ندى تساعد مصطفى يقعد على الكرسي وتزقه بره، وتقفل الباب. ندى / بابا، الأستاذ مصطفى، عم حسام. عدنان يقوم بسرعة يساعدها. عدنان / تعبتي حالك، كان فيني أنا أدخله. لا تؤاخذني يا غالي. مصطفى يبتسم.