رواية سلف و دين الفصل الثاني والأربعون 42 - بقلم لولو محمد

على / يعني استنى أما تموت في إيده على ما باباكي يدخل، انتي مش سامعاني؟ نور / سامعة والله، بس انت ما ينفعش تدخل، انت مالكش دعوة. على / دي لو كلبة في الشارع بتصرخ بالمنظر ده هجري عليها. أوعى. على يزق نور ويفتح الباب وينزل، يلاقي محمد بيخبط على الباب. محمد / افتح يا حسام بدل ما أكسر الباب، افتح… على! إيه اللي نزلك؟ صوت صريخ ندى يختفي ويفضل صوت صريخ حبيبة. محمد / اطلع لعروستك يا على وأنا هدخله. على / ما فتحش. محمد / سكت.

على / ما يمكن جرالها حاجة، سكوتها لوحده مرعب. على بيرزع على الباب مفيش حد يفتح، على يبص لمحمد ويخبط الباب بكتفه، محمد يخبطه معاه لحد ما يتفتح ويدخلوا يلاقوا مصطفى نايم على وشه في الطرقة بيحاول يزحف. محمد وعلي يدخلوا يلاقوا حسام قاعد في الأرض بيعيط وحاضن ندى مغمى عليها وغرقانة في دمها. وحبيبة مفلوقة من العياط. على يجري على ندى، حسام يحضنها أوي ويمنعه يلمسها ويصرخ فيه. حسام / ابعد عنها، ما حدش يقرب، ابعد. محمد يشد على.

محمد / إيه اللي جرا يا حسام؟ على يروح لحبيبة اللي بتصرخ على آخرها، يشيلها ويهزها، تسكت وهي بتتشحتف وعينه على ندى. محمد يقعد قدام ندى ويبص لحسام. محمد / حسام اهدى… قوم خلينا ناخدها المستشفى نلحقها. حسام حاضنها وبيعيط، يعدي إيده على شعرها. حسام / أنا ما كانش قصدي. على وحسام يصرخوا في بعض. أماني تدخل. على / انت لسه هتعيط، ما تقوم تلحقها بدل ما تموت في إيدك. حسام / ما لكش دعوة، انت مالكش دعوة.

أماني / انت بتعمل إيه هنا يا على؟ انت إزاي تسيب عروستك لوحدها وتنزل؟ مصطفى يوصل للأوضة. محمد / قوم يا ابني معايا، قوم نلحق البت. أماني / انت لسه واقف يا على، ما تطلع لعروستك. علي يقوم، حسام شايل ندى وياخده ويمشي، على يروح وراهم، أماني تقف في النص تمنع على. أماني / رايح فين؟ على يبصلها، يروح يحط حبيبة في سريرها ويروح يشيل مصطفى من الأرض بيعيط، يحطه في سرير ندى. أماني / انت عاوز تنقطني؟ انت بتعمل إيه؟

على / بصلح اللي ابنك بيعمله، إيه مش شايفه حاجة حواليكي غير إن نور لوحدها فوق، نور سليمة. أماني / انت إزاي تكلمني كده؟ على يقرب من أماني. على / أنا متربي شوارع، روحي عدلي على ابنك. أماني تبصله بغضب. أماني / حسابنا بعدين. أماني تمشي. على يبص حواليه وبعدين يبص على مصطفى ويروح يقعد جنبه. على / هتبقي كويسة إن شاء الله… هاخد حبيبة فوق أبص على نور. على يبص على الأرض. بقعة دمع. على / هبقى أنزل أبص عليك.

على يقوم يمسح دموع مصطفى ويروح يجيب إزازة ميه ويسقي مصطفى ويشيل حبيبة ويطلع. يلاقيها قاعدة بتعيط وأماني بتطبطب عليها. أماني / واحد ومراته، إحنا مالنا. على / احم احم. أماني تبصله من فوق لتحت بقرف. يروح يحط حبيبة على السرير جنب نور ويبصلها. على / بتعيطي ليه يا نور؟ أماني / يا بجاحتك يا أخي، ليك عين تسأل. على يقوم لاماني. على / واحد ومراته، انتوا مالكوا. أماني / انت زودتها أوي. نور / لو سمحتي يا ماما.

أماني / انتي بتكلميني أنا بعد اللي عمله وبعد اللي قاله؟ على / لو حضرتك شايفه إن واحد يضرب مراته عادي، لكن إني أدخل وألحقها ده اللي غلط. فكويس إن حضرتك بتصلحيلى مفاهيمي بدري عشان في أول خناقة ليا مع نور، هديها علقة موت. أماني / ابقي المس شعرة منها. على / هي نور بنتك أحسن من ندى في إيه؟ أماني / انت بتقارن إيه بإيه؟ أنا بنتي متربية أحسن تربية، إنما ندى…

على / قبل ما تغلطي فيها، مفيش مبرر في الدنيا يبرر اللي ابنك عمله، لا دين ولا قانون. ولا إنتي إيه رأيك يا نور؟ نور / ممكن تنزلي يا ماما بعد إذنك. أماني تبص لنور وعينيها واسعة. أماني تبص لعلى مبتسم ومش قادر يداريها. أماني تمشي وترزع الباب وراها. على يروح يقعد جنب نور. على / أنا آسف. نور / على إيه؟ انت ما غلطتش. على / أمال بتعيطي ليه؟ نور / أنا ما أعرفش إيه اللي حصل بينهم، بس دي أول مرة تحصل والله.

على / كانت سايحة في دمها. نور تبصله. على / مغمى عليها وغرقانة دم، ما كانتش غيرت فستانها حتى. حبيبة جنبك كانت بتصرخ وعمك كان في الأرض بيزحف يحاول يحوش عن بنته. نور / ليه كل ده؟ على / بالظبط، إيه في الدنيا ممكن يبرر موقفه، عملت إيه ولا قالت إيه؟ حتى ادعيلها عشان لو ملحقوهاش، أخوكي هيتعدم. نور / لا، وبتسألني بتعيطي ليه؟

على / يهمني إنه ما يكونش بسببي. أنا ما كانش قدامي حل تاني، إيه قلبي إني أكمل معاكي على صوت صريخهم يعني. نور / لما نزلت، بابا ما كانش تحت. على / كان تحت، خدوا ندى ومشوا، حبيبة كانت بتصرخ، عمك كان في الأرض. نور / ماما كانت… على / أمك ما طلعتش غير على صوتي، وكل اللي فارق معاها إني إزاي أسيبك وأنزل. أنا والله ما فاهماها، هي بتكره ندى كده ليه؟

حتى بعد كل اللي حسام عمله، كارهة ندى. ده لو حسام اتعدم إنه قتل ندى، هتلوم ندى إنها ماتت في إيد حسام. نور / تف من بقك، إن شاء الله مش هيحصلها حاجة. على / خايفة عليها ولا على أخوكي؟ نور / إن كان هو أخويا، فهي أختي، وانت عارف. على يتنهد ويقوم يروح ناحية الباب ويبصلها. عينها عليه. على / أنا كنت مستني إيه يعني؟ إيه اللي جد في حياتي عشان أفرح زي الناس؟ ما كان لازم أتوقع إن في مصيبة هتحصل تنكد عليا. نور تضحك.

على يروح يقعد جنبها، ياخدها في حضنه ويبوس راسها. على / حقك عليا. نور / تفتكر هي عاملة إيه؟ على / مش عارف، وقلقان موت. على عمك اللي لوحده تحت ده. نور / معاك حق، وماما أكيد نزلت على شقته. نور تبص على حبيبة نايمة. على / هنزل أبص عليه وأجيلك. نور تهز راسها وتبتسم. على يبوس راسها ويقوم. نور / ليه كدا يا حسام؟ حرام عليك… في شقة عمر. عمر نايم وأية صاحية بتفكر. عمر يتقلب يفتح يلاقيها باصة للسقف. ياخدها في حضنه.

عمر / بتفكري في إيه؟ غيري. أية تبتسم. عمر / والله ما في حاجة مستاهلة. أية / بفكر في حياتي يا عمر، دي كمان ما تستاهلش. عمر / لو بتفكري في اللي فات، فلا ما تستاهلش تضيعي النهرده عليه. ولو بتفكري في اللي جاي، فلينا رب اسمه كريم قادر يقلب الحال. ولو بتفكري في النهرده… أية / إحنا ليه بيحصل معانا كده؟ عمر / في غيرنا بيحصل معاهم أسوأ. أية / أسوأ من كده؟ عمر / بكتييييييير. هو حد عارف حاجة؟

ما البيبان متقفلة على كل بيت يا بنتي، ما حدش مرتاح. أية / بس أنا مش قادرة أعيش يا عمر. عمر / ولا أنا، بس أنا عندي في الدنيا اللي يخليني أتمسك وأعافر فيها عشانه. أية / على؟ عمر / إنتي يا أية. أية / أنا إيه؟

عمر / إنتي حياتي، إنتي اللي ربطاني بالدنيا دي ومخليني أكمل فيها. ودا من زمان على فكرة، من وإنتي بيبي. أنا فجأة لقيت أمي ماتت وإخواتي سابوني، ما كانش ليا غيرك من يومها وأنا عايش بفكر فيكي بس. عارف إن مرت علينا أوقات… بس زي ما قولتلك، لينا رب اسمه كريم. ادينا أهو سوا. أية / ما بتفكرش إيه اللي هيحصل لو الفيديوهات دي طلعت تاني؟

عمر / فكرت طبعًا، فكرت كتير كمان. وعارف هعمل إيه، هواجه. أنا ما فيش على راسي بطحة، أنا لا عملت حاجة غلط ولا حرام. أية / ولا ندى عملت. عمر / أنا عارف إنك بتحبيها وإنك متأثرة عشانها، بس… أية / ما لهاش حد يقف جنبها ولا يدافع عنها. وعلى أخوك ده اللي رايح عشان يبقى جنبها ويحميها، هو أول واحد جرحها. عارف يعني إيه إن اللي بحبه يدخل على أختي في الشقة اللي فوقي، يبقى قدامي طول الليل والنهار أسمع ضحكتهم وأشوفها بتدلع عليه؟

انت متخيل العذاب اللي هي عايشة فيه؟ ندى انتحرت عشان حبيبة باعت نفسها للشيطان عشان بنتها. عمر / ام يا أية… بكرة إن شاء الله لما ربنا يكرمنا هتفهمي. أية / مش خايف تنام ما تقومش؟ مش خايف حبيبة تشوف اللي انت شوفته؟ عمر / الأعمار بيد الله، وأكيد ربنا ليه حكمة من اللي بيحصل. أية / ونعم بالله.

عمر / أية… حبيبتي… حاولي تشغلي عقلك بنفسك، دراستك اللي متأخرة فيها، البيت، شوفيلك هواية تشغلي وقتك، أي شغلة، حتى لو تنزلي تقفي معايا في المحل. أية / لا، المحل. عمر / أونلاين يا ستي، سوقيلي أونلاين، الاتجاه دلوقتي كله كده. نعمل صفحة وتابعيها، إيه رأيك؟ أية / على فكرة ده نفس كلام الدكتور، بس تفتكر هيجيب نتيجة معايا؟ عمر / نجرب، هنخسر إيه؟ وبعدين طول ما إحنا مع بعض، نحاول مرة واتنين وتلاتة، ولا إيه؟ أية تهز رأسها.

عمر / أنا بحبك أوي يا يويو. أية / وأنا والله يا عمر. عمر ياخد أية في حضنه ويبوس راسها… في المستشفى. الدكتور / لا طبعًا لازم محضر، ومستحيل تكون حادث. محمد / يا ابني والله… حسام / اعمل الصح يا دكتور. محمد يبص لحسام والدكتور يمشي. محمد / يعمل الصح إيه؟ انت عاوز تودي نفسك في داهية. حسام / اللي يحصل يحصل. محمد / إيه اللي وصل الدنيا بينكم لكده؟ إيه اللي حصل؟ حسام / والله يا بابا ما قادر أتكلم دلوقتي، أبوس إيدكم.

محمد / أنا هقوم أكلم أمك أطمن على حبيبة، وعمك سيبناهم لوحدهم. محمد يقوم يقف في جنب ويتكلم في التليفون. محمد / أيوه يا أماني. أماني / عاجبك عمايل سي على دي؟ دا البيه لسه ما دخلش وبيعمل كده. محمد / وقت على دلوقتي يا أماني… طمنيني على مصطفى وحبيبة. أماني / لا يا خويا ما تقلقش، سي زفت طلع حبيبة للدادة تقعد بيها، ونزل قعد مع أخوك. يا ميلة بختك يا بنتي في جوازاتك، هي بنتي بس دول ولادي الاتنين. محمد / سلام يا أماني.

محمد يقفل السكة ويتصل بعلي. نور ترد عليه. نور / أيوه يا بابا، طمني ندى عاملة إيه؟ محمد / لسه جوه، ما حدش عاوز يقولنا حاجة، وأخوكي مش معايا خالص. نور / أنا مش قادرة أصدق إنه عمل كده. قلبي بيتقطع من ساعة ما على حكالي على منظرها، ولا حبيبة يا قلبي، عمالة تتفزع كل شوية كأنها حاسة. محمد / وعمك عامل إيه؟ نور / على معاه تحت، ما تقلقش مش هيسيبه لوحده. طمنونا انتوا بس على ندى.

محمد / ادعيلها وادعي لأخوكي ربنا يهديه، لحسن أنا خلاص حطيت صوابعي العشرة منه في الشق. نور / إن شاء الله خير. محمد / حقك عليا أنا يا بنتي، كسرنا فرحتك. نور / ندى تقوم بالسلامة لبنتها، والباقي محلول بإذن الله. محمد / يكملك بعقلك يا قلب أبوكي… خدي حبيبة يا نور وانزلي جنب جوزك، يا عالم بيقول علينا إيه دلوقتي. نور / حاضر يا بابا. محمد / حضر لك الخير يا بنتي، مع السلامة. محمد يقفل ويبص لحسام قاعد في دنيا تانية.

يخبط كف على كف ويروح يقعد جنبه… في شقة ندى. علي يقوم من الأرض ويشيل طبق بلاستيك فيه ميه بصابون. علي / فلة أهي. علي يبص على مصطفى قاعد سرحان، يحط الطبق على الكومدينو ويقعد جنبه. علي / هتبقي كويسة إن شاء الله وهترجع زي الفل وأحسن. مصطفى يبص لعلى ويرجع يبص الناحية التانية. علي / أجيب لك حاجة تاكلها ولا أعدلك راسك تنام شوية؟ مصطفى يهز راسه لأعلى. مصطفى / حاسس بيك أوي على فكرة، إن يبقى جواك كلام ومش قادر تقوله.

علي يبص في الأرض ومصطفى يبص عليه. علي / ما حدش عارف الخير فين ولا الحكمة من ورا إرادة ربنا. كل اللي علينا نصبر ونعافر. نور تدخل شايلة حبيبة نايمة. نور / ازيك يا عمي؟ نور تحط حبيبة جنب مصطفى، يبصلها ويبتسم. نور تبص لطبق الصابون الأحمر من لون الدم وتبص لعلى. نور / كلمتهم في التليفون… خير إن شاء الله. علي يهز راسه. علي / تعالي نتكلم بره عشان ما نصحّيش حبيبة، كفايا فزعته. نور / يا ريت. علي ونور يطلعوا بره.

نور / واحد غيرك كنت هبقى محرجة منه، بس انت عارف عني كل حاجة. علي / إنتي ما لكيش ذنب في كل اللي بيحصل، بس أخوكي لازم يلاقي اللي يحاسبه. نور / بابا معاه، وبجد. علي / أبوكي راجل طيب، وحسام ابنه. نور / وندى كمان.

علي / أبو ندى راقد جوه مشلول، ما استحملش اللي حصل في بنته. كان مرمي في الطرقة هنا بيزحف بكل قوته عشان يلحقها، وحتى لو كان وصل ولا كان قدر يعملها حاجة… ده حبيبة بنته كانت مفلوقة صريخ وعياط، ما هانش عليه يسكتها في وسط كل ده، هي أساسًا مش فارقة معاه. نور / هو أبوها. علي / وبتقوليلى أنا الجملة دي؟

انتي كمان عارفة عني كل حاجة. أنا أبويا بالنسبالي كان أسوأ أب في الدنيا، كنت ببص للأولاد اللي بتضحك في حضن آباءها وأدعي وأحسبن عليه، بس لما شوفت أخوكي، هدعي لأبويا بالرحمة. نور تبص في الأرض. علي / بيحبها… أمال لو بيكرهها هيعمل فيها إيه؟ نور / ما حدش عارف تفاصيل اللي حصل بينهم. علي / إنتي كمان هتبرريله؟ ترضيها على نفسك يعني؟ مش كفايا عايشة معاه غصب عشان حبيبة؟ لا وكمان يقتلها بالشكل ده. نور تبص في الأرض.

علي / على فكرة أنا حاسس بيكي والله، بس إن كان هو أخوكي، فهي زي ما بتقولي أختك. نور / بإيدي إيه أعمل؟ ولا حاجة… النهرده المفروض أسعد يوم في حياتي، وأديك شايف اللي إحنا فيه… أعمل إيه قولولي؟ أقدر أعمل إيه وما عملتوش؟ علي / بطلي تدافعي عنه وتدوري له على مبررات. نور / ما بيسمعش لحد والله، ما بيسمع. علي / تمام. نور / على… حبيبي… عشان خاطري سيب بابا هو اللي يدخل، ما لكش انت دعوة، ما تحطنيش بينكم. علي / يا ريته كان ينفع.

علي يسيب نور ويدخل المطبخ يروق الدنيا ويغسل الببرونات. نور تروح تقف على الباب وتبص عليه في صمت وتبص في الأرض وتروح تقعد جنب عمها… في المستشفى. الظابط خارج من أوضة ندى ومحمد واقف بيفرك في إيديه وحسام واقف هادي. الظابط يبص لحسام ويمشي. محمد واقف مستغرب. يفتح الباب ويدخل يلاقي ندى نايمة في السرير، يروح يقعد جنبها. محمد / قولتي لهم إيه يا بنتي؟ ندى / ما تقلقش يا عمي، قلت له وقعت على السلم وما بتهمش حد. محمد / ليه؟

ندى تبص لمحمد باستغراب. ندى / كنت عاوزني أقول إن حسام ضربني!!! محمد يبص في الأرض. ندى / حبيبة فين يا عمي؟ سبتوها لوحدها؟ محمد / ما تقلقيش، على حبيبة دي مع نور وعلي، الله يبارك له واقف مع أبوكي. ندى / خليهم يروحوني يا عمي لو سمحت. حسام يدخل بالراحة مكسوف ومش قادر يبص على ندى. حسام / عاملة إيه دلوقتي؟ ندى / عايزة أروح. حسام يبص لمحمد. محمد / هروح أتكلم مع الدكتور وأشوف هنعمل إيه. محمد يطلع بره. حسام يقعد ويمسك إيدها.

حسام / ليه ما قلتيش للبوليس إني أنا اللي ضربتك؟ ندى / هيحصل إيه؟ هتتحبسي؟ وساعتها أسافر لبنان إزاي؟ حسام / ساعتها كان ممكن تطلقي لو عاوزة. ندى / هيعدموك يعني؟ أنا خلاص اتعلمت الدرس… الحاجة الوحيدة اللي هتفرقنا هي الموت، بس إن شاء الله ما يكونش موت حبيبة. حسام / بعد الشر عنك وعن حبيبة… ندى أنا بجد آسف أوي، أنا مش عارف أنا عملت كده إزاي… أنا ما كنتش في وعيي.

ندى / مش فارقة… حسام أنا عايزة أروح. آخر حاجة فكراها حبيبة كانت بتصرخ وأنا قلبي واكلني عليها أوي. يا تروحوني يا تجبهالي لو سمحت. حسام / طب ارتاحي وأنا… ندى / عايزة بنتي يا حسام، لو سمحت هات لي بنتي، مش هرتاح غير بيها. حسام / حاضر حاضر. حسام يطلع بره يلاقي محمد بره. حسام / عايزة حبيبة. محمد / لينا كلام تاني في اللي انت عملته. حسام / اللي تشوفه يا بابا، بس لو سمحت. محمد / لا… أنا مش هسيبها معاك لوحدها. روح هات حبيبة.

حسام / تمام يا بابا، عن إذنك. حسام يمشي ومحمد باين عليه الضيق… في شقة حسام. نور بتدي حبيبة ببرونة. علي يدخل لابس خروجه. نور / علي فين؟ علي / هروح المستشفى لندى. نور / بابا معاها وطمني، بقت كويسة؟ علي / آه، بس لوحدها. وأكيد البوليس هييجوا ياخدوا أقوالها وممكن يجبروها تتنازل. نور / يا علي. علي / أخوكي مش أخوكي، مجرم ولازم يتربي. ولا عشان يتيمة وما لهاش حد؟ نور / برده مصر تحشرني بينكم.

علي / مش من حقه، مش من حق أي حد يمد إيده على مراته بالشكل ده. نور / اعمل اللي انت شايفه صح. نور تبص لحبيبة وتكمل رضاعتها. علي لسه واقف بيبص عليها، مش بتبص عليه. علي / مش هقدر أشوف الغلط وأغمض عيني. نور / قولتلك اعمل اللي انت شايفه صح. هي أختي وهو أخويا، وكده كده أنا في النص بينهم، فمش هتفرق لما جوزي كمان يدخل في المطحنة. علي / يا أجي عليكي، يا أجي على ندى، مش كده؟ نور تبصله. نور / انت مش عارف إيه الصح، مش كده؟

علي / عارفه، بس مش قادر أجي عليكي أنا كمان. نور / روح يا علي، أنا بقولك روح واقف جنب ندى. ولو استنيت أكمل رضاعة حبيبة، هطلع اللبس وأجي معاك أنا كمان. علي / بجد يا نور؟ نور / لو ندى اختارت تشتكي حسام، هقف معاها. هو غلطان، بس لو ندى… علي / أكيد هتشتكيه، إلا لو كان مهددها بحاجة. إنتي يعني مش عارفة أخوكي؟ نور تتنهد وتبص لحبيبة. نور / أعمل إيه؟ ولا حاجة… علي / وجودك هيفرق مع ندى جدا، زي ما طول الوقت بتقولي، إنتي أخته.

نور / خد كمل انت الببرونة على ما أطلع اللبس. علي ياخد حبيبة ونور تيجي تطلع بره تلاقي حسام داخل. نور / حسام!! في المستشفى. ندى بتتألم لوحدها في الأوضة، تضرب الجرس وهي عمالة تبص حواليها. الممرضة تدخل. ندى / لو سمحتي، هو مفيش أي مسكن ليا؟ جسمي كله واجعني. الممرضة / ثواني حاضر. الممرضة تطلع بره ومحمد يدخل. محمد / محتاجة حاجة يا بنتي؟ ندى / هو حسام لسه ما جابش حبيبة؟

محمد / جايين في الطريق، نور جاية معاها. تحبي يجيبولك حاجة وهم جايين؟ ندى تبص الناحية التانية وهي مضايقة. الممرضة تدخل تحطلها حقنة في الكانولا. ندى / شكراً. الممرضة / بالشفاء… عن إذنكم. الممرضة تطلع بره. ندى / عمو.. كلمتهم إني أروح. محمد / تروحي فين بس يا ندى؟ ندى / هروح بيتي يا عمو، لو سمحت. أنا مش عيانة عشان الناس تيجي تزورني هنا، أنا مش عاوزة حد ييجي يتفرج عليا. هنام. محمد / يتفرج عليكي؟

ندى / بابا لوحده وأكيد قلقان عليا، خليني أروح بدل ما يجراله حاجة. محمد / على معاه. ندى / مين علي يا عمو؟ مين علي؟ بابا يقرب له إيه؟ يخصه في إيه؟ الوقت اتأخر وإنام. محمد / على طيب وابن حلال. ندى / أنا عايزة أروح… أرجوك. الباب يتفتح ونور تدخل شايلة حبيبة وراها حسام وراهم علي. ندى / أخيراً، اتأخرت كده ليه؟ حسام يروح يقعد جنبها. حسام / ما رضوش يدوني البنت، افتكروني هرب بيها. ندى / حسام أنا بقيت كويسة، خليهم يكتبولي خروج.

نور / حبيبتي ارتاحي هنا، انتي شكلك تعبانة أوي. ندى / إنتي إيه اللي جابك؟ نور / ندى!!! ندى تبص لعلى. ندى / إنتي بتقولي إيه؟ بقولك خدي جوزك وروحي يا نور. نور / ندى. حسام / ندى إيه يا نور؟ ندى إيه؟ علي / ندى… لو بيحاول يضغط عليكي بأي شكل. ندى تشد المخدة من تحت راسها وتغطي وشها. علي / إحنا جايين نبقى معاكي. ندى تشيل المخدة. ندى / وأنا ما طلبتش منكم حاجة ومش عاوزة منكم حاجة. سيبوني في حالي. حسام يبص لعلى ويبتسم.

علي يبص لنور. نور / ندى… حبيبتي. ندى / خدي جوزك وروحي. نور تبص لعلى وتبص لحسام. حسام / إيه!!! شيفاني ماسك لها خرزانة ولا ماسكها السلك العمومي عريان؟ نور / بابامحمد / حسام ما دخلش الأوضة على ندى من ساعة ما فاقت ولا كلمها. حسام / أخيراً… صدقتي ولا تحبي أحلفلك؟ علي / ندى. ندى تتك على الزرار كتير جدا. علي / اللي حصل النهاردة لو ما أخدتيش موقف هيتكرر تاني وتالت وعاشر. هتستني أما يموتك؟ إنتي ساكتة ليه؟ إحنا معاكي.

ندى تبصله بغل. ندى / خد… مراتك… وروح يا عريس. الممرضة تدخل. ندى / لو سمحتي، هو مفيش ساعات محددة للزيارة؟ أصلي تعبانة ومحتاجة أرتاح. الممرضة تبص للي في الأوضة باستغراب. محمد / خد مراتك وروحوا يا علي. ندى / وانت معاهم يا عمو… بابا محتاج اللي يبقى جنبه، ودول عرسان جداد مش عاوزين نتقل عليه. علي يبص على ندى. حسام / تقدروا تتفضلوا، أنا هبقى معاه. نور تبص لعلى، ما بيشيلش عينه من على ندى، باصة الناحية التانية.

محمد / يلا يا ولاد. محمد يمشي، نور تمشي وراه. الممرضة تمشي، وعلي لسه واقف. حسام / مستني حاجة؟ علي / ندى. حسام يجز على سنانه وندى باصة الناحية التانية. نور تدخل تمسك إيد علي، يمشي معاها. ندى تبص عليهم وتبص لحسام. ندى / هنتحاسب على اللي انت عملته… أوعى تفتكر إنها خلصت على كده. حسام / أقسم لك يا ندى، كان غصب عني. ندى / لا سكران ولا بتاخد مخدرات، إيه عذرك؟ ملبوس. حسام / وإنتي مش حاسة بنفسك؟

مين في الدنيا يتعرض لكمية الاستفزاز دي ويفضل هادي؟ ندى / استفزاز؟ حسام / بتعيطي عليه؟ ندى / بعيط على روحي. حسام / لو شوفتي… لو حسيتي مرة واحدة بحبي ليكِ… أنا بحبك لدرجة الجنون. ندى / لدرجة المرض. حسام / لدرجة المرض… أيوه، أنا مريض بيكي. طول عمرهم بيقولوا خد اللي شاريك. ندى / وأنا بيعاك. حسام يقوم يقف. حسام / مش قادر، مش قادر. ندى / المرة الجاية هموت في إيدك.

حسام / اسأليهم أنا كنت عامل إزاي لما دخلوا عليا… أقسم بالله ما كنت في وعيي… ندى أنا بحبك، أنا عمري ما أذيتك. ندى / أمال تسمي اللي أنا فيه ده إيه؟ أنا عملت أبو نية في المستشفيات يا حسام. حسام / إنتي اللي… ندى / أنا اللي قتلت أمي وشللت أبويا وشيلت رحمي. حسام / ما كنتش عايز حاجة من دي تحصل. ما مسكتش سكينة ودبحت بيها طنط مها الله يرحمه. ندى / أمال اللي عملته معايا تسميه إيه؟ أنت دمرت حياتي وحياة أية.

حسام / أمها السبب، مش أنا. ندى / أنا تعبانة ومش قادرة أجادل… كده كده بكلم حيطة ما بتحسش. حسام / مقدر إنك زعلانة… غلطان ومش هقدر أتكلم، بس أوعدك إني أعوضك. ندى / عايزة… أنام. حسام / تمام تمام… نامي وأنا هسهر بحبيبة هن. ندى تهز رأسها وتغمض عينيها… في شقة نور. علي واقف في البلكونة بيغلي، ونور بتتابعه من بعيد تدخل. نور / أنا هدخل أنام. علي ما بيردش. نور / تصبح على خير. علي ما بيردش.

نور تدخل الأوضة وتنام على السرير على جنبها والحزن مالي وشها. علي يدخل وينام على جنبه ووشه ليها وهي مدياله ضهرها. علي / أنا آسف. نور تبصله. نور / على إيه؟ علي / إنتي ما لكيش أي ذنب في كل اللي بيحصل. نور / ولا انت ليك. علي / خايف أكون ظالمك. نور / أي حد مكانك أكيد كان هيتصرف زيك. علي يفتح إيده. نور تروح في حضنه. علي / أنا تعبان أوي يا نور، إنتي كنتي تستاهلي حد يشيل عنك. نور / وهو الحب والجواز إيه غير اتنين يسندوا بعض.

علي / ربنا ما يحرمني منك. نور تبتسم. علي يبتسم. علي / النهار قرب يطلع. نور / أيوه. علي / أنا مش جايلى نوم بصراحة، ما بحبش أنام وأنا مضايق. نور / تحب نغير المود بأي حاجة تيجي نلعب؟ علي / نلعب!!! نور تقوم. علي يقوم يبص عليها. تفتح درج التسريحة وتطلع كوتشينتين. نور / نلعب الشايب بأحكام. علي يبتسم. نور / إيه خايف ولا إيه؟ علي / لا، إنتي قلبك حنين، تعالي.

نور تروح تقعد قدامه وتفنط الكوتشينة، وهو عينه على الكوتشينة وهي عينها عليه… في شقة ندى. ندى تدخل وحسام مسندها. ندى / نيميني جنب بابا لو سمحت. حسام / حاضر. حسام يدخل ندى جنب أبوها. أول ما يشوفها يمد لها إيده وهو هيموت ويقوم لها ويزوم. ندى / جيالك أنا كويسة، ما تقلقش. محمد / أنا طلبت دليفري، زمانه جاي في الطريق. ندى تنام جنب مصطفى، ياخدها في حضنه. محمد / هسيبكوا ترتاحوا، لو عاوزتوا حاجة نادوني.

حسام / ربنا يخليك، ارتاح انت. محمد يبص لندى ومصطفى مش باصين له ويمشي ويقفل باب الشقة وراه ويطلع فوق. يخبط على نور، الباب يتفتح في ثانية. نور / شششش… علي نايم… ازيك يا بابا. محمد / كنت عاوز أتكلم معاكي. نور / اتفضل. محمد يدخل يبص حواليه ويطلع البلكونة ويقف فيها لوحده. ثواني ونور تدخل شايلة كبايتين شاي، واحدة مليانة والتانية لنصها. نور / لسه طافية الكاتل، اتفضل. محمد ياخد الكباية وهو مبتسم. محمد / عاملة إيه؟

نور / الحمد لله تمام. محمد / أمك طول الليل تقومني على جوزك. نور / انت رأيك إيه؟ كنت هتحترمه لو ما كانش أدخل؟ محمد / علي شاب ابن حلال وأنا بحبه. نور / علي غلبان وطيب والله يا بابا، طول الليل بيتفزع من الكوابيس، ما صدقت نام شوية. محمد يبصلها باستغراب. نور / على عاش حياة صعبة أوي يا بابا، واللي حصل امبارح قلب عليه ذكرياتهم. محمد / نور أنا بس عاوز أفكرك إن حسام أخوكي في الأول والآخر.

نور / وندى أختي، واللي حصلها ما يرضيش ربنا. محمد / ندى جت تحت، أنا كنت معاها، هي مش هتشتكي حسام وهتسافر معاه لبنان. نور / ربنا يهدي سرهم بس اللي حصل… محمد / ندى وحسام حياتهم مختلفة، بدأت غلط، فلازم هتبقى غلط في غلط. بس حبيبة ما لهاش ذنب في كل ده. علي يدخل. علي / حبيبة من حقها تتربى في بيت سوا… صباح الخير يا عمي. محمد / صباح النور يا علي. نور / هو إحنا صحيناك ولا إيه؟ هروح أحضر لك تفطر. علي يبتسم لها، تدخل المطبخ.

يروح يدخل البلكونة. علي / أنا أكتر واحد يا عمي عارف مصير البنت اللي بتعيش في أسرة مفككة. حبيبة ما لهاش أخ، حتى ما لهاش غير أمها. لو أمها جرالها حاجة… محمد / ندى بنتي، إنت فاكرني راضي عن حسام وتصرفاته؟ محمد يتنهد. محمد / إنت ما تعرفش حاجة يا علي. علي / ما هو المشكلة إني عارف كل حاجة… أنا جارهم، وإيه صاحبة ندى. محمد / أنا فاهم ده، بس… علي / حسام بيحب ندى. محمد / حسام بيقتل ندى. علي / هو أبو البنت زي ما هي أمها.

محمد / البنت دي اللي رماها في الصحرا، واللي ندى دفعت رحمها تمنها، اللي حبيبة دفعت تمنها إنها عمرها ما هتبقى لها إخوات. محمد يبص في الأرض ويرجع يبص لعلى. محمد / أنا مش ببرر له، أنا قلت لك إني مش راضي عن تصرفاته، بس ده أمر واقع. علي / مش هيبقى رضا بالهم والهم مش راضي بينا. اتجوزته وعاشت، يسيبها تعيش بقى، مش يقتلها. ده ما فيش قانون وشرع يسمح له يضربها كده. محمد / وهي سامحت. علي / هنخربها إحنا.

محمد / وهي سامحت عشان سامحت، ولا عشان حبيبة؟ برضه هو حضرتك مش واخد بالك إن ندى يتيمة؟ لا لها أهل ولا ضهر ولا أي حد يحميها ولا يحمي بنتها. ما لازم تطاطي وتسامح وتاخد بالجزمة وتسكت عشان تحافظ على بنتها اللي جت للدنيا غصب عنها ومش هتقدر تجيب غيرها. نور تدخل. نور / علي… الفطار يا حبيبي، تعال. علي يبص لنور ويبص في الأرض ويبص لمحمد.

علي / أنا آسف، أنا ما كانش المفروض أكلم حضرتك كده… أنا عارف إنك ما لكش يد في كل ده ولا في إيدك حاجة تعملها. علي يدخل يقف قدام كرسي ويرجع يبص لمحمد. علي / اتفضل معانا يا عمي. محمد / سبقتكوا… ألف هنا. محمد ياخد بعضه وينزل. نور تجري وراه. نور / بابا. محمد / روحي أكلي جوزك واقعدي معاه، ولو عاوزتي حاجة رني لي، أنا تحت. نور تهز راسها. محمد ينزل. نور ترجع الشقة ما تلاقيش علي، تدخل جوه تسمع صوت الدوش… في المحل عند عمر.

عمر بيتكلم في التليفون. عمر / بتهزر؟ لا طبعًا مش هقولها ومش هجيبها معايا. وأنا شخصيًا ما أعرفش… عندها جلسة كمان شوية، كنت ناوي أوصلهم وأجيلك أصبح عليك وأرجع آخدهم. تمام، هرن لك لما أقرب منك… تمام، سلام. أية تدخل. أية / إنت لسه ما قفلتش يا عمر؟ عمر / كنت هقفل والله، بس علي كلمني. أية / عامل إيه؟ عمر / كويس الحمد لله، يلا يلا عشان لسه هنعدي على طنط منى. أية / يلا… في شقة ندى. حسام داخل بصينية عليها أكل.

حسام / الغدى يا نونو، الأكل يا عمي. ندى / هي حبيبة فين يا حسام؟ حسام / حبيبة راضعة ومغيرة ونايمة على السرير جوه، وكله تمام، ما تقلقيش انتي خالص. تحبي أدخلك لي؟ ندى / لا، خليني جنب بابا هنا. حسام يحط الصينيه على ترابيزة ويعدل ندى ويروح يحط الصينيه على رجليها. حسام / هتقدري تاكلي لوحدك؟ آكل أنا وعمي؟ ندى / هاكله أنا، روح انت كل. حسام / مش عاوز آكل لوحدي، خليني آكل معاكم. ندى تملأ معلقة وتأكل مصطفى.

حسام / ليكي دوا بعد الأكل، ما تنسيهوش. وعمي عنده جلسة الساعة أربعة، كلمت المركز هيبعتوا عربية، وكلمت بابا فاضي هيروح معاه. ندى تبصله. حسام يكمل كلام. حسام / كان ممكن أروح أنا، بس انتي تعبانة وحبيبة هتبقى تقيلة عليكي، ومش هينفع نتقل على نور، دي عروسة برضه. حسام يبص على الأكل وندى لسه عينها عليه، تبص للأكل وتأكل أبوها. حسام / كلي انتي يا بنتي عشان دواكي، وأنا هاكله. حسام ياكل مصطفى. مصطفى يقفل بقه ويبص الناحية التانية.

حسام يضايق وفي ثانية يبتسم بخبث. حسام / هههههه شوفتي أبوكي طلع أذكى مني؟ عاوزني أكلك إنتي بإيدي؟ عاوزني أدلعك عشان أصالحك؟ ندى / كتر خيرك، بعرف آكل نفسي. كل انت عشان تقوم، ترتاح انت مطبق من امبارح. حسام / لما العربية تيجي وأطمن على عمي، هبقى آجي أريح جنبك شوية. ندى تبص لحسام وتتنهد وتكمل أكل… في شقة علي. علي نايم في السرير ونور في حضنه.

نور / واتجوز علاء الدين من الأميرة ياسمين وعاشوا في تبات ونبات وخلفوا صبيان وبنات. توتة توتة خلصت الحدوته، حلوة ولا ملتوتة؟ علي / هههههه حلوة. نور / تحب أحكيلك قصة الشاطر حسن؟ علي / عمرك فكرتي ليه كل القصص بتنتهي نهاية واحدة؟ نور / يتجوزوا ويخلفوا تقصد؟ علي / يعيشوا في تبات ونبات. نور / قصة روميو وجوليت انتحروا هم الاتنين في الآخر.

علي / وقيس وليلى… قصص الأطفال لازم تنتهي نهاية سعيدة، بس لما بيكبروا بيفوقوا إنها مش كل النهايات سعيدة. أو على الأقل الأفلام العربي القديمة كلها بتنتهي نهاية واحدة، مشهد الدخلة. حتى الأفلام اللي اتجرت وصورت الحياة بعد الجواز كانت كلها مشاكل وخناقات. كان مفيش حياة سعيدة بعد الجواز، أو مفيش حياة سعيدة أصلاً. نور / بس ممتاز محل وشاه جيهان أثبتوا العكس. علي / ومين سي ممتاز وست جيهان دول كمان؟ عمرك ما حكيتيلي عنهم.

نور / هههههههه، لا لا ممتاز محل دي ست. علي / الست ممتاز والراجل جيهان؟ ولا دول كانوا مقضينها في… أعوذ بالله. نور / هههههههه، إنت بتقول إيه؟ معقول عمرك ما سمعت عن تاج محل؟ علي / اللي في الهند؟ نور / عليك نور. اهو شاه جيهان ده كان واحد من حكام الهند زمان، من حبه في مراته بنى لها تاج محل، ضريح ليها يخلد حبهم. جرس الباب يضرب. الاتنين يتعدلوا في قعدتهم. علي / دا أكيد عمر. هروح أفتح له. علي يلبس الروب ويطلع بره.

يفتح الباب يلاقي عمر شايل علبة شيكولاتة. عمر / إيه يا أسطى؟ كنت همشي. علي / ادخل تعال. عمر يدخل يقعد. عمر / إيه الأخبار؟ علي / تشرب إيه؟ عمر / ولا أي حاجة، مش هطول أصلًا، انت عارف الليلة. عمر يوطي على علي. عمر / عامل إيه مع نور؟ علي / الحمد لله تمام. عمر يهز راسه ويتعدل. علي / نور واخده فرع أبوها، المشكلة من الفرع التاني. عمر / إنت هتقول لي. نور تدخل شايلة صينية عليها ساقع. عمر / صباحية مباركة يا عروسة.

نور تبتسم وتقعد وعلي يناول عمر الكاس. نور / الله يبارك فيك. أمال أية فين؟ ما جتش معاك ليه؟ عمر / الجيات أكتر، إنتي عارفة عندها كشف وكده. نور تبتسم بحزن وتهز راسها. عمر يهز راسه ويقوم. عمر / أنا مش هبقى تقيل بقى، أنا عارف الضيوف في المواقف اللي زي دي بيبقوا تقال أوي. نور / ما تقولش كده. عمر يبتسم. علي / يا ابني اقعد شوية. عمر / الجيات أكتر، يلا خد بالك من عروستك، يلا سلام يا نور. نور / مش محسوبة.

عمر / أكيد، ده أنا هقرفكوا زيارات. نور / على قلبنا زي العسل. عمر / تعيشي، يلا سلام. علي / ابقى طمني. عمر / لو في جديد، هبقى. علي / إن شاء الله خير. عمر يبتسم ويفتح الباب ويمشي. علي يقفل الباب وراه. نور / كنت أمسكه شوية، ده ما شربش حتى الساقع. علي / بصراحة معاه حق، في الأوقات اللي زي دي الضيوف بيبقوا تقال أوي. وبعدين إنتي ما كملتيليش حكاية الشاطر حسن. نور تقرب بدلع. نور / إنت عاوز تضحك عليا، ده دورك.

علي / بس أنا ما عنديش قصص، بس إيه رأيك لو نلعب الكومين؟ نور / نلعب؟ علي ياخد نور تحت باطه ويدخلوا جوه وهي مبتسمة… في شقة ندى. ندى نايمة في السرير بتلعب في الموبايل. حسام يدخل يقف عند الباب. ندى تتجاهله. حسام / تحبي أعمل لك أي حاجة؟ ندى تبصله وترجع تبص في الموبايل. حسام / إنتي لسه زعلانة مني صح؟ ندى تبصله. يروح يقعد جنبها.

حسام / أنا بحبك يا ندى، اطلبي مني أي حاجة وشوفي، ما تفضليش تضغطي علي لحد ما أفقد أعصابي وتيجي تحاسبيني. ندى / وإنت ما ضغطتش علي. حسام / ضغطت… ضغطت… بس ليه؟ هو ما يستاهلش… والله ما يستاهل. ندى / أنا عايشة في الدنيا عشان حبيبة، حبيبة وبس. حسام / وكنتي بتعيطي في المطبخ عشان حبيبة برضه؟

ندى / بعيط على نفسي يا حسام، على حياتي اللي انتهت من قبل ما تبدأ. زمايلي بيروحوا الكلية، عايشين في الأحلام، إنما أنا… عندي كام سنة على الكابوس ده؟ حسام / بإيدك يتحول لحلم الكل يحسدك عليه… جربي بس… حبيني… حبيني مرة واحدة وشوفي هعملك إيه… هجيب لك الدنيا تحت رجليكي، هلففك العالم، هلبسك أحسن لبس وأكلك أحسن أكل وأعيشك أحسن عيشة، هخلي الكل يغير منك. ندى / زي عصفورة ضعيفة في قفص دهب صح؟

حسام / قفص إيه بس، بقول لك هلففك الدنيا. هدخل حبيبة أحسن مدارس، واشترك في أحسن نادي… تنزلوا إنتوا الاتنين تعملوا شوبينج في أفخم مولات. ندى / مش عاوزة ده. حسام / عاوزة إيه؟ شاوري وأنا أنفذ. ندى / عاوزاك تسبني أنا وحبيبة وأبويا في حالنا، تطلقني وتسيبنا وأنا هرجع لك شقتك، وكده كده عمري ما هخرب على أختي، مش هتجوز علي ولا هيبقالي أي صلة بيه، أوعدك. نظرات خيبة أمل على وش حسام. حسام / تمام… هتاكلوا منين؟ من معاشه؟

طب لو كفاكوا أكل وشرب، هتعالجي أبوكي منين؟ طب تمام، اديتك نفقة لحبيبة واتكفلت بمصاريفها. هتعوضيها عني؟ هتعوضيني عنك إزاي؟ ندى / حاولت والله، حاولت، بس إنت مش قادر تفهم، أنا مش قادرة أنسى اللي فات، وإنت لسه مستمر في أخطاء جديدة.

حسام / فعلاً… كل حاجة غلطتي أنا… مراتي عينها في واحد تاني ومقهورة عليه إنه اتجوز غيرها… دي غلطتي. مراتي مش بتسمح لي أقرب منها… غلطتي. بتنكر كل حاجة عملتها لها وشايفاني شيطان بقرون… غلطتي برضه… إنما إنتي ملاك. ندى / أنا كمان شيطان زيك، بس إنت اللي عملت مني كده. حسام / مش لوحدي… كلكم اشتركتوا معايا. ندى / وكلهم دفعوا التمن.

حسام / وأنا أكتر واحد دفعت… ده اللي ماتوا ارتاحوا. غلطتهم كانت قليلة، عقابهم كان خفيف، إنما أنا مستمر طول الوقت… خسرت كل الناس وخسرت شغلي وعيلتي، حتى البنت الوحيدة اللي كنت مستعد أبيع عشانها الدنيا، كرهاني. ندى / بإيدك تصلح كل ده. طلقني وسيبني أعيش، وحاول تقرب مني تاني لو لينا نصيب في بعض. حسام / دي هتبقى طلقة تانية. ندى / أيوه، لسه في فرصة. حبيبة هتجمعنا، أقسم لك إني مش هكون لغيرك، بس…

حسام / إنتي كل اللي طلبتيه أنا عملته، ليه عاوزة ترجعيني للصفر تاني؟ صفر إيه ده؟ أنا لسه قدامي طريق طويل للصفر… طب ولبنان؟ مش إنتي اللي طلبتي مني أقبل الوظيفة؟ أنا كنت مستعد أبعد عن الدنيا بس أبقى معاكي… أنا لو بعدت عنك هعيش إزاي ولمين؟ صدقيني أنا بحاول أفكر معاكي أهو، بس أنا مش هقدر أبعد… العبي بيا، عشميني واخلفي، بس على الأقل عندي أمل اللي ما حصلش النهاردة بكرة يحصل… كفايا أبص عليكي وتبقى قدامي، إنما أطلقك!!

طب ما تقتليني أهون. ندى / جهزت كل حاجة للسفر؟ حسام يبتسم بأمل. ندى / أنا البيت ده؟ الشقة دي… تعال نروح نقعد في شقة بابا الكام يوم دول. حسام / عندي حل أحسن. ندى تبصله زي الغريق المتعلق بقشة… في شقة علي. نور وعلي قاعدين على السرير. نور لابسة قميص نوم حرير وشعرها ديل حصان، وعلي لابس بنطلون البيجامة. علي يلعب آخر ورقة في إيده. نور / ولد… كان معايا ولد… ولد… أعاااا. نور ترمي آخر ورقة في إيدها. علي يهوي عليها.

علي / قولت لك هقشطك. نور تخلع التوكة وتديها لعلي. علي / إيه الخمر ده؟ نور / خليك جنتل مان بقي، إنت عمال تكسب من الصبح. علي / تعرفي إن شعرك وهو سايب على وشك أحلى كتير. نور تشد منه الكوتشينة وتفنطها. نور / تلعب دور تاني؟ علي يشدها من إيدها ويرميها ورا ضهره. علي / إن كان حبيبك عسل، وأنا بشر برضه. نور تبتسم. جرس الباب يضرب. الاتنين يتعدلوا في قعدتهم. علي / هقوم أفتح، على ما تلبسي. نور تهز راسها وهي مبتسمة.

علي يطلع وهو بيلبس التيشيرت، يفتح الباب يلاقي أماني. أماني / إزيك يا جوز بنتي؟ علي / الحمد لله، اتفضل. أماني / أمال نور فين؟ علي / جايه حالاً، تحبي تشربي حاجة؟ أماني / مع إني زعلانة منك أوي، بس كل اللي ييجي منك حل. علي يبتسم ويدخل جوه. أماني تستغرب ثواني ونور تطلع. نور / إزيك يا ماما، عاملة إيه؟ أماني / إنتي اللي عاملة إيه؟ والجدع العجيب ده عامل معاكي إيه؟ نور / لحقتي تقلبي عليه؟ أماني / ما شوفتيش عمل إيه امبارح؟

نور / امبارح كان يوم ملخبط، عديه زي ما عديتي لحسام. أماني / إنتي بتقولي إيه؟ ده أنا مفيش حاجة بردت جوفي إلا اللي حسام عمله. أيوه بقي، يشكمها مرة بدل ما هي ممروعة كده ومش عاملة حساب لحد. علي يدخل شايل صينية عليها كانزات وكاسات فاضية. نور / حبيبي بنفسك كده… ثواني هجيب تلج. علي يحط الصينيه على الترابيزة. علي / أمال عمو محمد ما طلعش معاكي ليه؟ أماني / عمك مصطفى عنده جلسة، راح معاه. علي / بالشفا إن شاء الله.

أماني تفتح كنزاية وتصب في الكاسة. نور تدخل شايلة تلج تحط لأماني. أماني / تسلمي يا حبيبتي… بص يا علي، إنت بقيت واحد منا خلاص، وأنا اتكلمت مع عمك محمد في اللي حصل، وبصراحة اقتنعت برأيه. علي / هو إيه بقى؟ أماني / أصل إنت فعلاً اتأخدت على خوانة كده، لسه أول مرة تبات وسطنا، تسمع صريخ وضربكة، بس إنت ما تعرفش الحقيقة يا ابني. ندى دي… علي / أنا أعرف ندى من سنين يا ست الكلام. أماني / من على الوش، إنما الأصل…

علي / أنا كنت فاكرك طالعة تصبحي علينا. أماني تبص لنور. أماني / أنا كمان عاوزاك تراضي حسام. علي يرفع حاجبه. أماني / أخوكي برضه، وإنت ضربته. علي يبتسم ويقوم يدخل جوه، وأماني عينها عليه. أماني / عاملين إيه مع بعض؟ نور / كويسين. أماني / حسام هيسافر، ما ينفعش يسافر وانتوا زعلانين من بعض. اللي حصل بينه وبين مراته، وأهو اتصالحوا وهتسافر معاه. وقال على رأي المثل: ما ينوب المخلص إلا تقطيع هدوم. نور / تمام.

أماني / هسيبك، وعارفة إنك هتعرفي تليني. وابقي لفتي نظره إنك إنتي اللي مراته، مش ندى، عشان يتحمقلها أوي كده. نور / و هو كان حد وجه لي كلمة وسكت؟ علي بيتحمق للحقيقة. أماني / والله!! طيب. أماني تقوم. نور / خليكي شوية. أماني / مش باين إني مرغوب فيا هنا، إيه؟ ما شوفتيش قام إزاي ودخل وقال عدليني. نور تبصلها. أماني تطبطب عليها وتنزل. نور تقفل الباب وتدخل الأوضة تلاقي علي قاعد على السرير. نور / مشيت. علي / بعد ما قومتك على.

نور / بما إنك سمعت اللي هي قالته، أكيد سمعت ردي. أنا ما بسخنش. علي / الزن على الودان. نور / بس في جزء هي معاها حق فيه، حسام. علي / أنا قمت عشان ما أردش ونمسك في بعض. نور / ولا حتى عشان خاطري. علي / أنا ما غلطتش فيه عشان أعتذر. نور / إنت ضربته. علي / كان يستاهل أكتر من كده. نور / ده أخويا يا علي. علي / وأنا مش مانعك عنه، وده في الأول والآخر بيتك، تيجي في أي وقت وتنزل له في أي وقت. لكن أنا… أكيد بتهرج.

نور / ده جارك ومسلم زيك، ليه عليك حقوق. علي / نور. نور / خلاص براحتك، هو كده كده مسافر، وعلى كلام ندى مش هتخليه ينزل مصر تاني، فبراحتك. علي / ولو ما فيهاش قلة ذوق مني، ياريت زي ما مامتك طلبت منك تليني، ياريت تتكلمي معاها وتفهميها إنها بتخسرني. لسه بدري أوي على الخلافات دي، وبالنسبة لي الخلافات من النوعية دي هي الأسوأ. نور / والله ماما طيبة جدا وبتحبك…