رواية سلف و دين الفصل الحادي والأربعون 41 - بقلم لولو محمد

نزل و نور دخلت جوه. ندى بتتابعهم على السلم من فوق. دخلت شقتها وهي هتطق. تبص لحبيبه وتروح تحطها جنب أبوها نايم. تروح تبص على حسام نايم وهي بتغلي. تبص لنفسها في المراية وتبتسم باسطناع. وتروح تنام في حضن حسام. حسام يصحى ويبص لها وهي في حضنه. تشد إيده تخليه يحضنها. يبتسم قوي ويحضنها قوي من ضهرها. حسام: هو أنا مت ودخلت الجنة ولا إيه؟ ندى: وهي دي الجنة بالنسبالك؟ حسام: وأكتر مما كنت أتخيل كمان. حسام يحضنها أكتر.

ندى: أنا زهقت من قاعدة البيت، ما تخرجني بكرة. حسام: أؤمري وأنا أنفذ. ندى: تعال نسافر السخنة يومين، أهي ساعة بالعربية. أي فندق أو شقة، نبعد عن كل اللي هنا أنا وأنت وبس. حسام: وأنا؟ ندى: وأنا. حسام يهز راسه وهو مش مصدق نفسه. حسام: أنا وأنتي وبس. حسام يحاول يبوسها، تقوم تقعد. يستغرب وخيبة الأمل تظهر على وشه. ندى: أنا ما أكلتش حاجة من الصبح. قوم افتح نفسي وشوف لنا فيلم كوميدي. قوم انطر الطاقة السلبية اللي في البيت دي.

افتح الشبابيك وعلى الأغاني قوم نرقص. حسام يقوم يقعد على ركبته وهو مش مستوعب. حسام: نرقص؟ ندى: أنت عمرك ما شفتني برقص صح؟ قوم أما أرقصلك. حسام: ما تعمليش فيا كدا يا ندى. ندى: أنا عايزة أفرح، عايزة أضحك، عايزة أرقص وأغني وأتنطط. قوم معايا، أنا ما ليش غيرك. حسام يقوم مع ندى ويطلعوا بره. ندى تفتح شبابيك الشقة كلها وتشغل النور وتعلي التليفزيون على قناة الأغاني. حسام واقف عمال يتلفت حوالين نفسه.

وهي بتتحرك بسرعة في الشقة ومش ملاحقها. تروح تشده تقعده على الكنبة وفي إيدها طرحة تتحزم بيها وتفضل ترقص. وحسام بيتفرج وهو مبسوط. *** في شقة عمر. عمر قاعد على السفرة بيراجع حسابات. وأية قاعدة بتتفرج على التليفزيون وهي بتقطع خضار. جرس الباب يضرب. أية تقوم تتفزع وتجري على عمر اللي قام واقف. عمر: إيه؟ إيه؟ الباب بيخبط عادي. خشي وأنا هشوف مين. أية تهز راسها وتدخل تداري في الستارة.

عمر يروح يفتح يلاقي علي مقرفص في الأرض وحاطط راسه بين رجليه. يوطي عليه بفزع. عمر: علي.. مالك قاعد كدا ليه؟ علي يرفع راسه ويبصله بحزن. علي: أنا تعبان أوي يا عمر، تعبان ومش لاقي مكان أروحه. عمر: طب قوم قوم ادخل، ولا نروح مستشفى ولا إيه؟ علي: لا لا، أنا بس مش.. عشان أية وكدا. عمر: ما لكش دعوة بيها، تعال نقعد في الأوضة الصغيرة، قوم تعال. عمر يقوم. علي يبص جوه يلاقي أية متدارية في الستارة.

عمر: علي معايا، هندخل الأوضة الصغيرة. أية تدخل أوضتها وتقفل على نفسها الباب. وعمر وعلي يعدوا ويدخلوا الأوضة ويقفلوا الباب. *** في شقة ندى. ندى تفك الطرحة من على وسطها وتروح تترمى على الكنبة جنب حسام وهي مسخسخة من الضحك. يأخدها في حضنه وهو سعيد. حسام: ما كنتش أعرف إنك بترقصي حلو أوي كدا. ندى: اخص عليهم، معقول ما حدش قالك؟ حسام: اللي يسمع غير اللي يشوف. حسام يحاول يبوسها، تقوم. ندى: يبقى نشغل أغنية تانية.

حسام يشدها في حضنه. حسام: يا شيخة، اتقي الله. أنا تعبت لك سلف. ندى: نفسي أعمل مساج أوي، حد يطقطق لي ضهري. بتعرف تعمل مساج يا حسام؟ حسام: على خفيف كدا. ندى: تؤ، يبقى هتعجن وأنا مش حمل فرهدة. حسام: أشوف فيديوهات وأتعلم، أنا ذكي وبتعلم بسرعة. أنتي بس جربيني. ندى: من هنا لحد ما نسافر، قدامك وقت تتعلم براحتك. حسام: وأنتِ؟ ندى: لا، دلوقتي هدخل أنام بقى عشان تعبت وكمان بكرة ورايا يوم طويل جدا. حسام: تنامي إيه ويوم طويل إيه؟

ندى: الله، أنت مش قلت هتخرجني؟ اخص عليك، بتعشمني وتخلي بيا. حسام: مين ده؟ أنا؟ أبداً والله. طب دا أنتِ بس تؤمري كدا. ندى: بحسب والله، كنت هزعل منك. حسام: وأنا ما أقدرش على زعلك. حسام يشيل ندى ويدخل يحطها على السرير. ندى: حسام. حسام: إيه؟ ندى: غيرت البامبرز لحبيبة بدل ما تصحى وتفضل تصرخ. حسام: ما هي نايمة نايمة. ندى: أنت بتتخلق عليا ليه؟ حسام: أبداً يا حبي، وأنا أقدر. أنا بس.. جرا إيه يا نونو، دا أنا لحم ودم برده.

ندى: إيه يعني؟ أول مرة تشوف واحدة بترقص؟ حسام: وأنتي أي واحدة؟ انتي مراتي حلالي وبحبك. ندى: اممم.. أنا والله مش معترضة، بس هو.. حسام: إيه؟ ندى: بصراحة يا حسام، أنا بحاول بس بخاف. حسام: بتخافي من إيه بس يا بنتي؟ ادّي لنفسك فرصة بس، والله هغير رأيك خالص. ندى: عشان خاطري، ما تضغطش عليا. حسام: لكن عادي، أنتِ تضغطي عليا صح؟ عادي تعدي وتدوسي، ما فيش حاجة حصلت صح؟ ندى: أنا آسفة. حسام يزعق. حسام: يعني إيه آسفة؟

جرس يضرب من أوضة مصطفى. حسام يلم نفسه ويبص لندى ويسيب الأوضة ويمشي. ندى تتنفس. *** في شقة علي. عمر: أنت عبيط صح؟ بعد كل الفلوس دي. علي: ما أنت ما شفتش بتبص لي إزاي. عمر: يا علي يا علي، افهم. إحنا من الأول قولنا لك إن ده هيحصل. أنت كدا بتخسر نور كمان. علي: ما ده اللي تاعبني، نور نور، كانت واقفة مش فاهمة أي حاجة. عمر: وما ينفعش تفهم. علي: هي ما لهاش ذنب في كل ده. عمر: ولا حد فينا له ذنب.

وأنت كدا كدا مش هتؤذيها، بالعكس، أنت.. علي: أنا ضايع.. أنا.. ضايع. عمر: تمام، فسخنا الخطوبة وخرجت من حياة نور وندى.. ندى سافرت لبنان وأنت هتقعد تعيط لي برده. أقولك تمام، أنت صح. اتصل بنور بقى قول لها: أنا هفسخ الخطوبة، مش هقدر أكمل. علي يبص لعمر. عمر: ما تكلمها وقول لها. علي يبص الناحية التانية. عمر: أنت بتعمل في نفسك كدا ليه؟ دا جواز مش لعبة.

علي: مش عارف.. المشكلة إن نور كويسة وبتفهمني وبتحاول تقرب بكل الطرق، بتستوعبني وتريحني. بس نظرة ندى بتدبحني يا عمر. عمر: نفس النظرة، سواء اتجوزت نور أو غيرها. أنت ليه من الأول اخترت نور؟ علي: عشان أبقى جنب ندى. عمر: ووجودك جنب ندى تاعبك بس مش قادر تبعد.. لا عن ندى ولا عن نور. وسبحان الله، الاتنين شبه بعض. علي: وحبيبة. عمر: أهي دي بقى حكاية تانية. البت دي طلعت نزلت بنت حسام. يعني أنت تقدر توفر لها إيه؟

علي: هي مش فارقة معاه، بيستغلها بس عشان يربط ندى جنبه. عمر: بس طول ما ندى جنبه، هو أب كويس جدا وزوج برده للأسف كويس جدا. علي: ما بني على باطل فهو باطل. عمر: بس في طفل مالهوش ذنب. علي: بالظبط، حبيبة مالهاش ذنب. ده مش هيصونها، مش هيعرف يربيها ولا يحافظ عليها. عمر: وأنت كزوج أمها طبعاً هتقدر توفر لها اللي أبوها ما قدرش يوفره. علي: أنت معايا ولا معاه؟ عمر: معاك. ولعلمك، اللي بقوله ده أنت شخصياً بتقوله جواك.

وده اللي خلاك تيجي لي، إنك عايز تسمعه، عايز حد يقول لك إنك مش هتقدر تقدم لحبيبة أي حاجة ولا حتى لندى. فابعد عن نور كمان. بس أنت مش هتقدر تبعد عن نور، لأن نور هي القشاية اللي بقالك تربطك بندى وحبيبة. علي يبص لعمر. عمر: قول لأية إنك هتسيب نور، هتزغط. مش بعيد تتحزم وتنزل ترقص زي الهبلة في الشوارع. بس أنا بقول لك إن بغض النظر عن كل القرف ده، وفعلاً ما بني على باطل فهو باطل. نور بنت كويسة جدا وبتحبك جدا.

علي: يعني أعمل إيه؟ عمر: دي حياتك. أنت ما أقدرش آخد أي قرار مكانك. وبعدين، من فلاحتي جاي تسألني أنا؟ يا عم وحد الله. علي: هههههههههههه. لا إله إلا الله. عمر: بص، هي القرارات دي ما ينفعش تتاخد على معدة فاضية. أنت تقوم تطلع لك حتة كبدة من الفريزر وتشوحها لنا ونتكلم بقى على رواقة، إيه رأيك؟ علي: كبدة إيه دلوقتي؟ أنت كمان. عمر: تصدق معاك حق، حموضة وقرف. بيتهيأ لي عندي زبادي جوه. علي: أنا مش جعان، أنا همشي.

أكيد أية زهقت من القاعدة لوحدها ومش عايز أقيد حريتها. عمر: الشقة واسعة، خليك ارتاح هنا النهاردة وأنا هروح أبص عليها. علي يبص لعمر. عمر: ما تستهبلش، أنت أصلاً مش عايز تبقى لوحدك النهاردة. فما تتعبش قلبي في مناهدة بقى واقعد أتحايل عليك، دا بيتك، خليك. علي يبتسم ويبص في الأرض. عمر يفتح الباب ويطلع يروح المطبخ يلاقي أية بتعمل سندوتشات. عمر: هو أنا بحبك من شوية؟ أية: أحسن دلوقتي. عمر: إحنا جنبه أهو.

أية تروح تصب شاي في كوبايات. أية: خليك جنبه النهاردة وأنا هدخل أنام. عمر: ربنا ما يحرمني منك. أية: ولا يحرمني منك. بس أنت عارف إن ده الصح، جوازه من نور مش هيحل حاجة. عمر: أوكر ولا إيه؟ أية: تصبح على خير. أية تسيب المطبخ وتمشي. عمر يشيل الصينية ويرجع لعلي. عمر: شوفت بقى أية بتعزك إزاي. أحلى عشا، لأ وما صدقت. خليك جنب أخوك ودخلت تنام خالص. أنا بقى بقول أجيب اللاب وأقطعك رايح جاي، إيه رأيك؟ علي يبتسم.

عمر يحط الصينية قدامه ويقعد ويطبطب على رجل أخوه. عمر: هتفرج إن شاء الله. *** في شقة ندى. ندى تقوم بالراحة تتحرك في الشقة. تلاقي حسام نايم على الكنبة في الصالة. تقف بعيد تبص عليه. يحس بيها. حسام: ناقصك حاجة ولا إيه؟ ندى: أنت زعلان مني صح؟ حسام يقوم يقعد. حسام: فارق معاكي يعني؟ ندى: صدق أو ما تصدقش، فارق. أنا مش باقيلى غيرك. حسام يستأخر ويشاور لها تروح تقعد مكان ما كان قاعد. تروح تقعد. ندى: أنت فاكر الدنيا سهلة؟

أنت مش حاسس بيا. حسام: خلاص يا ندى، أنا مش هطلب منك الموضوع ده تاني. ندى: وأنا مش هرأصلك تاني. حسام: هو رقص بس؟ وجودك جنبي، مجرد إني أشوفك، أشمك، أحس بيكي، كفاية. ندى: ودي هعمل لك فيها إيه دي كمان؟ حسام: ما تعمليش. أنا غلطت زمان وإن شاء الله مع الوقت هقدر أتلافى الغلط. ندى: بفكر أروح لدكتور أية. حسام: لما نسافر هشوف لك حد هناك كويس. هنا مش هينفع أصلاً، مش هنلحق تتابعي مع حد عشان السفر. ندى: تمام، اللي تشوفه.

حسام: خشي نامي وارتاحي عشان بكرة هاخدك نتفسح. ندى تهز رأسها وتدخل جوه. حسام ينام على الكنبة تاني وهو بيفكر. *** في شقة نور بعد فترة. نور بتعمل بروفة لفستان الفرح. نور: هو فعلاً محتاج كورسيه عشان يظبط، ولا إيه رأيك يا نون؟ ندى بتلعب في الموبايل ومربعة على السرير وجنبها حبيبة نايمة. ندى: حلو. نور: جب، بصي طيب قبل ما تقولي رأيك. ندى تبصلها وترجع تبص في الموبايل. ندى: حلو. نور تروح تقعد جنب ندى. نور: مالك يا ندى؟

ندى: دي عاشر مرة تقيسي الفستان من يوم ما اشتريتيه. دا أنتِ هتقطعيه قبل الفرح من كتر القلع واللبس. نور: مش لازم أتأكد إن كل حاجة تمام. ندى: أمّال لو كنتي هتعملي فرح؟ يا بنتي، كل حاجة سيمبل أهي، إشمعنى ده اللي أنتِ عايزاه بيرفكت؟ وطرحة إيه وتاج إيه وشوز إيه؟ نور: خلاص خلاص، أنا غلطانة أصلاً. ندى: لا، ما أنتِش غلطانة. والفستان أقسم بالله ما محتاج كورسيه وطالعة مزة المزز. اهدّي بقى. نور: هديت. هروح أغير.

ندى: يا ريت، وأنتِ جاية تجيبي شنطة الماسكات أما نروّش شوية. نور: تمام.. استني. شفتي جبت إيه امبارح؟ ندى: إيه؟ نور تجري تفتح الدولاب وتطلع شنطة فيها بوكس جواه قميص نوم أبيض وتفرده قدام ندى. ندى: حلو أوي. نور: صح؟ بسبعمية جنيه في السايل. ندى: غالي أوي، ليه يعني؟ أمّال قبل السايل كان إيه؟ نور: يا بنتي، حرام عليكي، ده تحفة. ندى: ولو يعني، هي فلوس حرام؟ قولتي لـ علي إنك جايباله قميص نوم بالسعر ده؟ هيقول عليكي سفيهة.

نور: هههههههههههه. ليه يعني؟ ده أنا حتى هلبسه له يعني. ندى: وأنا مالي يعني؟ ما تلبسيه زي ما تلبسيه، في الأول والآخر غالي وما يستاهلش. نور: مش بقولك، أنتِ مش في المود النهاردة. إيه الفصلان ده؟ بس تصدقي يا ندى، الحق مش عليكي، الحق عليا أنا إني فاكرة إني أختك وهتفرحيلي. ندى: والله!! هي بقت كدا.. اعذريني إني بغير منك ومش قادرة أداري. ندى تشيل حبيبة وتيجي تقوم. نور تمنعها. نور: في إيه يا ندى؟

ندى: ما فيش، غير إني منك، هطق. نور: بطلي رخامة بقى، أنتِ عارفة إني ما أقصدش. بس أنتِ حسام ما بيستخسرش فيكي يعني، لو نفسك في واحد زيه هيجيب لك وهيجيب لك الأغلى كمان. ندى ما تقدرش تمسك دموعها. ندى: لا عايزة أغلى ولا أرخص، أنا بس عايزكم تسيبوني في حالي. نور: ندى ندى، اهدّي. ليه كل ده؟ أنا مش فاهماكي. ندى: نور، أنا آسفة. ألف مبروك والله، الفستان جميل والقميص تحفة. أنا اللي وحشة، وحشة أوي. نور تحضن ندى.

ندى تعيط ونور مش فاهمة حاجة. ندى تبعدها عنها. ندى: هانت خلاص، ادينا هنسافر أهو ونبعد عن كل ده. نور: خليكي هنا ثواني وراجعالك. ندى: اتفضل. نور تطلع بره. ندى قدامها قميص النوم تطبقه وتحطه في العلبة وتقفلها. وتروح تبص في المراية وتمسح دموعها. ندى: مش مكتوب لك. ندى تمسك قلم روج أحمر فاقع وتحط. ندى: عشان حبيبة.. عشان نور.. وعشاني. ندى تمسك قلم كحل وتتكحل. نور تدخل. نور: بتعملي إيه يا بنتي؟ أمّال الماسكات دي لازمتها إيه؟

ندى: هعمل شعري كيرلي، إيه رأيك؟ نور: هيليق عليكِ. ندى: أحمر ولا أشقر؟ نور: ندى، أنتِ بترضعي. ندى: أشقر، الأحمر هيكبرني. نور: اقعدي أما أظبط لك عينيكي، إيديكي بترعش. ندى: ماشية. ندى تقعد ونور تزوقها. نور: زمان كان عندي صحبات بالهبل وقرايب وكده. الجواز خدني منهم واحدة ورا التانية. لما ما عادليش غيرك أنتِ وأروى. وطبعاً هي ما بتردش على تليفوناتي حتى. ودلوقتي أنتِ مسافرة لبنان وأنا.. ندى: أنتِ معاكي علي.

نور: وأية ما بتطيقنيش، وهو نفسه علي أقصد مش بيحب يقرب من أية أوي. ندى: لما نسافر أنا وحسام، الدنيا هتظبط، ما تقلقيش. نور تلف رأس ندى للمراية. نور: أنتِ قمر حتى من غير كل ده. استنى هطلع المكوة ألف لك شعرك الكيرلي اللي أنتِ عايزاه. ندى: أنا بحبك يا نور والله. نور: وأنا كمان يا ندى. بس برضه، ما فيش صبغة. ندى تضحك وتبص الناحية التانية. *** في محل بدلة. علي بيقيس بدلته ومش مرتاح. عمر: حلوة والله.

وبعدين دي ساعتين زمن هتتصور وزفة عربيات وهتروح. مش حوار. علي: خانقاني. عمر: لتكون خايف من الجواز؟ علي: خفة ولا إيه؟ عمر: بص، الجواز ده زي الجزمة الجديدة، بتلمع ومغرية كدا. بس أول ما تلبسها لازم تعورك شوية. بس ما تقلقش، بتريح بعد كدا في الاستعمال. علي يبص لعمر باستغراب ويرجع يبص لنفسه في المراية. علي: تمام، هاخدها وأمري لله. أخبار أية إيه؟ عمر: عندها فستان هتحضر بيه.

ودا طبعاً بعد ما بوست إيديها ورجليها إنها تتكرم وتحضر أصلاً. وهتيجي بس عشان ما تبقاش واقف لوحدك. علي: أصيلة. عمر يبتسم ويبص الناحية التانية. علي يتكلم بصوت واطي. علي: نور بنت كويسة وبتحبني. عمر يبصله ويبص في الأرض ويسكت. *** في شقة أماني. ندى قاعدة بالعرض على كرسي ورجليها متعلقة على إيد الكرسي. عمالة تتصور سيلفي. جرس الباب يضرب. ندى: افتحي يا نور. نور تطلع من جوه بتنشف إيدها بفوطة. نور: لا بجد، لا تعليق يا ندى.

نور تفتح تلاقي علي شايل أكياس كتير. تاخد منه. نور: إيه ده كله؟ هههههههههه. تعالى ادخل. حماتك بتحبك. علي: شوفي كدا في حاجة ناقصة؟ نور: بعدين بعدين، البانيه على النار. ادخل. نور تجري على المطبخ. علي يقف ويبص على ندى وهي بتتصور. وكأنه مش موجود. علي: لايق عليكِ. ندى تبصله وتتعدل بالراحة في صمت. علي: عاملة إيه؟ ندى تفكر وتبص بعيد وترجع تبصله. علي يقعد. علي: ندى، أنا.. ندى: جبت بدلة الفرح؟

نور اشترت لك بجامة حرير نبيتي شكلها عبيط أوي. ههههههههههههههه. علي يبص الناحية التانية. ندى: ما تقوليهاش إني حرقت المفاجأة، تمام؟ هقوم أبص على حبيبة. ندى تقوم. علي يمسك إيدها. تبصله. علي: عايزاني أعمل إيه وأنا أعمل. ندى: لو لفيت الدنيا مش هتلاقي أحسن من نور. أحسن مني أنا شخصياً. شاطرة في كل حاجة ومحترمة. بتعرف ربنا، طيبة وبتحبك. خد أنت بس بالك منها. نور تطلع شايلة سرفيس عليه مكرونة.

نور: هي ماما هتبات عند الترزي ولا إيه؟ ندى: أم العروسة بقى، أمّال إيه؟ شوفت فستان بيبو جاااااامد. نور: ما تحرقيش المفاجأة بقى. ندى: سوري سوري. هدخل أبص على بيبو، وأهو ما أبقاش عازول بينكم. نور: يا رخمة. هههههههههه. ندى تبص لعلي وتدخل الأوضة وتقفل الباب عليها. نور: هجيب البانيه والسلطة عشان نتعشى وهو سخن. شكلهم مطولين بره. علي: كله أنت، أنا تعبان طول النهار من اللف، الحاجات دي. اممم.. معظمها لبسي الجديد.

آآآه، ابقي حطيها في الدولاب وشوفي لو حاجة ناقصة أجيبها. وهبقى ألم هدومي في شنطة بكرة وأجيبها، أو يوم الحنة يعني. ربنا يسهل. وجبت لك حاجة حلوة أنتِ والجماعة. علي يجي يمشي. نور تمنعه. نور: طب على الأقل اتفرج على الحاجات اللي جبتها لك. علي: ممكن بكرة؟ معلش يعني.. والله تعبان، ما قادر. نور: تمام يا حبيبي، لو حبيت تكلمني في أي وقت. علي يهز راسه ويمشي. نور تدخل المطبخ. ندى تفتح الباب وتبص من وراه. ***

قدام المحل يوم الحنة الصبح. علي يدخل يركن العربية يلاقي ناس بتعلق. علي: أحمد.. أحمد. أحمد يروح لعلي. أحمد: أؤمر يا ريس. علي: هو فيه إيه؟ أحمد: جرى إيه يا ريس، أنت مش عريس ولا إيه؟ بنجوب معاك. علي: يا ابني. أحمد: بقولك إيه يا ريس، دي ما كانتش عشرة يوم. ومن حقنا نفرح بيك، وأنا والرجالة حالفين لنهيص لك ونخربها النهاردة. حتى لو زفة عربيات، طب دا أنا أجرت حتة موتوسيكل. قسماً بالله لنولعها.

علي: هههههههه. تسلم يا أبو حميد، نردهالك إن شاء الله. أحمد: قول يا رب، لحسن الواحد تعب. علي: هههههههه. طب ما تتجدعن، مستني إيه؟ أحمد: مستني بنت الحلال. هتجوز نفسي يعني، اهو اديني بدور. علي: إن شاء الله ربنا يعترك فيها عن قريب. بقولك إيه، أنا هطلع ألم باقي حاجتي من فوق وهمشي. ساعتين زمن وهرجع. أحمد: مش عايزك تشيل هم أي حاجة. عيش وانبسط. علي يخبط على كتف أحمد ويطلع فوق. *** في شقة نور.

ندى بتعدي إيدها على سرير حبيبة وتبص له. نور تدخل. نور: جبتك يا عبد المعين. ندى تبصلها. نور: بصراحة، عندك حق. تحفة أوي صح؟ ندى تهز رأسها. نور: هيصعب عليا إنها مش هتنام فيه خالص. ندى: مش مكتوب لها.. ما لهاش نصيب فيه. هنعترض على إرادة ربنا؟ نور: إن شاء الله تنزلوا إجازة قريب قبل ما تكبر عليه. المهم أنا خلصت هنا، تعالي بقى ننزل نجهز قبل ما الناس تيجي. ندى: ناس مين؟ نور: إيه يا بنتي، أنتِ ناسيه إننا مش عاملين فرح؟

يعني اللي هيجامل هيجامل في الحنة. ندى: صح صح. نور: يلا يلا، لسه ورانا حاجات كتير أوي. أول عروسة في التاريخ بتعمل كل حاجتها بإيديها. يلا. نور تمشي وندى تبص على السرير بحزن وتمشي. تعدي من على أوضة النوم وتقف. نور ترجع لها. نور: بكرة أبقى أفرشها. ماما وهي جاية هتعدي تجيب شوية شمع وورد. وبكرة بقى أبقى أزوقها عشان ما تتبهدلش. ندى: عندك حق. ندى تمشي ونور وراها. *** في شقة تهاني. تهاني: يا ستي ألف مبروك وربنا يتمم لها بخير.

بس أنا مش هقدر أدخل مكان بنت مها فيه. أماني: أقول لك إيه بس؟ على عيني والله، أعمل إيه. تهاني: أنتِ ما لكيش ذنب. صحيح، يعملوها الصغار ويقعوا فيها الكبار. أماني: بس نور بنتك.. تهاني: خلاص بقى يا أماني، قولت لك أنا وبنت مها ما ينفعش نكون في مكان. ونور اختارت ندى، يبقى ربنا يوفقها. إن شاء الله لما تغور على لبنان هاجي أنا وأروى نبارك لها ونقطها كمان عشان تعرفي إن ما فيش بيني وبين نور غير كل خير.

أماني: والله هتجنن، كان مستخبيلنا كل ده فين بس يا ربي. أماني تقوم. تهاني: على فين؟ أماني: ورايا هم ما يتلم. ما أنتِ عارفة. يلا، فتك بعافية. تهاني تقوم توصل أماني للباب. *** في شقة ندى. حسام بيلبس ويسرح ويرش برفيوم قدام المراية. ندى تدخل. حسام: أنتِ لسه ما لبستيش؟ الناس هتيجي. ندى: هلبس أهوه. ندى تفرد نفسها على السرير. حسام يبصلها. حسام: أنا لبست عمي وظبطه آخر حاجة. هنزل تحت وأطلع لبس حبيبة وأرضعها.

جهزى أنتِ براحتك وما تشغليش بالك بأي حاجة. عايزاكِ قمر. ندى باصة للسقف وساكتة. حسام ينام جنبها ويلعب في شعرها. حسام: أنتِ كدا كدا قمر أصلاً، حتى لو حضرتي بالبجامة. حسام يحاول يبوسها. تقوم تفتح الدولاب وتطلع فستان سيمبل وتبدأ تبص في المراية وتعدل شعرها. حسام يقوم يبوس راسها ويطلع بره. ترمى الفرشة على التسريحة وتقوم تدخل الحمام. *** في الشارع. عربية علي تركن وينزل علي وعمر وأية ومنال.

الشباب يتلموا حوالين علي ويشيلوه وسط الزحمة. ومنال بتضحك تاخد أية وتطلعوا فوق. وعمر واقف قدام البوابة. حسام يروح يناوله إزازة حاجة ساقعة. حسام: إيه يا عم التأخير ده كله؟ دا أنا قولت هتخلعوا. اشرب ساقع. عمر: كنت هتنبسط لو خلعت. حسام: سراب وجوده بالنسبالي زي عدمه. عن إذنك. حسام يمشي وعمر متابعه بغل. عمر: ليك يوم يا ابن الكلب، ليك يوم. *** في شقة نور. الشقة مليانة ستات وبنات ونور قاعدة. وندي مش موجودة. أية ومنال يدخلوا.

نور تقوم تسلم. وأماني تقوم تسلم. نور: اتأخرتوا كدا ليه؟ أية: ندى فين؟ منال: معلش والله، على ما عدى علينا وعلى عمر وكدا والطريق، أنتِ عارفة. أية: ندى فين؟ أماني: في الأوضة جوه بترضع حبيبة. أية: عن إذنكم. أية تروح ناحية الأوضة. أماني: وهي مش هاين عليها تبارك للعروسة ولا شغل السلايف هيبتدي بدري؟ منال: دي غلبانة والله ومالهاش في حاجة.

أماني: والله اخص عليكِ يا حجة، طب دا أنتِ تعرفي نور من قبل أية بكتير، يعني المفروض تقفي في صف نور مش أية. نور: مش وقته يا ماما، الناس. منال: أنا هكلم أية، متأكدة إنها ما تقصدش. خليكي مع ضيوفك يا بنتي. منال تروح الأوضة وراها. أية تدخل وتقفل الباب. تلاقي حبيبة نايمة على السرير وندى وأية قاعدين قدام بعض. منال: ليه كدا يا أية؟ مش تباركي لنور؟ ازيك يا ندى. ندى: الحمد لله تمام.

منال: قومي اقعدوا مع الناس بره وبلاش الحركات دي. نور مالهاش ذنب في كل اللي بيحصل، وعلي كمان. لو بتحبوه افرحوا له، مش هتبقوا انتوا والدنيا عليه. منال تطلع بره وهي بتزرغط. أية: انتوا عايزين تجننوني؟ ندى: إيه اللي جابك؟ فاكرة إني هبوظ الفرح مثلاً؟ ولا هقعد أنا وأنتِ زي عوازل الفرح نبصلهم بغل ونمصمص شفايفنا؟ أية تبص لندى. ندى: هو اختارها وهي طيبة وبتسهله، يبقى نفرح لهم. أية: بس هو ما اختارهاش، علي بيحبك أنتِ.

ندى: أنتِ بجد لسه مصدقة؟ أنا مرحلة في حياته وعدت. دلوقتي وقت نور.. مراته. ندى تفتح الباب وتطلع بره. أية واقفة مضايقة. *** في الشارع. علي راكب حصان والشباب بيرقصوه وهو عمال يضحك. علي: يا جدعان كفايا، هو مفيش غيري في الحنة ولا إيه؟ أحمد: يا عم عيب عليك، دا العروسة بتتفرج. علي يبص لفوق يلاقي نور والبنات ملمومين حواليها. نور تشاور له. يشاور لها وينزل. وأحمد يركب على. يروح ناحية عمر واقف في جنب.

الفراشة معمول، أوضة فيها ترابيزة كبيرة والناس بتاكل. وعمر واقف على بابها. علي: إيه الأخبار؟ نبعت نجيب كمان ولا إيه؟ عمر: ما يتهيأ لي الأكل كتير وهيفض كمان. حسام يدخل. حسام: عشر وجبات فوق بسرعة. عمر: وأنت اتشليت؟ ما تدخل تاخدهم. حسام يبص لعمر وبعدين يبص لعلي. حسام: هخليها عليا المرادي.. عشان خاطر العرسان بس. حسام يدخل. علي: كمل. عمر: مش عارف أحط أي حاجة في بقي هنا. علي: ما تافورش.

عمر: يا عم، اقسم بالله أداني الساقع بيته. علي: لا إله إلا الله. طب استنى هنا. علي جوه وينادي على واحد من الشباب. علي: بلال.. بلال. بلال يجي. بلال: أؤمر يا ريس. علي: إزازتين ساقع من التلاجة بسرعة يا ابني. الواحد ريقه ناشف. بلال: طب مش تاكل الأول يا ريس. علي: لا، خليني أنا للآخر لما الناس كلها تاكل. خد عمر معاك وظبط لي الأداء. عمر يبص لعلي. علي: هروح أبص على الرجالة ليكون سقطنا حد ما أكلش ولا حاجة.

بلال: ما تقلقش يا ريس، كلو تحت السيطرة. علي: حبيبي. علي يخبط على كتف عمر يزقه على جوه. وعمر بيبصله. بلال يفتح أكياس ويرص على الترابيزة. *** في شقة أماني. ندى متحزمة وبترقص. وأية قاعدة هتطق. توطي على منها. أية: دا أكيد ساقيها حاجة. منال: ششششش. أية: يعني دي تصرفات واحدة طبيعية. منال: يعني اللي بتعمليه أنتِ اللي طبيعي، مالك يا أية؟ أية: هموت أقسم بالله.. هي مش صعبانة عليكي؟

منال: اتكلمنا مليون مرة في الموضوع ده، اهدّي بقى. أية: سكت، سكت. أماني تروح تقعد جنب أية. أماني: جرى إيه يا يويو؟ هتفضلي قاعدة كدا؟ مش تقومي ترقصي مع سلفتك؟ أية: ما بعرفش أرقص، معلش. أماني: هو فيه حد الزمن ده ما بيعرفش يرقص؟ أية: أنا، معلش. ندى تروح تقعد. ندى: تعبت أوي أوي، مش قادرة. أماني: اقعدي يا أختي جنب صحبتك. هروح أنا أهيص للعروسة. أماني تمشي. أية تشد ندى عليها. أية: هو ساقيكي حاجة ولا إيه؟

قوليلي، والله أفضحه وأطربق الفرح على دماغهم. ندى: ششششش بس يا مجنونة. ساقيني حاجة إيه؟ هو أنتِ مش هتكبري وتعقلي بقى؟ منال: ربنا يكملك بعقلك يا ندى يا بنتي. أية: يعني أنتِ فرحانة بجد؟ ندى: رايي وإحساسي مش مهم. أنا شخصياً مش مهمة. بس الناس دي كلها بتدور على حاجة يرغوا فيها. وأنا ما عنديش استعداد أكون أنا حدوتة الفرح. منال: وتكوني أنتِ ليه؟ ما أية قايمة بالواجب، هتطق في فرح سلفته.

ندى: هي مش خطوبتها كانت معاكي في فرحك وكنتي هادية؟ وأنا رقصت يوميها برده، عادي. وأنتِ كمان رقصتي. إيه اللي جد دلوقتي؟ بت بت، ما ترديش ولا تجادلي، لا وقته ولا مكانه. يومين نستحملهم بالطول ولا بالعرض، وحسام ده مش هتشوفي وشه تاني. أية: وأنتِ؟ ندى: أنا كفيلة بنفسي. فكيها كدا وبلاش الوش ده، ما حدش هنا فاهم ولا هيفهم. منال: معاها حق. ندى: أنا هقوم أجيب لكوا حاجة تشربوها. ندى تقوم تدخل المطبخ.

تلاقي أماني بتفتح ساقع وترص على صينية. أماني: شايفة يا أختي، مجايبك. ندى: مجايب أنا؟ ليه؟ أنا ما عزمتش حد خالص. بتتكلمي عن مين؟ أماني: عن غراب البين. صاحبتك ست أية، إيه؟ مش شايفة بوزها الممدود شبرين قدامه. ندى: ندى، قبل ما تكون صحبتي، هي قريبة علي جوز بنتك. ولا أنا كمان اللي عرفت علي عليكوا؟ ولا أنتِ ما اتعرفتيش على أهل علي قبل ما توافقي على الجواز؟ أماني: النصيب بقى، لازم يطلع لنا في كل خرابة عفريت.

ندى: بس العفريت المرادي شديد عليكي، على روحه في أخوه. أماني: بتتكلمي بثقة أوي، كأنك تعرفيه. ندى: من كلام بنتك عنه تعرفي إنه كتب لعمر شوية وشويات. دا حتى اتنازل عن كل ميراثه من أبوه الله يرحمه، البيت والمحل. واتكفل بكل مصاريفه، حتى الفرح وشهر العسل. ولحد دلوقتي عمر يشاور وعلي ينفذ. أماني: عشان كان عازب، ما وراهوش مسؤوليات. إنما دلوقتي الوضع اتغير. ندى: هنشوف. ندى تشيل الصينية وتطلع بره. أماني: هنشوف يا أختي.. هنشوف.

*** في شقة ندى. ندى تدخل شايلة حبيبة. وحسام بيزق كرسي مصطفى. ندى: أنا تعبت موت، بجد هموت وأنام. ندى تاخد حبيبة الأوضة. وحسام ياخد مصطفى أوضته ويغير له هدومه وينيمه على السرير. حسام: ناقصك أي حاجة يا عمي؟ مصطفى يهز راسه لا. حسام: تصبح على خير. حسام يروح أوضته يلاقي ندى نايمة بهدومها وحبيبة صاحية. حسام: وأنتِ إيه اللي مصحيكي؟ إيه سهرتنا مطولة ولا إيه؟ حسام يغير هدومه. حبيبة تزمزر. حسام: حاضر والله حاضر، بغير بس.

حسام ياخد حبيبة ويطلعوا بره. ندى تقوم تقعد تبص عليه وتتاخد نفس وتنّفخ وترجع تنام تاني. *** في شقة عمر. عمر: هههههههههههههههههههه. ما كنتِ جبتيها من شعرها بالمرة. علي: أنا بس نفسي أفهم، نور عملت لك إيه؟ أية: ما عملتش. أنا متعصبة لصاحبتي يا أخي، اللي المفروض يكون بيترقصلها ندى مش نور. عمر: ماليش نصيب فيها يا أية. أية: بالسرعة دي فقدت الأمل؟ نور قدرت تنسيك ندى بالسرعة دي؟ علي: ما نسيتهاش، بس مش من حقي أفكر فيها.

هي في عصمة راجل تاني. أية: أنا داخلة أنام. البيت بيتكوا. النقاب خانقني. عمر: النقاب برضه؟ هههههههههههه. أية تبصله. عمر وعلي بيضحكوا. أية تدخل جوه وهي بتضرب كف على كف. عمر: عشان خاطر علي. أية: أكتر من كده إيه؟ عمر: هانت خلاص. أية: أنا تعبانة ومصدعة وهنام. عمر: تصبحين على خير. عمر يبوس راسها وينام جنبها. *** في أوضة ندى. حسام يدخل لوحده. ندى نايمة. يروح يفتح الدولاب ويطلع بجامة ليها ويروح جنبها بالراحة.

ويفتح سوسة الفستان. ندى تقوم تقف بعيد ضهرها للدولاب. ندى: فيه إيه؟ حسام: هتنامي بهدومك؟ ندى: تقوم تخضني كدا يا حسام، حرام عليك والله. حسام: إيه يا نونو، ما حصلش حاجة لكل ده. ندى: أنا داخلة الحمام. حسام: حمام إيه دلوقتي يا ندى؟ هو فيه إيه؟ ندى: أعملها على نفسي يعني عشان تنبسط؟ ولا ألبسني بامبرز أحسن؟ حسام: أنا آسف، ما قصدتش. ندى: أنا رايحة الحمام. ندى تشد البجامة وتدخل الحمام وتقفل الباب بالمفتاح.

وتقف تبص لنفسها في المراية وهي مخنوقة. *** في أوضة نور. نور بتتكلم في التليفون. نور: لا، على فكرة أنا فهماها جداً ومقدرة موقفها جداً. علي: الحمد لله. نور: بس هي لازم تتعلم تفصل بيني وبين حسام. علي: بكرة تكبر وتفهم. المهم إنك مش زعلانه. نور: نهائي، بالعكس، اليوم كان جميل جداً. بس أنا هعمل إيه في الأكل الباقي ده كله؟ علي: يا ستي، بكرة ما حدش هيكون فاضي يعمل أكل. ينفع. نور: أنت اتعشيت؟ علي: على أخرى، مفيش مكان لبق ميه.

نور: الحمد لله. بص، أنا مش عايزة أقفل بس أنا لازم أنام عشان الصور بكرة وكمان هصحى بدري. في حاجات كتير أعملها، عروسة بقى وكده. ههههههههههه. علي: تمام.. تصبح على خير. نور: وأنت من أهله يا حبيبي. سلام. علي يقفل ويحط الموبايل جنبه ويبتسم وينام. *** في شقة حسام. حسام قاعد على السرير بيشرب قهوة. يحط الفنجان على الكومدينو وينفخ. ويقوم يخبط على الحمام. ندى تفتح، حاطة ماسك على وشها ولافة شعرها بفوطة.

حسام: أنتِ بتعملي إيه كل ده؟ ندى: فيه إيه يا حسام؟ بظبط شوية حاجات عشان الفرح بكرة. حسام يبتسم. حسام: ماشي يا ندى، بس يا ترى بكرة هتبقي حجتك إيه؟ ندى: مش فاهمة، تقصد إيه؟ ندى تروح تغسل وشها. حسام: على العموم، أنا شربت لك فنجان قهوة مخصوص. فخذي راحتك على الآخر، أنا مش مستعجل. خدي.. راحتك.. على الآخر. حسام يسيبها ويمشي يروح أوضته. تروح وراه. ندى: أؤمر يا حسام. تقصد إيه بكلامك ده؟ حسام يبصلها ويبتسم.

حسام: إنما للصبر حدود يا ندى. ندى: معاك من الدوا اللي كنت بتديهوني؟ المنوم أقصد؟ حسام: ندى. ندى: اديهون. أنا بقولك اديهوني، لأني جربت كل الطرق وما نفعش. حسام: ليه؟ ما أنا من حقي أعرف، أنا قصرت في إيه؟ ندى: أنت بجد بتسأل السؤال ده؟ حسام: آه، بسأل، عايز أفهم. فين المشكلة؟ دا أنتِ عايشة ملكة. دا أنا طافح الدم عشان أرضيكي، طبخ وترويق. دا أنا حتى حبيبة برضعها وأغير لها، وأنتِ كلمة حلوة حتى مستخسرة فيا.

ندى: لو على الكلام، فأنا مش مقصرة. المشكلة إني مش قادرة أدّي أكتر منه. حسام: والعمل؟ ندى: أنا مسامحاك. اديني المنوم وأنا راضية. حسام: أنا مش راضي. أنتِ فاكراني إيه؟ أنا كنت بعمل كدا غصب عني عشان أوصلك. أنا عايز أحس بحبك يا ندى. ندى: مش قادرة. مش قادرة أعمل إيه يعني؟ مش قادرة. ندى تعيط. ندى: بمجرد ما بحس إنك.. الدنيا بتسود في عيني، روحي بتروح. عايزاني أقول إيه؟ مش قادرة، أنسي، مش قادرة أعيش بالطريقة دي.

بقولك اديني فرصة، اصبر عليا. خدني بالراحة. حسام: أكتر من كدا إيه؟ ندى: أنا قدامك يا حسام، اعمل اللي أنت عايزه. حسام: أنا بقى اللي مش عايزك. أنا مش هتحايل عليكي أكتر من كدا. بكرة أنتِ اللي هتجي لي لما تشوفيه نايم مع غيرك، لما تسمعي ضحكهم، لما تلاقي عايش حياته وناسيكي. أنتِ اللي هتجي لي. ندى: اطلع بره. حسام: هتجي لي؟ ندى تصرخ. ندى: بقولك اطلع بره، اطلع، اطلع. ندى تزق حسام بره وترزع الباب وراه. ***

تاني يوم في أوضة مصطفى. ندى بتلبس مصطفى الجرافاتة. حسام يدخل ويقف على الباب. ندى تبصله وتروح تجيب فرشة الشعر وتسرح لباباها. ندى: قمر يا بابا، قمر. هروح بقى ألبس حبيبة. حسام: لبسته؟ ندى: هروح أشوف. ندى تيجي تعدي، يوقفها. حسام: النهاردة فرح، ماشي؟ ندى: أنا لا لبست ولا جهزت. حسام: الكوافير تحت، البسي الفستان وانزلي وسيبى الباقي عليا. ندى: عشان ترجع تعايرني تاني. حسام: ندى. ندى: هروح ألبس.

ندى تدخل الأوضة التانية وتقفل الباب. حسام يبص لمصطفى. حسام: حطيت صوابعي منها في الشق، أعملها إيه أكتر من كدا عشان تعجب؟ أنا بدأت أحس إن كل ما بدلعها بتتمرع. جبت آخري، بقولك طهقت. مصطفى يبص الناحية التانية. حسام: أنا بكلمك ليه صحيح؟ إيه التخلف اللي أنا فيه ده. حسام يسيب الأوضة ويمشي. مصطفى يتف وراه. *** قدام البيت. عربيات كتير وموتوسيكلات والشباب متجمعين حوالين علي بيضحكوا ويهزروا، وهو واضح عليه التوتر.

أحمد: دا أنا هطلع عينك. بلال: إن عرفت تمشيها أساساً. دا هيغرقك ده يا ريس. اشترى مني. أحمد: كدا؟ طب ابقي تعال متأخر وانت تشوف هيبقوا ٣ أسابيع سواد. علي: هو أسبوع واحد. شاب ١: أنت مش مسافر؟ علي: أيوه، ما هو أسبوع السفر. إنما قبل كدا هبقى متابع معاكوا وبروح وبأجي عليكوا. الكل يضحك بسخرية. علي: وأنا قولت حاجة غلط ولا إيه؟ شاب ٢: لا أبداً. نبقى نتكلم في الحوار ده لما نبقى نشوفك. ما تقول حاجة يا عمر. عمر: حاجة؟

بلال: إيه يا أبو عمو مالك؟ عمر: العروسة نزلت الحمد لله. نكمل الحفلة. منال تطلع من البيت ووراها أماني بيزغرطوا، ونور وحواليها بنات. وفي الآخر ندى. علي واقف مكانه ونور وندى بيبصوا له. عمر يزغده. عمر: روح هات عروستك. علي يبص لعمر ويبص على ندى ونور. حسام: يلا يا جماعة، هنتاخر. نور وأماني يروحوا ناحية علي. عينه على حسام بيمسك إيد ندى ويركبها عربيته قدام. ومنال تركب معاها ورا. نور: إيه رأيك؟ علي: حلوة أوي، ما شاء الله.

نور: طب إيه؟ علي: إيه؟ نور: فين البوكيه؟ هههههههه. علي: آه، أسف. علي يمد إيده من الشباك ويطلعلها البوكيه. تمسكه وهي مبسوطة. يفتح لها الباب يركبها ويجري يركب الناحية التانية. وعمر يركب مكان السواق. أماني تلف تلاقي أية راكبة جنب عمر. تستغرب. علي يطلع راسه من الشباك. علي: لو تحبي تركبي جنبنا ورا. أماني: لا، أنا بطمن بس إن الكل ركب. هركب مع حسام. أماني تجري ناحية عربية حسام وتفتح باب. ندى تبتسم وتنزل تركب ورا جنب منال.

أماني تركب. والزفة تتحرك. أماني: نعدي النهاردة بس وأفوق لها. حسام: مين دي؟ أماني: ست زفتة اللي فاكرة إنه فرح أبوه. ندى: قصدك أية؟ أماني تبص قدامها وتسكت. ندى: كان نفسي أشوف هتقدر تعملي معاها إيه بس للأسف مسافرة. منال: ندى. ندى: سوري يا طنط. أماني: سبيها تتكلم. العيب مش عليها، العيب على البيه. حسام: مش قولتي هتعدي الليلة؟ أماني: عشان خاطر اختك الغلبانة بس.

وبعدين، على راي الـ.. كلها كام يوم ونخلص، نستحملهم بالطول ولا بالعرض. حسام: عين العقل يا ست الكلام. أماني: ما هو اللي بيشيل قربة مخرومة. حسام يضحك ويبص الناحية التانية. أماني: الصبر من عندك يارب. ندى تضحك بصوت عالٍ مستفز. منال تغمزها. تحط إيدها على بقها وتبص لحسام في المراية. متابعها ومبتسم. تغمزه بعينها. أماني تنفخ. *** في الاستوديو. علي ونور جوه والباب مقفول والدنيا زحمة. حسام يروح ناحية ندى. حسام: نونو نونو.

ندى تقوم وتروح له. حسام: أنا قطعت لنا كارتين. بعدهم إيه رأيك؟ ندى: فكرة حلوة، حتى بيبو تتصور بفستانها وكدا. حسام: أنا بصالحك على فكرة. ندى: مش زعلانة على فكرة. حسام: بجد؟ ندى: مش وقته ولا مكانه. حسام: أنا بحبك. ندى تبتسم وتبص حواليها. باب الأوضة يتفتح وعلي ونور يطلعوا. حسام: إحنا لينا كارتين. حسام يروح يشيل حبيبة ويمسك إيد ندى ويدخلوا. ونور واقفة على الباب. حسام: هاخدك معانا الكارت الجاي، استني ما تمشيش.

نور تبتسم وندى تقعد على كرسي وحبيبة على رجلها. وحسام موطي عليهم واخدهم في حضنه. الراجل يصور. حسام: زود، زود، كارتين كمان. الراجل يهز راسه. ندى تقوم من الكرسي وحسام يشيل حبيبة وهي تقف قدامه وحبيبة منهم. حسام: تعالي يا نور. نور تدخل وتقف قدام ندى وحسام قاعد على الكرسي وحبيبة على رجله. علي يبص عليهم. حسام: هاخدك معانا الكارت الجاي. الراجل: بصيلي هنا يا مدام. ندى تنتبه وتبص للراجل.

حسام يبصلها ويبص لعلي على الباب ويبص للراجل وياخدوا الصورة. حسام: هطلع أحاسب على الكارتين الزيادة. خد بقى صورة للقمرات سوا. حسام يطلع بره وندى شايلة حبيبة. نور تقف قدامها وياخدوا الصورة. الراجل: حاجة كمان؟ علي: أنا كمان عايز كارتين. عمر، تعال أنت وأية. علي يدخل ويبص لندى. علي: بعد إذنك. ندى تديله حبيبة ويقعد بيها على كرسي. ونور واقفة حاطة إيدها على كتفه. عمر وأية يدخلوا. علي: تعالوا الناحية التانية.

عمر وأية يروحوا يقفوا. ندى تيجي تمشي. علي: استنى، اتصوري معانا. ندى: ما افتكرش ليا مكان. نور: إيه الكلام ده، تعالي يا بنتي. ندى تروح تقف جنب نور. الراجل يصور. علي: تعالي يا ندى مكاني. ندى تقعد مكان علي ويشيل حبيبة. وعلي يقف وراها. ونور تسند على كتفه بدلع. ندى بتبص عليهم. حسام يدخل. حسام: وأنا، وأنا. حسام يروح يزق علي من ورا ندى ويقف هو مبتسم ويحط إيديه الاتنين على كتفها. الكل مضايق ما عدا نور وحسام.

الراجل: الضحكة الحلوة. ابتسامة خفيفة تظهر. الراجل: ألف مبروك. علي: حاسب على الكارتين يا عمر على ما الناس تركب. عمر يهز راسه ويطلع بره. حسام: كانت فكرة جامدة منك دي. عجبتني. حسام يشيل حبيبة وينج ندى بإيده التانية ويمشوا. وندي بتبص وراها على علي. نور تشاور لها باي وهي مبتسمة. ندى تبتسم وتبص قدامها. وعلي عينه على ندى. نور: كانت فكرة حلوة أوي، بجد انبسطت بيها جداً. علي يبصلها ويبتسم. علي: أهم حاجة.

نور تهز رأسها وهي مبسوطة أوي. *** في شقة نور. أماني تدخل وهي بتزرغط. وعلي ونور وراها وحسام. حسام: طب إيه يا ماما، مش يلا بقى ولا إيه؟ أماني: صينية العشا على السفرة، لو احتاجتوا أي حاجة. حسام: مش هيحتاجوا، يلا بقى. أماني: خد بالك منها يا علي. علي: في عينيا، ما تقلقيش عليها. أماني تحضن نور وتبوسها وتنزل هي وحسام. علي يقفل الباب وراهم ويبص نور واقفة مبتسمة. علي: مبروك. نور: مبروك.

علي: تحبي تدخلي تغيري ولا المفروض أشيلك لجوه؟ نور: هههههههههههههههههه. علي: مخيب للآمال صح؟ نور: تحب تتعشى؟ علي يبص على الصينية ويضحك. علي: عمر مرة قال لي، أنا هتجوز مخصوص عشان صينية الديك الرومي دي. نور تروح تكشف الصينية. علي: مين هياكل كل ده؟ نور: أنا هدخل أغير الفستان. نور تدخل الأوضة وعلي متابعها. يروح يغطي الأكل ويقلع جاكت البدلة ويبدأ يفك الزراير. *** في شقة ندى.

حسام يدخل يلاقي ندى بتنيم مصطفى في سريره، يساعدها. حسام: كنت متخيل هلاقيكي نايمة بهدومك. ندى تبصله. يروح يجيب بجامة مصطفى ويساعدها تلبسهاله. حسام: أمّال بيبو فين؟ ندى: في أوضتنا نايمة، ارجوك ما تصحيهاش. حسام: وأنا كنت جيت جنبها. صحيح، جبت لك بره نص صينية العشا اللي كانت عند ماما تحت. ندى: أنا مش جعانة. حسام: يمكن عمي يحب يتعشى. ندى تبص لأبوها يهز راسه لا. ندى تعدله وتطلع بره. حسام يروح وراها.

ندى تدخل المطبخ وتفتح شنطة حبيبة تطلع الببرونات تغسلها. حسام يحضنها من ضهرها. حسام: أنتِ لسه زعلانة مني؟ ندى: لا. حسام: أمّال مالك؟ ندى: ما ليش. بغسل الببرونات قبل ما حبيبة تصحى، كلها وسخة زي ما أنت شايف. حسام يعلق على الكاتل. صوت ضحك من فوق. حسام يبتسم وعينه على ندى اللي اتخشبّت. حسام: هروح أغير هدومي. حسام يطلع بره ويبص عليها من بعيد. الدموع تنزل من عين ندى. صوت الضحك يتكرر.

ندى تقعد في الأرض وتغطي ودانها بإيديها وبتعيط. حسام يدخل. حسام: جايلك إيه من دا كله؟ دا ما يستاهلش. دا جه سكن فوقيكي عشان تسمعي وتشوفيه بعينيكي وهو هايص مع غيرك. فوقي بقى لنفسك ولبيتك ولجوزك. ندى تبصله بغل. ندى: وأنت يعني اللي تستاهل؟ ما أنت السبب في كل ده. حسام: ليه؟ وأنا اللي قولتلك اتعلقي بواحد باعك. عيطي يا ندى، عيطي جامد، وهو فوق ولا أنتِ فارقة معاه. بيضحك وعايش عادي جدا مع عروسته.

اطلعي بكرة لنور واطمني عليها وشوفي هتقول لك إيه. سكتوا يا ندى. حسام يشاور على شباك المطبخ وندى بتبصله وهي منهارة من العياط. حسام: صوتهم راح، دخل معاها الأوضة وهينام معاها على نفس السرير. ندى: أنت إزاي حقير كدا؟ حسام: وأنتِ إيه ها؟ ولا فاكرة إن صبري عليكي وسكوتي خلاكي بقيتي على حق؟ مجرد تفكيرك فيه خيانة ليا. جوزك، ولو هو كلمك يبقى بيخون نور اللي بتعتبرك أختها. يعني مش بس بتخوني جوزك، دا أنتِ بتخوني أختك كمان.

ندى تقوم تقف. ندى: أنا مش هرد عليك. أنا حتى مش هقعد معاك في مكان واحد. ندى تطلع بره المطبخ وتروح الأوضة. وحسام وراها. حسام: قالها نفس الكلام اللي قاله لك، وفسحها في نفس الأماكن اللي فسحك فيها. كتب لها الشقة واشترى لها دهب. قدملها أضعاف اللي قدمه لك. ندى: اطلع بره. حسام: حتى سرير حبيبة اللي كان عامله عشانك اداه له. ندى تبصله. حسام يبتسم. حسام: ما دام بصيتي كدا يبقى أنا عندي حق. أنا اللي بحبك. ندى: وأنا بكرهك.

حسام الابتسامة تروح من وشه. وندي وصلت للانهيار. ندى: أنت اللي ما استحملتش تشوفنا سوا. أنت اللي فرقت بينا وحرمتني منه. حسام يمسكها من شعرها. حسام: أنا جوزك. ندى: مغتصب وقتل وحقير. حسام: ما حدش بيغتصب مراته، دا حقي وهاخده. بالزوق، بالعافية هاخده. حسام يزق ندى على السرير. تبصله وتتفل عليه. يضربها بالقلم. شفتها تجيب دم. ندى: اضرب كمان، يمكن تحس إنك راجل. حسام يمسكها من رقبتها وهي نايمة على السرير.

حسام: حسّي أنتِ مرة من نفسك، حسّي. ندى: الميتين ما بيحسوش. وطول ما أنا معاك بموت كل يوم مليون مرة. حسام: وهو كان هيحييكِ؟ ندى: بص في وش أختك وانت تعرف. بص كانت إزاي وبقت إزاي. بص لي، كنت إزاي وبقيت. حسام يخنقها. تبدأ تزرق. يسيبها يقوم يقف ويديها ضهره وهو بيحاول يمسك أعصابه. وهي تقعد وهي عمالة تكح. ندى: دا أروى نفسها خدت بالها قد إيه وشي بينور وأنا معاه. حسام يلف ويديها بضهر إيده قلم. تتنطر على الأرض.

شفتها تتفتح من الناحية التانية. مصطفى يضرب الجرس جامد. حسام واقف. ندى تسند على الكومدينو وتقوم تمسح الدم بإيدها. وأبوها لسه عمال يضرب الجرس. حسام: بعد كل اللي عملته عشانك. ندى: ما شفتش منك غير الدم. حسام يلف ويبصلها والنار قادت جواه، مش قادر يتحكم فيها. حسام: ما دام ده ردك على كل اللي عملته معاكي، يبقى شوفي الدم بقي عشان تعرفي الفرق. حسام يجيب ندى من شعرها في الأرض وينزل فيها ضرب وهي بتصرخ.

ومصطفى يضرب الجرس وحبيبة تصحى تصرخ. حسام: دلالي فيكي خلاكي تفتكري إن ما ليش وش تاني، خلاكي تسوقي فيها. *** في شقة نور. علي بيلبس هدومه وبيجري. نور تجري وراه وتقف قدام الباب قبل ما يفتح الباب. علي: أوعي من وشي. نور: بابا هيدخل، بابا دلوقتي هتلاقيه بيخبط عليه. علي: يعني استنى أما تموت في إيده على ما باباكي يدخل؟ أنتِ مش سامعة؟ نور: سامعة والله، بس أنت ما ينفعش تدخل، أنت ما لكش دعوة. علي يزق نور ويفتح الباب وينزل.

يلاقي محمد بيخبط على الباب. محمد: افتح يا حسام بدل ما أكسر الباب. افتح.. علي! إيه اللي نزلك؟ صوت صريخ ندى يختفي ويفضل صوت صريخ حبيبة. محمد: اطلع لعروستك يا علي، وأنا هدخله. علي: ما فتحش. محمد: سكت؟ علي: ما يمكن جرالها حاجة. سكوتها لوحده مرعب. علي بيرزع على الباب مفيش حد يفتح. علي يبص لمحمد ويخبط الباب بكتفه. محمد يخبطه معاه. لحد ما يتفتح ويدخلوا.