رواية صوت من المجهول الفصل الخامس والعشرون 25 - بقلم زينب ماجد

ابتسمت وكتله: جرب وشوف وادلل. تركته ومشيت. ردت أدخل للنادي لمحت بنية لابسة عباية. البنية تباوعلي. أو مفتت وكفت. أخذت فنجان قهوة. باوعت بعد نص ساعة للمحاضرة وعندي امتحان. فاخذت الگهوة مالتي ورحت ع الطاولة. فتحت تليفوني وكمت أراجع. جت البنية: صباح الخير. ابتسمت بوجهه: صباح النور. -أكدر أكعد؟ –أي ياهلا تفضلي. -انت غفران صحيح؟ –نعم اسمي غفران. تعرفيني؟ –أني وياج بالقسم. –صدگ! مشايفتچ أول مرة أشوفج.

–لا شايفتني بس أول مرة ألبس عباية وحيل مستحية وخجلانة منها. ولإن انت لابستها اتقويت بيج. –ليش خجلانة منها؟ –أني ما ألبس هيج ملابس. كله بنطرون وقميص عريض. بس أخوية حيل معقد. لأن شباب ويانا بالجامعة يومية يريد يبطلني من الجامعة بسبب اللبس. يكلي لو تلبسين عباية لو تبطلين. فلبستها بس أخجل. ما أحس يعني ما أدري شكولج. –شنو؟ صارت بالعكس. التلبس عباية وتتستر تستحي وتخجل. ليش الستر بيه مستحه!؟

هو أخوج هم غلط. لا أكراه في الدين. المفروض يقنعج مو يفرض عليج. بس ذولة الأهل بعد شنسوي. يفتقدون لعنصر التفاهم والتقنيع. ويملون للغة الضغط والفروض. ظناً إن هالشي في مصلحتج. ويمكن بيه مصلحتج. لكن الطريقة غلط. –انت لابستها من كيفج لو أحد فرضها عليج؟ –لا محد فرضها عليه. جان لبسي عريض بس ملون. وصلت لقناعة إن ربي يحب يشوف المرأة بهالصورة. فرسمت نفسي بالصورة اللي ربي يحب يشوفني بيها. لعل ننال رضاه وتوفيقه.

–كلامج يريح الگلب. وهيج ما أعرف أحسج تفتهمين. يعنيييي ما أعرف شلون أشرحلج. بس حبيتج. ابتسمت: ما عرفت اسمج؟ -اسمي زهراء. –سلام الله على السيدة الزهراء. اسمج حيل حلو. تدرين مقررين إذا صارت عدنا بنية إن شاء الله راح نسميها زهراء. –تصير عندج بنية. ليش انت متزوجة؟ –بلي متزوجة وحامل. –يا عمري. بس ولا مبين عليج. شو حتى حلقة ملابسة.

باوعت لادية: تدرين أول مرة أنتبه. ناسية إنو اني لازم ألبس حلقة. حتى ناسيه هي حلقتي وين. يمكن يم أمي. –شنو هاي ههههه. ضحكت: أي والله يمعودة. الدنيا متلحك تصفن بيها. حتى تدور روحك. يمكن لما سويت عملية إسقاط وقتها نزعوني كلشي جنت لابسته. ذكرتيني. حتى كلادتي بيها سيف الإمام علي. كلهن يم أمي. –يا عيني. إسقاط طفل.

–أي والله. جانت أيام حيل صعبة. زوجي اتصوب واني سقطت. والتهينا بعدين. عمي انجلط. راح من بالي ارجع أسأل أمي على حلقتي. –بس بعدج صغيرة. ليش تزوجتي!؟ يعني أحس الزواج مسؤولية جبيرة. مو مال عمرنا نتخرج ونخلص دراستنا. وبعدين الله كريم. أني هيج أعتقد. بعد ما أعرف انت شلون تشوفين. –أشوف مثل اللي انت تشوفي. ربج بعد واللي كاتبه النا. والحمدلله على كل حال.

–الله يسعدج يارب. أني حيل فرحانة لأنو حبيتج. يعني لحد هسه ما صارتلي أي صديقة بالجامعة. —تسلمين حبيبتي. اتشرف بيج عمري. وهم زين اثنينا عباية تيم عباية مو؟ ضحكت: أييييي. –وهسه صار وقت الامتحان. خلي نگوم. –بعد ربع ساعة يولي. –أني أحب أدخل القاعة أول الناس. حتى آخذ المقعد الأول وأركز ويا الأستاذ. لإن إذا أكعد ورا أنعس وهو يشرح. –إذا هيج تمام لعد. گمنا أني وياها. رحنا للقاعة.

كعدت أول كرسي. والمكان اللي جنت أحط بيه جنطتي كعدت بيه صديقتي الجديدة. حبيتها وحسيته بنية لطيفة ومحبوبة. وهم فرصة تكون الي صديقة بالجامعة. لإن الوقت بالجامعة كلش ممل إذا وحدي وماكو صديقات. أديت امتحاني اللي زفتت بيه نوعاً ما. وطلعنا من القاعة سوية. كالت: تحبين نروح لمكان خارج الجامعة نتريك؟ –والله ممجربة اطلع خارج الجامعة لحد الأن. بس بودي. بس بالأول خلي أخابر زوجي. لإن مكايلتله سابقا إذا يقبل او لا.

–تمام. خابري لعد حتى نطلع. خابرت أيوب مرة مرتين ما رد. كلتلها: ربما عنده أجتماع ومدا يرد. أفضل نروح للنادي نتريك وغير مرة نطلع. شنو رأيج؟ –يلا عادي ماكو مشكلة. ولو الأكل بالنادي حشى نعمة الله مينبلع. –اتفق جدا. بس شسوي. لازم ناخذ الأوامر من الجهات العليا. –شمدري يمعودة. –مو انت ممتزوجة. لو اني ممتزوجة مو مهم ماما تقبل. بس الزواج غير شكل. لازم آخذ موافقة من الوزير الأعظم. والا أكون ملعوووونة. ضحكت وهي ضحكت.

كالت: ملعونة إذا مموافق الوزير الأعظم. شنو السلطان سليمان. –لا والله. بس زوجي شوية عصبي ومرات ميتفاهم. وأني ما أحب أسوي هيج أمور تخرب بيني وبينه. تروح تنلاص الوضعية وووو. –ههههههه عفية. زوجج شيشتغل؟ –عسكري. –ها شرطي لو جندي يعني. –امممم هيج شي. –تحبي؟ –طبعاً. أبو البيبي مالتي شلون ما أحبه. ضحكنا وهي تكلي: يا عيني ع الحب يا عيني. اتزوجتوا على حب.

–لا والله. أني ما عندي سوالف الحب وهاي الأمور. تزوجنا تقليدي. بس الحمدلله متفاهمين. –عكسج أني ما أتخيل نفسي راح أتزوج إنسان بطريقة تقليدية. يعني أحب أتعرف عليه وأحبه يلا نتزوج. –ما أؤمن بعلاقات الحب صراحة. أؤمن برب العالمين يختار إلنا أفضل من اللي احنا نختاره ونحبه. –انت حيل متدينة؟

–والله يا حبيبتي أكره كلمة متدينة. مرات صفة التدين تخليج بخانة التعقيد. والناس تخليج بصورة المثالية. اللي أي غلط منج ولو بسيط تكول شوووف هاي المتدينة. أني ما أعتبر نفسي متدينة. مجرد إنسان عادي يغلط ويصيب. وتصدر منه مختلف الأفعال. كل ما بالموضوع إنّي إنسانة أحب رب العالمين. وأحب أبحث عنه. –تبحثين على رب العالمين. استغفر الله. ليش هو ضايع؟ –لا هو موجود. بس احنا اللي ضايعين. صفنت بوجهي: حبيت الجواب. احنا الضايعين.

–طبعاً. والا تشوفين بكاتبه الكريم. هو يطلب منه إنو نبحث عنه. آيات لقوم يتفكرون. لازم نفكر بآياته وخلقه وعجائبه حتى نلكاه. ابتسمت: أحس راح أستفاد من صداقتج هواية. –أني اللي راح أستفاد بيج. لأن انت إنسانة محبوبة ولطيفة. نسولف واحنا نمشي للنادي. نشتري ونكعد. وبقينا نسولف لحد ما ردنا نرجع للقسم. واحنا نمشي. دگ التليفون. باوعته هي لازمة أيدي. كاتبة (ايوب) –العفو: بس أرد على زوجي. مشيت ورديت:

–أيوب: ها أبويه مخابرتني واني جوا. كولي. –لا بس ردت أطلع أتريك. وخابرتك إذا تقبل. –تطلعين وين؟ جديدة هاي!؟ –هو لإن جديدة خابرتك حتى أعرف إذا تقبل أو لا. بس من ما رديت ما طلعت واتريكت بالنادي. وهسه راح أدخل القسم. –تمام. نحجي بعدين. –تجيني لو أرجع وحدي لما أخلص؟ –ما أعرف. هسه خل أخلص شغلي وعود أخابرچ. –تمام. مع السلامة. رحت أني وياها. دا أريد أدخل القسم. بس لعبت نفسي. حجت: بيج شي؟

–لا بس من أكلت شوية تأذيت. كامت تلعب نفسي. –خاف لأن حامل عندج دوا؟ –أي عندي هذا شايلته ويايه. بس خل نروح نجيب مي. رجعنا. أخذت مي وشربت. حجت بضحكة: انت مسمية زوجج بالتليفون أيوب؟ –هو اسمه أيوب. –لا يعني لا حبيبي لا شريك حياتي لا زوجي سر سعادتي لا هاي الأسماء مال الحبچية. غير زوجج شبيييج. –أيييييع. ما أحب هاي السوالف. ههههههه. زوجي سر سعادتي وتلكيها مدمغ على راسها ولاعب بيها جولة. –هههههه. أي والله.

دخلنا المحاضرة. أثناء المحاضرة أيوب اتصل. أنطيت رفض وكتبتله: اسفة اني بالمحاضرة. كتبلي: شكد وتطلعين؟ –أقل ساعة. –راح أكمل وأتوجه عليج من اتكملين. خابريني. –ماشيب. باوعتها لزهراء بصفي دا تتراسل أثناء المحاضرة. خليت تركيزي ويا الأستاذ. لما كملنا كالت: غفو. انت وين بيتكم؟ كتلها منطقتنا. كالت: يا قريبة من عدنا. شوفي مو بس نتشابه. وحتى قريبين من بعض. –أي زين لعد. عندج خط لو ترجعين هيج؟ –لا والله. أرجع فورتات.

–لعد أمشي وياي أوصلج قريب من بيتكم. –عندج سيارة؟ –لا والله. سيارة زوجي جاي بالطريق. –خاف عيب أو ميقبل؟ –يمعودة شكو. دمشيمشينا. واني أخابر أيوب. كال: بالباب. طلعنا هو وبلال. فتحت الباب الورا وكلت الها اتفضلي. –انت فوتي استحي. صعدت وكلتلها: اصعدي يلا تعاي. صعدت. هو باوع. كتله: بس صديقتي على طريقنا نوصلها لمكان قريب من بيتهم. حجه أيوب: هلا بيه. أداسلها بلال لحد ما وصلنا لشارع. كالت: هنا أنزل. –اني كتلها: بيتكم هنا.

–لا بس أركب كية بخمسمية تذبني براس الشارع مال بيتنا. حجه أيوب: لا أبويه ما يصير نوصلج للباب. إن شاء الله. بس دلي أخوج. وأشر على بلال. كامت تدلي لحد ما دخلوا للفرع. كالت: هنا تعبتكم. –حبيبتي تعبج راح. باوسنا ونزلت. بلال راد يحرك. أيوب لزم ايده. وكام يباوع ع البنية لحد ما دخلت البيت. كاله: امشي. طلعنا الفرع. كاله: اوكف. حجيت: شكو؟ حجه أيوب: ماكو شي. شلونج بالامتحان؟ -على الله. –على الله يعني ما بيج أمل؟

–والله شگلك. هي الدنيا تنطينا مجال نقرا؟ –الله يساعدج أبويه. إن شاء الله تعوضيها. صديقتج هاي جديدة؟ -ويايا بالقسم. خوش بنية. حجه ويا بلال: لوف وارجع لنفس الفرع واطلع منين ما اجينا. كتله: شكو؟ –ماكو شي. بس انت مضيعة عنوانج. صديقتج قريبة من منطقتنا. مو منطقة أهلج. لو تريدين نرجع للبيت!؟ –يا والله نسيت. لا لا فدوة رجعني لبيت أهلي.

لاف بلال. ورجع انفس الفرع مال صديقتي. أيوب ظل يباوع لبيتهم. وطلعنا بنفس الطريق اللي اجينا بيه. حجه أيوب: شنو سالفة الطلعة والصداقات. شو سوالف جديدة غفران. –يعني حتى بنية لازم ما أصادق. شنو السالفة. أيوب والله ملل الجامعة. الوقت ميمر إذا بس أنتظر محاضرات. ضحكوا اثنينهم هو وبلال. حجه: لا أبويه بس اتحذري. أني شفت وضعها مبينة خوش بنية وحبابة. بلال: وهم صاحبة عباية. مرتك تتخير أصنافها.

حجيت: الصاحب ساحب. ما أحب أمشي ويا أي إنسان إذا ما يتناسب ويا أفكاري وعقلي. ابتسم أيوب: عاشت ايدج أبويه. بس شسالفة الطلعة. وين تريدين تطلعين؟ –ما أعرف. بس الأكل بالنادي يلعب النفس. فكلنا نتريك بمكان قريب. بس انت ما رديت. شسوي. أكلنا بالنادي. –ويا صديقتج تطلعون؟ –أي. –أني أثق بيج وأعرفج شنو. إذا تريدين تطلعين تاكلين. أطلعي. بس آخذي حذرچ. ولد الحرام هواي. –استغفر الله. شبيك أيوب. أني أطلع ويا ولد؟

–القصد اكو ناس هواية مو زينة. يا بنتي. أطلعي بس ديري بالج على نفسج. –ماشيسكت شوية ورجع حجه: شلونها بطنج؟ هم وجعتج؟ جندسته. اندار يباوعلي. خزرته وأشرتله بعيوني على بلال. حجه بلال: عليمن تخزرين وتأشرين. هو غير شفتج. كاموا يضحكون بصوت عالي. صرت بنفسجية من المستحى. هي حتى مو بطني التوجعني. معدتي بس أيوب. الله كالبه الا يفشلني. بطنج توجعج شنييية.

وصلني لبيت أهلي. ونزل وياي يسلم على اميلكى. أمي طابختلنا مركة دجاج أصفر بالفطر وتمن برياني. كالتله: والله ما تطلع تنزل ابن عمك وتتغدون. راح صاح بلال وكعدوا بالاستقبال. صبتلهم وكعدت وياهم تسولف. بلال انطلق ويا أمي سوالف وضحك. جان آخر شي كاللها: حجية عليش ما تاخذيني واني هالعبد الفقير الإداريچ وخوس أزلمة ويومية تسويلي هيج أكل طيب من ايدج. ركعته أمي بالقبق مال الجدر. كاموا يضحكون بصوت عالي.

حجه أيوب كاللها: والله يا يمه كعدتج طيبة وأكلج طيب. وانت طيبة. حتى أمي تريد تجي هي والبنات يشوفنج. بس ما عندي وكت أجيبهم. حجت: لا عليك العباس جيبهم. أسوي ثواب للمرحوم ويجن هنا ناكل ونتونس. شو ما عدنا أحد. جيب البنيات عليك الله. خابر على امه. كالتله: علوا. بس كون واحد يضل يم أبوك. كاله: حضري نفسكم. راح أجي. أني أضل يم أبويه. وانت والبنات يجيبكم بلال ويرجعلي. كالتله: ديلا راح أكله. نسده من عدنا. وكام سلم علينا وراح.

ساعة أني وأمي كاعدين بغرفتها. سمعنا صوت علي وهو يصيح: يمممممه. صاحت أمي: ها يمه. هنا. أجا… راح الحجي. –أي والله يمه راح. شني خبرك؟ –والله يمه ماخذيها أهلها. وخابرني أخوها يمسلت بالحجي. سديته بوجه وانعل أبوه لأبوها. حجت: لا يمه ما أريد مشكلة بينك وبين مرتك. رجع مريتك يمه. واكعد. وحتى غفران ترد لرجلها. أني أضل وحدي هنا. شعدي عود. كل يوم أسيرلي على واحد منكم. علي: دخلي تولي. لعبت نفسي منها ومن خلقتها. أتوسل بيها أني.

–ميخالف يمه. رد مريتك يمه. وكفكف على جهالك. لا تخرب بيتك من وراي. أني ما عدي شي. بالعكس أبرد راس. حجيت: يمه انت مرة مريضة. نعوفج وحدج شلون!؟ وكعتي اتخربطتي اتأذيتي صار بيج شي. –عساني جا هسه. أني شني. أخير من الماتو. أهجم بيوت ولدي حتى أعمر بيتي. ما أريد. يكفيني كل واحد بيكم مستقر ومرتاح. هاهية. أنا أرتاح من يمي. –هذا مو حجي.

–لا بتي طالت وشانت. وأخيج تأذى وانت تأذيتي. هذا صاله أسبوع معارك ويا مرته. وانت هادة زلمتج ومكابلتني. شنية؟ شبيه. شو هالاكوم وأكعد. والله مطيني حيل وصحة الحمدلله رب العالمين. ما بحاجة أحد يمه. تمرضوني من تضلون هذا حالكم. كل واحد منكم يرد لبيته وعوفوني. –أني بالنسبة إليه. تعذريني ما أكدر. –غفران يمه لا تمرضيني. رجلج خوش زلمة. ويحبنا وزين وياج. ليش نزيد الحمل عليه لحد ما نخليه يطك روحه من عدنا. –واتركج على مود رجال!؟

أحسب روحي ما تزوجت. وأشيل هالسنة من راسي. وأرجع يمجعلي: دنجبي انت لا تدخلين بهالسوالف. ولي لبيت وجلج وفكينا. غفران: ليش تغلط. أني لا محاجيتك ولا جاية يمك. احترم. –دكومي لا بالنعال. والله طايحة الحظ. –يمه صيحي بيه. هسه هو شعليه بيه. –يمه اخوج يريد مصلحتج. رجعي لبيتج يمه. –وانت شمدريكم مصلحتي وين!؟ –جا تضلين هيييييج. –والله إذا بقيتي هيج. أني أبقى هيج. وطز بالدنيا. لابو أهلها. كام علي: هو منو الطز. منو الطز.

صاحت أمي: هسه مو عليك يا يمه. جا انت متعارك ويا مرتك. تجي تذب حركتك بهالمكرودك ابطنها جاهل. ميل عنها. لو صار عليه شي. شيفكنا من أهله. وخر من عندي. وأني درت وجهي من عنده. لفد شوية هناك. أجا بلال جايب خالتي ونجلاء ونبأ وسرى. أمي فرحت بيهن ورحبت. وكعدنا سوالف وضحك. والجو جان حيل حلو. حتى نجلاء حبت أمي. وانطلقت وياها بالسوالف. وأمي تكوللها: خايبة دتعاي هنا كعدي عدي. وعوفي أمج خلي توليوخالتي تضحك وتكلها:

بلاش الج بس فكينانجلاء: شفايتتلي خو أخير من حبستي هناك. اقلها أتونس وياج. سوالفج حلوة خالة. اندارتلي أمي: ولج شنسوي العشا. حجت خالتي: طماطة تكلا وجاي. لا تتعبين روحج. ولا تدزين عليج الحسين. –ياااا كلاب الدنيا. جاياتني البنيات واعشيهن طماطة تكلاه. والله الأحسن من الحسين. لا تدزلهن على نص كيلو لحم ونص كيلوا معلاك. ونطلع الفحم ونشوي. شنو رأيجنسرى: ااااااالله. ونسوي حفلة شواء.

خالتي: لا تكلفين روحج خية. شني جايين نتونس وياج. لو جايين نجربج. –يا تجربوني شني. غير ناكل. اندارتلي: اخيج عليوي وينه؟ –ما أدري. روحي شوفيه. ابتسمت. هي فهمتني. كامت على حيلها ومشت تطلع. لكت علي وبلال واكفين يسولفون. خالتي حجت: والله أمج ما تستاهل. خطية إنسانة طيبة. –يويل حظها ما طاحتلها. بچنة بيها غير. –بعد مو كل الجناين مثل جنتج. ضحكنا. وهي تكلي: يعاب حالج على حورج. –هاااااااه. ظلينا نضحك. وهي غمتني بضحكة.

اجت أمي كالت.. وديتهم. كومي وياي غفران. خلي نطلع كونية الفحم فوك. صاحت خالتي: هاه خية. ها شنهي؟ الكومي غفران. جا وابنا البطنها. –يا علي العباس. نسيته. متعودة. هي أيدي وهي رجلي. ولا أبالي. هالغفيرة تكبر وتحبل. خالتي: هي الكعدة ما تكبر. مثل حال سرى. بس أني ما يطيني كلبي أسخرنها. أكولن خطية. –الله يحفظها الج. بناتي. جا هسه يا هي التكوم منجن. تعاوني. أنزل الكونية. كامت نجلاء: صدك جذب. أصيرلج فاندامسرى: أني جاية وياكم.

وراحن امي والبنات. كامت خالتي: جا احنا المن كاعدين هنا. دكوميلناتبعناهن. هيج بس صعدنا. أمي اتعذرت منهن. كالتلهن: الفوك مهجور. جان لعلي والبنات. بس من اتزوجوا انهجر الفوك كله. ضل البيت الجوا النا. وفريخات حميد. سكتت وكالت ليما انهجر كله. كسرت عليها خالتي: كلنا مثل حالج. أنا لو ما أيوب يعرس. لا أدري عن الفوك. ولا أوصلة. حتى بناتي ما يرضن ياخذن الغرفة الفوك. كارصات بهالغرفة الجوا. مدري شمالهن.

نزلن كونية الفحم. وطلعنا المنقلة. ونصبناه بالحوش. أجا علي اعتذر منهم. أنطا المسواك لامي. أنطتنياه أني ونجلاء وسرى. كصصنا اللحم والمعلاك وفلفل وبصل وطماطة. وشيشنا. وكمنا نشوي. وحاطين الصوبة برا. وكاعدين كارصين يمها من البرد. وحطينا السفرة. ونصبناها. أشكال وألوان. سوالف وضحك وشقا وأكل. برد الحو كلش. نجلاء اخذت الصوبة. ودخلوا جوا. واني وسرى وكفنا نسوي جاي.

صاحتني أمي اطلع الها القماش مالها من البوفية. تشوفه لعمتي. طلعته وكعدت أسولف. لشوية حجت خالتي: جا الجاي وين صار؟ كمت بسرعة للمطبخ. لكيت الجاي مطفي. وسرى ماكو. لزمته. الجاي دافي. رجعت شغلته. وطلعت أريد أصيح سرى. سمعت حجي ناصي يم المرجوحة. باوعت. سرى ع المرجوحة. وعلي منتجي ع الشجرة يسولف وياها. شافوني بسرعة. سرى ركضتلي وطلعت برا. كتلها: شكو؟ –ماكو. هيج نسولف. –إذا تشوفج خالتي تكوم تحجي. خلي نودي الجاي.

–لا تحجين. شفتيني وياه. –أحجي لمنو. –حتى لأمج. استحي. –انت عندج شي ويا علي؟ –لا والله ما عندي. بس الصدك معجبة بيه. وهو أحسه همينه. بس ما بيناتنا أي شي. –بس هو متزوج وعنده جهال؟ دنكت: أعرف. –ابعدي هالامور من بالج. ختولي. وأمشي. خلي نروح نكمل كعدتنا. آخذي الجاي. بس خل أشوف بلال موجود؟ لبست حجابي. وحطيته على وجهي. وفتحت باب الحوش. شفت علي بالسيارة الجمسي مال أيوب. معناها بلال راح. لمحني تخبل. لأن مادة راسي من الباب.

نزل يركض: طايحة الحظ. انت شلون هيج تمدين راسج للشارع. أكسر راسج هسه. –بس ردت بلال. عبالي موجود. –دولي طبي. لا أدفرج ومحمد. عفته ودخلت. كملوا عيالي الجاي. وخالتي كالت: تأخر الوقت. بعد هم ياله نروح. غفران تروح لو تضلين؟ حجت أمي: علي راح يبات يمي. انت روحي لرجلج يمه. –خاف يرجع لشقته. –لا كال راح أبايت. بعد ما يرجع. تأخر الوقت. يوصلكم ويرد.

لميت غراضي. وبدلت وطلعت ويا عيالي. خالتي ما رضت تكعد يم علي بالصدر. كالتلي انت اكعدي يم أخوج. واني والبنات ليورا. كعدت. وهو مشغل أغاني ومنص خفيف. الأغنية مال معجبين وهنيالي وهنيالي. ومدري هالسوالف. حسيته جاي يلمح الها. خليت وطفيت الأغنية. صاحت نبأ: لا أحبها. كتلها: عيب. ميصير. بيبي موجودة. حجت خالتي: العيب مني لو من الله. غير حرام.

–إذا أكول حرام هسه تصيحون أهووو. المتدينة. كمنا نخاف نكول. إحنا نخاف الله. خلي الله بكلوبنا. حجت سرى: أي لعد دحطي الله بكلبچ. ورجعي الأغنية. والله حبيتها. كرصتها خالتي وحجت: بطلي الخفة. وأشارت على علي. أباوعلها بالمرايا الجانبية. لما وصلنا. دخلنا كلنا بجوكتنا. أيوب كاعد ع التليفون. كالهم: ها. اجيت. وشافتي وراهم: ها. انت هم اجيت. حجت خالتي: علي راح يبات يم أمه. بعد شعدها ضالة. أيوب: أي هم زين. شلونها الروحة؟

خواته كامن يسولفله. ونبأ سطرته سطر بالسوالف. حتى العطسة اللي عطسناها مثلتها الها. كاللهم: هم زين إذا اتونستوا. ديلا خلي أصعد أنام. جنت منتظركم. غفران صعديلي غراضي وياج. حجت امه: شوف شوف. صدك لو كالو من شاف أحبابه نسى أصحابه. صاله أسبوع ينام يمي ع القنفة. هسه غفران صعديلي غراضي. صاح: تعبان يمه. تعبااان. حجت: ادري. تعبك شنهوه يمه. روحي مهنى. ضل يضحك. وهو يمشي. وأني وراه. كاله: دمشي فشلتنا. انت فضيحة.

–عليمن فضيحة. غير مرتي. شنو حرام لو ناهب. دخلت للغرفة. لكيتها مهجورة. رتبتها ونظفتها. وهو ع التخم يباوع بموبايله. ورحت سبحت ورجعت. كعدت أمشط بشعري. هو بدل. جر العشر راد يحطه. كتله: هااااا يمعود. –شبيييج. غير أحط عطر. –تريد تموتني. غير هسه أشرد من الغرفة كلها. –جا شلون نظل هيج بالله. –روح اسبح. –بتل بتل. كبل شوية سبحت. جا هي كلساع. –أي لعد هاهية نام. –نام شني هاي. شو كمت أخاف منج. شتريدين مني. جايتني حامية.

–حاميتيش انت. غير ثلاجة بلاديعفته ورحت للفراش. اتمدد. كال: عبالي اليوم راح أتعرض لأعمال العنف. التعرض. ما بيج كل خير. –مأثر بيك الساتر هواي. شو طفي الضوا وتعال. –تخوفين والعباس. لا عمي. أني رجال أخاف على روحي. أرجع أنام يم أمه أحسنلي. ضليت أضحك. كعدت وحطيت رجل على رجل. وكتله: فنك تفتح الباب وتطلع. –شبيه غشيم. لو مضروب على راسيطفا الضوا. واجاني يعرجضليت أضحك. وأخذته بين اديه. ثاني يوم كعد مبتسم. مزاجه عالي.

ينغمش بوجهي بالكلينكس. واني عبالي ذبانة. كاعد أنش هيج. طخت أيدي بايده. فتحت عيني. ابتسم وكال: صباح الخير أم علاوي. –ومنين عرفت علاوي. يمكن أم زهراء. –شيجي من الله. نعم الله. صباح الخير. ابتسمت: صباح النور. –شو متكعدين للدوام اليوم. مو عندج دوام. لو اني غلطان. –لا عندي. بس ب١٠ أروح. باجر امتحاني. واليوم ما عندي محاضرات هواية. –باوع الساعة ٧ وربع. زين. يعني يحقلي آخذ راحتي بعد. عصرت خشمه: انت شنو شنو متشبع.

–مشتاقلج والله. حضنته. والجو بارد. مو مال واحد يداوم ولا يطلع من فراشه. بقينا بفراشنا نضحك ونسولف. لحد ما صارت ب٨ ونص. كال: أني ب٩ لازم أروح. عندي شغل بالشورجة. –لعد عوفلي السيارة. أروح بيها. بداعتي ما أحب بهذلة التكاسي والفورتات. –أخذيها. أصلاً ما محتاجها. كام من عندي. راح للحمام. أني نزلت. حطيت الجاي على نار. ووترستله الطاولة. شنو يشتهي كلبه. وزينت ورتبت. لحد ما نزل. كال: شنو هالدلال عمي. صدك الزلمة بلا مرته يتيم.

–سودة عليه. دتريك. خلي أروح أسبحل. لزمني: وين. تعاي كابليني ع الريوك. وروحي. –امممم يصير. يلا. كعدت تريكت وياه. كعدت خالتي. كالت: خير. شنو هذا ريوك مال نفرين لو عشرة. شدعوة هالكد. حجه: الكم يمه الكم. محتاجة شي يمه؟ –لا يبعد گلبي. سلامتك. باس راسها. وكام. انطاني فلوس. وكال: يلا ديري بالج على نفسج. مع السلامة. اصدگ. كبل لا أنسى. عطر ما حطيت. خفت تلعب نفسج. بس اصعدي جيبيلي. –الله لا يصغرج أبويه. صعدت ركض. جبته واجيت.

كتله: حطه بالسيارة. لتفوته بالبيت بعد. –إن شاء الله. مع السلام. –الله وياك. يحفظك إن شاء الله. انداريت: خالة. أسويلج شي غير الموجود. لو أصعد؟ –لا شتسوين. نعم الله كلها هاي. حرام خوما تنذب. ما تداومين اليوم. –لا. هسه رايحة. محاضرتي ب١١. لازم أطلع بعد ربع ساعة تقريباً. –دستعجلي لعد. صعدت ركض. سبحت وبدلت. وأخذت السيارة. ورحت للكلية. لكيت زهراء موجودة. فتحتلي أيديها من شافتي: –هلو غفو. –هلو زوزة. شوكت اجيتي.

–والله من الصبح اجيت. –ليش محاضرتنا ب١١. –أي. بس جان عندي شغل. –شغليش. –يعني. ضحكت. وكامت تميل راسها منا ومنا: الشغل هذا شغل كلب. لو عمل عمل. –امممم افتهمتيني. –صدك والله. عندج علاقة بأحد؟ –بس مو تحسبيني ساقطة ومرتدة. –ها خير. ليش اعتبرج هيج. ترا كتلج أني مو متدينة ولا معقدة. يعني ما راح اعتبرج فاجرة لمجرد تحبين شخص. هذه جامعة وهالامور تصير عادي. –أي هم زين. امشي لعد. أخذت أيدي بيدها. وخر راسي. ورفعت أيدي أحذرها:

–بس دوري افتهم كلشي. حتى أنصحج. –ممممم متفقين. ضحكنا ومشينا للنادي. أخذت اثنين قهوة. رادت تدفع. كتلها: هالمرة ضيافة مني. حتى أسمع السوالف. طلعيهن طلعيهن. –اوكييييي. ضحكنا. وأخذنا الكهوة. وكعدنا. مر من عدنا ساري. حجت: تعرفي؟ –لا. ليش. –مو حسيته يعرفج. وانت انتبهتي من فات. –إنسان كلش تافه. لدرجة ميستاهل نحجي بيه. عوفيني منه هسه. سولفيلي منو شنو الووو. –باعي. هو طويل وضعيف وأسمر. وشخصية تخبل تخبل. –موجود ويانا بالجامعة.

–أي مرحلة ثالثة. بس منلتقي بالجامعة أبد. أخاف أحد يشوفنا ويعرف أخوية يكصون راسي. –صارلكم شكد تعرفون بعض؟ –أسبوعين. –بس عبالي قصة حب عريقة. –ايييي. اصبري تصير عريقة. –ويا ترى إذا صبرنا راح تصير؟ –شمدريج. يمكن الله كاتبنا لبعض. –شنو اسمه؟ –محمد. بس يشبه بكر. يموووت. –يا بكر!؟ –متابعين واتباد!؟ -لا. شنو هذا الواتباد. ما أعرف. –برنامج كله كتب وقصص. –بيه كتب دينية؟

–ما أدري. ما باحثة. بس أتابع بيه قصص. أني كلش حلو. تابعي قصة حكاية سمر. راح تموتين تموووتين عليها. –شنو هاي حكاية سمر. شو أني ما أعرف. أني بيا عالم. –اووو فاتتچ والله. تموت تموت. انط من البحي على بكر وسمر. ولج اتزوج غيرها ويغنيلها. ردت أنساك وأخلص من كلام الناس. ولج يغني ويبجي. واني أبجي ويااااااه. –يعني تشوفي؟ –لا. بس انت من تقرين القصة. متدرين. عبالج كدامج. تتخيلي وتعيشين وياها. –ما أعرف والله. مقاريتها.

–تابعيها. راح تموتين عليها. حتى ع الفيس موجودة. بس اكتبي حكاية سمر. تطلع لج. –دزيلياها حتى أقرأ وياج. ولو احنا خلي نقرا امتحاناتنا بالاول. وبعدين نحتار بالقصص. دكومي خلي نروح. راح تبدي المحاضرة. كمنا أني وياها. وركملنا المحاضرة. كتلها: اليوم جايبة السيارة. واخذت إذن من الوزير الأعظم. كالي أثق بيج. وين متريدين روحي. بس ديري بالج. –يا فدوة. يخاف عليج. –دمشي خلي نطلع. طلعنا أني وياها بالسيارة.

مشغلتلها: يلا شكرا للحشد والأيدوه. وهي تصيح. هو هو هو هووكفنا يم مطعم. أخذنا لفات بيبسي وكص. وكعدنا ناكل بالسيارة ونسولف. لحد ما كملنا. وصلتها. وخابرت أيوب. كتله: ها. موجود بالبيت. حجه: خابرتني امج. –علموديش؟ –اترجتني نروح على مرت علي نرجعها. تكول ما أريد أهدم بيت المرة. ورايدة رجعتها. وأردتني وياها حتى نشوف شنو أسباب زعلها. واحنا أهل إن شاء الله ونحلها بالتراضي. –وهسه راح تروح. –منتظرج علمود آخذ السيارة ونروح.

–وصلت تقريباً. أروح وياك. –أي عادي. خوما بس أمج تجي ويانا. اقلها انت وأمج. واني وعلي. –خابرته لعلي؟ –أي. يم امج نروحلهم ناخذهم ونمشي. –ديلا لعد. أني راح أدخل الفرع. أفوت لو تطلعلي. –لا ابقي. بس حولي. صفيت بالباب. طفيت السيارة وحولت. هو اجا على عكازته. انطانياهم. حولتهم ورا. وصعد كدام الستيرن. ساق لبيت أهلي. وخابر على علي. اني حولت. ونزلت ورا. وعلي كاله: حجي. أني أسوق عنك. كاله: اصعد. ما بيه حيل أنزل بعد.

صعدت ورا. واجت أمي. سلمت عليها. وبستها. وصعدت يمي. طلعنا لبيت أهل نسرين. وايوب اتفق ويا أمي. إنو هو اليحجي. والكلام اليكوله ما ينكال فوكاه. أمي كالتله: هاهية. راية الله ورايتك. وصلنا أهلها. استقبلونا. وكعدت أمها وأبوها وأخوها. أمها متنگة. وأبوها جاف بالحجي. وأخواها ما حجه ولا نطق. بعد الضيافة والحجي. فتح الموضوع أيوب. كاللهم: الله بالخير. كالوله: الله بالخير.

–خابرتني يمه. وهي بمثابة أمي. إن شاء الله. وعلي أخوي. كالتلي مرت علاوي زعلانة. واني ما أريد أهدم بيتها. ورايدة رجعتها. وأردتني وياها حتى نشوف شنو أسباب زعلها. واحنا أهل إن شاء الله ونحلها بالتراضي. وجايين نسمع منكم الأسباب. واحنا بالخدمة. حجه أبوها: خوية. احنا من اجوا وخطبوا. كالولنا تكعد ويا عمتها!؟ بتنا رادت بيت وحدها. أيوب: أنا ما حاضر بالخطبة. هي شرطت بالعرس الا بيت وحدها.

حجه علي: لا. طلعتنا جان اتفاق بيني وبينها بالخطوبة. نكعد وحدنا. قدمت على بسماياحجه أبوها: أي. بس من طلعت من بيتنا. اخذتها. من تكعد ابيت وحدها. أيوب: وهو صادك. بيت ابوه محد بيه. طابقين. يصوصي. ما بيه بشر. –لا شني. مرة تهد بيتها وتروح تكعد ابيت ابوه.

حجه أيوب: الإنسان ينتقل من بيت لبيت للافضل. أحسن ما شقة وكاعدين بكن مال دجاج. بيت ابوه جبير. ويطارد بيه الخيل. وبس الهم. وبعد هم المستفادين. يأجرون الشقة. وحطون فلوسها ببطونهم. ويكعدون ابيت احسن منه. وواسع ونظيف. حجت امها: البنية تريد تاخذ راحتها. تكعد تعرف بيتها الاثثته على ايدها. وتروح تكعد ابيت مو بيتها. ما يصير. –أي. تحسبه بيتها وتأثثه. وتاخذ راحتها. وين المشكلة.

حجت امي: خالة. الحجي واضح. يريدون يكولون ما نريد أمه. حجه أيوب: خو لا بكيفها ولا بكيف أحد. انت ام مثل ما هي ام. وعدها جهال. وباجر يكبرون. ترضى جهالها من يكبرون يذبوها. حجه أبوها: مخلفة هالخلفة. شكثر. ما ظل بس عليايوب: لو ترضى تعيش عدي. مو فوك راسي. لا والله. ابطن عيني. بس الام عليمن تميل. إذا مو على ابنها. حجت امها: وابنها الجبير وين. أيوب: احسبي انطاج عمره يا عمي. وما عدنا غير علي. مطالبكم شنو هي؟

حجت امها: ما عدنا مطاليب. احنا النريده. تضل ابيتها. ماخذة واحتها. مو خذتوها شي. وبعدين ها. والله ما يناسبنا. أيوب: أي والله ما يناسبنا. وماكو حال يضل ما يتغير. الله بكبر عظمته يكول كل يوم هو في شأن. تريدين حالنا يضل على وضعه. كاموا يجيبوها منا يردوها منا. آخرها أيوب كاللهم: هي المرة وينها. أني مثل أخوها. خل تجي. ونسمعها. ليش تحجون عنها. هذا رجلها. وخل يتفاهمون. خو احنا جايين نصلحهم. ما رايدين خرابه.

ماجت نسرين. سلمت وكعدت. كالهالها: خوية. شنو مطالبج؟ كالتله: والله اني مطالبة شي. ومن حقي أعيش ابيت وحدي. واني ما ملزمة بأحد. ولا أكابل أحد. الدين ما فرض عليا أخدم رجلي. مو غيره. تعاي لازم أني لازم أتحمل وأتهجول من بيتي علمود غيري. عمتي على عيني وراسي. بس تعذرني. يعني اني اني ما أكدر.

حجت امي: خالة. لا اني رايدة أعيش عدج. ولا أعيش وياج. ولا أذب حملي عليج بعدني بحيلي. الله لا يعرزني لأحد. واني جاية لخاطر هالفروخ. ما أريد بيت ابني ينخرب. حجه أيوب: على حلكج نور يمه. وهذا اليجرالها. ما دام طالبت بحقها. والدين ما يفرض عليها. وما يحقها بخدمة أم زوجها. بعد حقه. احنا شنحجي. خوما احنه أحسن من الله ونتشرط؟ ها يجرالج. لبسي خوية. وكومي ويا رجلج. وارجعي لبيتج. وما يصير خاطرج الا طيب.

ابوها اتشكر من أيوب. وسلم عليهم. وكاللنا: يلا كومواعلي صفن بوجه أيوب: حجي و… غمزله أيوب وكاله: يلا خويامها اترخصت من علي. يبقيها يمهم يوم ثاني. لأن خواتها جايات بالطريق. علي وافق. وطلعنا. صعدنا بالسيارة. أول ما صعدنا حجه علي: حجي. ما حلينا شي. أساس عركتنا. اريد أشيل يم امي. اني ما أگدر أعوفها هيج وحدها. حجه أيوب: خوية. المرة ما تريد امك. شني زور لو كوة.

حجت أمي: يمه. ولا اني الرايدة أكعد عد أحد. انتم ليش حاطيني حمل. تعلاوة هدوني. وكل واحد يشوف حياته. ترا ما صايرة هاي. صاح أيوب: لا ما يتركج. امه وغصبا ما علييييه. انت امه. لا تكولين هدوني. هالمرة كلتيها. المرة الثانية اتزاعل وياج. والله. علي: حجي. أعوفهم جا أعوفهم بالشقة. وأجي أكعد ويا امي. لو أعوف امي وأجي أكعد بالشقة!؟

–هاي وهاي. مرتك تحجي بالدين. وهي كطعية. لا تعرف الدين ولا تعرف أهله. مو هاي اختك. يوم الطكت براسي. وردت أعوف امي وأهلي. كالتلي روح ولي لوحدك. أني ما أرضى تعوف امك. طلكني ولا تعوفهم. خوية. المرة التحجي بالكطع والدين. طبق الدين بيها. وربك محلل أربع. ولا خير البالزلمة الما يثني اعلى غمة. سكتنا كلنا. حجت أمي: ولو ما رضت مرته. يثني هم ترد تتزاعل وتتخارب.

–جا يطبها طوب. مثل ما حقها بالدين تكعد لوحدها وما تتحمل أحد. حقه بالدين يتزوج الترضى تباري امه!؟ صفن علي بوجهه. حجه أيوب: شعدك؟ شو بيت ابوك موجود. وامك موجودة. وعدها راتب ابوك مال الشهيد. تساعدك بالمصاريف. وتشيل عنك. وبعد ضلت يمكم. اني برأيي اشوف هذا الحل. وبكيفكم. رجعنا للبيت. علي استغل المواقف.

كاله حجي: أني موافق اتزوج. وعلى حجايتك. لا أهدم بيتي. ولا أغضب ربي. وأعوف امي. من بعد اذنك حجي. إذا تقبل. اني طالب ايد رضيعتك المحروسة. على سنة الله ورسولة. وما الكى بيت ناس. اخذ منه مرة احسن منكمعقد حاجبه أيوب: ياهي التقصد من خواتيحجه: اللي بكصة غفران. اللي تدرس. انت شاور الاهل. وشوفهم. وأسألهم. وردي الجواب. حجيت أني: من كل عقلك تريد سرى. شبييك. سرى ممت…. قاطعني أيوب. وكال…. اششش.

–اسأل الاهل. وأشوف رأيهم. ويصير خير. كام وكال يلا. كمت. بس النار شاطت براسي. صعدت بالسيارة وياه. كتله: انت من كل عقلك تسايره بسرى. –شنو بينه وبين سرى؟ –شمدريني. بس متناسبه. أيوب. –اخوج لو ما اباله شي. ما ينطينياها بالوجه. ويكاطعني ويكلي شوف الاهل بالاول. وردلي جواب. لا ما متأكد اكو موافقة من الاهل. شايفة شي. سامعة شي. –أيوب. ميتناسبون. سرى مو لعلي. بعدها بنية ممتزوج. تاخذلها رجال متزوج وعنده جهال. ليش؟

–جاي اسالج. شايفة شي. سامعة شي. –الشفت والسمعت. لا حقي ولا من حقي اسولف. بس أيوب. ارفضها من يمك. سكت. وضل صافن. رجع للبيت. كعد ويا امه. كاللها: يمه. سرى عدها شي ويا علي؟ شهكت خالتي: اسم الله الرحمن. شنو البيناتهم. لا ماكو. أبد. –هسه إذا اكو. خلي نفتهم. الولد لا لاعب عليها. ولا عينه زايغة. الولد طلبها مني. على سنة الله ورسوله. وهاي مو عيب. شوفي رأي سرى. إذا موافقة. هذا قرارها. أني ما أدخل. حجاها وصعد.

جرتني: شنو علي. شنو سرى. سولفتلها. وكتلها: خالة. ارفضي. لا تكسرين ابخت البنية. بعدها منتزوجة. تعيش معلعلة وزوجة ثانية. –انت شايفتها. شايفة عليها شي. تعرفين بينهم شي. –ما أدري خالة. أني ما أدخل بهالامور. لا اسم. لا أرى. لا أتكلم. –يعني شايفتها. –خالة مالي علاقة. أني فدوة لعينج. لتحطيني.

صفنت بوجهي: بس تريدين الصدك. خوش قسمة. بيت ابوج فارغ. وامج خوش مرة. وهو عنده بيت. ولا هي اا يلهيها عن دراستها. ولا يمنعها من شغل. ولا دادة. ولا أحد وياها يتنغصلها بالبيت. –خالة متزوج. شنية. –هسه غير نسالها. إذا رضت. ورايده. يطبها طوب. بس علي. اني أحبه. خوش ولد. وأمج زينة. وتستاهل. خوما يصل هذا حالها. وجناينها كطعيات. تاخذلها بنية من عدنا. تباريها. مثل ما اني ماخذه منها بنية. اتباري. –خالة صدك تحجين.

–دسكتي انت. وكومي صيحيه. دافعتني. كمت من مكاني. أصيح: سرى. سرى. صاحت: عليج الله لتكليلي شغل. والله ما بيه حيل. فتحت الباب: لا. لعد ما نريدج. جنة ما تناسبينا. ولي. فزت ووكعت بالكاع: جنة شنو. تعاي. أني خوش بنية. ركضت وراي: شكو؟ جن نجلاء: شكو. شصاير. –تفضلن. يم ست الخالة. الخبر اليقين. اثنينهن تراكضن. وكعدن يم امهن. وكالتلها: يمه. شكوحجت خالتي: علي اخو هاي. طالبج من اخوج. على سنة الله ورسوله. حطت ايدها على حلكها.

وحجت: عززززز. وضحكت. حجت خالتي: بربوك. شعدج وياه. –يمه والله ما عندي شي. هيج نظرات من بعيد لبعيد. بس ابنج هذا يخلي حب. يخلي صخام صاكرنا صكر. –يعني رايدته. حطت اديها على وجهه. وضمت راسها ورا نجلاء. حجت خالتي: تعاي بربوك. مستحية. وانت حاطة عينج عليه.

–يمه والعباس. لا بيناتنا حب. ولا كايللي احبج. ولا كايلتله. ولا سوالف حب أبد. سلام عليكم وعليكم السلام. وذاك اليوم من رحنالهم. سالني انت بيا مرحلة. بيا جامعة. شتريدين تصيرين. واجتنا هاي. (أشارت عليه) واتطافرنا. والعباس والحسين. بس هذا الصار. اندارتلي: وانت من شفتيها. ما كتيلي ولج. –أسرار الناس الها حرمتها. ما يحقلي اسولف. الواجب علي انصح. وهاي كدامها نصحتج. لو لا.

–أي والعباس والحسين. نصحتني. ورزلتني. بس يمه اني معجبة بيه. –خايبات. ما تطني النعاااااال. صرخت –يماااااا. وركضت لغرفتها. كمنا نضحك. والله مسودنة. حجت خالتي: جا ما طول الولد رايد. وهي رايدة. احنا شيضللنا نحجي؟ إذا سألج أيوب. كليله موافقة. وإذا ما سألج. يجيني. صعدت لايوب. هستوة مبدل. وكاعد متلفلف بالبطانية. كال: ها؟ –شها. موافقة. –سرى موافقة!؟

–ما بيناتهم شي. بس شايفها وشايفته كم مرة. وصاير بيناتهم نظرات. وهسه خطبها. وهي وافقت. وعاشوا عيشة طايح حظها. –أحسن يمعودة. حمل وانزاح من ظهري. ما طولها مرافقة. الله يوفقها. خل أفتك من حمل وحدة. علي خوش ولد. وأمن عليها بيه. وهم منها أخلص من سالفة ضلتج يم أهلج. وتنحل مشكلة أهلج. –والله ما أدري. –لا تدرين ولا تدخلين. اطلعي من السالفة كلها. هو الخطب. وهي الوافقت.

خبرتني امي. طلعت أسولف وياها. وحجيتلها. سرى موافقة. أمي فرحت. كالت: سرى حبابة وطيبة. وخوش بنية. تصيرلي ونيس بهالبيت. –يمه على حسابي. إذا اخوي اتزوج الثانية. واخذ حماتي. هاني. بعد شخلالي. –وانت شعليج. قابل انت خاطبتها. –والله يمه. ما أدري. اني الوضع ما حابته. ولا مرتاحتله. –الله كريم يمه. بعد الكاتبه ربج يصير. سديت الأتصال منها. ورحت دخلت للغرفة. هو يباوع تلفزيون. فتحت البطانية. هو فتحلي اديه.

حجيت: أيوب. تعبانة. بس أريد أنام. –نامي أبويه. ما محتاج شي غير راحتج. ارتاحي. حطيت راسي على صدره. وهو يمسح على شعري. ويباوع مراد علم دار. غفيت على هالوضع. الجو بارد. والغرفة مطفين الضوا. ومدفين بالفراش. وحضنه دافي. راحة من العمر. تجبرك تسكن وتغط بنومك. بعز نومتي. سمعت صوت التوجيهات الدينية مال قناة كربلاء. أيوب مطلعها. لأن صار المغرب. فزيت من فراشي. واتذكرت. فتحت اللحاف. وطلعت أركض: صاح شبييييج.

صحت: صلاة الظهر والعصر ما مصليتهاااااا. نسيييترحت توضيت. ومديت سجادتي. وصليت فرض الظهر والعصر. كبل لا يأذن المغرب. افر السبحة بالأستغفار. لما أذن. انتظرت يكول حي على الصلاة. كمت للصلاة. واديت فرض المغرب والعشا. كتله: الم السجادة. لو أتركلك اياها. –لا خليها. خل أكوم أتوضى.

كمت من مكاني. أريد أرجع لجربايتي. وهو طلع. وسد الباب وراي. شفت التليفون مالته صامت. ورسايل توصل. حاطة ع الميز يمه. سحبته. الاشعارات على وجه الشاشة كاعد توصل. شيختهم وادز رسايل: مو كتلي اخلص شغلي. واحجي وياج. من ١١ الظهر لحد هسه ما خلص شغلك. مو والله اشتاقيتلك. أني قريتها. لو اشتعل راسي. ناردخل. شافني لازمة تليفونه. باوعتله: شكو. شبيج. –منو شيختهم هاي. اللي تراسلك. من سمع الأسم. أجا كبل كال: انت شنو تلزمين تليفوني.

جريته ورا ظهري: منو هاي. أيوب. –مالج علاقة. منو. انطيني. –إذا اني المالي علاااااقة. منو اله علاقة غيري. –انطيني. أكلج. –تفتحلي التليفون. أشوف منو. –انطني. لا راسج يتكسر. –أني الراسي يتكسر. وحدة تكتلك. كتلي بس اخلص شغلي. واحجي وياج. ومن ١١. ما راسلتني. والله اشتاقيتلك. منو التحجي وياها. وتشتاقلك. واني مووووووجودة. –مالج علاقة. رجال. وهاي امور تخصني. –رجال. واني مو مرتك. –أي. مرة. الصارلج أسبوع هاجرتني. علمود امج.

ججججججج. أي مرررره؟ –حسبت علييييه. أسبوع تركتك. ورحت لامي. ما حسبت شهور. انت مريض. وتغلط. وترزل. وتصيح. وتطلع كل المك بيه. واني صايرتلك خادمة. جوا رجلييييييك. نكرت مني كلشي. وجازيتني على ااااااااسبوووووووع. حجيتها. وركعت التليفون مالته بالكاع. وهو تخبل. يتبع.