رواية سر بين السطور الفصل الثاني 2 - بقلم ريو الطائي

كمت بسرعة وأنا مفزوعة من صوتها. فتحت الباب ونزلت جوه. دخلت المطبخ، كانت مرت خالي، لزمتها من شعرها ومخلية السكين على إيدها. فتحت عيوني وأنا أباوع لها، شلون تصرخ بصوت عالي ومرت خالي تضحك. وبناتها واقفات ويباوعن. رحت بسرعة وأخذت السكينة من إيدها وأشمرتها بالكاع. باوعت على وجه جيلان، جانت روحه مفرفحة من الألم. حضنتها ومرت خالي تعيط بصوت عالي. مروة: يمهههااااااا تالييي عمريييييييييييييييييي

درت وجهي لها وأنا أحس نار اشتعلت بكلبي. نيران: مااكوووو غيرججج انتييي وبناتججججججج تخبلت لأن رديت عليها. أجت عليّ وجرتني من شعري. وخرت جيلان من حضني ولزمتها من إيدها وعضيتها وخرمشتها بظوافري. وبناتها واقفات يخافن يقربن. كمت جيلان تحاول تفكّنا بس ماكو. طلعت كل تعب وضيم عيشتنا فيها. نيران: وخريييي جيلان خلييي ربيهاااا كافي تضرب بينااا شنووو عبيد عدهم الله ياخذكمممم ان شاءلله شنووو أبقت عيشتنا عليكمممم

جيلان: كافيي نيران ولجج هسه يجي خالي ويضربجج عوفيهاا وخرتني جيلان وأنا أباوع لمرت خالي بحقد وغل، وهي وجهها مخرمش وشعرها واقف ودشداشتها نشكت من فوق لأن عتيتها قوي وأنا أحلكي ينزف. دفعت جيلان ومسحت أحلكي ورتبت بشعري. وهي صارت تعيط على بناتها لأن ما كتلني. نزعت النعال وصارت تضرب بيهن وتعيط. يمكن كل المنطقة سمعت صوتنا. مروة: هممم أحسبه نفسي أني عندي بناتتت ولجننن هايي الكح** تضرب بأمجن وأنتن واكفاتتت تباوعننننننن

صارن يتطافرن بالبيت وهي تركض وراهن ويعيطن. أبجي وتحاول تبرر: والله يمه أخفت اخخ يمه عليج الله كافي مردت بس تضرب بيهن. درت وجهي على جيلان، جانت بس تباوع عليهن وساكتة. درت وجهه إلي جانت الدموع بعيونها. تنهدت وفركت وجهه وإيدها صارت حمرة. سحبتها من إيدها وأخذت ثلج من الثلاجة وصعدنا فوك. كعدنا على فراش وسحبت إيدها وخلّيت عليها الثلج وإحنا ساكتين. تنهدت بصوت وهمست وأنا أباوع لها. نيران: شصاير ليش هيج سوت بيج

باوعت لي ورجعت أباوع على إيدها وحجت بغصة. جيلان: جايبت لي عريس تريدني أزوج. فتحت عيوني وأنا مصدومة. نيران: ش... شنوو عريس! لزمت إيدي وعيونها مليانة دموع. جيلان: أي علمود هيج ماردتج تضربيها. تدرين بيها أنتِ هسه راح تحجي وياه خالي ويجبرني أزوج. نيران: شنوووو يجبرججج هوه بكيفهااااقسم بالله حرككك البيت بيهممم ما ردت أبقى ساكتة وتفرك إيدها بتوتر. همست بصوت هادئ. نيران: أنتِ تريدين تزوجين جوجو؟

رفعت راسها وباوعت لي ودموعها نزلت. أول مرة أشوفها تبجي. مسحت دموعها بسرعة. جيلان: أنتِ تدرين إن بحياتي ما فكرت بزواج نيران فدوه ما أريد أزوج. تقربت مني وحضنتني ودموعها نزلت بغزارة. جانت تحاول تحتمي بي. ما أعرف إن أنا الأخذ القوة منها. أول أشوفها هيج ضعيفة، جانت دائما هي تواسيني وتشيل همي وتجبر خاطري بكلامها. بس أنا ما أعرف واسيها ولا أعرف شنو أسوي حتى مرت خالي تشيل فكرة الزواج من بالها.

خليت إيدي على ظهرها وأمسد عليها بهدوء. مرّ فترة طويلة وإحنا ساكتين وكل وحدة تفكر شنو نسوي. أكيد خالي ماراح يسمع من عدنا وراح يسويها عناد ويزوجها بدون موافقتها. كمت جيلان وراحت تمددت بفراشها. صارت الدنيا ليل والوضع هدوء. استغربت ليش لحد هسة ما إجه خالي وسوى هجوم علينا. باوعت على جيلان، غطت راسها بالبطانية وما تحركت. عفتها وطلعت. فتحت باب السطح، جان الجو بارد هواي. كعدت على كرسي.

غمضت عيوني، لميت رجليها وخلّيت راسي عليهن وغمضت عيوني واسترجع كل ذكرياتي. جنت كل ما أخلي يضربني أشرد من عنده وأصعد للسطح وأقفل الباب حتى لا يصعد. يبقه إيده بالباب وقت طويل وما يفتح. فزيت على صوت شخص يتقرب مني. فتحت عيوني باوعت. حسيت كلبي صار بي فراشات من شفته. جان واقف يم باب السطح ومخلي الجكارة بيده. نزلت رجليّ وعدلت كعدتي. أحس راح أموت من الخجل. صار فترة طويلة ما شايفته. رفعت راسي باوعت له، شفته بعده يباوع لي.

همس بصوت هادئ. علي: مشتاقلج نيران. دنكت راسي وحجيت بغصة. نيران: صار لك 5 أيام من جيت من الدوام، هسه يلا تذكرتني... جنت بيهن مشغول وغلاتج على كلبي. تجاهلت كلامه وحجيت. نيران: علي أنت تحبني؟ ابتسم وغمض عيونه. رفع إيده وخلاها على كلبه. علي: أنتِ عايشة بقلبي مكانج بين ضلوعي. تعرفين شوكت راح أبطل أحبج؟ من هذا يوكف. جان يحجي ويضرب على كلبه. ما رديت، بقيت ساكتة والجو صار أكثر برودة.

وهو لابس تيشيرت نص ردِن وشكله ما يوحي إن بردان. نيران: الجو بارد وأنت لابس هيج. معقوله ما تحس بالبرد؟ علي: مو كلنه مثلج يا قمري. ضحكت بخجل وخليت إيداتي على خدودي. وهو جان يباوع لي ويبتسم ابتسامة لطيفة. نيران: ليش واقف بعيد؟ هذاك كرسي جيبه وتعال اكعد. علي: لا خليني بمكاني أحسن. نيران: ليش أحسن؟ زفر دخان الجكارة وما رد. علي: أني رايح نيران انتبهي لنفسج. المرة الثانية الجي بها راح أكون جاي وياي أمي حتى تطلبج لي.

نيران: شنوو أمك قبلت بي؟ علي: وين تلكى جنة مثلج طبعاً تقبل. اسمعي أسبوع واحد وراح أكون يمج. تحملي هانت نيران راح نصير بيت واحد. اخخخ شكد فرحان يلا أكومين نزلي جوه باردة عليج يا حلوة. ابتسمت وما رديت. أحس كلبي راح يوكف من الفرح. باوعت له راح واقف يم السور حتى يطفر لبيتهم. دار وجهه، أغمز لي ودز بوسة بالهوا وكال. علي: أحبج يا نبضة كلبي. كال هيج وطفر. أصرت أكمز من الفرحة. وخيرًا راح نصير البعض.

أحس كلبي راح يوكف من السعادة. سعادة ما أحس بيها من قبل. (بس ياترى راح تدوم هاي السعادة؟ تقربت من السور اللي يطل على شارع. باوعت جوه ماكو أحد. الوضع هدوء والجو بارد. خليت إيداتي على خدودي وغمضت عيوني مبتسمة. أخذت نفس عميق وزفرته. فتحت عيوني على صوت قوي. باوعت، حاولت أركز منين جاي الصوت. رفعت راسي باوعت على البيت اللي مقابلنا. جان اكو شخص واقف على بلكونة. ما مبين غير الشارع.

ما جان مبين شكله زين لأن الضوية مطفية بس اكو ضو خفيف. بقيت مركزة وباوع. أخفت كلش أخاف شافني أحجي وياه علي ويروح يكول لخالي. درت وجهي ورجعت ورا، واكفة يم باب السطح. أخذت نفس عميق وزفرته. فتحت الباب ورحت بسرعة للغرفة. دخلت جانت جيلان كاعدة وتقرأ قرآن. بلعت ريقي. سديت الباب ورحت تمددت بفراشي. بست القرآن وخليته على صفحة ودارت وجهه لي وتباوع لي بخزرة. جيلان: وين جنتي؟ نزلت عيوني عنها، حاولت ما ارتبك. نيران: ك...

كاعدة بسطح لأن ضوجة وما جنت نعسانة. جيلان: من شوكت بينكم علاقة نيران؟ وليش ما أكلتي لي؟ ما رديت. بقيت ساكتة. عزة بعيني، معقولة جان صوتنا عالي لو شافتني وأنا أباوع على بيت الجيران؟ جيلان: أنتِ تدرين أمه ماتحبج وإذا تزوجتي ماراح ترتاحين بحياتج. وخرت الغطة وزفرت نفس بنتر. نيران: اوف منج شبيج وياي أنتِ هاي بمكان ما تفرحيلي. جيلان: أني أتمنى تعيشين مرتاحة. منو كال ما فرحانة لج بس صدقيني أمه ماراح تقبل. لميت رجليّ وتربعت.

باوعتلها ودنكت راسي. نيران: إذا ما قبلت مراح يجي حتى يخطبني. صح؟ هزت راسها وتقربت لزمت إيدي. جيلان: يمكن يحبج صدك بس مراح يخسر أمه علمودج. نيران: جيلان أدعي إن توافق. ابتسمت وحضنتني. بادلته الحضن. جيلان: لا تفكرين بأشي الله كريم. يلا تعالي ننام. وخرت من حضنها وبست إيدها المحروقة. تمددنا ورحنا بالنوم. مرّ يومين وماكو أحداث جديدة. خالي ما إجه للبيت وإحنا متعودين عليه لأن كل فترة يغيب كم يوم بدون لا يكول لأحد.

أني وجيلان أبقينة بقلق لأن إذا رجع خالي ومرته حجت له على صار أكيد راح يزوج جيلان غصب. جنت خايفة وأفكر شنو راح يصير بينا. فزيت من أصفنتي على صوت سماء. درت وجهي لها. أوف هاي البنت شكد فطيـرة على رايح والجاي فاكه أحلكها وتتمنى يصير زوجها. نيران: خير شبيج يمعودة. درت وجهه يمين ويسار تباوع أخاف اكو أحد. دنكت راسها عليّ وهمست. سماء: ولج اجه نفس الشخص. باوعت له باستغراب. نيران: عن ياشخص تحجين؟ خزرتني وكرصتني من إيدي.

سماء: لا تصيرين غبية باوعي وراج وراح تفهمين قصدي. ما كنت مهتمة. درت وجهي وشفت نفس الشخص اللي شفته المرة الماضية ومركز عيونه علينا. درت وجهي بسرعة وأخذت نفس بصعوبة. أحس رجليّ نشلت من الخوف. لزمت إيدي سماء. رفعت راسي باوعتلها وهمست بصوت خافت. نيران: م... منو هاذ؟ باوعت لي سحبتني من إيدي ودخلتني لغرفة مخصصة بس للاستراحة. كعدتني على كرسي. واكفة كدامي. سماء: نيران أني خايفة عليج منه. أحس وراه شي. باوعتلها.

نيران: أني ما شفته من يومين جان موجود وأني مامنتبها له. سماء: ما أتوقع موجود لأن حتى أني ما انتبهت لوجوده. تعالي غسلي وجهج. هزيت راسي وكمت وياها. غسلت وجهي وطلعت حتى أكمل شغلي. جنت مدنكة أمسح بالطاولات. رفعت راسي باوعت له بفضول. شفت شخص كاعد يمه وسوالف وياه وكل شوي يدور وجهه يباوع لي. زفرت نفس بقلة صبر. باوعت على سماء جانت تنظف بالطاولة القريبة من عندهم. حجيت بصوت شبه عالي.

نيران: صدوك سماء كلج بعد شكم يوم خطوبتي وأتمنى تكونين موجودة. رفعت راسها تباوع لي وهيه مصدومة. هاجت عليّ بسرعة ولزمت إيدي وتهز بيها حجت بحماس. سماء: ولجج صدك يعني راح تزوجين؟ أوييي كلش فرحانة. جهزت راسي وأني مبتسمة بتمثيل. درت وجهي باوعت شفته مرجع ظهره على كرسي ويباوع علينه هو والشخص وياه. درت وجهي بسرعة ورجعت أحجي ويه سماء. والغبيه صارت تفكر شنو تلبس للحفلة. أخلص الدوام وهيه صافنة شنو تسوي. طلعنا بعد ما أخلص الدوام.

هيه إجه أخوها وأخذها. حاولت وياي إن أصعد وياهم بس ما قبلت. رحت أمشي وحدي وأفكر منو هاذ وشيريد مني. معقولة يطلع رئيس عصابة؟ وكفت وصفنت شوي وبعدين غميت كصتي. نيران: شنو هاذه التفكير رئيس عصابة ويجي عليّ أنا مالكة غيري. والله يالله. رجعت أمشي والجو جان بارد. ماكو أحد بره والغالبية سكروا محلاتهم. اللي يروح للجامع واللي يرجع للبيت يتغدى. رجعت للبيت وأني ميتة جوع. فتحت الباب ودخلت. وكل عادة جيلان واقفة تنتظرني. ابتسمت لها.

نيران: ولج بس لا يكون مشتاقتلي. باوعت لي من فوق لي جوه وشرت على نفسها. جيلان: أني شتاقلج لا حبي متوهمة. شايفة نفسج بالمراية أنتِ. خزرته ودخلت للبيت. باوعت مجان اكو أحد. درت وجهي. نيران: ليش ماكو أحد؟ معقولة تركو البيت النه وراحوا؟ جيلان: لا ماتركوا كل وحدة بغرفتها. صغرت عيوني وأنا أباوع لها. نيران: أول مرة أدخل للبيت ومرت خالج ما تلعلع بصوتها. ما رديت دخلت للمطبخ عفتها وصعدت فوك.

أغسلت وغيرت ملابسي وهيه شوي واجت جابت لي أكل. كعدنا ناكل اثنينة وساكتين. شوي وهي حجيت بحماس. جيلان: اليوم جيرانه عدهم حفلة خطوبة وعزمونا. شرايج نروح؟ رفعت راسي باوعتلها. نيران: معقولة عزمونا؟ بعدين منو يكول مرت خالج تخلينه نروح تعرفين بيها شكد حقيرة. جيلان: لاتخافين هي أصلًا هي اللي كالت ترحن. ما رديت بقيت ساكتة. شنو صاير بدنيا؟ معقولة الكتلة فادت وياها. سبحان مغير الأحوال. كمت أغسل ورحت أساعد جيلان بتنظيف البيت.

أنظفنا البيت. أبقى بس باب البيت. أخذت الصونده. فتحت الباب واكفت أغسل وناس رايحة وراجعة. فجأة طلع واحد من البيت المقابلي واللي عدهم حفلة. رفعت راسي باوعت له. جان لابس لبس ضابط وعلى كتفه ثلاث نجمات وجسمه أضخم حيل. دار وجهه باوع لي رئستن. دنكت راسي. سحبت الصونده ودخلت للبيت وأنا أرجف من البرد لأن ملابسي تبُللت. طلعت مرت خالي باوعت لي. مروة: دخلي غيري ملابسج بسرعة لاتتمرضين حبيبتي. درت وجهي باوع وراي ماكو أحد.

رجعت باوعتلها وأنا مستغربة. شرت على نفسي وحجيت. نيران: هاذه الكلام اللي أني؟ مروة: أي يلا دخلي للبيت الجو بارد. بقيت باوعتلها وأنا ساكتة مصدومة من هاذ التغيير. عفتها ودخلت للبيت. صعدت غيرت ملابسي ونزلت يم جيلان بالمطبخ. هي تسوي عشة وأني كاعدة أسوالف وياها. درت وجهه لي. جيلان: ليش ماتحجيلي شي يصير وياج بالشغل مثل قبل؟ بعدت نظري عنها وحاولت ما ارتبك. نيران: ماكو شي جديد بس شغل. جيلان: ومديرج شلون تعامله وياج؟

نيران: لا تشغلين بالج كل شي بخير. هزت راسها وسكتت. ما حبيت أحجيلها شي حتى لا ينشغل بالها. كملت العشة وصعدنا على السطح نسوالف ونتخيل لو أهلنا لحد هسه عايشين. مرّ وقت طويل وإحنا كاعدين. صاحت علينا مرت خالي حتى نصب عشة. نزلنا وصبينالهن عشة. ولأول مرة تكول تعالن كعدنه ويانه ناكل سوة. جنت مستغربة منهم وجيلان مثلي. كعدنا ناكل وإحنا ساكتين بس مرت خالي تحجي. كملنا أكل.

أخذت المواعين وأغسلتهن بمكان جيلان وصعدت فوك حتى أغير ملابسي. دخلت للغرفة شفت جيلان منزلة الملابس كلها من الكنتور وما تعرف شنو تلبس. سندت نفسي على باب وباوعتلها. جيلان: تعالي اختاري لي فستان ما أعرف شنو ألبس. نيران: عادي لبسي أي شي كل شي حلو يطلع عليج. باوعت لي وابتسمت. اختارت لها فستان. أخذته ونزلت جوه حتى تغير بالحمام. أخذت تيشيرت وبنطلون لبست بسرعة وأمشطت شعري وكعدت أنتظرها.

باوعت على ملابس الأرض كلهم مرت خالي تجيبهن النه من البالة. ابتسمت بحزن وتمددت وباوع على سقف بشرود وأفكر منو هاذ ليش ما شفته؟ معقولة نفس الشخص اللي شفته بالمطعم؟ لا لا ما يشابهون. إذا مو هوه لعد منو؟ بقيت أفكر لحد ما فتح شوي ونفتح الباب ودخلت جيلان. رفعت راسي باوعتلها. جانت مغيره الفستان ومخليه مكياج ومسشورة شعرها. طالعة تجنن. عدلت كعدتي وبقيت أباوع لها. نيران: ليش غيرتي الفستان؟ بعدين هاذه فستان مال وفاء.

أخذت نفس وتباوع لي بشرود. جيلان: مرت خالي ما أعرف شنو يدور بالها. هيه لبستني هاذه الفستان. كمت واكفت وصرت كبالها. خليت إيدي على خدها. نيران: أدري وراها شي بس إن شاءلله خير. انسي هسه ولا تشغلين بالج. دنكت واخذت المراية تباوع على شكلها وعلى فستان. دارت وجهه لي وعيونه مدمعة. جيلان: ما أريد لبس هيج فستان ولا أريد يطلع شعري. أريد تحجب حرام علينا نبقى بدون حجاب. تنهدت بتعب. نيران: شنو بيدي تدرين بخالج ما يقبل نتحجب.

عجيب مرة خالج غير عن باقي الناس. ما تشوفين بناته ومرته مو محجبات. جيلان: حنى شكو معلينه بيهن. حركت كتافي بمعنى ما أعرف. وأخذتها من إيدها ونزلت جوه. جانت مرت خالي وبناتها لابسات ومجهزات وجوهن ما تنعرف من المكياج. رفعت راسها باوعت لي وباوعت على جيلان. هزت راسها وطلعت كدامنها. أخذت نفس بضوجة. ما كنت أريد أروح بس علمود جيلان تستحي تطلع بدوني. طلعنا ورحنا لبيتهم. جان الباب مفتوح لأن نسوان طابة وطالعة. دخلنا داخل.

جانت مرة چبيرة بالعمر واقفة بالباب وتستقبل نسوان. أسلمت مرت خالي عليها ومدري شنو همست بأذنها وهيه تهز براسها وتباوع على جيلان. تقدمت من عدنا وصارت تبوس بينه. هلا بيجن يلا دخلو داخل. مروة: يزيد فضلج حبيبتي. باوعت على مرت خالي شلون تحجي بأدب وتضحك وأني مستغربة من هاذه الوضع لأن هي ولا واحدة تحبها لأن تسوي مشاكل وياه الكل. هاي جانت أول مرة وحدة تعزمها. دخلنا داخل وجان البيت جبير وتصميمه فخم وكلش حلو.

رحنا كعدنا على كراسي وجيلان لزقة بيه. باوعتلها وهمست. نيران: شسالفه إيدي عوفيها تره ما راح ياكلوج. بعدين أنت مو جايه أكثر من مرة لهاذه البيت. جيلان: أي بس بسرعة أرجع ما أعرف أحد بيهم غير هاي البنت الخيط الهاملابس. نيران: امم بس ليش تخيط دشاديش بمكان ما تروح تشتري جاهزات. حركت كتافها وماردت. شوي ونزلت بنتهم المخطوبة. كعدت على كوشة وشكلها مقبول. مبتسمة ما فارقت وجهه. شغلوا الأغاني وصار الكل يركص.

اجت بنت وسحبت جيلان وكومتها حتى تركص. وهيه مستحية ماتريد تكوم. وتحجي وياها بهمس. جيلان: عفيه ما أعرف أركص.. يلا حبابه أكومي وياي فدوه. كمت جيلان وصارت تركص وياها. أخذت نفس وزفرته بملل. ما أحب الحفلات ولا المناسبات. سحبت نفسي وطلعت للحديقة. جان موجود بيها طاولة وكراسي ثلاثة شكلها كلش مرتب وبيها هواي وراد من كل النواع. ابتسمت على جمالها. رحت كعدت على واحد من الكراسي. خليت راسي على طاولة وغمضت عيوني.

أحس راسي صدع من صوت الأغاني. ياترى راح تبقى هيج حياتي شغل؟ تعب؟ تفكير؟ رهق؟ كسر خواطر؟ طعن بشرف؟ غلط وسب تهديد. أخذت نفس بغصة وبلعت ريگ. فزيت بأيد على كتفي. فزيت ودرت وجهي سريع. باوعت. خزرته وكمت بسرعة وحجيت بعصبية. نيران: شلون تجرئ وتخلي إيدك عليّ. ابتسم بستهزئ وسحب الكرسي وكعدت. طلع جكارة من الباكيت وشغله. رفع راسه باوعلي وهمس بهدوء. :: الي يسمعج ميكول مخلي إيدي على كتفج. يمكن يفكر مخليها على غير شي مثلآ مو صح!

خزرته ونترت بي بعصبية. نيران: انجب يااقندرة شلون تحجي وياي بهاي الطريقة. دنك راسه وابتسم وهوه يزفر الدخان. عفته وجيت أدخل للبيت واني معصبة. بس استوقفني كلامه. :: ولا كأن أنتِ نفسج اللي تحجين وياه شخص غريب عليج وبالسطوح وحدكم. كمل كلامه وضحك بستهزئ. بلعت ريگ يعني هو نفسه اللي شفته. بقيت أباوع له وساكتة. دار وجهه وهوه مرجع نفسه على كرسي. باوع لي وحجه. :: ليش مصدومة؟ وين راح لسانج؟ بلعت ريگ وحاول ما ارتبك.

نيران: مالك علاقة لاتدخل بشي ما يعنّك. أني حرة بتصرفاتي محد يدخل بيه. أفهمت. رفع راسه وغمض عيونه وهمس. :: صار ماتدخل بس مرة ثانية مراح يصير خير وعدج. ما رديت عفته ودخلت داخل واني ألف فكرة اجت ببالي. شنو قصده؟ وهوه ليش جاي يدخل بيه؟ أكيد وراه شي. ما اهتميت بصراحة رحت أدور على جيلان. دخلت للمطبخ جانت واقفة وتشرب مي. ودارة وجهه. لزمته من إيدها. نزت ونترت إيدي. باوعت لي وأخذت نفس. جيلان: شبيج فززتيني وين جنتي؟

ماشفتج موجودة. حاولت غير الموضوع وحجيت. نيران: خلي نرجع للبيت تعبت ورأسي صدع. أخلت إيدها على جبيني تتحسس أخاف اكو حرارة. دفعت إيدها. جيلان: يمكن صخنتي تعالي نكول لمرت خالي ونرجع حتى ترتاحين. جيت أروح لزمته من إيدها. دارت وجهه باوعت لي. نيران: تعالي نرجع هيه تجي من تخلص الحفلة يالله. هزت راسها وطلعنا من البيت. درت وجهي وعيني راحت على حديقة. جان بعده كاعد ويشرب جگاير. رفع راسه وصارت عينه بعيني. دنكت راسي سريع.

رحنا للبيت وصعدنا فوك. راحت جيلان تغير ملابسها واني رحت تمددت على فراشي وتغطيت. شوي ودخلت جيلان كعدت يمي ومدت إيدها ونطتني حبوب صداع. جيلان: شربيه حتى لا يبقى راسج يأذيج. أخذت الحبوب بدون كلامه وبلعته. شربت مي وهيه تمددت يمي وأخذتني لحضنه وتمسد على شعري. بست راسي وهمست. جيلان: شبيج نيران أحس بيج شي ووضعج هاي الأيام ما يطمن. احجي لي. ما عرف شنو رد عليها بقيت ساكتة. مع إن ما متعوّدة أضم عليها شي.

أخذت نفس وزفرته وأنا بلعم. نيران: ماكو شي صدقيني. لمتني صدرها وبست شعري وهمست. جيلان: إن شاءلله يطلع كلامج صدق. ما جاي چذبين عليه. سكتت مارديت. غمضت عيوني شوي ورحت بالنوم. صحيت الصبح على إيد على خدودي. فتحت عيوني باوعت ونترت إيدها بضوجة ورجعت تغطيت. جرت الغطة مني وحجت. جيلان: كومي كافي نوم تأخرتي على شغلج. باوعتلها بنعاس وأني افرك بعيوني. نيران: ناس أول ما تكعد تكول صباح الخير. تدرين أو لا. ضحكت وصارت تألم الفراشات.

جيلان: حنى ناس مثقفين ما نصبّح على أحد. ابتسمت وكمت. طلعت ملابس ونزلت جوه أسبح بسرعة وطلعت رجف من البرد. خليت المنشفة على شعري وأصرت أنشف بي. نزلت جيلان. باوعت لي وحجت بخوف. جيلان: ولج باردة شلون سحبتي؟ هسه تمرضين. نيران: انجبي ما أمرض. غمتني ودخلت للمطبخ. هزيت إيدي ورحت كعدت على الكرويته. باوع على كل ركن بالبيت. هدوء ماكو صوت. اخخ شكد البيت حلو بدون خالي الچلـب.

أكيد هسه مخلص وقته وياه الكح*حياته عبادة عن مشروب ولهو ومشاكل. محد يحبه بالمنطقة الكل يكرهه حتى مرته محد يحبها. أخذت نفس وزفرته. كمت شمرت المنشفة ولبست الشفقه وطلعت من البيت حتى بدون ما أودع جيلان. مخنوكة أحس بغصة. محد راح يحس بوجعي. أصعب شي نك تعيش بيت ما مرغوب بيك. شعور يوجع تتعرض للهانة والضرب وتبلع غصتك وتبقى ساكت. وذا حجيت محد راح يسمعك ولا أحد يهتم لك. وكفت يم باب المطعم وباوع علي من بره.

ياترى يجي يوم وأدخل بدون لا أخاف من عياط المدير لأن تأخرت بجيه مو بالوقت المحدد. سميت باسم الله ودخلت. رحت بسرعة وبديت بشغلي. سوء شي لما تسمع إهانة من الزبائن وكلام يجرح. تحرش كلام بذيء. بس مجبور ماترد وتبقى صامد. باوعت على كل الطاولات ماشفته. أخذت نفس براحة. كل ما يكون موجود ما أكدر آخذ راحتي لأن عيونه تتجول أحولي. فززني صوت المدير باوعت. :: على شنو صافنة؟ كملي شغلج بسرعة. هزيت راسي وما رديت.

سماء ما اجت لأن مريضة كلش. ضجت لأن ما داومت. أخلص الدوام وأني مخنوكة. أحسه بحساس غريب تجاهلت هذا الشعور وطلعت من المطعم وباوع شلون المطر ينزل. تأفأفت بضوجة لأن ملابسي غمصت. مجان اكو أحد بالشارع بس سيارات. ما أقدر انتظر أكثر لأن المطر كل ماله ويزيد. طلعت بسرعة وأمشي بوسط الشارع وأني مركزة على قطرات المطر. فزيت على صوت سيارة قريبة من عندي. درت وجهي وما أحس إلا يد تعتني بقوي وتدخلني سيارة.

خلو وصلة على خشمي وبعده فقدت الوعي.