رواية صراع القاسم الفصل الرابع 4 - بقلم سلوى عوض

قاسم: نهار أبوكي أسود، خلصتيه كله؟ صابرين: ديه حاجة أبويا مشيعهالي عشان أتجوز بيها. قاسم: تتجوزي؟ ده إنتي بقيتي عاملة زي الخزان. صابرين: خلاص بقى عايزة أنام. قاسم: اتخمدي خمدة تخمدك في الندى بدري. صابرين: أنا هروح لأبويا الصبح. قاسم: غوري مطرح ما تغوري. (يتركها ويخرج من القاعة) قاسم: أنا عايز أشرب قهوة، أخد البن بتاعي وأعملي فنجان. (أما دهب كانت جالسة في القاعة المخصصة لها هي وفاتن) دهب: بت يا فاتن، أنا عطشانة.

فاتن: روحي المطبخ اشربي، بس اسمعي تولعي النور وتطفيه في لحظتها. دهب: طيب. (لتخرج دهب قاصدة المطبخ، لتسمع صوت أحد يغني) دهب: يا أما المطبخ مسكون ولا إيه؟ (ليسمعها قاسم) قاسم: بتعملي إيه عندك دلوقت يا بت إنتي؟ دهب: أصل أنا كنت جاية أشرب. قاسم: تشربي ولا تسرقي وكلتي من التلاجة؟ دهب: هسرق إزاي والتلاجة مقفولة؟ قاسم: آه صح، المهم تعرفي تعملي قهوة مظبوطة؟ دهب: آه بعرف.

قاسم: خدي كيس البن، ولمي على قد فنجان وهاتي الكيس تاني. دهب: حاضر. (أما عبدالسميع كان يتحدث مع نفسه) عبدالسميع: وبعدين يا عبدالسميع، لازم تخش جوه عيلة جاسم بسرعة وأصرف. ولا يهمك، الكنز اللي تحت البيت هيخليك أغنى واحد في الدنيا كلها. أمال إيه؟

عشان كده هوصي الحاتي على كفتة وكباب وحمام كتير، وآخد زيارة وأروح عشان جاسم المجشف هو وناسه يبقوا زي الخاتم في صباعي. وآخد كمان حلويات وكده أبقى زغللت عيونهم، مساكين ما يعرفوش حاجة. تلجي جاسم نايم دلوقتي، بكرة بعد ما أجيب كل حاجة اتصل بيه وأقوله أنا جاي أتغدى معاك. (يضحك) ده ممكن يموت فيها، يحسبني هكلفه. (أما صابرين كانت قد أغلقت باب القاعة بالمفتاح، لترفع مرتبة السرير لتخرج كرتونة شيبسي)

صابرين: هو ما دام خرج من عندي، يبقى راح جاعته الخصوصي. آكل أنا بقى وأمتع نفسي بدل ما أنا خسيت النص كده من قلة الأكل. (تنظر إلى المرآة)

صابرين: حسرة قلبي على نفسي، خسيت كتير وكمان وشي مصفر كده. آه من قلة الأكل. أنا هخلي أبويا يخليهم يدبحولي ذكر بط وكام جوز حمام، آه ويتكبسوا فريك عشان آكل وأشبع بدل الشح اللي عايشة فيه هنا. ووشي المصفر يرد، منك لله يا جاسم إنت وأمك. الهي يشندل حالكم زي ما مشندلين عيشتي. الهي تشتهوا الماية متلاقوها، وينشف جلبكم وكبدكم. صابرين: يا أبويا، الشيبسي خلاني صدري يولع. أطلع جذاذة ساقعة أشربها. الهي تشرب المر يا جاسم إنت وأمك.

(أما في المطبخ، نجد دهب تصب القهوة) دهب: القهوة يا كبير. قاسم: هاتي. (يرتشف قاسم من القهوة) قاسم: نفسك في القهوة حلو. دهب: كتر خيرك. قاسم: إنتي أكلتي أبويا وأديتيه علاجه؟ دهب: آه، وغير كمان ومنزلتش من عنده غير لما راح في النوم. حضرتك، بس يعني عايزة أقول حاجة لحضرتك. قاسم: حاجة إيه؟ دهب: أصل يعني الحاج محمد بيقول محدش بيسأل عليه خالص. قاسم: اسمعي يا دهب، من النهارده كل شغلتك أبويا، أي حاجة غير كده لأ.

دهب: طب الست حليمة هتوافق؟ قاسم: مافيش حد هنا له كلمة غيري، فهمتي؟ دهب: آه فهمت، وكمان هو جالي نفسه ياكل فرخة ويشرب شربتها. قاسم: طيب بعدين، ما إحنا لسه دابحين فرختين اللي طفحوهم المذاغيف. دهب: اسمحلي حضرتك، هو بياخد علاج تقيل قوي ولازمه غذا. قاسم: مش قولت بعدين؟ يالا روحي نامي لك كام ساعة كده.