رواية ستندم الفصل السابع 7 - بقلم سوليية نصار

قال كريم بصدمة: -بتضربيني يا اسمهان… كان مصدوماً من البنت التي كان قادراً على تشكيلها بسهولة، تمتد يدها عليه. البنت التي كان يقدر السيطرة عليها بسهولة. البنت هذه كانت لا تستطيع مجادلته. كانت هي التي تتوسله أن يكون معها. سامحته على كل شيء فعله معها، كيف الآن تتصرف بهذه الطريقة وكأنه لا شيء بالنسبة لها. وكأنها نسيت.

هذا بالتأكيد ما كان يفكر فيه كريم. هو فاكر أنه عشان سامحت مرة واثنين وعشرة هسامح على طول. عرفت إني غلطت في حق نفسي وحق بابا لما ارتبطت بواحد زيه. -انتي بتضربيني يا اسمهان!!! -أيوه بضربك… ده واضح صح. ولو قربت مني بأي طريقة مش عاجباني أنا هضربك تاني. -انتي إيه اللي حصلك… مش كفاية سامحتك عشان ارتبطتي بغيري… واتخطبتي. ضحكت جامد وأنا ببص له. مكنتش مصدقة قد إيه هو بجح.

-أنا بجد مشوفتش أبجح منك… انت اللي اتصلت ببابا وحددت ميعاد وبعدها اختفيت عشان متتحملش المسؤولية وروحت عشان تعك بعيد عني صح. وشه بهت وقال: -لا أنا… ابتسمت بتريقة وقولت: -انت فاكر إني غبية مش فاهمة؟ هو أنا فعلاً كنت غبية وأنا عارفة إنك بتعك مع بنات تاني وكنت بسكت. كفاية قرفك اللي اكتشفته وسامحتك عليه. بس خلاص عرفت إني كنت غلطانة والحمد لله ربنا كشفك ليا والحمد لله فوقت يمكن متأخر بس الحمد لله.

وبعدين سيبته ودخلت عشان المحاضرة بتاعتي. قضيت ساعتين بعد كده قررت أمشي رغم إن كان عندي محاضرة تاني، بس أنا كنت فعلاً تعبانة. خرجت من الكلية ولسه همشي لقيت كريم وقف في مشي. نفخت بضيق. لقيته بيقول بعذاب:

-والله آخر مرة هعمل كده… اسمهان والله هموت لو سبتيني. أنا زودتها أنا عارف… أنا صحيح أخدتك كأمر مسلم بيه في حياتي وأنا أسف… والله العظيم أسف… بس أنا بحبك وصدقيني هموت لو روحتي لغيري. اديني فرصة واحدة فرصة واحدة واوعدك عمري ما هزعلك تاني. وهتجوزك. من بكرة لو عايزة. بصيت له ببرود وقولت: -كريم استوعب الموضوع… أنا مبقتش أحبك. وبعدين لسه همشي مسكني من إيدي وقال بهوس:

-مستحيل أسيبك… مستحيل انتي ملكي… أنا هموت لو سبتيني وأنا مش مستعد أموت. هترجعي ليا بإرادتك أو غصب عنك. ولسه هتكلم حسيت بحد بيشدني وراه وبيقف في وشه. بلعت ريقي وأنا شايفة مروان قدامي وهو بيقول: -لو شوفتك ماسك إيديها تاني أنا هكسر إيديك الاتنين يا شاطر. كريم اتجنن ومسك فيه وقال: -مش خلاص فسختوا خطوبتكم؟ ابعد عنها بقا. اسمهان ملكي أنا. صرخت فجأة لما مروان مسك كريم وفضل يضرب فيه.