رواية تاج الفهد الجزء الثاني الفصل الأول 1 - بقلم مريم مصطفى

في أوضة ضلمة وقزاز متكسر على الأرض وصوت عياط. دخل فهد فتح شباك الأوضة والنور دخل على وشه. تاج بعصبية: اقفل الشباك يا فهد واطلع بره. فهد: أنا سيبتك امبارح عشان كنت مقدر حالتك وقولت على الصبح هتكوني ارتحتي، بس الواضح إن مفيش فايدة من لما جينا من عند الدكتور ولسه زي ما انتي. تاج: أرتاح!! أرتاح إزاي وأنا مبخلفش، أرتاح إزاي وأنا عارفة إن عمري ما هكون أم.

فهد: قولتلك أنا مش عايز أطفال دلوقتي، أنا عايزك انتي وبس، لسه العمر قدامنا، افهمي يا تاج، اللي ربنا عايزه هيكون. تاج بعياط: انت بتضحك على نفسك، انت أكتر حد نفسه في طفل، انت مش بتشوف نفسك لما بتكون قاعد مع ولاد سيا وورد بتكون سعيد إزاي؟ أنا السبب، أنا حرمانك من أبسط حقوقك وإنك تكون أب، أنا مبخلفش ودي حقيقة لازم تصدقها و... قطع كلامها وهو

بيقرب عليها وبيمسك إيدها: أوعي تكملي يا تاج، أوعي تخلي لسانك يقولها، أنا ليكي انتي وبس. تاج: مش قادرة يا فهد، مش قادرة أرفع عيني في عينك وأنا مقصرة في حقك. فهد: كفاية لحد كده يا تاج، كفاية كلام في الموضوع ده. شالها ودخلها الحمام وجاب لها لبس. فهد: النهاردة الجمعة والعيلة كلها تحت، مش عايز حد يحس إنك ضعيفة، عشان مراتي تقول عمرها قوية، خدي شاور دافئ والبس لحد ما ألم الزجاج اللي اتكسر بره وننزل سوا. تاج: مش عايزة أنزل.

فهد: تاج مش هكرر كلام كتير، يلا. تاج بصتله بهدوء وهو سابها وراح يلم الزجاج ويرتب الأوضة، لأنه مش حابب إن حد من الخدم ينضفها ويقول لوالدته. تحت كانت العيلة كلها قاعدين بيتغدوا على السفرة. سماح: أنا مش فاهمة تاج مالها، من لما جت هي وفهد امبارح من برة وهي منزلتش من الجناح، حتى الفطار رفضت تنزل تفطر معانا وفهد طلعوه بنفسه فوق ومنع الخدم إن محدش ييجي جمب الجناح بتاعهم.

سيا: أكيد كانت عند الدكتور، ما انتي عارفة يا ماما تاج الموضوع مأثر معاها. صفاء: ربنا يكون في عونها يا بنتي، اتكتب عليها تتوجع وهي صغيرة وهي كبيرة. سماح: ربنا يرزقهم إن شاء الله. ورد: ربنا يخلي لها فهد، عوضها عن كل اللي شافته، ومتأكدة إن شاء الله إن ربنا هيرزقها ببيبي في أقرب وقت. جميلة: إن شاء الله. سماح: طب اتفضلوا يا جماعة اتغدوا، هما شكلهم هيتأخروا. سليم: بطل لعب مع ابنك، وكل بق.

سيا: أهو كده على طول، حتى في البيت سبني وبيلعب يا ماما مع فيروز وأنا ولا كأني موجودة. سليم بغمز: الحلوة بتاعتي بتغير مش كده. سيا: وهغير على إيه، خليك يا حبيبي، اديهم حنان. سليم: عندك حق، أنا اديتك حنان كتير زمان، ادي ولادي شوية. بق: سيا: ومن غيري مكنش هيبقى عندك فهد وفيروز. سليم بضحك: ومين قالك كده، كنت هتجوز وهجيبهم برضه من غيرك. سيا بعصبية: شايفة يا ماما، شايفة بقا مستفز إزاي!

سماح: بيهزر يا سيا، هو معندوش أغلى منك. زين: انتوا كل جمعة تتخانقوا كده، أنا صدعت منكم. سليم: والله غيران، اعمل زينا واتجوز. زين: اتجوز إيه!! هي ناقصة وجع دماغ ونكد يا راجل. مصطفى: والله يا بني غلبت معاك في الموضوع ده، واخته جميلة جابت له كذا عروسة وطفشهم بأسلوبه. زين بهمس لسليم: لازم تقول اتجوز دلوقتي، ده انت رخيم، حاول تخلي أبويا يقفل على الحوار ده قبل ما أقول إنك كنت معايا في الديسكو امبارح، هااا، ومدام سيا قاعدة.

سليم: يابن الـ****، حسبنا بعدين، أهدى عليا. سيا: انتوا بتقولوا إيه، ملاحظة إنكم بتتهمسوا من الصبح. سليم: احم، لا أبداً، بنتكلم في شغل. والله يا عمي أنا شايف إن الجواز مسؤولية كبيرة وزين مش قدها، سيبه يكبر شغله الأول. مصطفى: براحته، أنا عملت اللي عليا معاه. في جناح فهد وتاج. خرجت من الحمام وقعدت تسرح شعرها قدام المرايا وشكلها مرهق. قرب فهد منها ووقف يسرح لها شعرها بهدوء. تاج بحزن

وهي بتبصله في المرايا: مش هنخلف أبداً، مش كده. فهد بتنهيدة: دي حاجة في علم الغيب، بس عندي ثقة في ربنا إنه هيفرحنا قريب. تاج: بس الدكاترة قالوا مفيش أمل. فهد: معجزات ربنا مش مستحيلة، بس نصبر، كلها شوية وقت. تاج: متجوزين بقالنا سبع سنين ومحصلش ولا مرة حتى إني أحمل، هصبر أكتر من كده إيه! فهد: في ناس بتقعد فوق الـ15 سنة وأكتر وربنا بيديهم في الآخر. تاج: بس أنا... فهد مقاطعاً لكلامها: أنا خلصت شعرك، البسي طرحتك عشان ننزل.

فهد سابها وراح جاب لها كوباية عصير. فهد: اشربي العصير قبل ما ننزل. تاج بملل: مش فاهمة إيه لازمة العصير ده كل يوم، أنا مش عايزة أشربه، زهقت. فهد بتوتر: بحس إنك بتبقي كويسة لما بتشربي، وكمان انتي مبقتيش تاكلي زي الأول، فده أحسن على الأقل. خدت تاج من إيده الكوباية وشربتها. تاج: يلا، أنا خلصت. فهد قرب

عليها أكتر وخدها في حضنه: مش عايز حد تحت يشوفك ضعيفة كده ولا الحزن ده في عيونك، متبيّنيش ضعفك قدام حد غيري، خليكي متأكدة إني دايماً سند ليكي، إيدي عمرها ما هتسيبك، وجعك هو وجعي، اليوم اللي بتضحكي فيه الدنيا كلها بتضحك لي، ابتسامتك بتهون عليا حاجات كتير يا تاج، عشان خاطري ارجعي زي الأول، ارجعي اضحكي، خلي الدنيا تضحك لي.

تاج وهي بتحضنه أكتر: مش عارفة أقولك حاجة غير إني بحبك، بس وعد، هحاول أنسى، هحاول أعوضك عن الشهور اللي فاتت، بس سيبني آخد وقتي. فهد: وأنا معاكي لحد ما تبقي أحسن من الأول. ولو حد سألك تحت عملنا إيه عند الدكتور امبارح، قولي إننا مروحناش ورحنا غيرنا دوا. تاج: بس ليه؟ فهد: عشان مش عايز أشوف نظرة شفقة من حد ليكي أو ليا، إحنا بنستقوى ببعض، حزننا لوحدنا، مينفعش نشارك حد فيه، فهمتيني يا تاج؟ تاج: حاضر.

خدها فهد وهو ماسك إيدها ونزلوا تحت، لقوا إن العيلة خلصت غدا وقاعدين بيشربوا الشاي ويهزروا مع بعض، وسليم وحسام وزين قاعدين بيتكلموا مع بعض. تاج: مساء الخير. صفاء: يا مساء الفل يا حبيبتي. سماح: عاملة إيه النهارده. تاج: بخير يا طنط. بعتذر إني مقدرتش أنزل على الفطار النهارده. سماح: ولا يهمك، المهم تكوني ارتحتي. ورد: أنا بقى قمت عملت كيك بالشوكولاتة عشان عارفة إنك بتحبيها. تاج بإبتسامة: متشكرة أوي يا ورد.

فهد قعد مع زين وحسام وسليم وانضم ليهم نصار ومصطفى، وتاج قعدت مع حماتها وأمها وبنات العيلة. دخل فهد ابن سليم وهو في إيده لعبة وهدومه مليانة تراب من الجنينة وبيجري على تاج. فهد بفرح: ماما! سيا: يا قلب ماما، إيه اللي عملته في نفسك ده! فهد ساب حضن سيا وجرى على تاج وهو بيحضنها. فهد: أنا زعلان منك أوي يا ماما. تاج: ليه يا فهد؟ فهد: عشان أنا هنا من بدري ومش نزلتِ حضنتيني زي كل مرة.

تاج بحب وهي بتشيله: يروحي، كنت نايمة، بس وعد مش هتتكرر تاني. سيا بضيق: تعالى معايا يا فهد عشان أغير لك هدومك دي. فهد: لا، ماما تاج هي اللي هتيجي معايا. سيا: لا، تاج تعبانة ومحتاجة ترتاح. تاج: عادي يا سيا، أنا كويسة، المهم عندنا راحة فهد باشا. سماح لاحظت انفعال سيا، فتدخلت بسرعة: مالك يا سيا، خلي تاج تاخده، وانتي اطلعي نيمي فيروز عشان نامت وهي بتلعب. سيا بصوت عالي وضيق: ...........