رواية طبيب ولكن الفصل الأول 1 - بقلم مصطفي محمد

يعني إيه مفيش دكتور في المستشفى؟ مراتي بتولد. الممرضة: حضرتك متقلقش، إحنا اتصلنا بالدكتور وهو خلاص على وصول. علي بزعيق: ده تسيب وأنا مش هسكت وهعرفكم شغلكوا. الممرضة: طب اهدى حضرتك، الدكتور وصل أهو. الدكتور يوسف: مساء الخير يا جماعة، إيه الأخبار؟ علي: حضرتك تقدر تقولي يا أستاذ، إزاي مستشفى كبيرة زي دي ميبقاش فيها ولا دكتور واحد؟ يوسف: مهو انت غلطان برضو، حد ييجي لحد في ساعة زي دي؟ انت عارف الساعة كام دلوقتي؟

الساعة اتنين بالليل. علي: آه صحيح، تصدق عندك حق. المفروض الواحد يتصل بيكم قبل ما يتعب بيومين، يستأذن منكم يتعب ويجيلكم ولا لأ. يوسف: بغض النظر عن الأڤورة اللي انت عاملها دي، إيه اللي تاعبك؟ علي: كمان جاي ومش عارف الحالة اللي جايلها. يوسف: ما انتوا سربعتوني. علي: معلش حقك علينا يا باشا. حضرتك أنا مراتي عايزة تولد. يوسف: طب ما تولد، إيه المشكلة؟ علي: والله هو أنا جاي آخد إذنك. حضرتك اتفضل ولد.

يوسف: أوضة العمليات جاهزة؟ الممرضة: أيوه يا دكتور. يوسف: طيب دخلو المدام هناك، خلي حد يعملي كوباية شاي بلبن ويجيبلي بقسماط أو أي حاجة معاها. الممرضة: حاضر يا دكتور. علي: انت جاي تفطر هنا يا عم انت؟ اخلص. يوسف: مهو بص بقى، أنا مبعرفش اشتغل على معدة فاضية. أفطر واظبط الدنيا علشان أسلمك شغل نضيف تتشرف بيه. علي: انت لا يمكن تكون دكتور، أنا بكلم صنايعي سباك إنما دكتور. يوسف: هه، الكارنيه ده مكتوب عليه إيه؟

علي: عادي، ممكن تكون مزورة. يوسف: عيب، انت بتكلم دكتور محترم. علي: والله شكلك ولا تفهم حاجة. الممرضة مقاطعة: أوضة العمليات جاهزة يا دكتور ونقلنا المدام هنا. يوسف: والشاى بلبن اللي طلبتهم؟ علي: ياعم روح ولد الولية وبعدين افطر واتنيل على عينك. يوسف: أمري لله، جهزي العدة يا بنتي. علي: العدة! أنا قولت من الأول لا يمكن تكون دكتور. يوسف: بقلك إيه اسكت بدل ما أسيبهالك جوا وأمشي، وأنا أصلاً هموت وأنام. علي: حق عليا، اتفضل.

داخل غرفة العمليات: يوسف بابتسامة: مساء الخير يا فندم، عاملة إيه النهارده؟ دعاء: انت تعرفني؟ اخلص ولدني. آآآآآآه. يوسف وهو يسد أذنيه: تقوليلي تكره إيه؟ يا واد يا يسوف، أقولك الصوت العالي في ودني شوية. الممرضة: ضغطها مظبوط ي دكتور، وكل حاجة تمام. يوسف: طب كويس، المفروض نعمل إيه بقى؟ دعاء: ي نهارك أسود، انت مش عارف تعمل إيه؟ آآآآآه. يوسف: وطّي صوتك لو سمحت، وبعدين أنا عارف هعمل إيه، أنا متوتر بس أصلك متعرفيش.

دعاء بصراخ: معرفش إيه؟ يوسف: أصل دي أول مرة أولد حد فيها. دعاء: ينهار أسود! وجاي تجرب فيا؟ الله يخرب بيتك، اندهلي الموكوس اللي بره. يوسف: أبوس إيدك مش عايز شوشرة. دعاء: اندهولي. آآآآآه. يوسف: حاضر حاضر. خرج يوسف من الغرفة: علي بلهفة: ها، طمني يا دكتور، جابت إيه؟ يوسف: مجابتش. علي: مجابتش ليه؟ يوسف: حالفة متولد غير لما تشوفك. شغل ستات بقى. علي: طب هو أنا ينفع أدخلها؟

يوسف: أمااال ي باشا، اتفضل بس هنلبسك شوية حاجات وبعدين تدخلها. داخل الغرفة: دعاء بصراخ: هو فين؟ هو فين؟ اللي جايبني مستشفى منيلة بستين نيلة ذي الأيام اللي قضيتها معاه. علي: أنا هنا ي حبيبتي. دعاء: حبيبتك جايبلي دكتور مبيعرفش يولد وتقولي حبيبتك. علي: إيه؟ انت مش قلت إنها مش راضية تولد؟ يوسف: أنا قولت كدا. علي: آه، قلت. دعاء: والله لو م ولدتني حالاً، هقوم أجيبك من رقبتك. اخلص.

علي: ياعم اخلص ولدها، دي ولية مجنونة وتعملها، أنا جوزها وعارف. يوسف: أيوه أيوه، أنا تقريباً كدا افتكرت المفروض أعمل إيه. علي: افتكرت؟ وتقريباً يا عم أنت هتشلني. اخلص. يوسف: طب اطلع برا بقى علشان أعرف أولدها قبل ما المعلومات تطير من دماغي. علي: لا وحياتك، إحنا صدقنا، أنا خارج. حبيبتي ربنا معاكي. دعاء: خارج فين وسايبني؟ يوسف: بس اهدى خالص وكله هيبقى زي الفل. استعنا على الشقا بالله. وبعد ساعة أو أكثر

خرج يوسف من غرفة العمليات: يوسف: مبروك ي أستاذ علي. علي: هاا، طمني يا دكتور. يوسف: المدام جابت ولد. علي: الحمد لله، أحمدك وأشكر فضلك يا ربي. يوسف: ومش كدا وبس، المدام بتضحي النهارده وجابتلك عليه بنت هدية. علي: ألف حمد وشكر ليك يا رب. يوسف: مش قولتلك هسلمك شغل فنادق. علي: أنا الحقيقة كنت شاكك فيك، بس دلوقتي الله ينور بصراحة. يوسف: علشان تشوف بس. علي: طب ومراتى حالتها إيه دلوقتي؟ يوسف: لا، عال خالص، اطمن. كله تمام.

علي: طب الحمد لله. يوسف: أسيبك أنا بقى وأروح أكمل فطار. علي: اتفضل. الممرضة: إلحق ي دكتور، انت ولدت المدام ونسيت تقفل الجرح. علي: إيييييه؟ يوسف: تصدق، خرجت قبل ما أقفل.