رواية طفلة للبيع الفصل الأول 1 - بقلم صباح غمري

كان ماسك ايدي و طلع يجري بيا، كان جسمي كله وجعني من الضرب. أخدني حتى من غير ما البس طرحتي. "أنا خلاص جبت آخري، كل خطوبة يجي العريس يرميكي ليا بعدها بيومين." قلت له بعياط: "أنا ذنبي إيه بس، من عند ربنا، نصيب أعمل إيه. ونبي يا بابا سبني، طب أنت موديني فين، طب أنت مش فاهم ليه، أنا لسه صغيرة لسه حتى مكملتش الـ 17 سنة."

وداني بكل جبروت لحاتم، حاتم يبقى زي ما بيقولوا بلطجي المنطقة، الماسك المنطقة. أكتر واحد كرهته في حياتي وخفت منه ومن شكله من وأنا عيلة صغيرة، وأنا كل ما بشوفه بترعش بجري. دايماً كل مرة كنت بشوفه فيها كان لازم يكون بيعمل مصيبة، بيضرب حد، بيكسر محل. وكالعادة المرادي كان برضو بيضرب حد. محمد: "أنا عاوزك في موضوع يا حاتم يا بني." حاتم بص له ببرود وبص لي بنظرة كنت هموت منها وأنا منهارة وببكي:

"خير وإيه المبهدل ده، البنت قدامي." محمد: "أنا عاوز أبيعها." بصت له بصدمة وبكيت، بكيت يمكن لسنين قدام. فيه أب يعمل كده؟ وليه؟ كنت عارفة طول عمري إننا مجرد سلعة لوالدي بس متوصلش للدرجة دي. وكان الأصعب لما بصيت لحاتم اللي كان وشه خالي من أي صدمة أو تعابير. حاتم: "بالحلال ولا عاوز تشغلها؟ محمد: "هسيبها لك وهاخد فلوسها وأعمل الانت عاوزه، بس نتفق على المبلغ الأول."

بص لي بحقارة كأنه بيشتري بضاعة. غمضت عيني مكنتش قادرة أتحمل كل اللي بيحصل. اتمنيت لما أفتحها أكون في حضن ماما بتلعب في شعري وتحكي لي حدوتة زي زمان وأنا نايمة في حضنها مطمنة، وأختي جاية تنادي عليا. لكن فوقت على صوته البشع وهو بيقول. حاتم: "تمن حلو الكلام." محمد: "قفلهم 150 على طول." حاتم: "ياااا جعفر، أنت يا زفت." جعفر: "نعم يا ريس." حاتم: "هات التمن من جوه." بص لبابا وقال: "ولا ميجبش." محمد: "لا خلاص خليه يجبهم."

حاتم بص لي: "وإنتي ياحلوة تعالي ادخلي المخزن هنا." مسكت في بابا واترجته بكل الطرق: "أرجوك، أرجوك، هشتغل هجبلك فلوس، هعمل أي حاجة بس عشان خاطري متسبنيش، هتسيب بنتك يابابا، إزاي تسبني. طب الفلوس دي هجبلك أضعافها وهتشوف بس ونبي ما تسبني." قعدت أبكي أبكي، وقعت على الأرض ومسكت في رجله: "عشان خاطري يابابا، عشان خاطري متكسرنيش."

كان آخر كلمة قلتها "متكسرنيش يابابا"، ومن بعدها بابا كان أخد الفلوس واختفى. كان كل ما بيبعد وبيختفي عن نظري، قلبي كان بيوجعني أكتر. بصيت ورايا، بصيت له، بابتسامته الوحشة وجبروته، وبصيت معاه لمستقبلي وحياتي الجاية. هو: "اسمك شمس مش كده." شمس: "...