رواية طفلي الصغير الفصل العشرون 20 - بقلم هدير عبد العليم

زين: بس أنا بحبها، وهتجوزها. يمنى بعصبية: مينفعش تتجوزها. زين بعصبية: هو أنا مش باخد رأيك، أنا اللي هتجوز، بلاش بقى جوا إنك خايفة عليا والكلام ده. يمنى بزعل: جوا إني خايفة عليكم؟! أنا فعلاً بخاف عليكم. زين: ...

يمنى: مستحيل تكون أنت زين اللي ربيته، عشان بقولك لأ على جواز من واحدة مش زيك، عارف السما والأرض، أنت السما وهي الأرض، مش بقلل منها كلنا حلوين لأن ربنا الخالق، بس يابني الإنسان بيتعرف من أسلوبه، من أول كلمة، أول نظرة الناس بتعرف إذا كان الشخص ده محترم ولا لأ وعلى أساسه بتلاقي التقدير والاحترام أو لأ، ريم شخصيتها مش زيك، أنا معرفش عنها أي معلومات ومش عارفة هي بنت مين بس طريقة كلامها بتدل إنها مش شبهنا.

زين: لو قولتلك إنها بنت رائد أعمال كبير و.. يمنى بهدوء: مش مهم في الجواز هي بنت غني ولا فقير، المهم أهلها عرفوا يربوا ولا لأ؟ محترمين وعندهم أصل ولا مع أول مشكلة هنكون عند القاضي بيحكم الطلاق هيكون فين؟ زين بعصبية: ينفع تخليكي في حالك، أنا مش عايز رأي حد. يمنى بصدمة: رأي حد؟! أنت فعلاً تبقى مجنون لو اتجوزتها. زين: أنا محتاج أكون لوحدي، ممكن تتفضلي.

يمنى خرجت والدموع في قلبي قبل عيني، إزاي ده زين ابني اللي ربيته، إزاي يكلمني كده. يارا بعصبية: على فكرة أنت قليل الذوق، إزاي تكلم ماما بالطريقة دي، على فكرة أنت دخلت الجامعة دي بفضل ماما وبابا، إياك أشوفك بتتكلم بالأسلوب ده مع ماما. زين ببرود: ملكيش دعوة. يارا برفع حاجب: أقسم بالله يا زين لو اتكلمت كده تاني لـ أقول لبابا، مش معنى إنك تعبان تتعامل بالطريقة دي مع أكتر ناس بتحبك. مريم بتخبط على الباب: ممكن أدخل.

يارا: تعالي. مريم بقلق: زين أنت كويس؟ زين: في إيه؟ مريم: قلقت لما شفت ماما بتعيط أوي بره. يارا بتبص لـ زين بغيظ: لـ البيه كويس، هنزل أشوف ماما. زين: هي زعلت؟ يارا بعصبية: يا راجل تفتكر؟ أصل الكلام ميزعلش خالص. مريم بدون فهم: أنا مش فاهمة في إيه؟ يارا: معلش يا مريم دي حاجة بين زين وماما. مريم: معلش أنا آسفة افتكرت حاجة ممكن أساعد فيها، أنا طالعة. يارا: وأنا رايحة لـ ماما.

يارا: ماما خلاص حقك عليا، زين تعبان ولسه مفعول البنج وكده.

يمنى بصوت فيه حزن: أنا مش زعلانة من زين، تعرفي محدش بيزعل من عياله، بنزعل عليهم إنهم يروحوا لـ طريق غلط مش طريقهم، بنزعل لما يقربوا من ناس هتضرهم أكتر ما تنفعهم، لكن ديما عيالنا جزء مننا مينفعش نزعل منهم أبداً، بدموع أنتوا آه مش عيالي بس أنا ربيتكم وكانكم عيالي. التربية أصعب بكتير من الحمل والولادة، التربية هي الخوف على كل واحد فيكم لما يتعب، التربية هي القلق على كل واحد اتأخر عن معاده، التربية هي فرحتنا بيكم يوم نجاحكم، التربية هي الحزن اللي بنحسه لما نشوفكم زعلانين، عرفتي لي أنا زعلانة علشان مش دا جزائي يا يارا.

زين بدموع: أنا آسف والله مكنتش أقصد. يمنى بخضة: أنت إزاي اتحركت من على السرير، الدكتور قال لسه أسبوع كمان وتبدأ تتحرك. زين: مقدرتش أحس إنك زعلانة مني. ليلى جايه من بره: زين أنت إزاي اتحركت. زين: غصب عني يا دكتورة. ليلى: يارا أنتِ إزاي شوفتيه بيتحرك من مكانه وسكتي. يارا: ملحقتش أنا اتفاجأت والله. ليلى: لازم تروح لـ الدكتور دلوقتي. يارا: الدكتور اللي هييجي، مش عايزينه يتحرك.

ليلى: تمام كلمي الدكتور عقبال ما أغير لبس وأنزل. *** أيمن: طمني يا دكتور. الدكتور بهدوء: حضرتك قلقان كده ليه، الحمد لله زين كويس، بس لازم يبدأ العلاج طبيعي من الأسبوع الجاي. ليلى: أنا موجودة، لو على الأجهزة ممكن يروح مركز دكتور طارق. الدكتور: لا هو محتاج راحة مش عايزين حركة أوي. ليلى: أنا معه أهو وهبدأ معه، ربنا يقومك بالسلامة يا بطل. زين: ربنا يخليكم ليا، شكراً جداً يا دكتورة.

ليلى: على إيه إحنا أخوات يا عبيط أهم حاجة تقوم بالسلامة. سلمى: ماما أنا نجحت وطلعت الأولى على الجامعة. يمنى بسعادة: يا روحي مبروك، ياسين عمل إيه؟ سلمى: ربنا يخليكي يا ماما، نتيجة ياسين لسه يا ماما. يمنى بابتسامة: ماشي يا متر. سلمى: يارب أكون معيدة. يمنى: أشطر دكتورة في حقوق يا عيون ماما. أيمن، ليلى، زين في صوت واحد: ألف مبروووووك. سلمى: الله يبارك فيكم. ^^ بعد فترة ^^ يارا: فيه راجل بيسأل عليكِ بره يا ليلى.

ليلى: مين؟ يارا: ...