رواية ظننته اخي الفصل الثاني 2 - بقلم مريم عراقي

عمر باستغراب: هو إيه اللي مش معقول؟ منة: لا أقصد يعني إنك كنت لما بتشوفها معايا أو تيجي الفيلا عندنا كنت بحسّك مضايق أو مش حابب وجودها. عمر وهو بيحك دقنه: آه، هي دي. حقيقة بس طلعت كنت غلطان. بس بالعكس، دي طلعت بنت ذكية وجميلة وتتحب. منة باستغراب: وإيه اللي غير فكرتك كده؟

عمر: فاكرة يوم عيد ميلادك لما الوقت اتأخر واضطريت أروحها. بصراحة كده، هي بدأت تكلم معايا في العربية والكلام جاب بعضه ولقيتني بأخد وبدي معاها، واكتشفت إنها شخصية جميلة خالص. منة بابتسامة رقيقة: على العموم، ألف مبروك. أنا أتمنى لك كل خير. عمر بحب: الله يبارك فيك يا حبيبتي، ربنا يخليك ليا. وباس راسها. منة: طيب يلا ادخل خد شاور عقبال ما أحضر لك العشا.

عمر بتعب: لا يا حبيبتي، أنا مش جعان، أنا هموت وأنام عشان عندي مأمورية الصبح بدري. منة: ربنا يقويك يا حبيبي. خلاص ادخل ارتاح، وهتلاقي بيجامتك مغسولة ومطبقة على السرير. عمر: ماشي يا قمري، ربنا يخليك ليا. تصبحي على خير. منة بابتسامة: ويخليك ليا وانت من أهله. دخلت منة أوضتها، وأول ما قفلت الباب وقفت وراه وبدأت تفكر في كلام عمر. وفجأة دمعتها نزلت. منة مسحت دمعتها باستغراب وقالت في نفسها: هو في إيه؟

أنا مالي مضايقة ليه وبعيط ليه أساسًا؟ معقولة أكون مش مبسوطة لعمر؟ أكيد لا، ده باتمناله الخير. بس.. بس أنا حاسة إحساس غريب أوي، عمري ما حسيته قبل كده. يمكن عشان خايفة إنه يسيبني. وحطت إيديها على قلبها واتنهدت تنهيدة طويلة: يارب ريح قلبي ويكرمك يا عمر يا رب. عدى اليوم على أبطالنا من غير أحداث جديدة. عند عمر: صباح القمر. سلمي: صباح النور يا حبيبي، عامل إيه؟ عمر: تمام، وأنتِ عاملة إيه؟ سلمي: بخير يا روحي، الحمد لله.

وكملت بزعل مصطنع: على فكرة أنا زعلانة منك. عمر باستغراب: ليه بس يا روحي؟ سلمي بدلع: عشان أنت وحشتني، وبقالي يومين بحالهم ما شفتكش. عمر: غصب عني والله يا سلمي. اليومين اللي فاتوا كان عدي مأموريات كتيرة وكنت مضغوط، حقك عليا. سلمي: خلاص يا روحي، شوف هتعمل إيه عشان تصالحني. عمر بابتسامة: حضري نفسك النهاردة عشان هاجي أنا ومنة واتقدم لك. سلمي بعدم تصديق: بجد يا عمر؟ أنا مش مصدقة.

عمر: بجد يا قلب عمر. يلا روحي اجهزي، وهاجي لك أنا ومنة عشان نحدد معاد الخطوبة. سلمي: حاضر يا روحي، بحبك. عمر: وأنا كمان. مع السلامة. سلمي: سلام. عمر اتنهد بابتسامة وراح عشان يفتح الباب، لقي منة في وشه واقفة بتبص له والدموع في عينيها. عمر بخوف: مالك يا قلبي؟ في إيه؟ منة.