رواية ذنوب على قيد الغفران الفصل الأربعون 40 - بقلم براء

بعد مرور أسبوع.

غنى: مر أسبوع كامل على زواجي من فهد. مر بسرعة وما حسيت عليه. روتين بروتين. فهد أول ثلاث أيام ملازمني وكاعد وساكت، وباقي الأيام قام يطلع للمعامل والعماره لأن هسه ماخذ إجازة وما عنده دوام. المفروض اليوم يسوون سبعة، بس أنا كنسلتها. ما أريد سبعة، سويت حنة وعرس شگبره. ماكو داعي أكلف فهد، وأني شفت العرس شگد كلف. هاي من غير إني ما عندي أحد يحضر بالسبعة ومالي خلك الحجي، وهم ما ضغطوا عليّ، عافوني براحتي. واليوم بدال السبعة بيت جدتي عازمينه يمهم على عشاء.

فزيت على صوت الباب. كمت. غنى: منو؟ ساره: أني. غنى: فتحت الباب شفت ساره. ساره: سلام. غنى: ابتسمت بهدوء. وعليكم. تفضلي. ساره: دخلت ضايجة. اجيت يمج. غنى: أهلاً وسهلاً. تفضلي. تعالي خلي نكعد هنا. ساره: كعدت. أفييش الغرفة باردة ثلج. أكول ليش متنزلين؟ أثاريج مسنحة على البرودة. غنى: لا مو هيج. بس فهد طالع واستحي أنزل وحدي.

ساره: يمعودة بيت رجلج هذا. أخذي راحتج بي. خوما بتول الوصخة وسعاد المراهقة ياخذن راحتهن ويفترن بكيفهن، وأنتي حابسة روحج. غنى: عيب. ميصير تحجين هيج. ساره: العيب بالجيب يمعودة. وعلى طاري الجيب، غرفتج ببيش أخذتيها؟ غنى: والله علمي علمج. ساره: بس والله حلوة. گمت فتريت بالغرفة. هاي العطور كلهن الج؟ غنى: ابتسمت. لا لفهد. ساره: لعد شبي حظي. فيصل حتى العطر أني أجيبه إله. وأنتي رجلج ينكرط كرط من گاعه. لو هي حظوظ.

غنى: خليت إيدي على حلكي. گوه لازمة روحي حتى ما أضحكت. طبعاً هي تحجي ويه روحها وما منتبهة. ساره: الله. هذا المكياج كله الج. والله عبالك صالون على ميز التواليت. غنى: گمت. إذا تحبين أخذي الي يعجبج. ساره: صدگ والله؟ يعني عادي آخذ منج؟ غنى: طبعاً عادي. الي يعجبج أخذي الج وحلالج. ساره: ياا. أنتي شگد حبابة. شوفي راح آخذ هاي الحمرة وعلبة الظلال هاي هم. غنى: أوكي. تردين شي بعد؟

ساره: لا شكراً. بس ذني. وهسه تعاي وياي خلي ننزل. شعدج حابسة روحج هنا. كلهن كاعدات جوه. غنى: هسه صدگ. عليمّن حابسة روحي؟ أني صار أسبوع كاعدة هنا. خلي أنزل ما دام الولد بالدوام. هسه بس خلي أبّدل. رحت طلعت دشداشة سودة وزرگه وأخذت شال أسود. جيت أروح للحمام أبّدل. ساره: وين رايحة؟ غنى: أبّدل. ساره: يمعودة عليمّن هالمستحة. بدلي هنا.

غنى: لا. شلون ميجوز أبّدل گدامج. من رخصتج ثواني. دخلت بدلت ملابسي وطلعت. أنزل بالدشداشة. شلت شعري گبّابه ولبست شالي. ساره: والله عمي هنيالك فهد من ينام وياج على هالجسم. غنى: صفنت. هاي شتحجي بله؟ مو عيب بنية وتحجي هيج. بخجل. أگلج خلي ننزل أحسن. أنتي شكلج ما عندج كنترول. ساره: أي يله. غنى: نزلنه جوه. لكيناهن بالمطبخ. شي كاعدات يطبخن وشي كاعدات يحجن. السلام عليكم. الكل: وعليكم السلام.

سعاد: وأخيراً شفنه وجهج. صارلج أسبوع نايمة بغرفتج. گولي أنزل أشوف شعدهن ما عندهن. أتعرف على أهل رجلي. شنو تستنكفين تنزلين؟ غنى: ضليت لا أخذ ولا أطي. أكلتي أكل. حتى ما أعرف شجاوبها. إيمان: أم فيصل. ما عليج بجنتي. شتريد تسوي خلي تسوي. عروس ومن حقها. خليها براحتها. أريدها سالمة. ليلى: أكول خاله. شو مرت فهد ضاربتها على الصامت. خاف متسمع. آلاء: لا ولج. هاي تطبق مثل "طنش تعش تنتعش".

إيمان: لا غلطانة. هي هادئة. وهذا واحد من الأسباب الخلتني أخطبها لفهد. لأن هادئة وعاقلة ومؤدبة. غنى: باوعت لخاله إيمان. فاجئني كلامها. والله ضليت صافنة. يربي شهالعائلة. متعرف منو وياك منو عليك بهالبيت. حاولت أفتح موضوع. خاله وين أروى؟ إيمان: بالكلية. راحت تشتغل على التقرير. مدري رسالة الماجستير. والله ما أعرف.

غنى: تذكرت. عقب باجر تخلص إجازتي ولازم أداوم. زملائي بدوا يحضرون للتخرج وغيرها. وأني بعدني. شيخلص هالسنة وأرتاح. لعد وورده وينها؟ أنغام: هسه فد ساعة وتجي من الدوام. غنى: ليش المدارس بعد خمس تيام يداومون. شعجب من هسه مداومة؟ أنغام: مو هي مدرسة أهلية. وغير هي بكلوريا. فتبدي تداوم من وكت حتى يصيرلها وقت تراجع. هو ما بقى شي ويخلصون وترتاح خطية. شلع گلبها الثالث. ليلى: شنو السالفة؟ هو ثالث؟

أصلاً صوچ فهد. مدري شبي راح خلاها بمدارس أهلية. شبي الحكومي؟ أشو حتى هو طلع من حكومي. بس ما أدري عليمّن هالتفيك. أكول مرت فهد مو ترحين تكليلّه وتسويلج مشكلة. غنى: أسمي غنى. وعلى فكرة هو ميتفيك. بس يريد ورده تدرس دراسة زينة بكادر زين. لهالسبب خلاها بمدرسة أهلية. مو يتفيك مثل ما أنتي تكولين. آلاء: أكول غنى. بما أنو انتهى العرس على خير. خلي نقسم الشغل بيناتنه. خوما أضل بس أني أشتغل وأطبخ. وأكو غيري تلاثة.

غنى: ما عندي مانع. قسمي الشغل مثل ما أنتي تحبين. وأني وياج. آلاء: لعد شوفي. كل يوم على وحدة الطبخ. والتلاثة الباقيات عليهن غسل المواعين. يعني مثلاً أني راح أطبخ اليوم. وأنغام غسلت مواعين الريوك. وأنتي مواعين عليج الغدة. وساره عليها العشة وهكذا. إضافة الحديقة كلها عليج. والبيت عليّ وعلى أنغام. والكراج على ساره. غنى: ماشي. ساره: شنو ماشي؟ أني حامل وما أكدر أشتغل. يعني فوگ تعب الحمل تطلعلي بالتنظيف؟

لا عيني ما أشيل عودة من الكاع. بيه حيل أني. آلاء: شنو خدم عندج؟ خوما خدم أحنه. غصباً ما عليج تشتغلين وتأكلين تبن هم. أم الزلم. غنى: عزة. راح يتكافشن. خلص أني آخذ شغلج. بس لتتعاركن. آلاء: وإذا أنتي هيج حنينة. خلي كل المواعين عليج. والطبخ يتسلسل علينه. غنى: ها؟! أنغام: بله مو عيب عليجن. على مواعين تتعاركن. لا وجماله ذبّين كل الشغل على البنية. جان استحيتن على رواحجن شويه.

إيمان: صحت. كاااافيييي. شبيجن انفتكتن. الكل يشتغل بهالبيت. ما عندي وحدة تنام. الكل سواسية بالبيت. سواء جناين لو لا. أروى وبتول هم يشتغلن. حالهن من حالجن. وما شاء الله احنه خطارنه هواي. فغصباً على الكل يحط إيده ويشتغل. وأي نقاش ما أريد. كافي تره مو مراهقات. وواحد يرزلجن. أشو آلاء راح تطبين بالثلاثين. مو زعطوطة أنتي. عيب. ثگلن شويه. وأنتي... غنى. غنى: نعم خاله. إيمان: الكلام موجه الج وياهن. ما أريد مشاكل.

غنى: هزيت راسي. رحت أساعدهن. وهاي ليلى مدري شبيها تخوف. ليلى: أكلج خفي إيدج. جلفي أسرع. شگد فاهية. غنى: أي. گملت المواعين الوصخة. مدري شلون يشتغلن. وأكو جبل مواعين يمهن. غسلت إيديه وطلعت كعدت بالصالة. سعاد: ها؟ شو كعدتي؟ غنى: لعد وين أروح؟ أشرت لابن منذر يجي يمي. بوسته. أنت سالم مو؟ سالم: أي. غنى: گصت خدوده. تدري گولش گولش حلو. سالم: ثگرا. أنتي هم حلوه.

غنى: ههه. فدوه. شلون يحجي. ضليت أسولف وياه. وبعدها گمت أساعد البنات. سمعت صوت البنات أجن للمطبخ. أروى: سلام يا قوم. هله مرت أخويه نازلة اليوم. غنى: ابتسمت. بوستها. شلونج؟ شو تأخرتي؟ أروى: ولج هلكت من التعب. لو أدري هيج السالفة ما أفكر أدرس ماجستير. تعبت. خلي أرتاح وأسولفلج. غنى: يله هانت. ما بقى شي وتقدمين الرسالة وتخلصين. أروى: أي والله. شيخلصني. ورده: ها نونه شلونج؟ غنى: هلو حبيبتي. شلونج؟

ورده: الحمد لله. بشرن شمسويات غده؟ ليلى: مرقة بانيه. أنتي متحبيها مو؟ ورده: لااا. ما أحبها. ليلى: أدري بيج متحبيها. سويت الج معكرونة. ورده: أول تالي تسويها منج. من الشيطان. أروى: گصتها. تأدبي. يله تعاي خلي نبّدل. الولد أجو ويريدون يتغدون. غنى: أخذت السفره وطلعت. لكيت الولد كاعدين وفهد وياهم. السلام عليكم. الولد: وعليكم السلام.

غنى: رحت جبت المواعين ويه البنات. وكعدنه كلنه نتغده سوه. ما شاء الله همه عائلة جبيرة. ميكفيهم الميز. فـ يكعدون بالكاع. فيصل: ها مرت فهد نازلة. شلونج؟ ماشفتج. غنى: الحمد لله أخويه. فهد: انطيتها خاشوگة. هاج أكلي. لتضلين صافنة. غنى: شكراً. علي: شلونه الزواج؟ فهد حلو لو لا؟ فهد: يعتمد على اختيارك. إذا تختار اختيار مخربط يصير مو حلو. بس لو تختار عدل يصير توب. فيصل: وأنت زواجك حلو لو لا؟

فهد: تعذرني. أحب أحتفظ بالجواب لنفسي. دنيت الماعون يمها. جاي أكول أكلي. باعيلهن راح يطكن من الأكل. وأنتي تنقشين. غنى: داأكل والله. سعاد: أكلك شنو؟ مرتك خرسه؟ شو لاتحجي لا تكول. دومها ساكتة. فهد: أحسن. أخاف على صوتها. ليروح من الحجي. ساره: أوي فدوه. شلون يحجي عليها. تدري فهد حقك تخاف عليها. والله أني من شفت ترافة جسمها ونعومته. گلت حقك هيج تحبها وتخاف عليها.

غنى: عززه. فضحتني فضيحة. هاي شبيها مخبلة. أباوع لفهد. غص بالاكل. صبيتله مي بسرعة. فهد: دفعته بصعوبة. مو كلاصي هذا. غنى: گمت للمطبخ. جبتله گاسة مي وجيت ركض. انطيته. أباوع لوجهه كله انكلب. خطية والله غص غصة. أباوعله شرب مي وعيونه تخزر بساره. فهد: تنهد. شلون ويه بت هالكلب ساره ولسانها فالت. ساره: شبيك فهد؟ فهد: بيه جني. گمت أباوع لغنى. گامت وياي. گعدي كملي غداج. غنى: شبعت.

فهد: أكبر جذابة. أدري بيها تستحي تاكل واني ما موجود. رحت غسلت. وهي وراي. نشفت إيدي ورفعت ردن الدشداشة لتتبلل. غسلي وصعدي وراي. لتبقين جوه. غنى: أي. غسلت وطلعت. صاحت بيه أم فيصل. سعاد: وين؟ امشي روحي سوي جاي. غنى: مسوية قبل بوقت. بس صبّوا. بتول: نزلت. والمواعين منو يغسلهن؟ أروى: ما عليج. أنتي مو ستوج گعدتي وتتأمرين. روحي نونه. أني أغسلهن.

غنى: لا. ما عندي شي. أني أغسلهن. گعدت انتظرتهم يكملون. خطية أنغام وأروى گمن وياي. وآلاء بس شافتنه دخلنه للمطبخ صعدت فوك. هي وساره. الكل راح لغرفته. واحنه كملنه المواعين. غسلت وصبيت لفهد جاي وطلعت. دامشي وأحس راسي انسحل. رفعت الجاي بسرعة ليروح يتبده عليه. درت وجهي بسرعة. شفت بتول. هاي ليش هيج؟ بتول: سوري. أظفري علگ بشالج وانجر بإيدي بدون ما أنتبه.

غنى: باوعتلها بنظرات عدم تصديق. يربي شنو هالقابلية هاي. عفتها ورحت. أهدي غنى أهدي. لتخلين عقلج ويه عقلها. وصلت للغرفة. لكيت فهد نايم على الجرباية. فهد: بهدوء. ليش تأخرتي؟ مو گلتلج صعدي وراي. غنى: جنت أغسل مواعين. وكلت أصبلك جاي وأصعد. فهد: أخذته. روحي حضريلي ملابس. خلي أسبح وأطلع أنام. غنى: ماشي. رحت طلعتله ملابس من الكنتور. سمعت صوته يصيح. فهد: غنننننى. غنى: ها. فهد: تعاي بسرعة. غنى: ها. گمت ورا.

فهد: ليش معلگة ملابسج وخاوليّاتج بتعلاگتي؟ مو حاطلج تعلاگه هناك. غنى: منتبهت. وبعدين وإذا علگت ملابسي هنا. فهد: خاوليّي؟ ميصير. يصير ويه خاوليّي. جسمي يختلف عن جسمج. خوما ننشف بنفس الخاولي. غنى: شبيك؟ انهديت. داأگلگ منتبهت. قابل متعمّدة؟ شلت ملابسي. شجاك كلبت الدنيا؟ تگدر تحجي بهدوء.

فهد: كلشي ولا هالسالفة. لتصيرين مدعثرة. كلشي خلي بمكانه المحدد. تره تلعب روحي من الهوسة وعدم الترتيب. ذيج الزاوية خالچ بيها دولاب وتعلاگه. خلي بيها أغراضج. ولتخربطين نظام الحمام بعد. غنى: ماشي. حاضر. بس اهدأ. أخذتهن. خليتهن بالسلة الي هناك. وعلكت الخاولي. فهد: تعاي. غنى: نعم. فهد: شلت ملابسها الداخلية. نسيتي ذني. غنى: احتقن وجهها. ها؟ جي جيبهن. اجيت آخذهن.

فهد: لحظة لحظة. باوعتلها. گطفت عليها الحمالة. تعاي كليلي هذا شلون يطب بيج؟ مو أشوفه صغير. غنى: جيب فهد. عيب عليك. فهد: اوگفي. هاي مرة شفت بمحل أطفال هيج أحجام. معقولة يعني هذا مالتج. غنى: جريته بخجل. مو عيب تلعب بشي مو إلك. لو متگدر إيدك مو إلك. فهد: شگاعد ألعب؟ سؤال وسألتج. لأن تفاجئت. يعني جسمچ غريب. حمالة صدرچ جبيرة وحجمها لا بأس. بس ذاك كلش صغير. يعني مو مال بنات يلبسن.

غنى: خزرته. وأحس روحي راح أوگع من صلافته. گافي يله. لتلزگ. خليتهن بالسلة وفوكهن الدشداشة وطلعت. والله ميستحي. لا ويسأل وعادي عنده. فهد: هاي شبيها؟ هسه أني شگلتلها. والله يا الله. غنى: رحت طلعتله ملابس. وكعدت أقلب بموبايلي. شوية وطلع. لاف الخاولي على جسمه. فهد: وين الملابس؟ غنى: أشرتله على الجرباية. فهد: أخذت الملابس. رحت بدلت واجيت تمددت. غنى: رفعت الغطه. غطيته. هستوك طالع من الحمام. لتتمرض.

فهد: درت جسمي عليها. لعبي بشعري. غنى: تنهدت. مخلية إيدي بشعره. فهد: مغمض عيونه. خو محد ضوجتج منهن اليوم. غنى: لا أبداً. كلهن حبابات. فهد: جذبتي. غنى: شگلت؟ فهد: هيج. أگلج تره بالليل نروح لبيت جدي. وولد عمامي هناك. ما أريدج تحتكين بأحد. وحتى البنات لثگلي وياهن. غنى: صار. فهد: ومرتضى مالج علاقة بي. غنى: صار. فهد: رفعت راسي. شنو صار! تستهزئين انتي. غنى: لا والله. خلص كلام مفهوم. ما أختلط بأحد.

فهد: هزيت راسي. عفيه هيج أريدج. غنى: ضليت ألعب بشعره لحد ما غفى. سحبت إيدي خليتها جوه خدي. أباوعله. يربي شگد حلو نومته. گعدته. كلامه. گولي بي يجنن. بس لو يبطل سوالفه. ضليت گاعدة أباعله. مدري شحبيت بيك. وأنت مزنجر وناسيك بالفرن. وفوگ هذا لسانك باذر ومنحرف. تغطيت زين. وغمضت عيوني. وما حسيت بشي بعد.

فهد: گعدت العصر. خرب. هاي شگد نمت. باوعت. هاي نامت هم. أباوعلها مبينة تعبانه. ما هانلي أكعدها. بس لازم نروح هسه. خوما نطب بالليل. فشلة. تلمست خدودها. صايرات ثلج. من هوه السبلت. وخرت شعرها عن وجهي. غنى. گعدي يله. غنى: حسيت بملمس دافي يمر على خدودي. سنحت بالزايد. فهد: أباوعلها. تبتسم وهي نايمة. ابتسمت على ابتسامتها. من أشبهها بالجهال. تكول لا. همست. غنى. غنى. گعدي يمعوده. صارت الدنيا عصر.

غنى: فتحت عيوني. شفت فهد مزروع بوجهي. فزيت. شجنت تسوي؟ فهد: أغتصبج. غنى: گول والله. فهد: هههههه. خرب يومج. صدگ ضحكتيني. يعني بشرفج اكو واحد يغتصب وحدة وهي بالملابس؟ أدري اغتصاب ضوئي خوما ضوئي. غنى: گعدت بهدوء. تره أنت تدوخ. ساعة گالب وجهك ومتتحاجي. وساعة تضحك وتسولف. وساعة ثانية تكره الواحد بتصرفاتك. أنت شنو فهد؟ تره تعبت وأني أحلل بيك. ولحد الآن ما وصلت لنتيجة. وين فهد الصدگي؟

فهد: خليت شعرها وره أذنها. هو فهد واحد. كل ما بالموضوع. أني خال وقت لكلشي. إذا اكو شي يستوجب الضحك. أضحك. ماكو شي يستوجب الضحك. أحافظ على ملامح وجهي بدون ما أصير مهرج. وأخلي العالم تضحك عليه. وبالتالي محد يحترمني. وللمعلومة. لازم الواحد يصير رزن بتصرفاته. سواء مرة أو رجال. حتى بوقت الشقة والضحك هم لازم تحضر الرزانه. گصت خدها. فهمتيني هسه. غنى: هزيت راسي. فهد: يله كومي بدلي. علما أنزل أستعجلهم حتى نطلع.

غنى: أي كايمة. راح هو. وأني گمت طلعت ثوب مال طلعة. لونه وردي ويا شال كريمي وبي ورد وردي. خليته على جهة. رحت غسلت وجهي حتى أصحصح. بدلت وگفت أرتب وجهي. أباوع. دخل فهد. فهد: طلعت ملابسي. حسبي حسابج. مكياج ماكو. غنى: باوعتله. ليش؟ فهد: لبست التشيرت. ما أقبل واحد يباوع لمرتي. غنى: ماشي. ما أخلي. فهد: گفيت وراها. عود ليش كلشي أكوله توافقين عليه بدون ما تناقشين.

غنى: ذبيت العطر ودرت وجهي عليه. لأن ببساطة الله أمرني بعدم عصيانك. بس ها. بالامور المعقولة. يعني أنت متريد أخلي مكياج لسبب معقول. وأني ما عندي مانع. لأن المن أريد أخلي مكياج. عود شوية حتى يروح من شحوب وجهي. بس خلص مدام متقبل. مو باللزوم ماكو شي يستوجب أناقشك بي ونتعارك. فهد: باوعتلها. هاي كل الي يتزوجن هيج يسون ويه زواجهن. غنى: رفعت كتفي بمعنى ما أعرف.

فهد: كلامها صفني. يعني حتى لو أريد أحجي ما أكدر. مديت إيدي أخذت عطوري. غنى: أباوعله. گام يخلي من عطوره. أو يسبح عفواً. وأني أگول ليش طول اليوم العطر ميروح منه. فهد: تدرين أني ليوم العرس. أول مرة أشوفج لابسة ألوان. من شفتج لحد قبل عشر تيام. أنتي لابسة أسود. وهسه لابسة وردي. لحد الآن ما متعود عليج بهالالوان.

غنى: لفيت شالي. تريد الصدوگ. أني مردت ألبس ألوان. بس خالتي جبرتني وحلفتني أنزعه. وهسه هم لبست ألوان. لأن ما أريد أهلك يحجون على أبو. ليش عروس ولابسة أسود. من الحجي. أني بالعقد وكلت التوبة. فهد: ليش منو حاچاج؟ گليلي. أنعل والديه. خوش. هي هاي العايزة. أنوب يتدخلون. فلان لابس وعلان نازع. غنى: حسيت على زلة لساني. لا لا محد حجه. بس أني داأگلگ خاف واحد يحجي. يعني.

فهد: سديت الجرارة. عود اليحجي گليلي. حتى أوكله تبن. يله تعاي. غنى: نزلنه جوه. لكيناهم متحضرين. سعاد: أكول تعاي تعاي. غنى: تقدمت منها. سعاد: لزمت إيدها. ولج هالأسوار أني شايفته بأيد الحجية ياسمين. شجابه لايدج؟ غنى: هي لبسته الي بزواجنه. سعاد: باوعت لإيمان. عود شنو معناها هالتصرف؟ أسوارها العزيز تشيله تنطيه لجنتها؟ لعد وجنايني أني شتقصد بتصرفها هذا؟ فهد: جريت إيد غنى منها. على كيفج. أذيتيها. مو هيج مرتي متتحمل تره.

سعاد: أني وين أحجي وأنت وين رحت؟ فهد: شنو ترديني أروح أتعارك ويه الحجية. لأن ما انطت الأسوار الج؟ والله حلوة هاي. أني شعليه. روحي أنت گوليلا ليش انطيتي الأسوار لمرت فهد. يله امشونه. عيب نطب ووگت العشة. منذر: يله يمه يله. يمعودات وينجن؟ غنى: طلعنه مشي أني وفهد. لأن البيت قريب. فهد: لو جاين بالسيارة أحسن. ما نمشي والعالم كلها تباوعلنه. غنى: ليش؟

فهد: ما أدري. ما مرتاح لملابسج. أنوب من نطلع لبسي الي يعجبج. وفوگه الصايه حتى أرتاح. اللون هذا بارز ملامحج وجسمج. أكول تعاي تعاي. غنى: باستغراب. وين؟ فهد: خلي نرجع. لبسي صايه فوگ هدومج. شنو تمشين بالشارع هيج. غنى: يااا فهد. صدگ تحجي؟ مو أهلك سبقونه. فهد: ميخالف. عوفيهم. فتحت الباب. يله روحي. لبسي صايه عريضة وتعاي. وعود ذبيها هناك. غنى: شنو هاي فهد؟ رجعتنه على هيج سالفة. فهد: لتناقشين. يله.

غنى: تنهدت. صاعدة فوگ. فتحت باب الغرفة. أخذت الصايه. لبستها فوگ الثوب ونزلت. زين هيج؟ فهد: أي. هسه شكلج ينطلع بي. يله امشينه. قفلت الباب وطلعنه. وصلنه لبيت جدي. دگيت. فتحت الباب ودخلت. غنى وفهد: السلام عليكم. الكل: وعليكم السلام. فهد: بست راس الحجية. شلونج حجية؟ ياسمين: هله بعد گلبي. شو عيني الباردة عليكم. الرحمن يحرسكم. تخبلون. غنى: سلمنه على الكل وكعدنه. بتول: مو جنتي لابسة وردي. شبدلت ملابسج؟

غنى: باوعت لفهد وسكتت. مروه: أباوعله. طب هو وياها. إيده بإيدها. ماتركها لحظة. أجه سلم على الكل. وهي وراه. راح گعد وكعدها بصفه. كل هذا واني عيوني تتنقل بينهم. حارث: هاي گدام الكاعدين. يعني يصير فهد يخطب ورايه ويعرس قبلي. وأني صار سنتين منتظر. ميصير هيج عمي. مهدي: بويه غير أنتو تماطلون بالسالفة. وكل يوم مأجلين. حارث: هو أني لو بتك ياعمي.

ياسمين: والله أنت فاهي عمي. حددوا موعد وعرسوا. گافي بعد سنتين. گافي وزيادة. ولج شهد إذا منا لشهر شهرين ما كملتي جهازج. والله أروح أخطبله غيرج. وأنتي تتحملين المسؤلية. شهد: ههه. نعم الله عليج حجية. فهد: همست لغنى. شنو رأيج نكل للحجية تدورلي على مرة على الواهس. غنى: رفعت حاجبي. وأني شعليه؟ خلي تدورلك. فهد: أكول حجية. دوريلي على مرة. جنسرين: هاي! بعدك ما صارلك عشر تيام تريد تعرس؟ شنو متريدها؟

فهد: أي عمه. ما أريدها. بيضة وتتوصخ بسرعة. بدلوها. مرتضى: إذا متريدها رجعها. اكو غيرك يتمناها. أمنية. غنى: كلنه باوعنه على مصدر الصوت. أباوع مرتضى. هذا. درت وجهي على فهد. أباوعله ضم إيده بقوة. حسيتها حتنكسر. لزمتها بسرعة. أريده يفتحها. ماكو. فهد: راص على أسنانه. انعل والديه الي يفكر مجرد تفكير يتقربلها. كائن من يكون. مرتضى: گعدت. ليش؟ منو كال يريد يبدلها؟ أني لو أنت؟

فهد: للأسف. الأغبياء والي عقول مشيولة ومحطوطة برجلييهم. ميكدرون يميزون بين الجد والشقة. يا ابن عمتي. مرتضى: ها. نسيت. أنو أنت أهل تشاقه. أي. شلونج نونه؟ شخبارج؟ ما جاي أشوفج بالكلية. غنى: مسحت على إيد فهد. ما أريده يصير عصبي. لام أدري بي إذا عصب خلصت. بعد ومرتضى ينكتل. همستله. اهدأ فهد. لتتعصب. جاوبته. أي. أخذت إجازة أني وفهد على مود زواجنه. مروه: فهد صدگ شوكت تلتحق؟ فهد: بهدوء. بعد جم يوم.

مروه: سمعنه بيك راح تترقى. صدگ هالحجي؟ فهد: أي ترقيت. بس لسه ما باشرت. علا: فهد راح تخلي غنى توظف إذا تخرجت؟ فهد: طبعاً لا. هي مو بحاجة لوظيفة. مرتضى: بس هيج أنت ماراح تخليلها مساحة وحرية حتى تعيش مثل ما هي تريد. فهد: وأني ما أحب مرتي تداوم بنص الزلم. وهاي الساعات الي تكضيها بالدوام. خليها تكضيهن وياي وكدام عيني أحسن. مروه: بس أنت هسه دتلتحق. شلون راح تشوفها؟

فهد: خوما راح أبقى طول العمر بالموصل. لابد بعد فترة نرجع لشغلنه مثل قبل. وبعدين موضوع تعيين مرتي هذا شي نتناقش بي أني وياها من يجي وكته. مو هسه. ياسمين: الله يساعد كلبج يا مسكينة يا غنى. غنى: ابتسمت. والله جبتيها بالصميم. صدگ الله يساعد گلبي على هالغثيث. سامر: حجية خلي نتعشى بالحديقة على الهوة. خنكة جوه. ياسمين: أي يله امشونه. بس اخذوا المدات. فرشوهن على الثيلة حتى نكعد.

غنى: راح فهد ويه الولد ومرتضى بقة كاعد. أباوع لفهد رجع. فهد: مرتضى كوم ويانه. مرتضى: بضجر. ليش؟ فهد: كوم ساعدنه. شعدك كاعد يم النسوان. رجال صخام أنت. كوم يله. غنى: طبعاً أدري بي تخبل. لأن مرتضى كاعد هنا. گام يطب ويطلع يصيح بي. لمن خلا يگوم يمه. منك يا فهد. گمت وياهن حتى أساعدهن. تحبّن أساعدجن بشي؟ مروه: وين جنتي؟ ستوج تذكرتي. بعد وكت.

ضحى: خزرتها. روحي يمه گعدي. كلشي ما عدنه احنه. خليج أنتِ. نخاف عليج لتتعبين. وفهد يتعارك ويانه. حياة: هههه. على گولة تتوصخ بسرعة. والله سوالفك يا فهد. مروه: أي يحشش عليها. أروى: بالعكس. قصدك متفاجئ من كمية الجمال والترافة والجمال الي شايلته. وحقه. إذا عده هيج بنات عم جنهن حمار مستنسخ. شهد: رحم الله والديج. هيج هبطتي معنوياتنه.

ساره: تره كلام أروى صحيح. وأني أشهد. شفتها اليوم. صدگ مرت فهد فددد ترافة. حتى گلتلها. هنياله ينام وياج. إيمان: يمعودة لسانج لسانج. جهال هنااا. غنى: دنكت راسي. عززه. هاي فضحتني فضحية. بقت بس تطلع بنشرة الأخبار تحجيها. علا: هههه. لتدنگين حبيبتي. كلنه من نتجمع نحجي بهالمواضيع. هسه من تكعدين ويانه تصير هالسوالف عندج كلش عادية. ياسمين: شهالبنات البر.... هاي ولجن جنه معرسات وعدنه جهال. لو شافو شعرنه مبلل نموت من الخجل.

غنى: ليش حجية؟ غير تسبحن. شكو بيها؟ ياسمين: هو أنتي فهمتي قصدي حبيبه. غنى: أي. غير تسبحن وعدجن جهال. ليش عدكم السبح عيب واحد يدري بي. حياة: لا يمه. احنه عدنه بس نوع واحد من أنواع السبح. عيب واحد يدري بي. ولتسأليني شنوه. لأن جهال كاعده. وما أكدر أحجي. خلي فهد من ترجعون. هو يعلمج شنو. بتول: خاله ليش تكليلها يمه؟ تره أمها ميته. واكيد تتحسس من الموضوع.

مروه: أي والله. حتى أني أگول هيج. لتضلن تكولن يمه. تره تحز بصدرها. لأن أمها ميتة. غنى: باوعت لخاله إيمان. الي تخزر بيهن. لتخزرين بيهن خاله. صحيح أني أمي ميتة. بس هالشي مو عار عليه. ولا عيب. حتى تحز بصدري. وأضوج من يگوللي يمه. تره شي عادي ومبيها إشكال. وللمعلومة. أني ربتني بيبيتي. وأخذت مكان أمي وأزيد. يعني عشت هالشعور. مو محرومة منه.

بتول: أي صحيح. حتى أني أمي متوفية. بس مو مثل موتت أمج. أمج خطية ماتت وهي تجيب. وأبوچ بحادث. مو؟ مروه: خطية. كسرت خاطري. ماعدها أحد. وحتى حالها حال الجناين. يروحن ويعيدن ويباتن عد أهلهن. بس هي متگدر تسوي كل هذا. لأن للأسف. مگطوعة من شجرة. ومعدها أحد. صدگ صعبة. الله يساعد گلبه. غنى: نملت عيوني دموع. تذكرت التفاصيل الي حجتها بيبي عن وفاة أهلي. بصوت مهضوم. خاله تكرمين. وين الحمام؟ إيمان: بنظرات حنان. يم الدرج.

غنى: عفتهن وطلعت. دخلت للحمام. ونزلت دموعي. شگد شايفة حقارة. بس هيج ما شايفة. يعني أني شمسويتلهن. وهيج يحجن؟ يعني ما شايفة واحد يتشمت بالموت؟

قابل هو بأيدهم ماتو. هذا أمر من الله وصار. مسحت دموعي. وباوعت للمراية. يبووو. أنوب وجهي شلون بي. عيون صارن دم. گمت أغسلهن. حتى مابين باچية. غسلتهن بمي بارد. أريد بس هاي الخطوط الحمر الي بعيني تروح. هسه إذا شافوني شيكولون. مسحت وجهي وعدلت شالي وطلعت. ما لكيت أحد. رحت للمطبخ. لكيت أروى.

أروى: أباوع لوجهها. وعيونها مبينة باچية. ما سألتها. أدري من وره هالحقيرات. وأمي ما قصرت. رزلتهم رزالة تسوه حياتهن. وأني ما أگدر أحجي. أمي متقبل يعلى صوتنا. والحجي. خيه. موجودة. وينج طولتي؟ غنى: بالحمام. وين الباقين؟ أروى: طلعو بره. بقيت بس أني أنتظرج. غنى: يله لعد امشينه. نزعت الصايه ولفيتها وطلعت. لكيتهم فارشين هواي فراش وكاعدين. أشرلي فهد أكعد يمه. رحت گعدت يمه. فهد: باوعتلها. باستغراب. ليش باچية؟

غنى: ها. لا ما باچية. بس عيوني يحركني. فهد: شو باوعيلي. أي صدگتچ. غنى: غلست. محجيت. ضلوا فترة كاعدين. وگامن البنات. فرشن سفرة. وجابن العشة. وكعدنه نتعشه. أباوع لفهد. شگد مرتب بالاكل. لا يوصخ. ولا مثل ذولة الي ينتفخ حلكهم من گبر اللقمة. همه ياكلون واني صافنة على فهد. فهد: سويتيلها لفة بهدوء. هاج. غنى: شكراً. مروه: أباوعله. يسويلها لفات. إن شاء الله سم وزقنبوت بگلـبج. حارث: متاكلين. شبيج صافنة؟ صفنة المطي.

مروه: جاي آكل. وبعدين بطلها. هاي مال صفنة المطي. ساره: فهد حباب. انطيني خبزة من يمك. ليلى: راح تطگين يمعودة. هاي ثاني گصة. ساره: شعليج. تره أني حامل. ولازمني تغذية. جيب فهد. مرتك عصفورة. متاكل. انطيني الماعون الي بصفها. فهد: شلت الأكل. دنيته يمها. هاج. بس جفينه شرج. همست. وأنتي شبيج تمعجلين باللفة؟ أكلي حبابة. لتضلين صافنة. غنى: داأكل. فهد. وأصلاً أني شبعانة. معليك بيه. أكل أنت.

فهد: راح أطيح حظج والله. دباوعي لساره. بدت بالخبزة الثالثة. وأنتي بعدج ما كملتي لفة وحدة. مروه: أول مرة أشوف فهد هيج مهتم بأحد. أباوعله شلون كل شوية يهمسلها. أكيد يتغزل بيها. يمكن يگولها أحبچ. گمت. ما أگدر أتحمل هيج منظر. غنى: كملوا عشة. وگمت ويه البنات. شلت الأكل. ياسمين: عوفن المواعين. البنات يغسلنها. وتعالن عيني. المتزوجات گعدن. غنى: گعدت. ما قبلت الحجية أقوم. سعاد: حجية. عندي عتاب وياج. ياهو الأحسن؟

جـنة إيمان لو جنايني؟ ياسمين: ماكو واحد أحسن من واحد. الكل عندي سواسية. سعاد: لعد إذا هيج حجيج. ليش أسوارچ الذهب شلتي. انطيتي لمرت فهد. مو لوحدة من نسوان ولدي؟ ياسمين: وأنتي شنو تحاسبيني؟ المن أنطي والمن ما أنطي؟ سعاد: مو أحاسبج. بس السالفة بيها قصد. وأني أريد أعرف شنو قصدج بهالتصرف. وبعدين ليش الأسوار لمرت فهد بالذات؟ شنو فرقها عن جنايني؟

ياسمين: مو قصة فرق. بس ما صارلي مجال أطلع أجيب هدية إلها. وانطيتها أسواري الغالي من باب المعزة لا أكثر. ليش تسويلج سالفة؟ سعاد: ليش رجلها عايز وتنطيها سواره؟ أشو گادر يجيب إلها بدال الأسوار مية. ياسمين: أباوع لمرت فهد. جاي تفتح الأسوار. والله إذا شلتي من إيدج. لساني ميدور على لسانج. والله.

غنى: حجية. أني الأسوار ممحتاجته. فهد الله يحفظه ممقصر ويايه. گد شعرايه. وعلى گولة أم فيصل. يگدر يجيبلي بدال الواحد مية. والحمد لله متمكن هو. فإذا موضوع الأسوار زاعجها. خلي أرجعه. وأرجع وأگلج. أني ممحتاجة لا ذهب ولا فلوس. گوليش كافي عليه فهد. صاير خيمة فوگ راسي. الله يخليه. ياسمين: على حجيج هذا. والله متنزعينه. وحلفي براسي.

غنى: باوعت لام فيصل. تخزر بيه. وخاله إيمان تباوعلي بنظرات بيها شي من الرضا. شوية واجه فهد. گال يله. گمت. لبست صايتي. وسلمت على الحجية والبنات. وطلعت وياه. وصلنه للبيت. كلمن راح لغرفته. وأني صعدت. بگى بس فهد يقفل بيبان البيت. دخلت للغرفة. نزعت ملابسي. ولبست دشداشة صيفية سودة. وطلعت لفيت شعري. شفت فهد طب. ها. تنام؟ فهد: لا. بس جيبلي تراك. خلي أبدل. غنى: أي هسه. رحت طلعتله تراك. خذا لبس بس البجامة. واجه.

فهد: باوعت للساعة. 12. بعد وكت. مو مال أنام هسه. أگلج. راح أكعد أتمرن. وأنتي عديلي زين. غنى: گعدت. أي. أباوعله. گام يسوي شناو. وأني أحسبله. متتعب أنت؟ فهد: نزلت بجسمي. صار سنين بالجيش. ساگوا علينه بالعودة وفنه الميدرب. أتذكر بالاردن. الي ميسوي التمارين مثل ما مطلوب. يتعاقب. ويخلو يسوي التمرين أضعاف. والله أيام أكلنه بيها تبن. غنى: ابتسمت. حشاك. يله. وصلت للمية. گافي. مو زين عليك. فهد: گمت. تشكين بقدراتي؟

غنى: ياقدرات؟ شايب أنت. فهد: مسحت وجهي. وداعة أبو القاسم. الماعندي أعز منه. إذا أريد أثبتلج أني شايب لو لا. أخليج تباتين بالمستشفى. غنى: باستغراب. بعيد عن الموضوع. منو هذا أبو قاسم؟ فهد: واحد عزيز عليه. غنى: شنو جدك؟ فهد: ههه. لا. غنى: زين عايش لو ميت؟ فهد: لا عايش. الله يطول بعمره. غنى: باستغراب. ليش؟ شگد عمره؟ فهد: تلاثين سنة. بس خطية متعوب.

غنى: ياا. خطية. الله يساعده ويطول بعمره. أباوعله. شو هذا گام يضحك بصوت عالي. فهد: أمين. أمين. ههه. غنى: ما أعتقد گلت شي يضحك. فهد: والله أنت فطيرة. وقليل الي مثلج. غنى: لا. مو فطيرة. أني وقوية هم. فهد: شلون بله قوية؟ غنى: تحب أثبتلك؟ فهد: شلون؟ غنى: تلعب مصارعة مال إيدين. فهد: كل عقلك. تردين تلعبيها وياي؟ غنى: بثقة. أي. فهد: گعدت على الجرباية. يله تعاي. غنى: ركضت گعدت گدامه.

فهد: أباوع لشعره. انفل. مديت إيدي. يله. أباوعلها. خلت إيدها بإيدي. أقرب وصف ممكن أوصفه. أنو إيدها بإيدي صايرة مثل الفرق بين إيد واحد عمره أربعين وطفلة عمرها ست سنين. لا وكل عقلها تريد تغلبني. غنى: ضغطت على إيدي. حتى ما أگع. فهد: انسحبي بكرامتج أحسلج. غنى: ما عيب. ما أنسحب.

فهد: أنتي جبتيها لروحج. گـلبت إيدها على الجهة الثانية. أباوعلها. انگـلبت هي وجسمها وره الجرباية. سمعت صوت طگة. گمت بسرعة. رحت يمها. أباوعلها. گامت تصرخ. شبيج؟ غنى: آاااه. يمه. إيدي. إيدي. فهد: بخوف. شبيها؟ وشنو هذا الطگ؟ غنى: بدموع. يمكن انكسرت إيدي. شجاك كسرتني. آااه. إيدي. فهد: بارتباك. كومي. كومي. رحت ركض. جبت صايتها وشالها. كومي. حبابه. حاوطت خصرها وكومتها. لبستهة ملابسها. ونزلتها جوه. طلعت أمي على صوت. نزلتنه.

إيمان: نزل فهد هو ومرته. أباوع لغنى لازمة إيدها وتصيح. شكو؟ شبيكم؟ فهد: إيدها انكسرت. مدري شبيها. عود من أرجع نحجي. أخذتها بسرعة للمستشفى. والطريق كله هي تبجي. گتلج متگدرين لي. ليش تعاندين؟ بس أخ منج. غنى: بدموع. شسوي إذا أنت إيدك شگبرها كسرت إيدها. فهد: حقج. هو صوچي. خليت عقلي بعقلج. ولعبت وياج. وصلت للمستشفى. نزلتها. وأخذها بسرعة يفحصون إيدها. الدكتور: إيدها مفصوخه. وين وكعت؟ فهد: باوعتلها. شريد أكله؟

جنه نلعب. وإيدها انفصخت. الدكتور: لتخاف. مابيها شي. أهون من الكسر. هسه نجبسها. وعلى الأدوية والكريمات تصير زينة. فهد: أباوعلها. تكسر الخاطر. شلون تبجي مثل الجهال. راحوا جـبسوا إيدها. وانطوها أدوية وطلعنه. الطريق كله أني ساكت. أأنب نفسي. هسه شبيه أني طفل؟ شلون قبلت أسوي هيج. غنى: خف الألم. لأن ضربوني أبرة. نزلنه جوه. شفنه خاله إيمان كاعدة. إيمان: ها. شبيها إيدها؟ فهد: انفصخت. إيمان: شلون انفصخت؟

فهد: جنه نلعب. وگـلبت إيدها وتأذت. إيمان: شجاك يايمه؟ تجيب روحك الها. همزين ما انكسرت إيدها. ولو هو صوچي. خليتك تدخل ملاكمة. هو أنت من غير خير مخير. أنوب گمت تتعارك. گملت السبحة. دروحو نامو. وباچر أني أخابر خالك يدزلنه حليب دواب. على حساب تصير زينة. فهد: صعدنه فوك. گعدتها على الجرباية. نزعتها الصايه والحجاب. مسحت على شعرها. إيدچ لسه توجعج؟ غنى: غمضت. مابيها شي. لتخاف. تعال نام.

فهد: تمددت وراها. لزمت شعرها. وگمت ألعب بي. شفتي هاي تاليه ولدنتج. غنى: بألم. توبة عمي. أنت مينلعب وياك. فهد: ابتسمت. ضليت ألعب بشعرها لحد ما نامت. بست راسها ونمت. *** صباحاً. غنى: گعدت الصبح. گمت دخلت للحمام. غلفت إيدي بعلاقة حتى أسبح. اليوم أستحقيت صلاة. ولازم أسبح. سبحت وگفـت البس ملابسي. وما أحس غير الباب ينفتح عليه. وجان أشوف فهد گدامي. صحت. يااا. دوووور وجهك.