رواية ذنوب على قيد الغفران الفصل السابع والستون 67 - بقلم براء

فهد: كاعد على أعصابي صار نص ساعة من دخلوا ولحد الآن ما طلعوا. ياربي دخيلك كون ماكو شي. حسيت بأيد تطبطب على ايدي، عرفتها أمي. إيمان: شبيك يمه ليش وجهك أصفر وحلكك أبيض؟ فهد: خايف. إيمان: لتخاف يمه، تفائل. شجاك راح توكع. فهد: شلون أتفاءل وهي بنص الموت، هسه كلبها تعبان وراح تجيب اثنين وضربوها بنج وممكن البنج يأثر عليها. كل هالاحتمالات تخليني دربي ما أشوفه. باوعتلها يمه أني أخاف أخسرها.

إيمان: اسم الله يمه ليش هيج تحجي، كول يا الله. شبيك ترجف، هاي عود أنت السبع الميخاف من شي والي محد يكدر يكله على عينك حاجب، يرجف على عملية بسيطة. فهد: بهدوء، حتى لو كانت بسيطة تره الجوه مرتي وجاي تصارع حتى تجيب قطعتين من روحي. أني عائلتي كلها جوه، مرتي وجهالي معرضين للخطر بسبب وضع غنى الصحي. إيمان: إن شاء الله ماكو شي، صلِ على محمد. فهد: اللهم صلِ على محمد وآل محمد.

ضليت كاعد ولازم كلبي، أحس روحي تريد تطلع. خايف وهاي أول مرة أخاف لدرجة بودي أبجي من الخوف. يا رب العرش العظيم دخيلك، مرتي وجهالي بأمانتك. أروى: شو طولو، شوكت يطلعون؟ إيمان: شبيكم يا يمه، قابل جاي تلعب، هي عملية هاي. نرجس: بنات خلي نقره فاتحة لقضاء حاجة وتسهيل ولادة غنى. غسق: أي والله. أم صالح: يا دافع البلاء، ادفع البلاء عن حفيدتي وجهالها. دخيلك ربي طمعانين بكرمك وقدرتك.

فهد: كمت أفتر بالممر وعيني على الساعة. مر وقت طويل وما طلعوا. تنهدت، أباوع لغرفة العمليات تنفتح ويطلعن الممرضات يركضن. شكو؟ أحاجيهن ميردن. موووو أحجييييي وياااااجن. ممرضة: المريضة جاي تنزف بشكل رهيب، لازم نجبلها دم. الوضع خرج عن السيطرة. فهد: لا إلهي لا، أني طلبتها منك هي وجهالي، لتفجعني بيهم. نرجس: بدموع سودة عليه، ربي دخيلك كومها بالسلامة. إيمان: أباوعله، الدموع ترست عيونه. يمه سودة عليه، شحاله على مرته وجهاله.

فهد: شوية وأجن الممرضات يركضن وجايبات الدم وياهن. دخلن لغرفة العمليات وهم بعد ما طلعن. كعدت وحيلي مهدود. ميهمني شي، أهم شي مرتي. ربي انقذ لي غنى، ما عندي غيرها، هاي توأم روحي وحبيبتي. لو صار عليها شي أني أنتهي. إلهي... أباوع صارلهن ساعات وما طلعن. غير يفضّنها بنات الكلب، احتركت أبوهن يا كح... ضليت كاعد على أعصابي لحد ما طلعت الدكتورة. ركضنالها كلنه: ها دكتورة، بشري؟

الدكتورة: ألف مبروك، شرفوا التوأم الحلو على الدنيا وأمهم وضعها استقر الحمد لله. اللي صار اليوم معجزة، كنا على وشك نخسر المريضة بسبب كثرة النزف اللي تعرضت له، بس الحمد لله قدرنا نسيطر على الوضع. فهد: زين شوكت أكدر أشوفهم؟ الدكتورة: حالياً راح ننقل المريضة لغرفة خاصة والجهال هسه يجيبوهم، بس وين ملابسهم؟ أروى: ذني عندي. تعالي نرجس نروح وياهم. فهد: دكتورة غنى وضعها زين؟

الدكتورة: والله زينة والحمد لله والشكر، استقر وضعها. بقة بس تكعد من البنج. فهد: تنهدت براحة، أحس ماي بارد ونزل على كلبي من حجت. سمعت صوت أمي وبيبي غنى يهلهلن. إيمان: كللللوووش. الحمد لله على سلامة مريتك يمه. أروى: الحمد لله على سلامتهم حبيبي. فهد: الله يسلمجن. غسق: يتربون بعزك خويه، والحمد لله على سلامة نونه. أم صالح: قرت عينك. فهد: رحم الله والديجن. بلسم: يايييي متشوقة أشوفهم.

شهد: حتى أني متشوقة أشوفهم. يله هسه يجيبوهم. فهد: واكف بباب غرفة العمليات، أباوع طلعوها نايمة. حبيبتي الحمد لله ربي طلبتك للمرة الثانية وما رديتني. خجلان من كرمك وعطائك. ربي دخلوها للغرفة ودخلن الدكتورة والممرضات وياها. شوية ودخلنه وراهن. أجيت وكفت يم راسها. ياروحي نايمة ومتدرين الدنيا طشت لو رشت. عايفهني من ساعات، أبو أبويه استلك. دنكت بست راسها بعمق، ولا أول مرة ما أهتم إذا أحد موجود. ابتعدت وكعدت.

إيمان: ها يمه، ارتاحيت وورد وجهك؟ فهد: تنهدت، الحمد لله. باوعتلها وين جهالي؟ إيمان: هسه يجيبوهم. راحت نرجس وأروى وياهم، لتخاف، ثواني وهمه هنا. فهد: أباوع الكل ملت على غنى، من بنات عمامي لخواتي لأهلها. لعد شكد هي إنسانة زينة، بحيث الأغلبية يحبوها ويعزوها. خلصت من سالفة ولادة غنى ودخلت بالسالفة الثانية، جهالي أريد أشوفهم، أحس روحي مفرفحة تريدهم. ضليت كاعد وصافن على لا شي. سمعت صوت البنات. شهد: أجو، أجو جابوهم.

فهد: أباوع دخلو مثل العربانات الصغار، ما مبين منهن شي. كمنه كلنه، التمينة عليه. أباوع اثنين جهال صغار وناعمين لدرجة، واحد مكمطي وملبسي وردي والثاني نيلي. عرفت أم الوردي بتي وأبو النيلي ابني. ابتسمت بفرح وأحس الدنيا ما لامتني. غسق: أوي يمه بعد كلبي، كزكزت عليهم. شهالجمال هذا. أم صالح: اللهم صلِ على محمد. الله يحفظهم ويبعد عنهم كل شر. بعد كلبي جنهم أمهم، النعومة والهدوء.

إيمان: يتربون بعزك بعد كلبي، وينطيك طول العمر وتكبرهم وتزوجهم بأيدك.

فهد: بهدوء، ما أزوجهم. ذوله حتى طلعة ما أخليهم يطلعون. دنكت بستهم على كيفي، من كد ما جلدهم ناعم خفت لا ينجرحون. ابتعدت أباوعلهم وأحس عيني متشبع. بس أريد أعرف أني شمسوي حتى الله ينطيني مرة زينة شريفة وحبابة وجميلة وتعبدني عبادع ويرزقني منها توأم ولد وبنية. معقولة أني مسوي شي زين لهالدرجة حتى الله يرزقني كل هالرزق، لو هاي لأن غنى زينة الله جاي يكافئها. وردة: كعدوهم حبابين. نرجس: ولج شنكعدهم، عوفيهم همه يكعدون وحدهم.

وردة: يا جماعة، يصير أعضهم. أروى: شتعضين ولج. وردة: انتحبت. ولج متشوفيهم شلوون ناعمين، تحسينهم كيكة. لزمي لزمي وجهم. يييييبووو والعباس ما أتحمل بعد. ملك: هههه حقج والله، شكلهم كلش لطيف. خاصة همه اثنين مو واحد ويتشابهون.

فهد: همه يحجون ومخبوصين، وأني عيني عليهم. عيوني ما جاي تشبع. أباوعلهم وكأن كدامي كنز. شعور بداخلي صحى، ما أكدر أوصفه. خوف على فرح على مسؤولية. ما أعرف شنو هو، بس اللي أعرفه إنه من طاحت عيني عليهم وهمه أخذوا قطعة من كلبي وختموا عليه. ورغم أول مرة أشوفهم، بس حسيت روحي حبيتهم لدرجة إنو ردت أخفيهم ولا أخلي واحد يشوفهم. غنى: بخفوت، آه. فهد: كمت بسرعة رايح يمها. ها حبيبي. غنى: فهد. فهد: يمج حبيبي، تسمعيني؟

غنى: لتكعد يم بتول، هاي متستحي. فهد: ابتسمت. إيمان: شجاي تكول يمه؟ فهد: هيج يمه. رجعت باوعتلها، خرب يومجن النسوان، حتى وانتن مبنجات توصن رجولتجن يبتعدون عن النسوان. غنى: لتحاجيها فهد، خلي تولّي. فهد: هههه صار. ضلت تهذي وتحجي شاطئ باطي. وذني يضحكن عليها. شهد: وخرو وخرو خلي أصورها. فهد: لا لتصوريها، كعدي. شهد: خلينة نوثق هالشي، ما أراوي لاحد والله. فهد: بهدوء كلت، لا لحد يصور أي شي. إيمان: خلص بكيفك يمه.

فهد: ضلينه كاعدين يمها لحد ما انتهى مفعول البنج منها وكعدت. أول ما صحت نزلت دموعها. غنى: بألم، آخ يمه بطني. أم صالح: الحمد لله على سلامتج حبيبة. كومن يمه، صيحن للدكتورة خلي تنطيها مسكن. أروى: هسه أصيحلها. فهد: أجت الممرضة انطتها مسكن وكالت: هسه يهدأ جسمها. وفعلاً ما طولت حوالي دقايق وبدت تصحصح وتستوعب كل شي حواليها.

غنى: فتحت عيوني، أباوع الدنيا غواش. فتحتهن وسديتهن أكثر من مرة ياله وضحتلي الصورة. أحس اكو فراغ بداخلي والثقل اللي على بطني ماهو. يمه وين جهالي؟ باوعت لفهد. بدموع: وين جهالي فهد؟ فهد: هذوله وياهم حبيبتي، نايمين. لتخافين عليهم. لزمت ايدها. الحمد لله على سلامتج ياروحي. غنى: بهدوء، الله يسلمك حبيبي. أباوع لخالة إيمان اجت بوستني هي والبنات. إيمان: الحمد لله على سلامتج يمه.

غنى: الله يسلمج خاله. الكل تحمد لي بالسلامة وكعدوا. فهد أريد أكعد. فهد: أي هسه. رفعت جربايتها وخليت مخدة وره ظهرها، مرتاحة. غنى: أي. جيبو الجهال خلي أشوفهم. راح جاب واحد منهم فهد. أباوع هاي البنوتة لأن ملبسيها وردي. شلتها بأديه، بس باوعتلها نزلت دموعي. نورتيني يماما، نورتي حياتي يروحي. رفعتها، بايسها، يا عمري ريحتها تخبل. حضنتها وما بودي أعوفها. أباوعلها فتحت عيونها وتباوعلي. يا روحي تعرفين أمج انتي ها، ياقلبي؟

حسيتي على ماما تريد تشوفج مو؟ فهد: وكفت يمها. أباوع لبتي سبحان الخالقها، آية من الجمال. غسق: شراح تسموها؟ فهد: البنية أمها تسميها وأني أسمي الولد، أحنه هيج متفقين. إيمان: شراح تسميها يمه؟ غنى: باوعتلها، حسميها جوان. أم صالح: شهالاسم المرعب هذا. هاي الأسماء كلها فاطمة، نور، حليمة، سليمة، ما لكيتي غير هالاسم. فهد: حليمة؟ سليمة؟ طفلة مواليد سنة حديثة، تردينه نسميها سليمة أو حليمة. صدك تحجين حجية.

أم صالح: أي وإذا، شكو بيها. غسق: والله سوالفج يحجي. شهد: الاسم يخبل، عود إذا جبت أني هم أسمي جوان. إيمان: الله يكومج بالسلامة حبيبتي. ملك: صدك غنى شنو معنى اسم جوان؟ غنى: ابتسمت له، معناوين. الأول وردة الربيع والثاني نهر من أنهار الجنة. إيمان: يخبل. جوان بيبي يمه، أروح سبع فدوات لهالعيون. غنى: هههه شوفي شلون تباوع، عبالك تفتهم. إيمان: هههه بعد كلبي هالعيون تفهم. فهد: ابتسمت، حبيبة أبوها ذكية من هسه.

غنى: فهد جيب الولد أشوفه. فهد: شلت البنية، كبرت بأذنها اليمنى واليسرى وانطيتها لأمي. رحت أخذت ابني من سريره، شلته. غنى: أخذته منه. يشبه جوان بس هذا ولد يروحي، سندي وسند أختك. بسته وشميته مثل أخته. نزلت دموعي غصب عني. أحس روحي الحاضنتهم مو أيديه. وخفت بهاللحظة لا أموت مثل أمي وأعوفهم. طلبت واني بهالشدة، الله يكول بعمري ويخليني لاجلهم. إيمان: ليش تبجين حبيبتي؟ غنى: فرحانة كلش فرحانة. زمرد: ربي يجعل أيامك كلها فرح.

الكل: آمين. غنى: شلت راسي منه، مباوعة لفهد. فهد حتسمي الطفل؟ فهد: ابتسمت، مروان. غنى: فتحت عيوني، صدك؟ فهد: أي، عجبني اسم خالة وأريده على اسمه. أم صالح: نزلت دموعها. مروان حبيبي، سودة عليه حرموني من شوفتك، الميخافون الله. زمرد: يمه لتكدرين البنية، الله يخليج. عاشت إيدك خاله، الاسم يخبل. يتربى بعزك إن شاء الله أبو مروان الوردة.

غنى: باوعت للطفل مبتسمة. مروان حبيبي، ياترى من تكبر حتصير بلسم لجروحي وتعوضني عن فقدان خالك يروحي. بوسته وحضنته. وردة: يمه جوان ليش تسوي هيج بحلكها؟ إيمان: هههه هاي جوعانة بعد كلبي، تريد ترضع. غنى يمه راح أشربهم مميات ومن تحسين نفسج كادرة ترضعيهم رضعيهم، تره حليبج أفيدلهم من التعليب.

غنى: جيبيهم خاله، مبيه شي. أكدر أرضعهم والبنج انتهى مفعوله، ماكو مشكلة. طلعت صدري ونزلت الشال، عليه خاف يجي واحد، خليته للاحتياط. رضعت مروان لأن بحضني، أباوعله. سودة عليه شلون جوعان. غسق: تقربت بوستها. حبيبتي الحمد لله على سلامتج. ربي يحفظج ويحفظ هالكمرات اللي عندج. تعذرينه، صار لازم نروح وبس تطلعين من المستشفى، أحنه أول الوادم نجي.

غنى: براحتكم حبيبتي، تنورون بأي وقت. طلعوا أهلي وبيت عم فهد. أجه حارث خذاهم وخالة إيمان خابرت على علي يجي على البنات، وفعلاً أجه علي هو ومنذر طايرين. علي: ما شاء الله، ما شاء الله. ولكم شلون متحملين، متاكلوهم. منذر: ألف مبروك، يتربون بعزك حبيبي فهد، الله يخليهم الك. فهد: الله يخليك أبو سالم الوردة. علي: شوكت سميتوهم؟ فهد: جوان ومروان. علي: تخبل أسماؤهم وحيل موالمه عليهم. شوكت الله يرزقني مثلهم.

فهد: إن شاء الله يرزقك بالأحسن منهم. علي: إن شاء الله.

غنى: انقهرت على أروى ونرجس، وحدة كامت تباوع للثانية. خطية شهد تزوجت وحملت وهنه لسه محملن. ناس تكول عندهن تابعة مدري شنو، وناس تكول صابتهن خرعة من موتت أخو الحجية وبعد ميحبلن. أشكال الحجي طلع عليهن وهنه ساكتات. خطية رحت للدكتورة، طلع كل شي مابيهم بس لسه الله مرزقهن. والله قبل لا أدخل للعمليات سمعت بوكت الطلقة إذا تطلب الولادة طلب يتحقق، وأني دعيت الله يرزقهن الذرية ويرزق كل من محروم منها.

طلعوا الولد همه والبنات وبقت بس خالة إيمان وانغام مرت منذر. هالبنية لو شما أسوي ما أكدر أجازيها. دارتني من سويت حادث ومن حملت جانت تجي تساعدني بالبيت، ومرات خطية تطبخ وتجيني تكلي: أكلي، تغذي، لتكعدين، لتتحركين. وهسه من جبت هم ما عافتني، الله ينطيها العافية. فهد: يمه رجعي أنتِ وانغام، أني موجود.

إيمان: لا يمه، مرتك متكدر وحدها والدكتورة كالت كون تبقى يومين لأن بعده جرحها ما التئم ويرادلها راحة وكون يومين متتحرك لمن وضعها يستقر. خوما نعوفك أنت وياها يومين. فهد: أني لراحتكم، تردن تبقن بكيفجن. كمت، يله أني أروح أسجل الجهال وأجيب لكم عشة وأجي. عفتهم وطلعت. انغام: شلون تحسين نفسج هسه؟ غنى: أنطيت مروان لخالة واخذت جوان أردعها. لا الحمد لله، الألم خف، أحسن نفسي أحسن شوية.

انغام: الله يساعدج. أني وحدة وشلت حالتي، أنتِ اثنين. تلكيج متتي. غنى: على التعب اللي شفته بيهم، أجيت أموت، بس والله يا انغام من شفتهم عيني حسيتهم يستاهلون أتعب على حسابهم هالتعب. بست جوان. يمه أريد أكلهم كد ما حابتهم. إيمان: ابتسمت. كلنه مثلج، ندك ونلطم بالحبالة ومن نشوفهم ننسى كل الألم والتعب اللي شفناه بيهم. فطرة الأمومة الله زرعها بينه بعد.

غنى: هزيت راسي، حاضنه جوان. يمه فدوه أروح لليوم اللي خلاني أمكم. خليتها ترضع لحد ما نامت هي ومروان. شالتها خالة، خلتها بسريرها. رجعت راسي على المخدة. رغم جنت تعبانة بس عندي واهس أشيلهم وأخليهم بحضني. أصلاً نسيت نفسي مسوية عملية. غمضت عيوني وأخذتني النومة. وين ياله كعدت نص الليل. شفت انغام وخالة نايمات وفهد كاعد يم راسي. فهد: بهدوء، ها حبيبي كعدتي؟ غنى: أي. فهد: تقربت بست أيدها. شلون صرتي هسه؟

غنى: الحمد لله زينة. باوعت لسراير جهالي، مكعدو بعد. فهد: لا، من رضعتيهم لسه، همه جروها نومة وياج. مبين عليهم هادئين. غنى: طالعين على أبوهم. فهد: يعني أبوهم هادئ؟ غنى: شتكول أنت؟ فهد: بست شفايفها. أني أكول طالعين على أمهم، هادئين وينحبون. غنى: ابتسمت. أوف فهد، جنت شايلة هم لا أموت وأعوفهم.

فهد: كون أفرك حلكج لمن أخلي يخر دم. حجايتج قبل لا تدخلين للعمليات ضلت ترن بأذني. دربي ما كمت أشوفه، كل ساعة أكول ليش كالت هيج، وخاف راح يصيرلها شي. والله هذا كلبي راد يطلع من حلكي. غنى: لزمت ايده. حبيبي أني داخلة عمليات وما أعرف إذا راح أنجو لو الله كاتب لي أموت بهاليوم، فكلت أوصيك على جهالي قبل لا أدخل، لأن أني ما أعرف مصيري. والحمد لله الله كتب لي عمر. فهد: الحمد لله والشكر. غنى: أكول حبيبي. فهد: كولي.

غنى: حباب، أني جوعانة. فهد: ابتسمت. يخسه الجوع، هسه أجيب لج العشة. غنى: أباوعله راح. فتح علاكة وطلع منها طاسة سفري وفتحت علبة جابها خلاها بمثل صينية. فهد: هاج، جبت لج شوربة ومشاووي ومعلاك حتى تعوضين الدم اللي خسرتيه. ومن تكملين أكلي تمر على حساب الرضاعة، ما أريد جهالي يجوعون. غنى: وأنت شمعرفك بكل هذا؟

فهد: ليش غير هو من وراج أني صرت خبرة بالحوامل. أعرف شنو الصحي لهم وشنو المو صحي. النومة المناسبة والملابس المريحة للطفل، حتى أوضاع ال.... المناسبة الج حفظتهن. غنى: باوعت، عززة فهد صوتك. فهد: نايمات، ميسمعن. يله أكلي، خلي أروح أكعد يم جهالي. ولد الكلب يخبلون. غنى: ضحكت، والله تحير أنت. هذا مدح لو ذم؟ فهد: مادام سمعتيني كتلهم ولد الكلب، يعني مدح. دنكت بوستهم وهمه نايمين. أروح فدوة لهالنومة.

غنى: ابتسمت، ماخذة الخاشوكة. أكلت لمن شبعت. واجه هو شالهن. خطية انشلع كلبه، 9 أشهر هو الراحة مشايفها من ورايه.

بقيت يومين بالمستشفى وطلعت. بيومها فهد سوى غدة وذبح ذبيحتين على سلامتي وسلامة الجهال. ما خلى واحد معزوم. أهل أبويه اجو هم، وخوال وخالات فهد هم اجو من البصرة. أني ضليت بغرفة خالة لأن ما أكدر أصعد فوك. كل ساعة جاي أحد، وماكو الناس تصعد لي فوك، هم زحمة وخطية خالة كعدت بغرفة وردة. مر أسبوع على ولادتي مثل الورد. البيت مخبوص بجوان ومروان، وفهد خو هذا عالم ثاني. يضوج من واحد يلزمهم لو يشيلهم، ميكدر يحجي بس يبقى على أعصابه. أباوعله محللهم اثنينهم وكاعد كدامهم يسولف وياهم.

فهد: باباتي حبايبي، ها ولد الكلب تعرفوني. أباوعلهم، يباوعولي، عبالك جاي يفتهمون شكول. ولكم والحسن راح آكلكم، لتباوعولي هيج. غنى: هههه خبلتهم حبيبي، شجاك. فهد: مالج علاقة حبيبي، أني وجهالي. بوستهم وشميتهم. خرب يومهم ماخذين ريحة أمهم. باوعتلهم يحركون بأيديهم ورجليهم. ضحكت، تدرين أني ما مصدك صار عندي جهال، ومو واحد اثنين، لا ويخبلون. غنى: ابتسمت، تحبهم؟

فهد: روحي صارت بيهم. أريد أضمهم عن الدنيا كلها. من شفتهم واني قسمت بالله ما أخليهم يشوفون يوم واحد مو زين بحياتهم، وأحاول قدر الإمكان أبعد عنهم كل شي يأذيهم. غنى: أباوعله شلون يحجي وعيونه عليهم. من شفته هيج حسيت الله انطه جهالي هدية أول ما اجو، والي أبو حنون يحبهم لهالدرجة. ضلينه اليوم كله بالغرفة، فهد مكابلهم وكاعد وهمه فد لوتية، من يشوفوه يسوون حركات بوجهم،

اله وهو يتخبل عليهم ويصيح: ولد الكلب لتسوون هيج، تردون تموتوني. ثاني يوم الكل متجمع بغرفتي، وسمعنه باب البيت يتكسر. طلع علي يركض فتح الباب. أباوع دخل منذر يركض ويلهث ويبجي. كمله الكل. فهد: شبيك؟ شبيك؟ منذر: لارد. فهد: هسسسه غير يبطل ينوح ويحجييي. منذر: فهد الله يخليك ساعدني، أمي ضربتها جلطة وانشلت. الكل: شنووو.