رواية ذنوب على قيد الغفران الفصل الثامن والستون 68 - بقلم براء

منذر: فهد الله يخليك ساعدني أمي ضربتها جلطة وانشلت. الكل: شنووو! منذر: أي... فهد الله يخليك مو وقت الحجي، أريد تساعدني. فهد: أوكف، أوكف، شنو تريدني أساعدك؟ منذر: أمي محتاجة عملية وفوراً، وضعها كلش مو زين، وأني ما عندي والله تعرف إحنا بنهاية الشهر وما جوة أيدي فلس أحمر. أعرف بعد اللي سوته متستاهل أساعدها، بس هاي تبقى أمي وما أكدر ما أساعدها. فهد: شكد محتاج؟ علي: صدك تحجي! بعد كل اللي سوته راح تساعدها؟

منذر: لخاطري مو لخاطرها، والله أرجعهم بس خلي أستلم راتبي. فهد ما عندي غيرك والله. فهد: (بنفاذ صبر) مو جاي أكلك شكد تريد. منذر: مليون. فهد: هسه ثواني. (باوعت لغنى) مفتاح الخزنة بمكانه، خو ما شايلته؟ غنى: لا، نفس مكانه. فهد: خوش. (صعدت فوك، جبت له المليون ونزلت) تفضل. منذر: والله ما أعرف بشنو أجاريك بعد كل اللي سويته. أمي ومن طاحت بشدة ساعدتها.

فهد: مو بحالها. اني كل اللي جاي أسويه لخاطرك أنت بس. ما كالتلي شنو سبب الجلطة؟ منذر: (تنهد)

أنت تعرف من بعد سالفة الفصل أمي باعت الكاع مالتها، انطتكم المبلغ اللي طلبتوه، واللي زاد من فلوس الكاع ضمتهن. وقبل جم يوم اقترحت عليّ أبيع كل ذهبها وأضيفه على هاي الفلوس حتى نبيع بيوتنا ونشتري بيت جبير نكعد بيه أنا وياها وبيت فيصل. وفعلاً اتفقت ويه فيصل وعرضت بيتي للبيع وأخذت ذهب أمي بعته، ولكيت بيت جبير ومناسب قريب على بيت جدي. ورحت البارحة أريد آخذ الفلوس من أمي حتى أجملها فوك الذهب ونشتري البيت.

حاجيتها كالت: "خليت الفلوس عد فيصل يخليهن بالبنك لأن أخاف ينباكن يضيعن". رحت خابرت فيصل حتى يسحب الفلوس ويجيبهن. جان السافل يكلي: "الفلوس أنا اخذتهن، هذا حقي من الكاع اللي باعتها والفلوس هسه وديتهن لسوريا أسوي بيهن مشروع ويا جماعتي". وهي بس سمعته من كد الصدمة وكعت بسرعة. علي: لا يا نذل، يا خسيس! فهد: وشصار بعدين؟ منذر: (بدموع)

ما شفتوا منظرها شلون انعوج حلكها وأيديها وتختض. نريد نسيطر عليها، ما نقدر. حتى الجهال اخترعوا من شافوها. من حلاة روحي شلتها بسرعة وخذتها للمستشفى. أول ما دخلوها كالو انشلت ولازمها عملية فوراً. حاولت، ردت أحصل المبلغ، ما كدرت، وما صار قدامي غيرك. لأن السافل فيصل من كتله يكلي: "أنا شكو، تلكي هذا فلم من أفلامها". علي: صحيح أمك آذت حتى إبليس بشرها، بس فيصل بسوايته هاي بين هو حتى أنكس من الخنزير، هالكلب هذا. فهد: (بهدوء)

كافي حجي. روح منذر، لتتأخر. علي: امشي منذر، أنا جاي وياك، امشي، يله. غنى: طلعوا الولد وخطية منذر دموعه عشرة عشرة. باوعت لخالة اللي بانت على ملامحها التعجب. إيمان: دخيلك ربي، هاي شجاي يصير بالدنيا؟ شلون واحد يبوك أهله بدم بارد؟ شلوووون! لو مهما كانوا الأهل، متتسوه وياهم هاي السواية. دخيلك وسترك ربي، دخيلك. شجاي يصير بالدنيا؟ فهد: اللهم لا شماتة. بس كل اللي صار من إيدها هاي نتيجة الحلفان بكلام الله جذب.

غنى: أباوع لمروان، بجه. شلته. شنو قصدك فهد؟ فهد: من شكيت بيها هي اللي مبدلة الحبوب مال أمي، حلفتها على كلام الله، وحلفت بكل عين خلت إيدها على القرآن وقسمت ما مسوية أي شي ولا مأذية أي واحد منهم. غنى: استغفر الله، ألف استغفر الله. كزبر جلدي. شلون تكدر تحلف بالقرآن جذب؟ فهد: تكدر، ليش متكدر؟ اللي متخاف تخلي أدوية تموت الواحد وتسلب روحه، ترديها تخاف تحلف بكلام الله؟ نرجس: شنو من ملة هاي؟

وجماله نريد الله يرضى على هالبلد. والله ما أستبعد من بعد هالسوايات الأذية الجاي تصير بهالوقت يكلبها بينه. إيمان: سبحانك ربي، شكد ما أنت رحيم بينه، بس لو تريد تعاقبنا تنتقم منا شر انتقام. فعلاً غفور رحيم شديد العقاب. فهد: دك عليه منذر. فتحت الخط وطلعت.

غنى: أهز بمروان وإيدي على جوان. يارب لتراويني هيج يوم بجهالي. لتخليهم يأذوني ويأذون أبوهم لو كبروا. أباع لمروان يباوعلي، بس شافني ضايجة، برطم. بعد كلبي، لا تبجي ياقلبي أنت ها. ضجت على ماما متريد تشوفها ضايجة. أروح فدوة للحنين. نرجس، فدوه شيلي جوان. كعدت أفتري بيها بالغرفة بلكي تنام، خلي أنيم مروان. نرجس: جيبيها. أم الوكاحة، أم الصلافة، تريد واحد يشيلها ويديح بيها.

إيمان: مو خوش طبع هذا، أنوب تتعلم على الشيل ومتقبل تنذب بالكاع. غنى: غير فهد يا خالة، إذا كعد واحد منهم ياخذه ويطلع يفتر بيه بالبيت لحد ما ينام ياله يجيبه. نرجس: خليهم خطية، مادام يرتاحون بالفره، يله أعوفكم. أطلع أفر جوانه حتى تنام. غنى: فدوه لفيها زين، لا تاخذ برد. نرجس: صار. غنى: طلعت نرجس. باوعت لمروان، رجع نام. حبيبي شلته بصفي وغطيته. خالة، لعد وين وردة؟ إيمان: عدها امتحان وجاي تقره.

غنى: هزيت راسي. أباوع، دخل فهد. ها، شكالك منذر؟ فهد: كعد يكول وضعها مو تمام والدكتور كاله تأخرت. إيمان: يعني شنو راح تموت؟ فهد: لا، بس نسبة شفائها جداً ضئيلة، لأن ما سوولها عملية أول ما دخلت، وبنفس الوقت هي مضروبة جلطة كلش قوية بحيث ما ردتها مرد. إيمان: لا إله إلا الله. الله يبعدنا ويجفينه شر الأمراض. فهد: آمين. إيمان: يله يمه، أنا أعوفكم وأقوم أرتاح. تصبحون على خير. الكل: اجمعين. فهد: باوعتلها. لعد وين جوان؟

غنى: كعدت. فاخذتها نرجس تفرها حتى تنام. فهد: كمت. صدك تحجين؟ لتروح تاخذ برد، مو جانت بالدفء؟ إذا لاحها برد تستبرد، متفكرون أنتو يعني؟ أضل أعلم بيكم. غنى: أباوعله. عافني وراح. شوية وواجه شايلها وهي كاعدة ما نايمة. فهد: خليتها على الجرباية. ها حبيبي كاعدة؟ حبيبت أبوها متكدر تنام ها؟ كلب أبوها تريد تلعب. شنو شنو؟ شتريد الحلوة؟

غنى: كامت تبتسم. يعمري، شلون تضحك من واحد يناغيها. أباع، أجه فهد يبوس بمروان ويجر بخشمه حتى يكعده. لا فهد خطية، هستوه نام، عوفه. ما أكدرلهم ثنينهم. فهد: الكوا... ميقبل يكعد. غنى: عليمن طالع؟ أبد ميحب النوم. فهد: عليه، بس أنا أحب النوم، بس وياج. غنى: عيب عليك. أنا مو هذا قصدي. فهد: ولا أنا قصدي اللي ابالج. (أباوعلها دنكت ابتسمت)

رغم جابت وصارت أم وصارلها سنتين وياي، بس هي هي نفسها، أبد ما تغيرت. دنكت بست خدها. يله حبيبتي نامي، وأنا راح أضل ألعب جوان شوية لبين ما تنعس وتنام. غنى: لا، أخاف جوعانة. خلي أرضعها بلكي تنام. فهد: لو جوعانة تبجي، بس لا شبعانة وتريد تلعب. شلتها خليتها بحضني. نامي أنتِ حبيبي، أنا بعدني كاعد منتظر علي يرجع. غنى: ليش، شتريد منه؟ فهد: هو خابرني كلي لتنام، أريدك بموضوع. كتله ميخالف، منتظرك.

غنى: ماشي. ذبيت حجابي وتمددت. مبعدة مروان شوية عني لأن أخاف وأنا أتقلب أأذي. طبعاً من يوم اللي جبت وفهد ما يقبل ينيمهم غير بنصنا. غطيته وغطيت روحي، وظليت أباوع لفهد اللي كاعد ويسولف ويه جوان، وهي بعد كلبي مركزة ويا، عبالك تريده يحجيلها. بعد ضليت أباوعلهم لحد ما نمت. *** علي: ها، شكلك الدكتور؟ منذر: شكلي يعني؟ للأسف ما كدروا يسيطرون على الوضع لأن عمليتها تأخرت، وهالتشوف ضربتها جلطة وانصابت بشلل.

علي: مو مشكلة، بلكي تتعالج وتصير زينة. كافي منذر، لتبجي، أزمة وتعدي. منذر: شلون متريدني أبجي؟ لك هاي أمي، لو مهما تسوي وتفعل تبقى هي الجابتني وتعبت عليه. قابل تريدني أصير مثل هذاك السافل؟ باك فلوسها وبكل حقارة صدرهن لخارج العراق وما اهتم لا للحرام ولا للعيب. علي: لو ما متأكد هو أخونه جان كلت نغ... والله. منذر: والله سوايته حتى النغ... ميسووها. لابد النغ... من تجيبه وتصرف له جم فلس عليه مينساها الك، بس هذا كلب...

كلب وسافل ومنحط. لو ما منحط ميرفع إيده ويضرب أمه. علي: الدنيا دوارة، وأذكرك. شتسوي يرجع عليك. منذر: هزيت راسي. علي: بقينة للـ 1. هو بقى وياها، وأنا رجعت للبيت. دخلت لكيت فهد منتظرني. فهد: ها، شو تأخرت؟ علي: ما كدرت أعوف منذر منهار على أمه، خطية. خابر خواله ولا واحد منهم قبل يجي. صدمني موقفهم بصراحة، يعني لو مهما كانت المشاكل بين الإخوة، من يوكع واحد بشدة، بدال ما يوكفوله أول الناس يتبرون منه ويكولون مالنا علاقة.

فهد: جلاب، شتتوقع من جلاب؟ ولو الجلاب وفية، تنطيها عضمة تضل تعبدك، بس ذولة منبع مال حقارة. شتتوقع منهم. المهم، ما كالتلي ليش ردتني أنتظرك؟ علي: هيج جانت ابالي حسبة، وكلت لو صارت أنت موجود وأحاجيك، بس الحمد لله ما صارت. فهد: وشنو هالحسبة؟

علي: عبالي راح تموت، وتعرف وضع منذر أنت ما عنده. كلت أنا وياك موجودين ونساعده، لأن جنت شبه متأكد راح تموت. ترس أذاني. سمعت الدكتور كال ضربتها جلطتين، وحدة وره الثانية، وانشل كل جسمها. تعجبت من كال عايشة. بالعادة اللي عمره جبير وتضربه أكثر من جلطة وينشل، ميطول. بس هي عاشت، شلون ما أدري. بقدرة الله. فهد: هذا عقاب من الله. لو يريد يرحمها يموتها، بس ربك يريد يعاقبها بالدنيا والآخرة. علي: اللهم لا شماتة.

فهد: حاشا لله. أنا ما أتشمت، بس جاي أوضح لك وجهة نظري. يله من رخصتك، أنا تعبان، أريد أنام. وراك دوام، وأنت عود باجر لا تروح للدوام، ابقه ويه منذر، خطية. علي: أي، هو جنت مقرر هيج أسوي.

فهد: دخلت لغرفة أمي. شيطلع هالشهر ونصعد لغرفتنا. جزعت روحي، ما أرتاح إذا مو بغرفتي. تدنيت، وخرت الغطة ونمت بصف جوان. أباوعلها هي ومروان نايمين بنصنا. ابتسمت على منظرنا. أحس بشعور حلو من ننجتمع كلنا سوا، وخاصة بالنومة. غمضت عيوني حتى أنام، باجر وراي دوام. *** صباحاً

غنى: كعدت الصبح على صوت بجي جوان ومروان. فتحت عيوني لكيتهم يبجون. باوعت للساعة، هستوها بالتسعة الصبح. تنهدت. ياربي، والله بعدني نعسانه. البارحة أربع مرات كعدت، ينام واحد يكعد الثاني وهكذا. رفعت جسمي على كيفي. ها يماما، ها هياتني يمكم، لا تبجون، يعمري. فتحت دشداشتي حتى أرضعهم. شلتهم ثنينهم خليتهم على صدري. أباوعلهم سكتوا. طبعاً سالفة الرضاعة كلش تعبتني، ماشاء الله عليهم حبايبي يجوعون بسرعة ويريدون صدري وهالشي من صدك يتعب، خاصة هم ثنين مو واحد. أباع لمروان يطبطب على صدري ويرضع. ابتسمت بعد كلبي، شلون سوالف.

باوعت لجوان: ها ولج دبسزز، شو خانسة؟ كامت تضحك. هههه، بعد عمري هالضحكة. بوستهم. يمه، أفيييش، شكد أحبكم. رضعتهم لمن شبعوا، وخرتهم عن صدري. أخذت كلينس مسحت حلوكهم وصدري. نيمت جوان وأخذت مروان أدك على ظهره حتى ميتقيئ. تريّعته وسويت نفس الشي لجوان. نرجس: صباح الخير. غنى: ابتسمت. صباح الورد. نرجس: ها، شو الحلوين كاعدين؟ غنى: أي كعدوا جوعانين، قبل ربع ساعة رضعتهم وهاي كدامج كعدوا.

نرجس: سوو أسوف يمه سنوو أنتوا سنوو. الوح فدوه لهالعيون الحلوة. ولج غنى، جهالج رجعوني طفلة بكد سالم. غنى: شبيج؟ شو أحسج هادئة اليوم على غير العادة. نرجس: خابرتني أروى تبجي. غنى: خير، شبيها؟ نرجس: كالعادة، نسرين وحجيها المثل السم. غنى: شنو جديدة عليها؟ نرجس: تعرفيها بعد، شكد تتحسس من موضوع الحمل.

ونسرين مكابلتها صبح وليل: "أنتي جبيرة وميصير عندج خلفة، واستلاحكي روحج لتطلعين عاقر". أكلها ولج غبرة، لتهمين، إحنا راجعين يم الدكتورة اللي تفهم من نسرين وعشرة بكدها، وكالتلنا ما بيجن شي، وهذا رزق. وانطتنه مقويات حتى يصير حمل. بس هاي ثولة ناصبة مناحة وكاعدة كل يوم. غنى: أنتي تدرين بيها شكد حساسة، مع إن سامر واكف وياها ولا حجة ولا فتح حلكه. بالعكس،

هو يكوللها: "أكو ناس تبقى سنين بدون أطفال وما حجو شي، ترديني أنا اللي ما صارلي سنة أحجي وأتمنن". نرجس: صحيح حجيه، بس تردين الصراحة؟ غنى، هالايام جاي أشوف علي كلما يشوف له طفل يذب له حسرة شكبرها. حاجيته أكثر من مرة يكول: "كالت روحي على الطفل، بس صابر".

غنى: كل شي بأيد الله. ولتتوقعين اكو واحد يريد مصلحتنا بكد ربنه. ولتنسين كل تأخيره وبيها خيره، أكيد اكو صالح من تأخر حملجن. وهسه يله سوي لنا ريوك وكعدي خالة دنتريك، لأن أنا ما أكدر أكوم. يله يله. نرجس: تره تعبت. شوكت تصير زينة؟ ما طلعت هاي. غنى: برطمت. تتعاجزين مني؟ نرجس: أتعاجز من روحي ومنج ما أتعاجز. هسه ثواني والريوك يمج.

غنى: ابتسمت. حبيبتي. طلعت وأنا كعدت ألعب جهالي شوية، أريدهم يتعلمون على اللعب والضحك، ما أريدهم يتنحسون. *** فهد: كاعد بمكتبي وخابرني عمي. جاوبته. الووو. عباس: الوو، ها بويه، الله يساعدك. فهد: هله بيك عمي، ويساعدك، خير. عباس: ماكو شي، بس تعال للمعمل شوف العمال شتريد يسوون.

فهد: أنا متفق وياهم على اللي أريده، نفس بناء المعمل القديم، كل شي ليخربطون، وأنتوا موجودين. كل لمحسن شنو اللي يخطر على بالك، سوي بالشكل المعقول، وأنتوا هم، لأن أنا ما أكدر أطلع، عندي شغل كلش هواي. عباس: خلص، براحتك. راح أعوف محسن يتصرف. فهد: ماشي. سديته منه. أباوع، دخل عمر. ها. عمر: هذا اسمه أسعد، أجو أخوان مرته للمكتبي يردون يحاجوك. شكللهم؟ فهد: خلي الشرطي يدخلون، أشوف تاليها وياهم شنو. طلع عمر وهمه دخلو.

كامل وخالد: السلام عليكم. فهد: هله. خير. كامل: أنت رجل غنى مو؟ فهد: قصدك غنى اللي أخذتو ورثها وطردتوها بالشارع وشوهتوا سمعتها بكل مكان، مو؟ خالد: الفات مات، وكل شي انتهى. وأحنا ولد اليوم، وهي تبقى بت أختنه، وأحنا خوالها. فهد: رفعت حاجبي. لا بله؟ شو لك بيها؟

هاي ولد اليوم، أبو ولد. سمعوني زين، خلي نختصر النقاش اللي ماله داعي. دخلو بصلب الموضوع. بعد ساعة عندي اجتماع، أريد أكمله وأرجع لبيتي، مرتي وجهالي منتظريني. فاختصروا. كامل: شوف ابني، أحنه... فهد: قاطعته. سيادة الضابط فهد، أو أبو مروان، أنا مو ابنك. كامل: أبو مروان، اسمعني. أحنا داخلين على الله وعليك، نريدك تساعده بشغلة. أبو أمير اللي راح بالرجلين بسبب حادث غير مقصود وتدمر، ودمر مرته وابنه وبناته وياه.

فهد: هذي مو مشكلتي. أنا شعليه؟ ماسامع القانون؟ لا يحمل مغفلين. محد كاله روح اشرب سم وسوق واكتل بالعالم. وبعدين أنا آخر واحد المفروض تلجئون اله، لأن تدرون بيه شكد حاقد وأكرهكم على اللي سويتوه بمرتي. وأسعد لو تطلع روحه كدامي وباستطاعتي أساعده هم ما أساعده، على سوايته النكسة ويه غنى. خالد: بس الإنسان خطاء، إذا الله يغفر، منو أحنا ومنغفر؟ فهد: هذا الله مالك هالدنيا وصاحبها، منبع الرحمة والمغفرة، تجيبه علينه؟ لا وتقارن؟

هم لك بابا، هذا الله، أنت مستوعب المقارنة اللي جاي تسويها؟ منو أنا؟ زبالتيش وتقارني برحمة الله؟ كامل: حاشاك أبو مروان، مو هذا القصد. بس أحنا طمعانين بأخلاقك وكلامك، كلها هنا تشهد لك، من شرطة لضباط. شكد خوش آدمي وكلبك طيب، فأجينه نحاجيك باعتبارك نسيبنه وما عدنا غيرك، وهم تعشمنه بأخلاقك. فهد: (بهدوء)

أولاً، أنتو جذابين بهالمركز، كل الشرطة تكرهني لأن شاوي البصل على آذانهم، هاي نقطة. نقطة ثانية، ستوكم عرفتوا عندكم بت أخت ومزوجة وجايين تدورولي هالكلاوات؟ نسيب ونعيل ونن هالسوالف؟ سمعوني زين، حتى لو جان بامكاني أساعد رجل أختكم النذل، هم ما راح أساعده. وبالنسبة لقضيته، فتحولت للمحكمة وانحكم، بعد لو تنكلب الدنيا محد يكدر يساعده. القضية طلعت من أدينه، فلتحاولون، لأن رجل أختكم لابسته القضية، لابسته.

خالد: يعني ماكو أمل أبد؟ فهد: أي، ماكو أمل. وهسه إذا ممكن تفاركوني، لأن عندي اجتماع. كامل: أحنا جداً نشكرك لأن انطيتنا من وقتك. فهد: هله. (أباوعلهم طلعوا) . شلون أشكال؟ بسم الله متنكال بوجهم. بس أريد أعرف هالبت المشعول اللي عندي عليمن طالعة تبرك. (أخذت سلاحي وطلعت رايح لمكتب الاجتماعات حتى أستلم القضية الجديدة) *** غنى: كاعدين أنا ونرجس وخالة إيمان، ودخلت علينه أنغام بايدها جهالها. إيمان: شبيج يمه؟

أنغام: هسه خالة. ولج نرجس، لحكيني بماي بسرعة. نرجس: هله هله، الواضح اكو أخبار دسمة. أوكفي خلي أجيب لك الماي، مو تحجين. غنى: طلعت نرجس تركض جابت ماي لأنغام اللي وجها صاير أحمر وتهفي بعز البرد. نرجس: أحجي، يله. أنغام: (شربت ماي وأخذت نفس) كاعدة. ولجن بتول. الكل: خير، شبيها؟ أنغام: تزوجت. الكل: يااا! أنغام: أي والله. غنى: شلون يعني تزوجت؟ وأنتي شمدريج؟

أنغام: مو تدرن بيها قبل فترة طويلة تطلقت وكربست براسي وكعدت عندي. ورا ما عافتكم يربجن، كمت أشوفها تتقرب لمنذر لو تلبس لي دشداشة جنها اتك، لو تلبس تراك يحدد ملابسها الداخلية، خبلتني. وهذا منذر الفاهي يدنك راسه ويغلس. تالي جزعت روحي من كمت أشوفها تخابر بنصاص الليالي. خفت لا تطلع جاي تحجي ويه منذر. فكمت أراقبها. وعينجن متشوفين الشفته. ولجن، مسوية لها علاقة ويه واحد متزوج عن طريق الفيس، ومدري شلون ضاحكة عليه ومخليه يتزوجها سر، ومحد يدري.

نرجس: عزة العزاها كون. وأكول ليش كالت لي بأخر فترة متكعد بالبيت؟ طلعت تروح لهذا. إيمان: الله يطيح حظها. ما صار لها حتى سنة من تطلقت راحت عرست. أنغام: ليش، أنتن متدرن؟ المثل هاي يفلفلن على الرجل، يكدرن يبقن بدون زواج؟ لا وجماله أحاجيها قبل شوية تكلي: "أنا ما مسوية شي حرام، عاقد عليّ سيد وما علنت زواجي منه سابقاً لأن ما جنه جاهزين". غنى: والله عدها قابلية. شلون تتقبل نفسها أكثر من رجال يدخل حياتها؟

ماشي، أنتي تطلقتي، حقج تشوفين حياتج، بس مو هيج. (أباوع لخالة إيمان لزمت زلوفها) إيمان: وحق ذني وكولن كالت إيمان: إذا ما طلكها الرجال، يستقتل على المرة، بس مو الرخيصة. وهاي من شافها باعت له روحه، هسه يشبع روحه بيها ويذبها مثل كريم. وهسه تشوفن. نرجس: لا والله خالة، تسمحيلي أغلطج. تره بوكتنه هن الساقطات اللي يحيرن شيسون، حظهن كاعد. الشريفة بهالوقت ماكلة تبن باثنين أيديها. غنى: الحمد لله. ليش ما كليت تبن؟

بالعكس، الله منعم علينه من خلانه راضيين مرضيين بحياتنا. عبالج المثل ذني يرتاحون؟ لا قابل، حلوة يعني كل يوم ويه رجل شكل؟ وين الحظ بالموضوع؟ بالعكس ذني يقهرن، لأن صارن سلع، يطيحن بأيد أي واحد يلعب بيهن وينذبن. أنغام: أي والله، لا عاب حلكج. بس الكاتلني أنا ذوله الزلم المطايه. من الله انطاك بيت ومرة وعائلة، تروح تخون؟ ليش؟ ويا ريت لو يتزوجون لهم وحدة عليها الاعتبار، على الأقل اسمها شريفة. لا، همه وين ماكو كح... يركضون.

إيمان: لا، مو الكل. غنى: ضلن يتناقشن بالسالفة، وأنا صفنت. عجيب، شلون النسوان يتقلبن، ينامن بحضن أكثر من رجل؟ يمه، أنا غير فهد ما أقبل ولا أريد، تلعب روحي من كل رجل غيره، وما أتقبل أتخيل نفسي ويه أي رجل غيره. بس ما أعرف هالنسوان شبيهن. تنهدت. الله يبعدنا. مر الوقت، راحت أنغام لأن طلعوا سعاد، وأجه فهد. ها حبيبي، الله يساعدك. فهد: دنكت أخذت شفايفها. هله يروحي. ها، شو كاعدة؟ غنى: نومت الجهال وانتظرت. شو تأخرت حبيبي؟

حتى دكيت عليك مجاوبت. فهد: نزعت قميصي. أي، جان عندي اجتماع، ما كدرت أجاوبج. غنى: جوعان؟ أكوم أصب لك غدة. فهد: لا حبيبي، لتتحركين، مو زين عليج. أنا تغديت بالمطعم ويه جماعتي واجيت. غنى: شعجب؟ فهد: نمت على رجلها. تردين الصراحة؟ كمت أستحي من مرة علي، خطية صارلها فترة شايلة البيت على راسها، وكل يوم أجي بي من الدوام هي تصب لي غدة وتسوي لي جاي وتسألني شمحتاج وشتريد. فشلة. ابتلت خوما ابتلت.

غنى: مسحت على شعره. إن شاء الله بس خلي يتحسن وضعي وأنا أرجع أكوم، خطية نرجس انشلع كلبها وياي. فهد: دخيلج، كعدي وسكتي. أنا مستعد أضل آكل من المطعم وأغسل هدومي بيدي، بس لتتحركين أنتِ وتروحين تتأذين. غنى: دنكت عليه، بست خدّه بقوة. أحبك. فهد: اوف، شكد مشتاقلج، بس ميصير أتقربلج اله وره الأربعين. يله نصبر ونكضيها مقبلات وأبو قاسم نرجع نصومه، قابل شعدنه؟ أكلج. غنى: ها. فهد: متنطيني بوسة من الحلك؟

غنى: ابتسمت، مخلية شفايفي على شفايفه. هستوني دابوسه وصرخوا الجهال. فهد: لا يا أولاد الكلب، يا أولاد النعال! كمت. شلوون يعني؟ منبوووس اليوم؟ غنى: أباوعلهم. من صاح بيهم؟ خنسوا. فهد: شو سكتوا؟ خاف زعلو؟ غنى: رفعت كتافي. ما أعرف، يمكن. (أباوع له كل عقله) دنك يبوس ويشبك بيهم ويتعذر. فهد: آسف باباتي، أشاقة وياكم، ميخالف بخاطركم، منبوس قابل شنو؟ البوس رب الصمت، أبو قاسم ما أصوم حلكي.

غنى: كاعد يتناقش ويسولف وياهم، وهمه ويا. ضحكت. هههه. فهد: عليمن تضحكين؟ غنى: منظركم تحفة، بصراحة. عود صدك تحجي كاعد تبرر لأطفال عمرهم ما صاير حتى شهر؟ شنو يفتهمون همه؟ فهد: لو عمرهم يوم هم ما أخليهم يضوجون مني، غنى. ما أريدهم يذكرون عليّ ولو موقف واحد مو حلو. أريدهم كلما يصفنون يكولون: "الله انطانا أبو والنعم منه". غنى: ابتسمت. تحبهم. فهد: شميتهم. أموت عليهم. ذولة كلبي. غنى: لعد وأنا؟

فهد: أنتي روحي، نفسي، عمري، حياتي، كياني، كل شي بيه. شتريدين بعد؟ غنى: ابتسمت. أنت اللي روحي وعمري وحياتي. بست إيده. أروحلك فدوة. فهد: شفتوا بابا؟ خو أمكم تتحارش، ومن أكوم أكسرها تكول: "أوي فهد، أكعد راحة". غنى: هههه. دكوم دكوم اسبح وارتاح. فهد: أي، كائم. غنى: أباوع له. أخذ ملابسه ودخل للحمام، سبح وطلع، فرش السجادة ووكف يصلي. كمل وكعد يسبح. فهد: صدك، ما كالتلي رجل خالتج انحكم خمس سنين. غنى: باوعت له. عود صدك؟

فهد: لعد أجذب عليج. غنى: ليش؟ فهد: غير لأن قتل طفل. انحكم عليه خمس سنين بتهمة القتل غير المتعمد تحت تأثير كحول. غنى: صفنت. دمرني وخلاني داخلة إنذار لسنة. والله دمر له خمس سنين. فهد: كمت كعدت يمها. شبيج حبيبي؟ غنى: حضنته، دافنة راسي برقَبته. تدري لو ممساعدني بذاك اليوم جان تدمرت. فهد: غمضت عيوني. بروح أبوك لتجيب طاري ذاك اليوم، لأن حيل أتنرفز من أتذكره وأعصابي تنتلف من يجي على بالي. ابتعدت. مباوع لها. شبيج؟

غنى: أموت عليك ياروحي وسندي. فهد: بست ركبته وعضيتها. الهيييي، اختباااارك صعببببب، صعببببب. غنى: عززه فهد، صوتك فضحتنا. فهد: شيخلص هالشهر. والله متت. أبو قاسم يبجي يريد مريته. غنى: (بخجل) هو شدمرنا غيره. فهد: منو هو؟ غنى: أبو قاسم، أبو العيشة. فهد: يااا، فهد، أحبه؟ شنو؟ كوم كوم. غنى: ليش، شبي يخبل. تذكرين من... فهد: قاطعته. عززه فهد، لتروح زايد. كوم مني، كوم. غنى: ضحكت. أم وجه الفاهي، عود تستحي وهي مخلفة.

فهد: للمرة الألف أكلك، أنت مزنجر، فلتعيب عليّ. غنى: تعالي، بس شو جهالنا لا فاهين ولا مزنجرين. فهد: أي، الحمد لله. ما طلعوا عليك. جنك بيذنجانة. غنى: عود صدك؟ فهد: جريته من تشيرته بخفة وبست شفايفه. ليش يصح لي يطلعون جهالي بهالجمال؟ وأكول لا؟ كتلك حتى لو مزنجر، أموووت عليك، وبعيني أحلى رجال خلقه الله، أنت. فهد: أويلي. الله. اوف. من أشلع هالشفة. هم واحد يكلي ليش؟ حضنتها بقوة، لأن ما أكدر أتقرب لها. ميجوز.

غنى: حضنته وأنا مبتسمة. *** علي: كاعد وطلعوا منذر وليلى يبجون. شكو، شبيكم؟ منذر: لك علي، أمي حتى حلكها متكدر تحركه، معووج ليم أذنها، وحجيها كله مكسر. أيديها معوجات. حتى الأطباء صفنوا. ماكو تفسير لحالتها غير الجلطة. معقولة الجلطة هيج تسوي؟ ليلى: (بدموع) روح شوف يا ملة سافلة وحقيرة، سحروهاااا ووصلوهااا لهالمرحله. الجلطة متسوي هيج. شوووف أمك لو مرت أخوك، أم الزلم، شمسويات لامي.

علي: أحترمي نفسج، لا أمسح بيج المستشفى. خاف عبالج إذا دكتور ما أسويها، تره مسقط وبايعةن كلهن. فلزمي حدج وديري بالج تجيبين طاري أمي على لسانج، ومرت فهد هم. ترحين فدوة لأخلاقها، ولو هو مو صوجج، صوج أمي اللي ما وكفت بوجهنه وكالت لترحون، وصوج مرت أخويه من ما تفلت بوجهج وطردتج من بيتها. بس هنه ميفتهم. ليلى: هذا حجي مرتتك مووو؟ منذر: كافيييي! أنتِ شنووو؟ متملين من المشاكل؟ أمسحها بوجهي، عليه. علي: أنت شعليك؟ وأمسحها بوجهك؟

يله حبيبي، أنا أروح لأن من دوامي كبل جيتك. والله هاي وكفتي لاجل عينك. وفهد هم لو عنده مجال يجيك بس عنده دوام. منذر: معذورين. والله ما أعرف شحجي. اللي من أمي وأبويه ذل أمي ووصلها لهالمرحله، وولد أبويه اللي هي مرت أبوهم وأذتهم، وبالأخص فهد، حرّك له معمله كله، وهم من احتجته وكف لي. ما أعرف أفرح لو أزعل على الجاي يصير.

علي: حضنته. إحنا إخوة، يا منذر، لتنسى هالشي. ولو تثالث الدنيا، محد يكدر يفرقنه. طبطبت على ظهره وابتعدت. طالع. الله لا يوفقج ياسعاد. حرام أدعي عليج، وأنتي بهالشدة، بس تستاهلين واحد يدعي عليج. دمرتينه وفركتي شملنه. شكول عليج. رجعت للبيت. طبيت البيت هدوء. جهال فهد نايمين، ماكو صوت. أباوع، طلعت نرجس. تلكتني. نرجس: ها لولي، شلونك؟ علي: هلوو حبيبتي. نرجس: تتغده؟ علي: أي والله جوعان. بس وين فهد؟

نرجس: رجع ونام، أعتقد لأن غرفة أمك هدوء. علي: ها، خوش. *** غنى: كعدنا العصر من النوم. كعدت فهد، وكام يتحارش بالجهال، يكعدهم. جزعهم لمن كعدوا، وهو كالعادة طاح لهم، تعضض لحد ما بجاهم ورجع بوسهم. وهمه الدبسززيه، شيسويلهم ويرجع يبوسهم، يسكتون شوية. واجه الكل كعد بالغرفة. وراحت نرجس جابت جاي وكعك، وكعدوا علي وفهد يسولفون على وضع سعاد. إيمان: زين، هم ليش ميحولونها على أخصائي؟

علي: أجه أخصائي شافها، وهو أصلاً الدكتور اللي سوى لها العملية اختصاص، بس ماكو فايدة. صارت خرده. نرجس: شنو يعني؟ علي: بعد متكدر تتحرك. ممكن حلكها يرجع بالعلاج، بس تكدر تمشي، مستحيل. اله معجزة من الله ياله. فهد: صدك، شو بتول ما اجت لهنا؟ تتبكبك وتريد واحد يساعدها كالعادة. إيمان: غير تزوجت. فهد: بهالسرعة؟ إيمان: أي، حتى أنا تفاجئت. فهد: يطبها هرش، شأسويلها؟ همزين عرست وفكت يايخه عنه.

غنى: ضلينه كاعدين للمغرب، وكلمن قام لمكان. مر اليوم. وصار على ولادتي ثلث أشهر. واليوم حنروح أنا وفهد وهمه للحلة نبقى كم يوم. طبعاً جهالي بهل الكم شهر نشنشو وصاروا يخبلون. الدنيا مكلوبة عليهم، لأن مدبدبين وبيض حمر وسوالفهم تخبل. هادئين إلى درجة. واكفة أباوع لهم. جنت ملبستهم تراكات سودة وبيها خط أبيض. طالعين يخبلون. فزيت على صوت فهد. درت وجهي عليه. فهد: يله، وين صرتي؟

غنى: كملت، بس خلي أكمطهم حتى أسيطر عليهم. جبت الكماطات، كمطتهم. انطيت مروان لفهد، وشلت جوان. نزلنه، لكينه خالة كاعدة. فهد: ما نويتي تجين؟ تعاي ويانه، غيري جو، شعدج بالبيت؟ غنى: أي والله خالة، تعاي ويانه. إيمان: مابيه حيل والله. روحو انتو تونسو، شعليكم بيه. فهد: شنو شعلينا؟ غير أنا كلت نروح سوا، تالي أنتِ بطلتي.

إيمان: ولك يمه، والله مو حمل طريق. أنا أتعب، وأختك عدها دوام، خوما أغيبها على حساب الطلعة. روحو انتو وتونسو، عبالك أنا وياكم. فهد: خلص، براحتج. غنى: تقدمت بوستها. يله، مع السلامة خالة. إيمان: الله وياكم، بعد كلبي. شو أبوس الحلوين؟ يمه يمه، شلون راح أفارقهم ثلث أيام؟ شلون أنام وحسهم ما سامعته؟

غنى: ابتسمت. أخذناهم وطلعنه. صعدتهم وره وثبتتهم بمثل الكاروك المتحرك، شد عليهم فهد الحزام وصعدنه، لأن ما أكدر ألزمهم ثنينهم وره، آمن لهم. فهد: ها، هسه تمام؟ نطلع؟ غنى: أي. طلع فهد وكل عقله شغل المسجل على "ماما جابت بيبي" على حساب الجهال. عفيه فهد، مخلصانة منها بالبيت، تطلعها الي هنا. فهد: غير جهالي يحبوها. أنتي شكو؟ سمعوا باباتي، ماعليكم بهاي. غنى: هزيت راسي. والله سوالفك. كضينة الطريق كله ماما جابت بيبي وفهد كل شوية

يدور وجهه عليه يصيح بصوت: "هااااا؟ " وهمه يسكرون من الضحك، بعد كلبي. وصلنه وره ساعتين، لأن فهد يسوق بهدوء على حسابهم. أباوع، وكف يم فندق. مو عدكم بستان؟ شعجب جبتنه للفندق؟ فهد: دخلت للكراج. حبيبي، بيت البستان كاعد بيه الفلاح الجديد وعائلته، وإذا رحنه لا أحنه ناخذ راحتنه ولا همه خطية. فكلت نبقى بفندق، وكل يوم أطلع افركم بالحلة وأخذكم للبستان هم. غنى: خوش، عاشت إيدك.

فهد: صفيت السيارة ونزلت. فتحت بيبان الره، نزلت الجنط والعربانات، خليتها بيها الجهال وانطيتها لغنى. قفلت السيارة وأخذت الجنط ودخلنه. غنى: أخذ فهد هوياتنه، ووكف يحجز السويت ويدفع. باوعت لبنات كاعدات ويباوعن للجهال. حجت وحدة: "ذولة توم؟ غنى: هزيت راسي. "بنات مو؟ غنى: ابتسمت. لا، ولد وبنية. "فدوه، يتشابهون، مامبين ولد وبنية." غنى: أباوع لهن. أجن يكرصن بخدودهم ويلزمن أيديهم، وهو صافنين عليهن مستغربين.

"هاي ليش هيج يباوعون؟ غنى: ابتسمت. مستغربين لأن ما شايفينجن سابقاً، هاي طبيعتهم. "يا فدوة، الله يخليهم." غنى: تسلمن حبيباتي، ويخليجن. فهد: يله غني. غنى: أي يله. من رخصتكم. دفعت عربانتهم ومشيت. صعدنه بالمصعد، صاعدين للطابق اللي حنكعد بيه. حبيبي، بأي طابق حجزت؟ فهد: بالطابق الثاني، هسه نوصل.

غنى: وصلنه للطابق الثاني. فتح فهد الغرفة المكتوب عليها نفس رقم المفتاح. دخلنه. أباوع، تشبه الشقة الصغيرة، حلوة، تخبل، تشبه مال العرسان، بيها مطبخ وصالة وغرفتين. فهد: عجبتج؟ غنى: فتحت حجابي. كلش حلوة. فهد: شفته بالانترنت وعجبني، أخذت الموقع وجبتكم، همزين عجبكم. (باوعت للجهال) شبيهم؟ شو خانسين؟

غنى: أكيد تعبانين من الطريق. هسه أردعهم وأنيمهم، بس خلي أبدي وأجي. دخلت للحمام، ذبيت مي على روحي ولبست تراك برموده، وطلعت أنشف بشعري. لكيت فهد مطلعهم ومحللهم. ها حبيبي، تسبح؟ فهد: أي، هسه بس طلعي لي ملابس. غنى: صار. رحت طلعت له تراك، عزلته على جهة، وأجيت يم الجهال. باوعت لروحي زين، أنا شلون حأرضعهم وأنا لابسة تيشيرت؟

نزعته وأخذتهم كعدت وخلتهم بحضني. اللهم صل على النبي. من كد ما مدبدبين، من أشيلهم أيدي تضل توجعني وكمت أخاف عليهم. رضعتهم وأمسح على ظهرهم بلكي ينامون. أباوع، طلع فهد لاف منشفة على خصره وينشف شعره. فهد: أباوعلها. أكلج. غنى: ها حبيبي؟ فهد: أنا جوعان. غنى: أي، مو جبنه غدة ويانه. هسه بس خلي أشبع الجهال وأكوم أحضر لك الغدة. فهد: (بهدوء) بس أنا أريد آكل مثل جهالي. حالي من حالهم. غنى. غنى: ها.

فهد: أنا جوعان وأريد مثل اللي يسووه جهالي. حالي من حالهم. غنى: (أحم) حبيبي، بس... فهد: تقربت وكفت كبالها، دنكت بايس شفايفها. يله كمليهم حتى يجي دوري. ما عندج حجة بعد. طابت عمليتج وطلع أربعينج وطلع. بست بصف شفتها. ها، شكلتي؟ غنى: (بخجل) ماشي، بس أكملهم. (رضعتهم ونيمتهم واجه هو بدون مقدمات، وطبعاً ما عافني لحد ما أخذ اللي يريده.) غنى: حبيبي، حيكعدون. كافي. فهد: مصيت ركبته. خلي يكعدون، طززز، هي هاي العايزة؟ بعدهم بطول.

(وأحسب لهم حساب) غنى: حضنت متونه. أنت متشبع؟ فهد: أخذت شفايفها بايسهن. ابتعدت. ساند راسي على راسها. لا، ما أشبع، ولتسألين هالسؤال بعد. بهالسالفة، أنا نفسي دنيه خوش. غنى: آاااه، مو هيج. ضربت صدره. زين تعرف روحك. فهد: ابتعدت عنها. نايم بصفها. خليتها بحضني. اوف، هسه ارتاحيت. غنى: كلبت جسمي، نايمة على إيده. بهدوء. عفيه، طاقة متخلص. فهد: ضحكت. مو بصالحج إذا خلصت طاقتي. وتعرفين ليش. ماكو حاجة ندخل بالقلم العريض.

غنى: ابتسمت. نايمة بحضنه. للعصر ياله كعدنه. صلينه وبدلنه وطلعنه نفتر بالحلة. كولش حلوة، تشبه بغداد. ثاني يوم رحنه زرنه الحمزة (عليه السلام) وزيد ابن علي (عليه السلام) . تغدينا هناك وزرنه وافترينه بالسواك مالتهم. وراها افترينه بمناطق الحلة، مولاتها، شوارعها، سوقها. كولش تونسنه بهالتلث أيام. رجعنه لبغداد، الضحكة على وجوهنه. حتى الجهال غيروا جو هناك. رجعنه لبغداد ورجعت حياتنه لطبيعتها. *** بعد مرور أسبوع

نرجس: كاعدة بغرفتي ودخلت عليّ أروى. لاهله ولا مرحبا، شعدج؟ أروى: أكلي تبن ولج، وعوفي العرك. نرجس: كعدت. شبيج ولج؟ أروى: ولج شاكة بروحي حامل. نرجس: حلفي. أروى: والله العظيم. الشهرية صارلها أسبوعين غايبة عني، وماردت أكول لسامر، وأامله. حجيت لملك وخليتها تجيب لي اختبارات حمل. نرجس: أي، وسويتي الاختبار؟ أروى: لا. نرجس: ضربت كصتي. لج ليييش يا ثولة؟ أروى: أخاف. نرجس: من شنو؟ يحظي؟ أروى: أخاف يطلع سلبي.

نرجس: دتعالي، خلي نروح يم غنى، لأن أخاف علي يدخل علينه فجأة، وفهد ماهو. هسه يله تعاي بسرعة. *** غنى: كاعدة ألعب مروان وجوان، واندكت الباب. كمت فتحتها، لكيت نرجس وأروى بوجهي. ابتسمت. يا أهلاً، تفضلن. شبيجن؟ نرجس: حجيت لها كل شي. غنى: أييي، بلكي الله تطلعين صدك حامل. نرجس: يله دخلي، سوي التحليل. أروى: أخاف والله. غنى: سمي بسم الله وروحي. دفعتها. يله لتخافين، حتى لو طلع سلبي. نرجس: ذني أربعة، ياهو أول واحد تجربيه؟

أروى: ملك كالت ذني مضبوطات، وأبد ميخطأن. راح آخذ واحد منهن. غنى: أي، يله. أباوع لها. أخذت واحد ودخلت للحمام. لزمت كلبي. يارب بجاه زكريا (عليه السلام) مثل ما رزقته الذرية، ترزق كل محروم. ضلت أروى جوه ربع ساعة. وسمعنه صوتها تصرخ. ركضنه للحمام. لكيناها تبجي. شبيج؟ أروى: خطين، خطين. التحليل إيجابيييي. انيييي حامل، حاااااامل!

غنى: حضناها وكمنه نكمز وياها، كد ما فرحانين. يمكن بحملي ما فرحت هيج. ابتعدنه، بوستها، وباركنا لها. نرجس: مبروك الوصخة، تكومين بالسلامة إن شاء الله. أروى: حقيرة، يبارك بيج يوم الج إن شاء الله. نرجس: باوعت للاختبارات. بنات، شنو رأيكم؟ أنا هم أجرب. غنى: شتجربين؟ نرجس: أحلل. شو عجبني الوضع والدراما اللي صارت. أخذت الثاني، راح أجرب. ما أبقيها بنفسي. أروى: تخبلتي. غنى: أي صدوك، شلون تسوين الاختبار وأنتي ما عندج أعراض حمل؟

نرجس: والله أجرب، ما أبقيها بنفسي. أخذته ودخلت للحمام. غنى: هههه، خبله مو صاحية والله. كل عقله دخلت سوته وطلعت. نرجس: ولجن، شو طلع خطين. أروى: شنو شنو؟ نرجس: أي والله، هاجن شوفن. غنى: أخذت الاختبار منهن. أي والله، ولج. نرجس: عود، يعني أنا حامل هسه؟ غنى: ما أعرف. هاج الثاني، روحي جربي، خلي نتأكد. أباوع لها. أخذته ودخلت مرة ثانية. سوته وطلعت. ها؟ نرجس: هم خطين. (باوعتلهم) عود صدك يعني؟

غنى: ضحكت. سبحانك، الهي سبحانك. حضنتها ونزلت دموعي. شكد سمعن حجي، تالي حبلن سوا. نرجس: أنا حامل، حامل. ههههه، يعني مو عاقر مثل ما تكول نسرين الغبرة. أروى: أي ولج أي. بس لحظة، أنتي حتى بهاي لحكتيني. غنى: هههه، لا أحلى شي تزوجتجن سوا وحبلتن سوا. (أباوع لهن يضحكن من كل كلبهن)

. بيومها كلنه للكل، وبدون مبالغة، البيت كله فرح، لأن ثنتينهن سوا حبلن. علي الدنيا ملامته، وسامر خطية من الفرحة حضن أروى كدام الكل ويضحك. صدك بيومها الابتسامة ما فاركت وجوهنه. ثاني يوم أجه منذر وفاجئنه من كال سعاد تريد فهد. هو تفاجئ. راح فهد ويه منذر. *** فهد: دخلت لبيت منذر. وينها؟ منذر: بهاي الغرفة، تعال. فهد: دخلت جوه، لكيتها متمددة. منظرها صدمني. لا إيد ولا رجل. إيدها معووجة وحلكها هم. تقربت كعدت كدامها. أردتيني؟

سعاد: (بصعوبة) منذر أطلع بره. منذر: ماشي. فهد: طلع منذر وبقينه أنا وياها. خير. سعاد: لي ليش مم ما اجيت زرت زرتني؟ فهد: كلامها بصعوبة ينفهم، ركزت وياها ياله فهمتها. وليش ترديني أزورج؟ شنو تغشمين روحج لو شنو؟ سعاد: فهد، ا ا ا أنا أخخ أخاف اامم أموت. أريد تبريلي الذمة وتس وتسامحني. فهد: ابتسمت. والله جريئة أنتِ. بعد كل اللي سويتي تردين أبريلي الذمة وأسامحج؟ كلي لي بله، على شنو ترديني أسامحج؟ على حرك المعمل؟

لو على أذيتج لأمي؟ لو... (كمت تقربت منها، دنكت عليها) همست. لو ترديني أسامحج على التعذيب اللي جنت أتعذبه بسببج؟ لو أسامحج على الليالي اللي نمتها بالبرد وأنا جوعان؟ لو أسامحج على الآثار اللي انطبعت بجسمي بسببج؟ لو أسامحج على تفرقتج اللي زرعتيها بيني وبين إخواني؟ لو ولو ولو؟ على شنو ترديني أسامحج؟ ويا موقف ترديني أبريلج الذمة بي؟

تذكرين من شفتيني مرة كاعد أسوي دفتر جنت ناوي أنطيه للمدرس مالتي، واجيتي أنتِ أخذتيه وحركتيه، وحركتي كلبي وياه؟ بعد ما جنت أشتغل لأسبوع. لا لا، خلي أذكرج بموقف ثاني. تذكرين من شفتيني آكل ورحتي كالتِ لأبويه، وبيومها أبويه عاقبني وحرمني من الأكل يوم كامل؟ بعد شنو؟ ذكريني، مواقفج هواي. سعاد: (بدموع) سس سامحني فهد. ا ا أنا ظلمتك و وا واذيتك هواي. ب بس والله متندمة. أتمنى منك تسامحني.

فهد: إذا كدرتي ترجعين لي طفولتي، وإذا شفتي الجروح اللي بجسمي، أسامحج. يله تكدرين؟ صحتي؟ أحجييييييي! سعاد: (لا رد) تبجي.

فهد: متكدرين، لأن هذا شي مو بإرادتج. وأنا هم ما أكدر أسامحج، لأن روحي رافضة هالشي. كلما أشوفج وأتذكر حياتي قبل، أكرهج بالزايد. وروحييي يا سعاد، ما مبرية الذمة، وعسى الله لا يرحمج وما مسامحج. أنا. ابتعدت وطلعت تحت صياحها وصياح منذر. اليوم أكدر أكول خذيت حقي 31 سنة من عمري. من شفتها ذليلة كدامي، ابتسمت. صدك الدنيا دوارة. *** بعد مرور سنة ونصف غنى: كاعدة بالإمام الكاظم (عليه السلام) . وجوان ومروان يلعبون كدامي.

حاجيتهم: "على كيفكم ماما، فدوه أروح لكم، لا توكعون". أباوع لهم. أجو ثنينهم. ها؟ جوان ومروان: بابي، بابي. غنى: ابتسمت. ديزور ماما. أشرت: "شوفوا هناك، راح يزور ويجينا". جوان حبيبتي، ليش هيج ملابسج؟

جنت ملبستهم ثنينهم أوفرات كابوي ويا تيشيرت أحمر. وهمه ثنينهم شعرهم طويل وأسود نازل على عيونهم. من مظهرهم يخبل. جد وبدون مبالغة، جهالي آية من الجمال. بس اللي حيموتني، خديداتهم ذني. جريتهم، أدغدع بيهم وأبوس. اوف اوف، عسل عسل. دبسززيه، يضحكون. أباوع، أجه فهد من بعيد يمشي. حبيبي، فدوه أروح لطوله. رغم مرت سنين على زواجنه، بس أبد محسيت بيها، عبالك البارحة تزوجنه. كَاموا جوان ومروان يركضون له. أباوع، شالهم واجه كعد. تقبل الله حبيبي.

فهد: منا ومنج يروحي. ها، صليتي؟ غنى: أي، صليت وزرت الجهال وطلعت كعدت هنا. مروان: بابي، عم. جوان: بابي، فدفد، عم عم. فهد: هههه. صار. أنعل لكم أبو العم عم. هسه نروح نتعشى، بس خلي نكعد شوية، خوش؟ مروان وجوان: خو. فهد: يله، بوسة، بوسة.

غنى: أباوع لهم شلون يبوسون بفهد. يموتون عليه. وهو مخبل بيهم. بحياتي ما شايفه أبو يحب جهاله لهالدرجة. والله مداريهم حتى أكثر مني. أباوع عليهم. والابتسامة مالية وجهي. أروح لهم فدوه. شكد أحبهم. أباوع، عافوا فهد وأجو باسوني. حضنتهم بعد كلبي. ابتعدت، أبوس بخدودهم الجنةن طماطات من الحمار. صدقة ماماتي، شنووو أنت؟ فهد: (بابتسامة) عوفيهم، خلي يلعبون. غنى: عفتهم، راحوا يلعبون. باوعت لفهد. شبيك؟ فهد: أنتِ ليش هالكد حلوة؟ غنى:

(بخجل) عيونك الحلوة. فهد: مو أحلى من عيونج. غنى: أحم. صليت؟ فهد: أي، صليت وقريت قرآن. اليوم جنت ناوي أصوم، بس عندي دوام والدنيا حارة، ما كدرت. غنى: أباوع له. سبحان الله، قبل كم سنة جنت أتوسل به يصوم، وهسه التزم بشكل مو طبيعي. صلاته بوكتها، ويصوم رجب وشعبان وياي، والقرآن ختمه فوك العشرين مرة. كل هذا كام يسوي من ذات نفسه. بس مع هذا، بقه على طبيعته، هم لسانه باذر، بس أحبه. فهد: شبيج تباوعين لي؟ شتريدين؟

غنى: تذكر قبل سنين شلون جنت تشلع كلبي على الصلاة والصوم. فهد: الحمد لله تغيرت، وبفضلج. (باوع لها) تدرين، أنا أشكر المستشفى، لأن خلتني ألتقي بيج لأول مرة. غنى: الكاظم. فهد: شنو؟ غنى: أول مرة التقينا بيها هي هنا بالكاظم. فهد: هاي شوكت؟ غنى: ابتسمت. تذكر من مرة جنت جاي لهنا واجيت تنطي فلوس لفقيرة، وكعن منك، واجت بنية انطتهن الك بالعلامة، جنت لابس زيتوني. فهد: صفنت، مسترجع ذاكرتي. "عفواً أخويه... هاي الفلوس وكعن منك."

غنى: ها، تذكرت. فهد: ابتسمت. أي، تدرين، ولا بالي. كل بالي أول مرة شفتج بيها بالمستشفى، تالي طلعت صدفتنه هنا. ويا محلاها من صدفه. تدرين، أعشق هاي الصدفه، وكل صدفه جمعتني بيج. غنى: وأنا أعشق النفس لو طلع منك. أنا مهووسة بتفاصيلك. فهد: لزمت إيدها. أحبج، لأن غيرتيني. تدرين، من يوم الشفتج وأنا ذنوبي على قيد الغفران. وأكبر دليل إنو ما جاي أشوف غير الراحة، وهاي علامة على إنو الله سامحني.

غنى: ابتسمنا. عيونه على جهالنه، إيده بإيده، وكلبي حاضن كلبه. جهالنه كدامنه. أجمل حياة ممكن أعيشها هي بحضن فهد، وجهالي. الله يحفظهم لي، وما يحرمني منهم. فهد، أحبك. فهد: أعشقك.

نترك فهد وغنى ونسد الباب. طالعين من حياتهم لهنا، وأكون ختمت وياكم رواية ذنوب على قيد الغفران. فهد، طفل عانى من التعذيب والتعنيف المستمر والمكثف بطفولته، وهالشي ولد منه إنسان عنيف، صعب، خارج عن السيطرة، إنسان خطاء، هرب من واقعه المرير لاجئ لكل أنواع المعاصي والمحرمات ليرضي نفسه. عانى هواي بحياته بمرحلة الطفولة، تبعتها مرحلة الشباب والمسؤولية. ولكن!

شاء الله أن يظهر في حياته إنسانة صافية ونقية حتى تغيره، تكون له صدر احتواء، ويكون لها سند. يعوضها عن كل اللي شافته. ومن يوم اللي دخلت هي لحياته، صارت ذنوبه على قيد الغفران. سبحان اللي يهدي من يشاء بغير حساب. أختم وياكم هالرواية بالعديد من القبل، تسبقها ذرات من الحزن لغيابي عنكم. أتمنى أكون بهالرواية خليت بصمة حلوة بقلبكم، وياريت لو كنت خفيفة الظل عليكم. أتمنالكم الفرح والسعادة والحب ورضا الله. واعتذر على كل شي بدر مني بقصد أو بغير قصد، واللي زعّلتِه منكم، خلي يسامحني. لو ضاج مني بتصرف خارج عن إدراكي، واللي يحبني، خلي يدعي لي. أحبكم.

أختكم براء.