رواية ذنوب على قيد الغفران الفصل السادس والثلاثون 36 - بقلم براء

فتح الباب وانصدمت، تبسمرت بمكاني. باوعت لغنى بسرعة. غنى: بصدمة... خالة إيمان! إيمان: دخلت جوه وسديت الباب. باوعتلها بهدوء. طبعاً كلشي توقعت. ابني وأدري بي واحد طايح حظه، ربه دينه النسوان وشهواته فوق كل شي. بس انتي... انتي يا غنى صدمتيني. واني الجنت أشوفج قدوة. أتمنى كل البنات يصيرن مثلج وأكول ياريت كلها تصير مثل أخلاقها وأدبها. تالي طلع هذا وجهج الحقيقي، تتختلين بالشقق وترتكبين محارم.

فهد: بتحذير. يمه لا يروح بالج لبعيد، وأنتي كل شي ما تدرين. تره أنتي فاهمة غلط، بس كعدي وأني أفهم. إيمان: قاطعته. إشششش ولا كلمة! أبو عين الصلفة، وهم إلك عين وتحجي؟ وبعدين شتريد تفهمني؟ ها؟ بنية حديثة (شابة) ويه رجال جبير بشقة وحدهم شيسوون مثلاً؟ يلعبون طاولي؟ لو شيسوون مثلاً؟ غنى: بدموع. خالة والله العظيم الموضوع مو مثل الي ابالج. إيمان: ولج يالمتخافين! بعدج هاطولج وتلعبين على الحبلين؟

ليش ولج تجيبين العار لأهلج وهمه بكبرهم؟ ليش ولج ما فكررررتيييي؟ لا يطلع ابني ابن كلب ويتونس ويااااج وتالي يعوفج. ما خفتي لا يوسوسلكم ابليس وتسوي مكسورة وتحبلييين وتالي يشمرج بالشارع؟ ولج هذا رجال وميتعيب اله انتيييي يغبررره. منو ياخذج بعددد؟ ما ابنييي حار شلعب بيج. فهد: بعصبية. ياديييييين محمد! لتضلين تفسرين من كيفج. العلاقة البيني وبين غنى مابيها ذرة حرام. بس أنتِ غير تنطيني مجااااال أصخخخخم وأحجي.

إيمان: شلون مابيناتكم حرام؟ جا شتفسر وجودها وياك بنفس الشقة؟ حلال لو لبسها هذا كدامك حلال؟ احجي. فهد: تنهدت ماسح على وجهي. أي يمه حلال. لأن غنى مرتييييي. إيمان: شنو شنو ولك؟ شنو مرتك؟ احجيييي. شلون صارت مرتك ولك لتخبلنييييي. غضب الله عليك. فهد: يمه أني وغنى صارلنه أشهر مزوجين ووجودها ويايه هسه مابي كل حرام. لأن عاقد عليها سيد يعني شرعاً هي مرتي. إيمان: لطمت على وجهي. صخام الصخمج ايمان! ولك غلطت وياها مو حبلت منك؟

مووو؟ احجيييي. حبلت منك وتزوجتهاااا حتى تستر الفضيحة؟ مووو؟ عزة العزاج ايمان. شكل للعالم؟ وين أودي وجهي؟ ياكبرها عد الله. فهد: لزمت ايدها بسرعة لأن كامت تملخ وجها. أهدي يمه شبيييج؟ انطيني مجال واني أفهمج. أني وغنى مابيناتنه أي شي والله ماعندي وياها كل علاقة وحتى ما متقربلها. إيمان: ولك لتخبلنيييي! ستوك تكول مرتك وهسه ماعندك شي وياهااااا؟ شنووو؟ ماخذينيييي على كد عقلييييي؟ أنتو شلون متزوجها وشلون ماعندك شي وياها؟

غنى: خالة بس افهمي السالفة. انطي مجال لفهد يفهمج. والله مابيناتنه شي من الي ابالج. إيمان: أنتي بالذااات صوتج ما أسمعه! ولج حقيرة! رحتي بعتي روحج و خليتي رجال شكبره شكده ينام ويااااج على حساب الفلوس؟ يا ادبسززز! واني عبالي البينكم علاقة عابرة. تالي طلعت السالفة بيها زواج وأكبر من مجرد علاقة. مو مثل ما وصلني. فهد: لحظة لحظة. صدك أنتِ شدراج بكل هذا؟ ومكان العمارة شمدريج بي؟

إيمان: فاعل خير. الله يخلي. كلي استلاحكي ابنج جاي يلعب بالنار وجاي ينضحك على عقله. مسوي زوج ويسحبون فلوس براسه. لو شتكولين غنى؟ غنى: شنو قصدج؟ إيمان: قصدي واضح ياشريفه. صدك لا كالو جيبلك حيه ولا تجيبلك فكريه. فهد: شهالحجي هذااا يمه لتضلين تذبين حجي وأنتي كلشي ما فاهمه من السالفة. احجيلي منو خرطلج السالفة من ...... وجايتني حاميه؟ غنى: أسأل الكح.... مالتك شوف كدامن حاجيه وتريد تلبسك بيها.

غنى: باوعت لفهد بدموع. لا والله العظيم. لادزيت أحد ولا حجيت. الله شاهد. هاي منو كلج؟ أقسم يالله معندي شي ويه فهد. فهد: لحظة لحظة صبر. يمه منين جايه هالحجي أنتِ وشنو تلبسني بيها؟ شهالخريط هذا. إيمان: كتلك فاعل خير. واجه كلي. بالبداية ما صدكت. وخشيت بعينهم. تالي دلوني لهنا واجيت. جان أنصدم. طلعت البين ابني وصديقة بتي علاقة مرة ورجال!

لا واني الأجيت لهنا بكل ثقة لأن أدري ابني ميسويها. تالي أنصدمت بابني الي تعبت وضيعت عمري أربي بي. تطلع من هالسوايه. وصدمتي الكبيرة بيج أنتِ يا غنى. شكد جنت أحترمج وأعزج. وحدة من بناتي. بس هسه نزلت من عيني وصرتي جوه رجلي.

غنى: والله العظيم وروح أخويه الماعندي أعز منه. معندي شي ويه فهد. واصلاً ما أعرف شنو واصلج بالضبط. بس صدقيني كل البيناتنه أني وفهد هي علاقة حبر على ورق. ونتعامل حالنه حال الأخوان. وحتى جيتي ويه فهد اليوم حتى ننفصل. والله العظيم يا خالة أني مو مثل البالج. وداعة أخويه المرحوم الي مستحيل أحلف بي جذب. إيمان: تنفصلون؟!!! فهد: أي. جنه ناوين ننهي كل شي لوما جيتي أنتي.

إيمان: لزمت راسي. ولكم راسي راح ينفجر. ساعة تكولون مابيناتنه شي وساعة تكولون متزوجين وساعة راح تنفصلون. شهالتناقض هذا؟ ولكم عاد جذبو لكم جذبة عدلة حتى أصدكهاااا. مو كل ساعة الكم حجاية. فهد: بعيداً عن الموضوع والسالفة الي جابتج لهنا والي راح نتحاسب عليها بعدين. تعاي كعدي وأني أفهمج السالفة من البداية وأنتي حكمي.

إيمان: وهاي أثبرت. كعدت. غردلي يا سالم. هو الله خذا وزرع غيره. من أمه حظي الطايح حظه. لا من الرجل ولا من البزر. فهد: أباوع لغنى واكفة على جهة وتبجي. غنى تعاي كعدي ولتخافين. محلولة السالفة وأمي هسه عصبية لأن ما فاهمه السالفة. هسه من أحجيلها تبرد. إيمان: عوفها عساها لاسكتت. أم البلاوي. ساس الطلايب هي الكح.... أم الزلم. ولج عمري وحياتي لا فشرت ولا غلطت ولا طلعت مني العيبة. تالي تجين أنتِ تخليني أنزل لهالمستوى؟

يمن الله لا يوفقج. وعساج تلحكين أهلج يسايبة. غنى: ما أكدر أنطق حرف واحد. أحس لساني أربط. ياربي منين طلعتلي هالسالفة؟ شكول عليكم يالي ببالي؟ الله لا يوفقكم. وصلتوني لهالمواصيل. الله لا يوفقج ياسعاد. كل الي ديصير بيه من وراج. فهد: يمه لخاطر محمد لتحجين هيج وياها. إيمان: دافعلها ليش متدافعلها؟ قابل بيش حقه؟ أمك البركة بالتنام وياك. فهد: ممكن تنطيني مجال أحجي شويه حتى آكل تبن عدل؟

إيمان: لطمت على حلكي. وهاي سكتنه. يله آكل تبن. فهد: بديت أحجيلها لامي الصار من البداية لحد ما تزوجت غنى. بالمختصر سولفتلها كل شي. أباوع لوجها ماكو أي تعبير. إيمان: بس أسألك سؤال. أنت من شوكت صرت مصلح اجتماعي وتساعد الناس؟ فهد: يمه كل عقليج تحجين؟ بنية غريبة ماكو كل صلة بيني وبينها. شلون ترديني أبقيها عدي؟

وحتى لو لنفرض مخليها عندي، الي حق أحجي وأفتح حلكي لو أهلها رادوها. بس انجبرت أعقد عليها حتى تصير تحت مسؤوليتي حتى محد يدنالها. وأنتظرت فترة لحد ما ترجع خالتها وكل شي ينتهي. إيمان: وأنت إذا هيج حنين ما كتلي. واني أساعدك. على الأقل يكون عندي علم. أو أني وخواتك نساعدها وأنت تضل بعيد عن السالفة. فهد: إذا أكلج وأكل لخواتي المن ضام السالفة؟

بعد خو أسوي نشره ضوئية وأخلص. كتلج ماردت أحد يدري. زواجنه صار لسبب وهو خوفاً عليها من أهلها. ومن رجعت خالتها كل شي انتهى. ولو متأخره ساعة. جان هسه كل شي منتهي. إيمان: وأني المفروض أصدك هالفلم الهندي هذا وأصفكلكم وأسد الموضوع. غنى: خالة والله كل الي كاله فهد هو الصار. وماكو شي بيناتنه. ولو اكو شي بيناتنه تتوقعين نتطلك؟ إيمان: وإذا ماكو شي بيناتكم تلبسيله وتتعدليله؟ لا وتطلعين وياا للشقة؟

لج هاي السوالف أمشيها على وحدة غبرة عوبة مو بت شيوخ وشبعت طن تجاري من الدنيا. غنى: بدموع. شمتعدلتله يا خالة؟ والله العظيم اجيت بهدوم البيت. بس ردت أعرف شتريد لأن ما قبل يحجيلي اله نجي لهنا. وهذا كدامج وسألي.

فهد: مسحت على وجهي. يمه كلامها كله صحيح. ما كدرت أحاجيها بهيج موضوع بالموبايل. وردت من أ فاتحها بالموضوع ننهي الموضوع بنفس اليوم. بس حاولي تفهمين كلامي. وقبل كل شي. بس أسألج سؤال. منو كلج على كل هذا وسالج سيناريو معدل؟ إيمان: أسألج سؤال. منو يدري بعلاقتكم؟ فهد: كلبت عيوني. يمه مابيناتنه علاقة. بس ميخالف أسايرج. محد يدري بس أني وغنى. إيمان: عفية أنت كلتها. محد يعرف بالسالفة غيرك وغير هاي.

فهد: يمه خلاصاً للحجي. المن تردين توصلين بهذا كلامج؟ إيمان: أني أعرفك ذكي. ومن يومك تلكطها على الطايرة. موضوع علاقتكم محد يدري غيرك وغيرها. وأنت تكول أني ما حاجي لاحد. إذاً منو المطلع السالفة ورايح مسولف كدام العصفورة؟ غير الشفيه. فهد: باستنكار. غنى مستحيل تسويها. أشگ بروحي وما أشگ بيها. صدك تحجين أنتِ؟ إيمان: ليش مستحيل تسويها؟

إجتها السالفة على طبق من ذهب. فلوس وسلطة ورتبة وشكل وسمعة. هاي من غير الشغلات الثانوية. تتوقع هي غبية حتى تضيع هيج فرصة؟ وأبسط مثال سلمتك نفسها وهي بعدها بنية وبالباكيت. منو تسوي هيج غير بس الراسمة لبعيد. فهد: بعصبية. ودييييين الكحا...... ما مسلمتني شي! وشرف كل كح..... ماعدها شرف ما طاخها! احجيلي من الكوا... الموصلج الحجي واني أعرف شلون ان.... الجابه وأخلي يتندم على هالحجي.

إيمان: ما أكدر أكول ومو مهم منو كلي. أني محلفة ما أحجي. الله ينطي لو ما كايلي جان بقيت على عمى عيوني لحد ما يصير عندك طفل منها واني ما أدري. على الأقل دريت حتى استلاحك الوضع. مرتك. فهد: جاي أكلللللج ماكو أي زواج فعليييي بيناتنه. ليش متصدكين يايمه؟ إيمان: بعصبية. بعد سوايتك ما أصدك بيك. منا لهنا وهذا فلمكم الهندي. نكعو وشربو ميته. فتهموووو.

فهد: ماشي. خليج على موقفج. أني رايح أجيب الشيخ وأجي. وعلى فكرة. أني ما مضطر أبرر لاحد. لأن هاي حياتي واني حر بيها. إيمان: تصرفاتك من تقتصر عليك أنت بس ساعتها أكول أنت حر. بس من تجيب لك وحدة وتلعب وياها شاطي باطي وبالحرام؟ لا حبيبي أدخل وأطيح حظ كلمن يعترض. فتهتمت. وبالنسبة لسالفة الشيخ تتكنسل وطلاق ماكو. فهد: شلون يعني طلاق ماكو؟ ممكن توضحيلي؟

إيمان: طلاق متطلقها أنت. مو غلطت وياها. إذاً تتحمل نتيجة غلطك وتزوجها علني هم. مادام هي هم مادام سلمتك نفسها يعني تريدك. فخلي زواجكم يصير علني ودائمي. خلاصاً للفضايح والمشاكل. أنت عندك خوات خاف الله. فهد: أستغفر الله. يمه جاي أحجي هندي أني. أكلج ماكو كل علاقة بيناتنه ونريد ننفصل. شنو نزوج دائمي شنو بطيخ؟ إيمان: أني مامستعدة أنتظر جنابك أكثر. أنت مو تزوجت على مرامك؟

خلص بعد مالك حق تحجي. تزوجها كدام العالم وأسمك متزوج. حتى لو نايم وياها تحمل مشكلتك هاي مو مشكلتي. غنى: مسحت دموعي. شو أنتوا تقررون بكيفكم؟ أني مستحيل أقبل. شنو زواج دائمي؟ شنو يتحمل نتيجة غلطه؟

داكلج ماكو أي علاقة بيني وبينه. ومن سابع المستحيلات تكون اكو علاقة بيناتنه. وأني ما أقبل بهذا الزواج. وهسه فهد يروح يجيب الشيخ وننفصل أني وياا وكلمن يروح لحال سبيله. وحتى من المنطقة أشيل وما أريد أشوفكم بعد. بس فكوني من هالمشاكل. إيمان: أني ما جاي آخذ إذنك. أني جاي أكولج طلاق ماكو. أنت مو تزوجتو متعة مدري شتسمو انتو وخليتي يلعب بيج. تحملي نتيجة أخطائج. وسوالف الثكل هاي بطليها وظهري على حقيقتج أحسن.

فهد: يمه كلامج هذا من المستحيل يتنفذ. لا أني أريد غنى كزوجه ولا هي تريدني. وأني مستحيل أخطو هيج خطوة وأتزوج وحدة ما أريدها. لا وعلني هم. إيمان: إذا ما علنت زواجك اعتبرني متبرية منك وليوم الدين. وأحسبني غضبانه عليك لحد ما أموت. ووصيتي بفاتحتي متوكف يا فهد.

غنى: لبست صايتي بسرعة هي وحجابي. أني أكول خلي ننهي هالمهزلة. فهد أنت طلكني يم السيد. ولا أريد أشوف أحد ولا أتواصل ويه أحد. لهنا ووصلت حدها مال أمك تطعن بشرفي. والي مابقالي غيره. لا هنا أفكس عينه اليدنالي. عن إذنكم. أخذت جنطتي وأجيت أطلع. بس وكفني صوتها.

إيمان: أقسم بالله ياغنى لو خطت رجلج باب الشقة اعتبري السالفة واصلة لأهلج. والله العظيم أروح هسه لخالتج وكل شي أحجيلها وأوصل الحجي لخالتج. وأني متأكدة السالفة تروح تحطها بحلك عمامج والسالفة سالفة شرف. والله اخليج تعضين أصابعج ندم لو فكرتي تلعبين بذيلج وياي. كمت وكفت كدامها. شوفي خلي أكلج شغلة. صحيح أني حبابة وكافية خيري شري. بس الي يدوسلي على طرف واليستغبيني أراوي وجه بحياتة ماشايفه. فسمعي كلامي وامشي عدل أحسلج.

فهد: لا إله إلا الله. يمه السالفة البالج لو يطلع جدي من الكبر ما أسويها. أنتِ بكلامج هذا جاي تكولين راح تدمرين حياتكم. إيمان: محد كلكم تنامون سوه بالحرام. أني مامستعدة أتحمل عقاب من ربي من وراكم لأن دريت وسكتت. رجعت باوعت لغنى. لزمت وجها وهمست. خليج ذكية واسمعي كلامي حتى تحافظين على سمعتج. لأن زواجج من فهد فرصة. وأنتي مو غبية حتى تضيعين هيج فرصة. غنى: بدموع. حرام عليج الي دتسوي.

إيمان: حرمت عليج عيشتج أصلاً. أنتِ بالذات مالج حق تحجين بالحرام. وأنتي وحدة زانية بايعه روحها على حساب فلس فلسين. باوعت لفهد. باجر العصر أروح لخالتها وأطلبها الك رسمي. وأنتي راح توافقين. وبعدها نمشي بإجراءات العرس. وكأن شيئاً لم يكن. ومن تلتحق تروح تاخذ إجازة حتى نسوي العرس ونطمطم السالفة. غنى: رحت يم فهد. الله يخليك فهد حاجيها. أني ما أريدك يا اخييي. حلوو عني لخاطر الله. كولشي ما أريد منكم. بس عوفوني بحالي.

إيمان: طلعت القران من جنطتي. وحق كلام الله. يافهد إذا رفضت اعتبر نفسك متت بالنسبة إلي. وحق الحق. أخذ هدومي وأطلع من البيت وما أراويك وجهي طول العمر. أقسم بعزة جلالة الله. وأنتي يا غنى. أفضحج فضيحة وأخلي سيرتج على كل لسان. لو فكرتي ترفضين. غنى: باوعت لفهد الي علامات الحيرة بانت على وجهه بسبب كلام أمه. وعرفته راح يخضع للأمر الواقع. سعاد: كافي كعدي دوختينه.

بتول: آكل بأظافري خاله خايفه لا تحجي خاله إيمان لفهد وفهد يطيح حظي. فيصل: أنتي شكتيلها قبل يومين؟ بتول: رحتلها للغرفة كتلها خاله عندي موضوع وياج. وحجيتلها الي كتلج عليه. كتلها غنى عدها علاقة ويه فهد وجاي تستغله وتسحب منه فلوس. وكتلها شايفتهم بعيني أكثر من مرة بوضع محرج. وهم سمعت فهد يتفق وياها حتى تروح وياا للشقة. وهاي مو أول مرة يرحون للشقق. وهي شبه مسلمته نفسها. واني من خوفي على سمعتكم اجيت كتلج. سعاد: وشنو كملت؟

بتول: وحلفتها متجيب طاري لاي أحد. بالبداية هي ماصدكتني وضلت تصيح عليه وكالت مستحيل فهد يسويها وغنى خوش بنية ومتطلع منها هالسوالف. كتلها مثل ما وصاني فيصل تنتظر لحد ما أجيبيلها دليل. وانتظرت لحد ما فيصل خبرني اليوم الصبح وكلي خلي إيمان تروح لهالعنوان وللشقة الفلانية. ورحت بلغتـها بحجة سمعت فهد يدليها على العنوان. وهاي أني نفذت كل الي كالتولي عليه.

سعاد: عفيه عليج. هو هذا الأريده. وهسه هي وصلت للشقة أكيد. ولزمتهم بالجرم المشهود. وأني متأكدة بعد ماشافت غنى ويه فهد من سابع المستحيلات حتى تفكر تخطبها اله. وهذا الأريده. أريدها تنزل من عينها حتى تنزاح من طريقنه بعد. عليه غنى تخطيط وتعب سنين تالي تجي تاخذه الخدامة هاي. بتول: زين وبعدين شراح يصير؟ فيصل: الباقي عليجن. أني العليه سويته بلغتجن وانطيتجن كل شي أعرفه. والباقي يمجن.

سعاد: صدك ولك تعال. أنت شمدريك بكل هالتفاصيل؟

فيصل: بيوم الي جنه عد بيت جدي واجت هاي غنى حتى تخيط للحجية. بيومها جنت طالع بره أخابر وشفتها طلعت هي وفهد من بيت جدي. وضلو يمشون بس وضعهم ما عجبني. لأن فهد جان متنرفز وشكله مدري شلون. المهم خليت علامة عليهم وما شلتهم من بالي. وبعدها من اجتنه مرة ثانية شفتها طلعت من الفرع الثاني وصعدت ويه فهد والابتسامة شاكة حلوكهم ثنينهم. ولسوء حظهم أنا شفتهم. ومن يومها كمت أراقب غنى بدون متنتبه عليه. بتول: وشمعنى غنى مو فهد؟

فيصل: مو أني غبي حتى أراقب فهد. وحق ربج يلزمـني بلحظتها ويحير شيسوي بيه. اللعب ويه فهد صعب. فالتجئت لغنى أحسن. دليت مكان سكنها وكمت أشوف فهد يتردد لها. سألت البواب وكلي هو وزوجته كاعدين بالطابق الرابع الشقة... وبديت أخطط من يومها حتى أكشفها. حتى على الموبايل خابرتها وحظرتني. سعاد: منين جبت رقمها؟ فيصل: من موبايل أروى. منين يعني؟ المهم. وهذا الي صار. ومن سولفتلي انتن قبل يومين. كملت العندي وصار الي صار.

بتول: عززه فيصل أنت تخوف. فيصل: لتنسين أني وفهد أخوان وتابعين لنفس الأبو. سالم. أكبر ماكر بهالدنيا. الثعلب ميوصل لمكره. وهالجينات ماراحت بس لفهد لا وصلني منها شويه. بتول: وأنت شنو تستفاد من كل هذا؟ لابد أني أستفاد. لأن غنى حجارة تعيق زواجي من فهد. اله أنت بشنو تأثر عليك غنى؟

فيصل: خلي أكلها الج من الأخير. تره فهد يحبها ويخاف عليها. ولو تعوفي فتره بعد وياها يتزوجها. وأني متأكد من هالشي. لأن أنتِ ماشايفته من يباوع لها شلون عيونه تلمع. وهالنظرات بحياتي ماشفتها بعيون فهد غير من ظهرت غنى. وأني ما أريد فهد يتهنى بحياته. أملاك وفلوس ورتبة ومكانة مرموقة بالمجتمع. لا وأنوب ياخذ اليتمناها كلبه. هذا مو عدل ومستحيل أخلي يتهنى. إضافه إنو وجود هاي بحياته يضرب مصالحي. لتنسين أنتِ لو تزوجتي فهد إحنه أول المستفادين.

بتول: شلون يعني؟ ما فهمت قصدك. سعاد: خزرته. ههه ماعليج بي حبيبتي. أكلج توته أنتِ ماتعبتي روحي. أرتاحي بغرفتج وبعدين نتناقش بخصوص هالموضوع. يله حبيبتي روحي. السالفة وانتهت وتلكين إيمان فضت كل شي وطاحت حظ هالسايبة. بتول: أي يله. من رخصتكم. سعاد: براحتج. يمه... باوعتله. لك أنت غبي شلون تجفص هيج جفصة كدامها؟ فيصل: ما انتبهت. شبيج يمه؟

سعاد: تنهدت. أكلك بصراحة. أني خايفه من أخوك. لو دره ذاك اليوم ذبني بالشارع. هالمرة شيسوي؟ يمكن يشنقني. فيصل: لتخافين. لعد أني ليش خليت بتول تحجي حتى تصير هي بوجه المدفع. وأحنه ماعلينه لامن شاف ولامن دره. وبالأول وبالتالي هي ماعدها دليل علينه. سعاد: لتنسى تره هاي بت أختي وأحبها. وما أقبل عليها.

فيصل: يمه كلنه ندري أنتِ ما تحبين غير بس مصلحتج. وكل شي يضرب مصالحج تنهي. حتى لو كان ابن بطنج. فعن الحنية الزايدة رجاءاً. والله يخليج. يله من رخصتج. عفتها وطلعت. فهد: وكفت السيارة. إيمان: يله نزلي. ومثل ما اتفقت وياج سوي. روحج كل شي متدرين. ولتبينين شي لخالتج. وإن شاء الله باجر العصر أني والحجية والبنات يمكم. وأنت فهد أمشينه لبيت جدك.

غنى: هزيت راسي. نازلة وأحس الدنيا طالعة من عيني. هي هاي تاليتي أنذل هالذلة وأتزوج واحد لايريدني ولا حتى يباوع بوجهي. لا والمفروض عليه أنجب وأوافق. وإلا تدمر سمعتي وأصير على كل لسان. بعد يادنيا شنو الماسويتي بيه؟ دكيت الباب. طلعتلي خالتي. فتت جوه. سحر: وعليكم السلام. خير شبيج وجهج مكلوب. وحتى ما تأخرتي. غنى: بهدوء. تخربط هناك خاله وكلت أرجع. سحر: لزمتها. سودة عليه. ليش؟ خاف ضايقج شي هناك؟ خوما كلبج يوجعج؟ أحجي ولج.

غنى: كعدت بالطرمة ودموعي تنزل. تعبت خاله تعبت والله بعد ما أتحمل. سحر: حضنتها. شبيج حبيبتي؟ شنو المتعبج؟ اكو شي يوجعج؟ أحجي. غنى: آآآآه. كولشي يوجعني خاله. والوجع الأكبر بروحي. أحس روحي تنزف من جوه. لزمت ركبتي. أحس واحد خانكني منا. نفس ما أكدر أتنفس. أريد أموت وأخلص. روحي دتطلع على البطيء خاله.

سحر: سمِ بسم الله. وصلِ على محمد. هاي حالة نفسية يمكن. لأن جاي تنامين المغرب. وإضافة لضغوط الدراسة عليج. أكيد تتعب نفسيتج. مسحت على راسها. خلص يا عمري تنفسي بعمق. لتغيبين عن الوعي. راعي وضعج يا أمي. يله سوي الكتلج عليه. غنى: أخذت نفس بعمق أحاول أهدئ بس ما أكدر. سحر: بيج حيل تكومين؟ غنى: هزيت راسي. وكمت على كيفي. طبيت جوه. سحر: وين رايحة؟

تعاي عمج راح يجيب برتقال ويجي. خليج كاعدة. خلي أسويلج عصير بلكي تهدئ أعصابج شويه. غنى: نزعت شالي. كولشي ما أريد. أريد أنام. لتكعديني أبد. سحر: صليتي؟ غنى: هزيت راسي نافيه. هسه أصلي. صعدت لغرفتي. ذبيت ملابسي ودخلت للحمام حتى أتوضأ. لكيت الشهرية جايتني. تنهدت. حتى موعدها نسيته. سويت اللازم وطلعت. تغطيت ونمت. منتظرة المجهول. إيمان: أكول حجيه. مادام كلكم كاعدين. حبيت أبلغكم أني نويت أخطب لفهد.

فهد: جنت أكلب بالموبايل ووكفت. شلت راسي. عود صدك تحجي؟ سوتها صدك. ياسمين: ياا! صدك تحجين؟ كلللووووش! وجان تنفك عقدتك وتريد تعرس. يوم المنى. جان هذا فهيدان. مهدي: والله عاشت إيدك على هالقرار. كافي بعد كبرت. وصار لازم تكون حياتك الخاصة. ياسمين: ومنو ناويه تخطبيله؟ إيمان: غنى. محسن: غصيت بالجاي. منو منو؟ إيمان: غنى. جوارينه. عاجبتني وأريدها لفهد. وفهد هم عاجبته وموافق. مو فهد؟

فهد: ضغطت على ايدي حتى يبين بياضها. هزيت راسي. علا: بهدوء. بس خاله مو علساس عمتي نسرين جانت ناو... ياسمين: قاطعتها. والله عاشت إيدج يا زين ما اخترتي. خوش بنية حبابة وحلوة وخلوقة. شيريد الواحد من الله بعد؟ إيمان: كتيلي خلوقة؟ أي حقج. محسن: أكول حارث شعجب فهد قبل بهاي. وهو يدري عدها علاقة ويه مرتضى وتريده؟ حارث: مرتضى جذاب. البنية كلشي ماعدها وياه. والحجي كله تلفيق. محسن: صدك تحجي؟ حارث: اسكت. بعدين أفهمك السالفة.

عباس: عمي فهد شو ساكت؟ فهد: بهدوء. الوالدة جاي تحجي. ومادامها قررت. خلص بعد صار الوكت حتى أتزوج وأستقر. مهدي: أحسن قرار وليدي. علا: لعد فهد أنت مو تعيب عليها وتكول فاهية وتوگف على الكلب؟ شلون تخطبها؟ ياسمين: خايبه متسكتين؟ غير هي جنها جماره. شتوگف على الكلب؟ بس هذا ابن عمج جان مغمض وستوه صحصح. إيمان: عوفج من هالحجي حجيه. أني اجيت أبلغكم. وماردت أتصرف من كيفي. لأن أنتو أهله. ومهما يكن لازم تدرون.

عباس: خويه الي يناسبج سوي. أحسن خطوة خطيتيها هسه أنو تخطبين لفهد. ياسمين: أي والله. إيمان: حجيه ان شاء الله باجر نروح أني وياج ونسرين وام حارث وام محسن. نخطبها من خالتها. وحتى من يردولنه خبر نباشر. حياة: ليش مستعجلة هالكد؟ إيمان: أريد أمشي بكل شي بسرعة. ما أريد أماطل بالسالفة. حارث: والله عاشت إيدج خاله. استعجلي بكل شي. خوما مثلي صارلي سنتين أنتظر. ولسه كاعد وساكت أنتظر الأفنديه تكمل جهازها.

محسن: طبعاً يزيدك شرف وغصباً عنك تنتظر. غير راح تاخذ أحسن البنات. حارث: بله آكل تبن ولتحمه علينه. تره صيف. عباس: شبيك عمي فهد؟ شو أحسك مو على بعضك صاير شي. فهد: بهدوء. لا متوهم. بس تعبان شويه. كمت. يله يمه أمشينه. إيمان: أي يله. ياسمين: بعد وكت. حتى جايكم ما شربتو. إيمان: الجايات هواي إن شاء الله. مو تنسون باجر كون انتو يمي الساعة بالاربعه. النسوان: ان شاء الله.

فهد: طلعت أني وأمي. والدنيا كامزة من عيني. بس ما أكدر أحجي. من البداية ردت أنفصل عن غنى حتى ما أسبب لها مشاكل. خاصة من خابرتني فرح. كمت أحس غنى راح تگع بمشاكل بسببي. ففضلت أنو تنفصل. لأن ما أريد شي يصيبها نهائياً. وهسه هالسالفة طلعتلي صفح. أني ويني وين الزواج وهالصخام؟ غير هيج غنى ما أشوفها غير أخت وصديقة. ما أكدر أتقبلها كزوجة أصلاً. تشمئز نفسي لمجرد تفكيري بهالشي.

إيمان: لتضل كالب وجهك وتخلي الكل يشك اكو شي. ابتسم وحاول تبين أنت فرحان بهالزواج مو مجبور. فهد: أنتِ تعرفين كلش زين أني ما أنجبر على شي. وراح أوافق على هالزواج مو لأن مجبور. وإنما حتى ما أكسر بخاطرج ولا أعرض البنية لمشاكل بسببي. لأن أدري بيج تسويها صدك وتدمرين سمعتها. أمي وأعرفج على كد ما أنتِ طيبة. بس إذا كرهتي أحد تدمرين. وأني من حرصي وخوفي عليها قبلت. وإلا لو تثالث الدنيا ما أخضع لأي بشر كائن من يكون.

إيمان: شكد تمنيت تجي تكلي يمه خطبيها. عاجبتني. أريدها. غلطت وياها. والله ما أتردد أروح أخطبها. وأني الممنونة. بس سوايتك اليوم دمرتني. ماشفت بيك غير سالم. للحظة كلت عساني لا جبتك. وسوايتي اليوم حتى ما أخلي الغلط يزيد. أني عندي بنات وأخاف الله. وكلت أخطبها الك. لأن أدري لو أنت ما أخذتها ياخذها غيرك. وأني ما أقبل ولد العالم ياخذون شي مضروب وملموس. وأني أم وما أقبل آخذ وحدة لولدي لاعبين بيها. هذا السبب الخلاني أنوي هيج نية. أريدك تتحمل غلطك بنفسك. فتحت الباب ودخلت. لكيتهم كاعدين يشربون جاي.

أروى: وينج يمه؟ ضليت قلقة عليج. وين جنتي أنتِ وفهد؟ إيمان: كعدت يم الحجية. سعاد: خير؟ شعندج؟ أروى: أي يمه شعندج من الصبح لسه؟ إيمان: رحت أتفق وياها وويه نسوان عمج. أريد نروح نخطب لفهد. بتول: غصيت. احم احم. باوعت لخالتي وفيصل. شنو شنو؟ وردة: ذبيت الكتاب. لحظة لحظة. تردين تخطبين المن؟ إيمان: لفهد. شبيجن؟ علي: باوعت لفهد. وأنت قابل؟ فهد: باوعت له صفح. شتكول أنت؟ أروى: بگلبي. سودة عليه غنى. والله تدري تتخبل.

سارة: ومنو سعيدة الحظ؟ إيمان: غنى. صديقة أروى. أروى: بصدمة. عليج الزهرة حلفييي! وردة: هزيت جتف. ياييييي! وهله هله! هم راح يصير عدنا عرس. وهم راح تصير غنى مرت أخويه. والله فهد هنيالك راح تاخذ غنى. يممممممه فرحااااانه. فهد: ضربتها. شوييه ثكليييي! مو طفلة أنتِ. إلى متى أضل أعلم بيج؟ أني. منذر: شبيك فهد؟ عوفها فرحانه.

فهد: شو دوخرو عن وجهي. عفتهم وصعدت لغرفتي. فتحت الباب ودخلت. ذبيت روحي على الجرباية. هي هاي تاليتي. أتزوج بهالطريقة؟ تنهدت بصوت عالي. ياربي ما أكدر أتخيلها مرة الي. يلعن أبو الساعة السودة الفكرت بيها. أكلها أمشي للشقة؟ لو كاعد ومنجب ومخليها على ذمتي لبين ما تهدئ الأوضاع أحسن؟ منذر: هذا شبي مطنكر؟ علي: وجهه ولا جنه وجهه واحد يريد يعرس.

أروى: بالعكس يجوز خجلان منكم. يربي ما مصدكة نونه راح تصير مرت فهد. لا وتعيش ويانه بنفس البيت. آلاء: ليش منو كال راح ينطوكم؟ إيمان: وليش مينطونه؟ المفروض يبوسون إيدهم وجهه وكفة من اجتهم هيج قسمة. أروى: يمه ليش تحجين هيج؟ إيمان: سكتي عني أروى. تره مالي خلك أحجي. أروى: شبيهم اليوم؟ يله ماعليه بيهم. كومييي ورده خلي نخابر نرجس نفجر هالخبر يمها.

وردة: أي يله. وعريسنه جكليته. حامض حلو بباكيته. وغناوي يافاهيه على كولت فهد. وينننج مرت اخوويه الفاهيه؟ باجر جايين نخطبج. أروى: ههههه. سحر: دخلت للغرفة. هاي من الظهر لسه نايمة. تدنيت يمها. أباوع اكو دموع ناشفة على خدودها. مسحت على شعرها. هي فزت. غنى: ها خاله؟ رايدة شي؟ سحر: غربت الدنيا يمه. ميصير تضلين نايمة لسه. كومي أكليلج لكمة. غسلي. كعدي. عوفي النوم. هو يضيق خلكج. غنى: تنهدت. نعسانه خاله. عوفيني حبابه.

سحر: كومي كومي. ماكو نوم هسه. يضيق خلكج. الدنيا مغرب. كومي نزلي وياي. شربي جاي وكعدي ويانه. وعود من تصير الدنيا ليل نامي. كومي يله. غنى: كمت كوه من الفراش. فوك تعبي انوب الشهرية نزلت. جوه غسلت وجهي وكعدت. أني بطبيعتي من تجيني الشهرية تنقطع شهيتي وكولشي ما أكل. لأن الألم يسيطر عليه. سحر: هاج. شربي عصير. أحسلج من الجاي. بلكي تصحصحين.

غنى: تنهدت. مؤخره الكلاص عني. نفسي تلعب ومالي خلك. روحي. فتحت موبايلي. لكيت كومة مكالمات من البنات. طفيت النت. وما جاوبت على أحد. ماعندي واهس لاي شي. شويه واجتني رسالة على الخط من فهد. فتحتها. فهد: "بيج شي" غنى: كتبتله. شتريد فهد؟ فهد: كومي إذا يمج أحد راح أخابرج. غنى: كمت. سحر: وين؟ غنى: ابدل ملابسي وأجي. صعدت فوك. طبيت للغرفة وسديت الباب. دكيت عليه. جاوبني بسرعة. فهد: الوو. غنى: خير. شتريد؟ فهد: شنو هالاسلوب هذا؟

غنى: نملت عيوني دموع. فهد ما أريدك. افهمني. ما أريدك. ومستحيل أقبل بيك. فهد: علساس أني الكاتل روحي عليج؟ شعور متبادل بيناتنه. بس شسوي إذا أمي فرضت فرض علي. غنى: مو علساس أنت رجال ومينفرض عليك شي؟ شو خضعت لأمك مثل الجهال وقبلت على شي أنت متريده؟

فهد: بحده رجال. وغصباً ماعليج وعلى عشيرتج. واحد واحد عرفي شلون تحجين. لتخليني أتعامل وياج بغير أسلوب. مو أني الي أنجبر. بس بنفس الوقت مو أني الي أصير رجال براس أمي. لتنسين هاي أمي. وما أكدر أوقف بوجها. خاصة بهيج مواقف. غنى: شنو تسايرها الشغلة؟ لعبة عندك؟ هذا زواج. تعرف شنو يعني زواج؟ مابي كل تراجع. بدال ما تحاول تقنعها تبطل على هالسالفة. رحت وافقتها. فهد: وعلى حساب من وافقت أني؟

مو على حسابج. خفن لا تدمر سمعتج بدون سبب. مو دست على روحي لخاطرج. أنتِ ليش ماعندج تقدير لأي شي؟ خاف عبالج كاتل روحي عليج؟ تره أنتِ آخر مرة ممكن أفكر بيها. فتهمتي؟ غنى: وأني مستحيل أقبل بيك فهد. لو تبقى آخر واحد بهالدنيا هم ما أقبل أعيش تحت رحمتك ورحمة أهلك. فهد: عنج ما عشتي ولا قبلتي. يطبج طوب. خفتها وراحه. وعود باجر من يجون ردي خبر برفضج. وألعن أمّه وأبو اليكولج ليش. أصلاً تسوين فضل لو رفضتي. سديته بوجها.

غنى: شمرت الموبايل. وغطيت وجهي باجيه. شكد تمنيت أصير مرة لفهد. ويصير اسمه رجلي من صدگ. بس بعد ما عرفت بمشاعره تجاهي. مستحيل أقبل بي. لو يصوغوه ذهب. كرامتي فوگ كولشي. ولا يمكن أقبل بواحد ميريدني. أصلاً. ما أعرف للحظة شلون ضعفت كدام كلام وتهديدات خالة إيمان. وخضعت لها. لالا. أني مستحيل أوافق. وخلي شتريد تسوي. خلي تسوي. ما خايفه من شي. أني صحيح أحبه لفهد وروحي بي. بس لا يمكن أفرض نفسي عليه. بتول: هااا؟ ارتاحيتووو؟

هاي سويت الكلتولي عليه. شو ما نزلت غنى من عينها؟ وهاي رايحة تخطبهااا باجر؟ سعاد: شلون؟ بس أريد أفتهم. شلون راح تخطبها بعد مادرت بيها عدها مكسرات؟ فيصل: ماكو. بس شغلة وحدة تخليها تخطي هالخطوة. بتول: شنو شنو؟ اليجبرها تقبل تاخذ لابنها هيج وحدة؟ فيصل: أعتقد لزمتهم بوضع غير أخلاقي. فحتى تطمطم الفضحية. خاصة هي بت شيوخ. وهالشغلة جبيرة عدهم.

سعاد: لا ما أعتقد. فهد ذكي. ومستحيل يفكر يكسرله بنية ويعوفها. لا لا السالفة أكبر من هيج. بتول: بدموع. كله من وراكم. لو ساكتين وما حاجيلها. ما جان صار الي صار. سعاد: والله العظيم راح أجنن. شلون صار هيج؟ الجنت مخططتله صار كلشي عكسه. يمه غير لو صارت هاي مرت فهد. أموت بمكاني. فيصل: اكو انه بالموضوع. سعاد: وانه جبيرة هم. إيمان متخطبها لو ما صاير شي جبير.

بتول: بدموع. أنتو ضلو حللو. واني ضاع عليه كل شي من وراكم. وفهد طار من إيدي. فيصل: شو سكتي أنتِ. تره خبصتينه. الي يسمعج يكول جان مواعدج بزواج. بتول: والله العظيم. وهاي أني كتلكم. أشرب من دمها. والله ولا أخليها تصير لفهد. وعفتهم وطلعت. ونار واجه تغلي بيه. صباحاً. فهد: صباح الخير. الكل: صباح النور. أروى: يمه شوكت نروح لبيت غنى؟ إيمان: بهدوء. قصدج ترحن... العصر. أروى: ليش أني ما أجي وياجن؟

إيمان: لا. ماعدنه بنات مامزوجات يحضرن. آلاء: ليش؟ شكو بيها؟ وين الغلط؟ إيمان: كل عائلة والها تقاليدها. سارة: خاله عادي أروح وياكم؟ إيمان: باوعت لفهد. طبعاً. غير حماچ الراح يعرس. غير ترحين بصفتج جنه من الجناين. وانغام حبيبتي متكدر تروح لأن عدها طفلة. سعاد: أني ما أروح. إيمان: بكيفج. كمت. فهد كوم أريدك. دخلت لغرفتي. فهد: نعم. إيمان: ليش كالب وجهك؟ فهد: علساس متدرين يعني؟ إيمان: يعني مصر بالرفض؟

فهد: أي طبعاً. هاي حياتي. وأني أريد أعيشها مثل ما أني أريد. ومثل ما اختار. مو أنتو تقررونها. إيمان: أني كتلـك تختار. يا تسوي الي ببالي وتنسى عندك أم. وأضل غضبانه عليك طول العمر. يا أما تنفذ كلامي. وتبدي حياتك ويه الأنسانه الي اختارها غريزتك. وكمل وياها باقي حياتك. وتتحمل نتائج أخطائك.

فهد: خلص يمه. يجرالج الي تردي. بس صدقيني راح تتندمين. واحسبي حسابج. مثل ما فرضتي عليه هالشي. أني هم أعرف شأفرض عليج. وبكل الأحوال غنى راح ترفض. وراح تفشلون رواحكم. إيمان: ابتسمت. ولا بأحلامها. أروى: كاعدة بغرفة وردة. وأكلب بالتلفزيون. منتظرتهم يرجعون حتى أعرف شصار. وما حسيت غير الباب تندفع بسرعة وتدخل مروة تصرخ. مروة: وللللج اروووى صدك السمعته؟ أروى: ****يتبع