رواية ذنوب على قيد الغفران الفصل السابع والثلاثون 37 - بقلم براء

سمعت صوت الجرس كمت فتحت الباب شفت جوكة مال نسوان. سيف: هله بيج خويه ام فهد تفضلو تفضلو اهلا وسهلا. ياسمين: زاد فضلك وليدي. سيف: يا ام حوراء وينج؟ سحر: طلعت على صوت سيف شفت مجموعة مال نسوان أعرفها، انتبهت على الحجية وام فهد تفاجئت من جيتهن بس ما بينت. يا اهلا وسهلا نورتونه والله. سلمت عليهن كلهن. ياسمين: بعد كلبي ربي يحفظج. سحر: فتحت الاستقبال تفضلو تفضلو استريحو، بس من رخصتكم ثواني. طلعت بسرعه صاعدة أصيح لغنى.

غنى: كاعدة بغرفتي وسمعت الجرس يندك غمضت عيوني عرفتهم اجوا، شوية واجت خالتي. سحر: كومي يمه غنى اجونه خطار نزلي جيبي ماي وسوي جاي وضيافة، واني نازلة اكعد يم النسوان فشلة اعوفهن وحدةن. غنى: هزيت راسي وكمت نزلت. حياة: خالتها مبينة حبابة خوش استقبال استقبلتنه. ياسمين: سبحان الله نفس طبيعة امها بالضبط، هم جانت هيج صاحبة ملكة ووجها دومه يضحك، الله يرحمج يا ام كامل. نسرين: ذوله شلون كاعدين شهالبيت هذا؟

ساره: ليش شبي بيتهم شو يلك من النظافة والترتيب. نسرين: من تحجي الكبار الجنانين تسد حلكها وتسكت. ايمان: لا اله الا الله ام مرتضى، رحمه لابو مرتضى لتحجين ولا تنتقدين اي شي ما اريد الجماعة ياخذون على خاطرهم منه، وانتي يمه ساره مسحيها بوجهي. نسرين: انتي بالذات اني ماخذة موقف منج، اجيتي تخطبين لابنج وحدة اني رايدتها قبلك بس ميخالف فهد مثل ابني وما احقد عليه لان خذى وحدة هواها ابني.

ياسمين: خليني ساكتة كلنه ندري انتي بس حجي لا جنتي تردين تخطبيها ولا شي. نسرين: اجيت اجاوبها ودخلت خالتها. سحر: عذروني تاخرت. ايمان: براحتج حبيبتي ام حوراء. ضحى: لتتقيدين عيوني اهل احنة. سحر: والله انتوا اكثر من اهل الله يخليكم. ياسمين: اكول حبيبة جمارتكم وينها؟ سحر: جمارتنة؟ ها قصدج غنى، هسة تجي. غنى: دكيت الباب ودخلت بهدوء. السلام عليكم. الكل ما عدا ايمان: وعليكم السلام. غنى: قدمتلهم الماي.

ياسمين: عوفي الماي شاربين، تعاي خلي ابوسج شلونج حبيبة. غنى: الحمد لله حجية انتي شلونج. ياسمين: ليش هو الي يشوف مرت الغالي شلون يصير لونه؟ سحر: (بكلبها) شنو مرت الغالي طخت عندي بس لا جيتهم على حساب هالشغلة. غنى: سلمت على الكل كلهن بوسني واسلوبهن جان حلو ما عدا ام مرتضى وخالة ايمان. خليت الصينية واجيت اطلع. حياة: وين طالعة حبيبتي كعدي خلي نشوفج نسولف وياج كلشي ماشفنا منج. غنى: كعدت وجريت ضفيرتي من وره ظهري وعدلتها.

ضحى: اللهم صلِ على محمد، هذا شعرج طبيعي. غنى: هزيت راسي. ساره: ما شاء الله يخبل. غنى: (بابتسامة صغيرة) شكرا. ياسمين: ام حوراء شلونها غناوي؟ سحر: والله وردة وهاي الحجي مو كدامها صدك وردة. ياسمين: شكد عمرج حبيبة؟ غنى: واحد وعشرين. ضحى: ليش حسب علمي مو مرحلة رابعة انتي المفروض 22. غنى: بعدني مكملت الواحد وعشرين. حياة: شنو تدرسين؟ غنى: لغات قسم انكليزي. نسرين: ميرادلها سؤال هي ومرتضى سوة.

غنى: تنهدت من رخصتكم عفتهم وطلعت احس جبل نايم على صدري، ماردت زواجي يصير جبر لا وبهيج طريقة. رحت للمطبخ اهدر جاي. ياسمين: اكول ام حوراء خلي ندخل بالمفيد ونحجي بدون لف ودوران، جيتنه هاي اليوم حتى نطلب ايد غنى. سحر: نتشرف بيكم والنعم بس المن؟ ايمان: لابني فهد. سحر: ها بس مو الفرق هواي بيناتهم. ايمان: عمره ثلاثين وهي واحد وعشرين، تسع سنوات مو ذاك الفرق الجبير، وبعدين اساس نجاح كل علاقة هو التفاهم مو العمر.

سحر: اي والله صحيح كلامج. ياسمين: شوفي ام حوراء اني مو امدحلج بحفيدي لا والله كلها تدري بيه احجيها طك بطك وما اخاف، واني اكلج متلكين احسن من فهد، واخذيها مني غير غنى متناسب فهد لان هو بارود واعصاب يرادله وحدة عاقلة وفاهمة مثل غنى حتى تريحه وتدير بالها عليه، واني متأكدة فهد لو حبها يعلكلها العشرة شمع. سحر: والنعم منه حجية، ربي يشهد اني احبه واحترمه انسان خلوق وحباب ومبين علية صايم ومصلي وملتزم شيريد الواحد بعد.

ياسمين: ها فهد وصايم ومصلي وملتزم هم. ايمان: (دست عمتي) احم رحم الله والديج بعد كلبي هذا من طيب اصلج. سحر: على العموم اني عن نفسي موافقة لان ما الكي احسن من بيت حجي علي، بس القرار بالاول والاخير راجع لغنى، وانتوا انطونه مهلة ونردلكم خبر. ضحى: كل الوقت الكم حبيبتي اهم شي تردولنة اخبار حلوة. نسرين: بس لا ناوين ترفضون؟

شوفي ام حوراء بت اختج لو تزحف على ركبتها متلكي مثل ابن اخويه ولا تحصل مثله، فخلي تتأنى باختيارها وتفكر بالموضوع زين تره ابن اخويه فرصة. سحر: وبنت اختي ما ناقصها شي ادب وجمال وشهادة ويتمناها الف واحد، واذا على وضعنة المادي فالحمد لله عايشين من تعبنة ونام جوعانين ولانمد ايدنة لاحد وعزة نفسنة فوك كلشي، فثمني كلامج الله يخليج. نسرين: شدعواج عيني شـكلنة. ياسمين: اخزر، اريد ولا كأن. غنى: دخلت خليت الجاي والكيك. حياة:

(حاولت تسد الموضوع) عاشت ايدج حبيبتي. غنى: بالعافية. طلعت برة وعفتهم الواضح مطولين وخالتي كيفت عليهم. *** اروى: كاعدة بغرفة وردة واكلب بالتلفزيون منتظرتهم يرجعون حتى اعرف شصار، وما حسيت غير الباب تندفع بسرعة وتدخل مروة تصرخ. مروة: وللللج اروى صدك السمعته. اروى: خير يا ستار شسمعتي؟ مروة: صدددك فهد راح يخطب غنى والنسوان هسه ببيتهم يطلبوها رسمي. اروى: ركضت سديت الباب ولج صوتج فضحتينة ليسمعنة احد.

مروة: لج اروى شلون تقبلين فهد يخطب هااي وتدررررين بيه احبببه واريده شلوووون هانلكم كلبكم تسوون هيج بيه مو على اساس اني لفهد. اروى: مروة خلي نكون واقعيين انتي حبج لفهد من طرف واحد وكلنة ندري فهد ميعتبرج غير اخت وبت عم وعمره ما فكر بيج بغير طريقة، وانتي الي رسمتي علية احلام مالها اي صحة من البداية. مروة: (بدموع)

حرام عليج اروى اني اتنفسه لفهد واضيع لو صار لغيري، تالي ترحون تخطبولة هاي الي متناسب لا بالمستوى ولا بالشهادة ولا بأي شي. اروى: ما اسمحلج تحجين عليها لتنسين هاي صديقتي المقربة، وبعدين بطلي تفكرين بالمستويات. مروة: وصديقتج احسن من بت عمج حتى تدافعيلها؟

لزمت كلبي لج اروى نار واجت بيه فهد حب طفولتي من اني وصغيرة واني اشوفة غير عن كل الولد من اني طفلة متوقعتة يصير هو ابو جهالي، تالي ترحون تخطبولة غنى الي ما صارلها حتى سنة من ظهرت بحياتنة. اروى: لزمت ايدها مروة الزواج قسمة وفهد مو قسمتج. مروة: (دفعتها)

وخرررري عني انتي من البداية متحبيني، ولو تحبيني جان سعيتيلي حتى اتزوج فهد، بس انتي من البداية مترديني لفهد وصدكي واعتقدي فهد ماراح يتهنى لان اني نافستة واريدة وكولي مروة كالت. فتحت الباب وطلعت صار فهد بوجهي. فهد: اجيت أصعد فوك وشفت مروة تنزل وتبجي. ستوقفتها: شبيج مروة ليش تبجين؟ مروة: (بدموع) حرام عليك ليش سويت هيج؟ فهد: (باستغراب) شسويت؟ مروة: عفته وطلعت. فهد: باوعت لاروى: هاي شبيها شنو حرام عليك ليش سويت هيج؟

اروى: ما عليك بيها تمسلت. فهد: (هز ايدي) هي بقت بس هاي عليه. اروى: صعد فهد وشوية اجن كمت: ها بشرن شكالو؟ ايمان: كعدت كالو يردون مهلة يفكرون. ضحى: بس مبين من كلامهم راح يوافقون. اروى: صدك خالة؟ ضحى: اي حبيبتي. ياسمين: ها ولج شو مكيفة لو لان صديقتج؟ اروى: طبعاً اكيف وافرح اخوية وراح ياخذ اقرب صديقة الي، وعلى طاريها صارلي يومين ادك عليها مترد وفهد ميقبل اروح يكول عدهم رجال.

نسرين: عمه هذا يسمو داء الجلوبية هاي لان انخطبت انجلبت عليجن. ياسمين: انتي وتالي وياج كافي كل ساعة مدهديتلج حجاية شكبرها. حياة: ها عريسنة شلونك مبروك مقدماً. فهد: ليش وافقو؟ نسرين: وانت ليش مستعجل هيج؟ فهد: استغفر الله. يله من رخصتكم عفتهم وطلعت خابرت الشباب محد يقبل يطلع، اخذت سيارتي ورحت افتر اختنكت. ***

غنى: كاعدة اقرة مقالة تحفيزية بالموبايل، هالفتــرة كمت هواي الجأ لهيج اشياء احسها تنطيني دافع وترفع من معنوياتي الهابطة. سحر: ها يا حلو تستقبل ضيوف؟ غنى: تذكرت فهد هاي حجايته تنهدت، اكيد تعاي خالة. سحر: كعدت يمها شلون تحسين نفسج هسه بعده مودج مخربط؟ غنى: لا الحمد لله احسن. سحر: اكول حبيبتي غنى انتي تعرفين انو مصير كل بنية بالاول والتالي تتزوج وتستقر وتكون عائلة الها كيانها الخاص صح كلامي لو لا؟

غنى: عرفتها راح تحجي بهالموضوع، لا خالة مو شرط البنية تزوج تكدر تبني كيانها وهي وحيدة ولا شرط تكون عائلة يالة تصير سعيدة. سحر: هذا حجي مسلسلات وروايات ما عليج منه، المرة راحتها تصير من تتزوج، صحيح ممكن تواجه مشاكل لان تصير عليها مسؤولية بيت وعائلة، بس من تجين للجانب الايجابي تشوفين انو يصيرلج زوج بس الج انتي يحبج يحترمج يقدرج ويصيرلج اطفال يملون عليج هالدنيا هاي، كل الاشياء الذكرتها يسموها ايجابيات الزواج.

غنى: خالة دخلي بالموضوع وعوفي المقدمات. سحر: اليوم اجوا بيت حجي علي وخطبوچ لفهد. اباوعلها ضلت ساكتة مابدرت اي ردة فعل، انتي سمعتيني شكلت؟ غنى: اي سمعتج. سحر: شو ما احسج تفاجئتي او حتى علقتي على الموضوع. غنى: خالة اني ما موافقة. سحر: اكدر اعرف ليش؟ اشو الولد مبعيبة شي اخلاق وادب وشهادة وجمال ومنصب وفلوس وفوك هذا ملتزم مثل ما انتي تردين. غنى: (ضحكت هزة راسي) سحر: ما اعتقد كلت شي يضحك.

غنى: العفو خالة بس هيج ضحكت، كتلج اني ما موافقة ورديلهم خبر بهالشي. سحر: هسه غير اعرف ليش اشو عريس ولكطة وين تلكين واحد بهالمواصفات. غنى: خالة ما اريده، اني ويا ماكو اي تناسب بيناتنة واني ممقتنعة بي خوما كوة هي. سحر: اخذيها نصيحة مني، انتي وحيدة يايمة واني وعمج مادامين باجر عكبة ماخذنة التراب، وانتي لا من عم براسة خير ولا من خال براسة خير ويتحملج، فأنصحج توافقين علية انتي تحتاجين واحد مثل فهد يدافع عنج ويصونج.

واخذيها مني الي يكدر يعيش عوائل على كتافة ويتحمل مسؤليتهم يكدر يصون بيت ومرة. غنى: خالة اني ما سقطت منه الله يخلي ويحفظة لاهلة، بس مجرد كتلج ما موافقة لان احسة ميناسبني. سحر: وانتي شدراج ميناسبج قابل كاعدة ويا؟ هو بفترة الخطوبة راح تتعرفين علية وعلى طباعة، وبعدين المفروض انتي تعرفي اكثر مني لان بقالج عندة شهرين لا وماتقرب ولا وصل يمج، كل مواقفة هاي وتكولين ميناسبني؟

وها احب اكلج شغلة اني مصرة بالذات على فهد لانه رجال وحوك مو مثل زلم هالوكت محفحفين والبناطير نازلة والوجة مينعرف وجة رجال لو مرة، صدكيني فهد فرصة الج تضيعيها. غنى: تنهدت خالة يعني هم جبر؟ سحر: لا مو جبر بس انتي دتكبرين والوحدة مو كل مرة تجيها هيج فرصة، ففكري زين بكلامي وكعدي ويه نفسج، واني راح اخذلج استخارة بالقرآن حتى يطمئن كلبج. مسحت على راسها: خوش. غنى: ان شاء الله.

طلعت خالتي واني تمددت افكر بكلامها، كل عقلها خالتي عبالها فهد ملاك، متدري بي لا صلاة ولا تعالي وجماله يشرب ويدور نسوان، والمشكلة مو هنا المشكلة اني شلون كدرت اتقبلة واحبه ما ادري، اتذكر نفسي سابقاً جانت تلعب نفسي من هيج زلم بس من اجيت لهنا اختلفت هالنظرية عندي، ااااه ربي رحمتك تعبت رسيني على بر. *** شهد: كافي حبيبتي مردتي روحج. مروة: (بدموع)

شهد نار نار جواية راح اموت ولج احبه تعرفين شنو يعني احبه، ما اكدر اتخيل خلص راح يتزوج وحدة غيري لا وفضلها علية وخطبها الها. شهد: ياعمري كل واحد ياكل نصيبة وفهد مو نصيبج، باجر عكبة الله يرزقج بواحد احسن منه. مروة: بس اني ما اريد احسن منه اني اريده هو. شهد: والله مردت كلبي، حضنتها كافي ولج كطعتي روحج، كليلي شسوي والله لو بأيدي اروح اسحل فهد واجيبة يمج هسه، انتي ليش تيأسين يجوز غنى متقبل او اهلها يرفضون.

مروة: هه والله ضحكتيني غنى ترفض؟ انتي خبله ولج اذا ما طلعت هي جاي تحوم حوالية وتريد تسحبة، اطلع كلشي ما افتهم والواضح فهد غرته ببياضها ونعومتها وراح يخطبها. شهد: تره الاختيار اختيار خالة ايمان مو اختيارة، يجوز الولد كال خلص بعد لازم اتزوج و وافق امة. مروة: لتخليني اسب حتى الجاب ايمان هسه. شهد: ردت احجي وطبت خالة ضحى. ضحى: فتحت الباب ودخلت اباوعلهن سكتن، صارت عيني على مروة شبيج تبجين؟ مروة: (مسحت دموعي بسرعة)

لا هيج ماكو شي. ضحى: اكو واحد يبجي بدون سبب؟ خير شهد صاير شي وجوهجن متتفسر احجن لتخوفني. شهد: لا خالة بس جنه نحجي على الشهداء ومروة بجت. ضحى: اووف سودة علية الله يساعد كلوب امهاتهم، هاجن سويتلكن عصير. شهد: عاشت ايدج خالة. ضحى: ايدج العايشة، جنتي تلحين تره فهد منا لشهر معرس وانتي وحارث بعدكم. شهد: ان شاء الله بس خلي اطبق واباشر بكلشي. ضحى: ان شاء الله يلة اعوفجن. ***

فهد: صبيت كاس ثاني شلت راسي شفت وحدة من الراقصات تقربت يمي. : سلام ياحلو شنو شو جاي وحدك اليوم؟ فهد: ليش عندج مانع؟ : بالعكس اصلا انت دومك منور بدونهم او وياهم. فهد: حسيت بأيدها على فخذي دفعت ايدها بهدوء. ايدج وين؟ : تحب نطلع وره ما تخلص السهرة؟ فهد: (بهدوء) مالي مزاج كومي من يمي. : والله اكلبلك المزاج على البطانة بس لو توافقني وتكوم وتعوف السهرة ونطلعنة بفندق خمس نجوم ونتونس بس ها الليلة تكلفك.

فهد: محد كالچ اني مكحف بفلوس اجيب اغاتج وكتلج كومي من يمي لتخليني اصيح للكو... مالتجن واخلي يطردج يييييييله كووومي. : كايمة كايمة شبيك عابتلك شلون حلو. فهد: (باوعتلها بصفح) عايزني اني هسه لو حورية كدامي هم ما ادنالها. تنهدت اشتعلتي بكاز يا غنى، صبيت بعد كاس، السرسرية صاروا براسي شرفاء وميردون يطلعون، صدك الموت يخوف والله شكلهم تابوا، رفعت راسي وانت يا فهد شوكت تتوب؟ شوكت تشوف الجاي تسوي غلط؟ شوكت تحس روحك لازم تتغير؟

هاي انت راح تزوج ولسة ما حسيت انك تريد تتغير. كمت دفعت الحساب وطلعت رجعت للبيت فتحت الباب ودخلت كالعادة لكيت مرت فيصل مزروعة كدامي ادري هاي متقصدتني. ساره: الله يساعدك. فهد: ساره انتي تتعمدين تطلعين بوجهي وين ما اروح تره ما صايرة هاي كل شوية مكنبصة بوجهي جنج سكتت استغفر الله. ساره: شلون يعني ابطل ما افتّر بالبيت؟ وبعدين حاجي اخوج كل ساعة منزلني على شغلة. فهد: غلسـت عليها واجيت أصعد. ساره: اكول فهد سؤال. فهد:

(بنفاذ صبر) خير. ساره: شنو رأيك بعرسك البس اني ومرتك نفس البدلات؟ فهد: عود هاي فطيرة لو تتعمد تحجي هيج؟ باوعتلها ما اكول غير الله يشافيج. ساره: هذا شبي هسه اني شكتله معقولة زعل لان حجيت على مرته؟ هلة هاي بعدها ما اجت شدلها صدر من هسة. فهد: طبيت لغرفتي شفت امي كبالي جانت عاينة والتمت. ايمان: وين جنت الساعة بال 2 هسه؟ فهد: (ببرود) طالع. ايمان: ادري طالع بس وين؟ فهد: (رفع حاجبي) طالع وبس حجية. ايمان: حجية شنو ولك؟ فهد:

(كعدت فتحت قميصي) شتردين يمة؟ ايمان: انت راح تتزوج، طلعاتك هاي خففها واكعد وكابل زواجك وشوف شلون راح تعيش وتكون عائلة من تكضيها طلعات. فهد: ليش المفروض اضل كاعد بالبيت واسوي خلطات لو اكلج اروح اجيب كريمات تبييض حتى بالعرس متنصدم غنى من جسمي وتنذهل من بياضي وانوثتي الطاغية لو لالا اكعد اخذ خيط لحواجبي حتى يبينن حلوات؟

ايمان: استهزء استهزء، طبعاً شوراك انت اشو المضموم وشايفه انت وبالنسبة للكريمات فميحتاج هي شايفه ولا لاعبة وملخصة. فهد: لا وداعتج لا شايفه ولا لاعبة بس ان شاء الله منا للزواج راح تشوف وتخترع هم وحتى... راح تشبع شتردين بعد. ايمان: دومي اكول الشرطة هيلكتك ابو لسان الزفر، اني مو هذا قصدي بس انت دماغك رايح يسرة، اسمعني زين هذا روتينك يتغير وسوالف العزوبية تنساها فهمت، التفت لحياتك الجديدة احسن الك.

فهد: بعد اوامر ثانية تحبين اتحجب على الواهس؟ ايمان: فهييييدان لتستفزني كلامي واضح ومفهوم ويتنفذ غصباً ما عليك فـ فهمت. فهد: الله كريم. ايمان: احد كالك الله بخيل؟ ندري كريم واكرم منك، كلامي يتنفذ وغير قابل للنقاش، يلة اعوفك تنام. فهد: (غمضت عيوني) يلعن يوم النسوان شكد ينكنكن والله يا الله تكلي شايفه ولا لاعبة يمكن هاي اذا شافتني بدون قميص تريد توكع على وجها مو عاد اتصلخ كدامها. *** صباحاً

غنى: ضليت للصبح كاعدة عيني ما اخذت نوم، كمت فتحت موبايلي شفت مكالمات من البنات شكد عيب هنه صار ايام يخابرني واني ما اجاوب، عدلت شعري واتصلت مكالمة جماعية شوية وفتحن. صباح الخير. اروى: صباح الورد على مرت اخويه الكيكة. نرجس: لج جلبه صار ايام ادك عليج ليش متردين لو لان انخطبتي؟ غنى: (ابتسمت) والله اسفة جنت تعبانة شوية وحتى موبايلي مفتحتة كد ما مالي خلك اسفة حبيباتي.

اروى: عادي مرت اخويه ولا يهمج، هو حب اخويه يسهر فديته اكيد ما نمتي الليل تفكرين شلون راح تتوسدين صدره بعد كم يوم. نرجس: اي والله اني اشهد اول من فكر بصدر وعضلات فهد اني ههه. غنى: (ابتسمت) اروى: شبيج نونه شو احسج ضايجة؟ شنو احد ضوجج من النسوان؟ غنى: لا بالعكس كلهن حبابات بس كتلج اني تعبانة شوية. نرجس: اكول غنى خوا ما راح تغيرين اسمج؟ غنى: اغيره ليش؟ نرجس: عبالي راح تسوين مثل البنات وتسمين نفسج المخطوبة المخطوبة.

اروى: هههه خرب يومج نرجس والله عندج سوالف. غنى: تره بعدني افكر ومصرة مخطوبة. اروى: شنو تفكرين ولج مو دافنينها سوه وبس لا ناوي ترفضين يبعد كلبي. غنى: يجوز شمدريج. نرجس: صدك لا كالو هم صحلها رجل وهم كالت اعور لج بابا حمدي ربج طحتيلج بواحد مثل فهد، واذا متردي اني موافقة بدالج خلي يجي ياخذني فلاحة ملاحة حتى مهر ما اريد واذا تردون اني ادفعله مهر واحنه حاضرين من المليون للمية احنه مشترين رجال.

غنى: ههههه صدك ضحكتني والله مالي خلك. اروى: الله يساعد كلبج يا رجل نرجس راح تشبع طز نعل. نرجس: عن السخافة اصلا حبيبي راح ادلله دلال حتى ريوك اسويله. اروى: لا هواي متعبه نفسج. غنى: ضليت احجي ويه البنات شوية وسديت الموبايل حسيت نفسيتي ارتاحت شوية، صدك الاصدقاء نعمة بالحياة اذا احسنت اختيارهم. كمت نزلت جوه. صباح الخير. سيف: تعاي بوية يلة تريكي. غنى: صبيت جاي واجيت كعدت اكلت شوية وكمت اساعد خالتي. سحر: ها فكرتي بالموضوع؟

غنى: اي بس بعدني ما قررت. سحر: تره اليوم الفجر اخذت لج خيره بالقرآن وطلعت زينة وكلش هم. غنى: هزيت راسي. سحر: غنى يمة ادري بيج فكرتي وهواي بالموضوع كليلي موافقة لو لا. غنى: تنهدت موافقة بس عندي شروط. سحر: والي هي؟ غنى: عرس ماكو والاسود ما اذبة، عرس على الساكت. سحر: انتي مخبلة شهالحجي اكو بنية تشترط هيج شروط بزواجها.

غنى: لتنسين اني حزينة وما اريد لا طنة ولا رنة بزواجي وحتى اذا ميسوون عرس يفضلون علية لان بكل الاحوال الاسود ما اذبة. سحر: لج امي صار سنة سنة كاملة على الي صار وكل الناس تذب الاسود وره دورة السنة مو انوب عروس؟ غنى: خالة اني هذا شرطي قبلو قبلو مقبلو براحتهم.

عفتها وكمت انجبرت اوافق لان فكرت بكلام خالتي صحيح اني منو دايملي خاصه لو خالة ايمان سوتها صدك وحجت بالسالفة اول شي تدمر سمعتي وثاني شي موبعيدة عمامي بذبحوني ويطعنون بتربية اهلي واني افضل اموت ولا ينمسون اهلي ولو بحجاية بسببي، واذا كان زواجي الدائمي من فهد يبقي سمعة اهلي طيبة اني مستعدة اضل طول عمري تحت رحمتهم ولا ااذي اهلي وهمه بكبرهم.

مر اليوم بكل بطئ احس عقارب الساعة تتحداني وتكلي لو تضلين اليوم كله تتهربين من التفكير هم تنحصرين بزاوية الافكار، تالي الليل. ثاني يوم خالتي ردتلهم الخبر والفاجئني وافقوا على شروطي، ومن يومها بدت خالتي وخالة ايمان يخططن للمشية مال الزلم والي راح تصير مشية وعقد سيد. ما حسيت بأي شعور لان لاعندي بنات عمام ولا خوال ويجن ويحضرلي بهيج مناسبة، بيومها اجتني نرجس وخالة ام جعفر الدمعة بعينها تبوس بيه عبالك العقد لبتها.

كامت خالتي تجهز للمشية هي وام جعفر نزلن وصنعن محل حلويات على ضيافة وزينة وهالسوالف مال المشية. نرجس: سويتي جسمج؟ غنى: شهالاسئلة نرجس. نرجس: اي الولد يريد يشوف حرير ابيض مو غابات الامازون، فاذا ما مسوية جسمج كليلي حتى اساعدج. غنى: (رفعت ايدي) تره اني مو مشعرة وتدرين بيه بمناسبة او بدون اني معتنية بنظافتي الشخصية ومو لفهد لنفسي. نرجس: باجر عكبة حتى عينج تسويلها عناية خاف السيد فهد يلمحله رمشاية مكانها مو صح؟

غنى: انتي شعندج وياية؟ نرجس: (لزمت ايدها) غنى ليش احسج مو فرحانة؟ حتى اروى حست بس ما حجيت شي. غنى: تنهدت شريد احجي يعني اكول نرجس تعاي اراويج الفستان الجابته خالتي اني لسة ماشفته كلت اشوفة وياج. نرجس: اي يلة. لج ليش اسود؟ غنى: اني ردته هيج. نرجس: بس ليش غنى عفتي الالوان كلها خليتيها تجيب لج اسود. غنى: لتنسين اني حزينة. نرجس: (باوعتلها وهزيت راسي) بسيطة اله اخليج تذبين الاسود وكولي نرجس كالت.

غنى: مر اليوم بسرعة وتوالت الايام واني ما شفت فهد ولا حتى سمعت صوته، وهاي اطول فترة بعد صارت بيني وبينة، واجه اليوم الجنت اتمنى لو يصير واني وفهد موافقين عليه، اجوا هواي ناس ماشاء الله ترسو البيت وحتى ماكو مكان كعدة، اباوع لخالتي حبيبتي تركض ركض مقصرت ابد لا هي ولا عمو الي استقبل الزلم والمشية الجبيرة الي جابوها عبالك ابويه، مشت مراسم العقد لحد ما نطق الشيخ وسألني على موافقتي.

: اذا موافقة على فهد ابن سالم كولي نعم وانت وكيلي. غنى: (غمضت عيوني وجاوبته) نعم وانت وكيلي. سمعت الهلاهل وكالو فهد راح يدخل واني حسيت الدنيا تدور بيه. **** يتبع