رواية ذنوب على قيد الغفران الفصل التاسع عشر 19 - بقلم براء

رفعت البوشيه ... خاله اعرفج بنفسي اني ساره مرت فيصل الثانيه. آلاء: شنووو؟ سعاد: شهالتملق هذا؟ شنو مرت فيصل؟ شنو بطيخ؟ انتي جاية تذبين بلايج علينا؟ ساره: اني ما جايه أذب بلايه على أحد، اني صارلي ست أشهر متزوجه فيصل، يعني حالي حال مرته الأولى، ولي حقوق وواجبات حالي من حالها. علي: ضليت صافن، يعني فيصل ما عنده إمكانية يعيش عائلة وحدة؟ يروح يتلبس بعائلة ثانية؟ سعاد: وشجابج فجأة؟ وين جنتي قبل؟

ساره: اني جنت موافقة أكتم على زواجي من فيصل مثل ما هو راد، بس اني هسه حامل، والعالم لو درت مترحمني ولا تتقبل طفلي. حاجيت فيصل ورفض الطفل ورادني أنزله، وأني أريد ابني وما كان عندي حل غير أجى لهنا وأحتتمي بيكم. أروى: أباع للأء، كامت تلطم. آلاء: لطمت صخااام الصخمج آلاء! وين جانتلج هاي؟ ولك بشني؟ قصررررت وياك؟ يا حقير! يا عديم الرجولة! يا فكرررررر! إيمان: صلِ على محمد يمه، شجاج؟ هسه يجي فيصل وتتفاهمي وياه.

آلاء: فتحت زيك دشداشتي! ولكم! شتفاااااهم؟ نززززززل عليّ ضرة الكوووووو... ابو ال... الله لا يوفقك يا فيصل النكس! سعاد: بس عاد لج! شنو أول وحدة رجلها يتزوج عليها؟ أهدي، هسه أخابر فيصل ونفتهم السالفة. باوعت للثانية: انتيييي هييي؟ فيصل يدري بيج جايه لهنا؟ ساره: كعدت فاتحة عباتي. لا ميدي... عفيه يبنيّة جيبي لي كلاص ماي، ريكي نشف. أروى: ها؟ آلاء: تردين كلاص ماي؟ مو دتعاي خلي أوكلج وأشرب خوش ماي...

هجمت عليها، سحلتها من شالها ووكعتها بالكاع، نمت فوكها وكمت أملخ بيها. إيمان: عزة العزاج! وخررري ولللج! ذبحتي البنية! آلاء: وخررررررو عنييييي! كح... ام ال... بت الك... انتي تنزلين عليّ ضرة! ساره: لحكولييي يمه! ورده: تصفك. السبع يطلع دم! السبع يطلع دم! ولج كتليها! هاج النعال، ضربيها بي! يله ولجن تعاركن! هذا رجلجن، دافعن عن حقوقجن! ولج ساره بالنعال، بالنعالا! إيمان: ضربتها. انجبييييي انتي!

أروى: سحلنه آلاء من على البنية كوة، لان علي ما قبل يدخل، يكول عركة نسوان أني شكو... أباع للبنيه وجها دم ومخرمش... يمه هاي آلاء شكد شرسة. ساره: تبجي. الله لا يوفقج! اني شعليه إذا رجلج تزوج عليج لأن وصخة. آلاء: هدونييييي عليها! هدووونيا! إيمان: انغام تعاي خذي البنية لغرفتج بسرعة. انغام: كومتها. يله تعاي، خطية كوة تتحرك، لان المعزاية آلاء جنزتها. آلاء: وين ماخذتهاااااا؟ طلعييييها برررررره! سعاد: قزرقط شبيج تخبلتييييي؟

شنو أول وحدة انتي تنزل عليها ضرة؟ هاي اني مو نزل عليّ سالم ضرة، وياريت لو تسوه أو أحلى مني، راح جاب لي فلاحة بت فكر، بس انجبيت وكعدت وسكتت. إيمان: بحده. أم فيصل بلا تجاوز وتمادي بالكلام، احترمي، احنه مو صغار بعد. لا كل مرة ورجعتي عليه، خليج بجناينج ومصايب ابنچ وعوفيني أني وجهالي بحالنة. تره ملينة وطلعت رواحنة منكم ومن مشاكلكم. هاي جزاتنة كاعدين نحل مشاكلج انتي وبزرتج. سعاد: شدعوه عيني انهديتي؟ شكنالج قابل؟

علي: خاله رجاءً، تجاوز بالكلام لتتجاوزين. أدري بيج ضايجة ومقهورة، بس لسانج لزمي. أروى: ضلينه كاعدين فتره بين بجي آلاء ونحيبها، وبين دعاوي سعاد وصياحها... أباع شرف فيصل أفندي. فيصل: السلام عليكم. خير شبيكم؟ شبيج آلاء ليش تبجين؟ آلاء: كمت جريته من قميصه. ولك حقير سافل! علساس متدريييي؟ لييش مسوووووي روحك غشييييييم؟ هاااا؟ فيصل: شبيج مخبلة؟ عوفينيييي! آلاء: يالنكس! تزوج عليّ؟

بعد ما تحمّلتك وتحمّلت أهلك وكمت أداري زبايلك وأكول رجلي وميخاااااالف، هي هاااااي جزاااتييييي؟ ياكلببببب! كمتتتتت أبوك فهددددد وأجيييب الفلوووس وأعبيييي بحلكك يانذللللللل! فيصل: هاي منو ضاحك عليج وكايلج مزوج؟ آلاء: بعصبية. مرتك الثانييييييه كلتلييييي! يا كوا..... فيصل: صفكتها راشدي. بت الكلب! عليمن هالغلط؟ جريتها من شعرهااا! بت النعال! إذا أريد أضربج أزوعج العافية هنا ومحد يكلييي لا! ادبسززز!

علي: جريتها من ايده. انت مخبل؟ شلون ترفع ايدك على مرتك؟ خبل انت! فيصل: هاي مو مرة، هاي كح..... آلاء: أشررررف منك يا نذل! علي: أباع له. هد عليها. لزمته. كافي فيصل! خلي نتفاهم. مرتك الثانية هنا هسه. فيصل: بصدمة. ساره؟ شجابها هنا؟ سعاد: ليش عرست على مرتك؟ فيصل: اني مامجبور أبرر. الشرع حللي أربعة، واني ما خالفت الشرع.

إيمان: الشرع حلل الك أربعة، بس بشروط. أولها لازم تعلم مرتك الأولى وتعدل بين كل نسوانك. إضافه إنه لازم يكون اكو سبب من زواجك، مو مرتك مامقصّرة وياك وتتزوج. أروى: قابل شدرا؟ هو كل الزلم تعرف عن الدين حاجة؟ وحدة الشرع محلل أربعة، والباقي صفر. كلشي ميفتهمون. فيصل: تقدمت. لزمي لسانج ولتدخلين انتي. إيمان: دجرب تقربلها وشوف شسويلك... تره سكتتلكم هواي.

أروى: راحت سعاد بلغت عمامي والحجية حتى يصير كلشي بعلمهم. أجو بس شنو صايرين أعصاب. ياسمين: الله يطيح حظك ولك! انت بيت واحد مامدبر، تدبر بيتين؟ من تف عليك يا ادبسزز! عباس: يمه رجاءً، خلي نفتهم السالفة... شبيك عمي فيصل تخبلت؟ تزوج بهالسرعة وبدون علمنه؟ مهدي: شنو مالك رداد انت؟ ولك ما عندك أهل ترجع لهم؟ فيصل: اني مامسوي شي غلط. هذا حقي ومحد اله حق يحاسبني. ياسمين: نسلك النكس!

راجع لبيت حجي علي الله يرحمه، يعني راجع لنا احنه وغصباً ما عليك نحاسبك. لأن زواجك جان بالسر ومرتك هسه حامل، متكلي العالم إذا شافتها شتكلهم؟ هذا ابنك منو يعترف بي؟ وانت زواجك سرييي من امه؟ فيصل: اني عاقد عليها سيد وما عبالي راح تحبل. مهدي: لأن مطي وأغبر دومك جايبلنه الحجاية. عباس: هسه اهدو وفهمني فيصل، مرتك وين؟ أهلها شلون قبلو ينطوها الك؟

فيصل: جنت اشتكي لواحد صديقي من حياتي ويه آلاء واقترح عليه أتزوج وحدة ثانية، وكلي اكو عائلة ابوهم عنده كومه بنات، ويشتغل صانع حتى يصرف عليهم... ورحت خطبت وحدة من بناته. مهدي: وانت وين شايف بناته؟ فيصل: شفتهن ومشه الحال. اني متزوج على سنة الله ورسوله، لازنيت ولا سويت شي غلط. ياسمين: الله أكبر على راسك... باوعت له. اسمع ولك، مرتك تاخذها تعقد عليها محكمة، وحسك ما أسمعه. فيصل: بس اني جنت ناوي أطلقها. سعاد: أكل تبن!

مرتك حامل! ياسمين: أمشو صيحو للبنيه، خلي نفتهم منها السالفة، مادام هذا يريد يطلق. ابو حلك اليلزك. أروى: راحت أمي جابت البنية واجت. ساره: السلام عليكم. الكل: وعليكم السلام. عباس: عمي تعالي استريحي وفهمينا السالفة.

ساره: كعدت وعيوني على فيصل الي يخزرني. عمي ابنكم تزوجني بعد ما استغل وضع أهلي الفقير، ولأن احنه فقرة أبويه انجبر يوافق على فيصل وهو متزوج. عقدنه سيد، وانطاني مهر بسيط، وأخذني كعدني بمشتمل صغير. ضليت وياا أربع أشهر وحملت، ومن درى راد أنزل الطفل. أنتو عقلوها، شلون أنزل قطعة من روحي وجزء مني بهالبساطة هاي؟ مهدي: هز راسه. كملي عمي، كملي.

ساره: بدموع. ما كان عندي حل غير أجى لهنا وأخلي كدام الأمر الواقع، حتى ميطلقني ويكسر بختي، ولا يخليني أنزل طفلي. ياسمين: خلص أهدي حبوبة. فيصل ماراح يطلقج وراح يعقد عليج بالمحكمة هم، حتى من يولد الطفل يتسجل باسمه. خو مو يبقه بلا حقوق. فيصل: بس اني... عباس: انت انجب! حلكك لتفتحه! خلينه ساكتين وأحمد ربك. أخوك مو هنا جان طيح حظك. سعاد: وبصفته شنو يطيح حظه؟ ابو؟ واني ما أدري؟

ياسمين: بصفته مالك هالبيت ومسؤول عن هال عائلة، بالاضافة إنو ابنك كل ساعة مسويله مشكلة، وتعال يا فهد حل مشاكل أخوك وتحمل بلاويه. عباس: من رخصتج يمه... هال موضوع ينسد، وانت فيصل مرتك تاخذها تعقد عليها بالمحكمة، وعود بعدين تفاهمو وين تريد تكعدها وتخليها... يله حجية، أمشينه. إيمان: راحو حمويني وعمتي، وهم كبت العيطة. شلون أوقات؟ طايح حظها. هسه لو فهد هنا ما كان صار الي صار.

آلاء: اني رايحة لبيت أهلي، وورقة طلاكي توصلني. فتهّمو. إيمان: صلِ على نبيج يمه، لتستعجلين. اكعدي ببيتج وفكري بمستقبلكم، إذا مو لخاطر أحد لخاطر جهالج. آلاء: أنعل ابو جهالي! اني تنزل عليّ ضرة وأسكت وأتقبل الوضع؟ والله لو أموت.... علي حباب، أخذني لأهلي. علي: باوعت لأمي. إيمان: كوم يمه، أخذها يم أهلها... هناك بلكي تكدر تفكر عدل ومتستعجل بشي. سعاد: شو انتي تقررين بكيفج؟ شنو جنتج لو جنتي؟

إيمان: تنهدت. سعاد، متشوفين حال البنية... خلي تروح لأهلها إذا تريد. فيصل: إذا طلعتي مالج رجعة لهنا. آلاء: عساني لا رجعت... يله علي كوم أخذني. علي: أي يله... أخذت سويجي. سعاد: إذا طلعتي منا الجهال ميروحون وياج. آلاء: هو بكيفج؟ ميروحون... تعال أحمد، تعالي ماما زينة، أمشونه. فيصل: كلنه ميرحون! جريتهم. علي: خلي يرحون ويه أمهم، شبيك فيصل! أطفال ذوله، ميكدرون بدون أمهم... عوفهم يله عمو تعالو. زينه: وين حروح؟

علي: لبيت جدو حبيبتي، يله تعالي. أروى: راح علي أخذ آلاء والجهال وداهم لاهلها... صار البيت هدوء. سعاد تباوع لساره بحقد، وفيصل كاعد وايده على راسه. انغام: خاله هسه شراح يصير؟ سعاد: شيصير يعني؟ فيصل يطلع هاي من بيتي، يروح شو وين يوديها؟ اني ما أقبل تكعد ويانه. ورده: ضحكت. بيتج. إيمان: خزرتها. أروى: يربي شوكت نرتاح؟ هسه احنه مو حالنه حال العوائل؟ ليش من دون الناس المشاكل ملازمتنه؟

غنى: كاعدة أدرس بالغرفة وسمعت صوت فهد يصيح... طلعت أركض، لكيته كاعد مدري ويامن يحجي ويصيح... عززة فهد! صوتك فضحتنه! شبيك؟ فهد: أشرت لها تسكت. اسمع عمر! كل لهالابن الكو... ابن الكح... إذا الكفه أنعل والديه. دخيل أرْجع إذا ما أخلي يستقيل، أطلع اني كلب ابن كلب! عباله نقلت بعد ما أرجع! كَام يخبص بكيفه... ماشي ماشي، يله مع السلامه! سديت الموبايل. مباوع لغنى: شبيج واكفة على راسي جنج شمعة فكر؟

غنى: يمعود صوتك كولش عالي، تلكى وصل للطابق الأخير. صدك تحجي؟ مابقئ واحد ماسمع صوتك. فهد: وانتِ هيج حنينه وخايفه على الناس من صوتي؟ غنى: ما خايفة على الناس، خايفة على روحي. يا مسلم الله! اني هنا كاعدة وحدي، إذا الناس سمعت صوت رجال عندي، شيكولون عليه؟ تنهدت. ليش تجيب لي الحجاية يا فهد؟ فهد: لهدرجة صوتي جان عالي؟ غنى: أي. باوعت له. ليش جنت تصيح؟

فهد: مسحت على وجهي. اكو واحد من الشرطة حاجي عليه كدام زملائه، عود اني مأذيهم. والمسؤول سامعه بالصدفة وخابرني قبل شويه عتبني. غنى: كعدت. ليش؟ فهد: على أساس عود اني معتدي على الشرطة، ومن رادو يشتكون عليه سكتتهم بالفلوس. غنى: فتحت عيوني. يعني اغتصبته؟ فهد: من أركعج بهاي النفاضة هم واحد يكلي ليش؟ لج بابا الاعتداء مو بس للي ابالج. اني أقصد اعتداء بالشتم والضرب مو بالصخام. غنى: زين هو ليش اشتكى عليك؟

فهد: علمي علمج. اني الشرطة كلها تضوج مني، بس محد تجرأ يلفق عليّ سالفة، لا ويوصلها للمسؤول. غنى: يعني إذا يضوج منك يلفق عليك تهمة؟ شكد سخيف لعد. فهد: مو بس سخيف، وابن كح.... هم. غنى: سكتت. فهد: أباوع لها. سكتت وظهر احمرار طفيف على وجها. شنو استحيتي؟ غنى: بهدوء. مو عيب عليك تتلفظ هالالفاظ هاي؟ عود انت المثقف هيج تحجي؟ لعد شخليت لولد الشارع؟ فهد: علساس انتي ماسامعة هالالفاظ سابقاً؟

وبعدين أنصحج تتعودين، لأن اني إذا صرت عصبي ما أخلي فشوره أو غلطة ما أكولها، وما أخجل ولا أستحي. غنى: بس هالشي غلط. انت لسانك سليط. فهد: أعترف، ما أنكر هالشي. غنى: رجاءً فهد، ألفاظك هاي لتتلفظها كدامي، إذا صدك تعتبرني مثل أختك. فهد: خلص ما أردج. أحاول ألزم لساني كدامچ. راضية؟ غنى: ابتسمت. شكراً الك. تشرب جاي؟ فهد: إذا اكو. غنى: أي كايمة أصبلَك. صبيت له بالكوب، لأن انتبهت استكان ما يكفي. وديته للي. فهد: شكراً.

غنى: عفواً. فهد: دك موبايلي. شفتها أمي. جاوبتها. الوو. غنى: أباع لفهد. مدري شَكالت له أمه وانقلب وجهه. فهد: واني شكو؟ يطبّه طوب! إيمان: يا يمه! شلون يطبّه طوب؟ غير أخوك! فهد: أخو مثل هذا أدوس عليه ولا أهتم. هو جاب المشاكل لنفسه. هذا شي ميخصني... دخلي يروح يدبر عيشتهن سوه. إيمان: شو أحسك ما مهتم. فهد: وليش أهتم؟ شنو جانت عندي علاقة بي وانكسر كلبي من عرس؟ شبيج يمه؟ إيمان: انت ضل استهزئ...

وهاي اني مخابرتك رايدة أشوف حل لأخوك. مرته أخذت جهالها وراحت، وهاي مرته الثانية بقت بالبيت وكل ساعة كابة العيطة بينها وبين سعاد. فهد: يطبّهن مرض! اني شكو؟ نارهم تاكل حطبهم. إيمان: خلص شبيك يمه؟ صرت عصبي. فهد: العفو يمه، مو قصدي أعلي صوتي، بس ذولة نرفزوني. إيمان: لا يمه أدري بيك... يله يمه، أخذ راحتك. فهد: سديته. ذاب الموبايل. ويكلك انت مرتاح؟ غنى: خير فهد؟ صاير شي؟ فهد: رجعت نفسي على القنفة. تعبت غنى، تعبت.

غنى: إذا تحب تحجي، اني أسمعك. فهد: تنهدت. من جان عمري 18 ولليوم اني شايل مسوؤلية البيت على راسي. ما فديوم أهلي اعتمدو على نفسهم. من جنت صغير اني متحمل مسؤليتهم. مدارس أخوتي بدون استثناء، أجيب مصرف للبيت، أراقب الشغل والأملاك، وفوك هذا جنت لازم أقرأ لأن طالب ولازم أطلع معدل... تعبت وجزعت روحي. إلى متى أبقه متحمل عاتق شكبره على كتافي؟ ولازم آكل تبن وأسكت. غنى: زين أخوتك ميساعدوك؟ فهد: ضحكت. يساعدوني؟ كل عقلج تحجين؟

يمعودة واحد لاهي بالوناسة والطلعة ومرته وجهاله، اني أصرف عليهم... والثاني ميدخل بشي، أهم شي مرته وهو وجهاله، لا يحجي ولا يدخل... والثالث دكتور، ولاهي بروحه وطز بفهد... محد بيهم حاول يشيل ولو ربع المسوؤلية الي عليه. غنى: انت مو الجبير، ليش كل المسؤلية عليك؟ فهد: صحيح، بس كل الاعتماد عليه. غنى: خليت إيدي على خدي. متوقعتك هيج مشلوع كلب. فهد: لعد لو أحجي السوالف كلها جان شكتلي؟ غنى: عادي أسألك سؤال وتجاوبني عليه بصراحة.

فهد: تفضلي. غنى: شعجب لسه متزوجت؟ مع إنو أخوك الأصغر منك متزوج. فهد: انتي ينضم عندح سر؟ لو تسويها طوط؟ يازمار. غنى: ابتسمت. شتكول انت؟ فهد: اني ما أرتاح لك، بس راح أحجيلج. اني متزوج. غنى: بلا شقة. أدري هسه تكلي انتي. فهد: ضحكت. احم، أي صحيح. غنى: زين انت متتمنى تزوج تكون عائلة؟ تشوف حياتك ويه شريكة تناسبك؟ فهد: شسوي بالشريكة واني عندي الي يعوضني عنها؟

على الأقل إذا ما عجبتني أغيرها، مو مثل الزواج الدائمي، أتلبس أتلبس بيها. غنى: مفهمت قصدك. فهد: اكو نسوان هواي يعوضني عن الزوجة، وأكدر أحصلهن بأكثر من طريقة وبالشكل الي يعجبني. غنى: فتحت عيوني. هذا حرام! الزنى من الكبائر. فهد: ما أزني اني... كتلج اكو هواي أساليب عندي. غنى: ضليت صافنة بوجهه. وشلون تتقبل على نفسك تسوي هيج شي؟ فهد: ما مسوي شي حرام ولا غاصب أحد على شي. هاي حياتي واني حر بيها.

غنى: حسيت بشعور غريب من سمعت كلامه. ما عندي قدرة على وصفه... بهدوء. متخاف أكل لأروى؟ فهد: ضحكت. وإذا كلتليها شنو راح أخاف مثلا؟ ضميت أيديه. سمعيني غنى، اني بحياتي ما خايف من شي، ولا راح أخاف. غنى: كل إنسان عنده خوف، ولو من شي واحد بالحياة. فهد: صحيح. كل إنسان عنده خوف من شي. غنى: ومن شنو تخاف؟ فهد: الشي الوحيد الي خايف منه، إنو أخسر نفسي بيوم من الأيام. والا باقي الأشياء ما تهز شعرة مني.

غنى: شنو الي خلاك تحجي لي أسرارك؟ فهد: نفس الشي الي خلاچ تحجي لي عن حياتچ. غنى: ضلو واحد يباوع للثاني بدون إصدار أي صوت، والهدوء صار سيد المكان. بعد مرور خمس أيام. أروى: أكول آلاء ما ناوي ترجع؟ انغام: البارحة مخابرة لخالتي كايلتلها أريد أتطلك. إيمان: ليش تستعجل؟ مو كنالها فكري زين واهدي، وبعدين أخذي القرار الي يناسبج. انغام: تدرين بألاء طكة ونص. أروى: الحق ينكال. منو تقبل رجلها يتزوج عليها؟

لا ويجيب لها ضرة تكعد وياها بنفس البيت؟ انغام: خلينه ساكتين أروى. آلاء وصخة قذرة، يجيها الرجل يلكاها هيج، أكيد تنفر نفسه منها. خاصه انتي تعرفين الزلم بمن رغبتهم. أروى: جيت أرد عليها وسمعت صوت رجلين. شفت مرت فيصل الثانية نازلة من فوك، لابسة تراك أحمر مضبوب ضب على جسمها. ساره: مساء الخير. انغام: باستغراب. مساء النور. باوعت لأروى. ساره: دخلت للمطبخ.

إيمان: أباع لها. راحت للمطبخ، صبت لروحها أكل واجت كعدت بالكاع متربعة وتاكل. ساره: خاله عاشت ايدج، الأكل يخبل. إيمان: بالعافية حبيبتي. ساره: أكول خاله، البارحة الكيكة مالتج كلش عجبتني، سوي لي اليوم. ورده: مو جنها أخذت ميانه بسرعة. أروى: اسكتي. ما علينه. أباع لها. ماخذة راحتها باللبس، لا وزايد هم، وتفتر بالبيت براحتها. هاي صار لها فترة خانسة، بس اليوم مدري شبيها. انغام: حبيبتي ساره، تره الولد على جيه.

ساره: أي هله بيهم. انغام: راح تبقين هيج كدامهم؟ ساره: لا أكيد أبَدل، شلون أبقى هيج. أروى: كملت أكل وكامت صعدت لغرفتها. طاح حظك يافيصل، دومه اختيارك أعوج. أجو الولد من الدوامات، كمنه نحضر الغدة. رجعت نزلت ساره، ضلينه صافنين عليها لابسة دشداشة، أو هي دشداشة بالاسم، بس ضيكه إلى درجة، وهي سمينة وجسمها كله مبين. هاي صدك تحجي. ساره: الله يساعدكم. علي: نزلت راسي. ويساعدج خويه. منذر: استغفر الله. انغام تعاي وراي.

انغام: اجيت. فيصل: خزرتها. بت الكلب! شهاللبس؟ ساره: باوعت له صفح ومشيت. خاله يله استعجلي حبابة، جوعانة. سعاد: انتي مو تسممتي؟ ولي لغرفتج. ساره: هاي اسمها تصبيرة، أو جواعة على كولتكم، مو غدة. وبعدين اني شماكلة؟ هو ماعون تمن. حتى بهاي عينج عليه. إيمان: اجتي سعاد تحجي، قاطعتها أم فيصل. رجاءً عوفيها، خلي نتغدى بهدوء. الله يخليج، خلو نقاشاتكم وره الغدة. ورده: جنه بوحدة، صرنه بأثنين. سعاد: شنو قصدج ولج؟

ورده: أقصد إنو أمي فقيرة، دومهم الفكورة مكابليها. جيبي ماما، خلي أروح أتغدى وأكعد أقرأ أحسن من الحش الماله داعي. إيمان: ضحكت. بعد كلبي، شلون لسان يكنس ويرش... شلنه المواعين وكعدنه نتغدى. أروى: سوده عليه. احنه جاي نتغدى، وفهد هسه بالبصرة، تلكيه متخربطة أحواله بسبب الإنذار. إيمان: سوده عليه. تلكيه ميت من التعب هسه، لا أكله زينة، لا نومة مريحة. فيصل: شبيجن كلبتنها مناحة؟ خلي نتسمم. علي: تسمم؟ عسا سم. ساره: منو فهد؟

أروى: أخونه. ساره: ها؟ ابن منو؟ خاله إيمان لو خاله سعاد؟ إيمان: ابني اني. ساره: أكول خاله، عمو أبو فيصل ليش تزوج عليج؟ انغام: باوعت لأروى. هاي ناوية على مشكلة شكلها. سعاد: نزلت الخاشوكة. حظ الكح... غير يعرفن شلون يصيدن الزلم. علي: انتي ه... إيمان: خزرته بمعنى اسكت. ساره: شتقصدين؟ هاي عليه؟ سعاد: البعه طلي، يمعمع... اني ما ذكرت اسمج. ساره: شفت أمك شتكول. فيصل: بعصبييييه. سكتييييي! كاااااافي! ساره: برب.... عجوز مخرفة.

غنى: فهد لتضل واكف على راسي، تره دوختني. فهد: هاي فوك ما أكلج شتخلين للأكل. غنى: والله العظيم أعرف أطبخ. شبيك فهد؟ من اجيت من الكلية لسه انت واكف تكلي سوي هيج وسوي هيج. فهد: شِكالت؟ الدكمه شبيج؟ اخذي نفس، ماتعبتي. غنى: رفعت الخاشوكة. دهاك شوف شعايزها. فهد: نظيفة الخاشوكة. غنى: ياا صدوك تحجي؟ شلون أطبخ بيها وهي وصخة؟ دهاك يله لتشلع كلبي. فهد: أخذت الخاشوكة ضكتها. ملح. غنى: ترستها ملح. هم تكلي بعد...

رجعت خليت ملح على مركة البانية. استوت، طفيتها وصبيت. شلنه المواعين وطلعنه نتغدى. فهد: شلونها أروى؟ غنى: لا زينة. دأسألها كل يوم عن أخبارها، مثل ما وصيتني. فهد: خوش، عفيه عليج. غنى: ما كلولك شوكت تكدر ترجع لاهلك وشغلك؟ فهد: لسه ما بلغوني، بس اني بعد غير الأسبوع ما أبقى. أختنكت أريد أطلع. غنى: شلت شعري. همه غير على حساب سلامتك؟ ليش تعرض نفسك للخطر؟ فهد: يباوع لركبتها. يا خطر؟ يا بطيخ؟

اني إذا بقيت هنا يمكن أموت من الخنكة. غنى: هيج الكعدة وياي تخنك؟ فهد: حقيقةً صاير أستلطفچ نوعاً ما. غنى: لا دخيلك! إذا مستلطفتني حموت علساس. فهد: مو صارلنه يومين هادئين ومتفقين؟ ليش تخربين صداقتنه وتخلينه نتعارك؟ غنى: ابتسمت. خلص خلص، أسفه. كولشي ولا نتعارك.

فهد: كملنه غدة، كمت شلت المواعين وياها. اجت صبت لي جاي وراحت تصلي. أباع لها. من اجيت لهنا ولليوم تجي تسوي غدة وتنظف وكلشي تسوي على الساكت. لاحظت عليها حيل ملتزمة بصلاتها، ولا مرة شفتها تركت القرآن. مرات أسمع صوتها الفجر تبجي، أدري بيها تقره قرآن لأهلها بهالفترة من اليوم وتضل تبجي عليهم. علاقتي بيها زينة نوعاً ما هالايام، جاي نتعامل مثل الأصدقاء. حسيتها تفهمني، فكمت أحجي لها الي بكلبي بدون ما أتردد، مع إنو اني ما أحجي عن حياتي الشخصية نهائياً، بس الها حجيت. يمكن جنت أحتاج شخص غريب أفتح له كلبي، عسى ولعل يفهمني.

غنى: فهد أحجي وياك. فهد: ها؟ غنى: أريد أطلع أتسوك. فهد: ليش؟ خلص المسواك الي بالبيت؟ غنى: لا بس حيخلص. فهد: باجر اني أخابر البواب وأخليه يتسوك. لتطلعين انتي. غنى: لا فهد، أكيد من تكله حيشك. اني أروح أتسوك وأرجع، ما أتأخر. فهد: للسوك مترحين؟ كلها زلم هناك. اكو هنا مركز تسوق، روحي تسوكي منه. غنى: بس... فهد: غنى رجاءً، سمعي الكلام. غنى: أوك. فهد: كومي صبي لي بعد جاي. غنى: كمت. متشبع جاي انت. فهد: متشبعين صلاة انتي.

غنى: بشرفك هاي هم مقارنة؟ فهد: دكومي بسرعة. غنى: صبّت له جاي واجيت كعدت أقرأ كتاب. فهد: شنو هذا؟ غنى: كتاب اسمه... أمة العباقرة. كتاب ثقافي كولش حلو. فهد: منين جبتي؟ غنى: اجاني هدية بعيد ميلادي. فهد: منو جابه الج؟ غنى: أستاذ جعفر. فهد: شربت من الجاي. وشنو المناسبة ويجيبلچ هدية؟

غنى: أستاذ جعفر يصير أخو صديقتي المقربة نرجس، وبنفس الوقت جوارينه. علاقتي بيهم أكثر من مجرد جيرة. احنه شبه تربينا سوه، وكل سنة جانو يسوولي عيد ميلاد. ابتسمت. حتى حبيبي مروان جانو يسووله عيد ميلاد. فهد: ها؟ هسه فهمت. الأستاذ طلع ملازمچ ويحبچ من الطفولة... شعجب ما خطبچ؟ غنى: رفعت حاجبي. يعني خاطبچ؟ غنى: هزيت راسي. بس رفضت. فهد: وليش رفضتي؟

غنى: ما جنت مستعدة. أخويه جان هستوه ميت، وداخله بحالة هستيرية، ما جنت متقبلة أي شي بحياتي. وبنفس الوقت اني ما أحب أستاذ جعفر. فهد: يعني انتي تردين تزوجين عن حب؟ غنى: لا مو شرط عن حب. المهم يكون زواجي مبني على اقتناع تام بشريك حياتي. ما أكذب وأكلك ما أريد أحب، بالعكس. على كد ما سمعت عن الحب وقريت عنه، كمت أتمنى أحب. بس هالتشوف الحب بزمنه صار عبارة عن لعب وانحدر لأشياء قذرة ومقرفة دنسته...

بس مع هذا يجوز اني أتزوج زواج تقليدي وأحب زوجي من يصير حلالي. طبقاً للآية الكريمة ((وجعلنا بينكم مودة ورحمة) فهد: ابتسمت. حلو تفكيرج. قلة بهالزمن يفكرون هيج. غنى: شكراً على المجاملة. فهد: أبداً ماكو مجاملة، هاي الحقيقة. غنى: ابتسمت. مخلية شعري وره أذني. اني حروح أنام. فهد: اني هم أكوم أنام. دخلت لغرفتي، ذبيت ملابسي ونمت. : ها لكيتو؟ : فص ملح وذاب. ماهو. : بس أريد أفتهم وين أختفى؟

ما خليت مكان ما سألت بي عنه وماكو. حتى للمركز صار له أسبوع ما مداوم. : بس تره احنه لسه ما متأكدين منه، هذا هو لو لا. لتتهورون. : المشكلة احنه ما شايفين شكله. كل الي نعرفه إنو يشتغل بمركز (... . بس منو هو مندري. كومة ضباط هناك. حاولنه نعرف ما جاي نلكا. : زين احنه الأخبار الي اجتنه هو بالاستخبارات؟ والاستخبارات شجابها على هالمركز؟ : علمي علمك. اني هم صافن بهالشغلة. بس لتخاف، أولاً وأخيراً تتوضح الأمور.

: شفت الأمير اليوم أخذ جم مرة؟ : أي. الحلوات اله والمخربطات لنه. : لتخاف، الأمير يحب يسوي عملية ابدالية. اليوم هذني بحضنه، باجر بحضن غيره. ولتنسى هذني سبايا، وضيفتهم يمتعنه. : هههه صدقت يا مجاهد، على كولة الأمير. : هههه. أروى: ولج تعالي شوفيها! طلعت أنكس من آلاء! ولج كل ساعة تذبلها بسمار على سعاد وتكب العيطة. نرجس: هسه أخوج متوازي؟ متزوج اثنين؟ أروى: هي هاي دو... بعائلته يحبون تعدد الزوجات، وأولهم أبويه المرحوم.

نرجس: هههه. ولج همه الزلم كلهم هيج. أروى: كون غنى هنا وتسمع جان بطلت على الأعذار واكتفت برجال يكتفي بيها وما يعرس عليها. نرجس: تنهدت. ولج هاي غنى سالفتها سالفة. أصلاً بغير عالم. أروى: ليش؟ هاي صار لها يومين شحلاتها الضحكة مالية وجها. حتى أحسن من قبل. الواضح عليها مرتاحة بالعيشة ويه خالتها. نرجس: مستحيل أصدك غنى ترتاح هناك. هي جانت تشكي منها، بس يجوز ضحكها جذب حتى متخلينه نشيل همها. أروى: فديتها. ورده غناوي.

نرجس: أكلي تبن! ولحجين عليها هيج كدامي. أروى: هههه. طاح حظج! لسه تغارين عليها؟ نرجس: أي صديقتي ما أقبل عليها. أروى: لعد واني؟ نرجس: انتي هم ما أقبل عليج. أكلج صدك، شخبار أخوج المزنجر على كولة غنى؟ شو ما جاي أشوفه. أروى: هههه. مو هنا عنده إنذار. وبعدين خلي تولي غنى هاي. لأن هي بيضة تشوف الناس مزنجرين. شبي أخويه يخبل والله! البنات مستقتلات عليه، هو بس شخصيته كافية. نرجس: أي والله صدقتي، واني أول المعجبات.

أروى: وين الله؟ وينعجب بيج فهد ويخطبج؟ نرجس: أويلي الله! ياريت ياريت وأصير مرت هال مزنجر هذا. أروى: هههه. ولج وين سرحتي؟ صدكتي أخطبج لأخويه حتى تهججي بليلة ضلمة. نرجس: الله يطيح حظج! روحي والله زعلت. أروى: هههه. سديته وكمت. شفت ساره كبالي. هلو ساره، تفضلي. ساره: سمعت صوت ضحكج. ويامن جنتي تحجين؟ أروى: باستغراب. ليش تسألين؟ ساره: جنتي تحجين ويه حبيبج مو؟ أروى: عيب هالحجي ساره. شنو شايفتني وتحجين هيج؟

جنت أحجي ويه صديقتي. أصلاً ما أعرف ليش دابررلج اني. ساره: شبيج؟ أكلتيني يا حبيبتي؟ ليش؟ شكو بيها وإذا حبيتي؟ تره عادي تكدرين تعتبريني أختج وسولفي لي الي بكلبج. أروى: ما عندي شي حتى أسولفه والله. مجرد جنت أحجي ويه صديقتي. ساره: أوك، براحتج. لتحجين. أروى: هاي شبيها؟ الحمد لله والشكر. نزلت لكيت علي كاعد يم أمي. رحت كعدت يمهم. فهد: شباب الملخصات كلهن انطيتهن لمرتضى، تكدرون تاخذوهن منه وتستنسخوهن. يله تفضلو.

غنى: نرجس تعالي، خلي ناخذ الملخصات من مرتضى. نرجس: ياا عشتو! ولا آخذ ولا أروح. بالامتحان جعفر غصباً عنه يكعد يلخص لي المادة. غنى: انتي ضلي معتمدة على جعفر، خلي أشوف شلون بيج بعدين بالامتحانات النهائية. نرجس: لتخافين عليه. نسرة اني. غنى: دروحي يالنسرة! خلي أجيب الملخص من مرتضى والحكج. تقدمت. مرتضى، عادي أخذ الملخصات. مرتضى: انتي شنو من بشر؟ غنى: شبيك مرتضى؟ مرتضى: بعد كل الي سويتي ويايه، جايه تحجين ويايه؟

بس فهميني انتي ليش تكرهيني؟ شمسويلج اني؟ غنى: باستغراب. اني شسويلك؟ مرتضى: ليش البارحة من خابرتج ما جاوبتيني؟ وبعدين حظرتيني. غنى: بصدمة. انيي؟ مرتضى: أي انتي. غنى: طخت براسي. بسيطة يا فهد. اني أسفة مرتضى، تلكى الجهال ردوا عليك. مرتضى: والجهال شمعرفهم؟ شلون يحظرون؟ غنى: أقسم بالله مو اني حظرتك. يجوز الجهال جانو يتشاقون وياك، أكيد مو قصدهم. اني أسفة والله مجنت أدري. اليوم اني أعلمهم.

مرتضى: لا، ماكو داعي. جهال شمعرفهم. اعتذر على ردة فعلي عليج. تفضلي الملخصات. غنى: لا مصار شي. أخذت الملخصات منه، طلعت استنسختها ورحت يم نرجس وأروى. نرجس: شبيج؟ كلبتي وجهج. أروى: ها؟ طنكرتي؟ غنى: هيج ماكو شي. ما عولت يخلص الدوام، حسيت الساعتين الي مرن سنتين. طلعت من المحاضرة أمشي بسرعة، بس أريد أوصل للبيت. نزلت من العبرية، أمشي. يربي الشارع صار شطوله اليوم. وصلت للعماره، صعدت للشقة. تكلتني الحجية أشواق. يبوووو.

أشواق: ها حبيبتي غنى، الله يساعدج. غنى: هلو خاله، ويساعدج. شلونج؟ أشواق: الحمد لله. أكلج، اني مسوية دولمة، متجين تتغدين يمنه اني والحجي؟ غنى: سبع عافيات حجية. اني صايمة من رخصتج. غنى: فتحت باب الشقة ودخلت. لكيت الأفندي كاعد بالصالة يلعب رياضة. شمرت الملازم والجنطة. كووووم! أريد أحجييي وياك. فهد: وعليكم السلام. مو علساس انتي متدينة؟ متعرفين إنو تحية الإسلام هاي؟ غنى: بعصبية. الي مثلك حرام واحد يسلم عليهم.

فهد: كمت. شبيج انتي؟ شنو ضرب فيوز عندج؟ غنى: انت شلون تحظررررر مرتتتتتضى من جهازززي؟ أصلاًاااااا منو سمحلك تمد ايدك على موبايليييي؟ هااااا؟ فهد: بهدوء. يا مرتضى؟ وعن أي موبايل تحجين؟ غنى: لتسوي روحك فقير وكولشي متعرف. مرتضى ابن عمتك داك عليّ البارحة وانت حاظره! شلون تتصررررف من كيفك؟ أحجييييي! فهد: لويت إصبعها. حجه بفحيح. هذا إصبعج إذا ترفعيه بوجهي بعد، ورب العزة أكسره الج وأخليج تشوفين الويل. افتهمتييييي؟

شديت على إصبعها. وبالنسبة لمرتضى، أي اني حظرته. تكولين ليش؟ أكلج بكيفي. ميعجبني تحاجي. اكو أسئلة ثانية؟ غنى: دفعته متألمة. انت واحد متستحي وما عندك احترام. ولو اني شأتوقع من واحد زاني وحقير مثلك؟ غير هالسوالف المريضة هاي. ولو انت أصلاً الله غاضب عليك.

فهد: صفكتها راشدي. من أكول انتن النسوان مو مال احترام يلوموني. من جنت لابسج مثل الي برجلي مشيتي مثل الساعة، بس من عاملتج بأسلوب واحترام كمتي تتجاوزين. بس هو صوجي اني من فتحتلج كلبي وحجيتلج عن حياتي، تالي كمتي تلزمين أسراري عليّ. عبالج أهتم؟ طز بيج وبألي يشد على ايدج. وبالنسبة لمرتضى، روحي خلي يضل يضحك عليج. انتو ثنينكم نفس الصنف. درت وجهي، أخذت موبايلي وطلعت من الشقة. أنعل أبو المسؤول لابو الأوامر.

غنى: صافنة وخالة إيدها على خدها. مشيت للغرفة وكفت كدام المراية. أباع إصابع إيده مطبوعة على خدي وشفتي انجرحت هم. راجعت كلامي. اني هسه عيرته بالأشياء الي سولفها لي. اني من شوكت أعير واحد سر أمنه عليه؟ بجيت. هسه اني تعاركت ويه فهد؟ لا وعلى مود مرتضى. ضليت كاعدة بغرفتي، كوة صليت ورحت نمت. ما أريد أفكر بالموضوع. كعدت المغرب. كمت شفت غرفته فارغة. لسه مارجع. يربي وين راح؟

مو يدري حياته بخطر وميصير يطلع من البيت. رحت شربت مي. غمضت عيوني متألمة. شفايفي مجروحة. ضليت كاعدة للساعة 3 بالليل وهو لسه مارجع. إنفتحت الباب ودخل. أصلاً ما باوع لي. طب بسرعة لغرفته. ومن يومها اني وفهد بعد ما حجينه. كمت أروح وأجي للجامعة. الطبخ يبگه مثل ما هو. لا هو ياكل من أكلي ولا يحاجيني. وأغلب الوقت كاعدين بالغرفة. لا هو يطلع ولا اني. لحد ما سمعت بي يحجي ويه المسؤول. كاله بعد يومين تكدر ترجع لبيتك. كدروا يعرفون منو الي مبلغ. بيومها هم اطلع وكعدت أنتظره لليل. أجه. كمت. فهد لازم نحجي.

فهد: ببرود. ماكو حجي بيناتنه. وخري عن وجهي. غنى: رحت ورا فهد. مو بكيفك لازم نحجي. فهد: طلعي بره. غنى: جريته من ايده. مو أحجي وياك! لتتجاهلني. فهد: دفعها على الحايط بقوة وتقرب عليها. **************يتبع