رواية ذنوب على قيد الغفران الفصل الثامن عشر 18 - بقلم براء

مسحت دموعي وركزت ويه فهد. جان ديخابر سد موبايله ورجع مدري المن خابر. فهد: الوو يمه. ايمان: الو هاا يمه الله يساعدك ليش لسه ما اجيت انتظرتك على الغده لسه ماتغديت. فهد: بأسف ما اكدر ارجع يمه اجاني امر من المسوؤل ولازم اطلع خفاره. ايمان: امر؟ زين وين راح تروح وشوكت ترجع؟ فهد: للبصره فتره وارجع لتخافين يمه. ايمان: زين شعجب اول تالي انت تروح خفارات هيج طويله وشكد راح تبقه؟

فهد: هاي بعد الشغل يحتم علينه المهم اني ما اريدج تشيلين هم احاول اول ما اخلص خفاره ارجع. ايمان: هسه انت وينك؟ فهد: جاي اسوق، طلعت للبصره. ايمان: زين انت لا اخذت ملابس وياك لا اكلت شي شلون بيك يمه؟ فهد: لتشيلين هم ادبر روحي...

يله يمه اني اترخص لان جاي اسوق وهاا ما اوصيج شتحتاجين الخزنه تعرفين رمزها شتردين سحبي منها المبلغ الي تردي وصرفي وهم كلي لعلي خلي يوصل اروى كل يوم مو يخليها تروح وحدها تره اطيح حظه وخلي يدير باله عليكم لبين ما ارجع. ايمان: يبعد كلبي كلبك دومك شايل همنه لتخاف حبيبي اني شحتاج ما اتتردد اخذ... يله روح انت جاي تسوق ما يصير تخابر وتسوق دير بالك على نفسك. فهد: ماشي يله مع السلامه. سديت الموبايل لكيت غنى صافنه بوجهي.

فهد: ها خير؟ غنى: شنو مترجع لبيت اهلك؟ فهد: ها ابشرج راح اقيم هنا لمده غير معلومه. غنى: شلون شلون؟ فهد: بهدوء مثل ما سمعتي. غنى: وعلى اي اساس تبقه هنا؟ فهد: على اساس انو نفرض عليه ابقه بالمكان الي اني بي وهاي اوامر من فوك ولسوء حظي اني هنا وانحبست يمج وبعد ما اكدر اطلع منا لمن تخلص الشغله الي بالي. غنى: كمت... انت صدك تحجي شلون تبقه هنا مو علساس شويه وتروح وبعدين اني شعليه بشغلك مشكلتك هاي.

فهد: هم نزل ويدبج على السطح... انتي ملاحظه انو هذا بيتي يعني ابقه اروح بكيفي مو انتي تحاسبيني. غنى: يافهد اعرف هذا بيتك بس محلتلك الكعده غير هسه. فهد: شسوي اذا انتي وجهج فكر كلما اشوفج تصيرلي مشكله. غنى: تره انت الي تجيني مو اني اصلا ما اعرف ليش احسك دتجذب ولا اكو شغل ولا بطيخ بس انت تريد تبقه هنا.

فهد: بعصبيه تره اني ما ميت عليج لو ما مجبور ما ابقه هنا ولا اكابلج بس شغلي يحتم عليه ابقه هنا والا اني مستحيل ابات يمج ليله وحده... كتلج الف مره وارجع اكلج نظرتي الج نظرة اخو لاخته وعمرها ما راح تتغير وانتي اخر وحده ممكن افكر بيها تفكير يتجاوز الاخوه فبطلي هالتفكير لا انتي ملكة جمال الكره الارضيه ولا اني الحيوان وما اكدر اسيطر على نفسي كدامج. غنى: عافني وراح للغرفه الثانيه... طب وسد الباب بقوه...

كعدت هسه شجايه اني شبيج غنى فوك ما الرجال فضل عليج وخلاج ببيته تحاجي بهالاسلوب اني من شوكت جنت وقحه طول عمري احترم واقدر الكل حتى الي يأذيني اكتفي بانو ابتعد عنه لعد شبيه ويه فهد الرجال كلشي ما سوالي بالعكس شايل همي ومتحمل مسؤوليتي وبالنسبة لتصرفاته فهاي حياته وهو حر اني شكو بي... كمت اني لازم اعتذر منه تصرفي كان جدا غلط اصلا عيب احاجي هيج لاهو بكدي ولا غلط بحقي... دكيت الباب مارد. فهد: راح ادخل.

فتحت الباب لكيتة متمدد بس باقي بالنطرون والفانيلة الداخلية السودة. غنى: احم فهد عادي نحجي. فهد: لا رد. غنى: تقدمت وكفت كباله فهد اني اسفه اعرف ضوجتك بكلامي وجنت فضه وياك زيادة عن اللزوم اعذرني والله مجان قصدي بس اني من اصير عصبية اضل اخبص بالحجي. فهد: بهدوء انتي قليلة ادب. غنى: فعلاً اني اسلوبي كان بي قلة احترام واعتذر منك اتمنى تنسى انت مو تكول اني اعتبرج مثل اروى ووردة اعتبرني غلطت واجيت اعتذر منك......

وهذا بيتك تريد تبقه تريد تروح انت حر حتى اني اطلع اذا انت متريدني ابقه.... صدكني عمري ما انسى الي سويته ويايه بس اني بنيه وصعب عليه اتقبل وجود رجال غريب ويايه بنفس البيت. فهد: غنى اني راح ابقه هنا لمده غير معلومه... يعني راح اكابلج واكعد واني عصبي وما اتحمل تصرفاتج صدكي واعتقدي بالله اذا دستي بطني اغسل الشقه بشعرج والله. غنى: شنو رأيك نعقد هدنه؟ فهد: ذكرتيني بصلح الحديبيه... اي احجي.

غنى: خلي نتفق انو منتعارك نهائيا بهالفتره منا لحد ما تروح اني احاول اتحملك وانت هم. فهد: وتقنعيني انو انتي راح تصيرين حمل وديع بهالفتره؟ غنى: فهد انت متعرفني اني مسالمة جدا وهاي حقيقه بس مرات الظروف الي نمر بيها تجبرنه نصير اعصاب ولو على اقل سبب كان. فهد: واضح انج مسالمة من لسانج الي بطول النعال. غنى: انقهرت من كلامه... اشكرك هذا من ذوقك. عفته واجيت اروح. فهد: تعاي اني موافق على هدنتج هاي... مديت ايدي.

غنى: باوعت لايده... اعتذر ما اصافح زلم. فهد: جريت ايدها وكمت... همست يم اذنها لتنسين انتي ما محرمة عليه. ضغطت على ايدها وعفتها. فهد: اني جوعان شمسوية غده؟ غنى: باوعت لأيدي وباوعتله... ممسوية غده. فهد: يعني انتي ما عندج كل مميز لا انثى عليها العين ولا ام بيت عليها العين ولا شخصيتج عليها العين انطيني شي واحد يبهرني بيج.

غنى: بهدوء اولا اني لان وحدي مو دائما اطبخ لان كولشي الجان اكل وثانيا الانوثة انت فاهمها غلط مو شرط اتموع واتصنع شخصيتي حتى اصير انثى وثالثا شخصيتي عادية جدا مثلي مثل غيري محد شخصيته مميزة الا ماندر يافهد ورابعا واخيرا لا اني اكدر ابهرك بشي بيه ولا انت لان لا اني اهتملك والعكس صحيح وهسه اروح اسوي غده. فهد: باوعت لظهرها.... لسانها متر ونص متعرفها هادئة مدري صلفة...

باوعت لروحي لازم ابدل ملابسي واسبح احس روحي مختنك فتحت كنتوري همزين عايف لروحي جم تراك هنا للضرورة... اخذت تراك ودخلت للحمام اسبح. غنى: طلعت تمن حسوي تمن احمر ماكو غير هالاكله تتسوه بسرعه وهذا اذا اتأخر يمكن يعتقلني... وكفت اسوي حسيت الحجاب خنكني بودي انزعه بس ما اكدر صحيح مو حرام هو بس اني نفسيتي متتقبل.... باوعت لفهد دخل للمطبخ لابس ملابس غير الي اجى بيهم. غنى: بهدوء منين جبت هالملابس؟

فهد: عايف جزء من ملابسي هنا للضرورة.... شجاي تسوين؟ غنى: تمن احمر... تحبه؟ فهد: ماكو داعي تطبخين لو كايلتي جان طلبت اكل من برة. غنى: الثلاجة متروسة اكل ماكو داعي تصرف. فهد: ابتسمت وكفت يمها مديت ايدي موخر الشال عنها. غنى: بعصبية هاي ليش؟ فهد: لتتقيدين بوجودي اخذي راحتج كتلج اول وتالي مو حرام تبقين هيج كدامي. غنى: بس. فهد: يله خلصي الغده تره جوعان اريد اتغده وانام. غنى: ضليت ساكتة شريد احجي كملت التمن وعفته يستوي...

رحت سويت زلاطة ركض ركض وطلعت روبة خليتها بطاسة شفت التمن استوى صبيته وخليت الزلاطة والروبة وطلعت خليت الصينية كباله.... تفضل اعذرني من التقصير سويت الاكل بسرعة بسرعة بس ان شاءالله من باجر اطبخ. فهد: عينه على شعرها... بهدوء لا عادي عاشت ايدج. غنى: اذا خلصت صيحلي اني حروح اصلي تأخرت صلاتي من وره ناس. فهد: الناس تريد تتغده روحي تعبدي بالغرفة.

غنى: طبيت للغرفة سديتها رحت بسرعة توضيت وصليت وكعدت اقرة قران رفعت ايدي يارب ارحمني ووفقني بحياتي ومشيني على الطريق الصحيح دائما وابعد كل شر عني ياالله كملت صلاة كمت لفيت شعري الي كارهته بس ما اكدر اكصه... طلعت من الغرفة لكيت الصالة فارغة وهدوء.... طبيت للمطبخ شفت المواعين مغسولة ومحطوطة على السنكي ابتسمت والله وطلع يعرف يشتغل هالفهد لا وخوش يجلف... رجعت كلمن لمكانه ورحت انام وراية كومة دراسة.

سعاد: اكول ايمان فهد وينه؟ ايمان: اجا انذار بالشغل وماراح يرجع. سعاد: باوعت لبتول هو كلج؟ ايمان: اي خابرني الظهر كلي. سعاد: اكول ايمان من جان فهد هالفتره هواي يختفي. ايمان: قابل هو بكيفه عنده شغل واجا امر هو والضباط الي شلون يكلهم لا؟ سعاد: وانتي مصدكة؟ ايمان: وليش ما اصدكه يعني؟ سعاد: اجيت احجي بس سكتت.... اقصد شعجب اجه الامر فجئة غير يبلغوهم قبل بوقت. ايمان: هاي بعد صارت شغلة مستعجلة كمت يله من رخصتج.

سعاد: كمت صعدت فوك.... يمه احس كلبي واج نار متأكدة هالفهد ما عنده واجب ياخوفي تطلع عنده وحدة ساعتها كل مخططاتي تخرب من جانت بتول بالمتوسطة واني ازرع افكار براسها... فهد الج... فهد راح يتزوجج فهد وفهد وفهد.... لمن خليتها تحبه وتفكر بي بس الي جنت غافلة عنه انو اخلي فهد يلتفت لبتول هم بس للاسف هو حتى بوجها ميباوع وشلون بيه ما ادري اني اريد فهد يتزوج بتول بأي طريقة كانت لان محد يكدر يوصلني للاملاك غير بتول...

اذا تزوجت فهد اكيد تصير فلوسه فلوسها وساعتها راح تدر علي فلوس... كعدت ااااخ بس لو اعرف سالم ليش خطة هالخطوة قبل لا يموت ادفع عمري كله واعرف سالم ليش سجل كلشي لفهد... اباوع طب فيصل خير. فيصل: يمه محتاج فلوس. سعاد: ما عندي ولا فلس وخر عن وجهي. فيصل: دشوفي ماكو منا منا. سعاد: شسوي يعني ابوج واجيبلك... جاي اكول ما عندي اطرش انت. فيصل: اعصابج يمه هسه شحجينه شبيج كبيتي عليه. سعاد: بصوت عالي...

متت اختنكت طلعت روحي واني اكلكم اشتغلو درسو تعبو على رواحكم بس ماكو فايدة طاحت وصلة من لساني واني اكلكم شوفو ولد ايمان شوفو حياة ولد ايام شوفو عيشتها لأيمان.... ولكم حسرة علي الفلس اشيله انطي الكم وفهد كل فتره يدز امه للعمرة.... هاي من غير سفراتها لبنان وتركيا وايران وسوريا وغيرها وغيرهت ومو بعيدة هالسنة يوديها للحج واني كاعدة اباوع عليها وايدي على خدي ليش بشنو احسن مني هي. فيصل: يمه شجاج انفتكتي عليه خير شصاير.

سعاد: متت تعبت طلعت روحي من وراكم عجزت واني اقارنكم بولد ايمان انت يفصيل شوف فهد تخرج وصار ضابط انت يمنذر شوف علي صار دكتور انت ليش لا ولج ليلى اروى صارت مهندسة وانتي بطلتي ولكم ليش قصرت وياكم اني بقيت ويه سالم ودست على روحي وعلى كرامتي لخاطركم كلت كلشي يهون لعيون جهالي وهاي جهالي شجازوني احجي بشنوووو جايزيتوني انتو. فيصل: يمه شجاج اهدي راح تترخبطين.

سعاد: وخر عني الله ياخذك امشييي اطلع برة والله اذا اسمعك جاي تريد فلوس انعل والديك فتهمت. فيصل: فتهمت فتهمت بس لتصيرين عصبية خلص راح اطلع.... طلعت من غرفتها هاي شبيها امي شنو راح تخرف.. افف فتحت باب غرفتي ودخلت. آلاء: كتلك ما اكدر اجي هالفتره اصبر خلي اضبط اموري ونطلع شب... باوعت لفيصل دخل يله حبي بعدين احاجيج اجه رجلي سديته بسرعة. فيصل: ويامن جنتي تحجين؟ آلاء: صديقتي تريد اروحلها هالفتره بس كتلها ما عندي مجال.

فيصل: ليش روحي يمها غيري جو وفكيني منج. آلاء: بگلبي ليش هو لو بأيدي ابقه وياك بس من لا جاره باقية وياك على حساب جهالي.... عوجت حلكي هسه الي يسمعك يكول لازكة بيك. فيصل: دتعاي مشتاقلج. آلاء: هو انت بس بهاي فالح. غنى: كاعدة اقره قران وطلع فهد اباوعلة يمشي وهو مغمض هذا شبي راح يوكع على وجهه. فهد: كعدت باوعتلها انتي متملين من الصلاة؟ غنى: بهدوء ليش امل اكو واحد يمل من العبادة؟ فهد: اعرف عبادة من نوع آخر تحبين اشرحلج؟

غنى: لا شكرا.... رجعت اكمل قران. فهد: غنى. غنى: صدقت نعم. فهد: سويلي جاي بلا زحمة عليج. غنى: ابتسمت اي هسه... كمت للمطبخ اني اصلا جنت مسوية جاي صبيتلة وطلعت... تفضل. فهد: اخذته. غنى: اباوعلة اخذ الاستكان وكام يباوعلة ويباوع على الخاشوكة. فهد: غسلتي الاستكان بماي حار قبل لتصبي؟ غنى: باستغراب اي بس ليش دتسوي هيج؟ فهد: بهدوء اني عندي عقدة بموضوع النظافة ادقق هواي. غنى: كعدت بس هاي يسموها وسوسة. فهد: هاي طبيعتي شسوي.

غنى: باوعتلة انت هواي تدقق وهالشي مو زين عليك يدمرك. فهد: شربت من الجاي صحيح كلامج التدقيق يتعب بس كتلج كل واحد وطبيعته. غنى: شلت القران والسجادة دخلتهن للغرفة ضفرت شعري وطلعت كعدت بالصالة. فهد: اباوع لضفيرتها شثخنها وشطولها... شعرج من شفته اخر مرة جان بطولج شو هسه اكصر؟ غنى: بهدوء اي اني كصيته. فهد: بعصبية ليش كصيتي؟ غنى: بهدوء ليش تصيح هو شعرك لو شعري؟ فهد: مارديت عليها...

اخذت الريمون اكلب اختنكت ما اعرف اكعد بالبيت هسه لو باقي عد فرح ولا هنا. غنى: خلا على اغاني.... دورة اني هستوني قاريه قران والدنيا مغرب. فهد: هسه غير تكعد البلكة مدري البرصة. غنى: اولا اني مو برصة البرصة تصير برتقالية. فهد: اي لعد انتي من جماعة اعداء الشمس وتلكيج صابغة شعرج. غنى: اسمهم الالبينو واني لا صهباء ولا من الالبينو شعري اسود لا ابيض ولا برتقالي.

فهد: فتهمنه انتي مثقفة وتعرفين اصناف البشر ماكو داعي تبذلين كل هالجهد. غنى: انت شنو مشكلتك ويايه؟ فهد: غثيثة متنبلعين دخيل ربج توكفين على الكلب. غنى: بهدوء الي يسمعك يكول شو شمسويتلك ليش تتعامل ويايه هيج ما اعتقد بدر مني تصرف مو حلو حتى يكون هذا اسلوبك ويايه. فهد: اكره المتصنعين. غنى: ما الومك حقك تحجي هيج يمكن كثرت الاشخاص المتصنعين الي مروا بحياتك خلوك تفكر هيج بس صدكني مو كل اصابعك سوه فلتعمم بكلامك....

لنفرض لو نريد نعمم على الشباب وكلنه كلهم نفس شخصيتك جان اني اول الناس بطلت اتزوج. فهد: لو ما شايف بعيني النسوان تجي جوه رجلي جان صدكتج. غنى: هاي فئة من النساء اني بعيدة كل البعد عنها يمكن هنه حبن شخصيتك المتسلطة او منصبك او فلوسك او رجولتك او شكلك الي ممكن يكون محبب الهم اما اني كل هذني لا شيئ عندي. فهد: لعد شتريدين كائن فضائي؟

غنى: ابتسمت اريد رجال مختلف رجال يحسسني انو هو ابويه رجال استند عليه بكل لحظة تعب تمر عليه رجال يحب ربه رجال صايم مصلي بار بأهله انسان محترم ارفع القبعه احتراماً لشخصيته وتربيته. فهد: مو شرط كل شخص مو ملتزم ميحب ربه. غنى: صحيح كلامك انت هسه عندك هواي صفات حلوة بس للاسف بعض الصفات السيئة الي عندك غطت على الاشياء الحلوة الي بيك. فهد: المشكلة اني مقتنع بنفسي اقتناع تام عمري ما حسيت نفسي مسوي شي غلط.

غنى: اكبر غلط انك تقتنع بتصرفاتك الغلط... اتمنى لو اكدر اوصلك افكاري بصورة تكون كافية حتى تقنعك. فهد: ضميت اديه... عوفج مني خلينه نحجي عنج. غنى: ماكو شي مميز حتى تعرفه عني... اسمي تعرفه عمري 21 قسم انكليزي جنت عايشة بمنطقة... عندي اخ واحد اسمه مروان وبيبيتي اسمها زكية هواياتي القراءة والطبخ وبس. فهد: شلون كدرتي تتحملين مسؤولية بيت كامل وحدج؟

غنى: تنهدت من تصحى على الدنيا ومتلكه احد يعاونك ولا يكلك هاك تنجبر تعتمد على نفسك اني وعيت لكيت نفسي كاعدة عايشة ببيت صغير دخل اقل من متوسط محد يسأل عني محد يكلي شمحتاجة شتريدين كمت اكبر واشوف بيبيتي تتعب من الخياط وتحاول بأي طريقة كانت تمشي امرونه انجبرت اني اتعلم عنها وكمت اخيط واني بنية صغيرة... دمعت عيونها... وفوك هذا جان مرض مروان مصدر خوف بحياتي مجنت اكدر ارتاح واترك مسؤوليته من كد ما خايفة عليه...

الظروف يافهد تخلينه ننجبر نسوي كلشي... تصدق عمري ما حسيت نفسي بنية. فهد: شلون يعني؟ غنى: جنت بالاعدادية اشوف البنات وتفكيرهن البعيد عني جدا جان كلامهن عن الطلعات والسفرات الصالونات واهم شي الحب... جنت اسمع قصصهن واسرح وياهن عمري ما سويت ولا شي من الي ذكرته هسه. فهد: يعني تقنعيني انو انتي بحياتج ما حبيتي؟ غنى: ابتسمت ولامرة. فهد: معقولة فترة مراهقتج ما عشتيها؟

غنى: فترة مراهقتي كضيتها محدبة على الكتب والمكينة ساعة اقرة وساعة اخيط... كتلك مو كل اصابعك سوه اكو اشخاص عايشين بمأساة لتشوف نفسك مرتاح وراسك بارد عبالك كلها مثلك. فهد: ضحكت ههه منو الي راسه بارد؟ غنى: انت. فهد: شخص انتي ما شايفة الي بداخله شنو لتكولين عليه مرتاح. غنى: ليش الي مثلك شنو الصعوبة الي ممكن يشوفوها؟

فهد: هزيت راسي ما احب اتطرق لمواضيع مدفونة من زمان بس خلي شغلة ابالج ماكو واحد مرتاح بهالدنيا اصلا ما ادري شله داعي هالنقاش هذا كمت. غنى: فهد. فهد: همهم كأجابة. غنى: بعد نص ساعة على الاذان متصلي؟ فهد: صفنت عليها... بهدوء لا. غنى: باوعتله.... هزيت راسي يجي اليوم الي حتصلي بي اني متأكدة... ان الله يهدي من يشاء بغير حساب.

فهد: ابتسمت داخل للغرفة خابرت امي كتلها وصلت للبصرة من زمان وهي خطية مصدكة وكاعدة تتحمدلي بالسلامة متدري اني على بعد نص ساعة من البيت. غنى: اباوع عليه من يمشي شكد ما هو مزعج ويزهك بس والله ثكيل ويتصرف برزانة حتى مشيته هيبة وارجع اكول حرامات هالشخصية مدمرتها صفاته السيئة.... شلت موبايلي شفت مكالمة فائتة من خالتي رجعت خابرتها... الوو. سحر: الوو حبيبتي غنى وينج دكيت عليج هواي. غنى: منتبهت. سحر: شلونج يمه شخبارج؟

غنى: الحمد لله زينة انتي شلونج عمو شلونه؟ سحر: لا الحمد لله الاطباء طمنونة عن صحته ان شاء الله العملية ترجعه مثل اول واحسن. غنى: فرحتيني الله يكومه بالسلامة. سحر: بعد كلبي كلبج... احجيلي شلونج انتي محتاجة شي تردين شي كليلي اني ادزلج. غنى: لا الحمد لله مكتفية. سحر: عندي الج خبر حلو. غنى: شنو؟ سحر: بس يخلص عمج عمليته اجيبه للعراق واجي راح نستقر هناك. غنى: كمت صدك تحجين؟

سحر: اي والله بس يسوي العملية وتتحسن حالته نرجع للعراق اني كد الوعد يا غنى ما اتنازلت ولا تهربت منج مثل ما انتي مفكرة بس ظرف عمج جبرني ابقه يمه وان شاء الله راجعتلج وبعد ما اعوفج. غنى: ابتسمت صدوك خالة. سحر: اي حبيبتي. غنى: سديته منها والابتسامة شاكة وجهي بلكي صدك ترجع خالتي عن قريب ونرجع لبيتنا. فرح: وين صار فهد مو علساس يجي يمي شو لسه ماجه... اخابره ميجاوب...

افف رجعت دكيت عليه مرة ثانية طلعلي انتظار ويامن جاي يحجي... رجعت خابرته جاوبني... الوو فهد صار ساعة ادك عليك. فهد: ماشفتي طلعلج انتظار يعني جنت اخابر. فرح: ويامن جنت تحجي؟ فهد: وانتي شكو... وبعدين ليش مخابرتني؟ فرح: وينك مو علساس تجي يمي انتظرتك هواي. فهد: صار عندي شغل ما كدرت اجي. فرح: زين شوكت تجي؟ فهد: ما عندي مجال اجيج. فرح: ليش؟ فهد: مو كلنة عدنه نعل ما اكدر اجي لتلحين. فرح: وشوكت يخلص شغلك؟

فهد: ما ادري يله باي سديته. صباحا. غنى: كعدت الصبح دخلت سبحت وبدلت وطلعت للمطبخ بسرعة حضرت ريوك لفهد وطلعت من الشقة... تمشيت للشارع العام انتظرت العبرية تجي... صعدت ورحت للكلية دخلت شفت البنات كاعدات بنفس المكان بس هالمرة بتول وياهم... بوستهن صباح الخير. البنات: صباح الورد. غنى: شلونجن؟ نرجس: اني موزينة. غنى: كعدت ليش؟ اروى: متعاركة ويه جعفر اكو غيرها يعني. غنى: حرام عليج نرجس شكد تتناكرين ويه استاذ جعفر.

نرجس: ولج صاير يحاسب لتلبسين لتتمكيجين لتسوين هيج ولتتصرفين هيج مدري شبي. غنى: غير يخاف عليج ياحبيبتي مو كولشي تاخذيه بعصبية هو لوما حريص عليج ميكلج هيج. بتول: هذا اسمه تحكم مو حرص شنو معناها يحاسبها على كلشي. غنى: هو اخوها يحبها ميكرها ويريدها دائما احسن الناس وما انكلبت الدنيا اذا كلها على شي لا وهي عاقلة واكيد تتفهم كلامه. اروى: لك فديت الحكيم والله. غنى: ابتسمت يله امشونه حتبدي المحاضرات مشيت ويه نرجس...

انتي عقلي شويه تره تدرين بالاستاذ اذا طنكر يرسبج مثل العام. نرجس: لتخافين ميرسبني مادام شغلته بأيدي. غنى: اي شغلة؟ نرجس: هيج يله تعالي. ايمان: كاعدة الكط تمن للغده وسمعت صوت هبد شنو السالفة محد كاعد هسه كلهم بالدوام وسعاد والجناين نايمات كمت صعدت فوك لكيت سعاد مدري شتلم من الصالة.... سعاد شنو هذا؟ سعاد: نظفت غرفتي وطلعت اذب الزبل بس تبدت المكرافة بالصالة. ايمان: وغرفتج بيها رماد؟ سعاد: وين الرماد؟

ايمان: وكفت كدامها سعاد انتي شجاي تسوين تره تصرفاتج ابد ما جاي تعجبني مرة بالسطح وهسه بالصالة شنو سالفتج؟ سعاد: شبيج ايمان شنو تحكميني وين اروح وين اجي ما مسمولج تحققين وياي فتهمتي. ايمان: بدون ما ارد عليها طبيت لغرفتي اخذت عباتي وطلعت رحت للحجية خولة دكيت الباب طلعتلي علا. علا: صباح الخير خاله. ايمان: صباح النور حبيبتي الحجية كاعدة؟ علا: اي شتدرين بيها انتي من الستة تكعد.

ايمان: طبيت لكيت الحجية كاعدة تلكط خضرة صباح الخير عمه. ياسمين: صبحج الله بالخير يمه... باوعت لايمان مبين عدها حجي... شبيج ام فهد. ايمان: باوعت لعلا. ياسمين: تعالي لغرفتي... كمنه طبينة لغرفتي سديت الباب كعدي احجيلي شكو. ايمان: عمه سعاد. ياسمين: شبيها المصكوعة انوب شمسوية. ايمان: ذاك اليوم صعدت اجيب طحين من السطح و..... سولفتلها كلشي لحد الي صار قبل شوية. ياسمين: لطمت على صدري عزة العزاج سعيدان....

ولج خاف هاي جاي تسوي سحر. ايمان: بسم الله... معقولة. ياسمين: كلشي معقول ليش لا زين انتي شنو شفتي بأيدي؟ ايمان: كلشي ماشفت اول مرة حرمل وثاني مرة رماد. ياسمين: هاي جاي تسوي اعمال مال مشاكل حتى تكب العيطة بالبيت متريدنه مرتاحين. ايمان: شمدريج انتي؟ ياسمين: احنة امهات كبل يصيحولنه كلشي نعرف وسعاد ماعدها شي غير المشاكل...

سمعيني زين كل يوم ويه الاذان تشغلين قران وراح انطيج مي زمزم رشي بالبيت حتى يتبارك وما اوصيج اهم شي القران تره حسه بالبيت يطرد شكو عمل والله الحامي ان شاء الله. ايمان: عمه اني خايفة على ولدي وبناتي لتروح تسويلهم شي.

ياسمين: مادام بحفظ الرحمان انتو لتخافين من شي النكس ما يسوي غير النكس مثله عوفيها عليه اني اعرف شسوي وياها الواضح تقدم العمر ما وشيباتها مالهن احترام بس بسيطة اعيد تربيتها مثل ما سويت قبل شنو عبالها كبرت لا والله بعز صحتي وعشر زلم مو كدي كومي عمه روحي لبيتج وسويها وكأن شيئاً لم يكن وهاي الكح..... ام السحورة دبارها عندي.

ايمان: طلعت قلقانة من عمتي رجعت للبيت فتشت بغرفة بناتي نفظتها نفظ رغم اتعب بسرعة بس كلشي ولا سوالف الشعوذة الله لا يوفقج يالمتسمين.... طلعت لغرفة علي هم نفس الشي وصلت لغرفة فهد كلبتها كلاب اخاف عليه بشكل مو طبيعي ادري بيها شكد تكره فهد وحاقدة عليه ضليت للظهر افتش بالغرف اذن الظهر رحت علكت القران بصوت عالي بالبيت ورجعت اكمل تفتيش بالغرفة لتروح شو شتحط لولدي والله اموت لو صارلهم شي.... سمعت صوت وردة ورايه.

وردة: ماما شجاي تسوين؟ ايمان: بستها شلونج يمه شلونج بالامتحان؟ وردة: لا الحمد لله كلش زينة ما كتلتي ليش مدعثرة غرفة فهد مو تدرين بي يكره الهوسة. ايمان: هسه اعزلها يله روحي بدلي وصلي علما اشوف الغده... قفلت غرفة فهد وطلعت لكيت اكو اكل الطباخ طلعت انغام طابخة بعد كلبي شلون بنية وردة. غنى: دخلت للعماره صعدت للشقة صادفت ود من طلعت من المصعد. ود: سلام. غنى: وعليكم السلام شلونج؟

ود: هله حبيبتي انتي شلونج مبين عليج تعبانة اكيد ستوج اجيتي من الكلية. غنى: اي والله هستوني اجيت. ود: يله اخذي راحتج. غنى: رحت للشقة فتحت الباب ودخلت شفت فهد كاعد بالصالة... ابتسمت بهدوء السلام عليكم. فهد: ذبيت الموبايل وعليكم السلام تأخرتي. غنى: ذبيت الجنطة وكعدت.... بتعب اي اليوم كومة محاضرات عندي. فهد: شفتي اروى؟ غنى: اي شفتها هي وبتول. فهد: منو وصلها من طلعتو؟

غنى: اعتقد كالت علي راح يجي عليهن لان باعتقادها انت عندك انذار وسافرت للبصرة متدري بيك هنا.... صدوك فهد على طاري شغلك انت ليش اجاك امر تبقه هنا؟ فهد: المفروض ما احجي كدامج بس اني اشتغل ضابط بالاستخبارات.... ووصلت اخبار للارهابيين انو اني لازم مجموعة وجاي ادربها حتى ادزها للموصل وغير هيج لقيت القبض على وحدة من العصابات التابعة لداعش ولهسبب جاي يدورون عليه لان خربت كل مخططاتهم. غنى: فتحت عيوني عززة متخاف؟

فهد: ليش اخاف هذا شغلي. غنى: فتحت شالي زين انت شلون بيك اذا طلعت منا؟ فهد: اكو شك انو اكو واحد من المركز موصللهم الخبر وصارو يعرفوني بس لحد الان ماكو شي مؤكد همه هسه جاي يدورون عليه واكيد المسوؤل راح يطلعني من السالفة بطريقته الخاصة واني بكل الاحوال ميهمني اموت وله اعيش الاثنين نفس الشي. غنى: شنو الي صاير وياك بحيث هيج كاره الحياة؟

فهد: بهدوء غنى كومي صلي الدنيا ظهر وبما انو انتي داعية اسلامية ومتدينة ميصير تأخرين صلاتج مو؟ غنى: كمت شيخلصني بعد من لسانك خلص يحجايه رجعي لمكانج.... دخلت لغرفتي سبحت وبدلت وطلعت خليت الاكل على النار... البارحة بالليل طبخت فاصولية لان ما الحك وره الدوام اطبخ... نصيت النار ورحت صليت كملت وكمت صبيت غده جبت الصينية واجيت يله فهد. فهد: كعدت باوعت للصينية... شدراج اكلتي المفضلة الفاصولية؟

غنى: ابتسمت ما ادري بيك تحبها اصلا ردت اسوي مركة شجر بس سويت فاصولية. فهد: اخذت الخاشوكة مباوعلها همزين ما سويتي مركة شجر جان درتها على راسج. غنى: بالعكس والله طيبة. فهد: كشولت اموت منها تلعب روحي من اشوفها. غنى: لولا الاذواق لبارت السلع اكلي. فهد: لتتفلسفين خلي نتغده. غنى: تنهدت شكد مستفز يا الهي. فهد: اكلت سمعتج... بالمناسبة طيبة الفاصولية. غنى: بهدوء بالعافية....

كملنه غده كمت شلت المواعين غسلتها وصبيت جاي النه طلعت انطيت كوب فهد اله لان ميكفي استكان وطبعا يشرب الجاي بدون شكر شلون ما ادري. فهد: باوعتلها ها. غنى: هيج مو يمك... اكول فهد العصر اريد اطلع. فهد: وين؟ غنى: اجيب كم حاجة محتاجتهن. فهد: ماكو طلعة اني متسوك كل شي للبيت كعدي وسكتي. غنى: فهد احتاج سجلات وكم شغلة الي. فهد: لتطلعين خابري وحدة من صديقاتج تجيبلج وانتي انطيها فلوس باجر.

غنى: فهد تره انت ممسموحلك تكممني اني من حجيت فحتى ابلغك مو اخذ اذنك. فهد: غنى خصم الحجي طلعة ماكو. غنى: بس. فهد: قاطعتها انتهي النقاش. غنى: استغفر الله. علي: سمعت الباب يندك طلعت فتحتها شفت وحدة مبوشة... منو حضرتج؟ : اهلك موجودين. علي: اي بس منو انتي؟ : سويلي مجال اريد احجي ويه النسوان الله يخليك. علي: تفضلي دخلي... دخلت للطرمة طبيت صحت لامي والبنات طلعن. سعاد: منو انتي؟ ايمان: تفضلي حبيبة شتردين. : منو ام فيصل؟

سعاد: باوعت للأء... اني خير. : رفعت البوشية... خاله اعرفج بنفسي اني سارة مرت فيصل الثانية. آلاء: بصدمة شنوووو.