رواية ذنوب على قيد الغفران الفصل الثامن والعشرون 28 - بقلم براء

وكفت أعامل عليها، داكلب بباقي الموديلات، وحسيت بأيد على متني. درت وجهي. "مرحباً." باوعتلها. "هاي وين شايفتها... مراحب، تفضلي؟ "ممكن نحجي شوية." ستحيت أخجلها. "تفضلي، أسمعج." "عادي نبتعد شوية عن المحل؟ طلعت من المحل ووكفت وياها على جهة. "بالبداية أحب أعرفج بنفسي، أني فرح. إنتي شنو اسمج؟ "لا تصغرتاً بيج، بس أني ما أعرفج حتى أكلج اسمي." "إذا تذكرين، أني التقيت بيج بالمول قبل فترة مو طويلة."

صفنت عليها. "أي صحيح، هاي الي شفتها بالمول وتعاركنه بيومها أني وفهد من وراها... احم، عفواً، لا ما أتذكرج." "ركزي وياي، بالمنصور من جنتي جاية إنتي وأخوج." "أخويه؟ "إنتي مو أخت فهد؟ باستنكار. "أخته! وإنتي منين تعرفين فهد؟ "موضوع طويل... خلينة بالمهم، أكلج حبيبتي، إنتي وين ساكنة؟ أقصد بيتكم بأي منطقة؟ لارد. باوعتلها. "ليش ساكتة؟ "ممكن أعرف ليش هالأسئلة؟

أني ما أعرفج ولا اكو أي صلة بيناتنة. ما أحب أكون فضة وياج، بس أسألتج مو منطقية." طلعت ورقة وقلم من جنطتي. "تفضلي، كتبت رقمي. اتصلي عليه اليوم، وأني أفهمج على كلشي. صدكي أني محتاجة مساعدتج، الشغلة شغلة حياة أو موت." عقلي طار. "هاي شبيها؟ "واتمنى فهد ما يدري إنو إحنه التقينا." خليت الورقة بأيدها. "يلله باي."

باوعت للرقم وخليته بالجنطة. اشتريت العباية وطلعت. أخذت تاكسي ورجعت للعماره. وصلت للبيت، ذبيت الأغراض وكعدت. طلعت الرقم، أبَاوع شتريد مني هاي. تنهدت. طبعاً عرفت الها صلة بفهد، بس شنو نوع العلاقة الي بيناتهم؟ ما أعرف. معقولة حبيبته؟ لا، شنو حبيبته هاي جبيرة، يعني مبينة بگد فهد. رجعت الورقة واخذت موبايلي. دزيت رسالة لفهد. "إذا صارلك مجال تعال باجر." جاوبني. "خو ما صاير شي؟ "من تجي نتفاهم."

دزيتها وغلقت الجهاز. تمددت على القنفة وبدت الأفكار السخيفة تراودني وكمت أحلل من كيفي. يعني معقولة فهد هيج ذوقه؟ خزية البنية رغم جانت حلوة وجدا هم، بس جبيرة ولبسها وطريقة كلامها غريبة، يعني استغربت من شفتها حسيتها غريبة أطوار. وأخاف أتصل عليها وتصيرلي مشكلة، وأني ما عايزة. *** "تعاي بتول." "ها خالتي." "أريد أنزل. فهد موجود لو لا؟ "أي خالتي موجود. كاعد بالصالة." تنهدت. "شلون هسه أني أختنكت من الغرفة، أريد أشم هوا."

"خالتي، إذا تردين نروح باجر لبيت جدي نشوفهم، وإنتي هم تغيرين جو." "شنو شايفتني خبله أعوف البيت وأروح حتى يخلالالهن الجو؟ لا وجنايني الساقطات، ولا كأن أني عمتهن. تلاثتهن صافات ويه إيمان. يربج، حتى آلاء الي جنت أكول هاي خوش آدمية هم انكلبت." "ليش هو يايوم العمة والجنة تصافن؟ وبعدين إنتي جنتي ماشيتهم على الصراط المستقيم، أكيد من شافنج صرتي بهالموقف كيفن."

"دخيلج تهدئ الأوضاع وأعرف شلون أتصرف وياهن. كله من هاي ساس البله ساره." "يربي، شكد أكره هالساره. أحسها مسمومة وفكرية." "وإحساسج مو غلط، هي فعلاً هيج." هزيت راسي ونزلت. لكيتهم متجمعين. فهد كاعد يشرب جاي وكل ساعة يصيح بالجهال. "منذر، سكت ابنك، راح أشيله أركعه بالگاع." "كافي بابا، اكعد." "بابا، اليد العب." "ابن المسلوك، صارلك ساعة تزاكط. صرعت راسي، شگد تلغث. عليمن طالع إنت؟ "بيبي سيحي بامو فد يسيح عليه."

"ضربته بالشقة، ليش تصيح على حبيبي؟ ها؟ كلشي ولا سالم." "شلته يمه، أروح فدوة لهالوجه. عمو فهد ضوجك يروح عمتك. خل يروح بعد منحبه." "أي، ما أحبه." خزرته. "تعال ولك." اجه يمشي جنه فقمه. "باوعتله، متحبني إنت؟ "بخوف. لا لا أحبك." "امشي روح اكعد، وإذا سمعت صوتك أشيلك فلقة. يله." راح كعد على القنفة وخنس.

"أباوعله. صعد على القنفة كعد وضم أديه بمعنى صرت عاقل. كل شويه يشيل راسه يباوع لفهد ويدنك يضحك. هههه، والله سوالفه تموت ضحك. سالم عمره أربع سنوات بس سينما والدخول بلاش. يموت ضحك. سوالفه تونس، بس يخاف من فهد. خوفه الحية." "فهد، حباب، مابينه حيل نسوي عشة، خل نطلع نجيب من المطعم ونجي." "بهدوء. عندج موبايل؟ وخابري المطعم الي تردي وطلبي الي تردي يجيبو الج. ماكو داعي تسفسفن من مكان لمكان كل ساعة." "هذا شبي متحمل على الكل؟

كل شوية مفشلة واحد." "سكتي ليسمعج، وانوب يجي سراج ويفشلج إنتي هم." *** "ولج، جاي أكلج شفت أخته بالسوك." "ولج، بس لا حاچيتيها؟ "أي حاچيتها، وانطيتها رقمي هم، وكتلها خابريني أريد أحجي وياها." "عزة العزاج وصخم راسج، ولج شلون تسوين هيج؟ تدرين إذا عرف فهد راح يطلع بروحج."

"إلهام، تره أني مليت. راح يصير سنة أني متزوجة فهد متعة، ولليوم ما اعترف بيه كزوجة، ولا سوا زواجنه دائمي. وماكو حل يخلي فهد كدام الأمر الواقع ويخليه ينجبر يعلن زواجنه غير علم أهله." "إنتي صدك تحجين؟ لج بابا، هذا واحد ماكو تكة يوديج للشط ويرجعج عطشانة. خبله إنتي. يعني عبالج إذا عرفت أخته وكالت لأهله راح يتغير شي؟ مو بعيدة بدل ما يعلن زواجكم يطلقج ويخلص من حجي أهله." "أكلج لتخوفيني، شنو يطلقني؟

أني تفاهمت ويه أخته وكتلها خابريني، بس لتكولين لفهد. ومن تخابرني أشرحلها الموضوع وأطلب منها تگول لأهله بدون ما تدخلني. يعني اللوم كله يصير عليّ، وأني ما إلي علم. كاعدة وساكتة، لا من شاف ولا من درة." "ومنو كال أخته ماراح تگله؟ "لا، أخته مبينة حبابة كلش، ما أعتقد تگله. بس لو تخابرني، أني أعرف شلون أقنعها." "والله إنتي صايرة تخوفين." "ليش؟ الي تعاشر فهد شتتعلم غير الدهاء والذكاء." "شمعاشرة فرح؟

هي ساعتين تلاثة يجي بيهن يمج يشبع ويتونس ويطلع. حتى بيتوته ما يبات وياج. ياعشرة هاي؟ وبعدين تتوقعين حتى لو أهله يدرون معقولة يقبلون ابنهم يتزوج وحدة مطلقة وعدها ولد؟ لا ومتزوجة متعة؟ "يعني لازم تسميني. لتخافين، هالتفاصيل ماراح أتطرق الها." "يعني ماراح تكولين عندج ولد؟ تنهدت. "لا طبعاً، وشعندي كايلتها." "فرح، تره هذا ابنچ. حرام عليچ. صارلج أشهر طويلة كاطلته عد أبو وما كلفتي نفسج حتى تسألين عليه." "شسويله يعني؟

أذبح روحي؟ ذاك ويا كلشي مابي. وبعدين أني إلى متى أظل عايشة لأجل غيري؟ خل أفكر بنفسي شوية." "بس هذا ابنچ." "وأني ما قصرت وياه. ربيته وتعبت عليه وضيعت نص عمري على حسابه. وهو هسه جبير ويكدر يعتمد على نفسه. كافي، خل أبَاوع لروحي وأعوض السنوات الي طافت من عمري وأتونس وأعيش حالي حال النسوان وأحقق كل رغباتي وحقوقي الي انحرمت منها بسبب طليقي الكلب." "تره ابنچ عمره عشر سنوات. يعني مو جبير."

"هسه عوفج من ابني، خل عد أبو. وحسب الي سمعته، مرت أبو مداريته وتحبه. يعني وجودي ماله داعي بحياته. المهم عندي هسه فهد وبس. أريد أثبت زواجي منه وأعيش وياه وأجيب أطفال منه يعوضوني عن غلطة عمري الي نتج بيها طفل لا أني أريده ولا أكدر أتقبله." "ما أگول غير الله يهديج. الناس تتمنى أظفر طفل، وإنتي ترفسين النعمة متبطرة." ***

"رجعت من الجامعة. نمت وكعدت العصر. سويت حملة تنظيف. حيجي رجب، وإني هالاشهر الثلاثة، رجب وشعبان ورمضان، أحس أجوائهن تختلف عن باقي الأشهر. رفعت شعري بكباية عالية وشديته بشريط مال شعر حتى ميضوجني. رفعت ستريجي وبديت أنظف. شلت البردات غسلتهن، وبديت أكنس وأمسح البيت. صعدت على الكرسي أمسح الشبابيك." "دخلت للشقة، لكيتها واكفة على الكرسي تمسح. ضحكت على منظرها، هي ضعيفة وناعمة كلش، تحسها طفلة. الله يساعدهم."

"درت وجهي عليه. ابتسمت. هاي شوكت جيت؟ "هسه جيت، بس إنتي ملتهية بالتنظيف وما حسيتي عليه. خير، شعندج؟ "دانظف البيت، بما إنو حيجي رجب وهالأشهر فضيلة. وأحب أسويلها طقوس خاصة." "والله عندج سوالف." "معليك بيه. تعال اكعد." رحت غسلت واجيت انطيته گلاص مي. مبين عليه تعبان. "أباوعلها، عيونها مصوبة للكاع. على شنو تباوعين؟ "والله اجيت أبجي. شنو هاي فهد؟ ليش طاب بحذائك؟ هستوني كنسّت الصالة ومسحتها. شوف شسويت." "ترا حذائي نظيفة."

كعدت ومسحت على وجهي. "أووف منك." "ما گلتلي ليش البارحة طلبتي مني اجي؟ تنهدت وكمت فتحت جنطتي وانطيته الورقة. "باوعت. شنو هذا؟ "رقم فرح." "فتحت عيوني. وإنتي منين تعرفيها؟ وشجابلج رقمها؟ "من رحت للسوك اجتني وحدة وعرفتني عن نفسها وكالت اسمها فرح. وتريد تعرف اسمي وسألتني بعض الأسئلة، منها إنو أني أكون أختك. مدري منين جايبة هالمعلومة. وبالتالي انطتني رقمها وأصرت أتصل عليها ضروري. وأني ماحبيت أخطو هيج خطوة بدون ما أكلك."

"شسألتج بله؟ "سألتني على مكان سكني وما گلتلها." أباوع لوجهه انكلب وبينت دمارات رگبته. "كمت." "لزمت أيده. وين فهد؟ "مسحت على شعرها. راجعلك. ما أتأخر." أخذ سويجي وطلعت. "بسيطة يافرح، عبالج تمشيهن عليه ذني." وصلت بعد فترة. صفيت السيارة ونزلت. دگيت الباب. فتحتها. "هلو حبيبي، شلون... "قاطعتها. جريتها من شعرها وطببتها جوه." "آآآخ فهد، شبيك؟ "وين جنتي البارحة؟ "ها." "بعصبية. ويننننن جنتييييي؟ "رحت للسوك."

"شديت على شعرها. من شفتي أختييييي هنااااك، ليشششش ترحيييين تحاجيهاااا؟ أني شكايييييلج؟ مو گتلللللج بحياتيييي الخاصة والعائلية لتدخلييييين. لا ورايحة مطيتها رقمججج حتى تحجين وياهاااا. عبالج ما ألكفج مثلاً؟ تدرررين لو مخابرتج اختيييي أو لا، أني ميشكل فرق عندييي، بس ما أريد أورطها على هالسوالف وهي بريئة." "بألم فهد، بس اسمعني. اااااخ فهد، شلعت شعري." "شوفي ولج، ما عاش ولا كان الي يستغبيني ويستغفلني. لج تعرفين منو أني؟

زلم مشوربة متكدر توكف بوجهي، تجين إنتي أداة متعة تلعبين عليه." "بدموع. فهد، والله من حبي إلج سويت هيج. ردتاتعرف على أختك وأتقرب منها، لا أكثر. ما عندي غير غاية." "مردت حلكها بأيدي. لتجذبين، حقيرة. أني وياج ندري شنو غايتج من هالشي؟ تردين أختي تتعاطف وياج وتروح تگول لأهلي حتى تخليني أمام الأمر الواقع. عبالج أني مثل باقي الزلم واكو واحد يحكمني؟ ولج لا إنتي ولا أهلي ولا الدنيا كلها تكدر تلوي ذراعي، فتهمت؟

دفعتها. أباوع لحلكها طاگ دم. "إنتي لهنا وطارت ورقتج الرابحة وياي. روحي، انتهى كلشي. البيت بعد يومين، أجي ألگاچ عايفته ومولية للزبالة الي جنتي عايشة بيها. وياويلچ تخليني أشوف وجهج بعد. فتهمت؟ "لزمت رجله. لا فهد، الله يخليك لتعوفني. والله أموت بدونك. أني جنت ميتة ومن تزوجتك حسيت نفسي حييت. والله هالموضوع بعد ما أفتحه ولا أتدخل بحياتك، بس لتطلقني وتعوفني. أبوس رجلك فهد."

دفعتها برجلي. "وووخري، إنتي الي لعبتي بذيلج مو أني. وهسه استحقيتي للي سويتي. حمدي ربج أختي اجت فاتحتني بالموضوع وما وصلت السالفة لأمي، جان طلعت بروحج." عفتها وطلعت، وأسمع صياحها من جوه. يطبها مرض. أخذت سيارتي وطلعت. رجعت للشقة، فتحت الباب ودخلت. لكيت غنى كاعدة تقرة قرآن. "صدگت. وكمت. وين رحت فهد؟ تره قلقتني." "لزمت إيدها. گعدتها وكعدت كبالها. بالبداية، أحجيلي ليش اجيتي. كتيلي وما خابرتيها."

"لأن الموضوع يخصك ومحبيت أدخل أو أخبرها وأعرض نفسي لموقف مو حلو. فگلت أبلغك وأشوف شتكول." "باوعت لعيونها. تدرين كل ما بيه جاي أكتشف إنو إنتي أعقل وأرزن بنية بهالكون." "مسحت على رگبتي. احم. ما گلتلي منو هاي وشلون تعرفچ؟ "گعدت يمها وخليت راسي على كتفها. مجرد وحدة جنت أتونس وياها، وهسه خليتلها حد." "شلون يعني تشرب وياها؟ "غمضت عيوني. أعمق شوية." "تركص لك يعني؟ "هم أعمق شوية." "هو اكو أتعس من هيج؟

"بعدج صغيرة. من تكبرين تعرفين. ما أريد أفطنج على هالسوالف، خليج بريئة أحسن." "سكتت. فهمت قصده. يعني إنت گائللها إني أختك؟ "أي. ليش عندج مانع؟ "أي، ليش تنسبني إلگ؟ "اخذت إيدها خليتها على شعري. ترا إنتي مسجلة باسمي بكل الأحوال." "حركت أصابعي على شعره. فهد، متشوف الي دتسوي غلط؟ "هذا الغلط أني ما مروجله ولا معلم أحد عليه بالاول. والتالي الأذية راجعة عليّ مو على غيري."

"سندت راسي على راسه. بس الروح الها حق علينه وواجبنه نصونها ونحافظ عليها. وإنت بأعمالك هاي دتگتل روحك وجسمك هم. عبالك يعني الله حرب الشرب وهالمعاصي من دون سبب؟ أكيد لا. الله حرمها لأن الشرب يفقد الإنسان عقله ويخليه يتصرف بلا وعي، إضافة إنو يتلف الكبد والگلب ويمرد الجسم مرد. والمعاصي الثانية تنقل أمراض وتطفي النور الي بالوجهه، بحيث الإنسان يبين قبيح داخلياً وينعكس هالشي على الناس فيشوفوه قبيح ومخيف."

"كلامج كله صح، بس من الصعب تنفيذه." "إني مستعدة أساعدك. نگدر نخلق فهد جديد. تكدر تقلع عن هالعادات وصدگني أني مؤمنة إنو إنت تكدر." "ما دام إنتي موجودة، أكيد أكدر. بس حالياً أني ما مفكر ألتزم. من يجي الوقت المناسب الي أحس نفسي بي صرت جاهز، راح أخطو هالخطوة." "إسعى ياعبدي وأني أعينك. لازم إنت تسعى مو تأجل وتختار بمزاجك شوكت تتغير." "ربج الهادي. يله اشتغل نعسان." "حركت أصابعي بين خصلات شعره. ما تروح للبيت؟

"نعسان، مابيه بعد أطلع." "لا كوم روح. هواي دتغيب عن البيت وهالشي غلط وميصير." "حاضر ماما. غنى، اكو أوامر ثانية؟ "أي، بطل هالبرود الي عندك." "صار ماما. ومواعيد شرب الحليب ما خليتها إلي. سجليها بورقة." ابتسمت. "إنت ضل استهزئ. خليني أشوف تاليها ويه سوالفك." "گمت. خل أروح أحسن." "مع السلامة." "مع السلامة."

"طلع واني رحت مزقت الرقم وذبيته بالزبل. عمري وحياتي مجنت فضولية ولا حكون. متهمني مدام الشي ميخصني. أني معليه. رجعت كعدت أكمل الختمة." *** "ولج الهام، لحگيلي. صخام الصخمني، ولج فهد طلكني وطردني." "يااا، مو گتلج گعدي وسكتي وعوفج من هالسالفة. شفتي روحج وين وصلتي؟ هاي درة بأقل من أربعة وعشرين ساعة وطلكج."

"بدموع. ولج نار نار، واجه بيه. راح أتخبل. أخته راحت گلتله. ما توقعت تگله، بس طلعت حقيرة وراحت خلت السالفة بحلكه. ولج ميتة قهر. ميتة. فهدددد، عافنيي وبعد ميريدني. إلهام، اااااه يمة." "اهدئي. هو أكيد هسه بحالة عصبية وحجاها بدون قصد. لتخافين، يرجع الج." "لا، ميرجع. إلهام، ميرجع. انطاني مهلة يومين حتى أعوفله البيت. ولج ملخني تملخ. لهدرجة طلع مستعر مني. إلهام، گلبي يوجعني. أحس روحي راح تطلع."

"يمعودة، لتخوفيني وتخليني أجيب حتى رجلي ما هو ويجيبني. عفية اهدي وشربي ماي، بلكي تهدين وبعدها نتفاهم أني وياج. ووعد مني الج، فهد يرجع الج. وين يلكه مثلج؟ لا اكو بجمالج ولا بدلعج. وهذا صاحب مزاج، ما يعوف وحدة مثلج." "معقولة؟ "أي طبعاً." ابتسمت. "أني ماراح أروح وأبقى هنا حتى أتفاهم وياا، بس يكون يقبل يحاجيني."

"لا، دزيله رسالة گولي له ما عندي مكان أكعد بي. انطيني مهلة ألكه بيت وأطلع. وخليج فترة لبين ما تهدئ الأمور ورجعي حاچي." "مسحت دموعي. هيج گلتلچ؟ "أي." *** "متمدد بغرفتي ودخلت أمي." "شبيك يمه؟ أشوف اجيت من الدوام ضايج وحتى غدة ما تغديت. خير، صاير وياك شي؟ "بست إيدها. لا يمه لتشيلين هم. كلشي مابيه، بس تعبان من الدوام، وإنتي تدرين بيه من أتعب لو أضوج تنسد نفسي."

"حبيبي، ليش متأخذ إجازة وتروح تسافر لأي مكان تغير جو تشوف غير ناس. إلى متى تبقى بس شغل شغل." "يمه، إجازة ما أكدر آخذ. غير وقت الضرورة، وبألف يا محمد ياله نگدر نحصل إجازة. تالي ترديني أسافر بيها." "غير أريد راحتك أني يا يمه." "بس لو تهدئ المشاكل الي بحياتي، أكون بخير. لا أريد أسافر ولا بطيخ." "كل تعب ومشكله لابد وتنتهي. هاي سُنة الحياة. نشوف بيها الحلو والمر، وماكو شي يستمر على حاله."

"أجيت أجاوبها وسمعت صوت الصياح من جوه. گلتلي ماكو شي يستمر على حاله. تعاي خلي نشوف العرس الي جوه." نزلنه أني وأمي. أباوع نسوان فيصل صايرات من الشعر والبنات يجرن بيهن. فتحت عيوني وأني أشوف ساره راكعه آلاء بوكس. خرب يومهن، زلم مو نسوان. صحتت. "هاييييي، شصايررررر؟ أباوعلهم ابتعدوا. آلاء گامت تعدل بحجابها وساره ولا گأن التشيرت ممزوج من الياخه والشعر طالع. "شبيجن؟

"اليوم ليلتي وراحت خلت فيصل ينام عدها، ومن حاچيتها ضربتني." "بله ما استحيتي على روحج تحجين هالحجاية وكدامنة؟ أني سامع اكو ناس تنزع المستحة، بس هيج ماشايف. مشاكلكم الشخصية حلولها بيناتكم وسوالف الأفلام بطلنها. فيصل مو الأمير هاري وتتعاركن عليه. ويا ريت تثگلن شوية وتخلن حجار بجيوبجن، تره رواحنه طالعة ومالنه خلك." "والله يافهد، أني مو يمها. يعني فيصل اجه نام بالغرفة. شنو أطرده يعني؟

وهاي السايبة اجت تهجمت عليه. شنو قابل أسكتلها؟ طبعاً أگتلها." "لو طالبات ابتدائي أحجي وياهن، يمكن يفهمن ويستوعبن الكلام أكثر منجن. بس إنتن هنا." أشرت على راسي. "ماكو عقل، اكو سطلة زبل وملزوم عليها ذبان، بحيث الإيعازات وقت الكلام متوصل أبد." درت وجهي، شفت سعاد واگفة على الدرج. گملت السبحة. خزرتها وصعدت لغرفتي. والله لوما الحجي جان أخذت هدومي ورحت. بقيت يم غنى، على الأقل هناك هي صمً بكمً. *** "مرتضى، وتالي وياك ولك؟

صاير جلد على عظم، راح تنكطم." "ما أريد يمه، رجاءاً لتحلين." "كل هذا على حساب ست الحسن والجمال؟ گاطع الأكل والشرب، لا وهم عازل روحك ومتطلع. ولك متستاهل تسوي كل هذا على مودك الي مايريدني ما أريده." "إنتي جاية تشمتين بيه يعني؟ "ولك، اكو أم تتشمت بابنها؟ ولك أني گلبي ممرود عليك. أشوفك شلون تتكرض على وحدة متستاهل. أظفرك لا وجماله إنتي رايدها وهي باعتك بالرخيص."

"يمه، غنى تحبني، إله تموت عليه. بس أكيد من سمعت كلام إخلاص الحقيرة زعلت وبطلت عليه. حتى لو كانت موافقة، من درت بيه مرتبط بغيرها أكيد تبطل." "والله الي يحب لو يشوف حبيبه ويه عشره، يبگه يحبه. هذا أبوك خاني مو ويه وحدة، ويه عشرة، وهم بقيت وياه وأحبه ومداريته. بس هاي متحبك. لو تحبك جان گلتلك عوفها وتعال أخطبني، مو تسحب روحها. بس هذا مجالك، إنت ما سطرتها براشدي يمشيها عدل لهالخدامه."

"بعصبية. غنى مو خدامة. وإنتي إذا چانت گرامتج تسمحلج تبقين ويه واحد خاين، فغنى عزة نفسها فوگ كلشي." "صفگته راشدي. يا أدبسزز، أني تحچي وياي هيج على مود وحدة بت شارع ما معروف أصلها من فصلها؟ هي هاي تربيتي وتعبي وتالي تجازيني هيج. تف عليك ياحقير، روح ربي وگلبي غضبانين عليك يا مرتضى يا ابن گلبي. وإنتي يا غنى، عساچ بحركة گلبي."

"طلعت وعافتني. الله ياخذني ويخلصني من هالعيشة حتى أخلص من شكولكم كلهاااا. صايرة ضدي عبالك كاتلللل أهلكمممم." *** بعد مرور يومين. "اليوم جمعة، گاعدة على التلفزيون. وين أروح قابل؟ خابرتني أروى. جاوبتها. "ها، أرو. شلونچ؟ "هلو بيج حبيبتي. أكلج، نونه، اليوم إحنه متجمعين عد بيت جدي وكلتلي الحجية أخابرج. عدها كم قماشة تريدج تخيطيهن، والبنات سمعن الحجية وتخبلن، يردون يفصلن هم."

"المكينة مو عندي، تركتها بالبيت. وتدرين إني گاعدة عد خالتي." "أي، تعالي لبيتكم وكعدي خيطي. بكل الأحوال الفائدة الج. أدري خالتج أم فليس وكوة الربع يطلع منها. خاف عبالج مندري بيج دتعانين وياها، بس متحجين." فكرت بكلامها صحيح. فهد إلى متى يظل ينطيني مصرف؟ هم فشلة. خل أجيب المكينة، على الأقل هم أشتغل وهم أتلهى. بس كون أروح أجيبها. "الو؟ غنى وينج؟ "وياچ. معندي مانع، بس شوكت تدزلي القماش والفصالات الي تردنهن؟

"تكدرين تجين هسه لبيت جدي مادام متجمعين حتى تخلصين من الفرّة كل ساعة." باوعت للساعة. "بتلاثة ونص. خل تصير بالاربعة وأجي." "أوك، منتظرج. يله باي." "باي." سديته ورحت بدلت. لبست بنطرون كابوي وتشيرت أسود وفوگه صايه وشال. شفت صارت بالاربعة. أخذت جنطتي وقفلت الشقة وطلعت. وكفت بالشارع العام. گف كدامي تكسي. أباوع رجال جبير كلش. أي، هازين. صعدت. دليلته على المنطقة وطلع. وره فترة طويلة ياله وصل. نزلت دگيت الجرس وضليت واگفة.

"طلعت شفت وحدة. بسم الله. احم، نزل عينك ولك، عيب. إنت مزوج. تفضلي، منو رايدة؟ "إني الخياطة. الحجية والبنات موجودات." "أي، تفضلي. دخلي. يعني معقولة هي هاي الي يحبها مرتضى؟ زين شلون قبلت بي؟ شافت؟ لو هو شكو واحد زايعته الدنيا ياخذ وحدة جنها حورية." دخلت. شفت زلم گاعدين بالحديقة. نزلت راسي ومشيت. دخلت لكيت نسوان هواي گاعدات بالصالة. "السلام عليكم." "الكل: وعليكم السلام." "هله بعد گلبي، تعاي أبوسچ."

ابتسمت وتقدمت بوستها وسلمت على الباقين. بس خالة إيمان أول ما شافتني حضنتني. يربي، شگد حبابة وحنينة هالمرة. "گعدي حبيبتي، ليش واگفة." "طبعاً المفروض نشتكي عليج، تدرين؟ باستغراب. "ليش؟ "من وراج هالغبر، كل ساعة مطلعاتني للسوك حتى يشترن قماش وتخيطيلهن. خلصن فلوس رجلي." ابتسمت. "نسوان عم فهد كلهن حبابات. بس عمته تخوزر بيه. مهتمت الها، يجوز مو يمي. باوعت للحجية. حجية، ردتي أخيطلچ بعد؟

"أي حبيبتي، تعرفين اجا الصيف وأريدج تخيطيلي دشاديش صيفية مريحة." "صار من عيوني. وإنتن بنات، الموديلات الي ببالجن راوني ياهن حتى أشوفهن." أجن البنات يراوني. ضليت فترة أشوف بالصور وأسجل على حسب القياس. حسيت بصوت عالي وحجي شباب. كلنه رفعنة راسنه. شفت فهد ينزل من الدرج هو والشباب الي وياه. أباوعله لابس تراك زيتوني، بس طالع حلو. "تقربت. شلونچ غنى؟ باوعت لفهد. ***يتبع***