رواية ذنوب على قيد الغفران الفصل السابع والعشرون 27 - بقلم براء

فهد : رجعت من الدوام هلكان من التعب سلمت وصعدت لغرفتي. اجيت افتح الباب لكيتها مفتوحه. دخلت لكيت وحده متمدده على الجربايه. صحت: كوميييي! فزت بسرعه وكامت. باوعتلها باستغراب: هاي شعندج هنا؟ مروه : كمت بسرعه مرتبكه. ها؟ اني جنت جايه يم اروى وساعدتها بالتنظيف وانوب... فهد : اختصري حبابه. مروه : قسمنه الشغل واني اجيت انظف غرفتك ونعست فتمددت على جربايتك. اني اسفه مو قصدي.

فهد : ما صار شي. ماكو داعي للاعتذار، بس اتمنى ميتكرر هالشي. لان مهما يكن تبقين انتي بنيه وميصير تنامين بغرفه ولد بدون متكليله. هسه لو شايفج احد شيكول؟ اني هسه تفاجئت من شفتج نايمه بغرفتي. مروه : احم. والله اسفه. يله من رخصتك. فهد : اذا تعبانه وتحسين نفسج مالج خلك ابقي هنا واني اروح لغرفه امي. مروه : لا لا شكرا. اخذ راحتك. فهد : طلعت واني رحت سبحت واجيت نمت. مروه : عزه! هسه شيكول عليه؟ هسه اني شجاني نمت على جربايته؟

بس والله ماكدرت. هو اني بس شميت عطره عبالك ضربوني بنج. مالكيت روحي غير نايمه بفراشه واشم بعطره. اويلي لو من كلي ابقي بالغرفه واني اروح يم امي. هه والله لو يكلولي روحي هسه موتي اروح واني مبتسمه. رفعت ايدي: ياربي جعله من نصيبي وخلي ابو بيتي يا الله. غنى : كاعده وتذكرت الي صار قبل اسبوع والي الحمدلله عدت السالفه على خير. والا لو ما رساله فهد جان اني رحت بخبر كان. اروى : الوو؟ هاا نونه شلونج؟

غنى : هلو حبيبتي. الحمدلله. انتي شلونج؟ اروى : تمام. اكلج انتي موجوده عد خالتج؟ غنى : لا. معزومين عد خوالي اليوم. اروى : مو علساس انتي مريضه؟ شلون تطلعين من البيت؟ غنى : ها؟ مو جنت يم الدكتور. اخذتني خالتي لان كولش مالي خلك وبعدها رحنه يم خوالي. ليش تسألين؟ اروى : حرامات. خربت المفاجئه. جنه ناوين اني ونرجس نسويلج مفاجئه ونجي نزورج. بس للاسف خربت كل مخططاتنه. غنى : اني اسفه. لو ادري مجان طلعت.

اروى : عادي حبيبتي. اهم شي سلامتج. وبعدين اول وتالي راح نلتقي باجر. غنى : ان شاء الله. اروى : يله حبي اني اروح اخابر هاي الخبله هسه الكاها كاعده تشوف شتلبس. غنى : ابتسمت. ماشي. سلميلي عليها. اروى : يوصل. يله باي. غنى : باي. سديته. همزين كدرت اسيطر على نفسي وما اجفص. والا بذيج الساعه اصير بموقف اسخف منه ماكو. كمت وكفت اباوع للشارع من جام البلكونه.

تنهدت: شوكت ترجع خالتي. والله مليت من الجذب. اني عمري مجانت طبيعتي اجذب وهالسنه جبتها كلها جذب بجذب. اااه ياغنى هاي تاليتج تتخفين مثل الي مسوي عمله وخايف لا ينفضح. لا وفوك هذا كله تصرفاتي ابد ما موزونه. دانجرف وره مشاعري. وللاسف صاير فهد. لو كلي شلونج كلبي يكمز من مكانه. والمشكله اني كارهه هالشعور الي يراودني. مع انو فهد ممتجاوز حدوده ويايه ويعاملني بكل احترام ومرات يشاقيني من يشوفني ضايجه. بس مدري ليش اني اخذها بغير قصد. تنهدت ودخلت للغرفه. حتى قران معندي قابليه وتركيز حتى اقره. اجه على بالي اخر مره اجه بيها فهد لهنا قبل تلت تيام.

فهد : اكلج اني ضايج. غنى : اي. وشتريد؟ فهد : ما اعرف. ضايج. عندج اقتراح اسوي؟ غنى : متروح للملهى؟ مو ونستك هناك. فهد : هو جنت هناك واجيتج. بس مع هذا احس نفسي ماشبعت وبعدني ضايج. غنى : بضوجه. متشبع ابو النسوان. فهد : والله حلوه هاي. واذا ابو نسوان انتي شعليج؟ ليش ضايجه؟ غنى : وعلى شنو اضوج. بس اني متفاجئه. متمل انت؟ فهد : تره اني من اروح ما ادنه يم النسوان. بس اشرب واباوع للركص. غنى : باوعتله. وين اللذه من الموضوع؟

الشرب اوله وتالي حرام ومضر بصحتك. وهالمناظر الي تشوفها مقززه بصراحه وذره ذوق مابيها. عباره عن اجسام رخيصه تتحرك لا اكثر. فهد : هاي لان انتي متدينه مالج بهالسوالف. وعلى فكره تره الركص من الاشياء الي جدا مهمه بالنسبه الي. و واحد من شروطي اذا تزوجت دائمي كون مرتي تعرف تركص. غنى : باستغراب. اني سامعه الي يشرط يريدها حلوه او مثقفه بت ناس اخلاقها حلوه. مو تعرف تركص. شنو انت؟

فهد : كل انسان ورغبته. وبعدين المن ماخذها اذا متلبي رغباتي؟ غنى : يعني انت اذا تريد تتزوج علموم هاي الشغله؟ فهد : ياشغله؟ غنى : بخجل. هاي الشسمه. فهد : انوب صار بيها شسمه. احجي بالقلم العريض. لتنحدرين للالفاظ تخلي عقلي ياخذ عقلج ويسافر. غنى : احم. هيج ماكو شي. سد الموضوع.

فهد : شوفي غنى. خلي اكلج شغله. اني مو من جماعه الي يكولون اني ميهمني الشكل. اهم شي عندي الاخلاق. واكعد اتفلسف واني اكبر جذاب. تره اني رجال ومن اريد اتزوج حتى اصبح على خلقه حلوه وجهه يخلي يومي حلو. مو اكعد بوجهه وحده جنه تنور طين محروك.

غنى : اولا كلامك هذا حرام. لان البشر مو هو الي يخلق نفسه ولاهو الي يقرر شلون يكون شكله. كل واحد بينه ربك الي قسمله شكله وجسمه واهله والبيئه الي عايش بيها. احنه مسيرين بهالشي مو مخيرين. وبعدين اكو هواي زلم متزوجين نسوان ايه من الحسن والجمال بس ممرتاحين وياهن. وبالعكس الشكل ابد ابد مو مقياس. فهد : صحيح. الشخصيه والانسجام اله دور جبير. بس الشكل هم يلعب دور. قابل باجر عكبه راح انام وياها لو ويه شخصيتها؟

وبعدين تعالي انتي ليش انتفضتي؟ شنو الموضوع مسج؟ غنى : لا الحمدلله. الموضوع لا يمسني ولا يمس غيري. الله ماخلق واحد قبيح. كلنه جميلين. واذا انتو تشوفون اكو ناس قبيحين فالمشكله بعيونكم مو بيهم. والمشكله الاكبر انو كل واحد يتمنر ميوكف على المرايه ويشوف عيوبه بالاول. فهد : خليها حلقه بأذنج. الرجال مينعاب بشكله ابد. الي يعيبه شخصيته وكفاءته بالاعمال الشاقه الي من تزوجين تعرفيها. بس هذني عيوب الرجال.

غنى : تدري ساعات افكر انو انتو مالكم لازمه بالحياة. يعني لو يبقن بس النسوان بهالدنيا تصير الحياة رائعه. على الاقل لا خداع لا خيانه لا اخلاف وعود ولا اذيه. فهد : ومنين تتكاثرن حبيبتي؟ من زرف الحايط مثلا؟ لو تكاثرجن منجن وبيجن؟ غير اذا ماكو زلم تنتهي الكره الارضيه. والله ذكرتيني بهاي الي تكول اني باقيه ويه رجلي على حساب الجهال. وهي استغفر الله. خليني ساكت. ما اريد اعدلج. غنى : باوعتله بخجل. شكد لسانك زفر.

فهد : ما ماكل سمج. غنى : باوعتله صفح. شعندك باقي؟ متكوم تروح. فهد : رجعت نفسي على القفنه. اكدر اعرف عليمن فتحنه نقاش سخيف تالي ضجتي انتي؟ غنى : اكره الاشخاص الي يهتمون للمظاهر بس. فهد : ماراح اجاوبج لان ما اريد نتعارك. يله اني راح اروح. غنى : كمت ورى اريد اسد الباب. فهد : درت وجهي عليها. دنكت بستها بخدها. لتزعلين. تره جان مجرد نقاش ميستوجب تاخذين موقف. غنى : انخفظ تنفسها. هااا.

فهد : ابتسمت ماسح على شعرها. يله مع السلامه. غنى : مع مع السلامه. سديت الباب ودخلت لازمه خدي. عزه! هذا شلون يتجرئ يبوسني؟ جماله! اني كمت امعمع كدامه جني صخله. استغفر الله. فزيت على صوت الموبايل. اباوع حقيبه المؤمن علنت عن الاذان. كمت توضيت وكعدت اصلي. ساره : فيصل خلي نسافر بما انو الجو حلو. فيصل : وين تسافرين يمه؟ ساره : يعني لبنان، تركيا، دبي، هالمناطق. فيصل : وانتي تحجين كله بالعالي؟ والله واثقه.

هي ايران وسوريا غيرهن ماكو وهم يجوز ما اخذكم لان العدد جبير وماعندي ادفع مصاريف ساره: انت عليمن طالع بخيل؟ هذا اخوك بس طلعه وحده يترس بيها جيوبه أوراق. فيصل: وانتي وين شايفه جيوبه؟ ساره: شفته طلع محفظته منطي مصرف لجهاله، المحفظه عباره عن خمسه وعشرينات وأوراق، بشنو تختلف عنه انت؟

فيصل: طبعاً يترس جيوبه أوراق، ضابط وعنده راتب شهري وبذاك الحساب من غير أرباح المعمل والبساتين وفوك هذا العماره، يعني اكيد يكون غركان بالفلوس غرك وميهتم لو صرف مليون باليوم، هذا مترهي. ساره: يعني فهد ملياردير؟ فيصل: شمدرينه، يجوز. ساره: امده حظي الطايح حظه... لعد الله منطاني فهد على الأقل خلقه وفلوس مو مثل هالاغبر العندي بس أكل ونوم. كمت نزلت جوه، لكيت آلاء بالمطبخ تحجي بالموبايل بس شافتني سدته. ليش سديتي؟

آلاء: شي ميخصج... يله ولي عن وجهي. ساره: هزيت ايدي. رحت طلعت أكل وكعدت أكل، يمه هالحمل موتني، اني من غير شي أحب الأكل أنوب صرت حامل نفجعت. *** أروى: طلعت ويه علي حتى أروح لبيت عمي مهدي. دكيت الباب، طلع محسن. طبعاً بيت عمو مهدي عايشين عد بيت جدو. محسن: يا اهلاً وسهلاً، شلونج بنت العم؟ أروى: الحمدلله. الحجيه والبنات موجودات؟ محسن: أي كلهن كاعدات سوه، تعرفين بعد ميشبعن كالات وفتنه.

أروى: ابتسمت. دخلت سلمت عليهن وعلي بقه ويه محسن. ياسمين: لعد امج والباقين ليش ما اجو؟ أروى: امي وورده رهن من الصبح لخالتي يشوفنها لان مالها خلك، وفهد خذاهن وبعد شويه يروح يجيبهن. ياسمين: خير؟ شبيها خالتج؟ وياهي منهن مريضه؟ أروى: خالتي اميره مرتفع سكرها ورهن يشوفنها. حياة: شوف خطيه عدها العافيه ان شاءالله، خطيه متستاهل. سامر: السلام عليكم. هاي شنو اروى عدنه نور البيت، شلونج؟

أروى: بابتسامه، منور بأهله. اني الحمدلله، انت شلونك؟ سامر: ستوني صرت زين. أروى: هاا. شهد: كرصته. سامر: احم الحمدلله. أي شكو ماكو؟ شخبارج ويه الدوام؟ أروى: والله تعرف، بعد هاي اخر سنه واخذ الماجستير ان شاءالله. حياة: بعد كلبي انتي، شكد طموحه وورده. ربي يحفظج عيني بارده عليج مو مثل بعض البنات والشباب مكضيها تسخت حتى جامعه ما مدبرين.

شهد: هاا، اشتغلنه بالبسامير وبعدين اني راح اصير مدرسه رياضيات، يعني راح أخرج أجيال، عبالج قليله؟ ياسمين: أغسل ايدي من الأجيال الي تخرجيها انتي. ولج انتي حياتج وروحك السفافه والمكياج، وينج وين جوالاتج؟ أروى: ههههه بهاي صدقتي حجيه. سامر: اكول يمه، شنو انتي تتبطرين؟ محلل ومتخرج صار تلث سنوات وجاي اشتغل، شتردين بعد؟ حياة: بس ابن خالتك دكتور.

سامر: يبوو، انتي ضلي قارني بيني وبين ابن خالتي، اذا ابن خالتي انتحر كون اني هم انتحر. والله انتن الأمهات عدجن سوالف. ياسمين: عوف السوالف، اكلك ولك ما ناوي تعرس انت؟ مو شلعتو كلبي، اريد أحضر أعراس، مليت هدومي مال المناسبات لسه ما مدشنتهن. سامر: باوعت لاروى، ان شاءالله عن قريب وجدا هم. حياة: ابتسمت، هاا ولك نويت. سامر: أي بس غير الشفيه تفاركنه وتروح لبيت رجلها حتى يصفالنه الحو. شهد: شنو نايمه على كلبك يمه؟

هذا بيت ابويه. سامر: للتصحيح، بيت جدج هذا. شهد: حتى اذا نفس الشي. سامر: باوعت لاروى بابتسامه، شلونج اروى؟ أروى: ابتسمت مباوعتله. *** ورده: فهد حباب، مشتهيه موطه، جيبلي. فهد: صار. ايمان: ولج ورده ستوج اكلتي حلويات وعصير عد خالتج، متشبعين انتي؟ فهد: خليها يمه، شنو السالفه. امري حبيبتي، شمشتهيه بعد؟ ورده: بس موطه، بس حباب جبيره أريدها مو تضحك عليه بكاسه وحده.

فهد: صار. حركت سيارتي، راجع على واحد يبيع الموطه الي تحبها ورده. وكفت السياره، نزلت. بأي نكهه ترديها؟ ورده: انزل وياك. فهد: ماكو، كعدي وانجبي، صرتي مره. احجي بيمن ترديها؟ ورده: بقلبها. بسيطه يافهد، اله اخسرك بكل النكهات اريدها. فهد: وانتي يمه؟ ايمان: ما اريد يمه، تدري بيه ما أحب هالسوالف. ورده: هو انتي اكثر شي عليج حلاوه بالوته، واذا تردين تحافظين على البرستيج تاكلين كنافه.

فهد: هههه، شهالعرامه هاي، حتى امج ماخلصت من لسانج. سديت السياره ورحت جبتلها الي تريده وجبت للبيت كله واجيت. صعدت، هاج. ورده: هاي عود صدك جبتلي كل النكهات؟ فهد: أي، ليش؟ ورده: كمزت من مكاني ابوس بي، اروحلك فدوه يالحنين، يا هيج الأخوان يا بلا، عسى الله يرزقك دائما وتدللني هيج. ايمان: منا عالم دبسزز. فهد: السياره مضلله يمه، وانتي لوكيه، كعدي اريد أسوق. ورده: بالعباس اذا متبوسني ما اكعد.

فهد: ضحكت، بستها، يله رجعي لمكانج. وصلنه للبيت، نزلت انطيت العلاكه للكل. ساره: لعد ورده ليش بس انتي جايبلج من كلشي؟ ورده: لحكتيني على هاي، وبعدين اني كتله اريد بس ككو، بس هو أصر كال شنو وردة البيت تاكل نوع واحد؟ كام جابلي كل الأنواع، يحبني مو بأيده. بتول: كلبت عيوني، هاي ساره حاشره نفسها بكلشي.

فهد: هزيت راسي على سوالف ورده، متبطل سوالفها. صعدت لغرفتي، نزعت ملابسي، باوعت لروحي بالمرايه، صارت عيني على جسمي، تذكرت أيام قبل من جنت أنحرم من المصرف والدنيا حاره، شهر السابع كل الطلاب يوكفون يأكلون موطه لو يشترون أزبري واني ارجع فاحط. فلوس بطل ماي ما عندي. الله يرحمك يا سالم، ذكرى وحده حلوه ما تركت بخاطري قبل لتموت. تلمستهن، رغم ميأذني، آثار الجوي بس كل أثر من أشوفه أحسه المه يرجع بروحي. هواي أصرت امي أروح لدكتور

تجميل واوخرهن، بس ما رضيت، هالاثار كلما أشوفهن أتذكر كل دمعه وكل ألم عانيت منه بصغري وشبابي، هالاثار جانت ومازالت شاهده على هواي أشياء بحياتي، فبحياتي ما متخيل اني أشيلهن. كعدت واجت على بالي غنى، خطيه وضعها يقهر، لا ابو يذكرها لا ام موجوده، ماكو احد يحن عليها. لابد اني موجود سند لخواتي، بس هي ما عدها احد، من تشتهيلها حاجه لو تحتاج شي ماكو الي بجانبها ويسويلها شي. الك الله يالوحيد المالك احد.

*** صباحاً غنى: طلعت من الشقه، وبأيدي الملزمه أراجع. ود: صباح الخير حبيبتي غنى. غنى: بهدوء، صباح النور. ود: اكول حبيبتي، خو مابعدج ماخذه على خاطرج مني؟ غنى: لا مماخذه على خاطري، انسي الي صار، عن اذنك. صعدت بالمصعد، نزلت اباوع للناس، هاي شبيهم من الصبح؟ شفت الحجيه اشواق هي وزوجها ستوهم دخلو للعماره وبأيدهم علاكه صمون. ابتسمت صباح الخير. اشواق: يا صباح الورد على هالوجهه الحلو.

عامر: قبل لتطلعين للكليه تعاي تريكي ويانه بويه جايب كيمر عرب وطلعت اني والحجيه جبنه صمون واجينه تعاي ويانه. غنى: شكد اثرت بيه هالكلمه بويه اوف سوده عليه عليك بابا... لا عمو شكرا سبع عافيات اني سبقتكم يله من رخصتكم ادعولي اليوم عندي امتحان. اشواق: الله يوفقج وعساج دوم من الاوائل. غنى: ابتسمت وطلعت. لو عندي ام هسه مو جان دعتلي هالدعوه هاي. لو بابا لو موجود جان وصلني للكليه وراح لشغله. يله الحمدلله على كل حال...

صعدت بالعبربه... وصلت للكليه لكيت البنات كالعاده كاعدات بنفس المكان الي نكعد بي... صباح الخير. البنات: صباح النور. شلون صرتي اليوم؟ غنى: لا الحمدلله احسن. بتول: شكلج مو شكل وحده مريضه. غنى: يعني اذا مريضه كون اجي كالبه وجهي. وبعدين اني صارلي اسبوع وضعي مو كولش زين واليوم حسيت نفسي احسن وين المشكله. بتول: ماكو مشكله بس حجايه وكلتها. غنى: نرجس الاستاذه كالت الاسئله راح تكون مركزه بشري قريتي لا.

نرجس: شوف هاي بيه حيل اني. وبعدين احنه اليوم راح نكعد نتفق شراح نلبس بحفله التخرج. غنى: من هسه. نرجس: اي لعد شوكت. غير نكعد نحضر نفسنه. غنى: هزيت ايدي وكعدت اراجع. *** فهد: كاعد بمكتبي ودخلو مجموعه... رفعت راسي وانصدمت. منذر... كمت خير شبيك وشبي وجهك. منذر: طالب من الطلاب تجاوز عليه لان شفته يم الحمامات هو وجماعته وكاعدين يشوفون افلام مكسره. اخذتهم للاداره. كام هو ضربني والامن جابو لهنا بأمر من المدير.

فهد: شكد عمره هذا. منذر: طالب سادس اعدادي. فهد: باوعت للشرطي روحو جيبو بسرعه ثواني والكاا بمكتبي وخابرو اهله خلي يجون.... تعال اكعد... شويه ودخل ولد لعبت روحي من شفته يتمعلج وصابغلي الشعر. حني جنه من ذوله الاستغفر الله.... بس مبين ابن عائله غنيه لان منذر يداوم بمدرسه اهليه معروفه. : خابرو على بابا خلي يجي اني ما ادخل مركز. فهد: صحت بي اوكف عدل لك لا اجي اشكك بالنص دبسزز... شلون تتجاوز على استاذك حيوان.

: يستاهل. فضحني كدام المدير شسويله يعني. فهد: وانت من تريد تشوف صخام تشوفه بالمدرسه وويه الطلاب. ماعندك بيت وبعدين الي بكدك همهم دراستهم مو هالسوالف. وبعدين شهالموديل بنيه انت وتتمعلج جنك وحده.... كح... : ما اسمحلك. فهد: ديربالج سندس ليطكلج عرك لو يروح صوتج... اجو اهله. اباوع لابو مبين خوش رجال واخوته لزمو رادو يضربو ما خليتهم... رجاءا حجي استريح... كعد وبده منذر يحجيله الي صار.

الابو: الله يطيح حظك دومك مفشلني. كلي وين اوديك. بقت مدرسه ببغداد ما نقلتك بيها بس متصيرلك جاره. ولك شلون تعتدي على استاذك شلون. : بابا. الابو: اش ولا كلمه. فشلتني الله يفشلك. استاذ منذر رحمه لوالديك لترفع قضيه لخاطر شيباتي. والله مستعد انقله ومن باجر بس لتخلي يبات بالمركز. منذر: لا اني مصر ارفع عليه قضيه. هذا واحد سرسري وقليل ادب. اذا ميتسواله جرة اذن ميمشي عدل اني اكلك.

الابو: ابوس ايدك بعده طالب وهالسنه مصيريه اله. اذا بقه هنا يتدمر مستقبله. الله يخليك تنازل عن الدعوه واني مستعد اخسر الي تريده. فهد: بدون متخسر شي منذر راح يتنازل عن القضيه. منذر: فهد. فهد: بهدوء. اني شحجيت. كلت راح تتنازل مو لخاطره لخاطر والده. الابو: انت شتصير من الاستاذ. فهد: اخو. ولتشيل هم راح يتنازل وتبقه شغله المدير يمك. الابو: رحم الله والديك ماقصرت. الله يوفقك.

منذر: رحت تنازلت واجيت بلغت المدير الي فصله اسبوع بسبب سلوكه.... فهد ليش خليتني اتنازل. فهد: ماشفت ابو اجه يبوس رجلك حتى تتنازل. وبعدين الولد راح ينفصل عليمن تدخله مركز وتسجنه. منذر: بس هو ضربني. فهد: اي عود انت خلي عقلك اكبر من عقله ولتصير مطي مثله... تدري عبالي شو شمسوي وجايبيك لهنا. منذر: شتدري انت اني الي بالمشاكل. يله اني راجع. فهد: انتظر بعد ساعه يخلص دوامي ونطلع سوه... اكعد... صحت للشرطي روح جيب جاي وتعال.

الشرطي: صار. *** غنى: خلص الدوام وطلعت ويه البنات. شفت سياره فهد. مدري ليش حسيت بشعور حلو. اروى: يله باي نونه. غنى: باي... هي راحت واني طلعت وياها. رحت اتمشى على حساب اروح بالعبريه. فهد: اباوعلها شلون تمشي بكل هدوء. عينها بالكاع ولا رفعت راسها... اتمنى لو اكدر اكلها اوكفي لترحين وحدج اني اوصلج لان اخاف عليج بس ما اريد واحد يشوفته وتصير هوسه. اروى: شبي وجهك منذر. منذر: مابيه شي. اروى: زين شعجب انت وفهد جايين سوه.

منذر: بعصبيه شنو هو تحقيق كافيي سكتييي شكد لغثتي. فهد: شجاك وياها ليش تصيح. قابل شكلتلك هي. شنو هالاسلوب منذر على كيفك. اروى: برطمت وسكتت... والله صوجي اني خفت عليك. *** غنى: وصلت للبيت بدلت وصليت وكعدت اتغده. بعدها كمت نمت ومر اليوم طبيعي...

كعدت ثاني يوم جانت جمعه. كمت نظفت البيت وكملت كولشي وطلعت للسوك. ملابسي صارت قديمه وجبي كلهن شتائيات. فطلعت اشتري لروحي جبه مادام عندي فلوس. وصلت للسوك. بعد مبلغت فهد وسمحلي بالروحه اكيد... فتريت على المحلات معجبني شي. كل الموديلات اخضر واصفر لو اسود ويلعب النفس.... وكفت يم محل عجبتني عبايه اسلاميه كولش حلوه... وكفت اعامل عليها. داكلب بباقي الموديلات وحسيت بأيد على متني. درت وجهي. فرح: مرحبا.