رواية ذنوب على قيد الغفران الفصل الثامن والثلاثون 38 - بقلم براء

قبل ثلاث ساعات. اروى: علي، علي يا معود وينك؟ علي: نزلت ركض، ها شكو؟ اروى: فهد صاير بارود، خابرني كال خلي يلحقني لبيت جدي لأن المشية تجي مناك. علي: أي غير مشية أخويه وعقدة، خو ما نطلع مبهذلين؟ لللللك نعاااااال، منذر وين صرت؟ فهد راح يصمط أبوهنه اليوم. منذر: ابن الزفره، شبيك؟ جيت. انغام جيبي سالم خلي أخذه وياي. إيمان: طلعت من غرفتي، هاييييي بعدكمممممم! الزلم راحت وانتووووو لسه هنااااا. ورده: أدري مسابقة صياح هي، شبيكم؟

أهدي يمه، الولد هسه رايحين وانتي روحي كملي تبديل النسوان راح يجن من الصالون لهنا حتى نبدي العقد وره المشية. علي: تعاي تعاي، هاي شمسوية بوجهج انتي؟ ورده: جنت داتمكيج عقد أخويه، شنو عيب حرام جريمة؟ علي: لسانج أدبسز، وينج ووين المكياج؟ بعدج بطول إصبعي، امشييي روحي مسحييي. ورده: أكول يمه، حاجي حبابة، هو أني شخاله بس حمرة ومسكارة.

منذر: ما عليج حبيبتي، بكيفه هو. شتريدين تحطين حطي، وفنه يحاجيج، شنو هم عقد أخوج وهم بس نسوان؟ وتعالي أكلج، انغام عدها أسوار ويه بدلتج يطلع يخبل، صعدي اخذي منها، يله بسرعة. ورده: دزيتله بوسة بالهوى، أروحلك فدوة أنت وفهد، بس أنت أحبك. صعدت أركض، ولج اااااانغام! إيمان: شوووووو بعدكم واكفييييين. منذر: جريت علي، صار صار والله رايحين. اروى: ههههه، شجاج وياهم يمه؟ إيمان: شلعوا كلبي، لطخوا هنا. وين مرت أبوج وجناينها؟

شو لسه ولا وحدة اجت، وليلى من الصبح طالعة، بايته عد الصالون. اروى: يايمة غير عدنه عقد ومسوين حفلة، وبعدين شهالجمال هذا؟ شهالفستان الحلو؟ شهالزنود هاي؟ عايزها شيرة وتصير زنود الست. إيمان: ضحكت، والله سوالفكم مكسرة. امشينه نتأكد من حاجات ست الحسن مرت أخوج.

اروى: أي يله، اجيت. أروح أوكفنه أني وأمي مصدومين، نزلت مرت أبويه لابسة بدلة مو مال عمرها أبد، وصابغة شعرها ومسويه تسريحة، والمكياج، الذهب. ضلينه صافنين. أوك هي حرة بلبسها، بس مو هيج الواحد هم لازم يحترم عمره. سعاد: هاا، شلوني؟ اروى: باوعت لأمي وهزيت راسي، كوه لازمة روحي ما أضحك. *** فهد: كاعد وذولة صرعوني براسي بهوساتهم. جماعتي خو بدعوا، ولد الكلب جايين شمتانين. كافيييي، صرعتوا راسي. شبال عين اليوم؟

عمر: يدك على الطبله، وراح يدخل للقفص. راح منو الراح يدخل للقفص يا شباب؟ الولد: أبو الفود. عمر: منو الجان يكول ما أعرس، وهسه راح يتوب ويعرس يا شباب؟ الولد: فهيداااان هههه. إيمان: يا ناقص، قبل فترة سويتلي سالفة من ردت أعرس وتالي خطبت كبلي. فهد: كبرنه بعد. مهيمن: له له، معقولة هاي الحجاية تطلع منك أبو الفود؟ بس لا سلاحك كام ميشتغل، وكلت أستصلحك نفسي وأعرس قبل لا سلاحي يروح وبعد ميسحب أقسام.

فهد: مو سلاحي مثل سلاح أبوك، ضل يمعلك بي لمن جاب خلفه طايح حظها مثلك، وطاحت براس المكرودة أمك. مهيمن: رحم الله والديك. أيمن: والله لو ساكت أحسلك. شتسوالك هسه؟ هاي تشكك بسلاح أبوك. مهيمن: الحجي بيناتنه، الحجي صدك، سلاحه عاوي، والحجية حايرة بزمانها. أيمن: هههه. عمر: أكول، شلون راح تدبرها بيوم العرس وكتفك مصوب؟ فهد: لتخاف، ماكو شي يصعب عليه. وبعدين كتفي المتصوب أبو قاسم مابي شي، الله يحفظه ويطول بعمره وأمكانياته.

الولد: هههه. أيمن: اجاكم غانم. فهد: أباوع، أجه غانم. كمت. غانم: ألف مبروك ابني، وأخيراً عشت وشفتك بهاليوم. فهد: ابتسمت، لو أبويه عايش هسه ما أشوفه بعيونه هالنظرة الي بعيونك. غانم: والله المشية اليوم لابني مو ضابط. عساها زواجة الدهر، وإن شاء الله ابنك بحضنك بعد سنة. عمر: قصدك بعد شهر. غانم: هههه، أحسنت، هاي فاتتني.

فيصل: أباوع، الدنيا مكلوبة والشارع مسدود. جماعته كالبين الدنيا، وكل الجايين مسؤولين بالدولة، شي ضباط وشي عمداء. هاي من غير خواله الشيوخ. ينعل يومك جايب فيلق كامل، وياريت لو مرتك تستاهل. اللي يشوفه يكول راح ياخذ بت وزير وخابص الدنيا. ولو هو من يومه يحب الفخفخة. علاء: أبو حارث، وين فهد؟ شوكت نباشر بالمشية؟ عباس: أبو حسن، عوف فهد ويه جماعته، خلي متونس. وأحنه غدينا العالم الجاية وضيفناهم، خلي نطلع بعد ربع ساعة، أفضل شي.

علاء: على شورك خويه أبو حارث. علي: لك منذر، عود بمشيتي هم لازم أجيب كل هالعالم؟ منذر: أي أكيد، نسيت أحنه ولد منو؟ علي: أني ما أحبذ هالسوالف، أسوي خطبة عائلية وآخذ مرتي وأسافر أفضل من الصرف وهالسوالف. منذر: حتى إيمان تشكك بالنص. هي متعول تعرسكم وتفرح بيكم، وانت تريد تختصر عليها فرحة شكبرها. سامر: يوم الألي، كولوا آمين. علي: ليش أنت ياغبرة تقبل بيك؟ سامر: أختك. منذر: شكلت؟

سامر: ها، هيج ماكو شي. أروح أشوف أبويه يصيحلي. مشيت، شفت مرتضى أجه. خرب، كملت السبحة. أجه تقرب يمنه. مرتضى: ألف مبروك ابن الخال، تتهنى بغنى. فهد: بتحذير: صوتك ولتكول اسمها. مرتضى: باوعتله، عندي حقد تجاهه بهاللحظة، لو أطلعه أموته بمكانه. أجيت أجاووبه. سامر: أحم، مرتضى تعال أريدك. مرتضى: درت وجهي ورحت وياه. محسن: اهدئ فهد، شبيك؟ وجهك مطعون.

فهد: اسكت عني محسن، تره روحي واصلة لخشمي. وره ربع ساعة كمنه حتى نروح نخطبها رسمي. وصلنه لكينه خمس زلم، عرفت رجل خالتها جايب جماعته وإخوته. مدري ليش انقهرت على غنى، يعني أهلها عايشين وما واحد كلف روحه وكفلها بهيج يوم. *** غنى: درت وجهي، يله ننزل. شبيجن؟ نرجس: تخبلين، عزة العزاج. اروى: اسم الله، العزة يعزيك، طايحة الحظ.

غنى: باوعت لروحي، لبست فستان أسود تصميمه بسيط، بنفشة خفيفة كولش. ما ردت ألبس شي مبالغ بي، هو مجرد عقد. برمت شعري وهو طويل وثخين، صار أقصر وأحلى. نرجس: بس لو الله يهديج وتخلين مكياج. غنى: كلت مكياج ما أريد، أني مقتنعة بوجهي هيج. وبعدين أني وره الزواج راح أبقى كدامه بدون مكياج، فماكو داعي أخلي مكياج. وضيفي إنو أني حزينة ووافقت على حفلة العقد حتى ما أضوج أهل اروى. اروى: هي هاي العايزة؟ متقبلين نسوي حفلة حتى أكسرچ؟

خوش والله، عرس أخويه ومنسوي حفلة ونركص بي. غنى: بهدوء، هو هيج. أني مستحيل أكون أنانية. الحفلة الكم وما أريد أضوجكم، بس غيرها ما أريد. تردون تحتفلون؟ احتفلوا بفهد، وأتمنى متضوجون مني، وفهد هم ميحجي شي. اروى: بالعكس، ما حجه شي. من كلتله الحجية، كال براحتها، شتريد تسوي، خلي تسوي. غنى: تنهدت. يله، خلي ننزل. نزلت وأشوف الدنيا مكلوبة عدنه. أعتقد بدت الخطبة من صدك. أباوع النسوان يركصن ويغنن، مبين عليهم فرحانين بي.

حياة: اللهم صلِ على محمد. ولج ليش لابسة مخلع؟ لتنضربين عين يمه. ياسمين: العين الحارة الحمزة يطفيها، والعين الباردة كل الهلا بيها. أي أي أي. اروى: اليوم أركص ركص وأشلع الكاشية. أني أخت الولد مو أخت البنية. نرجس: وأحنه خوات العروس. واليوم نلعب جولة. خاف عبالكم بس الكم الكولات؟ لا حبايبي. اروى: هههه، شكد سخيفة.

غنى: كعدت على جهة، والنسوان شي يهوسن وشي يركصن، وأني ساكتة وأجامل الي يباركونلي. خو خالات فهد استقبلني ذاك الاستقبال، بحيث صفنني. عكس بيت جده جانوا حديين وياي نوعاً ما. عبير: مبروك غنى. غنى: الله يبارك بيج حبيبتي. آلاء: بوستها، مبروك عيوني، مرت الغالي. غنى: بتفاجئ، الله يبارك بيج. سعاد: شو وخرن، خلي أشوفها. ياا، هاي شنو؟ ليش لابسة أسود وما حاطة مكياج؟ أدري عقد لو فاتحة هو.

ضحى: أحسن، حتى الولد يشوفها على الطبيعة من البداية. ما شاء الله، هي تخبل بدون شي. غنى: شاورت سارة، أكولج منو هاي؟ سارة: ضحكت، هاي عمتي أم فيصل. شبيج؟ غنى: فتحت عيوني، ياا، والله ولا عرفتها. هاي شمسوية بروحها. إيمان: شويه وخرن حبايب، ونصن صوتجن شويه. همست لغنى: أفردي وجهج، تره مبين عليج كاعدة بعزة. لتخليني أضوج، واليوم يوم فرحة.

غنى: جبرت روحي ابتسم. صار خاله. باوعتلي بنظرة مكدرت أوصفها، حسيت نظرتها مليانة عتاب. بدت الحفلة وهوسات النسوان. للحظة تمنيت أمي موجودة ويايه وبيبي زكية واكفة يمي وتقرالي قرآن. بس مو كل شي نتمنى نحصله. تنهدت، أباوع أجو هواي ناس، ماشاء الله، ترسو البيت وحتى ماكو مكان كعدة. أباوع لخالتي حبيبتي تركض ركض، مقصرت أبد، لا هي ولا عمو الي استقبل الزلم والمشية الجبيرة الي جابوها، عبالك أبويه. فدوة لكلبه، مشت مراسم العقد لحد ما صاحولي حتى نعقد. لبست جادر أبيض، كعدت على كرسي، وخلن قرآن بحضني، وأشرتلي خالتي على هالاية

(إنا فتحنا لك فتحاً مبيناً) . ورجليه بمعجنة بيها ياسم وهيل وورد ومي. واكفات على راسي نسوان عم فهد، أم حارث وأم محسن، يقرن قرآن لأن ما عندي أحد يقرالي. بدت مراسم العقد، وأخذ الشيخ موافقة فهد، وأنوب سألني على موافقتي. الشيخ: غنى صالح... أنتي موافقة على فهد سالم علي، على مهر مقداره (... ومؤخر مقداره (... ... قولي نعم، وأنا وكيلك. غنى: باوعت لخالتي بسرعة، صدمني المبلغ الي ذكره الشيخ. سحر:

همستلها: لتنطقين، خلي يعيد كلامه أكثر من مرة ياله تجاوبي. غنى: هزيت راسي. عاد الشيخ كلامه أكثر من مرة، ومجاوبته. تالي أشرتلي خالتي، غمضت عيوني وجاوبته (عادة معروفة عد أغلب أهل بغداد) . نعم، وأنت وكيلك. سمعت الهلاهل وكالوا فهد راح يدخل، وأني حسيت الدنيا تدور بيه. لزمت أيد خالتي بسرعة. سحر: بخوف، شبيج يمه؟ غنى: نملت عيوني، عيوني دموع، اختنكت خاله.

سحر: من رخصتجن عيوني، بس شويه. كومي حبيبتي، كومي يمه. نرجس، كاسة مي من المطبخ بسرعة، كومتها، رجعتها بمكانها. أهدي، وكولي يا الله. هاي بالخطبة هيج، أهدي. نرجس: شربتها مي، شبيج غنى؟ غنى: ماكو شي، هيج لتخافون. تنفست بعمق. أباوع للنسوان كمن يتراكضن يلبسن يحجابتهن، حتى خالتي وياهن. انفتح الباب ودخل فهد، والدنيا انكلبت بالهلال. أميرة: كلللوووووش، مباركلك يا راعيها، مباركلك يا راعيها، أي أييي أي.

غصون: وعلى عناد عماته، لعبن لعب خالاته، أي أي. غنى: ابتسمت، مبينات خالاته يموتن عليه، وهو هم ما صدهن. بالعكس، أحسه فرحان بهوساتهن، مبين يحبهن. أباوعله لابس قاط كحلي ومزين ومخفف لحيته. مع إنو هو ضابط واللحية ممنوعة عدهم، بس هو يخليها خفيفة، ميزينها، ومدري شلون ما يعاقبوه. ما أدري، أجه وكف يمي. فهد: بعد الهوسة الي سووها خالاتي، شفت غنى وانصدمت. لابسة أسود وشعرها مدري شمسوية بي، بس طالع يخبل. كفت يمها.

نسرين: وحبها ولك، حبها، ولتخاف من أمها. يا نسيت، هي أمها ميتة. اروى: أباوع لغنى، الدمعة صارت بطرف عينها. خطية ما حجت شي، والحجية والكل ما قبل على سواية عمتي. سحر: ما يحبها. أني أمها، ما أقبل. غنى: باوعت لخالتي، أووف ماما، ياريتج موجودة ويسوون هالهوسة وأنتي يمي. ياسمين: وحبها ولك، حبها، ولتخاف من أهلها، حبها. بيبي حبها.

فهد: باوعتلها، وجها مابي ذرة مكياج. دنكت بستها بخدها وابتعدت. انتبهت ظهر احمرار طفيف على وجها. أخذت الحلقات من أمي، لبستها حلقتها. أباوع لأيدها عبارة عن قماشة بيضة وشرايينها مبينات كد ما بيضة. غنى: أخذت الحلقة خليتها بأيده، واجه لبسني طقم ذهب ثكيل، لأن ذهب العرس ما قبلت الحجية نشتري.

كالت: أنتو طلعوا جيبوا على ذوقكم، وأني مثل الإله العلية، أكول أي وبس. مرت مراسم العقد على خير، وبدت الناس تروح، وبقوا بس أهل فهد، حتى خالاته راحن. سحر: كومي يمه، رجلج كاعد بالاستقبال يريد يحجي وياج. غنى: شيحجي؟ سحر: غير يتعرف عليج، يحجي وياج، ما ياكلج. كومي دخلي. غنى: ماشي، بس خلي أبدل. سحر: كومي، شتبدلين؟ هو شافج، شافج. غنى: كمت وكفت يم الباب، سمعت صوت ورايه، درت وجهي، شفت اروى ونرجس.

نرجس: غنى، مو تسوون وكاحة، خليج كد الثقة. اروى: أني ضامنة أخويه، بس أنتِ غنى، لزمي نفسج. من تغتصبي تره أحنه عالم، أهم شي عدنه ستر ولدنه. غنى: عيب عليجن، أستحن شويه. نرجس: هههه، ست حت نصره. غنى: هزيت راسي، والله فايخات. فتحت الباب، لكيت فهد كاعد ومرتاح، لا ويدخن، عبالك البيت بيت أبوه. رحت كعدت بعيد عنه. فهد: مبروك. غنى: بهدوء، الله يبارك بيك.

فهد: اكو جم موضوع لازم نتفاهم بيهم قبل الزواج، مادام صرنه كدام الأمر الواقع وزواجنه صار شي حقيقي وما منه مهرب بعد. غنى: تفضل، أحجي. فهد: ببرود، تعاي كعدي قريب مني حتى نحجي مثل الأوادم، مو واحد بالشرق وواحد بالغرب. غنى: كمت كعدت قريب عليه، أسمعك. فهد: قبل لا نتناقش بالأمور الخاصة بحياتنه، سؤال وأريدج تجاوبيني عليه. أنتِ كلتلي راح ترفضين وقرارج ما منه رجعة، شنو الي غير رأيج وخلاج توافقين؟

غنى: بهدوء، خلي أكون بكامل صراحتي وياك. أني ما عندي أحد يافهد، وما أخجل أحجيها. أني وحيدة وبدون أهل. وخالتي ورجلها إلى متى يضلون متحملين مسؤوليتي. وحسب كلام خالتي، أنت أنسب خيار الي. وغير هيج، لو أرفضك راح أخسر سمعتي الي جانت حتدمرها أمك وتسبب حجي لأهلي الميتين. وهاي حقيقة وبس.

فهد: خوش، مادام الأوراق صارت واضحة، خلي ندخل بالمفيد. شوفي غنى، علاقتي وياج سابقاً جانت علاقة صداقة ومتتجاوز الأخوة، ومحور كلامنه جان عادي ومابي أي شي. وأبد ما تطرقت لأمور شخصية، وهواي أشياء بذيج الفترة أنتِ متعرفيها عني. أما هسه، كدام الناس وحتى بيناتنه، أنتِ مرتي شرعاً، وبعد جم يوم راح تصيرين قانوناً هم. فأسلوبي وكلامي وياج راح يتغير ميه وثمانين درجة. سابقاً يمكن جنت متساهل وياج بتصرفاتي وكلامي وبكلشي، أما هسه فلا. أني عندي قواعد وقوانين، وأنتي مجبورة تنفذيها بحذافيرها. وهذا كلامي لو أي وحدة بمكاني جان راح تسمعه. فلا تعتقدين كلامي هذا بس لأن انتي صرتي مرتي.

غنى: هزيت راسي. فهد: أول شي، أني شخص أحب تكون حياتي الخاصة معزولة على جهة، محد يدخل ولا يتطفل عليها. وأول شي أريده منج هو تكونين سكوتية، شيصير كدامج متحجين. علاقتي وياج أبد ما أحب أحد يعرف عنها شي، لا أني شلون أعاملج، ولا شيصير بيناتنه بالغرفة، ولا أي شي. وكتلج أني شخص يعشق الخصوصية. غنى: أي.

فهد: ثاني شي، يمكن تعرفي، أني أكره المرة الوصخة. سواء جانت نظافة الغرفة أو نظافتها هي. أجي ألكى الغرفة ما مرتبة، أو قشاية واكعة بالكاع، أو أنتِ وصخة، أحسبي البيت ينكلب. عزة عليج، فاريدج دائماً نظيفة.

غنى: أعتقد الدتحجين وياها مجانت عايشة بحاوية زبالة، ولا فد يوم طبيت عليچ بهدوم لابستها من سنة، ولا فد يوم دخلت للشقة وشفتها وصخة. هذا كلامك لوحدة متعرفها. وبالنسبة لنظافتي أني، فاني نظيفة لنفسي مو الك. أنتَ لأن ديني يحتم علي أبقى دائماً نظيفه، هاي إذا جنت تدري دينك شيكول. فهد: أدري بيچ وشايف نظافتچ، بس الحذر واجب. وكتلج الجاي تحجين وياا مو فهد الجنتي عنده من أشهر وبيناتكم صداقة...

أنتي هسه تحجين ويه زوجج الضابط فهد سالم، باعتبارچ نهيتي كل ذرة صداقة بيناتنه بمواقفج السخيفة وبعدم احترامج الي. بس مو مشكلة، شي وانتهى، وأحنه ولد اليوم... نرجع لموضوعنه، وين جنه؟

أي، ثالث شي، أني أكره الاختلاط. سواء ويه الولد أو البنات، حتى أقاربي ما أريدج تختلطين بيهم. أريدج رزنة بتصرفاتج دائماً. وهذا شي جداً مهم عندي. بالإضافة إلى إنو غير اروى ونرجس، ما مسموح الج تصادقين. ومرتضى ابن عمتي، لو شفتي كدامج تعبري وتمشين بدون حتى متسلمين عليه. لهنا مفهوم؟ غنى: لا، مو تمام. هذا اسمه سجن، شنو ما مسموحلي أختلط بأحد؟

وبالنسبة لصداقاتي، فمو أنت الي تقرر. أني الي أقرر أمشي ويا منو وأصادق منو. ومرتضى، أني أصلاً ما أحجي ويا. فهد: غنى، كلامي يتنفذ ب ح ذ ا ف ي ره (بحذافيره)

وغير قابل للنقاش. صدقيني، أنتِ ما شايفة وجهي الثاني. تره ذيج الفترة ماشفتي مني غير حمل وديع. أما هسه الحمل راح وسوينا له باي باي، وطلع الفهد يا حبابة. فكتلج، مادامج صرتي مرتي، تعيشين وياي مثل ما أني أريد. وأقسم لج بالله يا غنى، لو فكرتي مجرد تفكير تتجاوزين حدودج ويايه، راح أنقلب طنطل عليج وما أهتم لو جنت مرة لو رجال.

غنى: شكلي جنت مخدوعة بيك، وذاك فهد جان وجهه جذاب منك. مسحت دمعتي بسرعة. لتخاف، ما أتجاوز عليك. مو حباً بيك، بس الله موصيني ما أعصيك. وبالنسبة لكلامك، فراح أنفذه على قدر المعقول. بس إنو تسجني وتمحي وجودي، هذا شي بأحلامك الوردية. فهد: وردية، صفره، خضرة. كلامي يتنفذ حتى نعيش مثلنه مثل أي زوجين طبيعيين. ما أريد جهالي باجر عكبه يكرهون حياتهم بسبب مشاكل أهلهم.

غنى: ليش واثق إنو حياتنه راح تصير طبيعية مثلنه مثل أي زوجين طبيعيين؟ فهد: خصم الحجي غنى، أنتِ ترديني لو لا؟ كلمة وحدة تختصر كل شي وتكلب موازين علاقتنه الزوجية. غنى: للحظة ردت أكله لا، أني أريدك وأحبك. بس انعقد لساني ومانطقت غير... لا. فهد: بهدوء، براحتج. أني ما أجبرج على شي. خلص، حسبي حسابج جم يوم ونطلع نجهز للعرس. مادام كل شي مخصوم، ماكو داعي نماطل. يله، أخذيلي طريق، أريد أطلع.

غنى: طلعت. لكيت الكل طالع، وخالتي يمكن بغرفتها، وعمو... تفضل. طلعت ورا. دفعني حيل. فهد: بحده، رجل خالتج بالبيت. وين طالعة؟ وجسمج كله مبين. انتبهي. غنى: باوعتله، تره ما انتبهت. فهد: أنوب انتبهي، ولتطلعين وراي. أني طالع، وأنتي بوجهج لغرفتج. غنى: مسحت على وجهي، اللهم صبرني. *** ضحى: حبيبتي، ليش ما جيتي؟ حرامات فاتج العقد يخبل. مروة: تونستي؟ ضحى: كلش تونسنه. مروة: ذبيت الريمون، شلون طالعة غنى؟

ضحى: الله يحفظها، تخبل. خو فهد ضل صافن عليها، خاصة هي بيضة ولابسة فستان أسود، طالعة تضوي. الله يحفظهم، حيل لايقين لبعض. طول الحفلة والحجية تقرا المعوذات عليهم. مروة: يعني فهد فرحان؟ ضحى: أي أكيد، غير عقده. وبعدين ابن عمج كبر، ولازم يستقر. بعد الي بكده، هسه عدهم جهال مو ستوهم يخطبون. مروة: تره كل عمره ثلاثين، ليش تبالغون. ضحى: ليش تلاثين؟

صغير يعني. تره الزواج بعمر جبير مو حلو. على العموم، الله يسهله ويوفقه ويه هالبنية. مروة: عساها بالمرض، وإن شاء الله ينفصلون وأفتك منها هالبت الفكر هاي. اجتني رسالة من شهد: "لج ليش ما اجيتي للعقد؟ " طفيت الموبايل ولبستها، ما الي خلك روحي، وهاي بطرانه. *** فهد: متمدد بغرفتي، واندكت الباب. منو؟ اروى: أني وورده. فهد: كعدت، تعالن. اروى: عادي نجي يمك شويه. فهد: خير، شعدجن؟

ورده: طلعت الايباد، تريد تشوف حفلة العقد صورتها بالكامرة ونزلتها على الايباد. فهد: لا، اكو نسوان بالحفلة، شلون أشوفه؟ ورده: لا، ما صورنه النسوان، بس غنى والطقوس الي سوتها خالتها الها قبل العقد. كعدت بصفه، طلعت صورتها، شوفها. عفيه فهد، هنيالك، مرتك هيج شعرها. اروى: هههه، راح تحسديها. عوفي الصور، شوف فهد الفيديو مال نهاية العقد.

فهد: أباوع غنى كاعدة على كرسي، وخالين رجليها بطشت، بس مدري شخالين بي، وحاطين قرآن بحضنها. باستغراب، هاي ليش مسوين هيج؟ اروى: هاي خالين رجليها بماي وياسم وهيل وورد. تكدر تكول عادة، والقرآن يخلونها هالاية حتى تصير فاتحة خير على رجلها وأهلها. فهد: هاا. كلبت بالصور، طالعة حلوة، واختيارها للفستان ممتاز، حلو ومو مبالغ بي. ورده: عادي أسألك سؤال. فهد: خير. ورده: أنت تحب غنى؟ فهد: وأنتي شلج بهالأسئلة؟ مو عيب.

ورده: يعمي، هسه شكلنه سألك، تحبها لو لا؟ ندسته، شنو تستحي فهودي؟ فهد: ضحكت، تره تصرفاتج أبد مو مال عمج. ثكلي، طايحة الحظ، و صيري مثل اروى، حضنتها، حبابة وهادئة، مو مثلج. اروى: شوفي، فهد يحبني، ميحب ذيج البنية. ورده: وخرتهم عن بعض وحضنت فهد، امشييي لج، والله لو تموتين أبقى أني الصغيرة، وكلها تحبني أكثر منج. فهد: هههه، ها أم الغيرة. ورده: أم الدلال والجمال، أني. اروى: حمت حمت، طفوها.

فهد: كافي، يله امشن ولن، أريد أنام. تعبان. طلعن خواتي، وأني نمت من التعب، بعد ورايه حصبه وجدري. *** بعد مرور يومين... صباحاً. غنى: اليوم نروح أني وخالتي وفهد وخالة إيمان واروى نشتري الذهب ونجهز للعرس، لأن بعد فترة زواجنه، وفهد حيروح عكب باجر يلتحق وياخذ إجازة ويرجع. وبدينه من اليوم نطلع. صعدت، صباح الخير. الكل: صباح النور. فهد: حركت، وين تحبون ترحون؟ اروى: للمنصور، بي ملابس تجنن.

إيمان: كعدي كعدي، وين ما يضربون بالعالي؟ تردين وياريت لو الموديلات حلوة، كلها أزرك وأخضر. فهد، أخذنه لمكانات يبيعون بيها شغلات خاصة بالعرايس. فهد: كوه لزمت لساني، فشلة من خالة غنى. يمه، شمدريني أني؟ قابل معرس قبل؟ انطيني مكان وأني آخذجن. سحر: خاله، أخذنه للسوك، وإذا ما عجبنه شي، عدنه اليوم بطوله. ما خسرانين هيج. فهد: هو هيج خاله. حركت سيارتي، رحنه للصايغ أول شي. يله نزلن. قفلت السيارة ونزلت وراهم.

إيمان: فهد، أخذ مرتك، وأشترو الي يعجبكم. وأحنه راح نروح لهذا المحل نشتري جم شغلة للحنة. فهد: هزيت راسي. يله تعاي. غنى: مشيت ويا. دخلنه للصايغ. فهد: السلام عليكم. الصايغ: وعليكم السلام. فهد: هسه شكله، أني أريد ذهب عرس لو شنو؟ أحم، أريد تخم كامل مال عرس. الصايغ: موجود، وأكو موديلات كلش حلوة، خلي أراويكم ياها. غنى: نزلهن الولد. أباوع، هنه حلوات بس كبار كولش. فهد: اختاري الي يعجبج. غنى: همست: هذني غاليات.

فهد: بهدوء، ما عليچ بالسعر، اختاري الي يعجبج وبس. غنى: ما عجبني ولا واحد. لفت نظري واحد عازله على جهة، بس يجنن على شكل ورده وبيها ورقات ناعمة كولش. فهد: حلو، مو؟ غنى: أي. فهد: بلا أمر عليك، نزل هذا. الصايغ: أي، بس هذا البارحة وصل. فهد: شكد سعره؟ الصايغ: (... غنى: شهكت، وفهد بسرعة خزرني. فهد: طلعت محفظتي، نزله. غنى: شنو ينزله؟ أنت شفت السعر؟

فهد: أي شفته، ومو غالي. ومرة ثانية لتشهكين هيج. أحد جنج، سديت حلكي. ما أريد أغرد. تعاي، خلي نشوف الباقي، هذا راح ناخذه، عزله على جهة. غنى: فترينه بالمحل، أخذت سوارين، وهو أخذلي ست بتوت (مثل المعاضد) ، وأخذت محبسين، وياهن كلادة طويلة. راد يشتري بعد، بس مخليته، كافي. بس التخم الذهب صار بذاك الحساب، وهو بكل سهولة يشتري ولا يهتم للسعر. فهد: تردين شي بعد؟ غنى: بهدوء، لا، شكراً.

الصايغ: إذا تحبين تبدلين الحلقة، أجن موديلات فد شي، وأكو وحدة من بين الحلقات بيها ماسة نيلية تطلع تخبل على أيدج. تردين أراويج ياها؟ غنى: أباوع لفهد، خزرني. فهد: يله، كمل. أنطيته الحساب وجريتها من أيدها. الصايغ: بالعافية. فهد: مارديت عليه. غنى: طلعنه، وكام يغرد. فهد: يخبل، ابن السكط، والله. دنعل أبوكم لابو الخلاكم صياغ. إيمان: ها؟ يمه، كملتو كلشي؟ فهد: أي، يله صعدن، خلي نروح للسوك.

غنى: طلعنه، وهو الطريق كله ينافخ. هسه الي يشوفه يكول هذا يموت عليها، وهيج ضاج. وصلنه للسوك، ضلينه نفتر. لزمت بدلة سودة. سحر: لزمت أيدها، عليچ بروح أمج، وبروح كل ضحكة طلعت من مروان، أنسي الأسود وذبي. اروى: أي حبيبتي، بسج. صار سنة أنتِ الأسود ملازمج، كافي بعد. أنسي الماضي وابدي حياة جديدة. اعتبري زواجج من فهد هو بداية حياة جديدة الج. غنى: بتعب، ما أكدر. والله ما أكدر.

سحر: حلفتج بأمج وأخوج، وأنتي بكيفج بعد. كسري برواحهم وخلي يزعلون عليچ. غنى: لا خاله، لتحجين هيج، حبابة. إيمان: ببرود، تره الأم مهما كانت تزعل من تشوف بتها بهيج يوم لابسة أسود، لأن ميصلحلها، وليلة الزواج لازم تبدأ بلون أبيض. غنى: لا لا، كول شي ولا تزعل أمي. خلص، أذب الأسود، والله. سحر: ابتسمت، الله يطيج. ينرجس... عفيه عليج بنيتي. يله تعاي. غنى: انجبرت أقبل. خاله، أي ألوان صارخة ما ألبس.

سحر: ميخالف، المهم أسود متلبسين. اروى: شوفي نونه، هاي البدلة تجنن. وهم بيها أسود وكريمي، مدري رصاصي. غنى: باوعتلها، حلوة، تخبل. اروى: خلي نأخذها من ضمن بدلات الحنة.

غنى: هزيت راسي. أخذت بدلتين بعد، وبدلة العرس على غير يوم نشتريها. رجعنه للبيت، وضلينه كل يومين نطلع نشتري جزء من غراض العرس. فهد قبل ليروح، عقدت أني ويا محكمة، ووصى على الغرفة، وراح. وطبعاً ماشفته من التحق، وطول هالمده أي كلام ما صار بيناتنه، غير تردين شي، عاجبج هذا، اشتري هذا، وبس. هو ماخذ موقف، وأني ساكتة، لا بيه أحجي ولا بيه أناقش. فزيت على صوت نرجس. نرجس: شنو رأيج بهذا؟

غنى: باوعت، جنه بمحل خاص بالعرايس يبيع قمصان نوم، تراكات وهالاشياء. صدوك تحجين! نرجس: ليش، حلو، يخبل. غنى: متستحين؟ جماله لازمتة بأيدج؟ رجعي، عيب. نرجس: تره بعد جم يوم راح تلبسين أنكس من هذا لرجلج، هاي إذا خلاچ تلبسين ملابس كدامه. غنى: بخجل، تأدبي. نرجس: أوي يمه، استحت. باجر عقبه أنتِ تعلمينه. يله كليلي، ناخذه؟ غنى: لا طبعاً.

اروى: اجيت، أخذته. جيب حبي، جيب، خلي أخويه يتمتع عينه. فديته، مالج علاقة بهاي النفسية، جنها مطلقة. غنى: شو، أنتُن بكيفجن تتصرفن. اروى: دتعاي تعاي. تفضلي حبيبتي، نريد كل هذني. نرجس: ركزي على الأحمر أبو الشراشيب، مو تنسي. بي اغراءات هواي. غنى: والله أنتِ زايعة المستحة فرد مرة. إيمان: يله، كملتن؟ خلي نطلع، علي أجه.

نرجس: دفعنه لغراض غنى وطلعنه. شفت علي، أخو اروى. الصراحة، هو حلو، مو بجمال فهد، بس هم صكوك. وأني على الصكوك أخرب وأدوخ. علي: ها، كملتن؟ إيمان: أي يمه، بس بالبداية، خلي نوصل نرجس. أمها خابرتني كالت لتتأخري. علي: باوعتلها، نرجس الحشاشة، معروفة. الجماهير. اروى: نرجس، خليج يمنا، وبالليل نرجعج، حبابة. نرجس: لا عيني، لا. ما أكدر. هسه جعفر يلعب بية جولة. تأخرت هواي.

علي: طبعاً، طريقتها بالحجي تفقد ضحك. جنها عجوز. وصلت لبيتهم، نزلت ودكت الباب. طلع أخوها. نزلت سلمت عليه. أني أعرفه، تعرفت عليه من فترة. شلونك جعفوري؟ جعفر: هله حبيبي علاوي، شلونك؟ وين هالغيبة؟ صارلي هواي ما شايفك. علي: والله هالتشوف، ملتهين بعرس فهد، هاي من غير العيادة وهوسها. جعفر: الله يساعد كلبك. بس على فهد، مدري شلون تجرعه، والله. تقربت، شلونج غنى؟ غنى: الحمد لله، استاذ. أنت شلونك؟ جعفر: تنهدت بحسرة، الحمد لله.

علي: يله، أني أروح. سلملنا على الأهل. جعفر: يوصل الله وياكم. اروى: غنى، صدك، شلون بدوامج هاي؟ أنتِ الصبح جاي تداومين، والعصر نطلع؟ هاي من غير التطبيق؟ شلون بيچ؟ غنى: أحاول أوفق بين الدوام والطلعة. وبالنسبة للعرس، راح آخذ إجازة لخمس تيام. فهد قدمها إلي، وبقة بس التطبيق، وإن شاء الله وره العرس أباشر بي. علي: دير بالج، تره المعدل كلش مهم بآخر سنة، لأن أغلب الشركات والمدارس الأهلية تعين على المعدل.

غنى: لا، الحمد لله، المعدل ضامنته. علي: عود، إذا تعرفين انكليزي، أشغلج سكرتيرة عندي، بس ها، بدون راتب. اروى: تره غنى عدها دبلوم فرنسي، هاي من غير الاختصاص، لأن هي داخلة لغات. علي: هاج، تفضلي. غنى: شنو هذا؟ علي: مفتاح العيادة، من اليوم باشري. غنى: ابتسمت. علي ويه الغربة كولش حدي، بس ويه المقربين يصير كولش سبورتي. أما منذر، فمن كمية اللطافة الشايلها، تحسه فطير، وكل حقد ماكو بقلبه.

علي: يله، عيوني، خلصت كروتك لهلكم، يله. غنى: نزلت، شكراً علي، زحمتك. علي: تدللين، مرت الغالي أنتِ. غنى: راحن خالة وأروى، بعد ما نزلن الغراض وياي. أجيت شلتهن، ودكيت الباب. طلع لي عمو، بس شو كالب وجهه. سيف: جيبي عمي، جيبي، شلون تشيليهن وحدج. غنى: شبيك عمو؟ صاير شي؟ سيف: طبي بويه، طبي. غنى: دخلت جوه، لكيت خالتي سهاد وخوالي كاعدين. كامل: هله، وين جنتي؟ غنى: ما رديت عليه. خاله، أني تعبانة، حروح أبدل وأنام، ورايه دوام.

سهاد: وين رايحة؟ خالج مو يحاجيج، شهالقله الأدب هاي. غنى: اكو صوت وشوشة بأذني، خاله، هاي يمكن لأن تعبانة. يله تصبحين على خير. حصلي وأنام، لتكعديني. صعدت فوك. أني وعمو، خلينا الغراض. تسلم عمو. سيف: شسويتي قابل، بويه؟ زين سويتي بيهم. علاج الجاهل، التجاهل. يله، أني أعوفج ترتاحين.

غنى: بدلت ملابسي، وتمددت، وأني أسمع صوت صياحهم. عرفت اكو غاية من جيتهم، بس ما اهتميت. إذا أضل أفكر بيهم أدمر نفسيتي، فوك ما هي متدمرة. سمعت صوت موبايلي. شفت مكالمة من فهد. شعجب خابرني؟ صار له خمس تيام ملتحق، ومخابرني ولا مرة، واصلاً علاقتي بي صايرة جداً رسمية، وهالشي حيل مأذيني، بس يبقى أحسن ما نتعارك. جاوبت، الوو. فهد: الوو، كاعدة؟ غنى: أي، هستوني جيت من السوك. فهد: أدري، كلتلي أمي. خو ما محتاجة شي؟

الفلوس كفتج، لو أدزلج بعد؟ غنى: لا، شكراً، كفت وزايد هم. بعد بقة عندي مبلغ كولش جبير، ما صرفت منه شي. فهد: لتتقيدين، اشتري الي تردي. فلوس واكو. وشتحتاجين بلغيني، لتكولين لاي أحد، وأني أدزلج بأيد علي. خوش؟ غنى: خوش. فهد: حجزت القاعات وكملت كل شي. اكو شي بعد؟ ذكريني، خاف ناسي شي. غنى: لا، ماكو شي، كولشي تمام. فهد: ماشي، يله مع السلامة.

غنى: الله وياك. سديته، أحسه قالب ثلج من كمية البرود. اااااااه، الوحدة تكون فرحانة بهيج أيام، وحتى نوم متنام من الحماس. اله أني أحس كل مابيه دادمر حياتي، مو هاي الحياة الأريدها. توقعت نفسي سابقاً بهيج فترة، أكون أسعد إنسانة ويه الشخص الي اختاره كلبي، بس للأسف، راح أتزوج واحد اختاره كلبي، بس شنو الفائدة؟ ومشاعري محتفظة بيها لنفسي، حفاظاً على آخر حبة من كرامتي. *** أيمن: ها، فهد، شو كالب وجهك؟ خوما صاير شي؟

فهد: لا، ماكو شي. بس شايل هم لشغلنه وهم لحياتي. أيمن: كعدت، ليش؟ أحجي. فهد: أخذت نفس من الجكارة. يعني أني هنا بنص الموت، وهناك منتظرتني حياة جديدة. وأني مجهولة نهايتي. أعيش، أموت، ما أدري. قدرنه مجهول. أيمن: كول يا الله. تره مابقا شي وتتحرر الموصل بفضل الكادر العسكري والحشد، من بعد فضل الله. فهد: وهذا الي مخوفني. لا بنهاية المطاف وتصعد أرواحنه. أيمن: لا وداعتك، ما دام العلوية كلبها مطمئن علينه، كول ماكو شي.

فهد: منو هاي العلوية؟ أيمن: ضحكت، أمي. فهد: شلون علوية وجابت واحد مصدك مثلك؟ أيمن: هههه، أشكرك. فهد: العفو، تدلل. أيمن: ضربت متنه، توكل على الله، يله. أني كائم أصلي وأنام. فهد: الله يهديك. راح أيمن، وأني كاعد أفكر بحياتي الجديدة. لحد الآن ما مصدك. خلص، بعد اليوم الأحسب له يوم يوم ويه الإنسانه الي منتظرها من زمان، أجه. بس للأسف، ويه الإنسانه العمري ما تخيلتها تصير جزء من حياتي. يله،

على كولتها: وعسى أن تكرهوا شيئاً وهو خيراً لكم. تنهدت. كمت نمت. مرت الأيام بلمح البصر. أخذت إجازة ونزلت لبغداد. وصلت للبيت، فتحت الباب ودخلت. صباح الخير. أباوع، الكل كامت. الكل: صباح الخير عريس. الحمد لله على سلامتك. فهد: الله يسلمكم. منذر، الغرفة شديتها مثل ما وصيتك، مو؟ منذر: أي، كل شي تم مثل ما أنت ردت. بس روح نام بغرفة علي. فهد: باستغراب، ليش عود؟ إيمان: دشنها بليلة العرس، مو هسه. عود بعد ثلاث تيام أشبع بيها.

سعاد: والله عدج سوالف، دبطلي يمعودة. شهالمعتقدات. روح فهد نام بغرفتك. أمك فايخة. فهد: اروى، كومي فرشيلي فراش نظيف بغرفة علي، وأني أروح أسبح وأجي. من رخصتكم. ورده: فديت القصف، والله. سارة: بتحطي نفسك في مواقف بايييخة. انغام: صوتج لتسمعج يمعودة، مالنه خلك. منذر، فدوه، هاك سالم، أروح أسويله أكل. منذر: شلت بوست خدوده. شوكت تعرس أنت؟ سالم: خله أيده على حلكه: ئييييب، أني صغير (عيب، أني صغير) منذر: ههههه، أروح فدوه لهالسان.

*** سحر: ما فكرتي؟ غنى: ميجون خاله، فدوه لكلبج، كافي تحجين بالسالفة. سحر: يا أمي، مو لخاطرهم، لخاطرج. اسمهم من طرفج، حتى لو مابيهم خير.

غنى: خاله، أنتِ وعمو تكفون وتوفون، حبابة. كافي، لا أريدهم يجون ولا يوصلون. كمت، غسلت وجهي، وصعدت لغرفتي. حضرتهم جايين ذاك اليوم على حساب يصالحوني ويحضرون العرس. عبالهم أني زوج. من درو بمكان فهد، كأموا يتوددون إلي. عبالهم أفيدهم. أني شكد ما أني هادئة وما أحجي، بس مو غبية أبد، وأعرف الكدامي شنو، وأني متأكدة أجوا يتعذرون مو لخاطري، وأنما على حساب مكانة الي راح آخذه. أفف، بعد ثلاث تيام العرس، وأني كملت كولشي تقريباً. بقى بس الصالون، وباجر أروح، ولو ماكو داعي، بس فني أحجي. تجني خالتي وأروى ونرجس، يذبحني.

دزتلي رسالة اروى: "رجلج ستوه وصل، خابري سألي عليه." الحمد لله على سلامته، همزين وصل بخير. خليت الموبايل على الشحن، ونزلت. مر اليوم بشكل طبيعي. ثاني يوم رحنه للصالون، وفهد ماشفته. ملتهي بالحنة مالته، حيسويها قبل حنتي بيوم، لأن أني هي حنة هي زفة. سوتلي الصالون تنظيف، وحفتلي، ورتبت حواجبي. انصدمت بالنتيجة، طلع وجهي، على كولتهم، كلبتني كلب. اروى: تصبغين شعرج؟ غنى: لا، ما أصبعة، لونه عاجبني، بس خلي تكصلي أطرافه.

انغام: متكصين منه ولا شي. مالنه خلك لسان فهد. حذرنا قبل لا نجي، كال: إذا كذلتها كصيتها، أكلب الدنيا على راسها. كعدي وسكتي. إيمان: أي، يحب الشعر الطويل، خاصة إذا مثل شعر غنى.

غنى: تنهدت. خاله إيمان، واكفتلي على الحجاية هالايام. ياربي دخيلك، صبرني. طلعنه من الصالون، ومر اليوم، واجه يوم زواجي، والي ما أعرف شراح يصير ورا. وهل ياترى راح أعيش بي حياة سعيدة لو لا. باوعت لروحي بالمراية، ولأول مرة من بعد مرور سنة، أخلي ألوان على جسمي. والله لو بأيدي أبقى العمر كله لابسة عليكم أسود، لحد ما أجي وأنام بصفكم. بس انجبرت أذبّه.

سحر: بدموع، أروحلج فدوة، ولج ختام، تعاي شوفي بنيتج، أم نص لسان، شلون كبرت وصارت عروس. غنى: هفيت على وجهي، حتى ما أبجي. خاله حبابة، لتجيين طاري أمي، فدوه أروحلج. سحر: أباوعلها، طالعة لعابة. المكياج والبدلة مطلعاتها تحفة. الله يحفظج ويوفقج بحياتج الجديدة، يايمه. روحي، دعوة كلب أم لبنتها، عسى أيامچ كلها فرح وسعادة، ومتشوفين ولا يوم مو حلو بيها. غنى: حضنتها، حبيبتي خاله. حياة: يله حبيبتي، أجه حارث ياخذنه للقاعة. هاي شنو؟

ليش تبجن؟ لا لا، غنى، فدوه لتبجين، ليخرب مكياجج، يمعوده. غنى: مسحت دموعي. أي، بس انطيني الكبوس، خلي ألبسه ونطلع. لبسته، وطلعنه. وصلنه للقاعة، دخلت، وبدت الهلاهل. كعدت، وبدت الحفلة. مروة: أباوعلها، البدلة شنو والمكياج شنو؟ طالعة تلمع. عساچ بحركة كلبي يا غنى، وعساچ لا تهنيتي ولا شفتي الراحة. عبير: الله، غنى، بدلتج تجنن. غنى: باوعت لروحي، صدوك. عبير: والله تخبل.

غنى: حبيبتي، هذا من ذوقج. ابتدت الحفلة، وأني نسيت نفسي شويه. ويه أجواء الحفلة والبنات زميلاتي، ما قصرن، للحظة حسيت نفسي صديقتهن، كد ما شفتهن فرحانات. كمت بدلت، لبست البدلات، ومشيت الحنة، لحد ما كالو اجت الزفة. وشويه ودخل فهد. أباوعله، طالع يجنن. ما كدرت أشيل عيوني عليه. جان لابس قاط أسود، وحتى القميص أسود، بس طالع يجنن. أجه وكف يمي، باس راسي بكل رسمية، وابتعد. لبسوني الكبوس، وطلعت ويه البنات وره القاعة. أخذوني للبيت، شويه واجت الزفة، واجه فهد، أخذني ورحنه للفندق. وصلت ويه النسوان، صعدت ويه خالتي للغرفة، وكعدت تحجي خالتي، واشتغلت الإحراجات. لمن سمعنه الهوسات، عرفنه راح يزفوه.

منذر: فهودي، يا جكليته وحامض حلو بباكيته. عمر: فهودي، رش الدربونة، جت البنية الخاتونة. علي: وبت الشيخ لابن الشيخ جبناها، وبعد ما حافظ التكملة، هههه. مهيمن: اوكفو لحظة، حافظ كوله: هااا، عريسنه هااا. وكتله وطلع دمه، وكتله وطلع دمه، حبيب. فهد: بعصبية، الله يطيح حظك يا سافل. الولد: هههه. أيمن: هاي الكولة تحجي حال فهد. رحت فدوه للغالي، كعد بحضني بعد ما جان خالي. فهد: والله صوجي أني عزمتكم. كوا.... يله توكلو. ولو.

عمر: منتظرين النتيجة. فهد: جريت سلاحي، ترحون لو شلون؟ أيمن: رايحين والعباس رايحين. يله شباب، الأخ شكله مستعجل. جاسميه منتظرته. فهد: راحوا الولد، وأني فتحت الغرفة، ودخلت. شفتها كاعدة على الجرباية ومدنكة. أباوعلها تفرك باديها وترجف. تقربت، وكفت كبالها. مديت أيدي، شلت البرقع. ************ يتبع