رواية ذنوب على قيد الغفران الفصل الثاني والأربعون 42 - بقلم براء

انتي غنى صالح. غنى: أي نعم عمو، تفضل. : ما عرفتيني؟ غنى: لا، صغراً بيك عمو، بس ما أعرفك منو أنت. : أنا عمك سامح، أخو أبوك صالح. غنى: ما بدرت أي ردة فعل. باوعت له، ردت أعوفه وأمشي، بس وقف بعيني موقفهم وياي بيوم عملية مروان. تفضل، شتريد؟ سامح: أريد أحجي وياج. غنى: بهدوء، بعد وكت، هستوكم تذكرتو عندكم ولد أخو وجايين تسألون عليهم. تعذرني، ماكو حجي بيناتنا.

سامح: لحظة بويه، ترى عمامك ميدرون بيه جاي لهنا. أنا جيت من ذاتي أريد أحجي وياج. اكو هواي أمور لازم نحجي بيها. فإذا مو لخاطري، لخاطر أبوك، خلّينا نكعد بمكان ونحجي. غنى: تكدر تحجي واحنا واقفين. سامح: الحجي مو مال واحنا واقفين. خلّينا نكعد احتراماً لأبوك، وأنا أخو. انطيني مجال، بس أبري ذمتي وأوضحلك جم شغلة. من نعرف ربك شوكت ياخذ أمانته، على الأقل أكون مبري ذمتي أمام الله. غنى: ماشي، تفضل اكعد. بس خلّي آكل لصديقتي وأجي.

رحت حاكيت نرجس. نرجس: وشيريد منج؟ غنى: علمي علمك. نرجس: دروحي شوفي شيريد منج. غنى: رحت لكيته كاعد. كعدت. احجي، أسمعك. سامح: بالبداية، عرفيني عليج، شلونج؟ شخبارج؟ وين صرتي؟ طمنيني عنج. غنى: ابتسمت باستهزاء. تدري لو أنا بمكانك أستحي أسأل هالسؤال؟ جايني ورا واحد وعشرين سنة تسألني شلونج وشخبارج؟

والله يا عمي، أنا بألف خير. عشت عد الغريب وانتو موجودين، واشتغلت خياطة وعمري ما يتجاوز ١٧ سنة، بس حتى أكدر أعيش أخويه. وأنا عندي عمام وأهل ياكلون الطفة من كثرهم. لا واحد فكّر يسأل عني، يكول ولد أخويه شلونهم، وينهم، شلون عايشين؟ بت أخويه منين جاي تجيب فلوس؟ ياترى شغلها شريف لو لا؟ ياترى وين صارت؟ شجاي تسوي؟ متسوي؟ كل هذا انتو ما فكّرتو بيه.

سامح: دنّكت راسي. حقج بويه، حقج. لو شما تحجين وشما تكولين، حقج. وابن أمه اليكولج غلطانة، بس يا عمي لتظلميني. أنا جنت صغير بذاك الوقت، شباب وطايش، وجنت كوة متحمل مسؤولية نفسي، مو عاد أتحمل غيري. هي مرتي وجهالي ما جنت بحالهم، وعايش بس لروحي. وغراني الشيطان وطمعني بالحلال وحصة أبوك المرحوم كامت تتوزع علينة، وهذا الشي طمعني أكثر. بس من كمت، كلما أكبر أحس بغلطي وبالكارثة الي سويتها. وصدّكي يا عمي، أنا أبد مو مثل عمامج. حتى بذيج الفترة ما جان عندي السلطة حتى أوكف بوجه واحد منهم.

غنى: كلامك هذا ماله داعي. احنا ما كنا بحال فلوسك. ردنا الي يسأل علينه، ردنا نروح نعيد يم بيت جدنا حالنا حال الجهال، ردنا نبات عد بيت عمامنا ونتونس ويه أهلنا مثلنا مثل غيرنا. انتوا وأمكم حرمتونا من كل شي، وخلّيتونا كدام الناس مكطوعين من شجرة، وإحنا عدنا كومة أهل. فأي ندم جاي تحجي بي هسه؟

سامح: شوفي يابويه، احنا أذيناكم صحيح، بس الله يشهد أمي متدري بكل هذا. من جان عمرج ست سنوات ولليوم هي تبجي على حسج وحس مروان. وحتى متدري بمروان مات. غنى: باستغراب. شلون يعني متدري؟

سامح: إذا تذكرين من جنتي صغيرة، اجت أمي تريد تاخذكم، وبيبيتج ما قبلت وطردتها من البيت، وكالت لها عود انطتنه بيت أبوكم حتى نتنازل عنكم. وأمي ما صدكتها، بس هذا الي صار فعلاً. أم كامل انطتنه البيت واحنا تنازلنا عنكم. وعمامج فهموا أمي إنو الحجية تتبلى عليهم وهمه كلشي ما ماخذين. فبيبتج حلفت متطب لبيت جدج بعد. المهم ما أطول عليج. كامت أمي دائماً تسأل عليكم وتدز فلوس بأيد واحد من عمامج، بس ما كانوا يودوهن الكم، وياخذوهن الهم. وظل هالشي مستمر لحد البارحة. هو نفسه.

غنى: شنو الحقارة والدنائه الي انتوا واصلين لها؟ شنو هالقدرة على الكذب؟ معقولة الفلوس مهمة لدرجة إنو تكذبون على أمكم طول هالسنين؟ شنو من بشر أنتوا؟ سويتكم هاي حتى إبليس ما فكّر بيها. سامح: سكت. لارد. غنى: زين هي ما فكّرت فد يوم تجينا تشوفه؟ ما حبت تلتقي بينه؟

سامح: بلي. مرة كسرت حلفانها وكالت " اخذوني أشوفهم". ومن بدلت وكملت واجينه نطلع، كالت لها عمج غنى تكول إذا توصلين أطردج من الباب. ومن ذاك اليوم هي تعبانه وحال الضيم حالها على حسابكم. غنى: بدموع. الله لا ينطيكم. عساكم بكل دمعة نزلت من عيني. وعساكم بأعز ما عندكم على الي سويتوه بيه وببيبي. حرمتوني منه وحرمتوني منها.

سامح: ووداعة جهالي، أنا ما كنت قابل. ودومي أتعارك وياهم. وحتى هالسالفة ما دريت بيها غير قبل فترة قصيرة. الله يشهد عليه، أنا مالي أي سلطة. كلشي بأيد عمتج وعمامج. وأنا وعمتج زمرد كلشي ما إلنا. وعمتج زمرد حالها حال أمي. كلشي متدري. غنى: زين البيت شلون أخذتوه؟ وهو لأبويه يعني قانوناً مستحيل تكدرون تتصرفون بي واحنا موجودين.

سامح: البيت موجود. ما كدرنا نبيعه لأن باسم أبوك، ولازم يروح الكم. فعمامج أجروا لناس وبقوا بي فتره طويلة. تالي طلعوا المؤجرين وبقى البيت فارغ. غنى: وبيبي زكية ما حجّت؟ سامح: أي، انجبرت تسكت خوفاً لا ناخذكم منها.

غنى: هزيت راسي. شكد جنت أكرهكم، بس هسه اكتشفت إنو أنت متستاهلون حتى واحد يكنلكم مشاعر، سواء كرهه أو حب. لأن ما بقيتوا شي زين ينذكر الكم. لا والله، خلّي أكون صريحة. ما سويتوا شي يذكر غير دفعكم لتكاليف عملية مروان. رغم دفعتوها متأخر، ومروان مات. بس الحق ينقال. سامح: باستنكار. احنا كلشي ما دفعنا. عن أي تكاليف تحجين؟ غنى: تكاليف عملية مروان أخويه. مو أنتو الي دفعتوها؟

سامح: لا عمي، ما انطينا ولا ربع دينار. وتره ورا ما توفى أخوج يالة حجة عمج كفاح وعمتج لعبت بي جولة. غنى: صفنت. لعد إذا مو انتوا، منو دفع التكاليف؟ سامح: والله يا عمي ما أدري. علمي علمك. غنى: هزيت راسي وكمت. أعتقد خلص الكلام بيناتنا. عندك شي بعد؟ سامح: لا بنتي، بس ردت أبري ذمتي وأكولج إني حاضر. حتى لو تجين وياي هسه، وأني مستعد أتحمل مسؤوليتج، وكل فلس أحمر أخذته وهو من حقج، أرجعه الج وبالضعف هم.

غنى: لحظة. أنت شلون تريدني أجى وياك؟ وأنتوا حالفين لو لكيتوني تذبحوني. أصلاً أنت شلون دخلت للكلية؟ سامح: خابر خالج كامل قبل فترة، وكال لعمامج طلعوا غلطانين، ورجل خالتج متبلي عليج. غنى: رفعت حاجبي. شعجب حكوا الصدك؟ من شوكت؟ أصلاً همه يعرفون الله لا ويخافون منه؟ أصلاً أنا متأكدة انتوا ما دريتوا بال ولا اهتميتوا من دريتوا بجذبة خالتي ورجلها. لأن من البداية اجتكم هالسالفة على الحاضر حتى تخلصون مني بعد.

سامح: قلتلج عمامج كلشي ما يعرفون عنج. حتى ما سألوا ولا استفسروا عن الموضوع. وأنا خابرت خالج خالد وطلبت منه يكلي بيا كلية تداومين. وربج طلعت مرته تدري، وانطاني اسم الجامعة. ولحسن حظي، بتي طلعت تداوم بنفس الجامعة، وكدرت آجي وأسأل عليج بقسمج، ولكيتج الحمد لله. غنى: ببرود. هذا كله الحجي مو مهم عندي. أريد أشوف بيبيتي.

سامح: حالياً ما أقدر. احنا لسة ما كليلها شي. وإذا أجيت حجيتلها كلشي دفعة وحده يجوز يصير بيها شي. فشنو رأيج تعوفين خالتج وتجين تبقين عد بتي؟ بتي أرملة وكاعدة هي وجهالها ببيت وحدها. روحي كعدي وياها لبين ما أمهد لأمي الموضوع وأخليج تشوفينها. غنى: ابتسمت. للمعلومة، ترى أنا متزوجة هسه، وهاي الحلقة بأيدي. يعني ما أحتاجكم بعد. والي أريده منك هسه بس تخليني أشوف بيبيتي.

سامح: من هالعين قبل هالعين. صدكيني مستعد كل شي أسوي بس حتى أكفّر عن ذنبي. وبالمبارك زواجج. رجلج زين وياج؟ لا شيشتغل؟ غنى: ببرود. ضابط وزين وياي. أحسن منكم. عن إذنك، تأخرت. درت وجهي أروح، وكفني صوته. سامح: هاج، هذا رقمي. شوكت ما احتاجيتي شي، ليردج إلا لسانج. وأنا موجود. اعتبريني أبوج، ولا تترددين لحظة وحدة. غنى: ما أعرف شنو الي خلاني آخذه. مديت إيدي، أخذته ورحت أشوف محاضراتي. أكيد هسه فاتتني محاضرة من ورا...

خلص الدوام وطلعنا أنا ونرجس. نرجس: حماج الصاك. أجه الدكتور علي. أكولج بس شكله مو راحة، رغم صاك. غنى: والله انتي بطرانه. وبعدين شبي مو راحة؟ بالعكس، كولش حباب. نرجس: طبعاً تدافعين له، غير أخو أبو العيشة. وعلى طاري أبو العيشة، متكسبين بيه ثواب وتخطبيني لرجلج ونصير أنا وياج ضراير ونعيش على حبه الله ونتساعد على شغل البيت هم. شتكولين؟ غنى: باوعتلها. دنجبي، انجبي. يله امشي، روحي لأهلج. الأستاذ منتظرج.

نرجس: هههه، تغارين عليه؟ يله عيني، بطلت. باي. غنى: باي. أباوع لعلي واكف منتظرني. خطية، هسه أبتلى بيه. فتحت الباب. السلام عليكم. علي: وعليكم السلام. شلونج؟ غنى: صعدت. الحمد لله. آسفة تأخرت، بس كنت أحجي ويه نرجس. علي: عادي، عليمن تتأسفين. وبعدين لتتكلفين بالكلام. إحنا صرنا إخوان، لو متقبلين نصير إخوانج؟ غنى: ابتسمت. بالعكس، اتشرف. علي: حركت أكول. غنى، راح أسألج سؤال، بس لتفهميني غلط. غنى: تفضل، اسأل.

علي: احم. هاي نرجس صديقتج، يعني عدها، أقصد مرتبطة؟ اكو ببالها أحد؟ غنى: لا أبد. رغم هي سبورتية وكولش مرحة، والكل يحبها، بس ما عدها أي علاقة ويه أي أحد. وحتى تكدرين تسألين أروى، وحتكلك نفس كلامي. علي: لا لا، يمعودة، كلشي ولا أروى. مالي خلكها، تروح تسويلي سالفة. غنى: زين، أكدر أعرف ليش تسأل؟ علي: ها، هيج مجرد استفسار لا أكثر. غنى: ابتسمت ودرت وجهي. فهمت السالفة. وصلنا للبيت. نزلت. دكيت الباب. فتحها أحمد وزينة.

بوستهن. شلونكم؟ زينة: شتجيبيلنه وياج؟ غنى: ذبيت ملازمي ونزلت لمستواها. سودة عليه حبيبتي، ما أدري بيج تردين أجيبيلج شي، بس وعد باجر أجيبيلكم كول شي تردوه. أحمد: شكراً باجي. غنى: ابتسمت. عفواً حبيبي. كمت دخلت. أخذت ملازمي ودخلت جوه. علي صعد فوك. خطية، الله يساعده. أنا رحت أسلم وأصعد. شفتهن بالمطبخ. طبعاً خالة إيمان وأروى ما موجودات. معزومات عد صديقة خالة إيمان. كالتلي أروح وياها، بس مارحت، لا أنا ولا وردة.

السلام عليكم. الكل: وعليكم السلام. أنغام: هاي شبي وجهج؟ غنى: اسكتي، حارة الدنيا تكتل بره. هاي عود بعدنا ما دخلنا لتموز، وهيج الجو. لعد منا لتموز نموع من الحر. أنغام: أي والله، دبكنا من الحر. وحتى الكهرباء مابيها حظ، كل ساعة فاصلة. دروحي غسلي بماي بارد. وجهج صاير نار. وخلي واقعي، بردي وجهي بي. غنى: أي، هسه. آلاء: تعاي حبيبتي، وين رايحة؟ والغدة منو يصبه؟ أمي مو كافي من الصبح طالعة، وهسه جيتي على الحاضر تردين غدة؟

غنى: ترى جنت بالدوام، مو طالعة أتنّس. من رخصتجن، أبّدل وأجي. طلعت من المطبخ، صارت أم فيصل بوجهي. سعاد: ها، اجيتي يالمسعدة؟ غنى: تفضلي أم فيصل، محتاجة شي؟ سعاد: ما أريد شي. انكلعي لغرفتج، ولا تتأخرين. كتلنا الجوع.

غنى: صعدت فوك. والله يا الله. الساعة مصارت حتى بالثنتين، وهي كاتلها الجوع. يربي، لا من الأهل ولا من العيال. دخلت لغرفتي، ذبيت ملابسي بسرعة، ودخلت للحمام. همزين المي بارد. سبحت وطلعت بسرعة، بدلت ووكفت أصلي. حتى قرآن ما قريت، مالي خلك لسانهن. لبست صايتي فوك الدشداشة القصيرة، ولفيت شعري. سمعت الباب يندك. رحت فتحتها. شفت سارة. سارة: ها، الله يساعدج. غنى: تسلمين، ويساعدج. محتاجة شي؟

سارة: أي حبابة. كحلتج خلصت، والبارحة شفت الكحلة الخالتها بعيونج تخبل. عادي تنطيني القلم مالتج تستخدمه؟ غنى: تذكرت كلام أروى "سارة متنعطى وجه". تنهدت. ماشي. رحت طلعته. تفضلي. سارة: شكراً. يله أعوفج. غنى: نزلت جوه. لكيتها كاعدات بالصالة. رحت بوست وردة. شوكت جيتي؟ وردة: بتعب. قبل شويه. غنى: شبيج؟ وردة: تعبت والله. انهد حيلي. غنى: يله هانت. مابقاله شي شهر شهرين، بالهواي وتمتحنين. سمعت امتحاناتكم برمضان مو؟

وردة: على الأكثر، أي. بتول: كتلنا الجوع. يمعودة، عوفي الحنية وروحي صبي. وردة: انتي لتتدخلين، وخليج بروحج. بتول: هاي عليّه؟ وردة. وردة: لا، على الحايط. شو دسكتي، مالنا خلكج تره. أنغام: عينجن على سالم. كومي حبيبتي، خلّي نصب. غنى: رحنا صبّينا واجينه نكعد. فيصل: وين دولكة الماي؟ غنى: أباوع، وحدة كامت تباوع للثانية. استغفر الله. يعني ماكو هيج... اجت وردة تكوم. كعدتها. كمت جبت الدولكة من الثلاجة واجيت خليتها بالسفرة.

تغدينا. ما أكلت. مدري شلونه الأكل. كملنا غدة. كمنا أنا ووردة وأنغام لمّينا السفرة. والرباعي المرح كاعد على صفحة، وخامستهن راحت اليوم ويه رجلها ورجعت لبيتها (ليلى) سعاد: غننننى، غسلي المواعين وصبيلي جاييي. علي: لا عاد لهنا وكافي. مصختوها؟ شنو حضرت جنابجن خالات رجل على رجل؟ والبنيه هي صبت الغدة، وكل شوية مكومينها. حتى ما خليتوها تتغدى من الآوادم. وهسه تردون إلها تغسل المواعين وتصب لكم سم؟ ما طلعت هاي؟

أدري بت العالم تشتغل عدكم، لو لأن حبابة وساكتة تستغلونها؟ يعني لو فهد هنا، متفتحون حلكجن وياها. سعاد: شبيك؟ انفتكت علينه. هسه هي قابل شسوت؟ على المواعين والجاي، قابل شيرادله؟ شنو انكلبت الدنيا؟ علي: بعصبية. إذا ما انكلبت الدنيا، ما غسلتي المواعين انتي، وما كومتي جنتج، لو بت اختج تصب، لو مكسحات. منذر: طلعت من الاستقبال. شبيكم؟ ليش صوتكم عالي؟ فيصل: ماكو شي. أخوج جاي يلقي محاضرة بالمساعدة. تعال اسمع.

علي: ما راح أجاوبك، لأن لو بيك خير جان حجيت حق الله. ولو الياكل حق العالم، شمعرفة بحق الله. فيصل: كمت. شنو قصدك ولك؟ علي: قصدي الي فهمته. يا أمين، يا كد الاعتماد. باوعتلهم. أنا ما أحب أتدخل بسوالف النسوان، بس مادام أشوفجن تستغلن البنية، وهي حرام، إذا ينسمع صوتها تشتغل وهي ساكتة. ومن أول ما طبتلنه عرفت راح تستغلونها. بس إذا ناسيات، أذكرجن. هي مرة منو؟ وهالبيت لمنو؟ والي يفكر يندك بيها، شيسويله رجلها.

الله ينطي مرت منذر. لو ماهي جان البنية وكعت من الكد والتعب. بس صدك، بنات الأصول يبقن بنات أصول، سواء عد أهلهن لو عد العيال. والوصخات والقذرات هنّه هنّه، ميتغيرن. عفتهم ورحت. بتول: خرب يومه. شبي انفتك علينه. فيصل: ابتسمت. الواضح مرت فهد عزيزة عليه. ولو هي كل حاجة لفهد تصير محط إعجاب كل الزلم. سعاد: باوعت له. شنو قصدك ولك؟ فيصل: هيج. ما قصدي شي.

غنى: خلصت غسل مواعين وصبيت جاي. انطيته لأنغام، هي توديه. وهنه كاعدات. ما وحدة كلفت نفسها حتى تجامل وتكول خلي أساعدجن. حتى وردة ما خليتها تشتغل. خطية، فوك تعب الدوام، أجي أنا عليها. كملت كول شي وطلعت من المطبخ حتى أروح أنام. الساعة راح تصير بالاربعه، وأنا راح أوكع على وجهي. سعاد: مرت فهد، وين رايحة؟ غنى: أنام. سعاد: والجاي؟ غنى: هسه تجيبه أنغام.

عفتهم وصعدت لغرفتي. فتحت الباب ودخلت. نزعت ملابسي وبقيت بالدشداشة. تمددت وأحس جسمي متكسر. لأن من الصبح كضيتها أفتر، شي للمحاضرة، شي ورا نرجس، ورجعت ما ارتاحيت. مباشرةً استلمني ذني الحبابات. يبوو. نسيت موبايلي بالجنطة. ما طلعته. رحت طلعته. لكيت رسالة من فهد، ومكالمة فائتة، ورسالة هم من خالتي. شفت رسالة فهد من زمان. شيخلصني منه هسه؟

"أنا وصلت". "علي يجي عليج، لتروحين منا منا". "مكياج ممنوع، ومالج علاقة بمرتضى". أوامر بس أوامر. حتى أسلوب بالكلام ماكو. رحت شفت رسالة خالتي، تريدني أروح لها العصر. سودة عليه، صايرة ما تجي بس تخابرني تسألني عن أخباري. متقبل تجي، لأن الجماعة مضايقينها بالصبح، وحالفة متجي وهنه موجودات. طفيت الموبايل ونمت.

فهد: فتحت موبايلي. لكيتها شافت الرسالة، بس ما جاوبت. أكيد بعدها آخذة موقف مني، خاصة إنو بعدين عفتها ورحت للملهى. تنهدت. أووف. من البداية ما جان لازم أعقد عليها. أدري بروحي ما أناسب إنسانة مثلها. لو مسوي مثل ما كالت أمي، ومخليها تتحمل المسؤولية بدالي، وأضل أنا من بعيد أساعدها، بس أنا مطي. رحت عقدت عليها ودمرتها ودمرت نفسي. صفنت. بس لو أروح لغير زوايا، ياترى لو ما متزوج غنى، الي راح آخذه راح تصير مثل غنى لو لا؟

وهل أنا راح أقبل بوحدة ماعدها أخلاق وشخصية غنى؟ وفرضاً لو متزوج هسه غير غنى، هم راح تطلع شريفة وملتزمة مثلها؟ والأهم من هذا كله، بهالوكت اكو بنات مثل غنى؟

أسئلة هواي تدور ببالي وما الها جواب. ولو نجي للواقع، غنى إنسانة شبه كاملة. حلوة ومثقفة وعاقلة. وفوق هذا شريفة وبريئة إلى درجة متنوصف. بس أنا ما أعرف شبيه. اكو خوف فضيع بداخلي تجاهها. أحسها متناسبني، وأخاف بلحظة شهوة أتقرب لها، وتالي أظلمها وياي. غمضت عيوني. راسي راح ينفجر. عمري كله ما فكّرت بأحد. أقصى حد ممكن أوصل بي للتفكير بشخص، ثلث دقايق مو أكثر. إلا هي. أكعد ساعات أفسر وأحلل بها وبحياتي وياها، وتالي ما أوصل لنتيجة.

أيمن: ها، أبو الفود. شبيك؟ فهد: دايخ شوية. عمر: دايخ لو ضايج لأن عفت المرة؟ مهيمن: تلكيها مدللتة خوش دلال وصايلج لأن بعده ماشبع منها. فهد: رجاءً لتطرقون لهالمواضيع. خلّي النسوان بعيدة عن الشقة. مهيمن: هههه. بس لا متقبل؟ فهد: ورثت جكارتي. مو ما أقبل، بس خلّي نسوانه بعيدة عن شقانا. وانتوا تعرفون إحنا شلون نتشاقة؟ كله فشار وغلط. أيمن: والله كلامك صح. خلّينا نفشر، بس على الأمهات أحسن.

عمر: هههه. لعد شكد عارات انتوا على أمهاتكم. أي، على نسوانكم لا. فهد: أنجب. أنا حتى على أمي ما أقبل. مهيمن: أشوو ذاك اليوم نزلت أمّهاتنه وغسلتهن خوش غسلة بسوالفك. فهد: أخذت نفس من الجكارة. مو أمي شريفة، ومهاتكم هشّك بششك. وانتوا تعرفون. الولد: هههه. طاح حظك. أيمن: صدك شباب، على طاري النسوان، أحب أبشركم إني خطبت. عمر: عليك العباس؟ أيمن: والعباس خطبت. شبيكم؟ مهيمن: خطبت منو ولك؟

أيمن: خطبت بت صديق أمي. صيدلانية وحلوة تخبل. حتى انصدمت من شفتها. صدك، بعد ما تبت. الله فتحها بوجهي. عمر: لحظة لحظة. صيدلانية وقبلت بيك أنت؟ أيمن: ليش شبيه قابل؟ وصخ ومتقبل بيه؟ وبعدين البنية وافقت بعد ماشافتني. فهد: أي، مبروك منك المال ومنها العيال. أيمن: رحم الله والديك. هو هذا الحجي، مو مثل ذوله البغول. فهد: دك موبايلي. شفتها غنى. كمت طلعت. الو. غنى: الوو فهد. حروح لخالتي. وكلت خلّي أكلك. فهد: خالتج سحر؟

غنى: أي. لعد جم خالة عندي أنا؟ فهد: بس هي حايط على حايط ويانه. عليمن تكليلي؟ غنى: بهدوء. ميخالف. ميصير أطلع وما أكلك. مو هذا المفروض؟ فهد: ها. أي، أي. هو المفروض هيج. عاشت إيدج. همزين كلتيلي. أخذي راحتج، بس لتتأخرين. غنى: ماشي. يله باي. فهد: لحظة. غنى: نعم. فهد: بارتباك. ااا شلونج؟ ما سألت عليج. غنى: الحمد لله. فهد: خوما محتاجة شي؟ غنى: لا، شكراً. يلله صار لازم أروح. مع السلامة. سديته منه ونزلت.

فهد: اكو شي بداخلي فرح من خابرتني واستأذنت مني، رغم هي ماخذة موقف مني، بس مع هذا ماتصرفت بكيفها. عندي إحساس إنو غنى الإنسانة الوحيدة الي لو أعوفها، بدل اليوم سنة، تبقى نفس ماهي. للحظة حمدت ربي من الله خلاها مرتي. زين، والحجي الحجيته قبل دقايق، وين راح؟ شهالتناقص هذا يا فهد؟ غنى: حضنت خالتي. شلونج؟ سحر: بعد قلبي. مشتاقتلج هواي، وما كدرت آجي وأشوفج، من ورا المسمومة مرت أبو رجلج. غنى: ليش؟ شسوتلج؟

سحر: تعاي خلّي نطب نحجي جوه. غنى: طبيت وياها. شفت عمو سيف كاعد. ابتسمت. شلونك عمو؟ سيف: هله بويه. شلونج؟ والله مكانج خالي بالبيت. لابد جنه نكعد أنا وياج بالحديقة نحجي، نشرب جاي، نتابع أخبار. له خالتج من يوم تزوجتي وهي عايفنتي. سحر: ياا، أنا. غنى: هههه، يشاقه وياج خاله. سحر: كعدي. غنى: كعدت. خير؟ شعجب دازة عليه؟ أباوع لها. باوعت لعمو، وباوعتلي. حسيت اكو شي. احجي خاله.

سحر: شوفي بنتي، أنا وعمج راح نشيل منا. واشترينا بيت يم أهل عمج، وراح نكعد هناك. غنى: ليش؟ شنو السبب حتى تردون تشيلون؟ اكو أحد ضايقكم؟ سيف: لا بويه. كل الجوارين ورود وناس تنحط بنص القلب. بس هذا بيتج أنتِ، وإحنا ما إلنا بي، وزحمة نبقى كاعدين بي، وإنتي تزوجتي. غنى: ليش عمو؟ هو اكو فرق بيني وبينكم؟ انتوا أهلي. والبيت هذا يروح فدوة لرجليكم. صدك تحجون؟ تردون تعوفوني وتروحون على حساب البيت؟

خلص، أنا أحوله باسمك عمو، بس لا ترحون. سحر: شنو تحولي باسم عمج؟ كعدي وسكتي. هذا حقج وبيتج أنتِ. غنى: أنا ميهمني البيت. الي يهمني انتوا. سيف: لا بويه، مال أكلج أي، وأصفك لج. لا أنا عندي وألف الحمد لله الله رازقني. وأكدر أشتري بيت. وما أكدر أبقى كاعد ببيت مو إلي، ومستحيل أقبل بالنقاش هذا. بيتج ويبقى الج. وحتى ما أقبل تبيعيه. عوفي، متعرفين الزمن شضاملج. غنى: زين، ابقوا بي. أنا ما أريدكم ترحون.

سحر: حبيبتي، ترى ما راح نطلع خارج بغداد. راح نشيل لمنطقة... وهالمنطقة مو بعيدة. بالسيارة ربع ساعة. انتي يمنا، وأكيد راح تجين تشوفينه، وبالوقت الي يعجبج. بس مال نبقى هنا، لا عمج يقبل ولا أنا أقبلها. غنى: تنهدت. خلص، براحتكم. أهم شي موجودين يمي وأشوفكم. ولو ضايجة لأن حتروحون، بس قابل أكدر أجبركم.

سحر: لا حبيبتي، ماكو داعي تضوجين. وكتلج شوكت ما تحبين تجين، البيت بيتج. وأنا أمج، وسيف أبوج. ماكو حاجة أكلج، هذا شي أنتِ تعرفيه. غنى: هزيت راسي. ضليت كاعدة فترة، وكمت رجعت للبيت. تلكتني سعاد. الي ما أدري ليش حاقدة عليه، وش مسويتلها حتى هيج تكرهني، ما أدري. لكيت خالة إيمان والبنات كاعدات. سلمت. سعاد: وين جنتي؟ غنى: يم خالتي. سعاد: شو بكيفج تطلعين وتطبين أنتِ؟

غنى: ترى خابرت رجلي وأخذت إذن منه قبل لا أطلع. والعفو منج، بهالبيت محد له حق يحاسبني غير أم زوجي وزوجي وبس. أباوع لخالة إيمان، ابتسمت. ما ردت أتجاوز بالكلام، بس هي طلعتها من ماعونها، وهواي تدوس ببطني، وعبالها أنا بوز مهانة. وبكل مرة أسكت لها. سعاد: شفتي جنتج؟ شطول لسانها. إيمان: ما كالت إلا الصدك. رجلها ويدري. أنتِ شعليج؟ سعاد: هااا، هيجي صار الحجي؟ إيمان: أي.

أروى: مكانج خالي. فد تونسنا. وخالتي سألت عليج، ليش ما جيتي؟ غنى: مو تدرين عندي دوام. آلاء: صدك، أنتِ ليش لسة ما كعدتي بالبيت؟ مو هالسنة تتخرجين؟ غنى: هاي آخر سنة. مابقاله شي ونخلص إن شاء الله. سارة: صدك غنى، شعجب رحتي لغات مو تربيةنكليزي؟ وهي نفس الدراسة.

غنى: لا. شلون. الي يتخرج من قسم تربية نكليزي تعيينه يختلف، ودراسته هم تختلف. أهل التربية يدرسون أساسيات التدريس، إضافة إنو يدرسون مواد عربية يصيحولها ثانوية ويه موادهم الأساسية. والي يتخرج من كلية التربية يشتغل مدرس. أما إحنا لا. دراسته تتعمق بكل اللغة من ناحية الكلام، الكتابة، اللفظ، حتى مخارج الحروف نركز عليها. إضافة إنو أنا اختاريت هالمجال لأن بي هواي فرص. أكدر أشتغل مترجمة، وأكدر أصير مدرسة، وأكدر أشتغل باحثة هم. بس هاي يرادلها دراسة هواي. وللأسف، بالوقت الحالي ماكو ذيج الشركات بالعراق. فنتجه للتدريس أكثر. بس بالمختصر، كلية اللغات بيها فرص تعيين أكثر من التربية.

بتول: نفس الشي، ونفس الخرط. ماكو أي اختلاف بكلامج. هو مدرس نكليزي وخلصت السالفة. غنى: أنتِ خريجة شنو؟ بتول: ها. غنى: أنتِ خريجة أي كلية؟ بتول: تربية تاريخ. غنى: بهدوء. خلص، لعد إذا ما الج بالنكليزي، لتحجين بي. وردة: لزميها أروى، لزميها. أروى: شنو هي؟ وردة: جبهة بتول قبل لتطير. أروى: هههههه. طاح حظج.

فهد: صار ثلث تيام بالدوام. والحمد لله ماكو شي. بحيث حتى نفسيتنا ارتاحت. كاعد أشوف جدول الحضور وأتأكد من الأسماء. طب واحد من الولد. أباوع له، عيونه حمر. : سيدي، أريدك بموضوع. فهد: تعال، تفضل استريح. اسمعك. : سيدي، الله يخليك، حاجي المسؤول. أريد أنزل هسه. فهد: خير؟ خو ماكو شي؟

: الله يحفظ لك الوالدة. أمي توفت البارحة، وهسه خابروني. وأريد أنزل. رحت حاكيت صباح، ميقبل. وأنا لازم أروح. مال أنتظر منا لست تيام، ما أسويها. بدموع أبوس إيدك سيدي، حاجي. فهد: لا إله إلا الله. الله يرحمها. خلص، عوف الشغلة عليه. أنا أحاجي. : ممنون سيدي. فهد: كمت رحت لصباح. أنا منا أحبه، بس الولد نخاني وما أكدر أرده. دكيت الباب ودخلت. سلام. صباح: وعليكم. ها؟ شعجب منورني وجاي؟ شنو تريد تنزل عريسنه؟

فهد: ببرود. مو أنا أريد أنزل. اكو واحد من الولد أمه توفت، ولازم ينزل، وأنت ما قابل تنزله. أكدر أعرف ليش؟ صباح: بعد ست أيام تنزلون. خلّي يصبر. فهد: عود صدك تحجي؟ الولد أمه توفت؟ يا مسلمممم! الله ااااامه ماتتتت! شلون تريده ينتظر؟ قابل الميتة جدتج لو أمك؟ أنت ما عندك إحساس يا أخي؟ لو أمك الميتة البارحة، متعوف الشغل وتنزل؟

اسمع صباح، إذا ما تنزله، أقسم بشرفي أقدم بيك شكوى للمسؤولين. شلون ذيج المرة، وخليتهم يكصون من راتبك، وكت الي ما قبلت تدزلنه قوات دعم؟ تذكر شكد كطعوا من راتبك؟ لو أذكرك. أنصحك تخلي الولد ينزل، وإلا. وعافيتي بس أنزل، أروح أقدم عليك شكوى وأكول لهم الولد أمه ميتة وميقبل ينزله. وأعرف شلون أستغل عواطفهم، والله وأخليهم يعاقبوك. لا تبالغ إنو أنا هين. ترة كلشي يطلع مني. صباح: الله يطول بعمر أمي. خلص، لتخبصنه. هسه أخلي ينزل.

الله يساعد كلب مرتك، شلون قبلت بيك، ما أدري. فهد: باوعت له صفح. راح أروح. إذا مانزلته، أخابر غانم، وهو يتصرف وياك. صباح: عمي والعباس راح أنزله. بس روح. عبالهم هسه، شو بيك؟ نصي صوتك. فهد: طلعت. لكيت الولد بره. يله، روح جهز غراضك، وترجع لصباح، خلي يسجل اسمك، وانزل. الولد: رحم الله والديك سيدي. زحمتك. فهد: تدلل. ماسويت شي. غنى: مرن الأيام ركض ركض. واليوم خميس، وباجر يرجع فهد. واليوم البنات كلهن يمنه. شنو المناسبة؟

ما أدري. أنا كاعده بغرفتي، بس نزلت سلمت وصعدت. سمعت الباب يندك. عفية، باب ما يسكت أبد. خو سارة كل ساعة ناطتلي. كمت فتحتها. شفتهن كلهن بالباب. سارة: الدنيا حارة بالصالة. كتلهن خلّي نروح نكعد بغرفة مرت فهد، لأن ثلج وبارررده. غنى: ابتسمت بتصنع. هلوو. والله لو فهد يدري بيه مفوته كل هذني للغرفة، يشنقني. هي سارة، وما يدري بيها تفوت لهنا. وعود هو محذرني. تفضلن. أهلاً وسهلاً. مروة: ريحة الغرفة مو طيبة. شنو هالعطر الي راشته؟

شهد: دروحي. أنتِ تتحسسين من ريحة النظافة. ملك: هههه. ترة صدك. الغرفة ريحتها طيبة. أنتِ متوهمة. مروة: كعدت. ما أدري. ما عجبني. غنى: كعدن كل البنات. أباوع لأروى الي تطبطب على إيدي بمعنى سكتي، وأنا ساكتة. مروة: فهد، شوكت يرجع؟ غنى: باجر. مروة: حرامات. لو أدري جان اجيت باجر حتى أشوف فهد. أكول بنات، لعد بتول ما اجت لهنا؟ ليش؟ سارة: صحتلها. تكول ما آجي يم هاي، بت الفكر. عود تقصد غنى.

غنى: باوعت لأروى. بودي أكوم أنفجر عليها وأراويها بت الفكر شلون تصير. ملك: على حسب علمي، ما يعرف ابن الفكر غير ابن الفكر نفسه. وبعدين ابن الفكر عايش بالفكر، مو عايش عالة على العالم، ومحد يسأل عليه ولا يكلبه. وكللمي هذا يوصلها ويتعداها. فخلّي تحترم نفسها وتعرف شلون تحجي على أسيادها. مروة: أسيادها؟ غنى أسيادها؟

ملك: من تسمت باسم فهد، وصار اسمها بظهر جنسيته، صارت وحدة منه، وبينه. ومادامها منه وبينه، يعني صارت أسيادها لبتول، لأن بتول غريبة عنه، ومالها أي علاقة بينه. حي الله بت اختك، مرت عمنه. وغنى مرت ابن عمنه وأخونه. أروى: يمه من لسانج يمه. ملك: شعبالج؟ الكدامج دكتورة. مو حي الله بنية. مروة: بعدج ما صرتي دكتورة. ستوج. هاي أول سنة. شهد: انتن ملاحظات؟ إحنا عائلة كل شي وكلاشي. غنى: شلون يعني؟

شهد: إذا تدورين بينه، تلكين الدكتور العام، ودكتور الأسنان، والمهندس، والمحامي، والمحلل، والمدرس، والمترجم، والضابط، والمعلم، وووو. فكل شي عدنا. فصار أسمنا مو بيت حجي علي، بيت كل شي وكلاشي. البنات: هههه. غنى: ضلن البنات شوية وراحن. وأنا كمت أنام حتى أكعد من وكت، لأن فهد كايل لخاله إيمان يوصل الفجر. الساعة الخامسه صباحا.

فهد: وصلت للبيت. صفيت السيارة ونزلت. فتحت الباب ودخلت. البيت هدوء. أكيد جمعة، وكلها رايحة بسابع نومه. فتحت الباب على أمي، لكيتها كاعدة كالعادة تقره قرآن وتنتظرني. صباح الخير. إيمان: صدقت. هله يمه، هله حبيبي. صباح الأنوار. كمت شبكته. بعد قلبي، شلونك؟ فهد: بهدوء. الحمد لله. أنتِ شلونج؟ إيمان: شلوني، وأنت مثقل وجهك عليه؟ وتالي فهد. هاي أنت تزوجت وخلصت السالفة.

فهد: كلتلج، نتيجة إجبارج وإصرارج على هالزواج راح تكون له نتائج مو مفرحة الج، وهاي أولها. إيمان: عساني بالموت يا فهد، وأخلص وأرتاح من هالدنيا. لا من البزر، ولا من الرجل، ولا من هالدنيا الغبرة هاي. روح لغرفتك، روح. فهد: من شفتها بجت، حسيت روحي واحد حقير. حضنتها. خلص يمه، آسف. يا روح فدوة لتراب رجلك فهد وعشيرته. صدك تحجين؟ تبجين من وراي؟ من تراب يطمني؟ لو أنزل دموعي؟ خلص ياروحي أنتِ، لتبجين. حقج عليه، وأنا الغلطان.

إيمان: غلطان وابن كلبه. فهد: ضحكت. حشاچ يمه. بست أديها وراسها. إيمان: الله يرضى عليك يمي. اتجه لحياتك وبيتك. الي صار صار، وانتهى. وأحنه ولد اليوم.

فهد: هزيت راسي وصعدت فوك. فتحت باب الغرفة ودخلت. أفييش، ما أرتاح غير بس بغرفتي. لو أنام بالجنة هم ما أحس هالاحساس. صارت عيني عليها. شفتها متغطية ونايمة. تقربت وكفت كبالها. حركت إيدي، متلمس برودة خدودها. نزعت ملابسي، طبيت سبحت، واجيت نمت بصفها. تقربت عليها كلش، بحيث لزكت بيها. رفعت إيدي محاوط خصرها. خليت راسي بركبتها. أخذت نفس بقوة، بستها هناك، ودفنت راسي بجسمها، ونمت. ما أعرف ليش سويت هيج، بس اكو صوت بداخلي راد هالشي.

صباحا. غنى: فتحت عيوني وأحس ركبتي تحكني، وأكو حرارة عليها. تحركت. أباوع اكو أيدين محاوطتني. عرفتهن أيدين فهد المزنجرات من كبرهن. جريت إيده أريد أوخرها، ما أكدر. شادها شد. هذا شبي؟ أول وتالي تطلع منه هالسوالف. سمعت صوته. فهد: بصوت مكتوم. مو منطمر؟ ليش تحوصين؟ غنى: بارتباك. أريد أكوم. فهد: حرك خشمه على ركبتها. بعد وكت. رجعي نامي. غنى: شبعت نوم. وخر. فهد: وخرت راسي عنها. دارت وجها عليه.

غنى: جريت إيده من خصري. ماكو مجلب. احم، فهد، إيدك. فهد: شابك إيديه على خصرها مقربها عليه. همست. شبيها؟ غنى: أباوع لعيونه. عوزي شوية والزك بوجهه. وخرها أريد أكوم. فهد: بالبداية ماكو. الحمد لله على السلامة. غنى: بهدوء. آسفة. الحمد لله على سلامتك. فهد: بست خدها بعمق. الله يسلمج. شلونج؟ غنى: انخفض تنفسها. الحمد لله. فهد: حركت خشمي على خدها. دومج. غنى: بخجل. شكراً. ممكن أكوم؟ فهد: ليش ما مرتاحة هيج؟

غنى: باوعت له. شبيك فهد؟ فهد: همست. علمي علمك. شنو رأيج تفحصيني وتشوفين؟ غنى: بفهاوة. ها؟ فهد: باوعت لعيونها. قربت شفايفي، بستها بصف شفايفها. أحجي. شبيج صافنة؟ غنى: بارتباك. فه، فهد، وخر. شنو هالتصرفات هاي؟ شبيك اليوم؟ فهد: ههههههه. عفتها. ترة حلفتيني بالغالي. يله كومي. غنى: كمت بسرعة. عدلت ملابسي بهدوء. أكدر أعرف شبيك اليوم؟

فهد: وكفت كدامها. صدكيني ما أعرف. غنى، أنا نفسي ما جاي ألكى تفسير لتصرفاتي المتناقضة هاي. للحظة جاي أحس عندي إنفصام. غنى: حكيت راسي. الساعة بالتسعة هسه. وبالعادة محد يكعد بهيج وقت، خاصة الجمعة. حاولت تغير الموضوع. جوعان؟ ننزل نتريك. فهد: ولو بعدني نعسان، بس بعد كعدت. لبسي صايتج وحجابج. خلّي ننزل. تلكيهم هسه كلهم نايمين. غنى: هزيت راسي. رحنا غسلنا ونزلنه. فهد: شدعاي عليج. كمتي تحوصين. ما خليتينا ننام مثل الأوادم.

غنى: همست. أنا؟ فهد: لا، أمي. غنى: دخلنا أنا وفهد للمطبخ، وتصنمنا بمكانه. عززة، هاي شنو؟