رواية ذنوب على قيد الغفران الفصل الثاني والثلاثون 32 - بقلم براء

غنى: متمدده بالغرفه أحس روحي أحسن من البارحه الحمدلله. كلام خالتي طمني هواي من سمعت بيها ما أيدتني وواثقه مني. بعز تفكيري صحاني صوت أشعار. أجاني فتحت الرساله بسرعه من شفت اسمه. فهد: "إذا تكدرين صعدي للسطح وفوراً." غنى: معقوله أجه؟

لا مو معقوله. قمت على كيفي لأن جسمي نحلان وما أكدر حتى أتحرك. طلعت من غرفتي متهلفه حتى أشوفه. أشتاقيتله صار عشر تيام مشايفتنه. رغم الدنيا ظهر وحاره بس ميخالف. فتحت باب السطح ودخلت. شفته واكف كبالي. فهد: عبرت على سطحهم ورحت بسرعه. حضنتها. غنى: حاوطت خصره ودموعي نزلت. الحمدلله على سلامتك، ظل كلبي يمك.

فهد: بست راسها. الله يسلمج. سمعت بيج تخربطتي وحق ربج دربي بعد ما شفته من كلتلي أمي أجوي الإسعاف وخذوج. ابتعد أباوع لعيونها الي يلمعن. مسحت على خدها. أحجيلي شبيج. غنى: ملت على إيده مغمضه. لتسألني فهد الله يخليك. فهد: تعاي هنا. هاي الشمس سلكت الخلفني. جريتها على جهه مكان بي في. كعدتها وكعدت. أحجيلي غنى ودير بالج تجذبين عليه. غنى: خليت راسي على متنه متنهده. أجو خوالي لهنا. فهد: هزيت راسي. كملي.

غنى: رجع أنفتح الموضوع نفسه وصارت مشادات كلاميه بينهم وبين خالتي وكبت العيطه. خوالي جانو ناوين ياخذوني يودوني لعمامي بس خالتي مقبلت. تالي سكتت باجيه. ما كدرت أكمل. فهد: رفعت وجها. أحجي تالي شصار. تره أعصابي تلفت. غنى: بدموع. رادو ياخذوني يسوولي فحص. فهد: فحص شنو؟ غنى: مجاوبته. والله أستحي حتى ألفظها. فهد: ضغطت على إيدها بعصبيه. جاي أكول فحص شنو؟ غنى: دنكت راسي. فحص عذريه. فهد: فتحت عيوني. لا ياكواو....

يا خوات الكح.... شكد شايف جلاب بس هيج ماشايف. كليلي خوما سويتي الفحص. أحجي راح أجيبج براشدي أفر وجهج. شعلتي كلبي. غنى: هزيت راسي نافية. فهد: زفرت. همزين. لأن هالفحص ميصير تسوي بنيه. يدمر كل مستقبلها. غنى: شنو قصدك؟ فهد: هيج غلسي. أنتي وكعتي من سمعتيهم مو؟ غنى: بتعب. أي. فهد: مسحت على خدها. لتخافين. وحق ربج إذا ما أخليهم يعضون أصابعهم ندم. أطلع كلشي ما أفتهم. غنى: كولشي لتسويلهم. جفيني شرهم وبس.

فهد: أنتي بالسليم لتخافين. عوفي الباقي عليه. كليلي هسه شلون صرتي؟ كلبج بعده يأذيج؟ غنى: لا ماكو ألم. بس شويه أتعب من أتحرك. فهد: لتتحركين ولتعبين روحج. أصلاً لو أدري بيج هيج مالج خلك حتى ما أكلج صعديلي فوك. غنى: مسحت دموعي. صدك أنت شجابك لهنا؟ متخاف أحد يشوفه؟ فهد: من خوفي عليج نسيت كلشي. ردتلي بس فرصه حتى أشوفج وماكو حل غير السطح. غنى: أي. فهد: صفنت أباوع لشعرها. باوعتلها. تعاي ولج شلون تصعدين وأنتي بهالمنظر.

غنى: باوعت لروحي. أي. منظر. فهد: شلون تصعدين للسطح وكلشي ما حاطه على راسج؟ صدك تحجين؟ جم مره نبهتج أني وكتلج اكو داير مدايرنه عالم. ليروح واحد يشوفج بهالشعر ويطلع من دينه. غنى: وأنت إذا هيج حريص ليش أجيت؟ متخاف واحد يشوفك؟ فهد: أني ما أخاف من شي. وبالنسبه لجيتي هاي آخر مره. لوما خوفي عليج ما أصعد على السطوح مثل الحراميه. وشعرج يا غنى إذا شفته مره ثانيه طالع كدام أحد أطيح حظج. جماله فالته المسعده وصاعدتلي.

غنى: مادري نسيت والله. وبعدين ليش تحجي على شعري هيج؟ فهد: لأن الي يشوف شعرج راح يتخيل تخيلات يستحسن ما أحجيلج عنها حتى ما أخرب روح البرائه الي بداخلج. غنى: باوعت لعيونه. شنو تالي هذا فهد؟ فهد: ما فهمت قصدج. غنى: شنو نهاية علاقتنه؟ فهد: بضحكه. ليش هو اكو علاقه بيناتنه وأني ما أدري؟ غنى: بأحراج. أقصد أنو شنو تاليه تأجيلك لموضوع الأنْفِصَال؟

فهد: دنكت بست خدها. ممكن منحجي بهالموضوع. ما أريد أتناقش. أريد أشوفج وأشبع منج حتى أروح. غنى: هزيت راسي متنهده. شلونه شغلك؟ فهد: عادي. غنى: شكد حتبقى؟ فهد: أسبوع وأرجع ألتحق. غنى: سكتت وهو ما حجه. بعد شويه وكام. فهد: يله أني لازم أروح ليصعد أحد ويشوفه وشيفضج يطلابه. أحاول أشوفج بس أحصل فرصه. غنى: إن شاء الله. فهد: قمت حضنتها وهدئتها بكم كلمه حتى متضل تفكر بالموضوع.

غنى: باس راسي ودنك يريد يبوس خدي. ومن ثواني ملت عليه. فهد: صارت شفايفي بصف شفايفها. ابتعدت بسرعه. إحم. يله روحي نزلي. غنى: بفهاوه. ها؟ فهد: غنى روحي نزلي. غنى: وين أنزل؟ فهد: لبيتنه. أستغفر الله. أقصد لبيتكم. غنى: يله مع السلامه. عفته ونزلت بسرعه. طبيت لغرفتي وسديت الباب. لزمت كلبي الي صاير طبل كد ما يدك سريع. خرب شلون فشله. خليت إيدي على شفايفي. عززه شكد عيب. هسه شيكول عليه؟ فهد: طلعت من السطح. صارت سعاد بوجهي.

سعاد: الحمدلله على سلامتك. فهد: هله. سعاد: شجنت تسوي بالسطح؟ فهد: أسوي الصحن مال تلفزيوني. ليش؟ سعاد: بس أنت ستوك أجيت. وينك وين الصحن؟ فهد: أدري تحقيق هو؟ خوما تحقيق. سعاد: شبيك ما أكلت شي؟ فهد: تره ما ناسي سوايتج. لتتصرفين وكأنو أنتِ مامسويه شي. وبعدين منو سمحلج تطلعين؟ سعاد: أجيت أتحمدلك بالسلامه. فهد: سلامه ومنج ما أريدها. عفتها ورحت لغرفتي. كعدت على الجربايه ومسحت على وجهي. شلون موقف زباله. هسه أنت اله تبوسها؟

لو تموت إذا مابستها؟ الله ستر ومابستها بحلكها. جان رفعت عليه دعوه وطلعتني متحرش. أبتسمت ورجعت جسمي على الجربايه. غمضت عيوني. والله لعلم خوالها درس بحياتهم مينسو. يردون يسوولها فحص ولد النعال وهي أظفرها أطهر من عشيرتهم كلها. نورس: أرتاحيت هسه؟ شفت روحك وين وصلنه أنته وأخوتك. خالد: سكتي. أني لازم كلبي من غير شي. ليروح يصير بيها شي وتموت وأحنه نبتلي. نورس: خالد شجاك؟ ما جنت هيج. من شوكت أنت تمشي بحجي النسوان؟

ليش تخلي سهاد وكريمه يمشونك؟ تره أنت واني وكلنه ندري سهاد جذابه وغنى مؤدبه ومتسويها. خالد: لا تسويها. المثل يكول: ماتحت السواهي دواعي. خوفج من الخانس كلشي يطلع منه. وهاي كلتلك مابقالي لا أبو ولا أم. حتى أخويه راح. خلي أروح بغير طريق بلكي ألكه واحد يلفيني. نورس: عدنه بنات يرجال. خاف ربك. الفلوس متدوم لك بس السمعة الطيبه والحس الزين يدولك حتى من تموت. خالد: هسه أني شمسوي؟ ناهب؟ خوما ناهب؟

نورس: لا أبد. بس أنت وأخوتك ذبيتولكم بنيه مثل الورد بالشارع. لا وأخذو حتى حصه أمها. أنوب راحت وما خلصت منكم رجعتو تردون تودوها لعمامها. لا وكامل أفندي رايح كايل كلشي لعمامها. ما خاف ليرحون يذبحوها وهي بريئه. وتالي خطيتها تصير بركبتكم طول العمر. خالد: شو دسكتي. مالي خلج وخلك مثالياتج هاي.

نورس: أني ما أبيع براسك مثاليات. بس أنت زوجي وأنت شفتك تسوي منكر كدام عيوني. ولازم أحذرك بدال المره ألف. وهسه أنت ما اتعضت. وأني مالي علاقه بيك بعد. أني أديت واجبي أمام الله. وهسه أنت منك لربك. خلي هو يحاسبك. أني ما عليه. ضحى: ولج مروه يله وين صرتي؟ فضيهاااا. مروه: عدلت الحمره. أي أي ثواني. باوعت لروحي بالمرايه. أي هسه تمام. نزلت. يله أمشينه. ضحى: شنو هذا؟ شهالمكياج؟ شنو عندك عرس؟ مروه: ليش شبي مكياجي؟

ضحى: خففي ليشوفج أبوج وأخوانج ويطيحون حظج. مروه: ما أمسح شي. هي هاي العايزه بعد كل هالشغل. أروح أمسيح. يله تعالي خلي نروح. تأخرنه. ليطلع فهد وأحنه لسه ماشايفينه. ضحى: لتنسين أني أمج. ثكلي شويه ومشاعرج خليها بقلبج. مو تحجين بيها كدامي. تره الخجل حلو خاصه للبنيه. مروه: كلبت عيوني. ممكن نروح فدوه لكلبج يمه؟ حارث: لحظه لحظه. تعاي ولج. شهالالوان الي بوجهج؟ متستحين؟ أنتي شنو؟ وين رايحين؟

أحنه أمشيييي ولي. مسحييي الصخااام الي بوجهج. صدك متنعطين وجهه. حمدي ربج أبويه ماشافج جان كسر ضلوعج. يله ولييي. مروه: هو كدرت أبويه بس على أمي ميحاسب. شهد كدرته بس عليه. حارث: لتدردمين. يله. مروه: طلعت كلينس مسحت شويه من المكياج. يله أمشونه. رحنه لبيت عمي نتمشى. يمه صارلي عشر تيام ماشايفته. والله أحسهم عشر سنين. يربي هاي إذا تزوجنه وعافني عشر تيام شيصير بيه؟

فزيت على دكة الباب. دكها حارث. طلع فهد لابس تشيرت رصاصي وبجامه سوده. ضليت صافنه عليه. يربي هالرجال من شنو مصنوع؟ حارث: حضنته. الحمدلله على السلامه. فهد: أبتسمت. الله يسلمك. ضحى: شلونك يمه فهد؟ فهد: الحمدلله خاله. أنتي شلونج؟ ضحى: بخير. الله يسلمك. مروه: وعيونها تلمع بلهفه. شلونك فهد؟ الف الحمدلله على سلامتك. ضل بالي. أقصد بالنه عليك.

فهد: هله بيج. الله يسلمج. تفضلو دخلو. سمعت الباب الي بصفنه أنفتح. أباوع طلعت خاله غنى تذب الزبل. على أساس أني جنت متأمل هي تطلع. دخلت جوه. أباوع أم محمد كلها عدنه. طبعاً أني أكره هيج تجمعات لأن هوسه تصير وأني أضوج من الهوسه. أحب الهدوء. أجيت كعدت. عبير: فهد شلون الوضع هناك؟ هم عدكم أكشن وكذا مثل الأفلام؟ فهد: لا أبد ماكو أكشن. بس راح تصير بالقنادر. محسن: هههه لهدرجه واصله.

فهد: وأكثر. بس عادي ماعدنه شي نخسره. لو بالهدف لو بالنجف. ياسمين: أسم الله. فال الله ولا فالك. نسرين: يعمه ليش لسه ماتزوجت؟ لو عندك مره وطفل هسه على الأقل تروح ومأمن. لو متت اكو من يشيل أسمك. ايمان: اللهم صلِ على محمد. شجاج أم مرتضى؟ لتفاولين لابني. يمه عسى يومي كبل يومك. غير أتخبل والله. فهد: بستها. أروحلج فدوه يمه. من عمري على عمرج. باوعتلها. عمه الي الله قاسمه يصير. وبعدين منو كال لو متزوج يصير عندي جهال؟

شنو نعلم الغيب أحنه؟ نسرين: أني غير من خوفي عليك. فهد: لتخافين. ما أموت أني. وإذا ردت أزوج أعرف منو آخذ. شهد: أموت وأشوف مرتك الي منتظرها لسه شلون صايره. حارث: هسه تطلع تشبه فيصل. محسن: هههه أنجب ليسمعك. فهد: هي هاي العايزه حتى أطلق بنفس اللحظه. ملك: أسفه أقاطع سالفتكم. اروى فدوه متخابرين غنى تجي تاخذ هالصايه بيها عرض أريد تكصفها. اروى: البنيه مريضه. بيا حال وينها ووين الخياط؟ مروه: ليش شبيها؟ مو رجعت لهنا؟

اروى: كلبها تعبان. ضحى: ياا خطيه. متستاهل حرامات والله. حياة: بعدها صغيره مو مال قلب بهالعمر. ايمان: الله يساعد كلبها. مو زين. لسه عايشه. خطيه أخوها وبيبيتها ماتو بنفس السنه وكدام عيونها. أحنه لو نربي عصفور ويموت هم ننقهر. مو أنوب أهلنه. حياة: يمه والله كزبر جسمي. الله يساعد كلبها. كل هذا صاير وياها. ربي دخيلك لتفجعنه بعزيز. الكل: أمين.

فهد: أباوعلهم شلون يتناقشون بحياتها وكل واحد يبدي رأيه. سخافه بصراحه. همه شعليهم بيها؟ أصلاً ليش يحجون بيها؟ أدري ثاردين وياها؟ ما عجبني كلامهم. ما أريد واحد يشفق عليها. هي مو بحاجه شفقتهم. وأني متأكد هسه البنات يحسسنها بهالشي. وهذا أبي ما أريده. نسرين: أكول ايمان. أنتِ شدراج بهذا كله؟ ايمان: صديقتها سولفتلها على أخوها وبيبيتها. نسرين: زين هي عدها أهل؟ ايمان: أي أكيد. بس عايشه عد خالتها.

نسرين: أني ناوي أخطبها لمرتضى. سعاد: صدك تحجين؟ أنتِ تخطبين خدامه لابنج؟ لا حسب ولانسب. حارث: عيب هالحجي خاله. البنيه تنقاس بأخلاقها مو بمكانه أهلها الاجتماعيه. مروه: بس الفروقات هاي راح تسبب خلافات بيناتهم بالمستقبل. فهد: بحده. ليش هو أحسن منها؟ لو أنتِ أحسن منها حتى تنتقصين منها؟ على الأقل هي بكدها وتعبها عيشت بيت كامل وداست على روحها. مو مربخه ونايمه ومعتمده على مصرف نهاية الشهر.

بتول: كلنه ضلينه صافنين. هاي أول مره فهد يتدخل بنقاش ويدافع لأحد. خاصه أذا بنيه. أباوعله أكل مروه بكشورها. رغم أني أكرهه مروه وأشوف دم سنوني ولا أشوفها. بس ماتوقعت فهد يحاجيها هيج. لا وعلى مود وحده مثل غنى. مروه: بارتباك. بس أني مو قصدي أنتقص منها. بس حجيت الحقيقه. وهذا واقع. اكو هواي فروقات بيناتهم. شلون راح يتراهمون بعدين؟ فهد: ليش منو كالج هي راح تقبل بي أصلاً؟ وما أنصحكم تخطبها لأن راح ترفض وتتفشلون.

نسرين: ليش يمه؟ شناقص أبني وترفض؟ فهد: ولا هي ناقصها شي حتى تقللين من شأنها. وتكونين واثقه من موافقتها. ملك: الصراحه البنيه كلش حلوه. ماشاءالله جميله إلى درجه. نسرين: عاد لتصيرون كلش. منيلها حلوه؟ عاديه كلش واقل من عاديه هم. ياسمين: هاي عاديه ولج؟ أحجي ضميرج. البنيه تبرك برك من البياض. وإذا تاخذيها بغير فكر إذا وجها الشابع شمس صاير هيج. لعد الباقي والمضموم شلون؟ فهد: لا إله إلا الله. حجيه وين رحتي؟

ياسمين: عمتك متفتهم. كلت أدهديلي حجايه بلكي تفهم ابنها ليش يريدها. وياريت لو قابله بي. مروه: بعصبيه. هسه اكو داعي نحجي بيها؟ تره مو وحده من أهلنه هي. وهيج نحجي بيها. وعود من تصير مرت مرتضى كعدو احجو بيها. ورجاءاً لحد يجيب طاريها بعد. اروى: وأنتي شبيج انتفضتي؟ منو داسلج على طرف؟ ياسمين: كافي. تركو هالنقاش الماله داعي. حرف ما أسمع بعد. صباحا. غنى: جنت كاعده أقرأ قرآن ودخلت خالتي. سحر: صباح الخير.

غنى: صدقت وشلت راسي مبتسمه. صباح الورد. سحر: بستها. أروح فدوه لهالوجهه المنور من الصبح. يله تنزلين تتريكين لو أصعدلج الريوك لفوك؟ غنى: لا هسه جايه وراج. قمت نزعت الجادر وأخذت شالي ونزلت. لكيتهم كاعدين بالمطبخ يتريكون. صباح الخير عمو. سيف: صباح النور بويه. شلون صرتي؟ غنى: الحمدلله أحسن. سحر: هاج هذا دواج. تريكي حتى تاخذين الدوه. غنى: هزيت راسي. تريكنه وكملنه. كمنه لمينه السفره. قمت أساعد خالتي بتحضير الغده.

سحر: روحي يمه ارتاحي. عوفج مني. أني ماعندي شي. لتضلين واكفه مو زين. روحي حبيبتي. غنى: لا خاله ضجت من الغرفه. خليني أساعدج. سحر: براحتج يمه. غنى: شحتسوين غده؟ سحر: عمج مشتهي قيمه. كلت أسويله. غنى: قيمه بهالوقت؟ سحر: هاي بعد غير عمج اشتهاهه. باوعتلها. أكول خاله غنى ليش متذبين الأسود؟ غنى: لا خاله ما أذبه. سحر: حبيبتي مو راح يصيرلج سنه كامله لابسه هالأسود؟

وبعد شهرين تدور السنه على وفاة مروان. ووراها بتلث أشهر تدور السنه على أمي. إلى متى تضلين لابسه أسود يايمه؟ لو الأسود يرجع الي راحو جان بقينه العمر كله لابسين أسود ومنتظرين جيتهم. غنى: بصوت مستهضم. تصدكين خاله ولا حسيت بيها. الأيام تركض ركض. تخيلي حيصير سنه كامله مروان وبيبي تاركيني.

سحر: ربج فضل علينه بنعمه النسيان. لو ما كلنه ننسى وتطيب شويه من جروحنه جان متنه من قهر الفراك. فيايمه كومي ذبي الأسود. ميصلحلج وأنتي بعدج بعز شبابج. غنى: ترديني البس ألوان وأرجع للحياه وأبتسامتي ماليه وجهي؟ وأخويه والمرأه الي ربتني نايمين بالقبور؟ لا خاله ما أكدر. سحر: بكيفج حبيبتي. بس هاي أني داكلج. الحزن بالقلب. الألوان متعكس الحزن الي بقلبه. ولبسط مثال خالتج سهاد لابسه أسود وهي لا حزينه ولا بطيخ.

غنى: هزيت راسي. صحيح. مروه: ولج راح أجن. تعاي لزميني. شوفي شلون شابه نار. شهد: الوو يمعوده شبيج؟ مروه: شفتي فهد البارحه شسوه بيه؟ على حساب غنى. ولج خلاني لا أخذ ولا أنطي. فشلني كدام الكل. والله من البارحه لليوم أني عيني ما غمت. أول مره فهد يحاجيني هيج. دائما جان لطيف بتعامله ويايه. وأني غير عن الكل. الوحيده من البنات الي دائما أسلوب فهد يختلف وياها. تالي بسبب غنى نتعارك أني وياا. شهد: هسه قابل هو سحلج من شعرج؟

وبصراحه تستاهلين الرزاله. يصير تتشمتين وتحجين على البنيه هيج. أصلاً المفروض بعد الي سمعنا عنها نقربها منه. لأن ماعدها لاخوات ولا أحد وياها. مو نكعد نستهزئ بيها. أصلاً أني ما أدري شجاج وياها؟ شاده وياها فرد شده وهي كلشي ما مسويتلج. مروه: الحجي الي راح أكوله ما أريد واحد يدري بي. فتهمتي. شهد: فهمت.

مروه: ذاك اليوم من رحنه لبيت عمي على حساب الملابس وأجت غنى. شفت فهد نزل سلم على الكل. ومن أجه يطلع باوعلها وأبتسم. وهي هم دنكت راسها وضحكت. ومنها عرفت هي وفهد اكو شي بيناتهم. شهد: أستغفر الله. ميصير تتهميهم هيج. يجوز أنتِ متوهمه. يجوز البنيه أبتسمت على غير شي مو شرط على مود فهد. وبعدين فهد من شوكت يبتسم؟ أشوف ضحكته نشوفها بس بالأعياد والمناسبات. مروه نصيحه لتضلين تدققين بتصرفات فهد لأن راح تتعبين.

مروه: ما أكدر شهد. ما أكدر. من ذاك اليوم ولهالساعه أكل بروحي. شهد: خلص. أهدي وعوفي الشغله عليه. فهد: كاعد بالمعمل وأشوف جدول البيع والشره. محسن يامحسن تعال. محسن: نعم. فهد: اقرالي المكتوب هنا. محسن: صدك تحجي؟ فهد: كلت اقره. محسن: تم بيع 200 كونيه. فهد: بهالعشر تيام أنتو بايعين حوالي 200 كونيه بس. شو من رحت للمخزن العدد المأخوذ مبين فوك الـ 200 وبهواي هم.

محسن: لا يمعود. أني وعمي عباس متأكدين من كلشي. لأن كل يوم نسوي جرد لكل المبيعات. فهد: تعال وياي للمخزن. كمنه فتحت المخزن. شوف. محسن: شنو هذا؟ أباوع نص المخزن فارغ. وين راحت البضاعه؟ فهد: شفت. محسن: هاي شنو؟ وين الباقيات؟ فهد: روح صيح للعمال بسرعه. راح صاح للعمال وأجه. منو بايع قسم من الكواني الي بالمخزن بدون ما يرجع النه؟ العمال: محد.

فهد: أحجو أحسن الكم. خلونه ماشين على الثقه أحسن. لتخلوني أكلب المعمل على راسكم. والله يله أحجو. أباوعلهم كلهم كامو يتحلفون ويتكفرون. بس واحد بين عليه الأرتباك. أجيت أحجي ويا. سمعنه صوت سيارات وهوسه يم المعمل. طلعنه. أباوع سيارات حمل تنزل مواد. أباوع هذا مو رحمان صديق فيصل. محسن: أكلك هذا مو طلع للاردن؟ شرجعه؟

فهد: علمي علمك. أباوع فيصل نزل وياا. وبدو يفتحون باب المعمل الي بصفنه. بس الي صدمني بضاعه معملهم نفس بضاعتنه. عود شنو معنى هالتصرف؟ محسن: هذا صدك يحجي بهالسالفه. راح يضرب شغلنه. لأن إذا معمل بصف معمل راح يخسر واحد بيهم. فهد: عيني على الكواني الي ينزلوهن. أفر بالسبحه وأبتسم. هسه فهمت السالفه. باوعت لمحسن. لتخاف. مبين كلش زين منو الي راح ينضرب معمله. تعال وكل للعمال كلمن يرجع لشغله. محسن: وشغله الكواني؟

فهد: محلوله لتخاف. محسن: دشوف أبويه وعمي إذا درو شراح يسوون بهذا الناقص أخوك. فهد: ميسوون شي. ولحد يحجي. كتلك شغلتهم محلوله. انغام: واكفه أسوي بالغده وحسيت بألم ببطني. غمضت عيوني متألمه. آآآخ. آلاء: شبيج؟ انغام: بألم. آآآخ بطني توجعني. آلاء: ولج خاف راح تجيبين. انغام: أي أي عفيه روحي خابري منذر بسررررعه حبابه. آلاء: أي أي هسه طلعت. أركض. شفت خاله ايمان. خاله انغام جاي تولد. حبابه روحي يمها علما أخابر منذر يجي ياخذها.

ايمان: ركضي بسرعه. رحت للمطبخ شفتها واكفه ولازمه بطنها وتصيح. أهدي يمه وتنفسي على كيفج. هسه يجي منذر ثواني وهو يمج. أهدي حبيبتي. انغام: آآآآآآخ خاله راح أموت. لحكولييي. سعاد: دخلت للمطبخ. صدك تحجن؟ واكفات؟ مشنها شويه؟ شبيجن؟ ساره ياساره ولج صخااام. ساره: هاا. سعاد: روحي ركض جيبي عبايه راس وحجاب بسررررعه. منذر: طبيت أركض. هاا هاا صدك راح تجيب؟ سعاد: أي ولك تعال أخذها بسرعه. لتجيب هنا.

ايمان: بدلولها وخذوها للمستشفى. ضل بالي يمها. أروح وأجي. أخر شي خابروني العصر كالو جابت بنيه. وبنفس اليوم طلعوها. الحمدلله على السلامه حبيبتي. انغام: بتعب. الله يسلمج خاله. فهد: الحمدلله على سلامتج وسلامه البنيه. انغام: الله يسلمك خويه. اروى: كلنه التمينه على الطفله. أوي تخبل. ناعمه وصغيره كلش. فهد شوفها. فهد: أبتسمت. الله يحفظها. تتربه بعزك أبو سالم. منذر: الله يخليك. يوم الألك. ايمان: اللهم أمين.

ورده: ياالله شلون ناعمه. شراح تسموها؟ ياسمين: رفلمنذر: مو علساس كلتي لبنى؟ ياسمين: لارفل أحلى. ايمان: أبتسمت. نورتينه رفوله. بعد مرور يومين. غنى: طلعت من البيت أذب الزبل وأروح للكليه. ضاله أني متنقله كل ساعه لمكان. خليت العلاكه بالحاويه وفززني صوت. فهد: ممكن الرقم؟ غنى: درت وجهي. لزمت كلبي. يمه هذا أنت. وكعت كلبي والله. فهد: صباح الخير. غنى: أبتسمت. صباح النور. فهد: راح تداومين اليوم؟ غنى: أي.

فهد: يله لعد روحي جيبي جنطتج حتى نروح. غنى: وين؟ فهد: للشقه نتونس شويه. شبيج غير أوصلكم للكليه. غنى: لا روح. أني آخذ تكسي. فهد: هذا الحجي من جنتي كاعده عندي مو هسه. يله روحي جيبي غراضج وتعاي. غنى: فشله من اروى. فهد: هي اروى كلتلي إذا شفتها كليلها. يله بسرعه روحي تره أعوفج وأروح. غنى: هسه ثواني. رحت بسرعه غسلت إيدي وأخذت غراضي. بوست خالتي الي كعدت من الصبح وياي وطلعت. شفتهم صاعدين. فتحت الباب وصعدت. صباح الخير.

اروى: صباح النور حبيبتي. شلون صرتي؟ غنى: لا الحمدلله أحسن. فهد: باوعتلها بالمرايه. أحسها تعبانه بعدها بس تضحك على روحها. غنى: أباوعله. الطريق كله هادئ. كولشي ما حجه. هدوئه وعطره طغن على المكان. أنتبهت عليه لابس قميص رصاصي وبنطرون أسود. اروى: صدك فهد وين راح تروح؟ فهد: أوصلجن وأطلع للحله. صار أسبوعين ما واصل ولا شايف البستان. وصلت. يله تفضلن. غنى: نزلنه أني وأروى. هي دخلت وهو صاحلي. فهد: هاج. غنى: عندي.

فهد: خليتهن بأيدها. ميخالف. يله روحي مع السلامه. غنى: أبتسمت. مع السلامه. دخلت. صار مرتضى بوجهي. عبرته ومشيت ولا كأنه موجود. بده الدوام وتوالت المحاضرات وحده وره الثانيه لحد ما خلصنه وطلعنه. أجه علي خذانه. رجعت للبيت تغديت ونمت. وكعدت أقرأ لليل. خالتي وزوجها طلعو يزورون للامام. وأني بقيت كاعده أدرس. وأجتني رساله من رقم غريب. "بِشْكَد الليله؟ فتحت عيوني. منو هذا؟