رواية طليق اختي الفصل الأول 1 - بقلم اية زين

إزاي يعني اتجوز طليق اختي يا بابا؟ وانت يا داليا عادي بالنسبة ليكي؟ داليا ببرود: أيوه عادي.. أنا عمري لا حبيته ولا هو حبني.. وبعدين أنا اللي طالبة الطلاق وكمان أنا عايزة أبدأ حياتي من جديد وبصراحة كده ابنه ده مش هيخليني أعمل أي حاجة. رقية بصدمة: ابنه! على فكرة ابنك انت كمان.. وبعدين أي ذنبي أنا أشيل شيلتك! ما تشوفي حياتك أنا مالي أنا!

الأب بتوسل: عشان خاطري يا بنتي اتجوزيه.. مش عايزينه يتجوز واحدة غريبة وتتعب الولد معاها.. ده مهما كان ابننا برضه. رقية بدموع وصوت عالي: وأنا مالي؟! هو أنا كنت أمه؟ ما أمه ترجع لأبوه والموضوع ينتهي.. بتدخلوني أنا ليه؟ الأم بحزن: يا بنتي مش انتي كنتي عايزة تتجوزي! اتجوزي يوسف وهو مش هيزعلك صدقيني.. ومش هتندمي يا رقية. رقية بدموع: ولما هو كويس أوي كده وافقتوا داليا إنها تطلق منه ليه!

وبعدين يا داليا انت كنتي بتقوليلي عليه إيه! "يوسف يا رقية قلبه جامد أوي.. حتى لما بيتعامل معايا بحسه بيأدي واجب عليه وخلاص.. يوسف تعبني أوي يا رقية مش عارفة هكمل حياتي معاه إزاي.. ده إنسان لا يطاق.. يوسف معندوش حاجة اسمها حب.. مش عارفة لما أولد ابني هيستحمل ده كله إزاي.." عايزاني بعد ده كله وبعد ما سيادتك تزهقي منه أجي أنا أتزوجه بعدك! داليا باستفزاز: أيوه يا رقية هتتجوزيه.. عارفة ليه!

عشان ده الحل اللي قدامك عشان تهربي من لقب عانس.. هتوافقي تتجوزي طليقي وتربيلي ابني وأنا هشوف حياتي عادي.. واسمهم في الآخر طليقي وابني أنا.. أنا يا رق... الأب وهو بيضرب داليا قلم: انتي إزاي كده! أنا إزاي معرفتش أربيكي كده! داليا بصوت عالي: اهو ده اللي حصل بقى.. وخلوا ست الشيخة دي تتصرف.. مش هرجعله يعني مش هرجعله.. ومش هاخد الواد منه عشان ميعرفش يشوف حياته.. ولا هيتجوز واحدة تانية. رقية تسيبهم وتدخل أوضتها.

"دي أختي الصغيرة.. داليا.. عندها 24 سنة.. مطلقة من يوسف.. مشوفتش منه حاجة وحشة.. بس كلام داليا عنه خلاني أخاف منه.. أخاف من شخصيته.. يعلم ربنا إني حاولت اخليها تقرب منه.. بس هي كانت دايما عايزاه هو اللي يقرب.. محمد ابنهم دلوقتي عنده 4 شهور.. مستحملتش أكتر من كده وقررت تطلق.. ولما يوسف أصر إنه ياخد محمد معاه وافقت بكل سهولة عشان شايفة إنه هيوقف حياتها." يوسف: رقية.. أنا عايز أتكلم معاكي شوية.

رقية: أنا عارفة يا يوسف إنك رافض ال... يوسف: بس أنا موافق اتجوزك يا رقية. رقية بصدمة: نعم! موافق تتجوز أخت طليقتك! يوسف بتنهيدة: أنا موافق اتجوزك انت يا رقية.. أنا مش هكذب عليكي وأقولك مش هتجوز بعد داليا.. لأ أنا محتاج زوجة ومحمد محتاج أم.. وأنا مش هلاقي أم ليه أحسن منك. رقية بدموع: اللي خلاك متكملش مع أختي هتكمل معايا أنا يا يوسف!

يوسف: أولا مش عايزك تعيطي.. ثانيا أيوه يا ستي هكمل معاكي انت.. حاولي تنسي إني طليق أختك.. اعتبريني عريس متقدم لك وخلاص. رقية بجمود: وأنا مش عايزة اتجوز خالص.. لا انت ولا غيرك.. وأظنك عارف كده من زمان.. عن إذنك. يوسف بسرعة: طب لو قولتلك إن أنا ومحمد محتاجينك في حياتنا! رقية بدموع: مش هقدر يا يوسف.. مش هقدر صدقني. يوسف: هنقدر سوا.. أنا ومحمد معاكي. رقية بتردد: ب... بس داليا. يوسف: مالها داليا! رقية: هتحنلوا في يوم!

هتندم إنك اتجوزتني بعدها! يوسف باستغراب: وأندم ليه! أنا محتاجك في حياتي.. وبعدين انتي عارفة إن أختك التعامل معاها صعب.. وأنا للأسف ربنا محطش حبها في قلبي.. بس ربنا يعلم إني كنت بعاملها بكل احترام.. بس هي اللي قررت تبعد. رقية بحيرة: مش عارفة يا يوسف.. بس أنا خايفة. يوسف: أوعدك أطمنك وهفضل معاكي دايما. رقية بجدية: أنا موافقة يا يوسف.. بس مش عايزة فرح.. وكمان.. إيه. يوسف: كمان إيه يا رقية! قولي اللي انت عايزاه.

رقية: داليا.. ملهاش علاقة بينا بعد النهاردة.. هتفضل أختي مهما عملت.. بس انت متحتكش بيها ولا ليك كلام معاها. الأب: اللي انتي عايزاه كله هيحصل يا رقية.. بس يا بنتي تفرحي زي أي عروسة. رقية: لا يا بابا.. أنا قبلت اتجوز يوسف عشان محمد بس.. أي حاجة تانية ملهاش لازمة. الأم بدموع: سامحينا يا بنتي.. غصب عننا والله. الأب بيحضن رقية: يوسف ابن حلال وطيب يا رقية.. وأنا متأكد إنكم هتبقوا مرتاحين سوا.

رقية بجمود: خليكوا متأكدين إني عمري ما هشتكي منه وده عشان خاطر محمد بس.. ولا عمري هطلب الطلاق زي داليا.. هستحمل عشان أهرب من لقب عانس على رأي أختي. الأم بدموع: لا يا بنتي متقوليش كده.. ده انتي ست البنات. رقية بجمود: أختي شايفاني عانس يبقى مش هستغرب حاجة من الباقي.. بس عرفوها ملهاش دعوة بيوسف ولا محمد من النهاردة. داليا بتدخل وهيا بتصفق ليها: لا براڤو.. الأخت المضحية بقى وكده! طب ما كنتي تقولي إن عينك على جوز أخت..

رقية بتضربها بالقلم: متنسيش إني أختك الكبيرة.. ومتنسيش يا ست داليا إني كنت رافضة الجواز قبل سيادتك ما تتجوزي.. وحتى بعد ما اتجوزتي مفكرتش اتجوز.. فالزمي حدودك عشان مش عايزة أعمل حاجة أندم عليها. داليا بصوت عالي: انت بتمدي إيدك عليا ا... الأب بزعيق: انتي اخرسي خالص.. وهتروحي تعملي تنازل عن حضانة محمد ليوسف.. ورجلك مش هتخطي بيت أختك.. وده آخر كلام عندي يا داليا.

داليا ببرود: والله أحلى حاجة حوار التنازل ده.. أحسن عشان أنا مش طايقاه لا هو ولا أبوه. "بارك الله لكما وبارك عليكما وجمع بينكما في خير." رقية لنفسها: متخيلتش إن اليوم ده هيجي.. يارب أنا عارفة إن ليك حكمة في كده.. يارب أنا صابرة يارب وفقني في حياتي الجاية. يوسف لرقية: يلا يا رقية! رقية بتشيل محمد: يلا يا يوسف.. بيسلموا على أهلها ويمشوا.

رقية: أنا مش هقولك هنعيش أخوات وأصحاب.. على ما أعتقد إحنا كبار كفاية عشان نعرف إن الجوازة دي هتكمل إن شاء الله على الأقل عشان خاطر محمد.. فـ أنا بستأذنك الفترة دي أُقعد مع محمد في أوضة الأطفال عشان منزعجش لو صحي في الليل.

يوسف بيمسك إيدها: اهدي يا رقية.. انتي هنا أم محمد ومراتي.. يعني اعملي اللي انتي شايفاه فيه صالحنا إحنا التلاتة.. وأنا واثق إنك هتاخدي القرار الصح إن شاء الله.. وأنا اللي بطلب منك نكون أخوات وأصحاب لحد ما تستوعبي الوضع الجديد. ~~~~~~ تاني يوم الصبح. رقية: يوسف.. اصحى يا يوسف. يوسف: خير يا رقية! انتي كويسة! محمد كويس! رقية: إحنا كويسين الحمدلله.. قومي يلا عشان تفطري وتلحقي تروحي شغلك.

يوسف: بس أنا واخد إجازة من ساعة ط... رقية: عارفة إنك كنت واخد إجازة عشان تقعد مع محمد.. لكن أنا هنا أهو. يوسف: وانتي مش هتروحي شغلك! رقية: لا يا سيدي.. أنا خدت إجازة عشان أقعد مع ميدو.. على ما يكبر شوية أبقى أنزل الشغل تاني. يوسف: بجد يا رقية! عملتي كده فعلاً! رقية وهيا بتمشي: تخيل! يلا بقى بلاش كسل. ~~~~~~ رقية: مالك يا يوسف شكلك متضايق ليه! يوسف: مفيش حاجة. رقية: على فكرة ممكن تحكيلي عادي بما إني مراتك وك...

يوسف بصوت عالي: قلتلك مفيش يا داليا... انتي مبتفهميش! رقية بصدمة: داليا يا يوسف! أنا رقية مش داليا.