رواية توأمي الفصل الثالث 3 - بقلم هيام

تاني يوم في الكافيه، كيارا وديلارا اتقابلوا زي ما كانوا متفقين. ديلارا: ها، عملتي إيه؟ عرفتي حاجة؟ كيارا: ولا عملت ولا عرفت. هو أنا لحقت؟ أنا يا دوب وصلت طلع عليا واحد كده شبه عفريت، كان اسمه عيده. ديلارا: قصدك حديدة؟ كيارا: أيوه، هو. ديلارا بغيظ: وعملك إيه الكائن ده؟ كيارا حكتلها للي حصل وازاي حديدة اتعرضلها، وبعدين يا ستي من التعب نمت زي القتيلة. مصحتش غير الصبح، وطبعًا معرفتش أفتش عن حاجة. ديلارا: يا ابن الورمة!

وإنتي إزاي سكتي له؟ مجبتيش كرش أمه نصين ليه؟ كيارا: إيه؟ ديلارا: إيه ده؟ كيارا: إنتي بتقولي إيه؟ أنا مش فاهمة حاجة. ديلارا: ولا هتفهمي. المهم، إحنا هنعمل إيه دلوقتي؟ كيارا: مش عارفة.

كيارا وديلارا كانوا قاعدين جمب بعض، وفجأة إيديهم الاتنين قربوا من بعض بطريقة غريبة. كيارا وديلارا عندهم وحمة في جنب إيديهم تحت الصوابع كده. الوحمة دي عبارة عن شكل نص جمجمة. ولما كيارا وديلارا إيديهم قربت من بعض، الجمجمة اكتملت، وظهر نور غريب أوي من الجمجمة، وفجأة اختفوا من الكافيه.

لاقوا نفسهم في مكان غريب، عبارة غابة مليانة شجر في كل مكان. ومفيش ولا بني آدم ولا بيوت ولا أي حاجة. مكنش موجود غير قصر كبير لكن قديم ومليان بخيوط العنكبوت. كيارا بخوف: ديلارا، إحنا فين؟ وإيه المكان ده؟ وإيه للي حصل من شوية وإزاي جينا هنا؟ ديلارا: اهدي، أنا زيك مش فاهمة حاجة. بس تقريبًا دي القوة الغريبة للي قالت عنها العرافة، وسر القوة دي في الوحمة للي في إيدينا.

الجو بدأ يمطر بطريقة غريبة، مع إنه من ثواني كان فيه شمس والسما صافية. لكن الغريب إنه كان بيمطر دم. كيارا: ديلارا، إنتي شايفة للي أنا شيفاه؟ السما بتمطر دم! ديلارا: ولسه هنشوف عجائب وغرايب. تعالي ندخل القصر للي هناك ده عشان كده هنموت. كيارا وديلارا وصلوا للقصر، لكن الباب كان مقفول. حاولوا يفتحوه بكل الطرق، لكن بلا فايدة. والمطر والبرق والرعد بيزيد.

كيارا لمحت في مكان جمب الباب كان منحوت فيه نفس صورة الجمجمة للي على إيد كيارا وديلارا. كيارا: ديلارا. ديلارا: ها؟ عايزة إيه دلوقتي؟ هو ده وقته؟ أنا بفكر في طريقة نفتح بيها الزفت ده. كيارا: تعالي بس شوفي كده. ديلارا: يوووه! أهو، عايزة إيه؟ كيارا: تعالي شوفي المنحوتة دي. ديلارا: أنا بحاول أفتح الباب وإنتي بتناديني عشان أشوف جمجمة؟ على أساس أول مرة أشوف شكلها! كيارا اتغاظت

من غباء أختها وهي بتقولها: إنتي أكيد عقلك ده مكانه بطاطس! الجمجمة دي هي نفس الجمجمة للي على إيدينا. ديلارا هنا بدأت تاخد بالها وفهمت أختها عايزة توصلها إيه، وهي بتقولها: ديلارا: قصدك إن الباب ده معمول بكلمة سر، وكلمة السر دي هي الجمجمة للي على إيدينا؟ كيارا: الحمد لله، أخيرًا القرد بدأ يفهم. ديلارا: قرد مين يابت؟ ما تتلمي. كيارا: طب خلاص، اسكتي وقربي إيدك من إيدي.

الجمجمة للي على إيديهم اكتملت، ولما إيديهم قربت من المنحوتة... المنحوتة بقت باللون الأحمر الدموي، والباب اتفتح. كيارا: الحقي! الباب اتفتح! ديلارا: طب تعالي ندخل.

كيارا وديلارا دخلوا القصر، وكان عبارة عن قصر كبير أوي وأثاث من الطراز القديم. والمكان كله عبارة عن ستاير حمرا على الشبابيك بتحجب نور الشمس إنه يدخل القصر، والتراب كان في كل مكان كإن القصر متنضفش من سنين. وباب ضخم للقصر، وعلى جوانب القصر كان في تمثالين لمصاصي دماء. صوت من وراهم: نورتوني، أنا كنت منتظراكوا من زمان. اتأخرتوا عليا ليه؟

كيارا وديلارا خافوا من الصوت والتفتوا وراهم بحذر، عشان كانوا مفكرين إن القصر مهجور ومش هيكون في حد. أصل إزاي حد هيعيش في المكان ده؟ لكن اتفاجأوا من وجود ست عجوزة وماشية على عكاز. ديلارا: إنتي مين؟ العجوزة بصوت هادي: ديلارا يا ديلارا، إزاي مش فاكراني؟ كيارا وديلارا استغربوا إنها إزاي عرفتهم من بعض. الشبه للي بينهم كبير جدًا لدرجة إن أهلهم مبيعرفوش يفرقوا ما بينهم. كيارا بصدمة: إنتي إزاي عرفتي... العجوزة: إيه؟

مستغربة إني إزاي عرفتكوا من بعض؟ أنا أعرف حاجات عنكوا إنتوا متعرفوهاش. ديلارا: معني كده إنكِ عارفة سر الوحمة للي على إيدينا؟ العجوزة: طبعًا عارفة، وأنا للي جبتكوا هنا. كيارا: طب ارجوكي فهمينا إيه الحاجات الغريبة للي بتحصل معانا دي. العجوزة: هتعرفي كل حاجة، بس كل شيء ب أوانه. تعالوا ورايا.

كيارا وديلارا مشيوا ورا العجوزة وطلعوا على سلم بيوصل لـ تاني دور من القصر. الدور التاني كان عبارة عن أوض كتير أوي متداخلة في بعض كإنها متاهة، لكن للي يدخل جواها ميعرفش يخرج تاني. العجوزة دخلتهم أوضة كبيرة جدًا وكان في سرير ضخم في الأوضة ونايم عليه راجل. كيارا: مين ده؟ العجوزة: ده عمكوا. كيارا: عمنا؟ إزاي يعني؟ بابا ملوش إخوات. العجوزة: ده من ضمن الأسرار للي أبوكوا مخبيها عنكوا. وأبوكوا هو سر اللعنة للي إنتوا فيها.

ديلارا: إزاي لعنة؟ وإنتي قولتي إن إحنا اتولدنا بقوة غريبة. أنا مبقتش فاهمة حاجة. العجوزة: أبوكي هو السبب إنكوا تتفرقوا عن بعض، وهو السبب إنكوا تتلعنوا. إنتوا فعلاً عندكوا قوة كبيرة جدًا، لكن القوة دي إنتوا مكنش ينفع تستعملوها غير في سن معين. كيارا: طب إزاي بابا هو السبب إننا نتلعن؟ العجوزة: أبوكوا كان ملك مصاصي الدماء. كيارا وديلارا بصدمة: نعم؟ إزاي يعني؟ العجوزة: تعالوا معايا.

دخلوا أوضة غريبة مليانة صور ومنحوتات وكتب وبلورة سحرية. العجوزة: تعالوا قربوا من البلورة. كيارا وديلارا اتصدموا من للي شافوه ومش مستوعبين للي عينهم شايفة ده. فعلاً أبوهم وأمهم لكن لما كانوا شباب، ومعاهم الراجل للي نايم فوق.