رواية توأمي الفصل الثامن 8 - بقلم هيام

كيارا: بقولك إيه يا كركر. ديلارا: كيارا بقر. كيارا: كركر، إيه يا بيئة، أنا أختك الكبيرة المفروض تحترمني. ديلارا: الفرق بينا 3 دقايق ونص يا ماما. كيارا: قصدك 3 دقايق و 45 ثانية. ديلارا: كيارا، شامّة اللي أنا شامّاه؟ كيارا: شامّة ريحة دم. ديلارا عنيها احمرّت، وانيابها برزت. ديلارا: بشر. شكلها وجبة دسمة. كيارا بغضب، مسكت معصم ديلارا. كيارا: ديلارا، بابا قال مفيش شرب دم.

ديلارا زَقت كيارا على الأرض وهتتجنن وتشرب دم. هي مهما كان من مصيرها الدم. كيارا وقفت من على الأرض وحوّلت عينيها لـ حمرا، وانيابها برزت وضوافرها طلعت بطريقة مخيفة. كيارا بصوت جهوري: وأنا قولتلك مفيش شرب دم يا ديلارا. ديلارا الغضب كان مسيطر عليها وتعطشها للدم كان عاميها لدرجة لا توصف. اتحولت لخفاش واتبعت ريحة الدم. كيارا اتحولت وحاولت تلحقها. ديلارا وصلت لجنينة الشاليه لقت كيتي رجليها مجروحة وبتنزف.

ديلارا بتبلع ريقها ومصّت شفايفها لدرجة إنها خلاص مش قادرة تسيطر على غريزتها، ولسه هتنقض على كيتي وتغرّز أنيابها في رقبتها. كيارا: ديلارا فوقي، قولتلك لا. أنتي لو عملتي حاجة في كيتي، ماما عمرها ما هتسامحك، أنتي فاهمة؟ ديلارا مهمهاش كلام أختها ولسه هتقرب من كيتي. جه فاروق مسكها من رقبتها، رفعها لفوق، وكانت خلاص روحها هتطلع. سمر بصريخ: بنتي، سيب بنتي يا فاروق، سيبها.

فاروق بغضب: أنا مش نبهت يا ديلارا إن مفيش شرب دم. عايزة تبقي زي الحيوانات؟ ديلارا وشها أحمر ومبقتش قادرة تتنفس. ساره بدموع: نزّلها يا فاروق، بنتي هتموت. سيبها عشان خاطري. فاروق: نزّلها. كيارا وقعت على الأرض. سمر وساره وكيارا جريوا عشان يتطمنوا عليها. وفاروق سابها ودخل أوضته. ساره: حبيبتي، أنتي كويسة؟ ديلارا من غير ما تتكلم هزت راسها فوق وتحت بمعنى آه كويسة. سمر: طب، خدي يا حبيبتي، اشربي شوية مياه.

كيارا: ديلارا، أنتي كويسة دلوقتي؟ ديلارا: آه كويسة. ديلارا فاقت وهي حاسة بالذنب. هي لو كانت شربت من دم كيتي، كانت هترتكب جريمة أبوها عمره ما هيسامحها عليها، لأنها لو استسلمت لغريزتها وحبها للدم، ممكن متعرفش تسيطر عليها بعد كده وتوصل إنها تشرب دم البشر. في أوضة فاروق. الباب بيخبط. فاروق: ادخل. ديلارا: بابا أنا... فاروق: تعالي يا ديلارا. ديلارا: أنا آسفة، صدقني أنا مكنتش أقصد. فاروق: اقعدي يا ديلارا.

ديلارا قعدت جنب فاروق على السرير وهو بيملس على شعرها. فاروق: أنتي وكيارا اللي طلعتوا بيكوا من الدنيا، أنا مش عايز أخسر واحدة فيكوا. أنا عارف إنه كان غصب عنك، لكن أنتي معندكيش إرادة زي كيارا. أنتي لو استسلمتي للغريزة اللي جواكي، هتدمر البشرية يا ديلارا. إحنا بنحمي البشر يا بنتي مش بنحاربهم. أنتي وأختك جواكوا حاجات كتير مش اكتشفتوها. أنتوا لو مش استعملتوا قوتكم دي صح هتضيعوا، صدقيني. ديلارا: أنا آسفة، مش هتتكرر تاني.

كيارا بتمثيل، حطت إيديها على عينيها ورافعة الإيد التانية في الهوا. كيارا: لا، مش معقول، خيانة. لا، وفي أوضتي وعلى سريري. يالا الهول. تعالي يا ساره، تعالي شوفي جوزك بيخونك. فاروق بضحك: تعالي يا مجنونة. وبعدين دي أوضتي أنا مش أوضتك. كيارا هرشت في راسها: بجد؟ فاروق: تعالي يا كيارا، قربي. فاروق مسك إيد كيارا ومسك إيد ديلارا، وبقوا إيديهم في إيدين بعض. فاروق: أنا عايزكوا توعدوني إنكوا متتفرقوش أبداً. كيارا وديلارا بصوا

لبعض وقالوا في نفس واحد: نوعدك يا بابا. فاروق: طب انزلوا بقى لما أجهز عشان عادل وعيلته على وصول. ديلارا: بقولك إيه يا كركر، ما تيجي نلبس زي بعض. كيارا: مسكت المخدة حدفتها في وش ديلارا. ديلارا: شكراً يا كركر، كلك واجب. كيارا: بت، متقوليش كركر دي تاني. ديلارا: كركر، كراكير، مسك الكركور. كيارا طلعت تجري ورا ديلارا. كيارا: والله ما هسيبك. ديلارا استخبت ورا سمر وطلعت لسانها لـ كيارا. كيارا بغضب: تعالي هنا يا ديلارا.

ديلارا: تؤتؤ، مش جاية. كيارا: طفلة. ديلارا: طلعت لها لسانها. أنا عارفة إني طفلة مش عاجبك. كيارا: عدّلي لسانك اللي هقطعهولك ده. ديلارا اتحولت لـ ثعبان ولفّت حوالين كيارا. ديلارا: اللي عندك اعمليه يا قطة. كيارا مسكت ديلارا من رقبتها، وبقى لسانها طالع وبرقت بعنيها جامد وبتهز ديلها في الهوا. ديلارا: سيبيني يا مجنونة، هتموتيني. كيارا: اتأسفي الأول. ديلارا: يا بت، هلدغك في عينيك، أعميك. كيارا: شايفة يا ماما سمر قلة أدبها.

سمر: احترمي أختك يا ديلارا، عيب كده. ديلارا بنظرة ثعبان بريء: هو أنا عملت حاجة يا مامتشي؟ سمر: أنتي ملاك يا قلب أمك، مبتعمليش حاجة. ديلارا: شوفتي يا آنسة كيارا، حتى مامتشي بتقول عليا ملاك أهو. سيبيني بقى. ساره: خلاص يا كيارا، سيبيها، دي مش هتاخدي معاها حق ولا باطل. كيارا رمت ديلارا على الأرض. أول ما وقعت رجعت لشكلها الطبيعي. ديلارا ماسكة ضهرها وبتتوجع.

ديلارا: آه يا غضروفي، يا أنا، يا أمي، روحي يا كيارا يا بنت أم كيارا، يقعد لك في عيالك. كيارا: أنا مش متجوزة يا هبلة. ديلارا: طب وسّعي بقى كده لما أروح أغير هدومي. فاروق نازل من على السلم. فاروق: على فين يا شعنونة؟ ديلارا: إيه العيلة اللي مفيهاش حد بيحترمني دي، طالعة يا عم أغير هدومي. فاروق بصدق: عم. سمر بضحك: تعالي يا حبيبي، هو في حد بياخد لـ ديلارا على كلام؟

ديلارا طلعت لبست بنطلون أبيض وبلوزة سماوي وكوتش أبيض ورفعت شعرها ديل حصان. كانت قمر بنت اللذينة. حدفت لنفسها بوسة في الهوا ونزلت. ديلارا: كيارا، أنا لقيتك مخرجة نفس الطقم مرتين، أخدت منهم واحد. كيارا: إحنا مش اتفقنا نعمل ماتشنج مع بعض؟ ديلارا: خلصانة يا باشا، اطلعي البسي. فاروق رن. فاروق: الو، نعم يا أسطى عوض. فاروق: آه، افتح البوابة ودخلهم. فاروق: الضيوف وصلوا. خرج فاروق وساره عشان يستقبلوا الضيوف.

فاروق: أهلاً أهلاً عادل باشا، نورتني يا راجل. عادل: أهلاً بيك يا فاروق بيه. أحب أعرفك إن إنجي مراتي، والقائد أمير النجار مخابرات عامة أخو المدام وابن عمي طبعاً. فاروق: أهلاً أهلاً، شرفتوني. أمير: الشرف لينا يا فاروق بيه. سمر: اتفضلوا جوه. زين: مامي، مامي، أنتوا مش عرفتوهم؟ ديلارا من وراهم: إحنا عارفينك عز المعرفة يا أستاذ زين. زين: مش أنتي المزة اللي خرجتيني من البحر امبارح؟ إنجي: ولد عيب.

ديلارا قربت من زين: سيبيه يا مدام إنجي، لسه صغير. وبعدين أيوه يا سيدي، أنا المزة اللي خرجتك من البحر. زين: أنتي حلوة أوي. ديلارا: ميرسي، أنتي اللي عيونك حلوين. وبعدين إحنا هنقضيها كلام على الباب، تعالوا اتفضلوا. العائلتين اتجمعوا وسلموا على بعض وقعدوا يتكلموا ويهزروا. وأمير عينه منزلتش من على ديلارا. زين بيشد بنطلون ديلارا لتحت وهي بترفعها لفوق. زين: إيه يا ابني، عاجبك البنطلون؟ أقلعهولك؟

زين: لا، مش عايز البنطلون، بس أنتي إزاي منك اتنين؟ كيارا بضحك: لا يا أستاذ زين، إحنا توأم، يعني أنا كيارا وهي ديلارا. زين: بص أنا كده مش هعرفكم من بعض، انتوا شبه بعض ولابسين زي بعض. سمر: والله يا بنتي، ولا إحنا بنعرفهم من بعض. كيارا: أنا هقولك الفرق اللي بيني وبين ديلارا، وده اللي هتعرفنا منه. أنا هادية شوية، لكن ديلارا بتحب تتكلم وتزعق كتير وتعمل مقالب. زين: أوف! أنا كده اتلخبطت.

أمير: تعالي يا أستاذ زين، وأنا هقولك على فكرة تعرفهم من بعض. زين: إيه هي؟ أمير: تعالي معايا، عن إذنكم، هنخرج بره ونيجي. بعد مرور عشر دقايق. أمير: هااا، ياسيدي عجبتك الفكرة؟ زين: جميلة خالص. إنجي: كنتوا فين؟ زين: أنا وأمير جبنا اتنين بيج، واحد بحرف K كيارا، وواحد تاني بحرف D ديلايا، وبكده أنا سهل أعرفهم من بعض. زين أخد البروش من أمير، ووقف قدام كيارا وديلارا. زين: إنزلوا هنا، انتوا كبار أوي.

ديلارا بمشاغبة: لا يا أستاذ زين، إحنا مش كبار، أنتي اللي صغير. كيارا وديلارا نزلوا لمستوى زين، وزين شاور بصباعه: أنتي ديلايا. كيارا بضحك: لا، أنا مش ديلايا. ديلارا: بت، متتريقش على اسمي. كيارا: أنا متريقتش، زين اللي اتريق. كيارا: أنا كيارا يا زين، ودي ديلارا. زين علّق الحروف على بلوزات كيارا وديلارا. سمر: الله يجبر بخاطرك يا بني، أخيراً كده هنعرفهم من بعض.

ديلارا بتتكلم نفسها: اممم، عايزين تعرفونا من بعض عشان معرفش أعمل فيكوا مقالب تاني، بس سهلة جداً دي. كده احلوت أوي. فاروق: إيه رأيكوا نطلع نشوي على البحر؟ أمير: دي فكرة ممتازة جداً. العيلة كلها خرجت ع الشاطئ وجهزوا الشوايات واللحمة، والجو كان جميل، والوقت عدى ما بين هزار وضحك وشقاوة ديلارا وزين. إنجي قربت من كيارا وديلارا وبقوا أصحاب. واليوم عدى على الجميع بسلام، وكان في وعد بتكرار الزيارة من تاني.

الليل عدى على أبطالنا ما بين دقة قلب وحب جديد وفرح وراحة، واللي مكنش في باله حاجة. ويا ترى بكرة مخبي إيه لـ أبطالنا؟