رواية توم وجيري الفصل الثالث 3 - بقلم روان سالم

ـ آنسة آسية، شايفة نفسك فين كمان خمس سنين؟؟

ـ والله ما أعرف!

ـ أفندم؟

ـ ده علم غيب أنت عايزني أطلع على علم الغيب؟! لا إله إلا الله! زمن عجيب

قال بحمحمة وهو بيقول

ـ طب بلاش ده، في غيرك كتير أوي برا ومحتاجين نفس الشيء إللي أنتِ جاية عشانه، ايه إللي يخلينا ناخدك أنتِ يالذات

ـ هبلة وعلى نياتي

ـ نعم؟؟!

ـ اه والله آسر طول عمره يقولي كدا!

ـ آسر مين؟؟!

ـ آسر تؤامي! بس هو جه الأول بخمس دقايق، ومن ساعة ما ماما وبابا ماتوا وهو عاملي فيها الكبير بقا والكـ...

قال وهو بيقاطعها بصوت عالي

ـ بــــــــــــــــــــــس! أنا مالي؟!

قالت بصوت عالي زيه

ـ بتزعق ليــــه، ده عبد الرحمن معملهاش!

ـ عبد الرحمن ميـــــــــن؟؟!

ـ أبويا! ده كان أطيب أب ممكن تشوفه في حياتك بقا يا أستاذ والله، كان أب ولا كل البيبان

قال بصدمة وشلل

ـ بيبان؟؟؟؟؟!

هزت راسها وهي بتكمل كلامها

ـ كان بيدلعني ويخرجني.. كُـــل يوم لازم خروجة! وكان بيجبلي شيكولاتة! شيكولاتات كتيـــر بقا

بعد شوية...

كان حاطط ايده على دقنه وبيبصلها بتركيز

ـ لا والله؟ طب وبعدين؟

قالت وهي قاعدة ومربعة رجليها على الكرسي

ـ ولا قبلين يا سيدي! الولية الحيزبونة إللي إسمها سعاد دي كانت كل شوية تنطلي، كل شوية!

ـ شوف الولية!

ـ ما أنا بقولك حيزبونة يا عمرو

ـ إنتوا بتعملوا ايــــــــــــــــــه؟؟؟؟؟؟!

قام عمرو بسرعة وهو بيقول بحرج

ـ آسف يا فندم، أصلي كنت.... كنت

ـ لا كنت ولا مكنتش! أنت سايب الناس برا ومعطلهم وقاعد مع السنيورة؟!

قالت آسية ببسمة وهي بتلف حوالين نفسها

ـ بجد سنيورة؟!

بصلها بعدم فهم وبعدها بص على عمرو تاني وهو بيقول

ـ يعني موقف كل إللي برا عشان واحدة هبلة؟!

~ ~ ~ ~ ~ ~ ~ ~ ~ ~ ~ ~

دخلت من باب البيت بحزن، ثواني وسمعت صوت ضحكات عالية بتبص على الكنبة لقت آسر بيبص على ملامحها بضحك

ـ طردوكِ يا لوزة؟

فتح دراعه ليها فجريت عليه واترمت في حضنه

ـ مش مقدرين النعمة إللي في إيديهم يا آسر

طبطب على ضهرها وهو بيحاول يمنع ضحكاته

ـ ولا يهمك يا قلب آسر! أنا وفلوسي تحت أمرك يا حببتي ولا الحوجة لناس زي دول!

_ _ _ _ _ _ _ _ _ _ _ _