رواية تركت أثر الفصل الخامس عشر 15 - بقلم نهى الحفناوي

يااه يوم طويل أوى. رغم إننا تعبانين من السفر، بس تجهيزات فرح آيات ويوسف لازم تتم زي ماهي عاوزة وأكتر. آيات تستاهل كل خير. إحساس الفرحة حلوة أوى. عم محمود وشوق، ويوسف وآيات، كل الناس دي فرحانين عشان خدوا اللي بيحبوهم. يااه حاجة حلوة أوى إنك تكمل حياتك مع شخص أنت اختارته. شخص فاهم تفاصيلك، بيعمل أي حاجة عشان يشوفك مبسوط. مش هكذب، أنا كمان نفسي أقابل حد كدا. بس أنا مش بدي فرصة لحد. مش عاوزة يتعلق بيا ولا أتعلق بحد.

وفي الآخر أنا عارفة إيه اللي هيحصل، ماهو برضه محدش هيحب واحدة مريضة. آيات: إيه رأيك في الفستان؟ شكله حلو. أنا خايفة جدا جدااا. منة: اللي يشوف لسانك الطويل وإنت شبح ميشوكش دلوقتي وإنت شبه الكتكوت المبلول. أخلاق: بس يا منة بقى، خلاص سبيها. كفاية التوتر اللي هي فيه. بس والله قمر جدا اللهم بارك. دا يوسف واخد واحدة أحلى من كل البنات.

آيات: الله يفتح نفسك زي ما انت فاتحة نفسي كدا دايما. وأشوفك عروسة قمر كدا وأتعبلك يوم فرحك زي ما تعبتلي. سرحت في الكلام وعيني دمعت. هو أنا هبقى عروسة؟ يارب بس أقدر أعيش لحد أما أطمن عليكوا كلكوا. أنا مش عاوزة أكتر من كدا. منة: أخلاق أخلاق. منة بتهز أخلاق وأخلاق سرحانة ومش واخدة بالها. أخلاق: إيه يا منة؟ منة: أنا اللي مالي، إنت اللي سرحانة في إيه؟ أخلاق: مفيش يابنت، جهزي فستان شوق، وبدلة عمي. منة: فستان شوق برضه؟

اللي واخد عقلك يتهنى بيه. على العموم كل حاجة جاهزة. ووليد مع عم حسن راحوا دلوقتي عشان يجيبوا شوق. وعمر وأمين مع عمك محمود عشان يودوه للحلاق مع يوسف. وكل حاجة ماشية مظبوط. آيات: كدا مفضلش غير فستانك يا ست أخلاق. قعدنا نقولك روحي نقي واحد، كبرتي دماغك. أخلاق: يا ستي مش مشكلة. أنا كدا كدا مش بحب الفساتين. هلبس أي حاجة وخلاص. مريم جات وبتضحك ومعاها فستان. مريم: طبعًا يا ست خوخة نسيتي الفستان.

منة: بنت حلال يامريم. لسه بنقولها. إيه انت جايبة الفستان؟ ورينا كدا وجاية تعملي ميكاب عليه ولا إيه؟ مريم: لا طبعًا. الفستان ده عمله مينا مخصوص لأخلاق. وقال إن الفستان ده هيليق عليها. وهو قايل إن مش هيلاقي أغلى من أخلاق إنه يفصلها فستان. كفاية إنها دايما معانا وبتساعدنا وبتصالحنا لما بنتخانق. وقال إنه هيفصلها فستان الفرح وهيبقى هدية من أخواتك مينا ومريم لأحلى وأطيب أخلاق. منة قالت الكلام وهي عينها بتدمع وبعدين عيطت.

وأخلاق راحت خدتها في حضنها. ومنة وآيات بيعيطوا. آيات: إيه النكد ده بقى النهاردة؟ فرحي. عاوزة كله فرحان وبيضحك. وزوقيني ياماما أوام ياماما. دا يوسف هياخدني بالسلامة ياماما. الكل ابتسم وضحكوا. مريم: أنا همشي بقى عشان ألبس وألبس العيال. خلوا بالكوا من نفسكوا. عاوزة أشوف أحلى عرايس. وليد جه بالعربية عشان يوصل شوق للكوافير. وعمال يحاول يبص عشان يشوف أخلاق.

شوق: خلاص يا أستاذ وليد شكرًا. مش دا المكان اللي هما قالولك إنهم مستنيني فيه. وليد: آه هو. بيتكلم وهو مش مركز وبيحاول يشوف أي حد داخل أو خارج. شوق: طب متعرفش هما عاوزيني ليه؟ وليد: لا مش عارف. شوق: طب خلاص أنا هروح أشوفهم. وروح إنت بقى عشان تلحق تلبس ولا إنت مش جاي. وليد: لا لا طبعًا هاجي. مع السلامة. عم حسن: هتفضل كده تبص كتير ولا إيه؟ وليد: لا لا مفيش. يلا.

وليد بيسوق ومكسوف من اللي عم حسن قاله وعماله يقول يا ترى هو لاحظ إيه. عم حسن: قولها يا ولدي ريح جلبك. كفاك مناهدة فيه. أنا عارف إنك بتحبها ومتعلق بيها وعينك بتلمع لما بتشوفها. متكرنيش رجل كبير. جلتلك قبل كده إن أنا كنت حبيت. فبعرف اللي بيحبوا. كفاك تضيع في الوقت. قولها وارتاح. وليد: تقصد إيه يا عم حسن؟

عم: اطلع من الشوية دول يا ولدي. مهياش واقفة عشان تخبي عليها. أنا بكلمك زي ولدي. وهي زي بنتي وبحبها وشايف إنك مش هتلاقي حد زيها. وكنت بساعدك ومكنتش أحب عمر يجرب لها. لأن اللي شوفته في عينك ناحيتها بيقول إنك عشقها. وقولتلك هي بنتي وإني محب لها إلا الخير. وليد وقف العربية. وليد: وصلنا يا عم حسن. عم حسن: فكر في اللي قولتهولك يا ولدي. ومتهليش الزمن يضحك عليك علشان مترجعش تندم تاني.

شوق وصلت للمكان وطالعة وهي متوترة وخايفة ليكون حصل حاجة. شوق: فيه إيه يابنات؟ عاوزيني ليه؟ أخلاق: إيه رأيك في الفستان الأبيض ده؟ شوق: حلو جدًا. بس دا بتاع مين؟ آيات لابسة بتاعها أهي. ولا هي ناوية تغيره؟ آيات: *بتاكل وبوقها مليان أكل وفي ماسك على وشها والخيار على عينها* لا لا يا شوشو. أنا مصدقت رسيت على فستان. شوق: أومال ده لمين؟ أخلاق: ادخلي البسيه بس. شوق: أنا؟ أخلاق: آه إنت. شوق: هلبس فستان بعد السن ده كله؟

أخلاق: آه. وبعدين إنت لسه زي القمر. ولا عاوزة حد يدور على واحدة غيرك. ويلا بقى عشان زمانهم جايين منتأخرش. الكل لبس وخلص ومستني يوسف عشان يجي ياخد آيات. وشوق كمان خلصت. أخلاق خلصت آخر واحدة وطالعة من جوا وهي لابسة الفستان وباصة في الأرض. والفستان كان عاملها زي الأميرات وكانت زي القمر. الكل في نفس واحد: إيه الحلاوة دي!

آيات: أنا أول مرة أشوف واحدة أحلى من العروسة. إيه القمر ده اللهم بارك. دا الواد مينا موحد القطرين طلع بيعرف يفصل أهو. كنت فاكرة مبيعرفش يعمل حاجة غير إنه يتهانق مع مريم. منة: دا عود البطل طلع ملفوف أهو. وبنتنا أحلى من كل البنات. شوق: بجد ربنا يحميكي يابنتي. الفستان جميل عليكي خالص. الزفة وصلت. شوق: إيه الحلاوة دي يا محمود. محمود فرحان وعمال يشاور لها إنها كمان حلوة. وخدها ونزلوا العربية. يوسف: أومال فين العروسة؟

ولا هنسبق وبعدين نحصل؟ منة: ما إنت عارفها. إنت فاكر نفسك بالساهل كده هتجي معاك؟ تعالى ورايا. منة داخلة هي ويوسف وآيات مديالهم ضهرها وعمالة تلف وهو مش عارف يشوفها. يوسف: متخلصي يا ولية. هتقعدي تلفي؟ دا مفضلش غير إنك تجري وأنا أجري وراكي. المعازيم هيزهقوا. آيات: ولو ولو. لازم أعمل زي البنات. يوسف: طب تكلميني راجل لراجل وتديني وشك كده بدل ما إنت مديلني قفاكي كده. آيات: راجل إيه بس؟ في حد عاقل يقول لعروسه كده؟

أنا شكلي اتسرعت. فين يابني فين الرومانسية؟ يوسف: هو أنا عارف أشوفك؟ آيات لفت بعد ما طلعت عينه. يوسف: اللهم صلي على النبي. إيه القمر ده. بس إنت مين؟ أنا عاوز آيات. يا آيااات. إنت فين؟ في واحدة حلوة عاوزة تخطفني منك. بس متخافيش ياحبيبتي مستحيل أضعف. إنت فين بقى؟ آيات: إنت هتستعبط؟ يوسف: هو إنت بلعتيها ولا إيه؟ هو دا الصوت؟ بس مش إنت آيات. لا. إيه يا أخلاق؟ إنتوا بتهزروا؟ فين آيات؟

آيات: متهزرش أحسن. بص أقسم أبوظ الفستان وكل ده وأوريك آيات بقى. يوسف: مجنونة وتعمليها. بهزر. مانت على طول حارقة دمي. فيها إيه لما أحرق دمك شوية. آيات: طب هاتي. يوسف: أجيب إيه؟ آيات: الورد. ولا هو عجبك؟ يوسف: آه. اتفضلي. بس قمر مفيش كلام. آيات: ما إنت بتعرف تقول كلام حلو أهو. مش الباكبورت اللي قولته. يوسف: بقى فيه عروسة قمر كده تقول باكبورت؟ اخلصي يلا الناس مستنيانا تحت عشان نروع القاعة.

الكل نزل. وآيات ويوسف ركبوا العربية مع عمر. وأخلاق نازلة آخر واحدة عمالة تتكلم مع منة وبتلعب مع زين ابن منة وتضحك. ووليد شافها من بعيد ابتسم وحط إيده على شعره وكان شايفها حلوة جدًا. يوسف: أنا هركب أنا ومراتي لوحدنا مع عمر. وإنتوا اركبوا مع وليد. وكدا كدا أمين وعم حسن خدوا عم محمود وشوق. ويلا عشان منتأخرش. منة: تمام. مش ياعم يوسف. براحة شوية. الحب ولع في الدرة.

منة وأخلاق وزين ركبوا العربية مع وليد. ووليد عمال يبص من المراية على أخلاق. وسرحان وقعد يقول: طب لو أنا مبحبهاش ليه بغير لما حد غيري يكلمها؟ وليه ببصلها دايما وبفرح لما بتبقى معايا في أي مكان وعاوز أفضل معاها دايما. ولما بشوفها مش بعرف أخبي عيني ودايما ببصلها. تقريبًا كده عم حسن عنده حق. أنا لازم أقولها كل حاجة. وليد: وصلنا. اتفضلوا. منة: شكرًا يا أستاذ وليد. أخلاق: مفيش تعب ولا حاجة.

منة دخلت القاعة عشان زين عمال بيعيط. ووليد وأخلاق داخلين مع بعض. وليد: على فكرة الفستان حلو. أول مرة أشوفك لابسة فستان. كنت عاوز أقولك. أمين جه قطع كلامه. ووليد أول ما شافه اضايق. أمين: أنا بنت عمي قمر كده. لا إيه ده؟ كنت مخبية الحلاوة دي فين؟ تعالي أمي جوه وعمك عاوزين يسلموا عليكي. أخلاق: إيه يا بشمهندس؟ إنت هتأكلني بالكلام ولا إيه؟ فين عمي؟ يلا تعالى وريني عمي ومرات عمي فين. أمين: بعد إذنك يا وليد.

وليد متضايق وبيكز على أسنانه. وليد: اتفضل. أخلاق دخلت القاعة وسلمت على عمها. مرات عمها: إيه الحلاوة دي يا أخلاق. قمر. عاوزين نفرح بيكي بقى ولا إيه يا أمين؟ أخلاق ضحكت. أخلاق: بعد إذنكوا هشوف منة. راحت عشان تشوف منة ولقيتها واقفة لوحدها مع زين. أخلاق: بخ! بتعملي إيه؟ منة: يا أخلاق خضتيني. في إيه؟ أخلاق: على فكرة أنا عزمت الأستاذ سليمان المحامي. منة: بجد؟ طب وأنا مالي؟ وهيجي؟ أخلاق: عاوزة تعرفي ليه؟

منة: عادي. هو إنسان محترم وكويس. أخلاق: يعني نقول مبروك؟ منة: إنت هبلة؟ هو يرضى بيا؟ وإنت عارفة إن معايا زين ومستحيل أسيبه. ودا واحد لسه في أول عمره. أكيد عاوز واحدة يبدأ معاها. أخلاق: هو كلمني بحجة إنه عاوز يحجز في المحل. وكان بييجي كتير وإنت بتودي ابنك الحضانه. بس أنا مكنتش بقولك لحد أما اتأكد من شوية حاجات. منة: كملي يا أخلاق. إيه اللي حصل؟ أخلاق: بصي وراكي كدا. بصت لقيت سليمان وراها. معاه

دبلة وأهله معاه وبيقولها: سليمان: أنا اتفقت مع الآنسة أخلاق على كل حاجة. وهي فهمتني كل حاجة وحكتلي كل حاجة عنك. وكلمت أهلك. بس أنا كنت خايف من ردة فعلك. بس لما أخلاق رنت عليا دلوقتي سمعت إنك كمان موافقة بيا. لأني سمعت المكالمة. أنا آسف. بس أنا كنت عاوز أعرف إنت موافقة بيا ولا لا. والآنسة أخلاق ساعدتني كتير. ربنا يخليكوا لبعض. لأنها فعلًا بتحبكم. منة: كده يا أخلاق.

سليمان بيلبسها الدبلة. وفجأة الكاميرا جت عشان تصورهم. والناس التفوا حواليهم. وآيات ويوسف جم. آيات: أيوه بقى! أنا وإنت كده في يوم؟ مش كنت تقول من بدري يا أستاذ سليمان؟ قصدي سليمان. كنا خليناها فرح. الكل ضحك. سليمان: حصل خير. منة: شكرًا يا أخلاق. أخلاق: إنت عبيطة؟ شكرًا على إيه؟ إحنا أخوات. ربنا يسعدك دايما. منة: عقبالك يا خوخة. أخلاق: إن شاء الله. أخلاق مشيت كدا وشافت مدثر. أخلاق: إيه يا عم مدثر؟ واقف كده؟

يعني مش بتعمل حاجة؟ مدثر: نفسي بقى يبقى فرحك عشان أخربها. أيوه يابقى دا إحنا هنولعوها وهنعزموا إسكندرية كلها من شرقها لغربها. بس ييجي بس. أخلاق: مفضلش إلا إنت. كان نفسي أطمن عليك إنت كمان. مدثر: في إيه يا أخلاق؟ أنا مش فاهم حاجة. تقصدي إيه؟ هو إنت مسافرة؟ أخلاق: بس لما أسافر هنتقابل أكيد. مدثر: هاجي معاكي. أخلاق: يعد الشر. أقصد دلوقتي يعني مينفعش تسافر. لازم تخلص الأول كليتك وتحقق حلمنا. وكدا.

مدثر: متقلقيش. أنا أصلًا خلصت الكتب ورجعت كتير وبحل دلوقتي. متقلقيش. وإن شاء الله هرفع راسك وأدخل طب زي ما إحنا اتفقنا. أخلاق: لازم تدخل الامتحانات. واوعى في يوم حاجة توقفك عن حلمك. وافتكر دايما إننا موجودين ولازم نسيب أثر حلو. واوعى في يوم تكون سبب في إنك تجرح حد. مدثر: مالك يا ست خوخة؟ كده قالبة على جدتي وإنت بتكلمي في إيه؟ أخلاق: مفيش. ويلا روح سلم على عمك واقعد جنبه كده. متوقفش.

مدثر مشي. وأخلاق طلعت وقفت برة في الجنينة. ووليد شافها وطلع وراها. وليد: عاوزة أقولك حاجة يا أخلاق. هي الصراحة مش حاجة واحدة. هي حاجات. بس عاوزك الأول توعديني إنك تسامحيني. أخلاق: في إيه يا وليد؟ أول مرة أشوفك بتتكلم كده. عاوز تقول إيه؟

وليد: أنا مش عارف أبدأ ازاي. بس اللي عاوز أقولهولك. إن وجودي كان هنا عشان أخليكي تحبيني وعمر يبقى صاحبي. وكل ده اتفاق مع أبويا إبراهيم بيه. عشان يخليني أتنازل عن المحل مقابل إنه يديني فلوس ويخليني أسافر برة. بس. أمين جه قطعهم.